၂ ကွဲးနီၣ်တၢ် ၇:၁-၂၂
၇ ဖဲစီၤၡလိၤမိၤ ဃ့ဘါထုကဖၣ်တၢ် ဝံၤအခါ+ မ့ၣ်အူလၢမူခိၣ်န့ၣ် ဟဲလီၤအီၣ်ကွံာ်ဝဲ+ တၢ်လုၢ်ဒွဲၣ်အူ ဒီးတၢ်လုၢ်တၢ်ပာ်တဖၣ်လီၤ. ဒီးဟံၣ်န့ၣ် ပှဲၤဝဲဒီးယဟိဝၤယွၤ အလၤကပီၤလီၤ.+
၂ ဒီးမ့ၢ်လၢ ယဟိဝၤယွၤ အဟံၣ်န့ၣ် ပှဲၤဝဲဒီး ယဟိဝၤယွၤ အလၤကပီၤ အဃိ ပှၤလုၢ်တၢ်ဒိၣ်တဖၣ် လဲၤနုာ်လီၤလၢ ယဟိဝၤယွၤ အဟံၣ်ပူၤတသ့ဘၣ်.+
၃ ဖဲမ့ၣ်အူဟဲလီၤဝဲ ဒီးယဟိဝၤယွၤအလၤကပီၤ အိၣ်ဝဲလၢ ဟံၣ်ဖီခိၣ်အခါ ပှၤအံၣ်စရ့လးဖိခဲလၢာ် ကွၢ်ဝဲလီၤ. ဒီးအဝဲသ့ၣ် ထိၣ်လီၤပှီၤအသး ဒီးကျးလီၤအမဲာ်လၢ လၢၢ်ဒါခိၣ် ဒီးစံးဘျုးယဟိဝၤယွၤ မ့ၢ်လၢ “ကစၢ်ယွၤမ့ၢ်ပှၤအဂ့ၤ ဒီးအတၢ်အဲၣ်လၢအတီ အိၣ်ဂၢၢ်ဆိးကျၢၤ လီၤထူလီၤယိာ်အဃိလီၤ.”
၄ ဒီးစီၤပၤ ဒီးပှၤဂီၢ်မုၢ်ခဲလၢာ် လုၢ်ထီၣ်ဝဲ တၢ်လုၢ်တၢ်ပာ်တဖၣ် လၢယဟိဝၤယွၤ အအိၣ်လီၤ.+
၅ စီၤပၤၡလိၤမိၤ လုၢ်ထီၣ်ဝဲ ကျီၢ်အဒု ၂၂,၀၀၀ ဒီးသိအဒု ၁၂၀,၀၀၀ လီၤ. အဃိ စီၤပၤ ဒီးပှၤဂီၢ်မုၢ် ခဲလၢာ် မၤဝဲမူးခီဖျိလၢ ယွၤလၢအမ့ၢ်အတီတဂၤ အဟံၣ်ဝံၤဝဲ အဃိလီၤ.+
၆ ပှၤလုၢ်တၢ်ဒိၣ်တဖၣ် ဆၢထၢၣ်ဝဲ ဖဲအမူဒါလီၤဝဲအလီၢ် ဒီးပှၤလ့ၤဝံဖိတဖၣ်စ့ၢ်ကီး ဆၢထၢၣ်အိၣ်ဒီး တၢ်ဒ့တၢ်အူ အတၢ်ပီးတၢ်လီတဖၣ်လၢ တၢ်သးဝံၣ်စံးထီၣ်ပတြၢၤ ယဟိဝၤယွၤအဂီၢ်လီၤ.+ (လၢညါန့ၣ် စီၤပၤဒၤဝံး တ့ထီၣ် တၢ်ပီးတၢ်လီတဖၣ်အံၤလၢ တၢ်စံးဘျုး ယဟိဝၤယွၤ အဂီၢ်လီၤ. ဖဲစီၤဒၤဝံး စံးထီၣ်ပတြၢၤယွၤ ခီဖျိလၢ တၢ်သ့ၣ်တဖၣ်န့ၣ်* အခါ အဝဲသ့ၣ် တဲထီၣ်ဝဲလၢ “ယွၤ အတၢ်အဲၣ်လၢအတီ အိၣ်ဂၢၢ်ဆိးကျၢၤ လီၤထူလီၤယိာ်လီၤ.”) ဒီးဖဲပှၤအံၣ်စရ့လးဖိခဲလၢာ် ဆၢထၢၣ်ဝဲအခါ ပှၤလုၢ်တၢ်ဒိၣ်တဖၣ် အူထီၣ်ကွဲၤလၢ ပှၤလ့ၤဝံဖိတဖၣ် အမဲာ်ညါ ဒိၣ်ဒိၣ်လီၤ.+
၇ တၢ်လုၢ်လီၢ်တိၢ်ဘီလၢ+ စီၤၡလိၤမိၤ တ့ပာ်စၢၤဝဲန့ၣ် ဆံးတလၢအဃိ ပှၤလုၢ်ထီၣ် တၢ်လုၢ်ဒွဲၣ်အူ, တၢ်လုၢ်ဘု+ ဒီးတၢ်အသိ အကူာ်အခီတဖၣ်+ တတြီၢ်ဘၣ်. အဃိ စီၤၡလိၤမိၤ ပာ်စီဆှံဝဲ တၢ်ပျီအခၢၣ်သး လၢအအိၣ်လၢ ယဟိဝၤယွၤ အဟံၣ်အမဲာ်ညါ, မ့ၢ်လၢ အဘၣ်လုၢ်ထီၣ်ဝဲ တၢ်လုၢ်ဒွဲၣ်အူတဖၣ်+ ဒီးတၢ်အသိ အကူာ်အခီတဖၣ်လၢ တၢ်လုၢ်အိၣ်ဃူအိၣ်ဖိးတဖၣ် အဂီၢ် ဖဲန့ၣ်အဃိလီၤ.
၈ ဒီးဖဲန့ၣ်အခါ စီၤၡလိၤမိၤ ဒီးပှၤအံၣ်စရ့လးဖိခဲလၢာ် လၢအဟဲလၢ လံၤဘိၤဃမါသး တုၤလၢ အဲၤကူပတူး အတၢ်တြီၤန့ၣ်+ မၤဝဲဘူၣ် နွံသီလီၤ.+
၉ အဝဲသ့ၣ် မၤပာ်စၢၤဝဲမူးနွံသီ ခီဖျိလၢ တၢ်လုၢ်လီၢ်ဝံၤဝဲအဃိ ဒီးမၤစ့ၢ်ကီးဝဲဘူၣ်* နွံသီလီၤ. ဒီးဖဲဃိးသီတသီန့ၣ် အဝဲသ့ၣ် မၤဝဲတၢ်အိၣ်ဖှိၣ်လီၤဆီ တခါလီၤ.+
၁၀ ဒီးဖဲလါနွံလါတလါ, လါထီၣ် ၂၃ သီတသီန့ၣ် စီၤၡလိၤမိၤ ပျဲက့ၤ ပှၤဂီၢ်မုၢ်ခဲလၢာ် ဆူအဝဲသ့ၣ်အဟံၣ် လၢတၢ်သူၣ်ဖှံသးညီအပူၤ+ ဒီးတၢ်သူၣ်မုာ်သးမုာ်အပူၤ ခီဖျိလၢ တၢ်အဂ့ၤ ခဲလၢာ်လၢ ယဟိဝၤယွၤ ပာ်ဖျါထီၣ်လၢ စီၤဒၤဝံး, စီၤၡလိၤမိၤ ဒီးအပှၤဂီၢ်မုၢ်အံၣ်စရ့လး အဖီခိၣ်အဃိလီၤ.+
၁၁ အဃိ စီၤၡလိၤမိၤ တ့ထီၣ် ယဟိဝၤယွၤ အဟံၣ် ဒီးစီၤပၤအဟံၣ်+ ဝံၤဝဲလီၤ. ဒီးတၢ်ခဲလၢာ်လၢ အဟဲပၢၢ်ထီၣ်လၢ စီၤၡလိၤမိၤအသးပူၤ လၢအဘၣ်ဃးဒီး ယဟိဝၤယွၤ အဟံၣ် ဒီးအနီၢ်ကစၢ်အဟံၣ်န့ၣ် အမၤဝဲ ဝံၤခဲလၢာ်လီၤ.+
၁၂ လၢခံ ယဟိဝၤယွၤ လီၣ်ဖျါထီၣ်အသးလၢ စီၤၡလိၤမိၤအအိၣ်+ လၢမုၢ်နၤခီ ဒီးတဲအီၤလၢ “ယနၢ်ဟူ နတၢ်ထုကဖၣ် ဒီးယဃုထၢထီၣ် တၢ်လီၢ်တတီၤအံၤလၢ ယနီၢ်ကစၢ်အဂီၢ် ဒ်တၢ်လုၢ်တၢ်ပာ် အဟံၣ်အသိးလံ.+
၁၃ ဖဲယကးတံာ်ဃာ် မူခိၣ်ဒီး တၢ်တစူၤလၢၤဘၣ်အခါ, ဖဲယမၢလီၤဒွဲၣ်ဃၤကာ်တဖၣ်လၢ ကလဲၤမၤဟးဂီၤထံကီၢ် ဒီးယမ့ၢ်ဒုးလီၤဘၣ် တၢ်ဆါသံသတြိာ်လၢ ယပှၤဂီၢ်မုၢ်အကျါအခါ
၁၄ ယပှၤဂီၢ်မုၢ်လၢ တၢ်ကိးအီၤလၢ ယမံၤန့ၣ်+ မ့ၢ်ဆီၣ်လီၤအသး,+ ဃ့ထုကဖၣ်, ဃုယၤ ဒီးမ့ၢ်တမၤ တၢ်အၢတၢ်သီလၢၤဘၣ်န့ၣ်+ ယကဒိကနၣ်လၢမူခိၣ်, ပျၢ်အဝဲသ့ၣ်အတၢ်ဒဲးဘး ဒီးမၤဂ့ၤထီၣ်က့ၤအဝဲသ့ၣ် အထံကီၢ်လီၤ.+
၁၅ ဒီးယကကွၢ်လီၤ ဒီးယကဒိကနၣ် တၢ်ထုကဖၣ်လၢ ပှၤဃ့ထီၣ်အီၤလၢ ယအိၣ် လၢတၢ်လီၢ်တတီၤအံၤလီၤ.+
၁၆ ခဲအံၤ ယဃုထၢထီၣ် ဒီးပာ်စီဆှံ ဟံၣ်တဖျၢၣ်အံၤ ဒ်သိး ယမံၤကအိၣ်ဝဲဖဲအံၤ ထီဘိ+ ဒီးယမဲာ်ချံ ဒီးယသးကအိၣ်ဝဲ စ့ၢ်ကီးဖဲန့ၣ် ထီဘိလီၤ.+
၁၇ “ဒီးနၤစ့ၢ်ကီး နမ့ၢ်လဲၤတၢ်လၢ ယမဲာ်ညါ ဒ်နပၢ် စီၤဒၤဝံး မၤဝဲအသိး ခီဖျိလၢ နမၤတၢ်လၢ ယမၤလိာ်နၤ ကိးမံၤဒဲး ဒီးနမ့ၢ်ဒိကနၣ် ယတၢ်ဘျၢ ဒီးယတၢ်သိၣ်တၢ်သီတဖၣ်န့ၣ်+
၁၈ ယကဒုးအိၣ်ဂၢၢ်ဆိးကျၢၤ နဘီနမုၢ်အလီၢ်ပစိာ်+ ဒ်ယအၢၣ်လီၤပာ်စၢၤ နပၢ်စီၤဒၤဝံးလၢ+ ‘နစၢၤနသွဲၣ်တဂၤ ကပၢဘၣ် ပှၤအံၣ်စရ့လးဖိ ထီဘိ’+ အသိးလီၤ.
၁၉ ဘၣ်ဆၣ် သုမ့ၢ်ဃၣ်ကွံာ်သုသး ဒီးသုမ့ၢ်တမၤထွဲ ယတၢ်ဘျၢတဖၣ် ဒီးယတၢ်မၤလိာ်တဖၣ်လၢ ယပာ်လီၤလၢ သုမဲာ်ညါလၢၤဘၣ် ဒီးသုမ့ၢ်လဲၤဘါယွၤလၢ အဂၤတဖၣ် ဒီးမၤအဝဲသ့ၣ်အတၢ်န့ၣ်+
၂၀ ယကထဲးထီၣ်ကွံာ် ပှၤအံၣ်စရ့လးဖိ လၢယထံကီၢ်လၢ ယဟ့ၣ်လီၤ အဝဲသ့ၣ် အပူၤန့ၣ်လီၤ.+ ဒီးတၢ်လုၢ်ဟံၣ် လၢယပာ်စီဆှံအီၤ လၢယမံၤအဂီၢ်န့ၣ် ယကပာ်တ့ၢ်ကွံာ်အီၤလီၤ. ဒီးပှၤခဲလၢာ် ကဆိကမိၣ်ဆံးအီၤ ဒီးတဲဆါအီၤလီၤ.+
၂၁ ဒီးတၢ်လုၢ်ဟံၣ်တဖျၢၣ်အံၤ ကကဲထီၣ် တၢ်ဟးဂီၤအပူၣ်တဖၣ်လီၤ. ပှၤလၢအလဲၤဘၣ်ကျဲဖဲန့ၣ် ကိးဂၤဒဲးန့ၣ် ကကွၢ်ထံဝဲလၢ တၢ်လီၤကမၢကမၣ်အပူၤ+ ဒီးကတဲဝဲလၢ ‘ဘၣ်မနုၤအဃိ ယဟိဝၤယွၤမၤဝဲ ကီၢ်တဘ့ၣ်အံၤ ဒီးတၢ်လုၢ်ဟံၣ် တဖျၢၣ်အံၤ ဒ်အံၤလဲၣ်.’+
၂၂ ဒီးအဝဲသ့ၣ် ကတဲဝဲလၢ ‘မ့ၢ်လၢအဝဲသ့ၣ် ပာ်တ့ၢ်ကွံာ် အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ+ လၢအဒုးဟးထီၣ် အဝဲသ့ၣ် လၢကီၢ်အဲၤကူပတူးအပူၤ+ ဒီးမ့ၢ်လၢအဝဲသ့ၣ် တူၢ်လိာ်ယွၤလၢ အဂၤတဖၣ်, ဘါယွၤတဖၣ်အံၤ ဒီးမၤအတၢ်အဃိ+ ကစၢ်ယွၤ ဒုးလီၤဘၣ်အဝဲသ့ၣ်လၢ တၢ်နးတၢ်ဖှီၣ်အံၤ ခဲလၢာ်လီၤ.’”+
