တယံာ်ဘၣ်ဒီး တၢ်ဃူတၢ်ဖိးဒီး တၢ်သူၣ်ခုသးခုကအိၣ်ထီၣ်လီၤ
စီၤသးတီဒီးနီၢ်အဲၣ်ဖီ သူၣ်ပိၢ်သးဝးလၢ သ့ၣ်ညါဘၣ်ဝဲလၢ မုၢ်တနံၤဟီၣ်ခိၣ်အံၤ ကပှဲၤဒီးပှၤကညီလၢအဂ့ၤ ဒီးအတီအလိၤလၢ အရ့လိာ်အသးတဂၤဒီးတဂၤလၢ တၢ်အဲၣ်န့ၣ်လီၤ. အဝဲသ့ၣ်ဆိကမိၣ်ဘၣ်ဝဲလၢ တၢ်အိၣ်မူလီၤဆီလီၤလးလၢ ဟီၣ်ခိၣ်လၢ တၢ်သၣ်ဝံၤလီၤဒိတအိၣ်, တၢ်ဆူးတၢ်ဆါတအိၣ်, တၢ်သံတအိၣ်, ဟီၣ်ခိၣ်လၢအပှဲၤဒီး တၢ်ဃူတၢ်ဖိးဒီးတၢ်သူၣ်ခုသးခုန့ၣ်ကမုာ်ဆံးဒိၣ်လဲၣ်န့ၣ်လီၤ. အဝဲသ့ၣ်အဲၣ်ဒိးဝဲလၢ တၢ်သ့ၣ်တဖၣ်အံၤကဲထီၣ်အသးတဘျီဃီလီၤ.
စီၤသးတီအဲၣ်ဒိးသ့ၣ်ညါဝဲ အဃိသံကွၢ်ဝဲလၢ “တၢ်သ့ၣ်တဖၣ်အံၤ ကဟဲကဲထီၣ်ဖဲလဲၣ်အခါလဲၣ်.”
စီၤထူထူစံးဘၣ်စီၤသးတီလၢ “နတၢ်သံကွၢ်အံၤလီၤသးစဲဒိၣ်မးလီၤ. မ့မ့ၢ်ဒ်န့ၣ်ဒီးယကသံကွၢ်နၤတၢ်တမံၤ, မ့ၢ်နနၢ်ဟူဘၣ်ပှၤတဂၤလၢ အမံၤမ့ၢ်ယ့ၣ်ၡူးအဂ့ၢ်န့ၣ်ဧါ”
စီၤသးတီစံးဆၢဝဲလၢ “မ့ၢ်ယနၢ်ဟူဘၣ်ကစီဒီလီၤ. ယနၢ်ဟူဘၣ်လၢ အဝဲစံးတ့ၢ်ဝဲတၢ်ကတိၤလၢ အိၣ်ဒီးတၢ်ကူၣ်သ့န့ၣ်လီၤ. ဘၣ်ဆၣ်, တၢ်အံၤဘၣ်ဃးလိာ်အသးဒီး ယတၢ်သံကွၢ်အံၤဒ်လဲၣ်.”
စီၤထူထူတဲနၢ်ပၢၢ်အီၤလၢ “ပူၤကွံာ်အနံၣ် ၂,၀၀၀ ဃၣ်ဃၣ်, ဖဲယ့ၣ်ၡူး အိၣ်မူလၢဟီၣ်ခိၣ်အခါ အပျဲၢ်အဘီၣ်တဖၣ်သံကွၢ်အီၤတၢ်သံကွၢ် ဒ်နသံကွၢ်အသိးန့ၣ်လီၤ. လၢအတၢ်စံးဆၢအပူၤ ယ့ၣ်ၡူးဟ့ၣ်အဝဲသ့ၣ် ‘တၢ်ပနီၣ်’ လၢအပာ်ဃုာ်ဒီးတၢ်မၤအသးအါမးန့ၣ်လီၤ. တၢ်မၤအသးလၢ တၢ်ပနီၣ်အပူၤခဲလၢာ် မ့ၢ်ကဲထီၣ်ဖှိၣ်အသးန့ၣ်ဒီး တၢ်လဲလိာ် လၢကစၢ်စံးပာ်တ့ၢ်ဝဲန့ၣ် ကကဲထီၣ်အဆၢကတီၢ်ဘူးထီၣ်လံလီၤ.”—မးသဲ ၂၄:၃.
“တၢ်ပနီၣ်”တဖၣ်အံၤပာ်ဖျါဝဲလၢ တၢ်လဲလိာ်ကမၤအသးဘူးထီၣ်လံလီၤ. တၢ်သ့ၣ်တဖၣ်အံၤ နထံၣ်ကစီဒီဧါ.
စီၤသးတီစံးဝဲ “တၢ်ပနီၣ်, မ့ၢ်ဧါ. တၢ်အံၤလီၤသးစဲကစီဒီလီၤ. တဲဘၣ်ပှၤတၢ်ဂ့ၢ်အံၤဒံးမီၣ်.”
စီၤထူထူစံးဘၣ်စီၤသးတီလၢ “တၢ်မၤအသးအကလုာ်ကလုာ်လၢ တၢ်ပနီၣ်အံၤအပူၤန့ၣ် ဘၣ်တၢ်ကွဲးပာ်အီၤလၢ လံာ်စီဆှံပူၤလီၤ.” အိးထီၣ်ဝဲလံာ်စီဆှံဒီး စံးဝဲ “တၢ်အံၤမ့ၢ်ဒၣ်တၢ်ပနီၣ်အကျါတနီၤလီၤ.”
-
“ပှၤကညီတကလုာ်ကထီဒါ ပှၤကညီတကလုာ်, ဒီးတဘီတမုၢ်ကထီဒါတဘီတမုၢ်လီၤ.”—မးသဲ ၂၄:၇.
-
“တၢ်သၣ်ဝံၤလီၤဒိတဖၣ်ကအိၣ်ထီၣ်.”—မးသဲ ၂၄:၇, ခ့ခါစှီၤကျိာ်.
-
“တၢ်အၢတၢ်သီကအါထီၣ်ဂီၢ်ထီၣ်.”—မးသဲ ၂၄:၁၂, ခ့ခါစှီၤကျိာ်.
-
“ဟီၣ်ခိၣ်ကဟူးဝးဆှဲးဆှိးနးနးကလဲာ်.”—လူၤကၣ် ၂၁:၁၁.
-
“တၢ်ဆါသံသတြိာ်ကအိၣ်ထီၣ်ဝဲ.”—လူၤကၣ် ၂၁:၁၁.
စီၤသးတီဒီးနီၢ်အဲၣ်ဖီတဲဝဲလၢ ဆၢကတီၢ်ခဲအံၤ လီၤဂာ်လၢတၢ်သ့ၣ်တဖၣ်အံၤ မၤအသးခဲလၢာ်လံလီၤ. နီၢ်နီၢ်, အဝဲသ့ၣ်အသးဘၣ်တံာ်တာ်လၢ တၢ်သ့ၣ်တဖၣ်အံၤအဃိဒီး ဘၣ်ယိၣ်တၢ်လၢခါဆူညါန့ၣ်လီၤ.
စီၤထူထူစံးဝဲဒ်အံၤလီၤ, “တၢ်ပနီၣ်တဖၣ် အတၢ်ဟဲလၢပှဲၤထီၣ်အံၤ အခီပညီမ့ၢ် ယဟိဝၤယွၤအတၢ်ပၢအံၤ တယံာ်ဘၣ်ဒီး ကဟဲအိၣ်ထီၣ်လၢ ဟီၣ်ခိၣ်ချၢလီၤ. လံာ်စီဆှံကိးဝဲ တၢ်ပၢတၢ်ပြးအသီအံၤလၢ ယွၤအဘီအမုၢ်န့ၣ်လီၤ. ဒီးစီၤထူထူ ဖးန့ၢ်အီၤ လံာ်စီဆှံအဆၢဖိအံၤလၢ အပာ်ဖျါဝဲလၢ တယံာ်လၢၤဘၣ် ယွၤအဘီအမုၢ် ကမၤတၢ်အဂ့ၢ်န့ၣ်လီၤ.
-
“လၢစီၤပၤတဖၣ်အမုၢ်နံၤအပူၤန့ၣ် ကစၢ်ယွၤလၢမူခိၣ်ကသူၣ်ထီၣ်ဘီမုၢ်တဘ့ၣ်လၢအကတၢၢ်တအိၣ်ဘၣ်လီၤ. ဘီမုၢ်န့ၣ်ဘၣ်တၢ်မၤနၢၤကွံာ်အီၤတန့ၢ်ဘၣ်. မ့မ့ၢ်ကမၤဟးဂီၤကွံာ်ဘီမုၢ်တဖၣ်လၢာ်လၢာ်ဆ့ဆ့ဒီး ကအိၣ်ဂၢၢ်ကျၢၤဝဲလီၤထူလီၤယိာ်လီၤ.”—ဒၤနံးယ့လး ၂:၄၄.
စီၤထူထူစံးကဒီးဝဲ “ဖဲယွၤအဘီအမုၢ် ပၢဟီၣ်ခိၣ်အခါ တၢ်အၢတၢ်သီ, တၢ်တတီတလိၤ,ဒီးတၢ်အီၣ်ကဘျံးအီၣ်ကဘျၣ်ကဟါမၢ်ကွံာ်ဝဲ လီၤထူလီၤယိာ်လီၤ. ကဂ့ၤဆံးဒိၣ်လဲၣ်န့ၣ် ဆိကမိၣ်ကွၢ်တက့ၢ်.”
တၢ်ခဲလၢာ်အံၤ ထုးန့ၢ်စီၤသးတီဒီးနီၢ်အဲၣ်ဖီအသးဒိၣ်မးဒီး အဝဲသ့ၣ်အဲၣ်ဒိးအိၣ်မူဝဲလၢ ဟီၣ်ခိၣ်သီလၢပှဲၤဒီးတၢ်မုာ်တၢ်ခုၣ်န့ၣ်လီၤ.
စီၤသးတီသံကွၢ်ဝဲလၢ “ခါဆူညါတၢ်ကမၤအသး လၢအဂ့ၤဒိၣ်မးအံၤပကဒိးန့ၢ်ဘၣ်အဂီၢ် ယၤဒီးနီၢ်အဲၣ်ဖီ ပကဘၣ်မၤတၢ်မနုၤလဲၣ်.”
စီၤထူထူစံးဆၢဝဲ “စီၤသးတီဒီးနီၢ်အဲၣ်ဖီဧၢ သုသ့ၣ်ညါဂ့ၤဂ့ၤလီၤ. ပမ့ၢ်အဲၣ်ဒိးန့ၢ်ဘၣ် တၢ်လုၢ်ဒိၣ်ပှ့ၤဒိၣ်တမံၤမံၤန့ၣ် ပဘၣ်ဟ့ၣ်စ့ၢ်ကီးတၢ်တမံၤမံၤလၢ ပအိၣ်န့ၣ်လီၤ. ဆိကမိၣ်ကွၢ် အၤဒၣ်ဒီးအံၣ်အုဒီးတၢ်လၢအဝဲသ့ၣ်ဘၣ်ပျဲလီၤမၢ်ကွံာ်ဝဲန့ၣ်တက့ၢ်. ပမၤလိဘၣ်တၢ်မနုၤလၢအဝဲသ့ၣ်အတၢ်မၤအံၤလဲၣ်.”
စီၤသးတီစံးဝဲ “အဝဲသ့ၣ် တအိၣ်မူလီၤပလိာ်ဒီး ယွၤအတၢ်မၤလိာ်အဃိ အဝဲသ့ၣ်ဘၣ်ပျဲလီၤမၢ်ကွံာ်ဝဲ သးသမူအလၢအပှဲၤလၢ ဟီၣ်ခိၣ်ပၤရဒံစူးအပူၤလီၤ.”
စီၤထူထူတဲနၢ်ပၢၢ်အီၤလၢ “ဒ်န့ၣ်အသိး မုၢ်မဆါတနံၤအံၤ ယဟိဝၤယွၤဃ့တၢ်လၢပအိၣ် အိၣ်စ့ၢ်ကီးန့ၣ်လီၤ. ပမ့ၢ်အဲၣ်ဒိးအိၣ်မူ လၢဟီၣ်ခိၣ်ပၤရဒံစူးလၢ တယံာ်ဘၣ်ဒီးကဟဲကဲထီၣ်အံၤန့ၣ် လိၣ်လၢပကဘၣ်မၤလိကစၢ်အဂ့ၢ်ဒီးအတၢ်ဃ့တဖၣ်ဒီး ကျဲးစၢးအိၣ်မူလီၤပလိာ်ဒ်တၢ်သ့ၣ်တဖၣ်န့ၣ်အသိးလီၤ.”
စီၤသးတီ အၢၣ်လီၤတူၢ်လိာ်ဝဲလၢ တၢ်သ့ၣ်တဖၣ်အံၤ မ့ၢ်တၢ်လၢအကြၢးဝဲဘၣ်ဝဲလီၤ. ဘၣ်ဆၣ်, အဝဲဆိကမိၣ်ဝဲလၢ အဝဲဒီးနီၢ်အဲၣ်ဖီမၤဝဲကဘၣ်ထီၣ်ဘးန့ၣ်ဧါလီၤ.
ယဟိဝၤကွဲမုာ်ပှၤလၢ ပကလဲၤတၢ်လၢတၢ်ဃူတၢ်ဖိး ဒီးတၢ်သူၣ်ခုသးခုအကျဲဖီခိၣ်လီၤ
စီၤထူထူဒုးနာ်အီၤနီၢ်နီၢ်လၢ “တၢ်စူၢ်ယဟိဝၤအကလုၢ်န့ၣ် တမ့ၢ်တၢ်ဝံတၢ်ယိးဘၣ်. မ့ၢ်လၢ, ဒ်ပၢ်လၢအိၣ်ဒီးတၢ်အဲၣ်တဂၤအသိး, ကစၢ်ဃ့ပှၤလၢ ပကမၤတၢ်ထဲဒၣ်တၢ်လၢ အဘျုးကအိၣ်ဒိၣ်ကတၢၢ်လၢ ပဂီၢ်အဃိန့ၣ်လီၤ. ထဲဒၣ်ပာ်ဖျါန့ၢ်ပှၤကျဲလၢ ပကလဲၤဆူဟီၣ်ခိၣ်သီလၢ ပှဲၤဒီးတၢ်မုာ်တၢ်ခုၣ်တကးဘၣ်, ကစၢ်ကွဲမုာ်စ့ၢ်ကီးပှၤလၢ ပကလဲၤတၢ်လၢ အတၢ်နဲၣ်လိအကျဲပူၤလီၤ. ပာ်သူၣ်ပာ်သးဒီးကွၢ် တၢ်ကွဲမုာ်လၢအိၣ်ဒီးတၢ်အဲၣ်အံၤလၢ ပထံၣ်ဘၣ်ဖဲ လံာ်စီဆှံပူၤန့ၣ်တက့ၢ်.”
-
“ယမ့ၢ်ယွၤ[ယဟိဝၤ], နကစၢ်လၢအသိၣ်လိနၤဒ်သိးနကဘၣ်ဘျုးဘၣ်ဖှိၣ်, ဒီးယဒုးလဲၤနၤလၢကျဲလၢနဂ့ၤလဲၤန့ၣ်လီၤ. အိ, မ်နကနၣ်တ့ၢ်ယတၢ်မၤလိာ်တက့ၢ်. မ့မ့ၢ်ဒ်န့ၣ်ဒီး နတၢ်ဃူတၢ်ဖိး ကမၤသးဒ်ထံမိၢ်ပှၢ်အသိး, ဒီးနတၢ်တီတၢ်လိၤ ဒ်ပီၣ်လဲၣ်လပီအသိးန့ၣ်လီၤ. ဒီးနချံနသၣ် ကမၤသးဒ် မဲးဧိၤဟီၣ်ဧိၤအသိး, ဒီးနစၢၤနသွဲၣ်, ဒ်အဖျၢၣ်တဖၣ်အသိးန့ၣ်လီၤ. တၢ်တဒီၣ်တဲာ်ဘၣ်, ဒီးတမၤဟးဂီၤဘၣ်အမံၤ လၢယမဲာ်ညါဘၣ်.”—ယၡါယၤ ၄၈:၁၇-၁၉.
စီၤသးတီဒီးနီၢ်အဲၣ်ဖီ ဒိးန့ၢ်ဘၣ်တၢ်ဂံၢ်တၢ်ဘါခီဖျိ တၢ်ကတိၤလၢလီၤဘၣ်သူၣ်ဘၣ်သးတဖၣ်အံၤအဃိလီၤ. အဝဲသ့ၣ်အဲၣ်ဒိးဝဲနီၢ်နီၢ် တၢ်အိၣ်မူအကျဲလၢ ကကဲဘျုးလၢအဝဲသ့ၣ်ဒီးအဟံၣ်ဖိဃီဖိအဂီၢ်လီၤ. အဝဲသ့ၣ်ဆိကမိၣ်ဘၣ်ဝဲလၢ တၢ်လၢအဂ့ၤန့ၢ်ဒံး တၢ်အိၣ်မူဘၣ်ဒီးဖိတဖၣ်လၢ ဟီၣ်ခိၣ်လၢပှဲၤဒီးတၢ်မုာ်တၢ်ခုၣ်အံၤန့ၣ် တအိၣ်လၢၤဘၣ်.
စီၤထူထူစံးဘၣ်အဝဲသ့ၣ်လၢ “နမ့ၢ်မၤလိတၢ်လၢ ယဟိဝၤသိၣ်လိပှၤတဖၣ်ဒီး နမ့ၢ်ကျဲးစၢးမၤထွဲအဂ့ၤကတၢၢ်န့ၣ် နဒိးန့ၢ်ဘၣ်တၢ်ဆိၣ်ဂ့ၤတဖၣ်အံၤသ့ခဲလၢာ်လီၤ.”
လၢတၢ်သးဆူၣ်အပူၤစီၤသးတီသံကွၢ်ဝဲလၢ “တၢ်သ့ၣ်တဖၣ်အံၤပဃုသ့ၣ်ညါအီၤကသ့ဒ်လဲၣ်. နၤဒီးနီၢ်သးဝါ သုမၤစၢၤပှၤကသ့ဧါ.”
“ပအဲၣ်ဒိးမၤစၢၤသုဒိၣ်မးလီၤ. နီၢ်နီၢ်န့ၣ်, ဒ်သိးသုကထံၣ်န့ၢ် တၢ်ဃူတၢ်ဖိးဒီးတၢ်သူၣ်ခုသးခုအကျဲဒီး အိၣ်မူဒ်ကျဲအံၤအသိးအဂီၢ် တၢ်မၤစၢၤလၢသုလိၣ်ဘၣ်န့ၣ် ပမၤစၢၤသုသ့လီၤ.”
တၢ်ဂ့ၤအဂၤလၢ နကဘၣ်သး
ဘၣ်ဃးဒီးပှၤ
ဘၣ်မနုၤအဃိ ဘၣ်မၤလိလံာ်စီဆှံလဲၣ်—အထီ
လံာ်စီဆှံမၤစၢၤ ပှၤလၢအကကွဲၢ်တဖၣ် ဒ်သိးကသ့ၣ်ညါဝဲ တၢ်သံကွၢ်လၢ အရ့ဒိၣ်တဖၣ်အံၤအတၢ်စံးဆၢလီၤ
