၂ စီၤပၤ ၇:၁-၂၀
၇ ဒီးစီၤအလံၤၡါ တဲဝဲလၢ “ဒိကနၣ် ယဟိဝၤယွၤ အတၢ်ကတိၤ တက့ၢ်. ယဟိဝၤယွၤ တဲဝဲလၢ ‘ခဲမုၢ်ဆ့ၣ် ဆၢကတီၢ်ဒ်အံၤ ဖဲဝ့ၢ်ၡၤမရံ အတြဲၤခိၣ်ထိးန့ၣ်* ကိၣ်ကမူၣ်လၢအဂ့ၤ တစ့အၤန့ၣ်* အပှ့ၤကအိၣ်ဝဲ တၡက့လး* ဒီးဘုမုယီၤ ခံစ့အၤန့ၣ် အပှ့ၤကအိၣ်ဝဲ တၡက့လးလီၤ.’”+
၂ ဖဲန့ၣ် သုးခိၣ်တဂၤလၢ စီၤပၤနာ်န့ၢ်အီၤန့ၣ် တဲဘၣ် ယွၤလၢအမ့ၢ်အတီအပှၤတဂၤလၢ “ယဟိဝၤယွၤ မ့ၢ်အိးထီၣ်မူခိၣ်အတြဲၤတဖၣ် သနာ်က့ တၢ်ကဲထီၣ်အသးဒ်န့ၣ် ကသ့နီၢ်ကီၢ်ဧါ.”+ စီၤအလံၤၡါ တဲဆၢဝဲလၢ “နကထံၣ်ဘၣ်လၢ နနီၢ်ကစၢ်အမဲာ်+ ဘၣ်ဆၣ် နတအီၣ်ဘၣ်အီၤဘၣ်.”+
၃ လၢဝ့ၢ်အတြဲၤ အကျဲနုာ်လီၤအလီၢ်န့ၣ် ပှၤဘၣ်တၢ်ဆါအၢ အိၣ်ဝဲလွံၢ်ဂၤလီၤ.+ ဒီးအဝဲသ့ၣ် တဲလိာ်အသး တဂၤဒီးတဂၤလၢ “ဘၣ်မနုၤအဃိ ပဆ့ၣ်နီၤဖဲအံၤ တုၤလၢပကသံလဲၣ်.
၄ ပမ့ၢ်လဲၤလၢဝ့ၢ်ပူၤ ဖဲတၢ်သၣ်ဝံၤလီၤဒိ အိၣ်ဖဲန့ၣ်အခါန့ၣ်+ ပကသံဖဲန့ၣ်လီၤ. ဒီးပမ့ၢ်ဆ့ၣ်နီၤဖဲအံၤ သနာ်က့ ပကသံဒၣ်တၢ်လီၤ. အဃိ ခဲအံၤ ပကလဲၤသကိးလၢ ပှၤစူၤရံဖိတဖၣ် အဒဲကဝီၤ ဒီးအဝဲသ့ၣ် မ့ၢ်ပာ်မူပှၤန့ၣ် ပကမူ ဘၣ်ဆၣ် အဝဲသ့ၣ် မ့ၢ်မၤသံပှၤန့ၣ် ပကသံလီၤ.”
၅ အဃိ အဝဲသ့ၣ် ဟးထီၣ်ဖဲမုၢ်ဟါလီၤ အဆၢကတီၢ် ဒီးလဲၤဝဲလၢ ပှၤစူၤရံဖိတဖၣ် အဒဲကဝီၤလီၤ. ဖဲအဝဲသ့ၣ် လဲၤတုၤလၢ ပှၤစူၤရံဖိတဖၣ် အဒဲကဝီၤအချၢအခါ ပှၤတအိၣ် နီတဂၤဘၣ်.
၆ နီၢ်ကီၢ်န့ၣ် ယဟိဝၤယွၤ ဒုးနၢ်ဟူတ့ၢ် ပှၤစူၤရံဖိတဖၣ်လၢ တၢ်အသီၣ်လၢ အလီၤဂာ်ဒီး သုးမုၢ်ဖးဒိၣ်တဖုလၢ အအိၣ်ဒီး ကသ့ၣ်တဖၣ် ဒီးလ့ၣ်ကဟၣ်သုးတဖၣ်လီၤ.+ အဃိ ပှၤစူၤရံဖိ တဲလိာ်အသး တဂၤဒီးတဂၤလၢ “အံၣ်စရ့လး အစီၤပၤ ငါန့ၢ်ပှၤဃ့ၤသးဖိ ဒီးပှၤအဲၤကူပတူးဖိ အစီၤပၤတဖၣ် ဒ်သိးအကဟဲထီၣ်ဒုးပှၤ အဂီၢ်ဧါသၢၤ.”
၇ အဃိ အဝဲသ့ၣ် ဂဲၤဆၢထၢၣ် တဘျီဃီ ဒီးဃ့ၢ်ကွံာ်ဝဲ ဖဲမုၢ်ဟါလီၤအဆၢကတီၢ်န့ၣ်လီၤ. ဒီးအဝဲသ့ၣ် ပာ်တ့ၢ်ကွံာ် အဒဲတဖၣ်မ့ၢ်ဂ့ၤ, ကသ့ၣ်တဖၣ်မ့ၢ်ဂ့ၤ, ကသ့ၣ်ယီၤတဖၣ်မ့ၢ်ဂ့ၤ ဒီးဒဲကဝီၤ ဒီတဖျၢၣ်ဒ်န့ၣ် ဒီးအဝဲသ့ၣ် ဃ့ၢ်ပူၤဖျဲးအသးလီၤ.
၈ ဖဲပှၤဘၣ်တၢ်ဆါအၢတဖၣ် လဲၤတုၤလၢ ဒဲကဝီၤအချၢအခါ အဝဲသ့ၣ် လဲၤနုာ်လၢဒဲတဖျၢၣ်အပူၤ ဒီးအီၣ်တၢ်အီတၢ်လီၤ. ဒီးဖဲန့ၣ် အဝဲသ့ၣ် ဟံးန့ၢ်ဝဲ စ့ညၣ်, ထူ ဒီးတၢ်ကူတၢ်သိးတဖၣ် ဒီးလဲၤပာ်ခူသူၣ်ဝဲလီၤ. ဒီးအဝဲသ့ၣ် ဟဲက့ၤကဒါ ဒီးလဲၤနုာ်လၢဒဲအဂၤတဖျၢၣ် ဒီးဟံးန့ၢ်ဝဲ တၢ်ဖိတၢ်လံၤတဖၣ် လၢဒဲပူၤ ဒီးလဲၤပာ်ခူသူၣ်ဝဲလီၤ.
၉ ဘၣ်ဆၣ် လၢခံ အဝဲသ့ၣ် တဲလိာ်အသး တဂၤဒီးတဂၤလၢ “တၢ်လၢပမၤခဲအံၤန့ၣ် တဘၣ်ဘၣ်. တနံၤအံၤ ပအိၣ်ဒီးတၢ်သးခုကစီၣ် အဃိ ပကြၢးလဲၤတဲဆိပှၤဂၤလီၤ. ပမ့ၢ်မၤယံာ်မၤနီၢ်ပသး ဒီးအိၣ်ခိးတုၤလၢ မုၢ်ဝါထီၣ်န့ၣ် ပကြၢးဘၣ် တၢ်စံၣ်ညီၣ်လီၤ. အဃိ ပကလဲၤခဲအံၤ ဒီးတဲဖျါထီၣ် တၢ်ဂ့ၢ်တခါအံၤလၢ စီၤပၤအဟံၣ်လီၤ.”
၁၀ အဃိ အဝဲသ့ၣ် လဲၤတဲဘၣ် ပှၤခိးဝ့ၢ်အတြဲၤတဖၣ်လၢ “ပလဲၤနုာ်လၢ ပှၤစူၤရံဖိတဖၣ် အဒဲကဝီၤပူၤ ဘၣ်ဆၣ် ဖဲန့ၣ်ပှၤတအိၣ်နီတဂၤဘၣ် ဒီးပတနၢ်ဟူ ပှၤကလုၢ် နီတဂၤဘၣ်. ဖဲန့ၣ် အိၣ်ထဲဒၣ် ကသ့ၣ်တဖၣ် ဒီးကသ့ၣ်ယီၤတဖၣ် လၢအဘၣ်တၢ်စၢဃာ်အီၤ ဒီးဒဲတဖၣ်န့ၣ် ပှၤပာ်တ့ၢ်အီၤ ဒ်န့ၣ်လီၤ.”
၁၁ တဘျီဃီန့ၣ် ပှၤခိးတြဲၤဖိတဖၣ် တဲဘၣ် တၢ်ကစီၣ်လၢ ပှၤလၢ အအိၣ်လၢ စီၤပၤအဟံၣ်ပူၤန့ၣ်လီၤ.
၁၂ ဒီးစီၤပၤ ဂဲၤဆၢထၢၣ်တဘျီဃီ လၢမုၢ်နၤခီ ဒီးတဲဘၣ် အခ့အပှၤတဖၣ်လၢ “ယကတဲဘၣ်သု တၢ်လၢပှၤစူၤရံဖိတဖၣ် ကမၤဝဲလီၤ. အဝဲသ့ၣ် သ့ၣ်ညါလၢ ပလီၤဘဲအဃိ+ အဝဲသ့ၣ် ပာ်တ့ၢ်ကွံာ် အဒဲကဝီၤ ဒီးလဲၤအိၣ်ခူသူၣ်လၢ ပျီပူၤ ဒီးဆိကမိၣ်ဝဲလၢ ပကဟးထီၣ်လၢ ဝ့ၢ်ပူၤ ဒီးအဝဲသ့ၣ် ကဖီၣ်န့ၢ်မူဒံးပှၤ ဒီးလဲၤနုာ်လီၤလၢ ဝ့ၢ်ပူၤလီၤ.”+
၁၃ စီၤပၤအခ့အပှၤတဂၤ တဲဝဲလၢ “ဝံသးစူၤ ဃုထၢထီၣ်ပှၤတနီၤလၢ အကလဲၤဒိးဝဲ ကသ့ၣ်ယဲၢ်ဒုလၢ အအိၣ်တ့ၢ်ဒံး လၢဝ့ၢ်ပူၤတက့ၢ်. အဝဲသ့ၣ် မ့ၢ်ဆဲးအိၣ်ဖဲအံၤ သနာ်က့ အဝဲသ့ၣ်ကကဲထီၣ် ဒ်သိးဒီး ပှၤအံၣ်စရ့လးဖိ အဂၤတဖၣ် လၢအဆဲးအိၣ်ဖဲအံၤ ဒီးအဝဲသ့ၣ် ကကဲထီၣ် ဒ်သိးဒီး ပှၤအံၣ်စရ့လးဖိအဂၤတဖၣ် လၢအသံတ့ၢ်လီၤ. အဃိ ပကဆှၢလီၤ အဝဲသ့ၣ် ဒီးပကခိးကွၢ်သၢၤ.”
၁၄ အဃိ အဝဲသ့ၣ် ဟံးန့ၢ်ဝဲ လ့ၣ်ကဟၣ်ခံခိၣ် ဃုာ်ဒီး ကသ့ၣ်တဖၣ် ဒီးစီၤပၤ တဲဝဲလၢ “လဲၤကွၢ်တထံၣ်” ဒီးဆှၢလီၤအဝဲသ့ၣ်လၢ ပှၤစူၤရံဖိတဖၣ် အဒဲကဝီၤလီၤ.
၁၅ အဝဲသ့ၣ် လဲၤပိာ်ဝဲ ကျဲလၢ ပှၤစူၤရံဖိတဖၣ်လဲၤဝဲ ပၢၢ်တုၤလၢ ထံကျိယၢ်ဒ့ၣ်လီၤ. ဒီးကျဲဒီတဘိန့ၣ် အိၣ်ဝဲဒီး တၢ်ကူတၢ်သိးတဖၣ် ဒီးတၢ်ပီးတၢ်လီတဖၣ် လၢပှၤစူၤရံဖိ တၢၤကွံာ်ဝဲ ဖဲအဝဲသ့ၣ် ဃ့ၢ်လၢ တၢ်ပျံၤတၢ်ဖုးအပူၤ အခါန့ၣ်လီၤ. ပှၤစိာ်တၢ်ကစီၣ်ဖိတဖၣ် ဟဲက့ၤတဲဘၣ် စီၤပၤလၢ တၢ်ဂ့ၢ်န့ၣ်လီၤ.
၁၆ ဒီးပှၤဂီၢ်မုၢ် လဲၤဟံးန့ၢ်တၢ်လၢ အအိၣ်လၢ ပှၤစူၤရံဖိတဖၣ် အဒဲကဝီၤပူၤလီၤ. အဃိ ကိၣ်ကမူၣ်လၢအဂ့ၤ တစ့အၤန့ၣ် အပှ့ၤလီၤတုၤလၢ တၡက့လး ဒီးဘုမုယီၤ ခံစ့အၤန့ၣ် အပှ့ၤလီၤတုၤလၢ တၡက့လး ဒ်ယဟိဝၤယွၤ တဲပာ်စၢၤဝဲ အသိးလီၤ.+
၁၇ ဒီးသုးခိၣ်တဂၤလၢ စီၤပၤနာ်န့ၢ်အီၤန့ၣ် စီၤပၤ ပာ်ထီၣ်အီၤလၢ အကတီခိၣ်ရိၤမဲတၢ်လၢ ဝ့ၢ်အတြဲၤ ဘၣ်ဆၣ် ပှၤဂီၢ်မုၢ် ယီၢ်ဘၣ်အီၤဒီး အသံဝဲ ဖဲဝ့ၢ်အတြဲၤ ဒ်ယွၤလၢအမ့ၢ်အတီအပှၤတဂၤ တဲပာ်စၢၤ စီၤပၤ ဖဲစီၤပၤ ဟဲလၢအအိၣ်အခါန့ၣ်လီၤ.
၁၈ ဒီးဒ်ယွၤလၢအမ့ၢ်အတီ အပှၤတဂၤန့ၣ် တဲဘၣ်စီၤပၤလၢ “ခဲမုၢ်ဆ့ၣ် ဆၢကတီၢ်ဒ်အံၤ ဖဲဝ့ၢ်ၡၤမရံ အတြဲၤခိၣ်ထိးန့ၣ် ဘုမုယီၤ ခံစ့အၤန့ၣ် အပှ့ၤကအိၣ်ဝဲ တၡက့လး ဒီးကိၣ်ကမူၣ်လၢအဂ့ၤ တစ့အၤန့ၣ် အပှ့ၤကအိၣ်ဝဲ တၡက့လး” အသိး တၢ်မၤအသးဒ်န့ၣ်လီၤ.+
၁၉ ဘၣ်ဆၣ် သုးခိၣ်တဂၤန့ၣ် တဲပာ်စၢၤ ယွၤလၢအမ့ၢ်အတီအပှၤတဂၤလၢ “ယဟိဝၤယွၤ မ့ၢ်အိးထီၣ်မူခိၣ်အတြဲၤတဖၣ် သနာ်က့ တၢ်ကဲထီၣ်အသးဒ်န့ၣ် ကသ့နီၢ်ကီၢ်ဧါ.” စီၤအလံၤၡါ တဲဆၢဝဲလၢ “နကထံၣ်ဘၣ်လၢ နနီၢ်ကစၢ်အမဲာ် ဘၣ်ဆၣ် နတအီၣ်ဘၣ်အီၤဘၣ်.”
၂၀ ဒီးခီဖျိလၢ ပှၤဂီၢ်မုၢ် ယီၢ်ဘၣ်အီၤ ဒီးအသံဝဲ ဖဲဝ့ၢ်အတြဲၤအဃိ တၢ်ကဲထီၣ်အသးဒီးအီၤ ဒ်န့ၣ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ပှၤဆါတၢ်ပှ့ၤတၢ်အလီၢ်.”
^ ကအိၣ်ဝဲ ၄ ကံလိဃၣ်ဃၣ်. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ၁ ၡက့လးန့ၣ် အဃၢထဲသိးဒီး ၁၁.၄ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
