၂ စီၤပၤ ၂၁:၁-၂၆
၂၁ ဖဲစီၤမနၤၡ့ၤ+ ကဲထီၣ်စီၤပၤအခါ အသးနံၣ်အိၣ်ဝဲ ၁၂ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၅၅ နံၣ်လီၤ.+ စီၤမနၤၡ့ၤ အမိၢ်မ့ၢ်ဝဲ နီၢ်ဃ့ပစံဘၤလီၤ.
၂ စီၤမနၤၡ့ၤ မၤတၢ်လၢ ယဟိဝၤယွၤ ထံၣ်ဝဲလၢအအၢ ဒီးအဝဲမၤတၢ်လၢ အလီၤသးဘၣ်အၢ ဒ်ပှၤကလုာ်တဖၣ်လၢ+ ယဟိဝၤယွၤ နီဟးထီၣ်ကွံာ်လၢ အံၣ်စရ့လး အမဲာ်ညါ မၤဝဲအသိးန့ၣ်လီၤ.+
၃ အဝဲတ့ထီၣ်က့ၤ တၢ်လီၢ်ထီၣ်ထီတဖၣ်လၢ အပၢ်စီၤဃံးစကံယၤ မၤလီၤမၢ်ကွံာ်ဝဲ+ ဒီးအဝဲတ့ထီၣ် တၢ်လုၢ်လီၢ်တဖၣ် လၢဘဧၤလးအဂီၢ် ဒီးအဝဲတ့ထီၣ် တၢ်စီဆှံအထူၣ်*+ ဒ်အံၣ်စရ့လး အစီၤပၤအၤဃာ် မၤတ့ၢ်ဝဲအသိးလီၤ.+ ဒီးအဝဲဘူၣ်ထီၣ်ဘါထီၣ်ဝဲ မူခိၣ်အသုးမုၢ်ခဲလၢာ်* ဒီးမၤအဝဲသ့ၣ် အတၢ်လီၤ.+
၄ စီၤမနၤၡ့ၤ တ့ထီၣ်စ့ၢ်ကီး တၢ်လုၢ်လီၢ်တဖၣ်လၢ ယဟိဝၤယွၤ အဟံၣ်အပူၤလီၤ.+ ဘၣ်ဃးဒီး ဟံၣ်တဖျၢၣ်အံၤ ယဟိဝၤယွၤ တဲပာ်စၢၤဝဲလၢ “လၢဝ့ၢ်ယရူၤၡလ့ၣ်အပူၤန့ၣ် ယမံၤကအိၣ် ဖဲန့ၣ်လီၤ.”+
၅ ဒီးလၢ ယဟိဝၤယွၤ အဟံၣ် အတၢ်ပျီခံဘ့ၣ်အပူၤန့ၣ်+ အဝဲတ့ထီၣ် တၢ်လုၢ်လီၢ်တဖၣ် လၢမူခိၣ်အသုးမုၢ်တဖၣ် အဂီၢ်လီၤ.+
၆ ဒီးအဝဲလုၢ်ထီၣ် အဖိခွါလၢ မ့ၣ်အူလီၤ. တကးဒံးဘၣ် အဝဲအူတၢ်သမူတၢ်, ကၢ်တၢ်ဒွးတၢ်+ ဒီးပာ်ထီၣ်ဝဲ ပှၤလၢအဆဲးကျိးဒီးပှၤသံ ဒီးပှၤလၢ အဟီဆိပာ်စၢၤတၢ်တဖၣ်လီၤ.+ တၢ်လၢ ယဟိဝၤယွၤ ထံၣ်ဝဲလၢ အအၢန့ၣ် အဝဲမၤဝဲ အါအါဂီၢ်ဂီၢ် ဒီးမၤဆါ ကစၢ်ယွၤအသးလီၤ.
၇ တၢ်စီဆှံအထူၣ်+ အတၢ်ဂီၤလၢ အဝဲစိးပျၤထီၣ်ဝဲန့ၣ် အဝဲပာ်လီၤဝဲလၢ တၢ်လုၢ်ဟံၣ်ပူၤလီၤ. ဘၣ်ဃးဒီး ဟံၣ်တဖျၢၣ်အံၤ ယဟိဝၤယွၤ တဲပာ်စၢၤ စီၤဒၤဝံး ဒီးအဖိခွါ စီၤၡလိၤမိၤ ဒ်အံၤ, “လၢအံၣ်စရ့လး အဒူၣ်တဖၣ် အဟီၣ်ကဝီၤအပူၤ ယဃုထၢထီၣ် ဟံၣ်တဖျၢၣ်အံၤ ဒီးဝ့ၢ်ယရူၤၡလ့ၣ် ဒ်သိးယမံၤ ကအိၣ်ဖဲန့ၣ် ထီဘိအဂီၢ်လီၤ.+
၈ ဒီးအံၣ်စရ့လး အပှၤဂီၢ်မုၢ် မ့ၢ်မၤထွဲ ယခ့ယပှၤ စီၤမိၤၡ့ အတၢ်သိၣ်တၢ်သီခဲလၢာ် လၢအမ့ၢ် တၢ်ခဲလၢာ်လၢ ယမၤလိာ်အဝဲသ့ၣ်န့ၣ်+ ယတနီဟးထီၣ် အဝဲသ့ၣ်လၢ ကီၢ်တဘ့ၣ်လၢ ယဟ့ၣ်လီၤ အဝဲသ့ၣ် အမိၢ်ပၢ်ဖံဖု လၢပျၢၤတဖၣ်န့ၣ်+ နီတဘျီလၢၤဘၣ်.”
၉ ဘၣ်ဆၣ် အဝဲသ့ၣ်တဒိကနၣ်ဘၣ် ဒီးစီၤမနၤၡ့ၤ ဆဲးဆှၢကမၣ်အဝဲသ့ၣ် ဒီးဆီၣ်ထွဲအဝဲသ့ၣ်လၢ ကမၤတၢ်အၢအၢသီသီ နးန့ၢ်ဒံး ပှၤကလုာ်တဖၣ်လၢ ယဟိဝၤယွၤ မၤဟးဂီၤကွံာ်လၢ ပှၤအံၣ်စရ့လးဖိ အမဲာ်ညါန့ၣ်လီၤ.+
၁၀ ယဟိဝၤယွၤ ဆဲးတဲဝဲတလီၢ်လီၢ် ခီဖျိအခ့အပှၤ လၢအမ့ၢ် ဝံတဖၣ်လၢ+
၁၁ “ယူဒၤ အစီၤပၤမနၤၡ့ၤ မၤတၢ်လၢ အလီၤသးဘၣ်အၢတဖၣ်အံၤ ခဲလၢာ်လီၤ. အဝဲမၤတၢ်အၢ ဒိၣ်န့ၢ်ဒံး ပှၤအမိၢ်ဖိ+ ကိးဂၤဒဲးလၢ အအိၣ်မူဝဲလၢ အမဲာ်ညါ+ ဒီးအဝဲဆီၣ်ထွဲ ယူဒၤ အပှၤဂီၢ်မုၢ်လၢ ကမၤတၢ်ဒဲးဘး ခီဖျိလၢ အတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ် အဃိလီၤ.
၁၂ လၢတၢ်န့ၣ်အဃိ အံၣ်စရ့လး အကစၢ် ယဟိဝၤယွၤ တဲဝဲဒ်အံၤ, ‘ယကဒုးလီၤဘၣ် တၢ်ကီတၢ်ခဲ ဒိၣ်ဒိၣ်မုၢ်မုၢ်လၢ ဝ့ၢ်ယရူၤၡလ့ၣ်+ ဒီးယူဒၤဘီမုၢ် အပူၤ တုၤဒၣ်လဲာ် ပှၤတဂၤဂ့ၤတဂၤဂ့ၤ လၢအနၢ်ဟူဘၣ် တၢ်ဂ့ၢ်တခါအံၤန့ၣ် ကဖုးဘၣ်အသးလီၤ.*+
၁၃ ဒီးယကထုးယူာ်ထီၣ် ဝ့ၢ်ၡၤမရံ+ အတၢ်ထိၣ်ပျံၤတဘိ+ လၢဝ့ၢ်ယရူၤၡလ့ၣ် အဖီခိၣ် ဒီးယကသူ နီၣ်မၤပၢၤထီၣ်တၢ် လၢအဘၣ်တၢ်သူအီၤလၢ စီၤအၤဃာ်+ အဒူၣ်ဖိထၢဖိအဂီၢ် ဒီးယကထွါကွံာ် ဝ့ၢ်ယရူၤၡလ့ၣ် ဒ်ပှၤထွါပျီလီခီတဘ့ၣ် ဒီးပာ်အီထီလာ်အီၤ အသိးလီၤ.+
၁၄ ယကပာ်တ့ၢ်ကွံာ် ယတၢ်န့ၢ်သါလၢ+ အအိၣ်တ့ၢ်တဖၣ်အံၤ ဒီးဟ့ၣ်လီၤကွံာ် အဝဲသ့ၣ်လၢ အဒုၣ်အဒါတဖၣ် အစုပူၤလီၤ. ဒီးအဒုၣ်အဒါတဖၣ် ကက့ၤဖီၣ်အဝဲသ့ၣ် ဒီးဟံးန့ၢ် အဝဲသ့ၣ် အတၢ်ဖိတၢ်လံၤ,+
၁၅ မ့ၢ်လၢ အဝဲသ့ၣ် မၤတၢ်လၢ ယထံၣ်လၢအအၢ ဒီးစးထီၣ်လၢ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် ဟးထီၣ်လၢ ကီၢ်အဲၤကူပတူးအပူၤ တုၤလီၤလၢ မုၢ်မဆါတနံၤအံၤန့ၣ် အဝဲသ့ၣ် မၤဆါယသး တလီၢ်လီၢ် အဃိလီၤ.’”+
၁၆ စီၤမနၤၡ့ၤ အတၢ်ဒဲးဘးအိၣ် ခီဖျိလၢ အဆီၣ်ထွဲ ယူဒၤအပှၤဂီၢ်မုၢ်လၢ အဝဲသ့ၣ် ကမၤတၢ်လၢ ယဟိဝၤယွၤ ထံၣ်ဝဲလၢအအၢ တကးဒံးဘၣ် အဝဲလူလီၤစ့ၢ်ကီး ပှၤလၢအတၢ်ကမၣ် တအိၣ်ဘၣ်တဖၣ် အသွံၣ် အါအါဂီၢ်ဂီၢ် တုၤလၢ အအိၣ်ပှဲၤလၢ ဝ့ၢ်ယရူၤၡလ့ၣ်အပူၤ လၢအံၤတခီ ပၢၢ်တုၤလၢ အဝဲတခီအဃိလီၤ.+
၁၇ မ့မ့ၢ် စီၤမနၤၡ့ၤ အဂ့ၢ်လၢအဂၤတဖၣ်, တၢ်လၢအမၤတ့ၢ်ဝဲခဲလၢာ် ဒီးတၢ်ဒဲးဘးလၢ အမၤတ့ၢ်ဝဲတဖၣ်န့ၣ် ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၁၈ ဒီးစီၤမနၤၡ့ၤ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤလၢ အဟံၣ်အတၤသူတၤသၣ်ကရၢၢ်ပူၤ လၢအမ့ၢ် စီၤဧူးစး+ အတၤသူတၤသၣ်ကရၢၢ်ပူၤန့ၣ်လီၤ. ဒီးအဖိခွါ စီၤအၤမိၣ် ကဲထီၣ်စီၤပၤ လၢအလီၢ်လီၤ.
၁၉ ဖဲစီၤအၤမိၣ်+ ကဲထီၣ်စီၤပၤအခါ အသးနံၣ်အိၣ်ဝဲ ၂၂ နံၣ် ဒီးအဝဲပၢဘၣ်တၢ် လၢဝ့ၢ်ယရူၤၡလ့ၣ်အပူၤ ခံနံၣ်လီၤ.+ အမိၢ်မ့ၢ်ဝဲ နီၢ်မၡူးလမံး လၢအမ့ၢ် စီၤဃၤရူး လၢအအိၣ်လၢ ဝ့ၢ်ယၤတဘၤန့ၣ် အဖိမုၣ်လီၤ.
၂၀ စီၤအၤမိၣ် ဆဲးမၤတၢ်လၢ ယဟိဝၤယွၤ ထံၣ်ဝဲလၢအအၢ ဒ်အပၢ် စီၤမနၤၡ့ၤ မၤတ့ၢ်ဝဲအသိးလီၤ.+
၂၁ အဝဲအိၣ်မူပိာ်ထွဲ ဒ်အပၢ်အိၣ်မူဝဲအသိး လၢတၢ်ခဲလၢာ်အပူၤ ဒီးအဝဲဆဲး ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ် လၢအပၢ် ဘူၣ်ထီၣ်ဘါထီၣ်တ့ၢ်ဝဲ ဒီးမၤအဝဲသ့ၣ် အတၢ်န့ၣ်လီၤ.+
၂၂ အဃိ အဝဲပာ်တ့ၢ်ကွံာ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤ ဒီးအဝဲတအိၣ်မူမၤထွဲ ဒ်ယဟိဝၤယွၤ အတၢ်ဘၣ်သး အသိးဘၣ်.+
၂၃ လၢခံန့ၣ် စီၤအၤမိၣ် အခ့အပှၤတဖၣ် ကူၣ်အၢအီၤ ဒီးမၤသံကွံာ်အီၤလၢ အနီၢ်ကစၢ် အဟံၣ်ပူၤလီၤ.
၂၄ ဒီးပှၤထံဖိကီၢ်ဖိတဖၣ် မၤသံကွံာ်ဝဲ ပှၤခဲလၢာ်လၢ အကူၣ်သံ စီၤပၤအၤမိၣ်န့ၣ်လီၤ. ဝံၤဒီး အဝဲသ့ၣ်ပာ်ထီၣ် စီၤအၤမိၣ်အဖိခွါ စီၤယိၤၡံယၤ ဒ်စီၤပၤအသိး လၢအလီၢ်လီၤ.+
၂၅ မ့မ့ၢ် စီၤအၤမိၣ် အဂ့ၢ်လၢအဂၤတဖၣ် ဒီးတၢ်လၢအမၤတ့ၢ်ဝဲန့ၣ် ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၂၆ ဒီးအဝဲသ့ၣ်ခူၣ်လီၤကွံာ် စီၤအၤမိၣ်လၢ အနီၢ်ကစၢ်အသွၣ်ခိၣ် လၢစီၤဧူးစး+ အတၤသူတၤသၣ်ကရၢၢ်ပူၤ ဒီးအဖိခွါ စီၤယိၤၡံယၤ+ ကဲထီၣ်စီၤပၤ လၢအလီၢ်လီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ကတိၤအခီပညီ.
^ ဖျါလၢအဲၣ်ဒိးတဲဝဲ မူဖျၢၣ်တဖၣ် ဒ်သိးဒီး မုၢ်, လါ ဒီးဆၣ်တဖၣ်.
^ အခီပညီလိၤလိၤ “အနၢ်ခံခီလၢာ် ကကဆှၣ်ထီၣ်.”
