၂ စီၤပၤ ၉:၁-၃၇
၉ ဒီးဝံအလံၤၡါ ကိးန့ၢ်ဝဲ ပှၤလၢအပၣ်ဃုာ်လၢ ဝံအဖိခွါတဖၣ်အကျါတဂၤ ဒီးတဲအီၤလၢ “ခးချ့ၣ်ထီၣ် နတၢ်ကူတၢ်ကၤတဖၣ် လၢနယီၢ်ဒ့ ဒီးလဲၤစိာ်သိတကိအံၤ ဒီးလဲၤကရီလၢ ဝ့ၢ်ရၤမိးကံးလဧး တက့ၢ်.+
၂ ဖဲနလဲၤတုၤ ဖဲန့ၣ်အခါ ဃုကွၢ် စီၤယဟိၤၡၤဖးအဖိခွါ စီၤယ့ၤဟူ+ လၢအမ့ၢ် စီၤနံၣ်ၡံ အလံၤခွါ တက့ၢ်. လဲၤနုာ်ဒီး မၢအဟးထီၣ်လၢ ပှၤခိၣ်ပှၤနၢ်တဖၣ်အကျါ ဒီးလဲၤကိးအီၤလၢ ဒၢးလၢတၢ်လီၢ်ခံတဖျၢၣ် အပူၤတက့ၢ်.
၃ ဒီးဟံးန့ၢ် သိတကိ, လူလီၤအီၤလၢ အခိၣ်လိၤ ဒီးတဲလၢ ‘ယဟိဝၤယွၤ တဲဝဲဒ်အံၤ, “ယဒိးဖှူနၤ ဒ်စီၤပၤအသိးလၢ အံၣ်စရ့လး အဖီခိၣ်လီၤ.”’+ ဝံၤဒီး အိးထီၣ်ပဲတြီ ဒီးဃ့ၢ်ထီၣ်ကွံာ် တဘျီဃီတက့ၢ်.”
၄ အဃိ ဝံအပှၤမၤစၢၤတၢ်န့ၣ် လဲၤဝဲလၢ ဝ့ၢ်ရၤမိးကံးလဧးလီၤ.
၅ ဖဲအဝဲလဲၤတုၤဝဲအခါ သုးခိၣ်တဖၣ် ဆ့ၣ်နီၤဖဲန့ၣ်လီၤ. အဝဲတဲဝဲလၢ “အိ သုးခိၣ်ဧၢ, ယဟဲစိာ် တၢ်ကစီၣ်တခါ လၢနဂီၢ်လီၤ.” စီၤယ့ၤဟူ သံကွၢ်ဝဲလၢ “လၢမတဂၤ အဂီၢ်လဲၣ်.” အဝဲတဲဝဲလၢ “အိ သုးခိၣ်ဧၢ, လၢနဂီၢ်လီၤ.”
၆ အဃိ စီၤယ့ၤဟူ ဟးထီၣ် ဒီးလဲၤနုာ်ဝဲလၢ ဟံၣ်ပူၤလီၤ. ပှၤမၤစၢၤတၢ်တဂၤန့ၣ် လူလီၤဝဲ သိလၢအခိၣ်လိၤ ဒီးတဲအီၤလၢ “အံၣ်စရ့လး အကစၢ် ယဟိဝၤယွၤ တဲဝဲဒ်အံၤ, ‘ယၤ, ယဟိဝၤယွၤ ယဒိးဖှူနၤ ဒ်စီၤပၤအသိးလၢ ယပှၤဂီၢ်မုၢ် အံၣ်စရ့လး အဖီခိၣ်လီၤ.+
၇ နကဘၣ် မၤသံကွံာ် နကစၢ် စီၤအၤဃာ် အစၢၤအသွဲၣ် ဒီးယကဟ့ၣ်ကၣ်က့ၤတၢ်လၢ ယခ့ယပှၤ လၢအမ့ၢ်ဝံတဖၣ် အသွံၣ်အဂီၢ် ဒီးယၤ, ယဟိဝၤယွၤ အခ့အပှၤ ခဲလၢာ်လၢ အသံလၢ နီၢ်အံၤစ့ဘ့ၤလး အစုပူၤအဂီၢ်လီၤ.+
၈ ဒီးယကမၤသံကွံာ် ပှၤပိာ်ခွါလၢ စီၤအၤဃာ် အဒူၣ်ဖိထၢဖိအကျါ ကိးဂၤဒဲး ဃုာ်ဒီး အဒူၣ်ဖိထၢဖိလၢ အပတီၢ်ဖုၣ်ကတၢၢ် ဒီးလၢအဂံၢ်စၢ်တဖၣ် လၢအံၣ်စရ့လး အပူၤလီၤ. စီၤအၤဃာ် အစၢၤအသွဲၣ်ခဲလၢာ် ကတုၤလၢတၢ်ဟးဂီၤလီၤ.+
၉ ဒီးယကမၤ စီၤအၤဃာ် အစၢၤအသွဲၣ်ဒ် စီၤနဘးအဖိခွါ စီၤယၤရၤဘၣ်+ အစၢၤအသွဲၣ်အသိး ဒီးဒ်စီၤအဃံယၤအဖိခွါ စီၤဘါၡၤ+ အစၢၤအသွဲၣ် အသိးလီၤ.
၁၀ မ့မ့ၢ် နီၢ်အံၤစ့ဘ့ၤလးန့ၣ် ထွံၣ်တဖၣ် ကအီၣ်ကွံာ်အီၤ လၢဟီၣ်ခိၣ်လီၢ် တကဝီၤလၢ ဝ့ၢ်ယံးစရ့လးအပူၤ+ ဒီးပှၤတခူၣ်လီၤအီၤ နီတဂၤဘၣ်.’” ဝံၤဒီး ပှၤမၤစၢၤတၢ်တဂၤန့ၣ် အိးထီၣ်ပဲတြီ ဒီးဃ့ၢ်ထီၣ်ကွံာ်ဝဲလီၤ.+
၁၁ စီၤယ့ၤဟူ က့ၤကဒါက့ၤလၢ သုးခိၣ်အဂၤတဖၣ် အအိၣ် ဒီးအဝဲသ့ၣ် သံကွၢ်အီၤလၢ “တၢ်ကီတၢ်ခဲ အိၣ်တမံၤမံၤဧါ. ဘၣ်မနုၤအဃိ တၢ်ပျုၢ်တဂၤန့ၣ် ဟဲလၢနအိၣ်လဲၣ်.” စီၤယ့ၤဟူ တဲဆၢ အဝဲသ့ၣ်လၢ “ပှၤဒ်န့ၣ်တဖၣ်အဂ့ၢ်န့ၣ် သုသ့ၣ်ညါလံဧဲၤ, အတၢ်ကတိၤတဖၣ် အခီပညီတအိၣ်ဘၣ်.”
၁၂ ဘၣ်ဆၣ် အဝဲသ့ၣ် တဲဝဲလၢ “တမ့ၢ်ဘၣ်. ဝံသးစူၤ တဲပှၤသၢၤ.” ဒီးစီၤယ့ၤဟူ တဲဝဲလၢ “အဝဲတဲယၤဒ်အံၤဒ်နုၤ ဝံၤဒီးအဝဲဆဲးတဲဝဲလၢ ‘ယဟိဝၤယွၤ တဲဝဲဒ်အံၤ, “ယဒိးဖှူနၤ ဒ်စီၤပၤအသိး လၢအံၣ်စရ့လး အဖီခိၣ်လီၤ.”’”+
၁၃ တဘျီဃီန့ၣ် အဝဲသ့ၣ် တဂၤစုာ်စုာ် ဒါလီၤအနီၢ်ကစၢ် အဆ့ကၤ လၢဃီသွါတဖၣ်အလိၤ+ လၢစီၤယ့ၤဟူ ကဆၢထၢၣ်ဝဲလၢ အဖီခိၣ် ဒီးအဝဲသ့ၣ် အူထီၣ်ကွဲၤ ဒီးတဲဝဲလၢ “စီၤယ့ၤဟူ ကဲထီၣ်စီၤပၤလံ.”+
၁၄ ဒီးစီၤယဟိၡၤဖး အဖိခွါ စီၤယ့ၤဟူ+ ကူၣ်ထီၣ်တၢ် ဒ်သိးကထီဒါ စီၤယဟိရၣ် အဂီၢ်လီၤ.
ဒီးလၢညါန့ၣ် စီၤယဟိရၣ် ဒီးပှၤအံၣ်စရ့လးဖိ ခဲလၢာ် ဘၣ်တြီဆၢ ကီၢ်စူၤရံ အစီၤပၤဃစ့လး+ လၢဝ့ၢ်ရၤမိးကံးလဧးလီၤ.+
၁၅ ဒီးဖဲန့ၣ်အခါ စီၤပၤယဟိရၣ် ဒုးဝဲ ကီၢ်စူၤရံ အစီၤပၤဃစ့လး+ ဒီးပှၤစူၤရံဖိတဖၣ် မၤဘၣ်ဒိအီၤအဃိ အဝဲက့ၤဝဲလၢ ဝ့ၢ်ယံးစရ့လး ဒ်သိး အတၢ်ပူၤလီၢ်တဖၣ် ကဘျါက့ၤအဂီၢ်လီၤ.+
အဃိ ခဲအံၤန့ၣ် စီၤယ့ၤဟူ တဲဝဲလၢ “သုသးမ့ၢ်လီၤပလိာ်န့ၣ် တဘၣ်ဟ့ၣ်အခွဲးလၢ ပှၤကဟးထီၣ်လၢ ဝ့ၢ်ပူၤဒီးလဲၤတၢၣ် တၢ်ဂ့ၢ်တခါအံၤလၢ ဝ့ၢ်ယံးစရ့လးအပူၤ နီတဂၤတဂ့ၤ.”
၁၆ ဒီးမ့ၢ်လၢ စီၤယဟိရၣ် ဘၣ်ဒိ ဒီးမံနီၤဝဲ ဖဲဝ့ၢ်ယံးစရ့လး အဃိ စီၤယ့ၤဟူ ဒိးထီၣ်အလ့ၣ်ကဟၣ် ဒီးလဲၤဝဲဖဲန့ၣ်လီၤ. ဒီးယူဒၤ အစီၤပၤအဃၤစယၤ လဲၤဝဲဖဲန့ၣ် ဒ်သိးကထံၣ်လိာ်သးဒီး စီၤယဟိရၣ် စ့ၢ်ကီးလီၤ.
၁၇ ဖဲပှၤခိးကွၢ်တၢ်ဖိ ဆၢထၢၣ်လၢ ဝ့ၢ်ယံးစရ့လး အတၢးအဖီခိၣ်အခါ အဝဲထံၣ်ဝဲ စီၤယ့ၤဟူ အပှၤတဖု ဟဲဘူးထီၣ်ဝဲလီၤ. တဘျီဃီန့ၣ် အဝဲတဲဝဲလၢ “ယထံၣ် ပှၤတဖုလီၤ.” စီၤယဟိရၣ် တဲဝဲလၢ “ကိးန့ၢ် ပှၤဒိးကသ့ၣ်တဂၤ ဒီးမၢအလဲၤ ထံၣ်လိာ်သးဒီး အဝဲသ့ၣ် ဒီးမၢအတဲဒ်အံၤ, ‘မ့ၢ်သုဟဲလၢ တၢ်မုာ်တၢ်ခုၣ် အဂီၢ်ဧါ’ န့ၣ်တက့ၢ်.”
၁၈ အဃိ ပှၤတဂၤ ဒိးထီၣ်ကသ့ၣ် ဒီးလဲၤထံၣ်လိာ်သးဒီး စီၤယ့ၤဟူ ဒီးတဲအီၤလၢ “စီၤပၤတဲဝဲဒ်အံၤ, မ့ၢ်သုဟဲလၢ တၢ်မုာ်တၢ်ခုၣ်အဂီၢ်ဧါ.” ဘၣ်ဆၣ် စီၤယ့ၤဟူ တဲလၢ “တၢ်လၢ ‘တၢ်မုာ်တၢ်ခုၣ်’ န့ၣ်အဘၣ်ဃးဒီးသု ဒ်လဲၣ်. လဲၤလၢယလီၢ်ခံ ဒီးပိာ်ယခံသၢၤ.”
ဒီးပှၤခိးကွၢ်တၢ်ဖိတဂၤ တဲဝဲလၢ “ပှၤလၢ အဘၣ်တၢ်မၢလီၤအီၤ တဂၤန့ၣ် လဲၤတုၤလၢ အဝဲသ့ၣ်အအိၣ် ဘၣ်ဆၣ် အတဟဲက့ၤကဒါက့ၤဘၣ်.”
၁၉ အဃိ စီၤယဟိရၣ် မၢလီၤဝဲ ပှၤဒိးကသ့ၣ် ခံဂၤတဂၤ ဒီးဖဲအလဲၤတုၤလၢ အဝဲသ့ၣ် အအိၣ်အခါ အတဲဝဲလၢ “စီၤပၤတဲဝဲ ဒ်အံၤ, ‘မ့ၢ်သုဟဲလၢ တၢ်မုာ်တၢ်ခုၣ်အဂီၢ်ဧါ.’” ဘၣ်ဆၣ် စီၤယ့ၤဟူ တဲလၢ “တၢ်လၢ ‘တၢ်မုာ်တၢ်ခုၣ်’ န့ၣ်အဘၣ်ဃးဒီးသု ဒ်လဲၣ်. လဲၤလၢယလီၢ်ခံ ဒီးပိာ်ယခံသၢၤ.”
၂၀ ဝံၤဒီး ပှၤခိးကွၢ်တၢ်ဖိတဂၤန့ၣ် တဲကဒီးဝဲလၢ “ပှၤတဂၤန့ၣ်စ့ၢ်ကီး လဲၤတုၤလၢ အဝဲသ့ၣ်အအိၣ် ဘၣ်ဆၣ် အတဟဲက့ၤကဒါက့ၤဘၣ်. ဒီးပှၤလၢအနီ လ့ၣ်ကဟၣ်တဂၤန့ၣ် နီဝဲဒ် စီၤနံၣ်ၡံအလံၤခွါ* စီၤယ့ၤဟူ နီဝဲအသိး မ့ၢ်လၢ အနီဝဲ ဒ်သိးဒီး ပှၤပျုၢ်တဂၤ အဃိလီၤ.”
၂၁ စီၤယဟိရၣ် တဲဝဲလၢ “ကတဲာ်ကတီၤထီၣ် လ့ၣ်ကဟၣ်သၢၤ.” အဃိ ပှၤကတဲာ်ကတီၤထီၣ် အလ့ၣ်ကဟၣ်သုးလီၤ. ဒီးအံၣ်စရ့လး အစီၤပၤယဟိရၣ် ဒီးယူဒၤ အစီၤပၤအဃၤစယၤ+ လဲၤဒိးဝဲ အနီၢ်ကစၢ် အလ့ၣ်ကဟၣ်သုး တဂၤတခိၣ် ဒ်သိးကထံၣ်လိာ်သးဒီး စီၤယ့ၤဟူအဂီၢ်လီၤ. အဝဲသ့ၣ် လဲၤထံၣ်လိာ်သးဒီးအီၤလၢ ပှၤယံးစရ့လးဖိ စီၤနၤဘိး+ အဟီၣ်ခိၣ်လီၢ် တကဝီၤအပူၤလီၤ.
၂၂ ဖဲစီၤယဟိရၣ် ထံၣ်ဘၣ် စီၤယ့ၤဟူအခါ အသံကွၢ်အီၤလၢ “စီၤယ့ၤဟူဧၢ, နဟဲလၢ တၢ်မုာ်တၢ်ခုၣ်အဂီၢ်ဧါ.” ဘၣ်ဆၣ် စီၤယ့ၤဟူ တဲဝဲလၢ “ဖဲနမိၢ် နီၢ်အံၤစ့ဘ့ၤလး+ အတၢ်မၤကမၣ်မုၣ်ကမၣ်ခွါ* ဒီးအတၢ်အူတၢ်လိၢ်တၢ် အကလုာ်ကလုာ် အိၣ်ဒံးအဆၢကတီၢ်န့ၣ် တၢ်မုာ်တၢ်ခုၣ်အိၣ်ကသ့ဧါ.”+
၂၃ တဘျီဃီန့ၣ် စီၤယဟိရၣ် ဃၣ်ကွံာ် အလ့ၣ်ကဟၣ် ဒ်သိးကဃ့ၢ်ကွံာ်ဝဲ ဒီးအတဲဘၣ် စီၤအဃၤစယၤလၢ “စီၤအဃၤစယၤဧၢ, ပဘၣ်တၢ်လံၣ်န့ၢ်ပှၤလံ.”
၂၄ ဒီးစီၤယ့ၤဟူ ထုးထီၣ်အချံၣ် ဒီးခးဝဲ စီၤယဟိရၣ်လၢ အချၢဃံ ဒီးပျၢ်တဘိန့ၣ် ဟဲဖျိထီၣ်က့ၤလၢ အသးလီၤ. ဒီးစီၤယဟိရၣ် လီၤဃံၢ်ဝဲလၢ အလ့ၣ်ကဟၣ်ပူၤလီၤ.
၂၅ ဝံၤဒီး စီၤယ့ၤဟူ တဲဘၣ် စီၤဘံးဒကၢ် လၢအမ့ၢ်သုးခိၣ်တဂၤလၢ “စိာ်ထီၣ်အစိၣ် ဒီးကွံာ်လီၤအီၤလၢ ပှၤယံးစရ့လးဖိ စီၤနၤဘိး အဟီၣ်ခိၣ်လီၢ် အပူၤတက့ၢ်.+ ဖဲယဟိဝၤယွၤ အနီၢ်ကစၢ်ဒၣ်ဝဲ တဲပာ်စၢၤ တၢ်ကစီၣ် လၢအထီဒါအီၤအခါ နၤဒီးယၤန့ၣ် ပဒိးသကိးလ့ၣ်ကဟၣ် လၢအပၢ် စီၤအၤဃာ် အလီၢ်ခံန့ၣ် နနီၣ်ဘၣ်မ့ၢ်ဧါ.+
၂၆ ယဟိဝၤယွၤ တဲဝဲလၢ “မဟါတနံၤ ယထံၣ်လၢ စီၤနၤဘိး+ ဒီးအဖိခွါတဖၣ် ဘၣ်တၢ်မၤသံ အဝဲသ့ၣ်လီၤ. အဃိ ယၤ, ယဟိဝၤယွၤ ကဟ့ၣ်ကၣ်က့ၤနၤလၢ+ တၢ်ပျီတဘ့ၣ်ဃီအံၤအပူၤ သပှၢ်တၢၢ်လီၤ.” လၢတၢ်န့ၣ်အဃိ ခဲအံၤန့ၣ် ဒ်ယဟိဝၤယွၤ အတၢ်ကတိၤ အိၣ်ပာ်စၢၤအသိး စိာ်ထီၣ် စီၤယဟိရၣ်အစိၣ် ဒီးကွံာ်လီၤအီၤလၢ တၢ်ပျီတဘ့ၣ်န့ၣ် အပူၤတက့ၢ်.”+
၂၇ ဖဲယူဒၤ အစီၤပၤအဃၤစယၤ+ ထံၣ်ဘၣ် တၢ်လၢအမၤအသးတဖၣ်အခါ အဝဲဃ့ၢ်ကွံာ်လၢ ကျဲလၢအဘူးဒီး တၤသၣ်လီၢ်အဟံၣ်လီၤ. (လၢခံ စီၤယ့ၤဟူ လဲၤလူၤအီၤ ဒီးတဲဝဲလၢ “မၤသံအီၤစ့ၢ်ကီးသၢၤ.” ဒီးအဝဲသ့ၣ် မၤဘၣ်ဒိအီၤ ဖဲအလဲၤတၢ်လၢ အလ့ၣ်ကဟၣ်ဆူ ကူၢ်အတၢ်လီၢ် လၢအအိၣ်ဘူးဒီး ဝ့ၢ်ယံးဘျၣ် အကပၤန့ၣ်လီၤ.+ ဒီးအဝဲဆဲးဃ့ၢ်ဝဲဆူညါ တုၤလၢ ဝ့ၢ်မကံးဒိၤ ဒီးအသံဝဲဖဲန့ၣ်လီၤ.
၂၈ ဒီးအခ့အပှၤတဖၣ် က့ၤစိာ်အစိၣ်လၢ ဝ့ၢ်ယရူၤၡလ့ၣ် လၢလ့ၣ်ကဟၣ် အပူၤလီၤ. ဒီးအဝဲသ့ၣ် ခူၣ်လီၤကွံာ်အီၤ လၢအနီၢ်ကစၢ် အသွၣ်ခိၣ် တပူၤဃီဒီး အမိၢ်ပၢ်ဖံဖု လၢပျၢၤတဖၣ် လၢစီၤဒၤဝံး အဝ့ၢ်ပူၤလီၤ.+
၂၉ ဖဲစီၤအၤဃာ်အဖိခွါ စီၤယဟိရၣ် ပၢတၢ်တဆံတနံၣ် အနံၣ်န့ၣ် စီၤအဃၤစယၤ+ ကဲထီၣ် ယူဒၤဘီမုၢ် အစီၤပၤလီၤ.)
၃၀ ဖဲစီၤယ့ၤဟူ လဲၤတုၤလၢ ဝ့ၢ်ယံးစရ့လးအခါ+ နီၢ်အံၤစ့ဘ့ၤလး+ နၢ်ဟူဘၣ်ဝဲလီၤ. အဃိ အဝဲဒွံးသူထီၣ် အမဲာ်ဖံး, ကယၢကယဲထီၣ် အခိၣ်ဆူၣ် ဒီးကွၢ်စိလီၤတၢ်လၢ ပဲတြီဖိလီၤ.
၃၁ ဖဲစီၤယ့ၤဟူ လဲၤနုာ်လီၤဖျိလၢ ဝ့ၢ်အတြဲၤအခါ နီၢ်အံၤစ့ဘ့ၤလး တဲဝဲလၢ “စီၤစံၣ်ရံၤ လၢအမ့ၢ် ပှၤလၢအမၤသံအစီၤပၤန့ၣ် တၢ်မၤအသးဒီးအီၤ ဒ်လဲၣ်.”+
၃၂ စီၤယ့ၤဟူ ကွၢ်ထီၣ်တၢ်လၢ ပဲတြီဖိ ဒီးတဲဝဲလၢ “မတဂၤ အိၣ်ဃူယၤလဲၣ်. မတဂၤလဲၣ်.”+ တဘျီဃီန့ၣ် ပဒိၣ် ခံဂၤသၢဂၤ ကွၢ်လီၤအီၤလီၤ.
၃၃ ဒီးစီၤယ့ၤဟူ တဲဝဲလၢ “ကွံာ်လီၤအီၤသၢၤ.” အဃိ အဝဲသ့ၣ် ကွံာ်လီၤအီၤ ဒီးအသွံၣ်တနီၤ ဖျိးဝဲလၢ တၢ်ဒူၣ်ကပၤ ဒီးလၢကသ့ၣ်တဖၣ်အလိၤ ဒီးအကသ့ၣ်တဖၣ် ယီၢ်တံၢ်အီၤလီၤ.
၃၄ ဝံၤဒီး စီၤယ့ၤဟူ လဲၤနုာ် ဒီးအီၣ်တၢ်အီတၢ်လီၤ. ဒီးအဝဲတဲဝဲလၢ “ပိာ်မုၣ်တဂၤအံၤ အကဲဝဲ စီၤပၤအဖိမုၣ်အဃိ ဝံသးစူၤ ကွၢ်ကျဲၤက့ၤ ပိာ်မုၣ်လၢ အဘၣ်တၢ်ဆိၣ်အၢ တဂၤအံၤ ဒီးလဲၤခူၣ်လီၤကွံာ်အီၤ တက့ၢ်.”+
၃၅ ဘၣ်ဆၣ် ဖဲအဝဲသ့ၣ် လဲၤဒ်သိးကခူၣ်လီၤ နီၢ်အံၤစ့ဘ့ၤလးအခါ အဝဲသ့ၣ် ထံၣ်ဝဲထဲ အခိၣ်ကု, အစုလၣ် ဒီးအခီၣ်လၣ်လီၤ. အဝဲသ့ၣ် တထံၣ်တၢ်အဂၤ နီတမံၤလၢၤဘၣ်.+
၃၆ ဒီးဖဲအဝဲသ့ၣ် ဟဲက့ၤတဲဘၣ် စီၤယ့ၤဟူအခါ အဝဲတဲဝဲလၢ “တၢ်မၤအသးအံၤ မၤလၢထီၣ်ပှဲၤထီၣ် ယဟိဝၤယွၤ အတၢ်ကတိၤလၢ+ အတဲပာ်စၢၤဝဲ ခီဖျိအခ့အပှၤ ပှၤတံးၡဘးဖိ စီၤအ့ၤလံယၤ လၢအတဲလၢ ‘လၢဝ့ၢ်ယံးစရ့လး အဟီၣ်ခိၣ်လီၢ် တကဝီၤအပူၤန့ၣ် ထွံၣ်တဖၣ် ကအီၣ်ကွံာ် နီၢ်အံၤစ့ဘ့ၤလး အဖံးအညၣ်လီၤ.+
၃၇ ဒီးနီၢ်အံၤစ့ဘ့ၤလး အစိၣ်န့ၣ် ကကဲထီၣ် ဒ်တၢ်အ့ၣ်တၢ်ဆံၣ် လၢပျီပူၤ လၢဝ့ၢ်ယံးစရ့လး အဟီၣ်ခိၣ်လီၢ် တကဝီၤအပူၤလီၤ. အဃိ ပှၤတဲလၢ “အဝဲအံၤ မ့ၢ်နီၢ်အံၤစ့ဘ့ၤလး” န့ၣ်တသ့နီတဂၤဘၣ်.’”
