စီၤ​ထူ​ထူ​စံး​ဝဲ စီၤ​သး​တီ​ဒီး​နီၢ်​အဲၣ်​ဖီ​လၢ အဝဲ​ဒီး​နီၢ်သး​ဝါ​အ​သးခု​လၢ က​မၤစၢၤ​အဝဲသ့ၣ်​လၢ က​မၤလိ​အါထီၣ်​တၢ်ဂ့ၢ်​လၢ​အ​လီၤ​ဘၣ်သူၣ်​ဘၣ်သး​လၢ အဝဲသ့ၣ်​ကတိၤ​သကိး​တ့ၢ်​ဝဲ​တဖၣ်​လီၤ. ဒီး​ဒုးနဲၣ်​အဝဲသ့ၣ်​လၢ လံာ်​တဘ့ၣ်​လၢ​အမ့ၢ် လံာ်စီဆှံ က​သိၣ်လိ​ပှၤ တၢ်ဂ့ၢ်​မနုၤ​လဲၣ် လီၤ.

ဖဲ​စီၤ​သး​တီ​ဒီး​နီၢ်​အဲၣ်​ဖီ သမံသမိး​ကွၢ်ဝဲ​လံာ်​အံၤ​အခါ, အဝဲသ့ၣ်​ထံၣ်ဘၣ်​ဝဲ တၢ်ဂ့ၢ်​အါမး​လၢ အဝဲသ့ၣ်​အဲၣ်ဒိး​သ့ၣ်ညါ​ဝဲ​တဖၣ်​န့ၣ်​ အိၣ်ဖျါ​ဖဲ​တၢ်ဂ့ၢ်​ခိၣ်တီ​အ​ပူၤ​လီၤ. အခါ​ဖဲ​န့ၣ်, စီၤ​ထူ​ထူ​တဲ​နၢ်ပၢၢ်​ဝဲ​လၢ လံာ်​အံၤ​အိၣ်ဒီး တၢ်ဂ့ၢ်မိၢ်ပှၢ်​လၢ​လီၤသး​စဲ​ဒိၣ်မး​တဖၣ်​လီၤ. အဝဲ​စံး​ဝဲ–

“တၢ်​မၤလိ​တခါ​စုာ်စုာ်​အ​ကတၢၢ်​န့ၣ်​ အိၣ်ဒီး​တၢ်​ကွၢ်ကဒါ​က့ၤ တၢ်ဂ့ၢ်မိၢ်ပှၢ်​လၢ တၢ်​မၤလိ​အ​ပူၤ ဒီး​လံာ်စီဆှံ​အဆၢ​လၢ အ​ဘၣ်ထွဲ​လိာ်သး​တဖၣ်​လီၤ. လံာ်​ဒီတဘ့ၣ်​အ​ပူၤ အိၣ်ဒီး​တၢ်ဂီၤ​လၢ ပ​ဟံးန့ၢ်​တၢ်​မၤလိ​သ့ ဒီး​ဘၣ်​တၢ်ကွဲး​အီၤ​ဒ်သိး ပှၤ​ဖးဘၣ်​အီၤ​ကညီ​ဒီး ပှၤ​က​နၢ်ပၢၢ်​ဘၣ်​အီၤ​ညီ​ညီ​အဂီၢ်​လီၤ.”

စီၤ​သး​တီ​ဒီး နီၢ်​အဲၣ်​ဖီ​အ​သးဆူၣ်​လၢ က​စးထီၣ်​ဖး​ဝဲ​လံာ်​အံၤ​လီၤ. အဝဲသ့ၣ်​ကွၢ်လၢ်​ဝဲ​တၢ်​ဆၢကတီၢ်​လၢ က​မၤလိ​အါထီၣ်​တၢ်​ဒ်သိး​ဒီး က​လီၤတံၢ်​လၢ စီၤ​ထူ​ထူ​တဲ​အီၤ​တၢ်ဂ့ၢ်​တဖၣ်​န့ၣ်​ တမ့ၢ်​တၢ်မံ​မီၣ်​ဘၣ်​န့ၣ်​လီၤ. စီၤ​သး​တီ​ဒီး​နီၢ်​အဲၣ်​ဖီ စံးဘျုး​ဝဲ စီၤ​ထူ​ထူ​ဒီး​နီၢ်သး​ဝါ​ဒိၣ်မး​လၢ အ​တၢ်​သးအိၣ်​မၤစၢၤ​အဝဲသ့ၣ်​ဒ်သိး က​ထံၣ်န့ၢ်​တၢ်ဃူ​တၢ်ဖိး​ဒီး တၢ်​သူၣ်ခု​သးခု​အကျဲ​အဂီၢ်​လီၤ.