၂ စီၤပၤ ၁၂:၁-၂၁
၁၂ ဖဲစီၤယ့ၤဟူ+ ပၢတၢ်နွံနံၣ်တနံၣ်န့ၣ် စီၤယိၤအၣ်+ ကဲထီၣ်စီၤပၤ ဒီးအဝဲပၢတၢ်လၢ ဝ့ၢ်ယရူၤၡလ့ၣ်အပူၤ အနံၣ် ၄၀ လီၤ. ဒီးစီၤယိၤအၣ် အမိၢ်မ့ၢ်ဝဲ နီၢ်စံဘယၤ လၢအအိၣ်လၢ ဝ့ၢ်ဘ့ၢ်ၡဘၤန့ၣ်လီၤ.+
၂ ဒီးဖဲပှၤလုၢ်တၢ်ဒိၣ် စီၤယဟိၤယဒါ သိၣ်လိနဲၣ်လိအီၤ ဒီတကတီၢ်န့ၣ် အဝဲဆဲးမၤတၢ်လၢ ယဟိဝၤယွၤ ထံၣ်ဝဲလၢ အဂ့ၤလီၤ.
၃ ဘၣ်ဆၣ်သနာ်က့ တၢ်လီၢ်ထီၣ်ထီတဖၣ်န့ၣ်+ အိၣ်ဒံးဝဲလီၤ. ဒီးပှၤဂီၢ်မုၢ်တဖၣ် ဆဲးလုၢ်ထီၣ်ဒံးတၢ် ဒီးဒွဲၣ်ခုၣ်ထီၣ်တၢ်လုၢ် လၢတၢ်လီၢ်ထီၣ်ထီတဖၣ် အလိၤဒံးလီၤ.
၄ ဒီးစီၤယိၤအၣ် တဲဘၣ် ပှၤလုၢ်တၢ်ဒိၣ်တဖၣ်ဒ်အံၤ, “ကျိၣ်စ့ လၢပှၤဟဲစိာ်အီၤလၢ ယဟိဝၤယွၤအဟံၣ် ဒ်တၢ်မၤဘူၣ်တဖၣ်အသိး+ လၢအမ့ၢ် ကျိၣ်စ့ လၢပှၤကိးဂၤဒဲး ကဘၣ်ဟ့ၣ်လီၤဝဲ ဒ်တၢ်ခိတၢ်သွဲအသိး, ကျိၣ်စ့လၢ အဘၣ်တၢ်ဟ့ၣ်လီၤအီၤ ဒ်တၢ်ပာ်ပနီၣ်အပှ့ၤလၢ ပှၤတဂၤဂၤအဂီၢ် အိၣ်ဝဲအသိး+ ဒီးကယဲၢ် ကျိၣ်စ့လၢ ပှၤတဂၤစုာ်စုာ် ဟဲစိာ်ဝဲလၢ ယဟိဝၤယွၤအဟံၣ် လၢတၢ်သူၣ်အိၣ်သးအိၣ်အပူၤန့ၣ် ဟံးန့ၢ်အီၤခဲလၢာ်တက့ၢ်.+
၅ ပှၤလုၢ်တၢ်ဒိၣ်တဖၣ် အနီၢ်ကစၢ်ဒၣ်ဝဲ ကဟံးန့ၢ်ဝဲလၢ ပှၤလၢအဟဲဟ့ၣ်လီၤတၢ်တဖၣ်အအိၣ် ဒီးတၢ်လုၢ်ဟံၣ် မ့ၢ်ဟးဂီၤဝဲတတီၤတီၤန့ၣ် အဝဲသ့ၣ်ကသူဝဲဒ်သိး ကဘှီဂ့ၤထီၣ်က့ၤဝဲအဂီၢ်လီၤ.”+
၆ ဘၣ်ဆၣ် တုၤလီၤလၢ စီၤပၤယိၤအၣ် ပၢတၢ် ၂၃ နံၣ်တနံၣ်ဒၣ်လဲာ် ပှၤလုၢ်တၢ်ဒိၣ်တဖၣ် တဘှီဂ့ၤထီၣ်ဘၣ်က့ၤ တၢ်လုၢ်ဟံၣ်ဒံးဘၣ်.+
၇ အဃိ စီၤပၤယိၤအၣ် ကိးန့ၢ်ဝဲ ပှၤလုၢ်တၢ်ဒိၣ် စီၤယဟိၤယဒါ+ ဒီးပှၤလုၢ်တၢ်ဒိၣ်အဂၤတဖၣ် ဒီးတဲအဝဲသ့ၣ်လၢ “ဘၣ်မနုၤအဃိ သုတဘှီဂ့ၤထီၣ်က့ၤ တၢ်လုၢ်ဟံၣ်ဘၣ်လဲၣ်. သုမ့ၢ်တသူကျိၣ်စ့လၢ သုကဘှီဂ့ၤထီၣ်က့ၤ တၢ်လုၢ်ဟံၣ်အဂီၢ်ဘၣ်န့ၣ် သုတဘၣ်ဟံးန့ၢ်ကျိၣ်စ့လၢ ပှၤလၢအဟဲဟ့ၣ်တၢ်တဖၣ် အအိၣ်လၢၤတဂ့ၤ.”+
၈ ဒီးပှၤလုၢ်တၢ်ဒိၣ်တဖၣ် သးလီၤပလိာ်ဝဲလၢ အဝဲသ့ၣ် တဘၣ်ဟံးန့ၢ်ကျိၣ်စ့ လၢပှၤဂီၢ်မုၢ်အအိၣ်လၢၤဘၣ် ဒီးတဘၣ်ဟံးန့ၢ်မူဒါလၢ တၢ်ဘှီဂ့ၤထီၣ်က့ၤ တၢ်လုၢ်ဟံၣ်လၢၤဘၣ်.
၉ ဝံၤဒီး စီၤယဟိၤယဒါ ဟံးန့ၢ်တလါတဖျၢၣ်+ ဒီးပလံာ်ဖျိ တၢ်ပူၤဟိတပူၤလၢ အခိၣ်ကျး ဒီးပာ်လီၤဝဲတလါန့ၣ် လၢတၢ်လုၢ်လီၢ်အကပၤ ဖဲပှၤလဲၤနုာ်လၢ ယဟိဝၤယွၤ အဟံၣ်ပူၤလၢ အထွဲတခီလီၤ. ဒီးကျိၣ်စ့ခဲလၢာ်လၢ ပှၤဟဲစိာ်အီၤလၢ ယဟိဝၤယွၤအဟံၣ်န့ၣ် ပှၤလုၢ်တၢ်ဒိၣ်တဖၣ်လၢ အခိးတြဲၤန့ၣ် ပၢနုာ်ဝဲလၢ တလါတဖျၢၣ်န့ၣ်အပူၤလီၤ.+
၁၀ တဘျီဂ့ၤတဘျီဂ့ၤ ဖဲအဝဲသ့ၣ်ထံၣ်ဝဲလၢ တလါပူၤန့ၣ် ကျိၣ်စ့အိၣ်အါမးအခါ စီၤပၤအနဲၣ်ရွဲၣ် ဒီးပှၤလုၢ်တၢ်ခိၣ် အဒိၣ်ကတၢၢ်န့ၣ် ဟဲဟံးန့ၢ်ဝဲ ဒီးဂံၢ်ဝဲကျိၣ်စ့လၢ ပှၤဟဲစိာ်အီၤလၢ ယဟိဝၤယွၤအဟံၣ်န့ၣ်လီၤ.+
၁၁ ဒီးကျိၣ်စ့လၢ ပှၤဂံၢ်အီၤဝံၤတဖၣ်န့ၣ် အဝဲသ့ၣ် ဟ့ၣ်လီၤဝဲလၢ ပှၤလၢအဘၣ်တၢ်ဃုထၢအီၤလၢ ကတီခိၣ်ရိၤမဲ ယဟိဝၤယွၤ အဟံၣ်တၢ်မၤလီၤ. ဒီးပှၤတဖၣ်န့ၣ် ဟ့ၣ်လီၤဝဲ တၢ်အဘူးအလဲလၢ ပှၤလၢအတ့တၢ်ဘှီတၢ်လၢသ့ၣ် ဒီးပှၤစုသ့လၢ အမၤတၢ်မၤလၢ ယဟိဝၤယွၤ အဟံၣ်အဂီၢ်လီၤ.+
၁၂ အဝဲသ့ၣ် ဟ့ၣ်စ့ၢ်ကီး ကျိၣ်စ့လၢ ပှၤလၢအတ့တၢ်ဘှီတၢ်လၢလၢၢ် ဒီးပှၤလၢအဘူးတဲာ်လၢၢ်တဖၣ်လီၤ. အဝဲသ့ၣ် ပှ့ၤစ့ၢ်ကီး သ့ၣ်ဘၣ်ဒီး လၢၢ်လၢအဘၣ်တၢ်ပျၤန့ၢ်အီၤတဖၣ် ဒ်သိး ကဘှီဂ့ၤထီၣ်က့ၤ ယဟိဝၤယွၤအဟံၣ်အဂီၢ်လီၤ. ဒီးအဝဲသ့ၣ် သူကျိၣ်စ့လၢ တၢ်လၢာ်ဘူၣ်လၢာ်စ့ၤအဂၤတဖၣ်လၢ တၢ်ဘှီဂ့ၤထီၣ်က့ၤ တၢ်လုၢ်ဟံၣ်အဂီၢ်န့ၣ်လီၤ.
၁၃ ဘၣ်ဆၣ် အဝဲသ့ၣ်တသူ ကျိၣ်စ့လၢ ပှၤဟဲစိာ်လၢ ယဟိဝၤယွၤအဟံၣ် ဒ်သိးကတ့ထီၣ် ထံဒၢလၢ စ့ညၣ်မ့ၢ်ဂ့ၤ, ထးရံးတဖၣ်မ့ၢ်ဂ့ၤ, လီခီဖျၢၣ်တဖၣ်မ့ၢ်ဂ့ၤ, ကွဲၤတဖၣ်မ့ၢ်ဂ့ၤ+ ဒီးတၢ်ဖိတၢ်လံၤ တမံၤဂ့ၤတမံၤဂ့ၤလၢ အဘၣ်တၢ်တ့အီၤလၢ ထူ မ့တမ့ၢ် စ့ညၣ်လၢ ယဟိဝၤယွၤ အဟံၣ်အဂီၢ် နီတစဲးဘၣ်.+
၁၄ အဝဲသ့ၣ် ဟ့ၣ်လီၤကျိၣ်စ့ထဲလၢ ပှၤလၢအမၤတၢ်တဖၣ်လီၤ. ဒီးအဝဲသ့ၣ် ဘှီဂ့ၤထီၣ်က့ၤ ယဟိဝၤယွၤ အဟံၣ်ဒ်န့ၣ်လီၤ.
၁၅ ပှၤလၢ အတီခိၣ်ရိၤမဲတၢ်တဖၣ် လၢအဒိးန့ၢ်ဘၣ် ကျိၣ်စ့ ဒ်သိးကဟ့ၣ်လီၤဝဲ ပှၤမၤတၢ်ဖိအဂီၢ်န့ၣ် မ့ၢ်ပှၤလၢ ပှၤနာ်န့ၢ်အီၤသ့အဃိ အဝဲသ့ၣ် တလိၣ်ကွဲးနီၣ် စ့စရီဘၣ်.+
၁၆ ဘၣ်ဆၣ် မ့မ့ၢ် ကျိၣ်စ့လၢ တၢ်လုၢ်လၢ တၢ်ကမၣ်အဂီၢ်+ ဒီးကျိၣ်စ့လၢ တၢ်လုၢ်လၢ တၢ်ဒဲးဘးအဂီၢ်န့ၣ် ပှၤတဟဲစိာ်လၢ ယဟိဝၤယွၤအဟံၣ်ဘၣ်. ကျိၣ်စ့တဖၣ်အံၤ မ့ၢ်ဝဲလၢ ပှၤလုၢ်တၢ်ဒိၣ်တဖၣ်အဂီၢ်လီၤ.+
၁၇ ဖဲန့ၣ်အခါ ဘၣ်လၢ ကီၢ်စူၤရံ အစီၤပၤဃစ့လး+ လဲၤထီၣ်ဒုးဝဲ ဝ့ၢ်ကၤသး+ ဒီးမၤန့ၢ်ဝဲဝ့ၢ်န့ၣ်လီၤ. ဝံၤဒီး အဝဲပာ်လီၤအသးလၢ အကလဲၤဒုး ဝ့ၢ်ယရူၤၡလ့ၣ်လီၤ.+
၁၈ အဃိ ယူဒၤဘီမုၢ် အစီၤပၤယိၤအၣ် ဟံးန့ၢ် တၢ်မၤဘူၣ်ခဲလၢာ်လၢ ယူဒၤစီၤပၤလၢ အပၢတၢ်လၢ အမဲာ်ညါတဖၣ် လၢအမ့ၢ် စီၤယဟိၡၤဖး, စီၤယဟိရၣ် ဒီးစီၤအဃၤစယၤ ပာ်စီဆှံဝဲန့ၣ်လီၤ. တကးဒံးဘၣ် အဝဲဟံးန့ၢ်စ့ၢ်ကီး အနီၢ်ကစၢ်အတၢ်မၤဘူၣ်တဖၣ် ဒီးထူခဲလၢာ်လၢ အအိၣ်လၢ တၢ်လုၢ်ဒိၣ်ပှ့ၤဒိၣ် အလီၢ်လၢ ယဟိဝၤယွၤ အဟံၣ်ပူၤ ဒီးလၢတၢ်လုၢ်ဒိၣ်ပှ့ၤဒိၣ် အလီၢ်လၢ စီၤပၤအဟံၣ်ပူၤ ဒီးဆှၢလီၤဝဲခဲလၢာ်လၢ ကီၢ်စူၤရံ အစီၤပၤဃစ့လး အအိၣ်လီၤ.+ လၢတၢ်န့ၣ်အဃိ အဝဲဟးယံၤကွံာ်ဝဲဒီး ဝ့ၢ်ယရူၤၡလ့ၣ်လီၤ.
၁၉ မ့မ့ၢ် စီၤယိၤအၣ် အဂ့ၢ်လၢအဂၤတဖၣ် ဒီးတၢ်လၢအမၤဝဲခဲလၢာ်န့ၣ် ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၂၀ ဘၣ်ဆၣ် စီၤယိၤအၣ် အခ့အပှၤတဖၣ် ကူၣ်အၢအီၤ+ ဒီးမၤသံကွံာ်အီၤဖဲ ဟံၣ်လၢအအိၣ်လၢ တၢ်လူၢ်*+ လၢကျဲလၢအလဲၤလီၤလၢ စံးလၤလီၤ.
၂၁ ဒီးပှၤလၢ အမၤသံကွံာ် စီၤယိၤအၣ်န့ၣ်မ့ၢ်ဝဲ အခ့အပှၤ စီၤယိၤစၤကၢ် လၢအမ့ၢ် နီၢ်ၡံမဧး အဖိခွါ ဒီးနီၢ်ၡိမ့ၢ် အဖိခွါ စီၤယဟိစဘးန့ၣ်လီၤ.+ အဝဲသ့ၣ်ခူၣ်လီၤကွံာ် စီၤယိၤအၣ်ဒီး အမိၢ်ပၢ်ဖံဖု လၢပျၢၤတဖၣ် လၢစီၤဒၤဝံးအဝ့ၢ်ပူၤလီၤ. ဒီးစီၤယိၤအၣ် အဖိခွါ စီၤအမၤစယါ ကဲထီၣ် စီၤပၤလၢအလီၢ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “မံးလိၤ.” အဝဲန့ၣ် မ့ၢ်ဧ့ၤဘြံၤ အတၢ်ကတိၤလၢ အခီပညီမ့ၢ်ဝဲ “မၤပှဲၤ.”
