၂ ၡမူၤအ့လး ၂၁:၁-၂၂
၂၁ ဖဲစီၤဒၤဝံး ပၢတၢ်အဆၢကတီၢ် တၢ်သၣ်ဝံၤလီၤဒိ+ အိၣ်ထီၣ်ဝဲလၢ အယံာ်ဝဲသၢနံၣ်လီၤ. အဃိ စီၤဒၤဝံးသံကွၢ် ယဟိဝၤယွၤ ဒီးယဟိဝၤယွၤ တဲဝဲလၢ “မ့ၢ်လၢစီၤစီလူးမၤသံ+ ပှၤကံးဘိၣ်ဖိအဃိ တၢ်သွံၣ်လီၤတီလၢ စီၤစီလူးဒီး အဒူၣ်ဖိထၢဖိ အခိၣ်လိၤလီၤ.”
၂ အဃိ စီၤပၤကိးန့ၢ် ပှၤကံးဘိၣ်ဖိ+ ဒီးတဲတၢ်ဒီးအဝဲသ့ၣ်လီၤ. (ပှၤကံးဘိၣ်ဖိန့ၣ် တမ့ၢ်ပှၤအံၣ်စရ့လးဖိဘၣ်, မ့ၢ်ဝဲပှၤအမိၢ်ဖိလၢ+ ပှၤအံၣ်စရ့လးဖိ ပာ်မူအီၤ ဒီးအၢၣ်လီၤပာ်စၢၤလၢ တမၤသံအဝဲသ့ၣ်ဘၣ်,+ ဘၣ်ဆၣ် မ့ၢ်လၢ စီၤစီလူးသးဆူၣ်လၢ ပှၤအံၣ်စရ့လးဖိ ဒီးပှၤလၢယူဒၤအဒူၣ်ကျါအဂီၢ်အဃိ အဝဲဃုမၤသံအဝဲသ့ၣ်လီၤ.)
၃ စီၤဒၤဝံး တဲပှၤကံးဘိၣ်ဖိလၢ “ဒ်သိးသုကဆိၣ်ဂ့ၤ ယဟိဝၤယွၤ အပှၤဂီၢ်မုၢ်အဂီၢ်* ယကဘၣ်မၤန့ၢ်သု တၢ်မနုၤလဲၣ်. ဒီးယကဘၣ်မၤဘၣ်ဂီၢ်က့ၤ တၢ်ကမၣ်တခါအံၤဒ်လဲၣ်.”
၄ ဒီးပှၤကံးဘိၣ်ဖိ တဲအီၤလၢ “တၢ်ဂ့ၢ်တခါအံၤလၢ အဘၣ်ထွဲဒီး စီၤစီလူးဒီး အဒူၣ်ဖိထၢဖိန့ၣ် ပတဃ့က့ၤလၢ ထူဒီးစ့ဘၣ်.+ ဘၣ်ဆၣ် ပတအိၣ်ဒီးတၢ်ခွဲးတၢ်ယာ်လၢ ပကမၤသံ ပှၤတဂၤဂ့ၤတဂၤဂ့ၤ လၢအံၣ်စရ့လးအပူၤဘၣ်.” ဒီးစီၤဒၤဝံးတဲဝဲလၢ “ကွၢ်လၢသုတဲယၤန့ၣ် ယကမၤန့ၢ်သုလီၤ.”
၅ အဝဲသ့ၣ် တဲစီၤပၤလၢ “ပှၤတဂၤန့ၣ် ဂုာ်ကျဲးစၢးမၤဟးဂီၤကွံာ်ပှၤ ဒီးကူၣ်ထီၣ်ဖးလီၤဝဲ ဒ်သိး ပသုတဆဲးအိၣ်မူဒံး လၢအံၣ်စရ့လးအဟီၣ်ကဝီၤပူၤ နီတဂၤလၢၤတဂ့ၤအဂီၢ်လီၤ.+
၆ အဃိ ဟ့ၣ်လီၤပှၤ စီၤစီလူးအဖိအလံၤ နွံဂၤ ဒီးပကဘျးထီၣ် အဝဲသ့ၣ်အစိၣ်+ လၢယဟိဝၤယွၤ အမဲာ်ညါ လၢစီၤစီလူး လၢအမ့ၢ် ယဟိဝၤယွၤ ပှၤဃုထၢတဂၤ+ အဝ့ၢ်ကံးဘဧၤအပူၤလီၤ.”+ ဒီးစီၤပၤတဲဝဲလၢ “ယကဟ့ၣ်လီၤကွံာ် အဝဲသ့ၣ်လီၤ.”
၇ ဘၣ်ဆၣ် မ့ၢ်လၢ စီၤဒၤဝံး ဒီးစီၤစီလူး အဖိခွါ စီၤယိနၤသၣ် မၤတ့ၢ်တၢ်အၢၣ်လီၤလၢ ယဟိဝၤယွၤအမဲာ်ညါ အဃိ စီၤပၤဒၤဝံး ပာ်ဖျါထီၣ် တၢ်သးကညီၤလၢ စီၤယိနၤသၣ်+ အဖိခွါ စီၤမဖံဘိၤၡ့း အဖီခိၣ်လီၤ. စီၤမဖံဘိၤၡ့း+ မ့ၢ်ဝဲ စီၤစီလူး အလံၤခွါလီၤ.
၈ အဃိ စီၤပၤကိးန့ၢ် စီၤစီလူးအဖိခွါခံဂၤလၢ စီၤအၤယၤအဖိမုၣ် နီၢ်ရံးစဖၤ+ အိၣ်ဖျဲၣ်ထီၣ်န့ၢ်အီၤ လၢအမ့ၢ်ဝဲ စီၤအၢ်မိၤနံ ဒီးစီၤမဖံဘိၤၡ့းလီၤ. ဒီးအကိးန့ၢ်စ့ၢ်ကီး စီၤစီလူးအဖိမုၣ် နီၢ်မံကၤလး*+ အဖိခွါယဲၢ်ဂၤလၢ အအိၣ်ဖျဲၣ်ထီၣ်န့ၢ်ဝဲလၢ ပှၤမဃိလးဖိ စီၤဘၢ်စံးလဲ အဖိခွါ စီၤဧ့ဒြၤအ့လးအဂီၢ်လီၤ.+
၉ ဒီးစီၤပၤ ဟ့ၣ်လီၤကွံာ် အဝဲသ့ၣ်လၢ ပှၤကံးဘိၣ်ဖိအစုပူၤ ဒီးပှၤကံးဘိၣ်ဖိ ဘျးထီၣ်အဝဲသ့ၣ် အစိၣ်လၢကစၢၢ်ခိၣ် လၢယဟိဝၤယွၤ အမဲာ်ညါလီၤ.+ ပှၤနွံဂၤအံၤ ဘၣ်တၢ်မၤသံ အဝဲသ့ၣ် တဘျီဃီ နွံဂၤလၢာ် ဖဲပှၤကူးဘုမုယီၤ အဆၢကတီၢ် စးထီၣ်သီသီအခါလီၤ.
၁၀ ဒီးစီၤအၤယၤအဖိမုၣ် နီၢ်ရံးစဖၤ+ ဟံးန့ၢ် ထၢၣ်တၢ်ကံးညာ်* ဒီးဒါလီၤဝဲလၢလၢၢ်ခိၣ် ဒီးအိၣ်ခိးတၢ်ဖဲန့ၣ် စးထီၣ်လၢ ပှၤကူးဘုမုယီၤအဆၢကတီၢ် တုၤလၢမူခိၣ်စူၤလီၤဖးဒိၣ် လၢပှၤသံစိၣ် အလိၤလီၤ. လၢမုၢ်ဆါခီန့ၣ် အဝဲတပျဲလၢ ထိၣ်လၢအယူၤလၢ တၢ်ဖးဖီတဖၣ် စီၢ်လီၤလၢ အဝဲသ့ၣ်အစိၣ်လိၤဘၣ်. ဒီးလၢမုၢ်နၤခီန့ၣ် အဝဲတပျဲလၢ ဆၣ်ဖိကီၢ်ဖိအဒူတဖၣ် ဟဲဘူးဘၣ်.
၁၁ ဒီးပှၤတဲဘၣ် စီၤဒၤဝံးလၢ တၢ်လၢစီၤစီလူးအသံၣ်မါ* နီၢ်ရံးစဖၤ မၤဝဲန့ၣ်လီၤ. နီၢ်ရံးစဖၤန့ၣ် အပၢ်မ့ၢ်ဝဲ စီၤအၤယၤလီၤ.
၁၂ အဃိ စီၤဒၤဝံး လဲၤဟံးန့ၢ် စီၤစီလူးဒီး အဖိခွါ စီၤယိနၤသၣ် အဃံ လၢဝ့ၢ်ယၤဘ့ၣ်ကံးလဧး+ အခိၣ်အနၢ်တဖၣ်အအိၣ်လီၤ. လၢညါန့ၣ် ပှၤဖလ့ၡသးဖိ ဘျးထီၣ် အဝဲသ့ၣ်အစိၣ်လၢ ဝ့ၢ်ဘ့ၤသၡၢ် အတၢ်ဆါတၢ်ပှ့ၤအလီၢ် ဖဲပှၤဖလ့ၡသးဖိ မၤသံ စီၤစီလူးလၢ ကစၢၢ်ကံးလဘိ ဝံၤအလီၢ်ခံလီၤ.+ ဒီးဝ့ၢ်ယၤဘ့ၣ်ကံးလဧး အခိၣ်အနၢ်တဖၣ် လဲၤဟံးန့ၢ်ခူသူၣ် အဝဲသ့ၣ် အဃံဖဲန့ၣ် ဒီးက့ၤစိာ်ဝဲလီၤ.
၁၃ အဃိ စီၤဒၤဝံး လဲၤလၢအဝဲသ့ၣ်အအိၣ် ဒီးက့ၤစိာ်ဝဲ စီၤစီလူးဒီး အဖိခွါ စီၤယိနၤသၣ် အဃံတဖၣ် ဒီးစီၤဒၤဝံးအပှၤတဖၣ် ထၢဖှိၣ်ထီၣ်စ့ၢ်ကီး ပှၤပိာ်ခွါတဖၣ်လၢ အဘၣ်တၢ်ဘျးထီၣ်တ့ၢ်အီၤ အဃံတဖၣ်လီၤ.+
၁၄ ဒီးအဝဲသ့ၣ်ခူၣ်လီၤကွံာ် စီၤစီလူး ဒီးအဖိခွါ စီၤယိနၤသၣ် အဃံတဖၣ်လၢ အပၢ်စီၤကံၣ်+ အတၢ်သွၣ်ခိၣ် လၢအအိၣ်လၢ စ့လာ်+ လၢပှၤဘံၣ်ယၤမံၣ်ဖိ အဟီၣ်ကဝီၤပူၤန့ၣ်လီၤ. ဒီးအဝဲသ့ၣ် မၤတၢ်လၢ စီၤပၤ မၤလိာ်ဝဲခဲလၢာ် ဝံၤအခါ ကစၢ်ယွၤ ဒိကနၣ် အဝဲသ့ၣ် အတၢ်ဃ့ကညးတဖၣ် လၢထံကီၢ်အဂီၢ်လီၤ.+
၁၅ ဒီးတၢ်ဒုးတၢ်ယၤ အိၣ်ထီၣ်ကဒီးလၢ ပှၤဖလ့ၡသးဖိ ဒီးပှၤအံၣ်စရ့လးဖိ အဘၢၣ်စၢၤလီၤ.+ အဃိ စီၤဒၤဝံး ဒီးအခ့အပှၤတဖၣ် လဲၤလီၤဒုး ပှၤဖလ့ၡသးဖိ ဘၣ်ဆၣ် လၢခံ စီၤဒၤဝံးလီၤဘှံးလီၤ.
၁၆ ဒီးပှၤတဂၤလၢ အမံၤမ့ၢ်ဝဲ စီၤယံၡဘနိးလၢ အဟဲလီၤစၢၤလၢ ပှၤရၤဖၤဖိတဖၣ်န့ၣ်+ ပာ်လီၤအသးလၢ ကမၤသံစီၤဒၤဝံးလီၤ. အဘီ တိၢ်ဘီဖးဒိၣ်တဘိန့ၣ် အဃၢဝဲ ၡက့လး ၃၀၀*+ ဒီးအဝဲအိၣ်ဒီး နးသီသီတဘ့ၣ်လီၤ.
၁၇ တဘျီဃီန့ၣ် နီၢ်စရူယၤအဖိခွါ စီၤအဘံၡဲၤ+ ဟဲမၤစၢၤ+ စီၤဒၤဝံး ဒီးမၤသံကွံာ်ဝဲ ပှၤဖလ့ၡသးဖိတဂၤန့ၣ်လီၤ. ဖဲန့ၣ်အခါ စီၤဒၤဝံးအပှၤတဖၣ် အၢၣ်လီၤအီၤလၢ “ဒ်သိးနသုတမၤလီၤပံာ်ကွံာ် အံၣ်စရ့လး အမ့ၣ်အူဒၢ တဂ့ၤအဂီၢ်+ ပတဟ့ၣ်အခွဲးလၢ နကလဲၤဒုးတၢ်ဒီး ပှၤလၢၤဘၣ်.”+
၁၈ လၢခံ တၢ်ဒုးတၢ်ယၤ အိၣ်ထီၣ်ကဒီး ဒီးပှၤဖလ့ၡသးဖိ+ ဖဲကိာ်တၢ်လီၢ်လီၤ. ဖဲန့ၣ်န့ၣ် ပှၤဃူၡသးဖိ စီၤစံးဘကဲ+ ကျီသံကွံာ် စီၤစာ် လၢအဟဲလီၤစၢၤလၢ ပှၤရၤဖၤဖိန့ၣ်လီၤ.+
၁၉ ဒီးတၢ်ဒုး အိၣ်ထီၣ်ကဒီး ဒီးပှၤဖလ့ၡသးဖိ+ ဖဲကိာ်တၢ်လီၢ် ဒီးပှၤဘ့ၤသလ့ဃ့ၣ်ဖိ စီၤယၤရ့အိရကံၣ်အဖိခွါ စီၤအ့လဃၤနၣ် ကျီသံကွံာ် ပှၤကၤသးဖိ စီၤကၤလယးလီၤ. စီၤကၤလယး အဘီန့ၣ် အိၣ်ဒီး အဘိလၢ အမၤအသးဒ်ထၣ်အတီတဘိ အသိးလီၤ.+
၂၀ တၢ်ဒုးကဲထီၣ်ကဒီးလၢ ဝ့ၢ်ကၤသး ဒီးဖဲန့ၣ်န့ၣ် ပှၤပိာ်ခွါလၢ အနီၢ်ဖးဒိၣ်ဖးထီ အိၣ်ဝဲတဂၤလီၤ. အစုမုၢ်စုနၢ အိၣ်ဝဲတကပၤ ၆ ဘိ တကပၤ ၆ ဘိ ဒီးအခီၣ်မုၢ်ခီၣ်နၢ အိၣ်ဝဲ တကပၤ ၆ ဘိ တကပၤ ၆ ဘိအဃိ ခဲလၢာ်ခဲဆ့န့ၣ် အိၣ်ဝဲ ၂၄ ဘိလီၤ. အဝဲစ့ၢ်ကီး ဟဲလီၤစၢၤလၢ ပှၤရၤဖၤဖိလီၤ.+
၂၁ အဝဲဃ့ဘူၣ်* ပှၤအံၣ်စရ့လးဖိ+ တဘျီဝံၤတဘျီ အဃိ စီၤၡံမံၤ အဖိခွါ+ စီၤယိနၤသၣ် ကျီသံကွံာ်အီၤလီၤ. စီၤၡံမံၤမ့ၢ်ဝဲ စီၤဒၤဝံး အကၠီလီၤ.
၂၂ အဝဲသ့ၣ်လွံၢ်ဂၤလၢာ်န့ၣ် ဟဲလီၤစၢၤလၢ ပှၤရၤဖၤဖိလၢ ဝ့ၢ်ကၤသး ဒီးအဝဲသ့ၣ်သံလၢ စီၤဒၤဝံးဒီးအခ့အပှၤတဖၣ် အစုပူၤလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “တၢ်န့ၢ်သါ.”
^ ဘၣ်သ့ၣ်သ့ၣ် ကမ့ၢ် “နီၢ်မ့ရာ်.”
^ ကွၢ် တၢ်ကတိၤအခီပညီ.
^ ကွၢ် တၢ်ကတိၤအခီပညီ.
^ အိၣ်ဝဲ ၃.၅ ကံလိ လၢအမ့ၢ် ၇.၅ ပီၣ်. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “တၤ.”
