၂ ၡမူၤအ့လး ၂၃:၁-၃၉
၂၃ အဝဲအံၤမ့ၢ်ဝဲ စီၤဒၤဝံးအတၢ်ကတိၤလၢ အလီၢ်ခံကတၢၢ်တဖၣ်,+“စီၤယံးၡဲအဖိခွါ စီၤဒၤဝံး,+ပှၤပိာ်ခွါတဂၤလၢ ဘၣ်တၢ်မၤလၤကပီၤတ့ၢ်အီၤ,+စီၤယၤကိာ် အကစၢ်ယွၤ အပှၤဒိးဖှူသးတဂၤ,+ပှၤတဂၤလၢ အကလုၢ်မုာ် လၢအသးဝံၣ်+ အံၣ်စရ့လး အတၢ်သးဝံၣ် တဲဝဲလၢ
၂ ယတဲတၢ်ခီဖျိ ယဟိဝၤယွၤ အသးစီဆှံ,+အတၢ်ကတိၤန့ၣ် အိၣ်ဝဲလၢ ယပျ့ၤလိၤလီၤ.+
၃ အံၣ်စရ့လး အကစၢ်ယွၤ တဲဝဲ,ဒီးအံၣ်စရ့လး အလၢၢ်တဲယၤလၢ,+‘ပှၤလၢ အပၢပှၤဟီၣ်ခိၣ်ဖိတဂၤ မ့မ့ၢ်ပှၤလၢအတီအလိၤ+ဒီးပၢတၢ်လၢ တၢ်ပျံၤယွၤအပူၤန့ၣ်+
၄ လီၤဂာ်ဒ် မုၢ်ဆ့ၣ်ထီၣ် အတၢ်ကပီၤ ဖဲမုၢ်ဟဲဆဲးလီၤဝဲအခါ,+ဒီးဂီၤခီထီၣ်လၢ တၢ်အၢၣ် တအိၣ်ဘၣ်.
ဒီးလီၤဂာ်ဒ် တၢ်ကပီၤထီၣ်ဖဲ မူခိၣ်စူၤဝံၤအလီၢ်ခံ,လၢအဒုးမဲထီၣ် နီၣ်ဧိၤမံၤဧိၤ လၢ ဟီၣ်ခိၣ်ချၢန့ၣ်လီၤ.’+
၅ လၢကစၢ်ယွၤ အမဲာ်ညါန့ၣ် ယစၢၤ ယသွဲၣ်* လီၤဂာ်ဒ်န့ၣ် တမ့ၢ်ဧီၤ,မ့ၢ်လၢအဝဲမၤ တၢ်အၢၣ်လီၤအီလီၤ အထူအယိာ်ဒီးယၤ,+ဒီးအဝဲရဲၣ်ကျဲၤလီၤပာ်စၢၤဝဲ တဆီဘၣ်တဆီဂ့ၤဂ့ၤ ဒီးအဂၢၢ်ကျၢၤဝဲအဃိလီၤ.
တၢ်အၢၣ်လီၤအီလီၤ တခါအံၤ မ့ၢ်ဝဲ ယတၢ်အုၣ်က့ၤခီၣ်က့ၤ ဒီးယတၢ်သူၣ်ဖှံသးညီလီၤ.
လၢတၢ်န့ၣ်အဃိ အဝဲကမၤအါထီၣ် ယစၢၤယသွဲၣ် တမ့ၢ်ဧီၤ.+
၆ ဘၣ်ဆၣ် ပှၤပိာ်ခွါလၢ အလုၢ်အပှ့ၤ တအိၣ်ဘၣ် ကိးဂၤဒဲးန့ၣ် ဘၣ်တၢ်တၢၤကွံာ်အီၤ+ဒ်သပှီာ်တၤဆှုၣ်လၢ ပှၤဖီၣ်အီၤလၢအစု တဘူၣ်ဘၣ်တဖၣ် ဘၣ်တၢ်တၢၤကွံာ်အီၤအသိးလီၤ.
၇ ဖဲပှၤပိာ်ခွါတဂၤ ထိးဘၣ်တၤဆှုၣ်တဖၣ်အံၤအခါအဝဲကဘၣ်အိၣ်ဒီး တၢ်ပီးတၢ်လီ ထး ဒီးအဘီလီၤ.
တၤဆှုၣ်တဖၣ်န့ၣ် ကဘၣ် တၢ်ဒွဲၣ်အူထီၣ်ကွံာ်လၢအလီၢ် လၢာ်လၢာ်ဆ့ဆ့လီၤ.”
၈ အအံၤမ့ၢ်စီၤဒၤဝံး အပှၤဒူပှၤဃိၤတဖၣ်+ အမံၤလီၤ. လၢပှၤဒူပှၤဃိၤသၢဂၤအကျါန့ၣ် ပှၤတၤဃကးမိၣ်ဖိ စီၤယိစဘးဘၡဘးန့ၣ် မ့ၢ်ဝဲအခိၣ်လီၤ.+ ဘၣ်တဘျီ အသူဝဲ အဘီဒ်သိး ကမၤသံ ပှၤပိာ်ခွါအဂၤ ၈၀၀ လီၤ.
၉ လၢခံတဂၤန့ၣ် မ့ၢ်ဝဲ စီၤအလၤဧစၢ်လီၤ.+ အဝဲမ့ၢ်ဝဲစီၤအဃိဃး အစၢၤအသွဲၣ် ဒီးစီၤဒိဒိၤ+ အဖိခွါလီၤ. ဘၣ်တဘျီ ဖဲပှၤဖလ့ၡသးဖိ ပာ်ဖှိၣ်ထီၣ်အသး ဒ်သိးကဒုးတၢ်ဒီး ပှၤအံၣ်စရ့လးဖိအခါ ပှၤဒူပှၤဃိၤသၢဂၤ လၢအအိၣ်ဒီး စီၤဒၤဝံးန့ၣ် ဃ့ဘူၣ်ဝဲ ပှၤဖလ့ၡသးဖိလီၤ. လၢပှၤသၢဂၤန့ၣ်အကျါတဂၤန့ၣ် မ့ၢ်ဝဲ စီၤအလၤဧစၢ်လီၤ. ဒီးဖဲပှၤအံၣ်စရ့လးဖိ ဂုၤက့ၤအလီၢ်ခံအခါ
၁၀ စီၤအလၤဧစၢ်န့ၣ် တဂုၤက့ၤအလီၢ်ခံဘၣ်. အဝဲကျီသံဝဲ ပှၤဖလ့ၡသးဖိ တုၤလီၤလၢ အစုဘှံးဒီးဆှိၣ်ထီၣ် ဘၣ်ဆၣ် အဝဲတပျၢ်ကွံာ် အနးဘၣ်.+ အဃိ ဖဲတၢ်တနံၤန့ၣ် ယဟိဝၤယွၤ ဟ့ၣ်ပှၤအံၣ်စရ့လးဖိ တၢ်မၤနၢၤဒိၣ်ဒိၣ်မုၢ်မုၢ်+ ဒီးပှၤသုးဖိတဖၣ် ဟဲက့ၤပိာ်ထီၣ် စီၤအလၤဧစၢ်အခံ ဒ်သိးကဟံးန့ၢ် ပှၤလၢအသံတဖၣ် အတၢ်ကူတၢ်သိး ဒီးအတၢ်စုကဝဲၤတဖၣ်န့ၣ်လီၤ.
၁၁ ဒီးလၢခံတဂၤန့ၣ် မ့ၢ်ဝဲ ပှၤဟရၢ်ဖိ စီၤအက့အဖိခွါ စီၤၡးမၤလီၤ. ဘၣ်တဘျီ ပှၤဖလ့ၡသးဖိ ပာ်ဖှိၣ်ထီၣ်အသးလၢ ဝ့ၢ်လ့ၤဃံ လၢဟီၣ်ခိၣ်တကဝီၤလၢ အပှဲၤဒီး ပထိးမုၢ်တဖၣ်လီၤ. ဒီးပှၤသုးဖိတဖၣ် ပျံၤဝဲ ပှၤဖလ့ၡသးဖိအဃိ အဝဲသ့ၣ် ဃ့ၢ်ကွံာ်ဝဲလီၤ.
၁၂ ဘၣ်ဆၣ် အဝဲဆၢထၢၣ်ဝဲလၢ ဟီၣ်ခိၣ်တကဝီၤန့ၣ်အခၢၣ်သး ဒီးတပျဲလၢ ပှၤဖလ့ၡသးဖိ ကမၤန့ၢ် ဟီၣ်ခိၣ်တကဝီၤန့ၣ်ဘၣ်. ဒီးအဝဲ မၤသံဝဲ ပှၤဖလ့ၡသးဖိ တဂၤဝံၤတဂၤအဃိ ယဟိဝၤယွၤ ဟ့ၣ်ပှၤအံၣ်စရ့လးဖိ တၢ်မၤနၢၤ ဒိၣ်ဒိၣ်မုၢ်မုၢ်လီၤ.+
၁၃ ဖဲပှၤကူးဘု အဆၢကတီၢ် ပှၤသၢဂၤလၢ ပှၤအခိၣ်အဂၤ ၃၀ အကျါန့ၣ် လဲၤလီၤလၢ စီၤဒၤဝံး အအိၣ်လၢ ဧဒူးလၣ်အလ့ပူၤလီၤ.+ ဒီးပှၤဖလ့ၡသးဖိ လဲၤဆီလီၤသးလၢ ရၤဖၤအတၢ်တြီၤပူၤလီၤ.+
၁၄ ဖဲန့ၣ်အခါ စီၤဒၤဝံး အိၣ်ဝဲလၢ တၢ်အိၣ်သဒၢအလီၢ်+ ဒီးလၢဝ့ၢ်ဘ့ၤသလ့ဃ့ၣ်အပူၤန့ၣ် ပှၤဖလ့ၡသး အသုးဖိ အိၣ်ဝဲတဒူၣ်လီၤ.
၁၅ စီၤဒၤဝံးတဲဝဲလၢ “ယမ့ၢ်အီဘၣ်ထံလၢ ကမါလၢအအိၣ်လၢ ဝ့ၢ်ဘ့ၤသလ့ဃ့ၣ် အတြဲၤဃၢၤဒု ယကသးခုဖးဒိၣ်ညါ.”
၁၆ အဃိ ပှၤဒူပှၤဃိၤသၢဂၤန့ၣ် လဲၤနုာ်ဆူၣ်ဝဲလၢ ဖလ့ၡသး သုးဖိဒဲကဝီၤပူၤ ဒီးဒၢၣ်ထံလၢကမါပူၤ လၢဝ့ၢ်ဘ့ၤသလ့ဃ့ၣ် အတြဲၤဃၢၤ ဒီးဟဲက့ၤစိာ်ဝဲလၢ စီၤဒၤဝံးအအိၣ်လီၤ. ဘၣ်ဆၣ် စီၤဒၤဝံးတအီဝဲဘၣ်. ဒီးအဝဲလူလီၤကွံာ်ဝဲလၢ ယဟိဝၤယွၤအမဲာ်ညါလီၤ.+
၁၇ စီၤဒၤဝံးတဲဝဲလၢ “အိ ယဟိဝၤယွၤဧၢ, မ့ၢ်ယကြၢးအီ ပှၤပိာ်ခွါ လၢအလဲၤဒုးအိၣ်ထီၣ် တၢ်ဘၣ်ယိၣ်အလီၢ်လၢ အသးသမူအဂီၢ်တဖၣ်အံၤ အသွံၣ်ဧါ.+ လ့ၤတက့ၤ ယတကြၢးအီဘၣ်.” အဃိ စီၤဒၤဝံးတအီထံန့ၣ်ဘၣ်. ဒီးတၢ်သ့ၣ်တဖၣ်န့ၣ် မ့ၢ်ဝဲတၢ်လၢပှၤဒူပှၤဃိၤ မၤဝဲန့ၣ်လီၤ.
၁၈ လၢပှၤဒူပှၤဃိၤအဂၤ သၢဂၤအကျါန့ၣ် နီၢ်စရူယၤအဖိခွါ+ စီၤယိၤအာ် အဒီပုၢ်ဝဲၢ် စီၤအဘံၡဲၤန့ၣ်+ ကဲဝဲအခိၣ်လီၤ. ဘၣ်တဘျီ အဝဲသူဝဲအဘီ ဒ်သိးကမၤသံ ပှၤပိာ်ခွါအဂၤ ၃၀၀ လီၤ. ဒီးအမံၤဟူသၣ်ဖျါ ထဲသိးဒီး ပှၤဒူပှၤဃိၤ အဆိကတၢၢ်သၢဂၤန့ၣ်လီၤ.+
၁၉ လၢပိာ်ခွါသၢဂၤအံၤအကျါန့ၣ် အမံၤဟူသၣ်ဖျါ ဒိၣ်ကတၢၢ် ဒီးအဝဲကဲ အဝဲသ့ၣ်အခိၣ် ဘၣ်ဆၣ် အလီၢ်အလၤ တဒိၣ်ထဲသိးဒီး ပှၤဒူပှၤဃိၤ အဆိကတၢၢ်သၢဂၤန့ၣ်ဘၣ်.
၂၀ စီၤယဟိၤယဒါ အဖိခွါစီၤဘနါယၤန့ၣ်+ မ့ၢ်ပှၤလၢအသးဒူ ဒီးမၤတ့ၢ်တၢ်ဒိၣ်ဒိၣ်မုၢ်မုၢ်အါမး လၢကၤဘစ့လးလီၤ.+ အဝဲမၤသံ ပှၤမိၤအးဖိ စီၤအရံၤအ့လးအဖိခွါခံဂၤ ဒီးဖဲမူခိၣ်ဖီလီၤအနံၤန့ၣ် အဝဲလဲၤလီၤလၢ တၢ်ပူၤဒီး မၤသံခ့ယုၢ်တဒုလီၤ.+
၂၁ အဝဲမၤသံစ့ၢ်ကီး ပှၤအဲၤကူပတူးဖိလၢ အနီၢ်ဖးဒိၣ်ဖးထီတဂၤလီၤ. ပှၤအဲၤကူပတူးဖိတဂၤန့ၣ် အိၣ်ဒီးအဘီလၢအစုပူၤ ဘၣ်ဆၣ် အဝဲလဲၤသဂၢၢ်အီၤဒီး အနီၣ်ထိးဘိဒီး ပျ့ၢ်န့ၢ်ဘီ လၢပှၤအဲၤကူပတူးဖိအစုပူၤ ဒီးမၤသံကွံာ်အီၤလၢ အနီၢ်ကစၢ်အဘီလီၤ.
၂၂ စီၤယဟိၤယဒါ အဖိခွါစီၤဘနါယၤ မၤတၢ်သ့ၣ်တဖၣ်န့ၣ်ဒီး အမံၤဟူသၣ်ဖျါ ထဲသိးဒီးပှၤဒူပှၤဃိၤ အဆိကတၢၢ်သၢဂၤလီၤ.
၂၃ အမံၤဟူသၣ်ဖျါ ဒိၣ်န့ၢ်ဒံး ပှၤအဂၤ ၃၀ ဘၣ်ဆၣ် အလီၢ်အလၤတဒိၣ်ထဲသိး ပှၤပိာ်ခွါလၢ အဆိကတၢၢ်သၢဂၤန့ၣ်ဘၣ်. ဘၣ်ဆၣ် စီၤဒၤဝံး ဃုထၢထီၣ်အီၤဒ် ပှၤတဂၤလၢ ကဒီသဒၢအသးသမူလီၤ.
၂၄ စီၤယိၤအာ် အဒီပုၢ်ဝဲၢ်ခွါ စီၤဧစၤအ့လးန့ၣ်+ ပၣ်ဃုာ်လၢ ပှၤအဂၤ ၃၀ အကျါလီၤ. အဝဲသ့ၣ်မ့ၢ်ဝဲ ပှၤဘ့ၤသလ့ဃ့ၣ်ဖိ စီၤဒိဒိၤအဖိခွါ စီၤအ့လဃၤနၣ်,+
၂၅ ပှၤဃရိးဖိ စီၤၡးမၤ, ပှၤဃရိးဖိ စီၤအလံကၤ,
၂၆ ပှၤပးလတံၤဖိ စီၤဃ့လ့း,+ ပှၤတကိၤဖိ စီၤဧံးက့ၣ် အဖိခွါစီၤဧံရၤ,+
၂၇ ပှၤဧၤနသိးဖိ+ စီၤအဘံၤဧ့စၢ်,+ ပှၤဃူၡသးဖိ စီၤမၤဘူနဲၤ,
၂၈ ပှၤအဃိဃးဖိ စီၤစးလမိၣ်, ပှၤနတိဖၤဖိ စီၤမၤဟရဲ,+
၂၉ ပှၤနတဖၤဖိ စီၤဘၤနါအဖိခွါ စီၤဃ့လ့ာ်, စီၤရံဘဲၤအဖိခွါ စီၤအံတဲၤလၢ အဟဲလၢ ပှၤဘံၣ်ယၤမံၣ်ဖိ အတၢ်လီၢ် ကံဘဧၤ,
၃၀ ပှၤပံးရၤသိၣ်ဖိ စီၤဘနါယၤ,+ စီၤဟံးဒဲ လၢအဟဲလၢ ကၤဧၣ် အတၢ်တြီၤတဖၣ်,+
၃၁ ပှၤဧါရဘၤဖိ စီၤအဘံဧၤလဘိၣ်, ပှၤဘၤဃူရံၣ်ဖိ စီၤဧၤစမၤဝ့း,
၃၂ ပှၤၡၤလဘိၣ်ဖိ စီၤအ့လံယဘၤ, စီၤယၤၡ့ၢ်အဖိခွါတဖၣ်, စီၤယိနၤသၣ်,
၃၃ ပှၤဟရၢ်ဖိ စီၤၡးမၤ, ပှၤဟရၢ်ဖိ စီၤၡၤရၢ်အဖိခွါ စီၤအဃံအၣ်,
၃၄ ပှၤမၤကးဖိတဂၤ အဖိခွါ စီၤအဃၤစဘဲ အဖိခွါ စီၤအလံၤဖ့လ့း, ပှၤကံလိၤဖိ စီၤအဃံသဖ့ၤလး+ အဖိခွါ စီၤအလံဧၣ်,
၃၅ ပှၤကၢ်မ့ၤလးဖိ စီၤဃ့စရိၤ, ပှၤဧ့ရ့းဖိ စီၤပရဲ,
၃၆ စီၤနၤသၣ်အဖိခွါ စီၤယံးက့လး လၢအဟဲလၢ စိဘၤအဘီမုၢ်, ပှၤကးဖိ စီၤဘၤနံ,
၃၇ ပှၤဧၣ်မိၣ်ဖိ စီၤစ့လ့း, ပှၤဘအ့ရိးဖိ စီၤနၤဃရဲ လၢအမ့ၢ် ပှၤလၢအစိာ်န့ၢ် နီၢ်စရူယၤအဖိခွါ စီၤယိၤအာ် အတၢ်စုကဝဲၤ,
၃၈ ပှၤယံသၢ်ဖိ စီၤဧံရၤ, ပှၤယံသၢ်ဖိ+ စီၤကၢ်ရ့း,
၃၉ ဒီးပှၤဃ့ၤသးဖိ စီၤအူၤရံယၤလီၤ.+ အဃိ ခဲလၢာ်ခဲဆ့အိၣ်ဝဲ ၃၇ ဂၤလီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဟံၣ်.”
