၂ စီၤပၤ ၁၆:၁-၂၀
၁၆ ဖဲစီၤရမါလယၤ အဖိခွါ စီၤပ့ကး ပၢတၢ် ၁၇ နံၣ်တနံၣ်န့ၣ် ယူဒၤအစီၤပၤယိၤသၣ် အဖိခွါ စီၤအၤဃး+ ကဲထီၣ်စီၤပၤလီၤ.
၂ ဖဲစီၤအၤဃး ကဲထီၣ်စီၤပၤအခါ အသးနံၣ်အိၣ်ဝဲ အနံၣ် ၂၀ လီၤ. ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၁၆ နံၣ်လီၤ. အဝဲတမၤတၢ်လၢ အကစၢ် ယဟိဝၤယွၤ ထံၣ်ဝဲလၢအဂ့ၤ ဒ်အဖုဖးဒိၣ် စီၤဒၤဝံးမၤတ့ၢ်ဝဲ အသိးဘၣ်.+
၃ လၢတၢ်န့ၣ်အလီၢ် အဝဲအိၣ်မူပိာ်ထွဲဝဲဒ် အံၣ်စရ့လး အစီၤပၤတဖၣ်အသိးလီၤ.+ ဒီးပှၤကလုာ်တဖၣ်လၢ ယဟိဝၤယွၤ နီဟးထီၣ်ကွံာ်လၢ အံၣ်စရ့လး အမဲာ်ညါန့ၣ် စီၤအၤဃး မၤထွဲဝဲ ဒ်အဝဲသ့ၣ် အလုၢ်အလၢ်လၢ အလီၤသးဘၣ်အၢတဖၣ်အသိးဒီး+ အနီၢ်ကစၢ်အဖိခွါဒၣ်လဲာ် အဝဲလုၢ်ထီၣ်ဝဲ လၢမ့ၣ်အူပူၤလီၤ.+
၄ အဝဲဆဲးလုၢ်ထီၣ်ဒံးတၢ် ဒီးဒွဲၣ်ခုၣ်ထီၣ်တၢ်လုၢ် လၢတၢ်လီၢ်ထီၣ်ထီတဖၣ်+ အဖီခိၣ်, တၢ်လူၢ်ခိၣ် ဒီးလၢသ့ၣ်လါဟ့ လၢအပှဲၤဒီးအလၣ် ကိးထူၣ်ဒဲး အခီၣ်ထံးန့ၣ်လီၤ.+
၅ ဖဲန့ၣ်အခါ ဘၣ်လၢ ကီၢ်စူၤရံ အစီၤပၤရစံၣ် ဒီးစီၤရမါလယၤ အဖိခွါ လၢအမ့ၢ် အံၣ်စရ့လး အစီၤပၤပ့ကး လဲၤထီၣ်ဝဲ ဒ်သိးကဒုးတၢ်ဒီး စီၤအၤဃး အဂီၢ်လီၤ.+ ဒီးအဝဲသ့ၣ် ကဝီၤဃာ်ဝဲ ဝ့ၢ်ယရူၤၡလ့ၣ် ဘၣ်ဆၣ် အဝဲသ့ၣ် တမၤန့ၢ်ဝ့ၢ်ဘၣ်.
၆ ဖဲန့ၣ်အဆၢကတီၢ် ကီၢ်စူၤရံ အစီၤပၤရစံၣ် မၤန့ၢ်က့ၤ ဝ့ၢ်အ့လး+ လၢပှၤအဒိၣ်ဖိအဂီၢ် ဝံၤဒီး အဝဲသ့ၣ် နီဟးထီၣ်ကွံာ် ပှၤယူဒၤဖိလၢ ဝ့ၢ်အ့လးအပူၤလီၤ. ဒီးပှၤအဒိၣ်ဖိတဖၣ် လဲၤနုာ်လီၤလၢ ဝ့ၢ်အ့လးအပူၤ ဒီးအဝဲသ့ၣ်အိၣ်ဝဲဖဲန့ၣ် တုၤလၢ မုၢ်မဆါတနံၤအံၤလီၤ.
၇ အဃိ စီၤအၤဃး ဆှၢလီၤ ပှၤစိာ်တၢ်ကစီၣ်ဖိတဖၣ် လၢကီၢ်အၤၡူၢ် အစီၤပၤတံးကလးပလ့စ့ၢ်+ အအိၣ်ဒ်သိးကတဲအီၤလၢ “ယမ့ၢ်နခ့နပှၤ ဒီးနဖိခွါလီၤ. ကီၢ်စူၤရံ အစီၤပၤဒီး အံၣ်စရ့လးအစီၤပၤ ဟဲဒုးယၤလံ. ဟဲထီၣ်မၤပူၤဖျဲးယၤလၢ အဝဲသ့ၣ် အစုပူၤတက့ၢ်.”
၈ ဝံၤဒီး စီၤအၤဃး ဟံးန့ၢ်ဝဲ စ့ညၣ် ဒီးထူလၢအအိၣ်လၢ ယဟိဝၤယွၤ အတၢ်လုၢ်ဟံၣ် ဒီးလၢတၢ်လုၢ်ဒိၣ်ပှ့ၤဒိၣ်အလီၢ် လၢစီၤပၤအဟံၣ်ပူၤလီၤ. ဒီးအဝဲဆှၢလီၤဝဲ ဒ်တၢ်ဟ့ၣ်* အသိး လၢကီၢ်အၤၡူၢ် အစီၤပၤအအိၣ်လီၤ.+
၉ ကီၢ်အၤၡူၢ် အစီၤပၤ မၤဝဲဒ် စီၤပၤအၤဃး ဃ့ဝဲအသိး ဒီးအဝဲလဲၤဝဲလၢ ဝ့ၢ်ဒၤမ့ၤစ့း ဒီးမၤန့ၢ်ဝဲဝ့ၢ်လီၤ. ဒီးအဝဲဖီၣ်န့ၢ် ပှၤအိၣ်လၢဝ့ၢ်ပူၤတဖၣ် ဒီးက့ၤကိးဝဲလၢ ဝ့ၢ်ကံၢ်+ ဒီးအဝဲမၤသံကွံာ် စီၤရစံၣ်လီၤ.+
၁၀ ဒီးစီၤပၤအၤဃး လဲၤထံၣ်လိာ်အသးဒီး ကီၢ်အၤၡူၢ် အစီၤပၤတံးကလးပလ့စ့ၢ် ဖဲဝ့ၢ်ဒၤမ့ၤစ့းလီၤ. ဖဲစီၤပၤအၤဃး ထံၣ်ဘၣ် တၢ်လုၢ်လီၢ်တဖျၢၣ်လၢ အအိၣ်ဝဲလၢ ဝ့ၢ်ဒၤမ့ၤစ့းအပူၤအခါ အဝဲဆှၢလီၤန့ၢ်ဝဲ ပှၤလုၢ်တၢ်ဒိၣ် စီၤဧူၤရံယၤလၢ တၢ်လုၢ်လီၢ် အတၢ်ဂီၤအဒိ လၢအပာ်ဖျါထီၣ်လၢ ပှၤတ့ထီၣ်အီၤ ဒ်လဲၣ်ဒ်လဲၣ်န့ၣ်လီၤ.+
၁၁ အဃိ ပှၤလုၢ်တၢ်ဒိၣ် စီၤဧူၤရံယၤ+ တ့ထီၣ်ဝဲ တၢ်လုၢ်လီၢ်တဖျၢၣ်+ ဒ်သိးဒီး တၢ်ဟံးစုနဲၣ်ကျဲတဖၣ်လၢ စီၤပၤအၤဃး ဆှၢလီၤန့ၢ်အီၤလၢဝ့ၢ်ဒၤမ့ၤစ့းန့ၣ်လီၤ. တချုးလၢ စီၤပၤအၤဃး ဟဲက့ၤတုၤဒံးဘၣ်န့ၣ် ပှၤလုၢ်တၢ်ဒိၣ် စီၤဧူၤရံယၤ တ့ထီၣ် တၢ်လုၢ်လီၢ် ဝံၤဝဲလီၤ.
၁၂ ဖဲစီၤပၤအၤဃး ဟဲက့ၤထံၣ်ဝဲ တၢ်လုၢ်လီၢ်အခါ အဝဲလဲၤလုၢ်ထီၣ်တၢ်လၢ တၢ်လုၢ်လီၢ်တဖျၢၣ်န့ၣ် အဖီခိၣ်လီၤ.+
၁၃ ဒီးအဝဲ ဆဲးဒွဲၣ်ထီၣ် အတၢ်လုၢ်ဒွဲၣ်အူ ဒီးအတၢ်လုၢ်ဘု လၢတၢ်လုၢ်လီၢ်တဖျၢၣ်န့ၣ် အဖီခိၣ်လီၤ. ဒီးအဝဲလူလီၤစ့ၢ်ကီး စပံးထံလၢ တၢ်လုၢ်တၢ်ပာ်အဂီၢ် ဒီးဖှံဝဲ တၢ်လုၢ်အိၣ်ဃူအိၣ်ဖိးတဖၣ် အသွံၣ် လၢတၢ်လုၢ်လီၢ် တဖျၢၣ်န့ၣ် အဖီခိၣ်လီၤ.
၁၄ ဒီးတၢ်လုၢ်လီၢ်တိၢ်ဘီ+ အိၣ်ပာ်စၢၤဝဲလၢ ယဟိဝၤယွၤ အတၢ်လုၢ်ဟံၣ်အမဲာ်ညါ လၢအနီၢ်ကစၢ် အတၢ်လုၢ်လီၢ် ဒီးယဟိဝၤယွၤ အတၢ်လုၢ်ဟံၣ်အဘၢၣ်စၢၤ အဃိ အဝဲသုးကွံာ်ဝဲ ဒီးလဲၤပာ်ဝဲ တၢ်လုၢ်လီၢ်တိၢ်ဘီလၢ အနီၢ်ကစၢ် အတၢ်လုၢ်လီၢ် အကလံၤစိးတခီလီၤ.
၁၅ ဒီးစီၤပၤအၤဃး မၤလိာ် ပှၤလုၢ်တၢ်ဒိၣ် စီၤဧူၤရံယၤလၢ+ “ဒွဲၣ်အူထီၣ် ဂီၤခီ တၢ်လုၢ်ဒွဲၣ်အူ,+ ဟါခီတၢ်လုၢ်ဘု, စီၤပၤ အတၢ်လုၢ်ဒွဲၣ်အူ, စီၤပၤ အတၢ်လုၢ်ဘု ဒီးပှၤဂီၢ်မုၢ် အတၢ်လုၢ်ဒွဲၣ်အူတဖၣ်, အတၢ်လုၢ်ဘုတဖၣ်+ ဒီးအဝဲသ့ၣ် အစပံးထံလၢ တၢ်လုၢ်တၢ်ပာ်အဂီၢ် လၢတၢ်လုၢ်လီၢ်ဖးဒိၣ် အဖီခိၣ် ဒ်သိး အကခုၣ်ထီၣ်အဂီၢ်တက့ၢ်. ဒီးနကဘၣ်ဖှံလီၤ တၢ်လုၢ်ဒွဲၣ်အူ အသွံၣ်ခဲလၢာ် ဒီးတၢ်လုၢ်တၢ်ပာ် အဂၤတဖၣ် အသွံၣ်ခဲလၢာ်လၢ တၢ်လုၢ်လီၢ်တဖျၢၣ်န့ၣ် အဖီခိၣ်လီၤ. မ့မ့ၢ် တၢ်လုၢ်လီၢ်တိၢ်ဘီတဖျၢၣ်န့ၣ် ပှၤကဘၣ်မၤအီၤ ဒ်လဲၣ်ဒ်လဲၣ်န့ၣ် ယကဆၢတဲာ်လီၤ.”
၁၆ ဒီးပှၤလုၢ်တၢ်ဒိၣ် စီၤဧူၤရံယၤ မၤဝဲဒ်စီၤပၤအၤဃး မၤလိာ်အီၤအသိး ခဲလၢာ်လီၤ.+
၁၇ ဒီးစီၤပၤအၤဃး ဒီၣ်တဲာ်ကွံာ် လ့ၣ်ဆီၣ်အတိၢ်ဘီဘ့ၣ်ဘၣ်တဖၣ်+ တကူာ်ဘၣ်တကူာ် ဒီးထုးထီၣ်ထံဒၢတဖၣ်လၢ အအိၣ်ဝဲလၢ လ့ၣ်ဆီၣ်တဖၣ်အပူၤလီၤ.+ ဒီးထံဒၢဖးဒိၣ်လၢ ပှၤကိးဝဲလၢ ပီၣ်လဲၣ်တိၢ်ဘီ လၢအအိၣ်ဝဲလၢ ကျီၢ်ဖါတိၢ်ဘီတဖၣ်+ အဖီခိၣ်န့ၣ် အဝဲပာ်လီၤက့ၤလၢ လၢၢ်ဒါခိၣ်လီၤ.+
၁၈ ဒီးတၢ်လီၢ်လၢ အအိၣ်ဒီးအခိၣ်ဒုးလၢ မုၢ်အိၣ်ဘှံးနံၤအဂီၢ် လၢပှၤတ့ထီၣ်အီၤ ဘူးဒီးတၢ်လုၢ်ဟံၣ်န့ၣ် အဝဲထုးလီၤကွံာ်ဝဲ တကးဒံးဘၣ် အထုးထီၣ်ကွံာ် တြဲၤလၢ စီၤပၤတဖၣ် လဲၤနုာ်လီၤလၢ ယဟိဝၤယွၤ အတၢ်လုၢ်ဟံၣ်န့ၣ်လီၤ. ဒီးအဝဲမၤတၢ်သ့ၣ်တဖၣ်န့ၣ် လၢကီၢ်အၤၡူၢ် အစီၤပၤအဃိလီၤ.
၁၉ မ့မ့ၢ် စီၤအၤဃး အဂ့ၢ်လၢအဂၤတဖၣ် ဒီးတၢ်လၢအမၤတ့ၢ်ဝဲန့ၣ် ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.+
၂၀ ဒီးစီၤအၤဃး သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤဒီး အမိၢ်ပၢ်ဖံဖု လၢပျၢၤတဖၣ် လၢစီၤဒၤဝံး အဝ့ၢ်ပူၤလီၤ. ဒီးအဖိခွါ စီၤဃံးစကံယၤ*+ ကဲထီၣ် စီၤပၤလၢအလီၢ်လီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ထီးကျိၣ်ထီးစ့.”
^ အခီပညီမ့ၢ်ဝဲ “ယဟိဝၤ ဟ့ၣ်ဆူၣ်ထီၣ်ဂံၢ်ဘါ.”
