တၢ်သ့ၣ်ညါထီၣ် ကစၢ်လၢအဒုးအိၣ်ထီၣ်တၢ်ကိးမံၤဒဲး
စီၤသးတီ အသးခုလၢသ့ၣ်ညါဘၣ်ဝဲ တၢ်ခဲလၢာ်လၢယဟိဝၤစံးပာ်ဝဲန့ၣ်လီၤ. ဘၣ်ဆၣ် အဝဲဆိကမိၣ်ဝဲလၢ ပှၤတဂၤဂၤန့ၣ်အိၣ်ဒီးတၢ်စိကမီၤလၢ ကမၤလၢပှဲၤတၢ်စံးပာ်တဖၣ်အံၤကသ့ဒ်လဲၣ်န့ၣ်လီၤ. စီၤထူထူစံးဝဲလၢ ကနၢ်ပၢၢ်ယဟိဝၤမၤလၢပှဲၤအတၢ်စံးပာ်သ့ဒ်လဲၣ်အဂ့ၢ်အဂီၢ်, အဝဲသ့ၣ်ကဘၣ်ဆိကမိၣ်ဝဲ ဘၣ်ဃးဒီးတၢ်သ့ၣ်ညါအဂ့ၢ်ခီၣ်ထံးလၢ ပှၤကိးဂၤဒဲးသ့ၣ်ညါတ့ၢ်လံဝဲလီၤ. တၢ်န့ၣ်မ့ၢ် တၢ်အဂ့ၢ်အကျိၤမ့ၢ်တအိၣ်န့ၣ် တၢ်တကဲထီၣ်နီတမံၤဘၣ်လီၤ.
စီၤထူထူစံးဝဲလၢ တၢ်သ့ၣ်ညါအဂ့ၢ်ခီၣ်ထံးအံၤစ့ၢ်ကီး လံာ်စီဆှံတဲနၢ်ပၢၢ်ဝဲလီၤ. ဒီးအဝဲဒုးနဲၣ်ဝဲစီၤသးတီလၢ လံာ်စီဆှံအဆၢတဖၣ်အံၤလီၤ.
-
“ကယဲၢ်ဟံၣ်ခဲလၢာ်န့ၣ်, ပှၤဒုးကဲထီၣ်ဝဲတဂၤဂၤလီၤ.”—ဧ့ၤဘြံၤ ၃:၄.
စီၤသးတီစံးဆၢက့ၤဝဲ “တၢ်အံၤလီၤဂာ်လၢနာ်န့ၢ်သ့လီၤ. လီၤတံၢ်လၢ, ပှၤဘှီတၢ်တဂၤမ့ၢ်တအိၣ်ဘၣ်ဒီး ဟံၣ်တဟဲကဲထီၣ်နီတဖျၢၣ်ဘၣ်လီၤ.”
စီၤထူထူတဲကဒီးဝဲ “ဆိကမိၣ်ကွၢ်ကဒီးလၢခံတမံၤတက့ၢ်. ယအဲၣ်ဒိးတဲအါထီၣ်ဒံးလၢ ပှၤဖီတၢ်တဂၤမ့ၢ်တအိၣ်န့ၣ် ကသူတခွးကဲထီၣ်တသ့နီတဘျီဘၣ်လီၤ.”
စီၤထူထူဒုးသ့ၣ်နီၣ်ထီၣ်ဝဲစီၤသးတီလၢ တၢ်အိၣ်လၢအဝဲသ့ၣ်အကပိာ်ကပၤကိးမံၤဒဲးန့ၣ် ဒိၣ်န့ၢ်ဒီးသဘံၣ်သဘုၣ်အါန့ၢ်ဒံးဟံၣ်တဖျၢၣ်လီၤ. အဝဲစံးဝဲ “ကွၢ်ဃီၤ ဖီဃံလၤဖိတဖၣ်, ကစၢၢ်ကလိလၢ အိၣ်ဖျါစိဃီၤဖးထီ, ပီၣ်လဲၣ်ဖးဒိၣ်ဖးယိာ်, ဒီးမူဟီၣ်ကယၢလၢအကတၢၢ်တအိၣ်တက့ၢ်. ဟံၣ်တဖျၢၣ်ကကဲထီၣ်အဂီၢ် ပှၤတ့အဂီၤဒီး ပှၤဘှီတၢ်တဂၤ လိၣ်ဝဲအသိး ကသူတခွးကကဲထီၣ်အဂီၢ် ပှၤဖီတၢ်တဂၤမ့ၢ်လိၣ်ဝဲန့ၣ် ဘၣ်ဃးဒီးတၢ်အိၣ်လၢမူဟီၣ်ကယၢအပူၤလၢအလီၤကမၢကမၣ်တဖၣ်အံၤတခီလဲၣ်. တၢ်သ့ၣ်တဖၣ်အံၤစ့ၢ်ကီး ပှၤတ့အီၤဒီးပှၤမၤအီၤကဘၣ်လိၣ်ဝဲတမ့ၢ်ဘၣ်ဧါ.”
စီၤသးတီတူၢ်လိာ်ဝဲလၢ စီၤထူထူတဲတၢ်တဖၣ်န့ၣ် နာ်န့ၢ်သ့လီၤ.
စီၤထူထူစံးဝဲ “နီၢ်နီၢ်လံာ်စီဆှံစံးဝဲလၢ ပှၤလၢအတ့တၢ်ဒီးမၤဒုးအိၣ်ထီၣ်တၢ်အဆိကတၢၢ်န့ၣ်အိၣ်ဝဲလီၤ. ကမ့ၢ်ပှၤလၢအမၤကဲထီၣ်တၢ်ကိးမံၤဒဲးသ့အဂီၢ် ပှၤအံၤန့ၣ်ကဘၣ်အိၣ်ဒီးအစိကမီၤလီၤ. လၢတၢ်န့ၣ်အဃိ လံာ်စီဆှံကိးဝဲကစၢ်လၢ ကစၢ်ယွၤလီၤ. တၢ်ကတိၤအံၤလၢ လံာ်စီဆှံကျိာ်အခီၣ်ထံးန့ၣ်အခီပညီမ့ၢ် ‘ပှၤစိကမီၤဒိၣ်တဂၤ’ မ့တမ့ၢ် ‘ပှၤဂံၢ်ဆူၣ်ဘါဆူၣ်တဂၤ’ လီၤ. ဆၢကတီၢ်ခဲအံၤ ကစၢ်လၢ ပှၤကညီတဖၣ်ကိးဝဲလၢ ‘ယွၤ’ န့ၣ်အိၣ်ဝဲအါမးဘၣ်ဆၣ် ယဟိဝၤမၤဝဲတၢ်ကိးမံၤဒဲးအဃိ မ့ၢ်ကိးအီၤလၢ သ့တၢ်လၢာ်ကစၢ်ယွၤန့ၣ် ကြၢးဝဲဘၣ်ဝဲလီၤ.”
တၢ်ကိးမံၤဒဲးလိၣ်ဝဲလၢ ပှၤကတ့ဒီးဒုးကဲထီၣ်အီၤတဂၤ
စီၤသးတီကမၢကမၣ်လၢ ထံၣ်ဘၣ်ဝဲ လံာ်စီဆှံပာ်ဖျါထီၣ်ဝဲလၢ ယဟိဝၤယွၤ မၤတၢ်အါမးလၢအလီၤကမၢကမၣ်တဖၣ်လီၤ. တၢ်လၢလာ်တဖၣ်အံၤန့ၣ် မ့ၢ်တၢ်အဒိစှၤဘီလၢစီၤထူထူဒုးနဲၣ်အီၤလီၤ.
-
“လၢထံးလၢသီန့ၣ် ယွၤတ့လီၤမူခိၣ်ဒီးဟီၣ်ခိၣ်လီၤ.”—၁ မိၤၡ့ ၁:၁.
-
“သ့ၣ်ညါလၢယွၤ [ယဟိဝၤ] မ့ၢ်ပကစၢ်တက့ၢ်. အဝဲဒၣ်န့ၣ်တ့ပှၤ, တမ့ၢ်ဘၣ်ပကစၢ်ဒၣ်ပဝဲဘၣ်.”—စံးထီၣ်ပတြၢၤ ၁၀၀:၃.
-
“မူခိၣ်လီၢ်ဖျါထီၣ်ယွၤအလၤကပီၤ, ဒီးတၢ်လၢအမၤဝဲလၢအစုန့ၣ် မူကပိာ်လိၤဒုးနဲၣ်ဝဲလီၤ.”—စံးထီၣ်ပတြၢၤ ၁၉:၁.
-
“ပှၤလၢအတ့အဒၢးထီၣ်ထီလၢမူခိၣ်, ဒီးပာ်လီၤအမူထံးဟီၣ်ထံးလၢဟီၣ်ခိၣ်ချၢ, ပှၤလၢအကိးန့ၢ်ပီၣ်လဲၣ်ထံန့ၣ်, ဒီးလူလီၤအီၤလၢဟီၣ်ခိၣ်ချၢန့ၣ်အမံၤမ့ၢ်ယွၤ [ယဟိဝၤ] လီၤ.”—ဧၤမိၣ် ၉:၆.
မ့ၢ်လီၤ, ယဟိဝၤယွၤမ့ၢ် ကစၢ်လၢအမၤတၢ်ကိးမံၤဒဲးလီၤ. ဘၣ်ဆၣ်, ကစၢ်မၤဝဲတၢ်အါန့ၢ်ဒံး မၤကဲထီၣ်တၢ်သ့ၣ်တဖၣ်န့ၣ်လီၤ. ကစၢ်ဟ့ၣ်ဝဲတၢ်ဘၣ်တ့ခဲလၢာ်အသးသမူလီၤ. ဘၣ်ဃးဒီးယဟိဝၤန့ၣ် လံာ်စီဆှံစံးဝဲဒ်အံၤလီၤ– “အဂ့ၢ်ဒ်အံၤ, တၢ်မူအထံထီၣ်ပၢၢ်န့ၣ်အိၣ်ဒီးနၤလီၤ.” (စံးထီၣ်ပတြၢၤ ၃၆:၉) လၢတၢ်န့ၣ်အဃိ အဝဲမ့ၢ်တၢ်ဘၣ်တ့ကစၢ်လၢ ဟ့ၣ်ပှၤသးသမူလီၤ. ယဟိဝၤမ့ၢ်ကစၢ်လၢအဒုးအိၣ်ထီၣ်သးသမူအဃိ အဝဲမ့ၢ်နီၢ်နီၢ်ပပၢ်လီၤ. လၢတၢ်န့ၣ်အဃိ လံာ်စီဆှံစံးဝဲဒ်အံၤလီၤ “ပဝဲဒၣ်ခဲလၢာ်အံၤပအိၣ်ဒီးပၢ်တဂၤဃီ, တမ့ၢ်ဘၣ်ဧါ. ကစၢ်တဂၤဃီတ့လီၤပှၤ, တမ့ၢ်ဘၣ်ဧါ.”—မၤလကံ ၂:၁၀.
ယဟိဝၤမ့ၢ် တၢ်မူအထံထီၣ်ပၢၢ်
စီၤသးတီနၢ်ပၢၢ်ထီၣ်ဝဲဒီး တဲဝဲဒ်အံၤလီၤ– “ဖဲပကွၢ်တၢ်လၢပဃၢၤဝးဝးဒီးဆိကမိၣ်ကွၢ်အီၤအခါ တၢ်ဘၣ်တ့ကစၢ်လၢအမ့ၢ် တၢ်ဂ့ၢ်အခီၣ်ထံးတမံၤ, ပှၤတ့တၢ်, ပှၤဟ့ၣ်သးသမူ အိၣ်ဝဲန့ၣ် ပထံၣ်သ့ၣ်ညါဘၣ်အီၤတကီဘၣ်လီၤ.”
လၢတၢ်သူၣ်ဟူးသးဂဲၤအပူၤ နီၢ်အဲၣ်ဖီတဲဝဲ “ယဟိဝၤမ့ၢ်အိၣ်ဒီး တၢ်စိကမီၤလၢတ့လီၤတၢ်သ့ခဲလၢာ်န့ၣ် ကစၢ်ကဘၣ်အိၣ်စ့ၢ်ကီးဒီးအစိကမီၤလၢ ကမၤလၢပှဲၤအတၢ်စံးပာ်လၢ အိၣ်လၢလံာ်စီဆှံပူၤန့ၣ်လီၤ.”
စီၤသးတီဒီး နီၢ်အဲၣ်ဖီအဂီၢ်, တၢ်ကိးမံၤဒဲးလၢအဝဲသ့ၣ်နၢ်ဟူဘၣ်ဝဲလၢ တၢ်န့ၣ်အနံၤန့ၣ် နာ်န့ၢ်သ့လၢလၢပှဲၤပှဲၤလီၤ. ဘၣ်ဆၣ်အဝဲသ့ၣ်အဲၣ်ဒိးသ့ၣ်ညါဝဲလၢ ပှၤတ့တၢ်လၢအိၣ်ဒီးအစိကမီၤန့ၣ် မ့ၢ်ပှၤဒ်လဲၣ်န့ၣ်လီၤ.
