၂ စီၤပၤ ၃:၁-၂၇
၃ ဖဲယူဒၤအစီၤပၤ ယဟိၤၡၤဖး ပၢတၢ် ၁၈ နံၣ်တနံၣ်န့ၣ် စီၤအၤဃာ် အဖိခွါ စီၤယဟိရၣ်+ ကဲထီၣ်စီၤပၤလၢ အံၣ်စရ့လးအဖီခိၣ်လၢ ဝ့ၢ်ၡၤမရံအပူၤလီၤ. ဒီးစီၤယဟိရၣ် ပၢဘၣ်တၢ် ၁၂ နံၣ်လီၤ.
၂ တၢ်လၢယဟိဝၤယွၤ ထံၣ်ဝဲလၢ အအၢန့ၣ် စီၤယဟိရၣ်မၤဝဲ တလီၢ်လီၢ်လီၤ. ဘၣ်ဆၣ် အဝဲတမၤတၢ်အၢ ထဲသိးဒီးအမိၢ် ဒီးအပၢ်မၤဝဲဘၣ်, မ့ၢ်လၢ အဝဲမၤဟးဂီၤကွံာ် ဘဧၤလး အလၢၢ်ထူၣ်စီဆှံလၢ အပၢ်တ့ထီၣ်ပာ်စၢၤဝဲန့ၣ် အဃိလီၤ.+
၃ ဘၣ်ဆၣ် တၢ်ဒဲးဘးလၢ စီၤနဘး အဖိခွါ စီၤယၤရၤဘၣ် ဆီၣ်ထွဲ ပှၤအံၣ်စရ့လးဖိ လၢအကမၤဝဲတဖၣ်န့ၣ် စီၤယဟိရၣ် ဆဲးမၤဝဲ*+ စ့ၢ်ကီး ဒီးအတပတုာ်မၤဝဲဘၣ်.
၄ ကီၢ်မိၤအး အစီၤပၤ မ့ၡၤ ဘုၣ်ဝဲသိ ဒီးလၢညါအဝဲဟ့ၣ်ဝဲ သိဖိအဒု ၁၀၀,၀၀၀ ဒီးသိဖါလၢ အဆူၣ်တဘၣ် တၢ်တံာ်အီၤဘၣ် အဒု ၁၀၀,၀၀၀ လၢအံၣ်စရ့လး အစီၤပၤအအိၣ် ဒ်တၢ်ခိတၢ်သွဲအသိးလီၤ.
၅ ဖဲစီၤအၤဃာ် သံဝံၤအလီၢ်ခံန့ၣ်+ ကီၢ်မိၤအးအစီၤပၤ ထီဒါက့ၤ အံၣ်စရ့လး အစီၤပၤလီၤ.+
၆ ဖဲန့ၣ်အဆၢကတီၢ် စီၤပၤယဟိရၣ် ဟးထီၣ်လၢ ဝ့ၢ်ၡၤမရံ ဒီးကိးဖှိၣ်ဝဲ ပှၤအံၣ်စရ့လးဖိ ခဲလၢာ်လီၤ.
၇ ဒီးစီၤယဟိရၣ် ဆှၢလီၤတၢ်ကစီၣ်လၢ ယူဒၤ အစီၤပၤယဟိၤၡၤဖး အအိၣ် ဒီးတဲဝဲလၢ “ကီၢ်မိၤအးအစီၤပၤ ထီဒါက့ၤယၤလံ. မ့ၢ်နကလဲၤပိာ်ယခံ ဒ်သိးကဒုး ကီၢ်မိၤအးအဂီၢ်ဧါ.” ဒီးစီၤယဟိၤၡၤဖး တဲဆၢဝဲလၢ “ယၤဒီးနၤန့ၣ် မ့ၢ်ဒ်သိးသိးလီၤ. ယပှၤဂီၢ်မုၢ်န့ၣ် မ့ၢ်နပှၤဂီၢ်မုၢ် ဒီးယကသ့ၣ်တဖၣ်န့ၣ် မ့ၢ်နကသ့ၣ်တဖၣ်လီၤ.+ အဃိ ယကလဲၤလီၤ.”+
၈ ဒီးအဝဲ* သံကွၢ်ဝဲလၢ “ပကဘၣ်လဲၤထီၣ် ကျဲဖဲလဲၣ်တကပၤလဲၣ်.” ဒီးအဝဲ* တဲဆၢဝဲလၢ “ပကလဲၤကျဲလၢ ကီၢ်အဒိၣ် အပှၢ်မုၢ်ကနၢ တကပၤလီၤ.”
၉ ဒီးအံၣ်စရ့လး အစီၤပၤ, ယူဒၤအစီၤပၤ ဒီးကီၢ်အဒိၣ် အစီၤပၤ လဲၤထီၣ်ဝဲလီၤ.+ ဒီးအဝဲသ့ၣ် လဲၤတၢ်နွံသီ ဝံၤအလီၢ်ခံ လၢသုးဖိတဖၣ် ဒီးဆၣ်ဖိကီၢ်ဖိလၢ အပိာ်အဝဲသ့ၣ်အခံ အဂီၢ်န့ၣ် ထံတအိၣ်လၢၤဘၣ်.
၁၀ အဃိ အံၣ်စရ့လး အစီၤပၤတဲဝဲလၢ “ကီလၢာ်လံ, ယဟိဝၤယွၤ ပာ်ဖှိၣ်ထီၣ် ပဝဲ စီၤပၤသၢဂၤအံၤ ဒ်သိးကဟ့ၣ်လီၤ ပှၤလၢ ပှၤမိၤအးဖိအစုပူၤလီၤ.”
၁၁ ဘၣ်ဆၣ် စီၤယဟိၤၡၤဖး သံကွၢ်ဝဲလၢ “ဖဲအံၤ ယဟိဝၤယွၤ အဝံလၢ အကသံကွၢ်န့ၢ်ပှၤတၢ်လၢ ယဟိဝၤယွၤအအိၣ်န့ၣ် တအိၣ် နီတဂၤဧီၤ.”+ ဒီးအံၣ်စရ့လး အစီၤပၤ အခ့အပှၤတဂၤ တဲဆၢဝဲလၢ “စီၤၡၤဖး အဖိခွါ စီၤအလံၤၡါ+ လၢအကဲတ့ၢ် စီၤအ့ၤလံယၤ အခ့အပှၤတဂၤန့ၣ်* အိၣ်ဝဲလီၤ.”+
၁၂ ဒီးစီၤယဟိၤၡၤဖး တဲဝဲလၢ “ယဟိဝၤယွၤ တဲတၢ်ခီဖျိလၢ အီၤလီၤ.” အဃိ အံၣ်စရ့လးအစီၤပၤ, စီၤယဟိၤၡၤဖး ဒီးကီၢ်အဒိၣ်အစီၤပၤ လဲၤလီၤလၢ စီၤအလံၤၡါ အအိၣ်လီၤ.
၁၃ စီၤအလံၤၡါ တဲဘၣ် အံၣ်စရ့လး အစီၤပၤလၢ “နဘၣ်ဃးဒီးယၤဒ်လဲၣ်.+ လဲၤလၢ နမိၢ်ဒီး နပၢ်အဝံတဖၣ် အအိၣ်မီၤ.”+ ဘၣ်ဆၣ် အံၣ်စရ့လးအစီၤပၤ တဲစီၤအလံၤၡါလၢ “တဘၣ်တဲဒ်န့ၣ်တဂ့ၤ, ပှၤလၢအကိးဖှိၣ် ပဝဲစီၤပၤသၢဂၤအံၤ ဒ်သိး ကဟ့ၣ်လီၤ ပှၤလၢ ပှၤမိၤအးဖိ အစုပူၤန့ၣ် မ့ၢ်ဝဲ ယဟိဝၤယွၤလီၤ.”
၁၄ ဒီးစီၤအလံၤၡါ တဲဝဲလၢ “ယအၢၣ်လီၤတၢ်လၢ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢယဘူၣ်ထီၣ်ဘါထီၣ်အီၤတဂၤ အမဲာ်ညါလၢ မ့တမ့ၢ်လၢ ယပာ်ကဲ ယူဒၤအစီၤပၤယဟိၤၡၤဖး+ အဃိဘၣ်န့ၣ် ယတကွၢ်နမဲာ် ဒီးယတကနၣ်ဃုာ်နၤ နီတစဲးဘၣ်.+
၁၅ ခဲအံၤဟဲကိးန့ၢ်ယၤ ပှၤဒ့တနၢ်ဖိတဂၤတက့ၢ်.”+ ဖဲပှၤဒ့တနၢ်ဖိတဂၤ စးထီၣ်ဒ့တနၢ်အခါ ယဟိဝၤယွၤ အစိကမီၤ* ဟဲလီၤလၢ စီၤအလံၤၡါအလိၤလီၤ.+
၁၆ ဒီးစီၤအလံၤၡါ တဲဝဲလၢ “ယဟိဝၤယွၤ တဲဝဲဒ်အံၤ, ‘ခူၣ်လီၤတၢ်အကျိၤ တကျိၤဝံၤတကျိၤလၢ တၢ်တြီၤပူၤ,
၁၇ မ့ၢ်လၢ ယဟိဝၤယွၤ တဲဝဲလၢ “ကလံၤတအူတၢ်ဘၣ် ဒီးတၢ်တဟဲစူၤဘၣ် သနာ်က့ တၢ်တြီၤအံၤန့ၣ် ကပှဲၤဝဲဒီးထံလီၤ.+ သုဒီးသုဆၣ်ဖိကီၢ်ဖိတဖၣ် ကအီဘၣ်ထံဖဲန့ၣ်လီၤ.”’
၁၈ ဘၣ်ဆၣ် တၢ်တခါန့ၣ် တကီလၢ ယဟိဝၤယွၤအဂီၢ်ဘၣ်+ ဒီးအဝဲကဟ့ၣ်လီၤစ့ၢ်ကီး ပှၤမိၤအးဖိ လၢသုစုပူၤလီၤ.+
၁၉ သုကဘၣ် မၤလီၤပှီၢ်ကွံာ် ဝ့ၢ်လၢအအိၣ်ဒီး အဒူၣ်လၢအကျၢၤ+ ကိးဖျၢၣ်ဒဲး ဒီးဝ့ၢ်လၢအဂ့ၤကတၢၢ် ကိးဖျၢၣ်ဒဲး, သုကဘၣ်ကူာ်လီၤကွံာ် သ့ၣ်လၢအဂ့ၤ ကိးထူၣ်ဒဲး, သုကဘၣ် မၤပံးထံထီၣ်ပၢၢ် ကိးပူၤဒဲး ဒီးသုကဘၣ်မၤဟးဂီၤ ဟီၣ်ခိၣ်လီၢ်လၢအဂ့ၤ ကိးတီၤဒဲးလၢလၢၢ်လီၤ.”+
၂၀ ဒီးလၢဂီၤခီန့ၣ် ဖဲဂီၤခီ တၢ်လုၢ်ဘု အဆၢကတီၢ်န့ၣ်+ ထံအိၣ်လၢ ကီၢ်အဒိၣ်တကပၤန့ၣ် ဟဲယွၤလီၤဝဲ သတူၢ်ကလာ်လီၤ. ဒီးတၢ်တြီၤပူၤန့ၣ် ပှဲၤဝဲဒီးထံလီၤ.
၂၁ ပှၤမိၤအးဖိခဲလၢာ် နၢ်ဟူဝဲလၢ စီၤပၤတဖၣ် ဟဲထီၣ်ဒုးအဝဲသ့ၣ်အဃိ အဝဲသ့ၣ် ကိးဖှိၣ်ဝဲ ကယဲၢ်ပှၤပိာ်ခွါ လၢအစိာ်တၢ်စုကဝဲၤသ့ ဒီးအဝဲသ့ၣ် ဆီလီၤအသးလၢ ကီၢ်ဆၢလီၤ.
၂၂ ဒီးလၢဂီၤခီ ဖဲမုၢ်ဆဲးကပီၤလီၤလၢ ထံဖီခိၣ်အခါ ပှၤမိၤအးဖိတဖၣ် ဂဲၤဆၢထၢၣ်ဝဲလီၤ. ဒီးပှၤမိၤအးဖိလၢ အအိၣ်ဝဲလၢ ဝၢ်ခီန့ၣ် ထံၣ်ဝဲထံန့ၣ် ဖျါဂီၤဒ်တၢ်သွံၣ်အသိးလီၤ.
၂၃ အဝဲသ့ၣ် တဲဝဲလၢ “အကဲတၢ်သွံၣ်လီၤ. စီၤပၤတဖၣ် မၤသံလိာ်အသး ကဒဲကဒဲလံဧါသၢၤ. မ့မ့ၢ်ဒ်န့ၣ်န့ၣ် ပှၤမိၤအးဖိသ့ၣ်ဧၢ, ပကလဲၤဟံးန့ၢ် အဝဲသ့ၣ် အတၢ်ဖိတၢ်လံၤတဖၣ်ဟီ.”+
၂၄ ဖဲပှၤမိၤအးဖိတဖၣ် ဟဲနုာ်လၢ အံၣ်စရ့လး အဒဲကဝီၤပူၤအခါ ပှၤအံၣ်စရ့လးဖိတဖၣ် ဟဲထီၣ်ဒီးလူၤကျီ အဝဲသ့ၣ်အဃိ ပှၤမိၤအးဖိတဖၣ် ဃ့ၢ်ကွံာ်ဝဲလီၤ.+ ဒီးအဝဲသ့ၣ် လဲၤလူၤဝဲ ပှၤမိၤအးဖိတခီခီ ကျီဝဲတခီခီ တုၤလၢ ကီၢ်မိၤအးအပူၤလီၤ.
၂၅ ဒီးအဝဲသ့ၣ် မၤလီၤပှီၢ်ကွံာ် ဝ့ၢ်တဖၣ်လီၤ. အဝဲသ့ၣ်ကိးဂၤဒဲး ကွံာ်လီၤဝဲလၢၢ် တဂၤတဖျၢၣ်လၢ ဟီၣ်ခိၣ်လီၢ်လၢအဂ့ၤ ကိးတီၤဒဲးအပူၤ တုၤလၢ ဟီၣ်ခိၣ်လီၢ်ခဲလၢာ် ပှဲၤဝဲဒီး လၢၢ်တဖၣ်လီၤ. ဒီးအဝဲသ့ၣ် မၤပံး ထံထီၣ်ပၢၢ်ခဲလၢာ်+ ဒီးကူာ်လီၤသ့ၣ်လၢအဂ့ၤ ကိးထူၣ်ဒဲးလီၤ.+ ဒီးလၢခံကတၢၢ်န့ၣ် အိၣ်တ့ၢ်ထဲဒၣ် ကံၢ်ဃရၤၡ့း+ အဝ့ၢ်ဒူၣ်တဖၣ် အဃိ ပှၤကွံာ်တၢ်လၢ နီၣ်ဘျုးတဖၣ်န့ၣ်* ကဝီၤဃာ်ဝ့ၢ် ဒီးဒုးအီၤလီၤ.
၂၆ ဖဲကီၢ်မိၤအးအစီၤပၤ ထံၣ်ဝဲလၢ အဒုးတၢ်တနၢၤဘၣ်အခါ အဝဲကိးန့ၢ်ဝဲ ပှၤပိာ်ခွါ လၢအအိၣ်ဒီး နးအဂၤ ၇၀၀ ဒ်သိးကလဲၤနုာ်ဖျိလၢ ကီၢ်အဒိၣ်အစီၤပၤ+ အအိၣ်တခီလီၤ. ဘၣ်ဆၣ် အဝဲသ့ၣ် လဲၤနုာ်ဝဲ တန့ၢ်ဘၣ်.
၂၇ အဃိ ကီၢ်မိၤအးအစီၤပၤ လုၢ်ထီၣ်ဝဲ အဖိခွါဝဲၢ်ကိလၢ ကပၢတၢ်လၢ အလီၢ်တဂၤန့ၣ် ဒ်တၢ်လုၢ်ဒွဲၣ်အူ+ အသိးလၢ ဝ့ၢ်ဒူၣ် အဖီခိၣ်န့ၣ်လီၤ. ဒီးအဝဲသ့ၣ် သးပှံၢ်ထီၣ် အံၣ်စရ့လး ဒိၣ်မးအဃိ အဝဲသ့ၣ် ဟးထီၣ်ဖဲန့ၣ် ဒီးအဝဲသ့ၣ် က့ၤကဒါက့ၤလၢ အနီၢ်ကစၢ်အကီၢ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဘုးတာ်.”
^ ဘၣ်သ့ၣ်သ့ၣ် ကမ့ၢ် “စီၤယဟိရၣ်.”
^ ဘၣ်သ့ၣ်သ့ၣ် ကမ့ၢ် “စီၤယဟိၤၡၤဖး.”
^ မ့ၢ်စ့ၢ်ကီး “လၢညါ အဝဲလူလီၤထံလၢ စီၤအ့ၤလံယၤ အစုလိၤ.”
^ အခီပညီလိၤလိၤ “အစု.”
^ မ့ၢ်ဝဲ ပျံၤလၢ ပှၤသူအီၤ ဒ်သိးကကွံာ်လၢၢ်အဂီၢ်.
