၂ ကွဲးနီၣ်တၢ် ၅:၁-၁၄
၅ စီၤၡလိၤမိၤ မၤဝဲ တၢ်လၢအဘၣ်မၤဝဲလၢ ယဟိဝၤယွၤ အဟံၣ်အဂီၢ်န့ၣ် ဝံၤဝဲခဲလၢာ်လီၤ.+ ဝံၤဒီးစီၤၡလိၤမိၤ ဟဲစိာ်ဝဲ တၢ်လၢအပၢ်စီၤဒၤဝံး ပာ်စီဆှံပာ်စၢၤဝဲတဖၣ်+ ဒီးအဝဲထၢနုာ်ဝဲ စ့ညၣ်, ထူ ဒီးတၢ်ပီးတၢ်လီခဲလၢာ် လၢတၢ်လုၢ်ဒိၣ်ပှ့ၤဒိၣ်အလီၢ် လၢယွၤလၢအမ့ၢ်အတီတဂၤ အဟံၣ်ပူၤလီၤ.+
၂ ဖဲန့ၣ်အခါ စီၤၡလိၤမိၤ ကိးဖှိၣ် အံၣ်စရ့လး အပှၤသူၣ်က့သးပှၢ်တဖၣ်, အံၣ်စရ့လးအဒူၣ်တဖၣ် အခိၣ် ဒီးအံၣ်စရ့လး အဒူၣ်ဖိထၢဖိတဖၣ် အခိၣ်အနၢ်ခဲလၢာ်လီၤ. အဝဲသ့ၣ်လဲၤလၢ ဝ့ၢ်ယရူၤၡလ့ၣ် ဒ်သိးကလဲၤဆှၢထီၣ် ယဟိဝၤယွၤ အတၢ်အၢၣ်လီၤအီလီၤ အတလါ လၢအအိၣ်လၢ စီၤဒၤဝံးအဝ့ၢ်+ လၢအမ့ၢ် စံယိၣ်န့ၣ်လီၤ.+
၃ ဖဲလါနွံလါတလါ, ဖဲဘူၣ်* ဘၣ်ဝဲအဆၢကတီၢ်န့ၣ် ပှၤအံၣ်စရ့လးဖိခဲလၢာ် ပာ်ဖှိၣ်ထီၣ်အသးလၢ စီၤပၤအမဲာ်ညါလီၤ.+
၄ ဒီးအံၣ်စရ့လး အပှၤသူၣ်က့သးပှၢ်ခဲလၢာ် လဲၤတုၤဝဲ ဒီးပှၤလ့ၤဝံဖိတဖၣ် ယိးထီၣ်ဝဲ တလါစီဆှံလီၤ.+
၅ အဝဲသ့ၣ်လဲၤဆှၢဝဲ တလါစီဆှံ, တၢ်အိၣ်ဖှိၣ်အဒဲ+ ဒီးတၢ်ပီးတၢ်လီစီဆှံခဲလၢာ် လၢအအိၣ်လၢ ဒဲအပူၤန့ၣ်လီၤ. ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် လဲၤဆှၢဝဲ တၢ်သ့ၣ်တဖၣ်အံၤလီၤ.
၆ စီၤပၤၡလိၤမိၤ ဒီးပှၤအံၣ်စရ့လးဖိခဲလၢာ် လၢစီၤၡလိၤမိၤ ကိးဖှိၣ်ဝဲန့ၣ် အိၣ်ဝဲလၢ တလါစီဆှံအမဲာ်ညါလီၤ. ဒီးပှၤလုၢ်ထီၣ်သိ ဒီးကျီၢ်ဒီဒူၣ်+ တုၤဒၣ်လဲာ် ပှၤဂံၢ်အနီၣ်ဂံၢ် တဘၣ်လၢၤဘၣ်.
၇ ဒီးပှၤလုၢ်တၢ်ဒိၣ်တဖၣ် လဲၤယိးနုာ်ဝဲ ယဟိဝၤယွၤ အတၢ်အၢၣ်လီၤအီလီၤ အတလါလၢ ဒၢးလၢ အလီၢ်ခံတဖျၢၣ်အပူၤ လၢအမ့ၢ် တၢ်လီၢ်စီဆှံကတၢၢ်လီၤ. ဒီးအဝဲသ့ၣ် ပာ်လီၤဝဲ လၢအလီၢ် ဖဲခ့ရူာ်အဒံးဆ့တဖၣ် အဖီလာ်လီၤ.+
၈ ဒီးခ့ရူာ် အဒံးဆ့တဖၣ်န့ၣ် ယူာ်ထီၣ်အသးလၢ တလါစီဆှံ အိၣ်ဝဲအလီၢ်အဃိ အိၣ်ဘၢဝဲ တလါစီဆှံ ဒီးအနီၣ်ယိးဘိတဖၣ်လီၤ.+
၉ ဒီးနီၣ်ယိးဘိတဖၣ်န့ၣ် ထီဒိၣ်မးအဃိ နီၣ်ယိးဘိ အစိးနါတဖၣ် အိၣ်ဖျါဝဲလၢ တၢ်လီၢ်စီဆှံ လၢအအိၣ်ဝဲလၢ ဒၢးလၢအလီၢ်ခံတဖျၢၣ်န့ၣ် အမဲာ်ညါလီၤ. ဘၣ်ဆၣ် အတဖျါထီၣ် တုၤလၢတၢ်ချၢဘၣ်. ဒီးအအိၣ်ဝဲဖဲန့ၣ် တုၤလၢ မုၢ်မဆါတနံၤအံၤလီၤ.
၁၀ လၢတလါစီဆှံအပူၤန့ၣ် အိၣ်ဝဲထဲ လၢၢ်ဘ့ၣ်ဘၣ် ခံဘ့ၣ်လီၤ. စီၤမိၤၡ့ပာ်လီၤဝဲ လၢၢ်ဘ့ၣ်ဘၣ် ခံဘ့ၣ်အံၤ လၢတလါစီဆှံအပူၤ ဖဲပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးအပူၤ+ ဖဲယဟိဝၤယွၤ မၤတၢ်အၢၣ်လီၤအီလီၤဒီး+ အဝဲသ့ၣ်လၢ ဃိၤရ့းအခါန့ၣ်လီၤ.+
၁၁ ဖဲပှၤလုၢ်တၢ်ဒိၣ်တဖၣ် ဟးထီၣ်လၢ တၢ်လီၢ်စီဆှံအပူၤအခါ (ပှၤလုၢ်တၢ်ဒိၣ်တဖၣ်လၢ အအိၣ်ဖဲန့ၣ်ခဲလၢာ် အကရူၢ်မ့ၢ်အိၣ်ဒ်လဲၣ်+ သနာ်က့ အဝဲသ့ၣ် ပာ်စီဆှံအသးဝံၤလံ)+
၁၂ ပှၤလ့ၤဝံဖိ လၢအမ့ၢ် ပှၤသးဝံၣ်တၢ်ဖိတဖၣ်လၢ+ စီၤအၤစာ်,+ စီၤဟ့မၣ်,+ စီၤယဒူသူၣ်+ ဒီးအဝဲသ့ၣ် အဖိခွါ ဒီးအဒီပုၢ်ဝဲၢ်ခွါတဖၣ် တီခိၣ်ရိၤမဲဝဲ ကိးဂၤဒဲးန့ၣ် ကၤဝဲတၢ်ကူတၢ်ကၤလၢ အညၣ်ဂ့ၤလီၤ. ဒီးအဝဲသ့ၣ် အိၣ်ဒီးစှၢၣ်စှံး, သီတူၢ် ဒီးတနၢ်တဖၣ်လီၤ. အဝဲသ့ၣ် ဆၢထၢၣ်ဝဲလၢ တၢ်လုၢ်လီၢ်အကပၤ လၢမုၢ်ထီၣ်တခီ ဒီးပှၤလုၢ်တၢ်ဒိၣ်အဂၤ ၁၂၀ အိၣ်ဒီးအဝဲသ့ၣ် ဒီးအူထီၣ်ကွဲၤလီၤ.+
၁၃ ဖဲပှၤအူကွဲၤဖိတဖၣ် ဒီးပှၤသးဝံၣ်တၢ်ဖိတဖၣ် စံးထီၣ်ပတြၢၤဒီး စံးဘျုးစံးဖှိၣ် ယဟိဝၤယွၤ ဃူဃူ ဒီးဖဲကွဲၤတဖၣ်, စှၢၣ်စှံးတဖၣ် ဒီးတၢ်ဒ့တၢ်အူ အပီးအလီအဂၤတဖၣ် သီၣ်ထီၣ်အခါ အဝဲသ့ၣ် စံးထီၣ်ပတြၢၤ ယဟိဝၤယွၤလၢ “ကစၢ်ယွၤ မ့ၢ်ပှၤအဂ့ၤ ဒီးအတၢ်အဲၣ်လၢအတီ အိၣ်ဂၢၢ်ဆိးကျၢၤ လီၤထူလီၤယိာ်” လီၤ.+ ဒီးဖဲန့ၣ်အဆၢကတီၢ် ယဟိဝၤယွၤ အဟံၣ်န့ၣ် ပှဲၤဝဲဒီး တၢ်အၢၣ်လီၤ.+
၁၄ ဒီးမ့ၢ်လၢ ယဟိဝၤယွၤ အဟံၣ်န့ၣ် ပှဲၤဝဲဒီး ယွၤလၢအမ့ၢ်အတီတဂၤ အလၤကပီၤ ဒီးလၢတၢ်အၢၣ်အဃိ ပှၤလုၢ်တၢ်ဒိၣ်တဖၣ် ဆၢထၢၣ်မၤတၢ်အခ့အပှၤ အတၢ်မၤတသ့လၢၤဘၣ်.+
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ ဘူၣ်ဒဲ.
