၂ စီၤပၤ ၁၀:၁-၃၆
၁၀ လၢဝ့ၢ်ၡၤမရံအပူၤန့ၣ် စီၤအၤဃာ်+ အဖိခွါ အိၣ်ဝဲအဂၤ ၇၀ လီၤ. အဃိ စီၤယ့ၤဟူ ကွဲးလံာ်ပရၢတဖၣ် ဒီးဆှၢလီၤဝဲလၢ ဝ့ၢ်ၡၤမရံလၢ ဝ့ၢ်ယံးစရ့လး အခိၣ်အနၢ်တဖၣ်, အပှၤသူၣ်က့သးပှၢ်တဖၣ်+ ဒီးပှၤလၢအကွၢ်ထွဲ စီၤအၤဃာ် အဖိခွါတဖၣ် အအိၣ် ဒီးတဲဝဲလၢ
၂ “သုကစၢ် စီၤအၤဃာ် အဖိခွါတဖၣ် အိၣ်ဒီးသု တကးဒံးဘၣ် သုအိၣ်ဒီး လ့ၣ်ကဟၣ်တဖၣ်, ကသ့ၣ်တဖၣ်, ဝ့ၢ်လၢအအိၣ်ဒီး အဒူၣ်လၢအကျၢၤ ဒီးတၢ်စုကဝဲၤတဖၣ်အဃိ ဖဲသုဒိးန့ၢ်ဘၣ် လံာ်ပရၢ တဘ့ၣ်အံၤအခါ
၃ သုကဘၣ် ဃုထၢထီၣ် သုကစၢ် အဖိခွါတဂၤလၢ အတုၤထီၣ်ထီၣ်ဘး ဒိၣ်ကတၢၢ် ဒီးအဂ့ၤကတၢၢ်တဂၤ ဒီးပာ်ထီၣ်အီၤလၢ အပၢ်အလီၢ်ပစိာ် အဖီခိၣ် ဝံၤဒီး ဒုးတၢ်လၢ သုကစၢ် အစၢၤအသွဲၣ်တဖၣ် အဂီၢ်တက့ၢ်.”
၄ ဘၣ်ဆၣ် အဝဲသ့ၣ် ပျံၤတၢ်ဒိၣ်မး ဒီးတဲဝဲလၢ “စီၤပၤခံဂၤ မၤအီၤမ့ၢ်တနၢၤဘၣ်န့ၣ်+ ပမၤအီၤ ကနၢၤဒ်လဲၣ်.”
၅ အဃိ ပှၤလၢ အတီခိၣ်ရိၤမဲတၢ်လၢနီပူၤ, ဝ့ၢ်အပဒိၣ်ဖးဒိၣ်, ပှၤသူၣ်က့သးပှၢ်တဖၣ် ဒီးပှၤလၢအကွၢ်ထွဲတၢ်တဖၣ် ဆှၢကဒါက့ၤ တၢ်ကစီၣ်လၢ စီၤယ့ၤဟူ အအိၣ်လၢ “ပမ့ၢ်နခ့နပှၤတဖၣ် ဒီးတၢ်လၢနမၢပှၤန့ၣ် ပကမၤခဲလၢာ်လီၤ. ပတပာ်ထီၣ် ပှၤလၢစီၤပၤ နီတဂၤဘၣ်. ဖဲနအဲၣ်ဒိးမၤန့ၣ် မၤဟီ.”
၆ ဒီးအဝဲကွဲးဝဲ လံာ်ပရၢခံဘ့ၣ်တဘ့ၣ် လၢအတဲဝဲလၢ “သုမ့ၢ်အိၣ်လၢ ယအိၣ်တခီဒီး သုမ့ၢ်သးအိၣ် ဒိကနၣ် ယကလုၢ်န့ၣ် ခဲမုၢ်ဆ့ၣ် ဖဲတၢ်ဆၢကတီၢ်ဒ်အံၤ ဟဲစိာ်န့ၢ်ယၤ သုကစၢ်အဖိခွါတဖၣ် အခိၣ်သၣ်ဃံ ဖဲဝ့ၢ်ယံးစရ့လး န့ၣ်တက့ၢ်.”
ဒီးစီၤပၤအဖိခွါ အဂၤ ၇၀ န့ၣ် အိၣ်ဝဲဒီး ဝ့ၢ်အပှၤဒိၣ်ပှၤပှၢ်တဖၣ် လၢအကွၢ်လုၢ်ဒိၣ်ထီၣ် အဝဲသ့ၣ်လီၤ.
၇ ဖဲအဝဲသ့ၣ် ဒိးန့ၢ်ဘၣ် လံာ်ပရၢအခါ အဝဲသ့ၣ် ကိးန့ၢ်စီၤပၤဖိခွါ အဂၤ ၇၀+ ဒီးမၤသံကွံာ်ဝဲလီၤ. ဒီးအဝဲသ့ၣ် ပၢနုာ်ဝဲ စီၤပၤအဖိခွါတဖၣ် အခိၣ်သၣ်ဃံလၢ နာ်တဖၣ်အပူၤ ဒီးဆှၢန့ၢ်ဝဲ စီၤယ့ၤဟူ လၢဝ့ၢ်ယံးစရ့လးန့ၣ်လီၤ.
၈ ဒီးပှၤစိာ်တၢ်ကစီၣ်ဖိတဂၤ ဟဲတဲဘၣ်အီၤလၢ “အဝဲသ့ၣ် ဟဲစိာ် စီၤပၤအဖိခွါတဖၣ် အခိၣ်သၣ်ဃံလံ.” ဒီးအဝဲတဲဝဲလၢ “လဲၤပာ်ပူၣ်ထီၣ်အီၤခံပူၣ် လၢဝ့ၢ်အတြဲၤခိၣ်ထိး တုၤလၢ မုၢ်ဝါထီၣ်တက့ၢ်.”
၉ လၢဂီၤခီန့ၣ် စီၤယ့ၤဟူ လဲၤဝဲ ဒီးဆၢထၢၣ်လၢ ပှၤဂီၢ်မုၢ်ခဲလၢာ်အမဲာ်ညါ ဒီးတဲဝဲလၢ “သုတၢ်ကမၣ်တအိၣ်ဘၣ်. မ့ၢ်လီၤ, ယကူၣ်အၢ ယကစၢ် ဒီးယမၤသံကွံာ်အီၤလီၤ.+ ဘၣ်ဆၣ် မတဂၤ မၤသံ ပှၤသ့ၣ်တဖၣ်အံၤလဲၣ်.
၁၀ အဃိ ခဲအံၤန့ၣ် သုကဘၣ်သ့ၣ်ညါနၢ်ပၢၢ်လၢ ယဟိဝၤယွၤ အတၢ်ကတိၤလၢ ယဟိဝၤယွၤတဲဝဲ ဘၣ်ဃးဒီးတၢ်စံၣ်ညီၣ် စီၤအၤဃာ် အစၢၤအသွဲၣ်တဖၣ် အဂ့ၢ်လၢ အတဟဲလၢထီၣ်ပှဲၤထီၣ်ဘၣ်န့ၣ်* တအိၣ်နီတထံၣ်ဘၣ်.+ ဒီးတၢ်လၢ ယဟိဝၤယွၤ တဲပာ်စၢၤ ခီဖျိလၢ အခ့အပှၤ စီၤအ့ၤလံယၤန့ၣ် အဝဲမၤဝဲလံ.”+
၁၁ တကးဒံးဘၣ် လၢဝ့ၢ်ယံးစရ့လးအပူၤန့ၣ် ပှၤလၢအအိၣ်တ့ၢ်ဒံးလၢ စီၤအၤဃာ် အစၢၤအသွဲၣ်တဖၣ်အကျါ မ့ၢ်ဂ့ၤ, အပှၤဒိၣ်ပှၤပှၢ်တဖၣ်မ့ၢ်ဂ့ၤ, အသကိးတဖၣ်မ့ၢ်ဂ့ၤ ဒီးအပှၤလုၢ်တၢ်ဒိၣ်တဖၣ်မ့ၢ်ဂ့ၤ+ စီၤယ့ၤဟူ မၤသံကွံာ်ဝဲ ခဲလၢာ် ဒီးတပာ်မူဝဲ နီတဂၤဘၣ်.+
၁၂ ဝံၤဒီး စီၤယ့ၤဟူ ဟးထီၣ်ဖဲန့ၣ် ဒ်သိးအကလဲၤလၢ ဝ့ၢ်ၡၤမရံ အဂီၢ်လီၤ. လၢကျဲန့ၣ် တၢ်တံာ်သိဆူၣ်အဟံၣ် အိၣ်ဝဲလီၤ.
၁၃ ဖဲန့ၣ် စီၤယ့ၤဟူ ထံၣ်လိာ်သးဒီး ယူဒၤ အစီၤပၤ အဃၤစယၤ+ အဒီပုၢ်ဝဲၢ်ခွါတဖၣ် ဒီးအဝဲ သံကွၢ် အဝဲသ့ၣ်လၢ “သုမ့ၢ်မတၤလဲၣ်.” အဝဲသ့ၣ် တဲဆၢက့ၤလၢ “ပကဲ စီၤအဃၤစယၤ အဒီပုၢ်ဝဲၢ်ခွါတဖၣ်လီၤ. ဒီးဒ်သိး ပကသ့ၣ်ညါဘၣ်လၢ မ့ၢ်စီၤပၤအဖိခွါတဖၣ် ဒီးနီၢ်ပၤမုၣ်* အဖိခွါတဖၣ် အိၣ်ဆူၣ်အိၣ်ချ့ဧါ အဂီၢ် ပကလဲၤ သံကွၢ်တၢ်လီၤ.”
၁၄ တဘျီဃီန့ၣ် စီၤယ့ၤဟူ တဲဝဲလၢ “ဖီၣ်မူဒံး အဝဲသ့ၣ်သၢၤ.” အဃိ အဝဲသ့ၣ် ဖီၣ်မူဒံး ပှၤပိာ်ခွါ ၄၂ ဂၤန့ၣ် ဒီးမၤသံကွံာ်အဝဲသ့ၣ် ဖဲတၢ်တံာ်သိဆူၣ်အဟံၣ် အထံကမါန့ၣ်လီၤ. စီၤယ့ၤဟူ တပာ်မူ အဝဲသ့ၣ် နီတဂၤဘၣ်.+
၁၅ စီၤယ့ၤဟူ ဟးထီၣ်ဖဲန့ၣ် ဒီးစီၤရ့ကး+ အဖိခွါ စီၤယိၤနဒာ်+ ဟဲဝဲဒ်သိး ကထံၣ်လိာ်သး ဒီးအီၤအဂီၢ်လီၤ. ဖဲစီၤယ့ၤဟူ ဆၢဂ့ၤဆၢဝါအီၤအခါ အတဲအီၤလၢ “ဒ်ယဆီၣ်ထွဲနၤလၢ ယသးဒီဖျၢၣ်အသိး မ့ၢ်နကဆီၣ်ထွဲယၤလၢ နသးဒီဖျၢၣ်ဧါ.”
စီၤယိၤနဒာ် တဲဝဲလၢ “ဆီၣ်ထွဲဝဲ.”
ဒီးစီၤယ့ၤဟူ တဲဝဲလၢ “မ့မ့ၢ်ဒ်န့ၣ်န့ၣ် ယူာ်ဃီၤနစုသၢၤ.”
ဒီးစီၤယိၤနဒာ် ယူာ်ဃီၤအစု ဒီးစီၤယ့ၤဟူ ထုးထီၣ်အီၤလၢ လ့ၣ်ကဟၣ်အပူၤ တပူၤဃီဒီးအီၤလီၤ.
၁၆ ဒီးစီၤယ့ၤဟူ တဲဝဲလၢ “လဲၤပိာ်ယခံ ဒီးနကထံၣ်လၢ ယတတူၢ်လိာ် တၢ်လၢ အထီဒါယဟိဝၤယွၤ နီတမံၤဘၣ်.”+ ဒီးအဝဲသ့ၣ် ဒုးဒိးအီၤလၢ လ့ၣ်ကဟၣ်သုး တပူၤဃီဒီး စီၤယ့ၤဟူလီၤ.
၁၇ ဝံၤဒီးစီၤယ့ၤဟူ လဲၤတုၤလၢ ဝ့ၢ်ၡၤမရံလီၤ. ဒီးစီၤအၤဃာ် အစၢၤအသွဲၣ်တဖၣ်လၢ အအိၣ်တ့ၢ်ဒံးလၢ ဝ့ၢ်ၡၤမရံအပူၤန့ၣ် အဝဲမၤသံကွံာ်ဝဲ တုၤလၢအလၢာ်+ ဒ်ယဟိဝၤယွၤ တဲပာ်စၢၤဝဲ စီၤအ့ၤလံယၤ အသိးလီၤ.+
၁၈ တကးဒံးဘၣ် စီၤယ့ၤဟူ ကိးဖှိၣ်ဝဲ ပှၤဂီၢ်မုၢ်ခဲလၢာ် ဒီးတဲအဝဲသ့ၣ်လၢ “စီၤအၤဃာ် ဘူၣ်ထီၣ်ဘါထီၣ် ဘဧၤလးတစဲးဖိ+ ဘၣ်ဆၣ် ယၤ, စီၤယ့ၤဟူ ကဘူၣ်ထီၣ်ဘါထီၣ် ဘဧၤလး အါဒံးလီၤ.
၁၉ အဃိ ကိးဖှိၣ် ဘဧၤလးအဝံ ကိးဂၤဒဲး,+ ကယဲၢ် ပှၤလၢအဘူၣ်ထီၣ်ဘါထီၣ် ဘဧၤလး ဒီးဘဧၤလး အပှၤလုၢ်တၢ်ဒိၣ်ခဲလၢာ်+ လၢယအိၣ်တက့ၢ်. တဘၣ်ပျဲ အဝဲသ့ၣ် အိၣ်တ့ၢ်နီတဂၤတဂ့ၤ. ယကမၤတၢ်လုၢ် ဒိၣ်ဒိၣ်မုၢ်မုၢ်လၢ ဘဧၤလးအဂီၢ် အဃိ အဝဲသ့ၣ် တဂၤဂ့ၤ တဂၤဂ့ၤလၢ အတဟဲဘၣ်န့ၣ် ကဘၣ်သံဝဲလီၤ.” ဘၣ်ဆၣ် အနီၢ်ကီၢ်န့ၣ် မ့ၢ်ဒၣ် စီၤယ့ၤဟူ ကူၣ်ထီၣ်ဝဲ ဒ်သိး ကမၤဟးဂီၤကွံာ် ပှၤလၢအဘူၣ်ထီၣ်ဘါထီၣ် ဘဧၤလး ကိးဂၤဒဲး အဂီၢ်လီၤ.
၂၀ စီၤယ့ၤဟူ ဆဲးတဲဝဲလၢ “ဘိးဘၣ်သ့ၣ်ညါလီၤ တၢ်အိၣ်ဖှိၣ်လီၤဆီ လၢဘဧၤလး အဂီၢ်တက့ၢ်.” အဃိ အဝဲသ့ၣ် ဘိးဘၣ်သ့ၣ်ညါလီၤဝဲလီၤ.
၂၁ ဝံၤဒီးစီၤယ့ၤဟူ ဆှၢလီၤ တၢ်ကစီၣ် လၢကီၢ်အံၣ်စရ့လးအပူၤ ဝးဝး ဒီးပှၤလၢအဘူၣ်ထီၣ်ဘါထီၣ် ဘဧၤလးန့ၣ် ဟဲဝဲကိးဂၤဒဲးလီၤ. ပှၤလၢတဟဲဘၣ်န့ၣ် တအိၣ်နီတဂၤဘၣ်. အဝဲသ့ၣ် လဲၤနုာ်လၢ ဘဧၤလးအဟံၣ်*+ ဒီးစးထီၣ်လၢ ဟံၣ်မဲာ်ညါ တုၤလၢ ဟံၣ်လီၢ်ခံန့ၣ် ပှၤအိၣ်ဝဲလၢ ဘဧၤလးအဟံၣ်ပူၤ ပှဲၤပှဲၤလီၤ.
၂၂ ဒီးစီၤယ့ၤဟူ တဲဘၣ် ပှၤတဂၤ လၢအကွၢ်ထွဲ တၢ်ကူတၢ်သိးတဖၣ်လၢ “ဟဲစိာ် တၢ်ကူတၢ်သိးလၢ ပှၤလၢအဘူၣ်ထီၣ်ဘါထီၣ် ဘဧၤလး အဂီၢ်တက့ၢ်.” ဒီးအဝဲ ဟဲစိာ်န့ၢ် တၢ်ကူတၢ်သိးလၢ အဝဲသ့ၣ် အဂီၢ်လီၤ.
၂၃ ဒီးစီၤယ့ၤဟူ ဒီးစီၤရ့ကးအဖိခွါ စီၤယိၤနဒာ်+ လဲၤနုာ်လၢ ဘဧၤလး အဟံၣ်ပူၤလီၤ. စီၤယ့ၤဟူ တဲဘၣ် ပှၤလၢအဘူၣ်ထီၣ်ဘါထီၣ် ဘဧၤလးလၢ “ဒ်သိးပှၤလၢအဘူၣ်ထီၣ်ဘါထီၣ် ယဟိဝၤယွၤ သုတအိၣ်ဖဲအံၤ နီတဂၤတဂ့ၤအဂီၢ် ဃုကွၢ်ထံထံဆးဆးတက့ၢ်. ဒီးမၤလီၤတံၢ်လၢ ဖဲအံၤန့ၣ် အိၣ်ထဲ ပှၤလၢအဘူၣ်ထီၣ်ဘါထီၣ် ဘဧၤလးတက့ၢ်.”
၂၄ လၢခံကတၢၢ်န့ၣ် အဝဲသ့ၣ်လဲၤနုာ်လီၤ ဒ်သိးကလုၢ်ထီၣ်ဝဲ တၢ်လုၢ်တၢ်ပာ်တဖၣ် ဒီးတၢ်လုၢ်ဒွဲၣ်အူတဖၣ်လီၤ. လၢတၢ်ချၢန့ၣ် စီၤယ့ၤဟူ ဆီလီၤပာ်စၢၤ ပှၤပိာ်ခွါအဂၤ ၈၀ ဒီးတဲဝဲလၢ “သုဝဲတဂၤဂ့ၤ တဂၤဂ့ၤလၢ အပျဲပူၤဖျဲး ပှၤလၢအဝဲသ့ၣ်အကျါ တဂၤဂၤန့ၣ် ကဘၣ်သံလၢအလီၢ်လီၤ.”
၂၅ ဖဲအဝဲ လုၢ်ထီၣ် တၢ်လုၢ်ဒွဲၣ်အူ ဝံၤဝဲအခါ စီၤယ့ၤဟူ တဲဘၣ် ပှၤပၢၤတၢ်တဖၣ် ဒီးသုးခိၣ်တဖၣ်လၢ “ဟဲနုာ်မၤသံ အဝဲသ့ၣ်သၢၤ. တဘၣ်ပျဲ အဝဲသ့ၣ် ပူၤဖျဲးနီတဂၤ တဂ့ၤ.”+ အဃိ ပှၤပၢၤတၢ်တဖၣ် ဒီးသုးခိၣ်တဖၣ် မၤသံအဝဲသ့ၣ်လၢနး ဒီးကွံာ်လီၤ အဝဲသ့ၣ် အစိၣ်တဖၣ်လၢ တၢ်ချၢ ဒီးဆဲးလဲၤဝဲ တုၤလၢ ဘဧၤလး အဟံၣ်အတၢ်လီၢ်စီဆှံ* အပူၤလီၤ.
၂၆ ဝံၤဒီး အဝဲသ့ၣ် ထုးထီၣ်ကွံာ် လၢၢ်ထူၣ်စီဆှံတဖၣ်+ လၢအအိၣ်လၢ ဘဧၤလးအဟံၣ်ပူၤ ဒီးဒွဲၣ်အူထီၣ်ကွံာ်ဝဲ ကိးထူၣ်ဒဲးလီၤ.+
၂၇ အဝဲသ့ၣ် မၤလီၤပှီၢ်ကွံာ် ဘဧၤလး အလၢၢ်ထူၣ်စီဆှံ+ ဒီးဘဧၤလးအဟံၣ်+ ဒီးတ့ထီၣ်က့ၤဝဲလၢ တၢ်ဟးလီၢ်တဖၣ် လၢအအိၣ်ဝဲတုၤလၢ မုၢ်မဆါတနံၤအံၤလီၤ.
၂၈ စီၤယ့ၤဟူ မၤလီၤမၢ်ကွံာ် တၢ်ဘူၣ်ထီၣ်ဘါထီၣ် ဘဧၤလး လၢကီၢ်အံၣ်စရ့လးပူၤ ခဲလၢာ်ခဲဆ့ ဒ်န့ၣ်လီၤ.
၂၉ ဘၣ်ဆၣ် စီၤယ့ၤဟူ တဃၣ်ကွံာ်အသးလၢ တၢ်ဒဲးဘးလၢ စီၤနဘး အဖိခွါ စီၤယၤရၤဘၣ် ဆီၣ်ထွဲ ပှၤအံၣ်စရ့လးဖိ လၢအကမၤဝဲန့ၣ်ဘၣ်. အဝဲပျဲဝဲလၢ ကျီၢ်ထူဖိတဖၣ်လၢ ဝ့ၢ်ဘ့ၤသ့လး ဒီးဝ့ၢ်ဒၣ်အပူၤန့ၣ် ကဆဲးအိၣ်ဝဲလီၤ.+
၃၀ ဒီးယဟိဝၤယွၤတဲဘၣ် စီၤယ့ၤဟူလၢ “နမၤတ့ၢ်တၢ်ဂ့ၤဂ့ၤ ဒီးနမၤတၢ်လၢ ယထံၣ်လၢအဂ့ၤ ခီဖျိ နမၤစီၤအၤဃာ် အစၢၤအသွဲၣ်တဖၣ် ဒ်ယတၢ်ဘၣ်သး အိၣ်ဝဲအသိးလီၤ.+ အဃိနဖိခွါ အစိၤလွံၢ်စိၤန့ၣ် ကဆ့ၣ်နီၤဘၣ်လၢ အံၣ်စရ့လး အလီၢ်ပစိာ် အဖီခိၣ်လီၤ.”+
၃၁ ဘၣ်ဆၣ် စီၤယ့ၤဟူ တအိၣ်မူမၤထွဲ အံၣ်စရ့လး အကစၢ်ယဟိဝၤယွၤ အတၢ်သိၣ်တၢ်သီ လၢအသးဒီဖျၢၣ်ဘၣ်.+ အဝဲတဃၣ်ကွံာ်အသးလၢ တၢ်ဒဲးဘးလၢ စီၤယၤရၤဘၣ် ဆီၣ်ထွဲ ပှၤအံၣ်စရ့လးဖိလၢ ကမၤဝဲန့ၣ်ဘၣ်.+
၃၂ ဖဲန့ၣ်အဆၢကတီၢ် ယဟိဝၤယွၤ စးထီၣ်မၤအံၣ်လီၤ ကီၢ်အံၣ်စရ့လး အလီၢ်ကဝီၤ တတီၤဘၣ် တတီၤလီၤ. ကီၢ်စူၤရံ အစီၤပၤဃစ့လး ဟဲဒုးအဝဲသ့ၣ် သကုၤလၢ ကီၢ်အံၣ်စရ့လး အလီၢ်ကဝီၤ ခဲလၢာ်+
၃၃ စးထီၣ်လၢ ထံကျိယၢ်ဒ့ၣ် ဒီးဆူမုၢ်ထီၣ်တခီ လၢအမ့ၢ် ကံးလဧး အဟီၣ်ကဝီၤ ခဲလၢာ် ဖဲကးအဒူၣ်, ရူၤဘ့ၣ်အဒူၣ် ဒီးမနၤၡ့ၤအဒူၣ်+ အိၣ်ဝဲအလီၢ်န့ၣ်လီၤ. ဟီၣ်ကဝီၤအံၤ ပၣ်ဃုာ်ဒီး တၢ်လီၢ်စးထီၣ်ဖဲ ဧရိၤဧ့ၢ် လၢအအိၣ်ဘူးဒီး အၢ်နိၣ်အတၢ်တြီၤ တုၤလီၤလၢ ကံးလဧး ဒီးကီၢ်ဘၤၡၣ်န့ၣ်လီၤ.+
၃၄ မ့မ့ၢ် စီၤယ့ၤဟူ အဂ့ၢ်လၢအဂၤတဖၣ်, တၢ်ခဲလၢာ်လၢ အမၤတ့ၢ်ဝဲ ဒီးအတၢ်မၤလၢ အဒိၣ်အမုၢ် ခဲလၢာ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၃၅ ဒီးစီၤယ့ၤဟူ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤလၢ ဝ့ၢ်ၡၤမရံအပူၤလီၤ. ဒီးအဖိခွါ စီၤယဟိအါဃး+ ကဲထီၣ် စီၤပၤလၢအလီၢ်လီၤ.
၃၆ စီၤယ့ၤဟူ ပၢဘၣ်တၢ်လၢ ဝ့ၢ်ၡၤမရံအပူၤ လၢအံၣ်စရ့လးအဖီခိၣ်န့ၣ် အိၣ်ဝဲ ၂၈ နံၣ်လီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “လီၤတဲာ်လၢ ဟီၣ်ခိၣ်လိၤ.”
^ မ့ၢ်ဝဲ စီၤပၤယဟိရၣ်အမိၢ် နီၢ်ပၤမုၣ် အံၤစ့ဘ့ၤလး.
^ မ့ၢ်စ့ၢ်ကီး “တၢ်လုၢ်ဟံၣ်.”
^ အခီပညီလိၤလိၤ “အဝ့ၢ်,” ဘၣ်သ့ၣ်သ့ၣ် မ့ၢ်ဝဲတၢ်သူၣ်ထီၣ်တခါလၢ အဂၢၢ်ကျၢၤ.
