၂ မိၤၡ့ ၁၅:၁-၂၇
၁၅ ဖဲန့ၣ်အခါ စီၤမိၤၡ့ ဒီးပှၤအံၣ်စရ့လးဖိ သးဝံၣ် တၢ်သးဝံၣ် တယုၢ်အံၤလၢ ယဟိဝၤယွၤ အဂီၢ်လၢ+
“ယကသးဝံၣ်ထီၣ် ယဟိဝၤယွၤ, မ့ၢ်လၢ အဘၣ် တၢ်ပာ်ဒိၣ်ပာ်ကဲအီၤ ဒိၣ်မး.+
အဝဲ ကွံာ်လီၤဝဲ ကသ့ၣ် ဒီးပှၤဒိးကသ့ၣ်ဖိ လၢပီၣ်လဲၣ်ပူၤလီၤ.+
၂ ယဟိဝၤမ့ၢ် ယစိကမီၤ ဒီးယဂံၢ်ယဘါ, မ့ၢ်လၢ အအုၣ်က့ၤခီၣ်က့ၤယၤ အဃိလီၤ.+
အဝဲမ့ၢ်ယယွၤ ဒီးယကစံးထီၣ်ပတြၢၤအီၤလီၤ.+ အဝဲမ့ၢ် ယမိၢ်ပၢ်ဖံဖု လၢပျၢၤတဖၣ်အယွၤ+ ဒီးယကပာ်ဒိၣ်ပာ်ကဲအီၤလီၤ.+
၃ ယဟိဝၤယွၤမ့ၢ် ပှၤဒုးတၢ်လၢ အဂံၢ်ဆူၣ်ဘါဆူၣ်တဂၤ.+ ဒီးအမံၤမ့ၢ် ယဟိဝၤလီၤ.+
၄ ကစၢ်ယွၤ တၢၤလီၤကွံာ် ဖၤရိၤ အလ့ၣ်ကဟၣ်သုး ဒီးအသုးမုၢ်သံၣ်ဘိ လၢပီၣ်လဲၣ်ပူၤ,+ဒီးဖၤရိၤအသုးဖိလၢ အဂံၢ်ဆူၣ် ဘါဆူၣ်တဖၣ် လီၤဘျၢလၢ ပီၣ်လဲၣ်ပူၤလီၤ.+
၅ ထံယိာ် လုၢ်ဘၢကွံာ် အဝဲသ့ၣ် ဒီးဒ်လၢၢ်တဖျၢၣ် လီၤဘျၢဝဲအသိး အဝဲသ့ၣ် လီၤဘျၢလၢ ထံဖီလာ်လီၤ.+
၆ အိ ယဟိဝၤယွၤဧၢ, နစုထွဲ အစိကမီၤ ဆူၣ်ဒိၣ်မး.+အိ ယဟိဝၤယွၤဧၢ, နစုထွဲ မၤသဘှံး ဒုၣ်ဒါသ့လီၤ.
၇ ဒီးလၢ နတၢ်ကဟုကညီၢ် အဒိၣ်အထီအပူၤန့ၣ် နကွံာ်လီၤ ပှၤလၢ အဂဲၤဆၢထၢၣ် ထီဒါနၤလီၤ.+
နတၢ်သးထီၣ် ကဲၤကပျီၤထီၣ်ဝဲ ဒီးအီၣ်ကွံာ် အဝဲသ့ၣ် ဒ်လီၢ်ဘိ* အသိးလီၤ.
၈ နကသါလီၤ ကလံၤလၢ နနါဒ့ တထံၣ်အဃိ ထံပာ်ဖှိၣ်ထီၣ်အသးလီၤ.
ထံလၢ အယွၤလီၤဝဲတဖၣ်န့ၣ် အိၣ်ဆၢထၢၣ်ဝဲဂၢၢ်ဂၢၢ် ဒ်ထံတမၢၣ်အသိးဒီးထံလၢ အယွၤလီၤဆူၣ်ဆူၣ်န့ၣ် လီၤသကၤဝဲလၢ ပီၣ်လဲၣ် အသးကံၢ်ပူၤလီၤ.
၉ ဒုၣ်ဒါတဖၣ် တဲဝဲလၢ ‘ယကလူၤ ဒီးယကဖီၣ်န့ၢ် အဝဲသ့ၣ်,ယကနီၤလီၤ တၢ်လၢ အဘၣ်တၢ်ဂုာ်န့ၢ်ဆူၣ် တုၤလၢယသးမံတစု.
ယကထုးထီၣ်ယနး ဒီးယစု ကဖီၣ်န့ၢ်အဝဲသ့ၣ်လီၤ.’+
၁၀ နအူလီၤနကလံၤ ဒီးပီၣ်လဲၣ် ကျၢၢ်ဘၢ အဝဲသ့ၣ်လီၤ.+
အဝဲသ့ၣ် လီၤဘျၢဝဲလၢ ပီၣ်လဲၣ်လၢ အလီၤဘီလီၤမုၢ်အပူၤ ဒ်စၢၢ်ထး လီၤဘျၢဝဲ အသိးလီၤ.
၁၁ အိ ယဟိဝၤယွၤဧၢ, လၢယွၤတဖၣ် အကျါန့ၣ် မ့ၢ်မတၤ လီၤဂာ်ဒီး နၤလဲၣ်.+
မ့ၢ်မတၤ ပာ်ဖျါထီၣ်လၢ အစီဆှံဒိၣ်မး ဒ်သိးဒီးနၤ တဂၤလဲၣ်.+
နမ့ၢ်ယွၤတဂၤလၢ ပှၤကြၢးပျံၤအီၤ ဒီးသးဝံၣ် စံးထီၣ်ပတြၢၤအီၤ ဒီးနမ့ၢ်ယွၤတဂၤလၢ အမၤ တၢ်လီၤလိၢ်လီၤလး တဖၣ်လီၤ.+
၁၂ နယူာ်ထီၣ် နစုထွဲ ဒီးဟီၣ်ခိၣ် ယူၢ်လီၤကွံာ် အဝဲသ့ၣ်လီၤ.+
၁၃ ပှၤဂီၢ်မုၢ်လၢ နမၤပူၤဖျဲးအီၤတဖၣ်န့ၣ် နဆှၢအီၤ လၢနတၢ်အဲၣ် လၢအတီအပူၤလီၤ.+
လၢနတၢ်စိတၢ်ကမီၤ အပူၤန့ၣ် နကဟံးစုနဲၣ်ကျဲ အဝဲသ့ၣ်ဆူ နတၢ်အိၣ်တၢ်ဆိး အလီၢ်စီဆှံလီၤ.
၁၄ ပှၤကဘၣ်နၢ်ဟူဘၣ်+ ဒီးကကနိးကစုာ်ဝဲလီၤ.
တၢ်သူၣ်ကိၢ်သးဂီၤ ကဖီၣ်ဃာ် ပှၤဖလ့ၡသးဖိတဖၣ်လီၤ.
၁၅ ဖဲန့ၣ်အခါ ကီၢ်အဒိၣ် အခိၣ်နၢ်တဖၣ် ကပျံၤတၢ်ဒိၣ်မး,
ဒီးကီၢ်မိၤအး အပဒိၣ်လၢ အစိကမီၤဒိၣ်တဖၣ် ကကနိးကစုာ်ဝဲလီၤ.+
ဒီးပှၤလၢအအိၣ်လၢ ကီၢ်ကနၤဧၣ်တဖၣ် ကသးလီၤစၢ် ကိးဂၤဒဲးလီၤ.+
၁၆ တၢ်ပျံၤတၢ်ဖုး ဒီးတၢ်သူၣ်ကိၢ်သးဂီၤ ကလီၤဘၣ် အဝဲသ့ၣ်လီၤ.+
အိ ယဟိဝၤယွၤဧၢ, မ့ၢ်လၢ နစိကမီၤ လၢအဒိၣ်အဃိ အဝဲသ့ၣ် ကအိၣ်ဂၢၢ် ဒ်လၢၢ်တဖျၢၣ်ဖဲနပှၤဂီၢ်မုၢ် လဲၤခီဂာ်တၢ်အခါ,
ဖဲနပှၤဂီၢ်မုၢ်လၢ နဃုထၢထီၣ်အီၤတဖၣ်+ ခီဂာ်တၢ်အခါလီၤ.+
၁၇ အိ ယဟိဝၤယွၤဧၢ, နကစိာ် ပှၤဂီၢ်မုၢ် ဒီးသူၣ်လီၤ အဝဲသ့ၣ်လၢ နတၢ်န့ၢ်သါ အကစၢၢ်လိၤ,+လၢတၢ်လီၢ် လီၤတံၢ်လီၤဆဲး တတီၤ လၢနကတဲာ်ကတီၤ ပာ်စၢၤအီၤ လၢနကအိၣ်အဂီၢ်,အိ ယဟိဝၤယွၤဧၢ, တၢ်လီၢ်စီဆှံတတီၤ လၢနဒုးအိၣ်ထီၣ်အီၤလၢ နစုလီၤ.
၁၈ ယဟိဝၤယွၤ ကပၢတၢ် ဒ်စီၤပၤအသိး အစိၤစိၤအဃၣ်ဃၣ် လီၤထူလီၤယိာ်လီၤ.+
၁၉ ဖဲဖၤရိၤ အကသ့ၣ်တဖၣ် ဒီးအလ့ၣ်ကဟၣ်သုးတဖၣ် ဒီးအသုးဖိလၢ အဒိးကသ့ၣ် လဲၤလၢပီၣ်လဲၣ်ပူၤအခါ+ယဟိဝၤယွၤ ဒုးလီၤကဒါက့ၤ ပီၣ်လဲၣ်အထံ လၢအဝဲသ့ၣ် အဖီခိၣ်,+
ဘၣ်ဆၣ် ပှၤအံၣ်စရ့လးဖိတဖၣ် ဟးလၢ ဟီၣ်ခိၣ်ဃ့ထီအလိၤ ဒီးခီဂာ် ပီၣ်လဲၣ်လီၤ.”+
၂၀ ဒီးစီၤအၤဟရိၣ်အနီ နီၢ်မံးရယၣ် လၢအမ့ၢ် ဝံမုၣ်န့ၣ် ဟံးန့ၢ်တၢ်ခြ့ခြ့တခါ လၢအစုပူၤ ဒီးပိာ်မုၣ်ကိးဂၤဒဲး ပိာ်ထီၣ်အခံ အိၣ်ဒီးတၢ်ခြ့ခြ့တဖၣ် ဒီးဂဲၤကလံၣ်လီၤ.
၂၁ နီၢ်မံးရယၣ် သးဝံၣ်ဆၢက့ၤ ပှၤပိာ်ခွါတဖၣ်လၢ
“သးဝံၣ်ထီၣ် ယဟိဝၤယွၤ, မ့ၢ်လၢ အဘၣ် တၢ်ပာ်ဒိၣ်ပာ်ကဲအီၤ ဒိၣ်မး.+ကသ့ၣ် ဒီးပှၤဒိးကသ့ၣ်ဖိန့ၣ် အဝဲကွံာ်လီၤအီၤ လၢပီၣ်လဲၣ်ပူၤလံ.”+
၂၂ လၢခံ စီၤမိၤၡ့ ဆှၢဝဲ ပှၤအံၣ်စရ့လးဖိတဖၣ်လၢ အယံၤထီၣ်ဒီး ပီၣ်လဲၣ်ဂီၤ ဒီးအဝဲသ့ၣ် လဲၤလၢ ၡူၢ်အပှၢ်မုၢ်ကနၢအပူၤလီၤ. ဒီးအဝဲသ့ၣ် လဲၤတၢ်လၢ ပှၢ်မုၢ်ကနၢအပူၤ အိၣ်ဝဲသၢသီလံ ဘၣ်ဆၣ် တထံၣ်န့ၢ်ထံဘၣ်.
၂၃ ဖဲအဝဲသ့ၣ် လဲၤတုၤလၢ မၤရၤ*+ အခါ မ့ၢ်လၢထံန့ၣ် ခၣ်ဝဲအဃိ အဝဲသ့ၣ် အီဝဲထံလၢ အအိၣ်လၢ မၤရၤ တန့ၢ်ဘၣ်. လၢတၢ်န့ၣ်အဃိ အဝဲကိးဝဲ တၢ်လီၢ်အံၤလၢ မၤရၤလီၤ.
၂၄ အဃိ ပှၤဂီၢ်မုၢ်တဖၣ် ကဒူးကဒ့ၣ် စီၤမိၤၡ့+ ဒီးတဲဝဲလၢ “ပကဘၣ်အီ မနုၤလဲၣ်.”
၂၅ ဒီးစီၤမိၤၡ့ ဃ့တၢ်မၤစၢၤလၢ ယဟိဝၤယွၤအအိၣ်+ ဒီးယဟိဝၤယွၤ ဒုးနဲၣ်အီၤလၢ သ့ၣ်တထူၣ်လီၤ. ဖဲစီၤမိၤၡ့ ကွံာ်လီၤအီၤလၢ ထံကျါအခါ ထံန့ၣ်ကဲထီၣ်ထံလၢ ပှၤအီအီၤဝံၣ်လီၤ.
ဖဲန့ၣ် ယွၤပာ်တၢ်မၤအသးအံၤ ဒ်တၢ်မၤလိလၢ အဝဲသ့ၣ်အဂီၢ် ဒီးဒ်တၢ်အဒိလၢ အဘၣ်ဃးဒီး တၢ်စံၣ်ညီၣ်အသိး ဒီးဖဲန့ၣ် ယွၤမၤကွၢ် အဝဲသ့ၣ်လီၤ.+
၂၆ ဒီးယွၤတဲဝဲလၢ “သုမ့ၢ်ဒိကနၣ် သုကစၢ် ယဟိဝၤယွၤ အကလုၢ် လီၤတံၢ်လီၤဆဲး, မၤတၢ်လၢအဘၣ် လၢယမဲာ်ညါ, ဒိကနၣ် ယတၢ်မၤလိာ် ဒီးအိၣ်မူမၤထွဲ ယတၢ်ဘျၢ ခဲလၢာ်န့ၣ်+ ယတစံၣ်ညီၣ်သုလၢ တၢ်ဆူးတၢ်ဆါတဖၣ် ဒ်ယစံၣ်ညီၣ် ပှၤအဲၤကူပတူးဖိ အသိးဘၣ်.+ ယဲဒၣ်အံၤ ယမ့ၢ် ယဟိဝၤယွၤ, ကစၢ်လၢ အမၤဘျါက့ၤသုလီၤ.”+
၂၇ ဝံၤဒီး အဝဲသ့ၣ် လဲၤတုၤလၢ အ့လံၣ်လီၤ. ဖဲန့ၣ်န့ၣ် ထံထီၣ်ပၢၢ်အိၣ်ဝဲ ၁၂ ခါ ဒီးသ့ၣ်စူၣ်ပလိၣ် အိၣ်ဝဲ အထူၣ် ၇၀ လီၤ. အဃိ အဝဲသ့ၣ် သူၣ်လီၤအဒဲဖဲန့ၣ်လၢ ထံအဃၢၤလီၤ.
