၂ စီၤပၤ ၂၂:၁-၂၀
၂၂ ဖဲစီၤယိၤၡံယၤ+ ကဲထီၣ်စီၤပၤအခါ အသးနံၣ်အိၣ်ဝဲ ဃိးနံၣ်လီၤ. ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၃၁ နံၣ်လီၤ.+ အမိၢ်မ့ၢ်ဝဲ နီၢ်ယဒံဒၤ လၢအမ့ၢ် စီၤဧဒါယၤ လၢအအိၣ်လၢ ဝ့ၢ်ဘိးစကးန့ၣ်+ အဖိမုၣ်လီၤ.
၂ စီၤယိၤၡံယၤ မၤတၢ်လၢ ယဟိဝၤယွၤထံၣ်ဝဲလၢအဂ့ၤ ဒီးအဝဲအိၣ်မူပိာ်ထွဲ ဒ်အဖုဖးဒိၣ် စီၤဒၤဝံးအသိးလၢ+ တၢ်ခဲလၢာ်အပူၤ ဒီးအဝဲတလဲၤလၢ ကျဲလၢအကမၣ်နီတဘိဘၣ်.
၃ ဖဲစီၤပၤယိၤၡံယၤ ပၢတၢ် ၁၈ နံၣ်တနံၣ်န့ၣ် အမၢလီၤဝဲ စီၤအစါလံယၤ အဖိခွါ နဲၣ်ရွဲၣ် စီၤၡၤဖၣ် လၢအမ့ၢ် စီၤမၡူလၣ် အလံၤခွါန့ၣ် ဆူယဟိဝၤယွၤ အဟံၣ်+ ဒီးတဲပာ်အီၤလၢ
၄ “လဲၤလၢ ပှၤလုၢ်တၢ်ခိၣ် အဒိၣ်ကတၢၢ် စီၤဃံးလကံယၤ+ အအိၣ် ဒီးအဝဲကဘၣ် ဟံးန့ၢ် ကျိၣ်စ့လၢ ပှၤဟဲစိာ်အီၤလၢ ယဟိဝၤယွၤ အဟံၣ်ပူၤလၢ+ ပှၤခိးတြဲၤဖိတဖၣ် ထၢဖှိၣ်ပာ်စၢၤဝဲလၢ ပှၤဂီၢ်မုၢ်အအိၣ် န့ၣ်တက့ၢ်.+
၅ မၢအဝဲသ့ၣ် ဟ့ၣ်လီၤကျိၣ်စ့န့ၣ်လၢ ပှၤလၢအဘၣ်တၢ်ဃုထၢအီၤလၢ ကတီခိၣ်ရိၤမဲ ယဟိဝၤယွၤ အဟံၣ် အတၢ်မၤတက့ၢ်. ဝံၤဒီး အဝဲသ့ၣ် ကဟ့ၣ်လီၤဝဲ ပှၤမၤတၢ်ဖိတဖၣ်ဒ်သိး အကဘှီဂ့ၤထီၣ်က့ၤ ယဟိဝၤယွၤ အဟံၣ်+ ဖဲအဟးဂီၤဝဲ တတီၤဂ့ၤ တတီၤဂ့ၤလီၤ.
၆ ပှၤသ့ၣ်တဖၣ်န့ၣ် မ့ၢ်ဝဲ ပှၤစုသ့ဖိတဖၣ်, ပှၤလၢအတ့တၢ်ဘှီတၢ် လၢသ့ၣ် ဒီးပှၤလၢအတ့တၢ်ဘှီတၢ် လၢလၢၢ်တဖၣ်လီၤ. ဒီးအဝဲသ့ၣ် ကဘၣ်သူကျိၣ်စ့ ဒ်သိး ကပှ့ၤဝဲ သ့ၣ်ဘၣ် ဒီးလၢၢ်လၢ အဘၣ်တၢ်ပျၤန့ၢ်အီၤတဖၣ် ဒ်သိး ကဘှီဂ့ၤထီၣ်က့ၤ ဟံၣ်အဂီၢ်လီၤ.+
၇ ပှၤလၢအဘၣ်တၢ်ဃုထၢအီၤလၢ ကတီခိၣ်ရိၤမဲ တၢ်မၤအံၤ ဒီးဒိးန့ၢ်ဘၣ် ကျိၣ်စ့န့ၣ် မ့ၢ်ပှၤလၢ ပှၤနာ်န့ၢ်အီၤသ့အဃိ အဝဲသ့ၣ် တလိၣ်ကွဲးနီၣ်စ့စရီဘၣ်.”+
၈ လၢခံ ပှၤလုၢ်တၢ်ခိၣ် အဒိၣ်ကတၢၢ် စီၤဃံးလကံယၤ တဲဘၣ် နဲၣ်ရွဲၣ်စီၤၡၤဖၣ်လၢ+ “ယထံၣ်န့ၢ် လံာ်တၢ်သိၣ်တၢ်သီတဘ့ၣ်+ လၢယဟိဝၤယွၤ အဟံၣ်ပူၤလီၤ.” ဒီးစီၤဃံးလကံယၤ ဟ့ၣ်လီၤဝဲ လံာ်တဘ့ၣ်န့ၣ်လၢ စီၤၡၤဖၣ်အအိၣ် ဒီးစီၤၡၤဖၣ် ဖးဝဲလီၤ.+
၉ ဝံၤဒီး နဲၣ်ရွဲၣ်စီၤၡၤဖၣ် လဲၤတဲဘၣ် စီၤပၤလၢ “နခ့နပှၤတဖၣ် ထၢဖှိၣ်* ဝဲကျိၣ်စ့လၢ အဝဲသ့ၣ် ထံၣ်ဝဲလၢ ဟံၣ်ပူၤ ဒီးအဝဲသ့ၣ် ဟ့ၣ်လီၤဝဲ ပှၤလၢ အတီခိၣ်ရိၤမဲတၢ်မၤလၢ ယဟိဝၤယွၤ အဟံၣ်ပူၤလီၤ.”+
၁၀ နဲၣ်ရွဲၣ် စီၤၡၤဖၣ် တဲစ့ၢ်ကီး စီၤပၤလၢ “ပှၤလုၢ်တၢ်ဒိၣ် စီၤဃံးလကံယၤ ဟ့ၣ်လီၤယၤ လံာ်တဘ့ၣ်လီၤ.”+ ဝံၤဒီး စီၤၡၤဖၣ် ဖးထီၣ်ဝဲ လံာ်တဘ့ၣ်န့ၣ် လၢစီၤပၤ အမဲာ်ညါလီၤ.
၁၁ ဖဲစီၤပၤနၢ်ဟူဘၣ် တၢ်ကွဲးအသးလၢ လံာ်တၢ်သိၣ်တၢ်သီအပူၤအခါ အဝဲ ဖှီညာ်လီၤအဆ့ကၤလီၤ.+
၁၂ ဒီးစီၤပၤ မၤလိာ် ပှၤလုၢ်တၢ်ဒိၣ် စီၤဃံးလကံယၤ, စီၤၡၤဖၣ် အဖိခွါ စီၤအဃံကၣ်,+ စီၤမံၤကါယၤ အဖိခွါ စီၤဧးကဘိၢ်, နဲၣ်ရွဲၣ် စီၤၡၤဖၣ် ဒီးစီၤပၤအခ့အပှၤ စီၤဧစါယၤလၢ
၁၃ “မ့ၢ်လၢ ပမိၢ်ပၢ်ဖံဖု လၢပျၢၤတဖၣ် တဒိကနၣ် တၢ်ကွဲးအသးလၢ လံာ်တဘ့ၣ်အံၤအပူၤဘၣ် ဒီးတမၤထွဲတၢ်လၢ အဘၣ်တၢ်ကွဲးအီၤလၢ ပကြၢးမၤအီၤတဖၣ်အံၤဘၣ် အဃိ ယဟိဝၤယွၤ သးပှံၢ်ထီၣ်ပှၤဒိၣ်မးလံ.+ ဘၣ်ဃးဒီး တၢ်ကွဲးအသးလၢ လံာ်လၢ ပှၤထံၣ်န့ၢ်အီၤ တဘ့ၣ်အံၤအပူၤန့ၣ် လဲၤသံကွၢ်တၢ်လၢ ယဟိဝၤယွၤအအိၣ် လၢယဂီၢ်, လၢပှၤဂီၢ်မုၢ်အဂီၢ် ဒီးလၢကယဲၢ် ပှၤအိၣ်လၢ ယူဒၤဘီမုၢ်ပူၤ အဂီၢ်တက့ၢ်.”
၁၄ အဃိ ပှၤလုၢ်တၢ်ဒိၣ် စီၤဃံးလကံယၤ, စီၤအဃံကၣ်, စီၤဧးကဘိၢ်, စီၤၡၤဖၣ် ဒီးစီၤဧစါယၤ လဲၤဝဲလၢ စီၤၡၤလူၣ်အမါ လၢအမ့ၢ် ဝံမုၣ်+ နီၢ်ဃူးလဒါ အအိၣ်လီၤ. စီၤၡၤလူၣ်န့ၣ် မ့ၢ်ဝဲပှၤကွၢ်ထွဲ တၢ်ကူတၢ်သိး ဒီးအမ့ၢ်ဝဲ စီၤတံးကဝၤ အဖိခွါလီၤ. ဒီးစီၤတံးကဝၤ အပၢ်မ့ၢ်ဝဲ စီၤဃၢ်ဃၣ်လီၤ. ဒီးနီၢ်ဃူးလဒါန့ၣ် အိၣ်ဝဲလၢ ဝ့ၢ်ယရူၤၡလ့ၣ် တၢ်လီၢ်ခံတီၤတတီၤအဃိ အဝဲသ့ၣ် လဲၤတဲတၢ်ဒီးအီၤဖဲန့ၣ်လီၤ.+
၁၅ နီၢ်ဃူးလဒါ တဲဘၣ်အဝဲသ့ၣ်လၢ “အံၣ်စရ့လးအကစၢ် ယဟိဝၤယွၤ တဲဝဲဒ်အံၤ, ‘တဲဘၣ် ပှၤပိာ်ခွါတဂၤ လၢအဆှၢလီၤသုလၢ ယအိၣ်န့ၣ်လၢ
၁၆ “ယဟိဝၤယွၤ တဲဝဲဒ်အံၤ, ‘ယကဒုးလီၤ တၢ်နးတၢ်ဖှီၣ် လၢတၢ်လီၢ်အံၤ ဒီးစံၣ်ညီၣ် ပှၤလၢ အအိၣ်လၢအပူၤတဖၣ်လီၤ. တၢ်ကွဲးအသးလၢ လံာ်တဘ့ၣ်အံၤအပူၤ လၢယူဒၤဘီမုၢ်အစီၤပၤ ဖးဝဲန့ၣ်+ ကဟဲလၢထီၣ်ပှဲၤထီၣ် ခဲလၢာ်လီၤ.
၁၇ မ့ၢ်လၢ အဝဲသ့ၣ် ပာ်တ့ၢ်ကွံာ်ယၤ ဒီးဒွဲၣ်ခုၣ်ထီၣ်တၢ်လုၢ်လၢ ယွၤအဂၤတဖၣ်အအိၣ်+ ဒ်သိးအဝဲသ့ၣ် ကမၤဆါယသးလၢ တၢ်လၢအဝဲသ့ၣ် မၤဝဲခဲလၢာ်အဃိ+ ယကသးပှံၢ်ထီၣ် တၢ်လီၢ်အံၤ ဒ်မ့ၣ်အူလၢ ပှၤမၤလီၤပံးအီၤ တန့ၢ်ဘၣ်အသိးလီၤ.’”+
၁၈ ဘၣ်ဆၣ် မ့မ့ၢ် ယူဒၤဘီမုၢ် အစီၤပၤ လၢအဆှၢလီၤသု ဒ်သိး သုကသံကွၢ်တၢ်လၢ ယၤ, ယဟိဝၤယွၤ အအိၣ်န့ၣ် သုကဘၣ်တဲအီၤဒ်အံၤလီၤ. “အံၣ်စရ့လးအကစၢ် ယဟိဝၤယွၤ တဲဝဲလၢ ‘ခီဖျိလၢ တၢ်ကတိၤလၢ နနၢ်ဟူဘၣ်အီၤတဖၣ်န့ၣ်
၁၉ ထိၣ်ဟူးထိၣ်ဂဲၤထီၣ်နသး* ဒီးနဆီၣ်လီၤနသးလၢ+ ယၤ, ယဟိဝၤယွၤ အမဲာ်ညါ, နဖှီညာ်လီၤနဆ့ကၤ+ ဒီးနဟီၣ်လၢ ယမဲာ်ညါ ဖဲနနၢ်ဟူဘၣ် ယတၢ်စံၣ်ညီၣ်လၢ တၢ်လီၢ်အံၤ ဒီးပှၤလၢအအိၣ်ဖဲန့ၣ်တဖၣ် ကကဲထီၣ်တၢ်လၢ အလီၤပျံၤလီၤဖုး ဒီးကဘၣ်တၢ်ဆိၣ်အၢ အဃိ ယၤ, ယဟိဝၤယွၤ စ့ၢ်ကီးတဲနၤလၢ ယနၢ်ဟူ နတၢ်ထုကဖၣ်လံ.
၂၀ လၢတၢ်န့ၣ်အဃိ ယကပာ်ဖှိၣ်နၤ ဃုာ်ဒီးနမိၢ်ပၢ်ဖံဖု လၢပျၢၤတဖၣ်လီၤ.* ဒီးပှၤကခူၣ်လီၤကွံာ်နၤမုာ်မုာ် ဒီးနတထံၣ်ဘၣ် တၢ်နးတၢ်ဖှီၣ်လၢ ယကဒုးလီၤလၢ တၢ်လီၢ်အံၤန့ၣ်ဘၣ်.’”’” ဝံၤဒီးအဝဲသ့ၣ် ဟဲက့ၤတဲဘၣ် စီၤပၤလၢ တၢ်ဂ့ၢ်ခဲလၢာ်လီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “လူလီၤ.”
^ အခီပညီလိၤလိၤ “ကပုာ်လုး.”
^ တၢ်ကတိၤတဖျၢၣ်အံၤ မ့ၢ်တၢ်ကတိၤဒိလၢ အအဲၣ်ဒိးတဲဝဲလၢ ပှၤကသံ.
