၂ စီၤပၤ ၂:၁-၂၅
၂ ဖဲအဘူးထီၣ်လၢ ယဟိဝၤယွၤ ကဟံးထီၣ် စီၤအ့ၤလံယၤလၢ+ မူခိၣ်* လၢကလံၤမုၢ်အပူၤအခါ+ စီၤအ့ၤလံယၤ ဒီးစီၤအလံၤၡါ+ ဟးထီၣ်လၢ ဝ့ၢ်ကံးလကၤလး အပူၤလီၤ.+
၂ စီၤအ့ၤလံယၤ တဲဘၣ်စီၤအလံၤၡါလၢ “ယဟိဝၤယွၤ ကဆှၢယၤလၢ ဝ့ၢ်ဘ့ၤသ့လးလီၤ. အဃိ ဝံသးစူၤ အိၣ်ဖဲအံၤ.” ဘၣ်ဆၣ် စီၤအလံၤၡါ တဲဝဲလၢ “ယအၢၣ်လီၤလၢ ယဟိဝၤယွၤ လၢအမူဝဲတဂၤ အမဲာ်ညါ ဒီးလၢနမဲာ်ညါလၢ ယတပာ်တ့ၢ်နၤဘၣ်.” အဃိ အဝဲသ့ၣ် လဲၤလီၤလၢ ဝ့ၢ်ဘ့ၤသ့လးလီၤ.+
၃ ဒီးဝံအဖိခွါတဖၣ်* လၢအအိၣ်ဝဲလၢ ဝ့ၢ်ဘ့ၤသ့လးအပူၤန့ၣ် ဟဲထီၣ်လၢ စီၤအလံၤၡါ အအိၣ် ဒီးတဲအီၤလၢ “တနံၤအံၤ ယဟိဝၤယွၤ ကဟံးန့ၢ်ကွံာ် နကစၢ် အဃိ အဝဲတကဲ နခိၣ်လၢၤဘၣ်န့ၣ် မ့ၢ်နသ့ၣ်ညါ စ့ၢ်ကီးဧါ.”+ ဒီးစီၤအလံၤၡါ တဲဝဲလၢ “ယသ့ၣ်ညါလံ, ဘၣ်ဆၣ် တဘၣ်တဲတၢ်ဂ့ၢ်တခါန့ၣ်တဂ့ၤ.”
၄ ဒီးစီၤအ့ၤလံယၤ တဲဘၣ် စီၤအလံၤၡါလၢ “စီၤအလံၤၡါဧၢ, ယဟိဝၤယွၤ ကဆှၢယၤလၢ ဝ့ၢ်ယရံၤဃိလီၤ.+ အဃိ ဝံသးစူၤ အိၣ်ဖဲအံၤ.” ဘၣ်ဆၣ် စီၤအလံၤၡါ တဲအီၤလၢ “ယအၢၣ်လီၤလၢ ယဟိဝၤယွၤ လၢအမူဝဲတဂၤ အမဲာ်ညါ ဒီးလၢနမဲာ်ညါလၢ ယတပာ်တ့ၢ်နၤဘၣ်.” အဃိ အဝဲသ့ၣ် လဲၤလၢ ဝ့ၢ်ယရံၤဃိလီၤ.
၅ ဒီးဝံအဖိခွါတဖၣ် လၢအအိၣ်ဝဲလၢ ဝ့ၢ်ယရံၤဃိအပူၤန့ၣ် ဟဲလၢ စီၤအလံၤၡါ အအိၣ် ဒီးတဲအီၤလၢ “တနံၤအံၤ ယဟိဝၤယွၤ ကဟံးန့ၢ်ကွံာ် နကစၢ် အဃိ အဝဲတကဲနခိၣ်လၢၤဘၣ်န့ၣ် မ့ၢ်နသ့ၣ်ညါ စ့ၢ်ကီးဧါ.” ဒီးစီၤအလံၤၡါ တဲဝဲလၢ “ယသ့ၣ်ညါလံ, ဘၣ်ဆၣ် တဘၣ်တဲတၢ်ဂ့ၢ်တခါန့ၣ်တဂ့ၤ.”
၆ ဒီးစီၤအ့ၤလံယၤ တဲဘၣ် စီၤအလံၤၡါလၢ “ယဟိဝၤယွၤ ကဆှၢယၤလၢ ထံကျိယၢ်ဒ့ၣ်လီၤ. အဃိ ဝံသးစူၤ အိၣ်ဖဲအံၤ.” ဘၣ်ဆၣ် စီၤအလံၤၡါတဲအီၤလၢ “ယအၢၣ်လီၤလၢ ယဟိဝၤယွၤ လၢအမူဝဲတဂၤအမဲာ်ညါ ဒီးလၢနမဲာ်ညါလၢ ယတပာ်တ့ၢ်နၤဘၣ်.” အဃိ အဝဲသ့ၣ်ခံဂၤ လဲၤတၢ်လီၤ.
၇ ဒီးဝံအဖိခွါ အဂၤ ၅၀ န့ၣ် လဲၤဝဲစ့ၢ်ကီးလီၤ. ဒီးဖဲစီၤအ့ၤလံယၤ ဒီးစီၤအလံၤၡါ ဆၢထၢၣ်လၢ ထံကျိယၢ်ဒ့ၣ် အဃၢၤအခါ ဝံအဖိခွါ အဂၤ ၅၀ န့ၣ် ဆၢထၢၣ် ကွၢ်စိအဝဲသ့ၣ်လၢ အယံၤန့ၣ်လီၤ.
၈ ဒီးစီၤအ့ၤလံယၤ ဟံးန့ၢ်အဆ့ဖးထီ+ ဒီးထူထီၣ်ဝဲ ဒီးတီၢ်ဝဲထံလီၤ. ဒီးထံန့ၣ်သ့ၣ်ဖးဝဲ လၢအစ့ၣ်တခီ ဒီးလၢအထွဲတခီလီၤ. ဝံၤဒီးအဝဲသ့ၣ်ခံဂၤ လဲၤခီဂာ်တၢ်လၢ ဟီၣ်ခိၣ်ဃ့ထီ အလိၤလီၤ.+
၉ အဝဲသ့ၣ် လဲၤခီဂာ်တၢ်ဝံၤဒီး စီၤအ့ၤလံယၤ တဲဘၣ် စီၤအလံၤၡါလၢ “တချုးလၢ တၢ်ဟံးန့ၢ်ကွံာ်ယၤလၢ နအိၣ်ဒံးဘၣ်န့ၣ် နကဃ့လၢ ယကမၤန့ၢ်နၤ တၢ်မနုၤလဲၣ်.” စီၤအလံၤၡါ တဲဝဲလၢ “ဝံသးစူၤ မ်ယဒိးန့ၢ်ဘၣ် သး*+ လၢအအိၣ်ဒီးနၤ ခံစးတက့ၢ်.”+
၁၀ စီၤအ့ၤလံယၤ တဲဆၢဝဲလၢ “နဃ့တၢ်လၢ အကီတမံၤ. နမ့ၢ်ထံၣ်ယၤ ဖဲတၢ်ဟံးန့ၢ်ကွံာ်ယၤလၢ နအိၣ်အခါန့ၣ် အခီပညီမ့ၢ်ဝဲဒၣ် တၢ်ကကဲထီၣ်အသးဒီးနၤ ဒ်နဃ့အသိးလီၤ. ဘၣ်ဆၣ် နမ့ၢ်တထံၣ်ယၤဘၣ်န့ၣ် တၢ်တကဲထီၣ်အသးဘၣ်.”
၁၁ ဖဲအဝဲသ့ၣ်လဲၤတၢ်တခီခီ တဲတၢ်တခီခီအခါ သတူၢ်ကလာ်န့ၣ် လ့ၣ်ကဟၣ်တခိၣ် ဒီးကသ့ၣ်တဖၣ်လၢ အကပီၤဒ် မ့ၣ်အူအသိးန့ၣ်+ မၤလီၤဖး အဝဲသ့ၣ်ခံဂၤလီၤ. ဒီးစီၤအ့ၤလံယၤ ဘၣ်တၢ်ဟံးထီၣ်အီၤလၢ မူခိၣ်* လၢကလံၤမုၢ်အပူၤလီၤ.+
၁၂ ဖဲစီၤအလံၤၡါ ကွၢ်ဝဲအခါ အဝဲကိးပသူထီၣ်ဝဲလၢ “ယပၢ်ဧၢ, ယပၢ်ဧၢ, ယထံၣ်အံၣ်စရ့လး အလ့ၣ်ကဟၣ် ဒီးအပှၤဒိးကသ့ၣ်တဖၣ်မၢၤ.”+ ဖဲစီၤအလံၤၡါ တထံၣ် စီၤအ့ၤလံယၤလၢၤဘၣ်အခါ အဝဲဖီၣ်လီၤအနီၢ်ကစၢ် ဆ့ကၤ ဒီးဖှီညာ်ဝဲခံက့လီၤ.+
၁၃ ဝံၤဒီး စီၤအလံၤၡါ ထၢထီၣ်ဝဲစီၤအ့ၤလံယၤ အဆ့ဖးထီ+ လၢအလီၤတဲာ်လၢ အလိၤန့ၣ်လီၤ. ဒီးစီၤအလံၤၡါ က့ၤဆၢထၢၣ်ဝဲလၢ ထံကျိယၢ်ဒ့ၣ် အကၢၢ်နံၤလီၤ.
၁၄ ဒီးအဝဲတီၢ်ဝဲထံလၢ စီၤအ့ၤလံယၤ အဆ့ဖးထီလၢ အလီၤတဲာ်လၢ အလိၤတဘ့ၣ်န့ၣ် ဒီးတဲဝဲလၢ “စီၤအ့ၤလံယၤ အကစၢ်ယဟိဝၤယွၤ အိၣ်ဖဲလဲၣ်.” ဒီးဖဲအဝဲတီၢ်ထံအခါ ထံသ့ၣ်ဖးဝဲ လၢအစ့ၣ်တခီ ဒီးအထွဲတခီ ဝံၤဒီးအဝဲလဲၤခီဂာ်ဝဲလီၤ.+
၁၅ ဖဲဝံအဖိခွါ လၢအအိၣ်ဝဲလၢ ဝ့ၢ်ယရံၤဃိန့ၣ် ထံၣ်စိအီၤအခါ အဝဲသ့ၣ်တဲဝဲလၢ “သးလၢ အအိၣ်ဒီး စီၤအ့ၤလံယၤန့ၣ် လီၤဘၣ်လၢ စီၤအလံၤၡါ အလိၤလံ.”+ ဒီးအဝဲသ့ၣ် လဲၤထံၣ်လိာ်သးဒီးအီၤ ဒီးထိၣ်လီၤပှီၤအသးလၢ အမဲာ်ညါလီၤ.
၁၆ အဝဲသ့ၣ် တဲဘၣ်စီၤအလံၤၡါလၢ “ကစၢ်ဧၢ, ပှၤပိာ်ခွါလၢ အမၤတၢ်သ့ဂ့ၤဂ့ၤ အဂၤ ၅၀ န့ၣ်အိၣ်ဒီးပှၤဖဲအံၤလီၤ. ဝံသးစူၤ ပျဲအဝဲသ့ၣ် လဲၤဃု နကစၢ်တက့ၢ်. ဘၣ်သ့ၣ်သ့ၣ် ယဟိဝၤယွၤ အသးစီဆှံ ဟံးထီၣ်အီၤဒီး ကွံာ်လီၤအီၤလၢ ကစၢၢ်တဖျၢၣ်ဖျၢၣ်အလိၤ မ့တမ့ၢ် လၢတၢ်တြီၤပူၤ တတီၤတီၤလီၤ.”+ ဘၣ်ဆၣ် စီၤအလံၤၡါ တဲဝဲလၢ “တဘၣ်မၢလီၤ အဝဲသ့ၣ်တဂ့ၤ.”
၁၇ ဘၣ်ဆၣ် အဝဲသ့ၣ်မၢဆူၣ် စီၤအလံၤၡါ တုၤလၢအမဲာ်ဆှးဝဲ အဃိ စီၤအလံၤၡါတဲဝဲလၢ “မၢလီၤအဝဲသ့ၣ်ဟီ.” အဃိ အဝဲသ့ၣ်မၢလီၤ ပှၤပိာ်ခွါအဂၤ ၅၀ လီၤ. ဒီးပှၤတဖၣ်န့ၣ် ဟးဃု စီၤအ့ၤလံယၤ သၢသီဘၣ်ဆၣ် ဃုအီၤတဘၣ်ဘၣ်.
၁၈ ဖဲအဝဲသ့ၣ် ဟဲက့ၤတုၤလၢ စီၤအလံၤၡါ အအိၣ်အခါ စီၤအလံၤၡါ အိၣ်ဝဲလၢ ဝ့ၢ်ယရံၤဃိအပူၤလီၤ.+ ဒီးစီၤအလံၤၡါ တဲအဝဲသ့ၣ်လၢ “ယတဲသုလၢ လဲၤတဂ့ၤတမ့ၢ်ဧီၤ.”
၁၉ လၢခံ ပှၤပိာ်ခွါတဖၣ်လၢ ဝ့ၢ်ပူၤန့ၣ် တဲဘၣ် စီၤအလံၤၡါလၢ “ကစၢ်ဧၢ, နထံၣ်ဘၣ်လၢ ဝ့ၢ်တဖျၢၣ်အံၤ အိၣ်ဝဲဂ့ၤဂ့ၤလီၤ.+ ဘၣ်ဆၣ် ထံတဖၣ် ဘၣ်အၢဝဲ ဒီးဟီၣ်ခိၣ် တဒုးမဲထီၣ်သၣ်ထီၣ်တၢ်ဘၣ်.”*
၂၀ အဃိ စီၤအလံၤၡါ တဲဝဲလၢ “ဟဲစိာ်န့ၢ်ယၤ လီခီဆံးဆံးဖိ သီသီတဘ့ၣ် ဒီးထၢနုာ်အံသၣ် လၢအပူၤတက့ၢ်.” ဒီးအဝဲသ့ၣ် ဟဲစိာ်န့ၢ်အီၤလီၤ.
၂၁ ဒီးအဝဲလဲၤလၢ ထံထီၣ်ပၢၢ်န့ၣ် ဒီးဖှံလီၤအံသၣ်လၢ အပူၤဒီး+ တဲဝဲလၢ “ယဟိဝၤယွၤ တဲဝဲဒ်အံၤ, ‘ယမၤကဆှီ ထီၣ်ထံအံၤလံ. ထံအံၤ တဒုးအိၣ်ထီၣ် တၢ်သံလၢၤဘၣ် ဒီးတဒုးကဲထီၣ် ပိာ်မုၣ်တဖၣ်လၢ ပှၤတူာ်ဖိလၢၤဘၣ်.’”*
၂၂ ဒီးထံတဖၣ်န့ၣ် ဂ့ၤဝဲ တုၤလၢ မုၢ်မဆါတနံၤအံၤ ဒ်စီၤအလံၤၡါ တဲတ့ၢ်ဝဲအသိးလီၤ.
၂၃ ဒီးစီၤအလံၤၡါ ဟးထီၣ်ဝဲဖဲန့ၣ် ဒီးလဲၤဝဲလၢ ဝ့ၢ်ဘ့ၤသ့လးလီၤ. ဖဲအလဲၤလၢကျဲအခါန့ၣ် ဖိသၣ် ပိာ်ခွါတနီၤလၢ အဟးထီၣ်လၢ ဝ့ၢ်ပူၤန့ၣ် ဒုၣ်ဒွဲၣ်အီၤ+ ဒီးတဲအီၤ တဘျီဝံၤတဘျီလၢ “တၢ်လ့ၤခိၣ်ဧၢ, လဲၤထီၣ်သၢၤ. တၢ်လ့ၤခိၣ်ဧၢ, လဲၤထီၣ်သၢၤ.”
၂၄ လၢခံ စီၤအလံၤၡါ တရံးအသးဒီး ကွၢ်အဝဲသ့ၣ် ဒီးဆိၣ်အၢအဝဲသ့ၣ်လၢ ယဟိဝၤယွၤအမံၤလီၤ. ဝံၤဒီး တၤသူမိၢ်ခံဒု+ ဟဲထီၣ်လၢ ပှၢ်ပူၤဒီး အ့ၣ်ဖှီကွံာ်ဝဲ ဖိသၣ်ပိာ်ခွါ ၄၂ ဂၤန့ၣ်လီၤ.+
၂၅ ဒီးစီၤအလံၤၡါ ဆဲးလဲၤဝဲလၢ ကစၢၢ်ကၢ်မ့ၤလး+ ဝံၤဒီးအဝဲ ဟဲက့ၤကဒါလၢ ဝ့ၢ်ၡၤမရံလီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “မူကပိာ်လိၤ.”
^ ဖျါလၢ “ဝံအဖိခွါတဖၣ်” န့ၣ်အဲၣ်ဒိးတဲဝဲ ဝံတဖၣ်လၢ အကထီၣ် တၢ်မၤလိတပူၤဃီ မ့တမ့ၢ် ဝံတဖၣ်လၢ အမၤသကိးတၢ်.
^ တၢ်လၢသးန့ၣ် အဲၣ်ဒိးတဲဝဲ ကစၢ်ယွၤအသးစီဆှံ မ့တမ့ၢ် စီၤအ့ၤလံယၤ အတၢ်ပာ်သူၣ်ပာ်သး.
^ မ့ၢ်စ့ၢ်ကီး “မူကပိာ်လိၤ.”
^ ဘၣ်သ့ၣ်သ့ၣ် ကမ့ၢ် “တၢ်ဟုးဟးဂီၤ.”
^ ဘၣ်သ့ၣ်သ့ၣ် ကမ့ၢ် “တၢ်ဟုးဟးဂီၤ.”
