၂ ၡမူၤအ့လး ၁:၁-၂၇
၁ စီၤစီလူး သံဝံၤအလီၢ်ခံ ဖဲစီၤဒၤဝံး လဲၤဒုး ပှၤဧမၤလ့းဖိနၢၤဒီး ဟဲက့ၤအခါ အဝဲအိၣ်ဝဲလၢ ဝ့ၢ်စံကလး+ ခံသီလီၤ.
၂ ဖဲသၢသီတသီန့ၣ် ပိာ်ခွါတဂၤလၢ အအိၣ်လၢ စီၤစီလူးအဒဲကဝီၤန့ၣ် ဟဲဝဲ ဒီးအဆ့ကၤညာ် ဒီးဟီၣ်ခိၣ်ကမူၣ်အိၣ်ဝဲလၢ အခိၣ်လိၤလီၤ. ဖဲအဝဲဟဲဘူးထီၣ်လၢ စီၤဒၤဝံးအအိၣ်အခါ အဝဲထိၣ်လီၤပှီၤအသးလီၤ.
၃ စီၤဒၤဝံး သံကွၢ်အီၤလၢ “နဟဲဖဲလဲၣ်.” အဝဲတဲဆၢဝဲလၢ “ယဃ့ၢ်ပူၤဖျဲးထီၣ်ကွံာ်လၢ အံၣ်စရ့လး အဒဲကဝီၤအပူၤလီၤ.”
၄ စီၤဒၤဝံး သံကွၢ်အီၤလၢ “တၢ်မၤအသးဒ်လဲၣ်. ဝံသးစူၤ တဲဘၣ်ယၤတက့ၢ်.” အဃိ အဝဲတဲဝဲလၢ “အံၣ်စရ့လး အသုးတဖၣ် ဃ့ၢ်ကွံာ်လၢ တၢ်ဒုးပူၤ ဒီးအဝဲသ့ၣ်သံဝဲ အါမးလီၤ. စီၤစီလူးဒီး အဖိခွါ စီၤယိနၤသၣ် ဒၣ်လဲာ်သံလံ.”+
၅ ဒီးစီၤဒၤဝံး သံကွၢ်ဝဲ ပိာ်ခွါသးစၢ်လၢ အဟဲစိာ်တၢ်ကစီၣ်တဂၤန့ၣ်လၢ “စီၤစီလူး ဒီးအဖိခွါ စီၤယိနၤသၣ် သံလံန့ၣ် နသ့ၣ်ညါဒ်လဲၣ်.”
၆ ဒီးပှၤပိာ်ခွါသးစၢ်တဂၤန့ၣ် တဲဆၢဝဲလၢ “ဘၣ်အတီၤဖဲ ယလဲၤလၢ ကစၢၢ်ကံးလဘိ+ ဒီးယထံၣ် စီၤစီလူး သန့ၤအသးလၢ အဘီလီၤ. ဖဲန့ၣ်အခါ လ့ၣ်ကဟၣ်သုး ဒီးသုးလၢ အဒိးကသ့ၣ်တဖၣ် လူၤအီၤဘူးကချုးလံ.+
၇ ဖဲအဝဲဃၣ်ဃီၤအသး ဒီးထံၣ်ယၤအခါ အဝဲကိးယၤ ဒီးယတဲလၢ ‘ယဘၣ်မၤန့ၢ်နၤ တၢ်မနုၤလဲၣ်.’
၈ အဝဲသံကွၢ်ယၤလၢ ‘နကဲမတဂၤလဲၣ်.’ ယတဲဆၢအီၤလၢ ‘ယကဲ ပှၤဧမၤလ့းဖိတဂၤလီၤ.’+
၉ ဒီးအဝဲတဲလၢ ‘ယဘၣ်ဒိနးမး ဘၣ်ဆၣ် ယတသံဒံးဘၣ်. အဃိ ဝံသးစူၤ ဟဲလၢယအိၣ် ဒီးမၤသံကွံာ်ယၤတက့ၢ်.’
၁၀ ဒီးယသ့ၣ်ညါလၢ အဝဲဘၣ်ဒိ ဒီးလီၤဃံၢ်လံအဃိ အဝဲမူတန့ၢ်လၢၤဘၣ်.+ အဃိ ယလဲၤဆၢထၢၣ်လၢ အကပၤ ဒီးယမၤသံအီၤလီၤ. ဝံၤဒီးယဟံးန့ၢ် ခိၣ်သလုးလၢ အအိၣ်လၢ အခိၣ်သၣ်ဃံလိၤ ဒီးထံဖှံၣ်လၢ အအိၣ်လၢ အစုဒုၣ်လိၤ ဒီးယဟဲက့ၤစိာ်အီၤဖဲအံၤ လၢနအိၣ်လီၤ.”
၁၁ အဃိ စီၤဒၤဝံး ဖီၣ်လီၤအဆ့ကၤ ဒီးဖှီညာ်ဝဲ ဒီးပိာ်ခွါခဲလၢာ်လၢ အအိၣ်ဒီးအီၤန့ၣ် မၤဝဲဒ်န့ၣ်စ့ၢ်ကီးလီၤ.
၁၂ ဒီးအဝဲသ့ၣ် ဟီၣ်ကိးပသူထီၣ်, အမဲာ်ထံလီၤ ဒီးဒုၣ်တၢ်အီၣ်+ တုၤလၢ မုၢ်ဟါလီၤ ခီဖျိလၢ စီၤစီလူး, အဖိခွါ စီၤယိနၤသၣ်, ယဟိဝၤယွၤ အပှၤဂီၢ်မုၢ် ဒီးပှၤအံၣ်စရ့လးဖိတဖၣ်+ ဘၣ်တၢ်မၤသံအီၤလၢနး ဒီဒူၣ်အဃိလီၤ.
၁၃ ဒီးစီၤဒၤဝံး သံကွၢ်ဝဲ ပိာ်ခွါသးစၢ်လၢ အဟဲစိာ်တၢ်ကစီၣ်တဂၤန့ၣ်လၢ “နကဲမတဂၤလဲၣ် ဒီးနဟဲဖဲလဲၣ်.” ဒီးအဝဲတဲဝဲလၢ “ယမ့ၢ် ပှၤဧမၤလ့းဖိတဂၤ လၢအမ့ၢ် ပှၤထံဂၤကီၢ်ဂၤဖိ အဖိခွါလီၤ.”
၁၄ စီၤဒၤဝံး တဲဘၣ်အီၤလၢ “ဘၣ်မနုၤအဃိ နမၤသံ ယဟိဝၤယွၤ အပှၤဒိးဖှူသးတဂၤ ဘူၣ်လဲၣ်.”+
၁၅ အဃိ စီၤဒၤဝံး ကိးဃီၤ ပိာ်ခွါသးစၢ်တဂၤ ဒီးတဲအီၤလၢ “ဟဲသုးထီၣ်သးလၢ တၢ်မဲာ်ညါ ဒီးမၤသံကွံာ်အီၤတက့ၢ်.” အဃိ ပိာ်ခွါသးစၢ်တဂၤန့ၣ် ကျီအီၤ ဒီးအဝဲသံဝဲလီၤ.+
၁၆ ဒီးစီၤဒၤဝံး တဲဘၣ်အီၤလၢ “မ့ၢ်လၢ နအုၣ်နသးလၢ နနီၢ်ကစၢ်အထးခိၣ်လၢ နမၤသံ ယဟိဝၤယွၤ အပှၤဒိးဖှူသးတဂၤအဃိ နသွံၣ်ကလီၤတီလၢ နနီၢ်ကစၢ်အခိၣ်လိၤလီၤ.”+
၁၇ ဒီးစီၤဒၤဝံး အုၣ်ဝဲ ထါဟီၣ်တယုၢ်လၢ စီၤစီလူး ဒီးအဖိခွါ စီၤယိနၤသၣ် အဂီၢ်လီၤ.+
၁၈ ဒီးအဝဲမၢ ပှၤလၢယူဒၤ အဒူၣ်အကျါ မၤလိဝဲ ထါဟီၣ်တယုၢ်အံၤလၢ ပှၤကိးဝဲလၢ “ချံၣ်” လၢအဘၣ်တၢ်ကွဲးအီၤလၢ လံာ်ယၤၡၣ်အပူၤန့ၣ်လီၤ.+
၁၉ “အိ အံၣ်စရ့လးဧၢ, ပိာ်ခွါတဖၣ်လၢ အအိၣ်ဒီးအလၤကပီၤန့ၣ် သံကွံာ်ဝဲလၢ နတၢ်လီၢ်ထီၣ်ထီတဖၣ်.+
ဒီးပှၤလၢအဂံၢ်ဆူၣ်ဘါဆူၣ် လီၤဃံၢ်ဝဲလံ.
၂၀ တၢ်ကစီၣ်တခါအံၤ တဘၣ်တဲအီၤလၢ ဝ့ၢ်ကၤသးအပူၤတဂ့ၤ.+
တဘၣ်ဘိးဘၣ်သ့ၣ်ညါအီၤလၢ ဝ့ၢ်အၤၡကလိၣ် အကျဲတဖၣ် အပူၤတဂ့ၤ,ပှၤဖလ့ၡသးဖိ အဖိမုၣ်တဖၣ် ကသးခုဘၣ်ဖုး,ဒီးပှၤလၢအတဒိးဘၣ် တၢ်ကူးတရံးန့ၣ် အဖိမုၣ်တဖၣ် ကသူၣ်ဖှံသးညီဘၣ်ဖုးလီၤ.
၂၁ ကံးလဘိ အကစၢၢ်သ့ၣ်ဧၢ,+ပစီၤထံမ့ၢ်ဂ့ၤ, တၢ်စူၤထံမ့ၢ်ဂ့ၤ မ်အသုတဟဲလီၤလၢ သုလိၤလၢၤတဂ့ၤ,ဒီးသုစံာ်ပျီတဖၣ် မ်အသုတမဲထီၣ် သၣ်ထီၣ်လၢ တၢ်မၤဘူၣ်စီဆှံ အဂီၢ်တဂ့ၤ,+မ့ၢ်လၢ ဖဲန့ၣ်န့ၣ် ပှၤလၢအဂံၢ်ဆူၣ်ဘါဆူၣ်တဖၣ် အကတီၤန့ၣ် ဘၣ်အၢထီၣ်ဝဲဒီးစီၤစီလူး အကတီၤန့ၣ် တဘၣ် တၢ်ဒိးဖှူအီၤလၢ သိလၢၤဘၣ် အဃိလီၤ.
၂၂ စီၤယိနၤသၣ်အချံၣ် ဒီးစီၤစီလူး အနးန့ၣ်+လူလီၤတၢ်သွံၣ် ဒီးဆဲးဖျိဘၣ် ပှၤလၢအဂံၢ်ဆူၣ်ဘါဆူၣ်တဖၣ် အညၣ်လီၤ.
အဝဲသ့ၣ်တဟဲက့ၤဝဲ ခီလီလီ နီတဘျီဘၣ်.+
၂၃ ဖဲစီၤစီလူး ဒီးစီၤယိနၤသၣ်+ မူဒံးဝဲအခါ ပှၤအဲၣ် ဒီးပာ်လုၢ်ပာ်ပှ့ၤ အဝဲသ့ၣ်လီၤ.
ဒီးဖဲအဝဲသ့ၣ် သံအခါဒၣ်လဲာ် တအိၣ်လီၤဖးဘၣ်.+
အဝဲသ့ၣ်န့ၣ် မ့ၢ်ပှၤလၢအဃ့ၢ်ချ့န့ၢ်ဒံး လံာ်ကြီကြာ်တဖၣ်+ဒီးအဂံၢ်ဆူၣ်န့ၢ်ဒံး ခ့ယုၢ်တဖၣ်လီၤ.+
၂၄ အိ အံၣ်စရ့လး အဖိမုၣ်သ့ၣ်ဧၢ, ဟီၣ်လၢစီၤစီလူးအဃိတက့ၢ်,အဝဲဒုးကူဒုးသိးသု တၢ်ကံးညာ်လၢ အလွဲၢ်ဂီၤဆှုၣ်ကလာ် ဒီးအညၣ်ဂ့ၤ,အဝဲမၤဃံမၤလၤထီၣ် သုကူသုသိးလၢ ထူလီၤ.
၂၅ ပှၤလၢအဂံၢ်ဆူၣ်ဘါဆူၣ်တဖၣ် လီၤဃံၢ်လၢ တၢ်ဒုးအပူၤလံ.
စီၤယိနၤသၣ် သံလၢ နတၢ်လီၢ် ထီၣ်ထီတဖၣ်လံ.+
၂၆ ယကၠီ စီၤယိနၤသၣ်ဧၢ, လၢနဃိန့ၣ် ယသူၣ်အုးသးအုးဒိၣ်မးဒီးယအဲၣ်နၤဒိၣ်မးလီၤ.+
နတၢ်အဲၣ်လၢ ယဖီခိၣ်န့ၣ် အဂ့ၤဒိၣ်န့ၢ်ဒံး ပိာ်မုၣ်အတၢ်အဲၣ် စၢၢ်တလၢၢ်လီၤ.+
၂၇ ပှၤလၢအဂံၢ်ဆူၣ်ဘါဆူၣ်တဖၣ် လီၤဃံၢ်ဝဲလံဒီးတၢ်ဒုး အစုကဝဲၤတဖၣ်န့ၣ် ဘၣ်တၢ်မၤဟးဂီၤကွံာ်အီၤလံ.”
