၂ ၡမူၤအ့လး ၈:၁-၁၈
၈ လၢခံ စီၤဒၤဝံး မၤနၢၤဝဲ ပှၤဖလ့ၡသးဖိ+ ဒီးစီၤဒၤဝံး ဟံးန့ၢ်ကွံာ်ဝဲ+ တၢ်လီၢ် မ့သ့းအးမၤ လၢပှၤဖလ့ၡသးဖိ အစုပူၤလီၤ.
၂ ဒီးအဝဲမၤနၢၤ ပှၤမိၤအးဖိတဖၣ်+ ဒီးအဝဲဟ့ၣ်လီၤ တၢ်ကလုၢ်လၢ အဝဲသ့ၣ် ကဘၣ်မံနီၤလၢ ဟီၣ်ခိၣ်လိၤလီၤ. ဒီးအထိၣ် အဝဲသ့ၣ်လၢ ပျံၤတဘိ ဒ်သိးကပာ်မူ အဝဲသ့ၣ် သၢပူတပူ ဒီးကမၤသံအဝဲသ့ၣ် ခံပူအဂီၢ်လီၤ.+ ဒီးပှၤမိၤအးဖိတဖၣ် ကဲထီၣ် စီၤဒၤဝံး အခ့အပှၤတဖၣ် ဒီးဘၣ်ဟ့ၣ် တၢ်ခိတၢ်သွဲလီၤ.*+
၃ ဒီးစီၤရဃိာ် အဖိခွါ စီၤဟးဒးဧ့စ့ၢ် မ့ၢ်ဝဲ စိဘၤ ဘီမုၢ်အစီၤပၤလီၤ.+ ဖဲအဝဲလဲၤလၢကျဲ ဒ်သိးကနုာ်လီၤပၢကဒါက့ၤ တၢ်လီၢ်တဖၣ်လၢ ထံကျိ ဖရၤသးအခါ+ စီၤဒၤဝံး မၤနၢၤအီၤလီၤ.
၄ ဒီးစီၤဒၤဝံး ဖီၣ်န့ၢ် စီၤဟးဒးဧ့စ့ၢ် အပှၤဒိးကသ့ၣ် သုးဖိအဂၤ ၁,၇၀၀ ဒီးအသုးဖိအဂၤ ၂၀,၀၀၀ လီၤ. ဒီးစီၤဒၤဝံး ကျီတဲာ်ကွံာ်ဝဲ ကသ့ၣ်တဖၣ် အခီၣ်ထူၣ် ဒီးပာ်တ့ၢ်ဝဲ ထဲအဒု ၁၀၀ လီၤ.+
၅ ဖဲပှၤစူၤရံဖိလၢ ဝ့ၢ်ဒၤမ့ၤစ့း+ ဟဲမၤစၢၤဝဲ စိဘၤ ဘီမုၢ်အစီၤပၤ စီၤဟးဒးဧ့စ့ၢ်အခါ စီၤဒၤဝံး မၤသံကွံာ် ပှၤစူၤရံဖိ အဂၤ ၂၂,၀၀၀ လီၤ.+
၆ ဒီးစီၤဒၤဝံး ဆီလီၤသုးခိးတၢ်လီၢ်တဖၣ်လၢ ဝ့ၢ်ဒၤမ့ၤစ့း လၢကီၢ်စူၤရံအပူၤလီၤ. ဒီးပှၤစူၤရံဖိတဖၣ် ကဲထီၣ်စီၤဒၤဝံး အခ့အပှၤ ဒီးဘၣ်ဟ့ၣ်ဝဲ တၢ်ခိတၢ်သွဲလီၤ. ဖဲစီၤဒၤဝံး လဲၤတပူၤဂ့ၤ တပူၤဂ့ၤန့ၣ် ယဟိဝၤယွၤ ဟ့ၣ်အီၤတၢ်မၤနၢၤလီၤ.+
၇ ဒီးစီၤဒၤဝံး ဟံးန့ၢ်ကတီၤထူတဖၣ်လၢ စီၤဟးဒးဧ့စ့ၢ် အခ့အပှၤတဖၣ် အအိၣ်ဒီး ဟဲက့ၤစိာ်ဝဲလၢ ဝ့ၢ်ယရူၤၡလ့ၣ်လီၤ.+
၈ စီၤပၤဒၤဝံး ဟံးန့ၢ်ဝဲ တိၢ်ဘီ အါအါဂီၢ်ဂီၢ်လၢ စီၤဟးဒးဧ့စ့ၢ် အဝ့ၢ်ဘ့ၤတၤ ဒီးအဝ့ၢ်ဘ့ၤရိသးန့ၣ်လီၤ.
၉ ဝ့ၢ်ဃမါသး+ အစီၤပၤတိဧံၤ နၢ်ဟူဘၣ်ဝဲလၢ စီၤဒၤဝံး မၤနၢၤဝဲ စီၤဟးဒးဧ့စ့ၢ် အသုးမုၢ်ဒီတဖုလီၤ.+
၁၀ အဃိ စီၤတိဧံၤ ဆှၢလီၤအဖိခွါ စီၤယိၤရၣ် လၢစီၤဒၤဝံး အအိၣ် ဒ်သိးကဆၢဂ့ၤ ဆၢဝါအီၤ ဒီးပတြၢၤအီၤ ခီဖျိလၢ အမၤနၢၤ စီၤဟးဒးဧ့စ့ၢ် အဃိလီၤ. (လၢညါန့ၣ် စီၤဟးဒးဧ့စ့ၢ် ဒုးတၢ်ဒီး စီၤတိဧံၤ တလီၢ်လီၢ်လီၤ.) ဒီးအဝဲလဲၤစိာ်ဝဲ တၢ်ဖိတၢ်လံၤတဖၣ်လၢ အဘၣ်တၢ်တ့အီၤလၢ ထူ, စ့ညၣ် ဒီးတိၢ်ဘီလီၤ.
၁၁ စီၤပၤဒၤဝံး ပာ်စီဆှံဝဲတၢ်သ့ၣ်တဖၣ်အံၤ လၢယဟိဝၤယွၤအအိၣ် ဒ်အပာ်စီဆှံဝဲ စ့ညၣ် ဒီးထူလၢ အမၤန့ၢ်ဝဲလၢ ပှၤကလုာ်ခဲလၢာ်လၢ အဒုးဝဲနၢၤတဖၣ်အအိၣ် အသိးန့ၣ်လီၤ.+
၁၂ ပှၤကလုာ်တဖၣ်န့ၣ် မ့ၢ်ဝဲ ပှၤစူၤရံဖိ, ပှၤမိၤအးဖိ,+ ပှၤဧၣ်မိၣ်ဖိ, ပှၤဖလ့ၡသးဖိ,+ ပှၤဧမၤလ့းဖိ+ ဒီးစီၤရဃိာ် အဖိခွါ စီၤဟးဒးဧ့စ့ၢ်+ လၢအမ့ၢ် စိဘၤ ဘီမုၢ်အစီၤပၤလီၤ.
၁၃ တကးဒံးဘၣ် စီၤဒၤဝံး မၤဒိၣ်ထီၣ်စ့ၢ်ကီးအမံၤ ခီဖျိလၢ အမၤသံ ပှၤအဒိၣ်ဖိအဂၤ ၁၈,၀၀၀ လၢအံသၣ်အတၢ်တြီၤ အပူၤလီၤ.+
၁၄ အဝဲဆီလီၤ အသုးခိးတၢ်လီၢ်တဖၣ်လၢ ကီၢ်အဒိၣ်ပူၤလီၤ. ဒီးလၢကီၢ်အဒိၣ်အပူၤန့ၣ် အဝဲဆီလီၤဝဲ အသုးခိးတၢ်လီၢ်တဖၣ် ဝးဝးလီၤ. ပှၤအဒိၣ်ဖိခဲလၢာ် ကဲထီၣ်ဝဲ စီၤဒၤဝံး အခ့အပှၤလီၤ.+ ဖဲစီၤဒၤဝံး လဲၤတပူၤဂ့ၤ တပူၤဂ့ၤန့ၣ် ယဟိဝၤယွၤ ဟ့ၣ်အီၤတၢ်မၤနၢၤလီၤ.+
၁၅ စီၤဒၤဝံး ဆဲးပၢဝဲ အံၣ်စရ့လးခဲလၢာ်+ ဒီးစီၤဒၤဝံး စံၣ်ညီၣ်န့ၢ်တၢ်လၢ အပှၤဂီၢ်မုၢ်ခဲလၢာ်အဂီၢ်+ တီတီလိၤလိၤလီၤ.+
၁၆ နီၢ်စရူယၤ အဖိခွါ စီၤယိၤအာ်+ မ့ၢ်ဝဲ သုးခိၣ်ကျၢၢ် ဒီးစီၤအဃံလူး အဖိခွါ စီၤယဟိၤၡၤဖး+ မ့ၢ်ဝဲ ပှၤကွဲးနီၣ်တၢ်ဖိလီၤ.
၁၇ ဒီးစီၤအဃံးတူာ် အဖိခွါ စီၤစၤဒိး+ ဒီးစီၤအ့ဘယၤသၢ် အဖိခွါ စီၤအဃံၤမ့လ့းန့ၣ် မ့ၢ်ဝဲ ပှၤလုၢ်တၢ်ဒိၣ်တဖၣ် ဒီးစီၤစရါယၤ မ့ၢ်ဝဲ နဲၣ်ရွဲၣ်လီၤ.
၁၈ ဒီးစီၤယဟိၤယဒါ အဖိခွါ စီၤဘနါယၤန့ၣ်+ မ့ၢ်ဝဲ ပှၤကရံသးဖိ ဒီးပှၤပလ့သးဖိ+ အခိၣ် ဒီးစီၤဒၤဝံး အဖိခွါတဖၣ် ကဲထီၣ်ဝဲ ပှၤခိၣ်ပှၤနၢ် လၢအပတီၢ်ထီတဖၣ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “တၢ်ဟ့ၣ်တဖၣ်.”
