၂ စီၤပၤ ၄:၁-၄၄
-
စီၤအလံၤၡါ မၤအါထီၣ် မုၢ်ကမဲတဂၤ အသိ (၁-၇)
-
ပှၤၡူန့ၣ်မုၣ်တဂၤ အတၢ်တူၢ်တံၤတူၢ်တမှံၤ (၈-၁၆)
-
ပှၤၡူန့ၣ်မုၣ် န့ၢ်ဘၣ်ဝဲ ဖိခွါတဂၤ, ဖိသၣ်သံ (၁၇-၃၁)
-
စီၤအလံၤၡါ မၤသမူထီၣ်က့ၤ ဖိခွါလၢ အသံတ့ၢ်တဂၤ (၃၂-၃၇)
-
စီၤအလံၤၡါ မၤဝဲဒ်သိး ပှၤအီၣ် ကသူထံကန့ၢ် (၃၈-၄၁)
-
စီၤအလံၤၡါ မၤအါထီၣ်ကိၣ် (၄၂-၄၄)
၄ ဝံအဖိခွါတဖၣ်+ အကျါတဂၤ အမါန့ၣ် ကိးပသူထီၣ်လၢ စီၤအလံၤၡါအအိၣ် ဒီးတဲဝဲလၢ “ယဝၤသံလံ. ဒီးဒ်နသ့ၣ်ညါအသိး အဝဲကဲပှၤတဂၤလၢ အပျံၤ ယဟိဝၤယွၤ ထီဘိ.+ ဘၣ်ဆၣ် အဒ့ၣ်ကမၢ်အိၣ်ဒံး ဒီးပှၤတဂၤလီၤ. ဒီးပှၤတဂၤန့ၣ် ဟဲဝဲဒ်သိး ကက့ၤစိာ်ကွံာ် ယဖိခွါခံဂၤ ဒီးဒုးကဲ အဝဲသ့ၣ်လၢ အကုၢ်လီၤ.”
၂ ဒီးစီၤအလံၤၡါ တဲအီၤလၢ “ယကဘၣ်မၤစၢၤနၤဒ်လဲၣ်. လၢနဟံၣ်ပူၤန့ၣ် တၢ်မနုၤအိၣ်လဲၣ်, တဲဘၣ်ယၤမီၤ.” ဒီးပိာ်မုၣ်န့ၣ် တဲဘၣ်အီၤလၢ “ယကစၢ်ဧၢ, လၢယဟံၣ်န့ၣ် တၢ်တအိၣ်နီတမံၤဘၣ်. အိၣ်ထဲ သိတကိလီၤ.”+
၃ ဒီးစီၤအလံၤၡါ တဲအီၤလၢ “လဲၤလၢတၢ်ချၢ ဒီးဃ့န့ၢ်တၢ်အဒၢ လၢအအိၣ်ကလီတဖၣ် လၢပှၤလၢနခိၣ်နဃၢၤတဖၣ် အအိၣ်တက့ၢ်. ဒီးတဘၣ်ဟဲက့ၤစိာ် ထဲစှၤကိာ်ဖျၢၣ်တဂ့ၤ.
၄ ဝံၤဒီး နၤဒီနဖိခွါတဖၣ်န့ၣ် လဲၤနုာ်လၢ ဟံၣ်ပူၤ ဒီးပံးဃာ်တြဲၤတက့ၢ်. မၤပှဲၤ တၢ်အဒၢတဖၣ်လၢသိ ဒီးတၢ်အဒၢလၢ အပှဲၤတဖၣ်န့ၣ် ပာ်အီၤလၢ တၢ်ကပၤတက့ၢ်.”
၅ အဃိ ပိာ်မုၣ်န့ၣ် ဟးထီၣ်ကွံာ်လၢ စီၤအလံၤၡါအအိၣ်လီၤ.
ဒီးဖဲအီၤဒီးအဖိခွါတဖၣ် နုာ်လီၤလၢ အဟံၣ်ပူၤအခါ အဝဲသ့ၣ်ပံးဃာ်တြဲၤလီၤ. ဒီးအဖိခွါတဖၣ် ဟ့ၣ်လီၤအီၤ တၢ်အဒၢတဖၣ် ဒီးအဝဲလူလီၤသိလၢ အပူၤလီၤ.+
၆ ဖဲတၢ်အဒၢတဖၣ် ပှဲၤဝဲအခါ အဝဲတဲ အဖိခွါတဂၤလၢ “ဟ့ၣ်လီၤယၤ တၢ်အဒၢလၢအဂၤတဖျၢၣ်.”+ ဘၣ်ဆၣ် အဖိခွါ တဲအီၤလၢ “တၢ်အဒၢ တအိၣ်လၢၤဘၣ်.” ဒီးဖဲန့ၣ် သိတလီၤလၢၤဘၣ်.+
၇ ဒီးပိာ်မုၣ်န့ၣ် လဲၤတဲဘၣ် ယွၤလၢအမ့ၢ်အတီ အပှၤတဂၤန့ၣ်လီၤ. ဒီးအဝဲတဲဘၣ် ပိာ်မုၣ်န့ၣ်လၢ “လဲၤဆါကွံာ်သိ ဒီးလိးတူာ်ကွံာ် နဒ့ၣ်နကမၢ်တက့ၢ်. ဝံၤဒီးတၢ်လၢ အအိၣ်တ့ၢ်န့ၣ် သူအီၤလၢ နၤဒီးနဖိခွါတဖၣ် ကလုၢ်အီၣ် သုသးသမူအဂီၢ်တက့ၢ်.”
၈ ဘၣ်တနံၤ စီၤအလံၤၡါ လဲၤလၢ ဝ့ၢ်ၡူန့ၣ်+ ဒီးပိာ်မုၣ်လၢ အရ့ဒိၣ်တဂၤ အိၣ်ဝဲဖဲန့ၣ်လီၤ. ဒီးပိာ်မုၣ်တဂၤန့ၣ် မၢဆူၣ်အီၤလၢ အကအီၣ်တၢ်ဖဲန့ၣ်လီၤ.+ အဃိ စီၤအလံၤၡါ မ့ၢ်လဲၤဘၣ်ကျဲဖဲန့ၣ် တဘျီဂ့ၤ တဘျီဂ့ၤ အဝဲအိၣ်ပတုာ် အီၣ်တၢ်ဖဲန့ၣ်လီၤ.
၉ ဒီးပိာ်မုၣ်လၢ အရ့ဒိၣ်တဂၤအံၤ တဲဘၣ်အဝၤလၢ “ပှၤလၢအဟဲကျဲဖဲအံၤ ထီဘိတဂၤန့ၣ် ယသ့ၣ်ညါလၢ အဝဲကဲ ယွၤအပှၤစီဆှံတဂၤလီၤ.
၁၀ ဝံသးစူၤ မ်ပတ့ထီၣ်န့ၢ်အီၤ ဒၢးဖိတဖျၢၣ်လၢ ဟံၣ်ခိၣ်+ ဒီးပာ်လီၤန့ၢ်အီၤ လီၢ်မံ, စီၢ်နီၤခိၣ်, လီၢ်ဆ့ၣ်နီၤ ဒီးမ့ၣ်အူဒၢတဖျၢၣ်တက့ၢ်. ဒီးအဝဲမ့ၢ်ဟဲလၢ ပအိၣ်တဘျီဂ့ၤ တဘျီဂ့ၤန့ၣ် အအိၣ်ဖဲန့ၣ်သ့ဝဲလီၤ.”+
၁၁ ဘၣ်တနံၤ စီၤအလံၤၡါ လဲၤဝဲဖဲန့ၣ် ဒီးအဝဲလဲၤထီၣ် မံနီၤဝဲလၢဒၢးပူၤ လၢဟံၣ်ခိၣ်န့ၣ်လီၤ.
၁၂ ဒီးအဝဲတဲဘၣ် အပှၤမၤစၢၤတၢ် စီၤက့ၤဃစံလၢ+ “ကိးန့ၢ်ယၤ ပှၤၡူန့ၣ်မုၣ်တဂၤန့ၣ်တက့ၢ်.”+ ဒီးအပှၤမၤစၢၤတၢ်န့ၣ် ကိးန့ၢ်အီၤ ဒီးပှၤၡူန့ၣ်မုၣ် ဟဲဆၢထၢၣ်လၢ အမဲာ်ညါလီၤ.
၁၃ ဒီးစီၤအလံၤၡါ တဲစီၤက့ၤဃစံလၢ “ဝံသးစူၤ တဲပိာ်မုၣ်တဂၤန့ၣ်လၢ ‘နတူၢ်ဆါနသးလၢပဂီၢ် ထဲထဲအံၤညါအဃိ+ ယကဘၣ် မၤန့ၢ်နၤ တၢ်မနုၤလဲၣ်.+ မ့ၢ်ယကဘၣ်တဲန့ၢ်နၤ စီၤပၤ+ မ့တမ့ၢ် သုးခိၣ်ကျၢၢ် တၢ်တမံၤမံၤဧါ.’” ပိာ်မုၣ်န့ၣ် တဲဆၢဝဲလၢ “ယအိၣ်ဘၣ် ဘံၣ်ဘံၣ်ဘၢဘၢ လၢယဒူၣ်ဖိထၢဖိ အကျါလံ.”
၁၄ ဒီးစီၤအလံၤၡါ တဲဝဲလၢ “မ့မ့ၢ်ဒ်န့ၣ်န့ၣ် ယကဘၣ်မၤန့ၢ်အီၤ တၢ်မနုၤလဲၣ်.” ဒီးစီၤက့ၤဃစံ တဲဝဲလၢ “ပိာ်မုၣ်န့ၣ် အဖိတအိၣ်ဘၣ်+ ဒီးအဝၤစ့ၢ်ကီး အသးပှၢ်လံ.”
၁၅ တဘျီဃီန့ၣ် စီၤအလံၤၡါ တဲအီၤလၢ “လဲၤကိးန့ၢ်အီၤတက့ၢ်.” ဒီးစီၤက့ၤဃစံ လဲၤကိးန့ၢ်ပိာ်မုၣ် ဒီးပိာ်မုၣ်န့ၣ် ဟဲဆၢထၢၣ်လၢ ပဲတြီအခီၣ်ထံးလီၤ.
၁၆ ဒီးစီၤအလံၤၡါ တဲဝဲလၢ “လၢခံတနံၣ် ဖဲဆၢကတီၢ်ဒ်အံၤန့ၣ် နကစိာ်ဘၣ် ဖိခွါတဂၤလီၤ.”+ ဘၣ်ဆၣ် ပိာ်မုၣ်န့ၣ် တဲဝဲလၢ “ကစၢ်ဧၢ, တၢ်တခါအံၤဒု ကဲထီၣ်အသး တသ့ဘၣ်. နမ့ၢ် ယွၤလၢအမ့ၢ်အတီအပှၤ အဃိ တဘၣ်တဲလံၣ်ယၤတဂ့ၤ.”
၁၇ ဒီးလၢခံ အဝဲဒၢထီၣ် ဒီးအိၣ်ဖျဲၣ်ထီၣ် အဖိခွါတဂၤ လၢခံတနံၣ် ဖဲဆၢကတီၢ်ဒ် စီၤအလံၤၡါ တဲပာ်စၢၤအီၤအသိးန့ၣ်လီၤ.
၁၈ ဒီးဖိသၣ်န့ၣ် ဒိၣ်ထီၣ်ဝဲလီၤ. ဘၣ်တနံၤ ဖဲအပၢ်အိၣ်ဒီး ပှၤကူးတၢ်ဖိတဖၣ်အခါ ဖိသၣ်န့ၣ် လဲၤဝဲလၢအပၢ်အအိၣ်လီၤ.
၁၉ ဒီးဖိသၣ်န့ၣ် တဲဘၣ်အပၢ် တဘျီဝံၤတဘျီလၢ “ယခိၣ်သၣ်ဃံဆါညါ, ယခိၣ်သၣ်ဃံဆါညါ.” ဒီးအပၢ်တဲဘၣ် ပှၤမၤစၢၤတၢ်တဂၤလၢ “က့ၤစိာ်အီၤလၢ အမိၢ်အအိၣ်တက့ၢ်.”
၂၀ ဒီးပှၤမၤစၢၤတၢ်တဂၤန့ၣ် က့ၤစိာ်ဖိသၣ်လၢ အမိၢ်အအိၣ်လီၤ. ဒီးဖိသၣ်ဆ့ၣ်နီၤလၢ အမိၢ်အခီၣ်အလိၤ ဒီးဖဲမုၢ်ထူၣ်အခါ ဖိသၣ်န့ၣ်သံဝဲလီၤ.+
၂၁ အဃိ အဝဲလဲၤထီၣ် ပုာ်မံနီၤအဖိလၢ ယွၤလၢအမ့ၢ်အတီ အပှၤတဂၤန့ၣ်+ အလီၢ်မံခိၣ် ဒီးအဝဲပံးဃာ်တြဲၤ ဒီးဟးထီၣ်ဝဲလီၤ.
၂၂ ဒီးအဝဲကိးအဝၤ ဒီးတဲဝဲလၢ “ဝံသးစူၤ ဆှၢလီၤန့ၢ်ယၤ ပှၤမၤစၢၤတၢ်တဂၤ, ကသ့ၣ်ယီၤတဒု ဒီးဟ့ၣ်ယၤအခွဲးလၢ ယကလဲၤကရီလၢ ယွၤလၢအမ့ၢ်အတီ အပှၤတဂၤအအိၣ် ဝံၤဒီး ယကဟဲက့ၤကဒါက့ၤနီၤ.”
၂၃ ဘၣ်ဆၣ် အဝၤတဲအီၤလၢ “တနံၤအံၤ တမ့ၢ်လါထီၣ်သီ+ မ့တမ့ၢ် မုၢ်အိၣ်ဘှံးနံၤဘၣ်. ဘၣ်မနုၤအဃိ နကလဲၤထံၣ်လိာ်သးဒီးအီၤလဲၣ်.” ဘၣ်ဆၣ် အဝဲတဲဝဲလၢ “တဘၣ်နီတမံၤဘၣ်.”
၂၄ ဒီးအဝဲကတဲာ်ကတီၤထီၣ် ကသ့ၣ်ယီၤ ဒီးတဲဘၣ် အပှၤမၤစၢၤတၢ်လၢ “လဲၤနီမ့ၢ်ချ့ဟီ. ယမ့ၢ်တတဲနၤလၢ နီကဘှၢလီၤဘၣ်န့ၣ် နီကဘှၢလီၤအီၤတဂ့ၤ.”
၂၅ အဃိ ပိာ်မုၣ်န့ၣ် လဲၤလၢ ယွၤလၢအမ့ၢ်အတီ အပှၤတဂၤအအိၣ် လၢကစၢၢ်ကၢ်မ့ၤလးလီၤ. ဖဲယွၤလၢအမ့ၢ်အတီအပှၤတဂၤ ထံၣ်စိအီၤလၢ အယံၤအခါ အတဲဘၣ် အပှၤမၤစၢၤတၢ် စီၤက့ၤဃစံလၢ “ကွၢ်မီၤ, ပှၤၡူန့ၣ်မုၣ် အိၣ်လၢန့ၣ်လီၤ.
၂၆ ဝံသးစူၤ လဲၤဃ့ၢ်လၢအအိၣ် ဒီးသံကွၢ်အီၤလၢ ‘နအိၣ်ဆူၣ်ဧါ, နဝၤအိၣ်ဆူၣ်ဧါ. နဖိအိၣ်ဆူၣ်ဧါ’ တက့ၢ်.” ဒီးဖဲအသံကွၢ် ပိာ်မုၣ်အခါ ပိာ်မုၣ်န့ၣ် တဲဝဲလၢ “အိၣ်ဆူၣ်ကိးဂၤဒဲးလီၤ.”
၂၇ ဒီးဖဲအဝဲ လဲၤတုၤလၢ ယွၤလၢအမ့ၢ်အတီ အပှၤတဂၤလၢ အအိၣ်လၢကစၢၢ်အခါ တဘျီဃီန့ၣ် အဝဲဖီၣ်တံၢ်ဃာ်ဝဲ ယွၤလၢအမ့ၢ်အတီ အပှၤတဂၤန့ၣ် အခီၣ်လီၤ.+ ဖဲန့ၣ်အခါ စီၤက့ၤဃစံ သုးဘူးအသး ဒ်သိးကဆီၣ်ဖျိးကွံာ်ပိာ်မုၣ် ဘၣ်ဆၣ် ယွၤလၢအမ့ၢ်အတီ အပှၤတဂၤန့ၣ် တဲဝဲလၢ “တဘၣ်တြီအီၤတဂ့ၤ. အသးဘၣ်ဒိ ဖးဒိၣ်ညါ. ဘၣ်ဆၣ် ဘၣ်မနုၤအဃိလဲၣ်န့ၣ် ယဟိဝၤယွၤ တပာ်ဖျါထီၣ်န့ၢ်ယၤဘၣ် အဃိ ယတသ့ၣ်ညါဘၣ်.”
၂၈ ဒီးပိာ်မုၣ်န့ၣ် တဲဝဲလၢ “ကစၢ်ဧၢ, မ့ၢ်ယဃ့နၤလၢ ယကန့ၢ်ဘၣ်ဖိခွါတဂၤဧါ. ယတဲနၤလၢ ‘တဘၣ်ဟ့ၣ်ယၤ တၢ်မုၢ်လၢ်လၢ အကဲထီၣ်အသးတသ့ဘၣ်တဂ့ၤ’ တမ့ၢ်ဧီၤ.”+
၂၉ တဘျီဃီန့ၣ် အဝဲတဲဘၣ် စီၤက့ၤဃစံလၢ “ခးချ့ၣ်ထီၣ် နတၢ်ကူတၢ်ကၤလၢ နယီၢ်ဒ့+ ဒီးဟံးန့ၢ်ယနီၣ်ထိးဘိ ဒီးလဲၤတၢ်တက့ၢ်. နမ့ၢ်ထံၣ် ပှၤတဂၤဂ့ၤ တဂၤဂ့ၤန့ၣ် တဘၣ်ဆၢဂ့ၤဆၢဝါအီၤတဂ့ၤ. ဒီးပှၤတဂၤဂ့ၤ တဂၤဂ့ၤ မ့ၢ်ဆၢဂ့ၤဆၢဝါနၤန့ၣ် တဘၣ်တဲဆၢက့ၤအီၤတဂ့ၤ. လဲၤပာ်လီၤ ယနီၣ်ထိးဘိလၢ ဖိသၣ်အမဲာ်သၣ် အလိၤတက့ၢ်.”
၃၀ ဒီးဖိသၣ်အမိၢ်န့ၣ် တဲဝဲလၢ “ယအၢၣ်လီၤတၢ်လၢ ယဟိဝၤယွၤလၢ အမူဝဲတဂၤ အမဲာ်ညါ ဒီးလၢနမဲာ်ညါလၢ ယတဟးဖးဒီးနၤဘၣ်.”+ အဃိ စီၤအလံၤၡါ လဲၤပိာ်အခံလီၤ.
၃၁ မ့မ့ၢ် စီၤက့ၤဃစံန့ၣ် လဲၤလၢ အဝဲသ့ၣ်အမဲာ်ညါ ဒီးပာ်လီၤ နီၣ်ထိးဘိ လၢဖိသၣ်အမဲာ်သၣ်လိၤ ဘၣ်ဆၣ် ဖိသၣ်တသီၣ်တသဲ နီတမံၤဘၣ်.+ ဒီးအဝဲက့ၤ လၢစီၤအလံၤၡါအအိၣ် ဒီးတဲအီၤလၢ “ဖိသၣ်တပၢၢ်ထီၣ်ဘၣ်.”
၃၂ ဖဲစီၤအလံၤၡါ လဲၤတုၤလၢ ဟံၣ်ပူၤအခါ အဝဲထံၣ်ဝဲလၢ ဖိသၣ်န့ၣ် သံဝဲဒီး အိၣ်လၢအလီၢ်မံခိၣ်လီၤ.+
၃၃ စီၤအလံၤၡါ လဲၤနုာ်လီၤလၢ ဒၢးပူၤဒီး ပံးဃာ်တြဲၤ ဒီးအိၣ်တ့ၢ်ထဲ အဝဲသ့ၣ်ခံဂၤလီၤ. ဒီးအဃ့ဘါထုကဖၣ်လၢ ယဟိဝၤယွၤအအိၣ်လီၤ.+
၃၄ ဝံၤဒီးအဝဲလဲၤထီၣ်လၢ လီၢ်မံခိၣ် ဒီးမံလီၤလၢ ဖိသၣ်အလိၤ ဒီးပာ်လီၤအထးခိၣ်လၢ ဖိသၣ်အထးခိၣ် ဒီးအမဲာ်ချံလၢ ဖိသၣ်အမဲာ်ချံ ဒီးအစုညါသးလၢ ဖိသၣ်အစုညါသးအလိၤလီၤ. ဒီးအဝဲဆဲးမံလီၤလၢ ဖိသၣ်အလိၤ ဒီးဖိသၣ်အနီၢ်ခိ ကလၢၤထီၣ်ဝဲလီၤ.+
၃၅ အဝဲဟးလ့ၢ်လိၤဝဲလၢ ဟံၣ်ပူၤ ဝံၤဒီးအဝဲထီၣ်လၢလီၢ်မံခိၣ် ဒီးသကူးလီၤအသးလၢ ဖိသၣ်အလိၤ တဘျီကဒီးလီၤ. ဖိသၣ်န့ၣ် ကဆဲထီၣ်ဝဲ နွံဘျီ ဝံၤဒီးအိးထီၣ် အမဲာ်ချံလီၤ.+
၃၆ ဒီးစီၤအလံၤၡါ ကိးဃီၤ စီၤက့ၤဃစံ ဒီးတဲဝဲလၢ “ကိးန့ၢ် ပှၤၡူန့ၣ်မုၣ် တက့ၢ်.” ဒီးစီၤက့ၤဃစံ ကိးန့ၢ်အီၤ ဒီးအဝဲ ဟဲနုာ်လီၤ လၢအအိၣ်လီၤ. ဝံၤဒီး စီၤအလံၤၡါ တဲဝဲလၢ “စိာ်ထီၣ် နဖိခွါတက့ၢ်.”+
၃၇ ဒီးပိာ်မုၣ်န့ၣ် ဟဲထိၣ်လီၤပှီၤအသးလၢ စီၤအလံၤၡါအခီၣ်ထံးလီၤ. ဝံၤဒီး ပိာ်မုၣ်န့ၣ် စိာ်ထီၣ်အဖိခွါ ဒီးဟးထီၣ်ကွံာ်ဝဲလီၤ.
၃၈ ဖဲစီၤအလံၤၡါ က့ၤတုၤလၢ ဝ့ၢ်ကံးလကၤလးအခါ တၢ်သၣ်ဝံၤလီၤဒိ အိၣ်ဝဲလၢ ကီၢ်ပူၤလီၤ.+ ဝံအဖိခွါတဖၣ်+ ဆ့ၣ်နီၤဝဲလၢ စီၤအလံၤၡါ အမဲာ်ညါ ဒီးစီၤအလံၤၡါ တဲဘၣ် အပှၤမၤစၢၤတၢ်လၢ+ “ချီန့ၢ် ဝံအဖိခွါတဖၣ်လၢ ကသူထံဖးဒိၣ် တကပၢၤတက့ၢ်.”
၃၉ ဒီးပှၤလၢ အဝဲသ့ၣ် အကျါတဂၤ လဲၤဝဲလၢပျီပူၤ ဒ်သိးကဒဲး တၢ်ဒိးတၢ်လၣ် အဂီၢ်လီၤ. ဒီးအဝဲထံၣ်ဝဲ ထံလူၤမံၤအမုၢ်တမုၢ်, ဒဲးန့ၢ်ဝဲ အသၣ်တဖၣ် ဒီးဖၢဃာ်ဝဲလၢ အဆ့ကၤပှဲၤပှဲၤလီၤ. ဝံၤဒီးအဝဲက့ၤ သွဲၣ်နုာ်လီၤဝဲလၢ ကသူထံသပၢၤပူၤ ဘၣ်ဆၣ် တၢ်သ့ၣ်တဖၣ်န့ၣ် မ့ၢ်တၢ်မနုၤလဲၣ်န့ၣ် အဝဲတသ့ၣ်ညါဝဲဘၣ်.
၄၀ လၢခံ အဝဲသ့ၣ် ဒုးအီၣ်ဝဲ ဝံအဖိခွါတဖၣ်လီၤ. ဘၣ်ဆၣ် ဖဲအဝဲသ့ၣ်အီၣ်ဝဲ ကသူထံအခါ အဝဲသ့ၣ် တဲဝဲလၢ “အိ ယွၤလၢအမ့ၢ်အတီ အပှၤဧၢ, လၢကသူထံပူၤန့ၣ် အိၣ်ဒီးတၢ်အစုၣ်.” အဃိ အဝဲသ့ၣ် တအီၣ်ဝဲလၢၤဘၣ်.
၄၁ ဒီးစီၤအလံၤၡါ တဲဝဲလၢ “ဟဲစိာ်ကိၣ်ကမူၣ် တနီၤ.” ဝံၤဒီး အဝဲထၢနုာ်ဝဲလၢ သပၢၤပူၤ ဒီးတဲဝဲလၢ “ဒုးအီၣ် ဝံအဖိခွါတဖၣ်တက့ၢ်.” ဒီးလၢသပၢၤပူၤန့ၣ် တၢ်အစုၣ်တအိၣ် နီတမံၤလၢၤဘၣ်.+
၄၂ ပှၤပိာ်ခွါတဂၤ လၢအအိၣ်လၢ ဘဧၤလးၡလံၡၤန့ၣ်+ ဟဲစိာ်န့ၢ်ဝဲ ယွၤလၢအမ့ၢ်အတီ အပှၤတဂၤလၢ ကိၣ်ဘုမုယီၤ အလိၣ် ၂၀+ လၢအဘၣ်တၢ်တ့အီၤလၢ တၤသၣ်ဆိတဖၣ် ဃုာ်ဒီးဘုစဲၤသံသိ တထၢၣ်လီၤ.+ ဝံၤဒီး စီၤအလံၤၡါတဲဝဲလၢ “ဒ်သိး ဝံအဖိခွါတဖၣ် ကအီၣ်ဝဲအဂီၢ် ဟ့ၣ်လီၤအဝဲသ့ၣ်တက့ၢ်.”
၄၃ ဘၣ်ဆၣ် စီၤအလံၤၡါ အပှၤမၤစၢၤတၢ်န့ၣ် တဲဝဲလၢ “တၢ်အီၣ်အံၤ ကယၢဝဲလၢ ပှၤအဂၤ ၁၀၀ အဂီၢ်ဒ်လဲၣ်.”+ ဒီးစီၤအလံၤၡါ တဲအီၤလၢ “ဒ်သိး ဝံအဖိခွါတဖၣ် ကအီၣ်ဝဲအဂီၢ် ဟ့ၣ်လီၤအဝဲသ့ၣ်ဟီ, မ့ၢ်လၢ ယဟိဝၤယွၤတဲဝဲလၢ ‘အဝဲသ့ၣ် ကအီၣ်တၢ် ဒီးအဘျဲၣ်အစဲၢ် ကအိၣ်တ့ၢ်ဒံး တနီၤလီၤ.’”+
၄၄ ဒီးအဝဲဟ့ၣ်လီၤ ဝံအဖိခွါတဖၣ် ဒီးအဝဲသ့ၣ်အီၣ်ဝဲလီၤ. ဒီးဒ်ယဟိဝၤယွၤ တဲပာ်စၢၤဝဲအသိး တၢ်အီၣ် အဘျဲၣ်အစဲၢ် အိၣ်တ့ၢ်ဒံးဝဲ တနီၤလီၤ.+
