တၢ်ဃုထံၣ်န့ၢ် တၢ်နဲၣ်လိလၢအဘျုးအိၣ်
နီၢ်အဲၣ်ဖီပာ်သူၣ်ပာ်သးဝဲ ပှၤအိၣ်လၢအဃၢၤ, လၢအမ့ၢ်စီၤထူထူဒီးအမါနီၢ်သးဝါန့ၣ် ဖျါလၢအိၣ်ဒီးတၢ်သူၣ်မံသးမံဒီးတၢ်ဃူတၢ်ဖိးထီဘိလီၤ. အဝဲတဲဘၣ်စီၤသးတီလၢကလဲၤဒီးသံကွၢ်ဝဲနီၢ်သးဝါလၢ အဝဲသ့ၣ်အတၢ်ခူသူၣ်မ့ၢ်မနုၤလဲၣ်န့ၣ်လီၤ. လၢတၢ်န့ၣ်အဃိ လၢခံတဘျီဖဲ အဝဲထံၣ်ဝဲနီၢ်သးဝါအခါသံကွၢ်ဝဲလီၤ.
နီၢ်သးဝါစံးဝဲ “ဂ့ၤလံ, နီၢ်အဲၣ်ဖီဧၢ, ပဝဲစ့ၢ်ကီးပအိၣ်ဒီးတၢ်ကီတၢ်ခဲဒီး တၢ်ဘၣ်ယိၣ်အါမံၤဒ်သိးသုလီၤ. ဘၣ်ဆၣ်တယံာ်ဒံးဘၣ်န့ၣ် ယထံၣ်န့ၢ်လံာ်တဘ့ၣ်လၢ အိၣ်ဒီးတၢ်နဲၣ်လိလၢအဘျုးအိၣ်အါမးလၢယဂီၢ် ဒီးယဟံၣ်ဖိဃီဖိအဂီၢ်လီၤ. လံာ်အံၤပာ်ဖျါန့ၢ်ပှၤတၢ်ဃူတၢ်ဖိးဒီးတၢ်သူၣ်ခုသးခုအကျဲလီၤ. ပကွၢ်ဆၢၣ်မဲာ်ဘၣ်တၢ်ဆီၣ်သနံးဒီးတၢ်သူၣ်ကိၢ်သးဂီၤကိးနံၤဒဲးသနာ်က့ လံာ်အံၤမၤစၢၤပှၤလၢပကအိၣ်ဒီးတၢ်သးခုလီၤ.”
နီၢ်အဲၣ်ဖီသးစဲဝဲဒိၣ်မးအဃိ နီၢ်သးဝါတဲနၢ်ပၢၢ်အါထီၣ်ကဒီးအီၤလံာ်အံၤအဂ့ၢ်လီၤ. “လံာ်အံၤမ့ၢ်လံာ်လၢပျၢၤ လၢဘၣ်တၢ်ကွဲးအီၤဖဲ ကီၢ်အံၣ်စရ့ ဒီးထံကီၢ်လၢအဃၢၤတဖၣ်လီၤ. ဘၣ်ဆၣ်, လံာ်အံၤတမ့ၢ်လံာ်လၢခၢၣ်စးဝဲတၢ်ဘူၣ်တၢ်ဘါတမံၤမံၤ မ့တမ့ၢ်တၢ်အိၣ်ဖှိၣ်တဖုအဃိ လံာ်အံၤမ့ၢ်လံာ်လၢပှၤခဲလၢာ်အဂီၢ်လီၤ. နီၢ်နီၢ်, လံာ်ဝဲန့ၣ်ဘၣ်တၢ်ကွဲးကျိးအီၤလံလၢကျိာ်လၢအကယၤလံအဃိ ပှၤကိးဂၤဒဲးဃၣ်ဃၣ်ဖးဝဲသ့လီၤ.” နီၢ်သးဝါစံးစ့ၢ်ကီးဝဲလၢ လံာ်အံၤန့ၣ်ညီနုၢ်ဘၣ်တၢ်ယၢၤထီၣ်အီၤခီဖျိ ပှၤကူၣ်ဘၣ်ကူၣ်သ့တဖၣ် ဒီးမ့ၢ်စ့ၢ်ကီးတၢ်အခီၣ်တဃၣ်လၢ ထံကီၢ်အါဘ့ၣ်အသဲစးတၢ်ရဲၣ်တၢ်ကျဲၤအဂီၢ်လီၤ.
နီၢ်အဲၣ်ဖီအဲၣ်ဒိးထံၣ်ဘၣ်ဝဲလံာ်အံၤဒိၣ်မးလီၤ. တၢ်န့ၣ်အနံၤဟါခီန့ၣ် အဝဲလဲၤဆူနီၢ်သးဝါအဟံၣ်လီၤ. ဖဲန့ၣ် နီၢ်သးဝါဒုးနဲၣ်အီၤ တၢ်နဲၣ်လိအဘျုးအိၣ် လၢလံာ်အံၤပာ်ဖျါဝဲလၢ လာ်အံၤန့ၣ်လီၤ.
တၢ်လုၢ်ဒိၣ်ထီၣ်ဖိတဖၣ်
-
“ဆှၢဖိဒံဖိသၣ်လၢ အကျဲဧိၤကပူၤဧိၤတက့ၢ်. ဒီးတုၤအသးပှၢ်ဒီး, တဟးဖးဒီးအီၤဘၣ်.”
-
“ပၢ်သ့ၣ်ဧၢ, မၤဒိၣ်ထီၣ်သုဖိတဖၣ်အသးတဂ့ၤ.”
တၢ်ဖံးတၢ်မၤ ဒီးတၢ်သူကျိၣ်စ့လၢ တၢ်ကူၣ်သ့
-
“ပှၤလၢအဟုၣ်တၢ်, မ်အသုတဟုၣ်လၢၤတၢ်တဂ့ၤ, အခိၣ်တလိာ်, ဒ်သိးအကဟ့ၣ်နီၤတၢ်လၢပှၤဖှီၣ်ဖိယာ်ဖိဒီး, မ်အကျဲးစၢးမၤတၢ်ဂ့ၤလၢအစုသပှၢ်ပှၢ်တက့ၢ်.”
-
“ပှၤလၢအတမၤဘၣ်တၢ်တဂၤဂၤန့ၣ်, မ်အသုတအီၣ်စ့ၢ်ကီးတၢ်တဂ့ၤလီၤ.”
ကသံၣ်မူၤဘှီး ဒီးသံး
-
“မ်ပမၤကဆှီပသးလၢကယဲၢ် တၢ်ဃံၣ်တၢ်မူး, ဘၣ်ဃးဒီးပဖံးပညၣ်, ဒီးပသူၣ်ပသးခဲလၢာ်တက့ၢ်.”
-
“စပံးထံန့ၣ် မ့ၢ်တၢ်မၤတရီတပါတၢ်, ဒီးသံးဧိၤဂာ်ဧိၤန့ၣ်မ့ၢ်တၢ်မၤတၢထီၣ်တၢလီၤတၢ်လီၤ. ဒီးကယဲၢ်ပှၤလၢအလဲၤကနူၤကပၤလၢအဃိန့ၣ် ကူၣ်တၢ်တသ့ဘၣ်.”
တၢ်သိၣ်တၢ်သီလၢ သကဲးပဝးအဂီၢ်
-
“မ်တၢ်န့ၢ်မါန့ၢ်ဝၤဒီး လီၢ်မံတဘၣ်အၢဘၣ်န့ၣ်, အိၣ်ဒီးအလၤအကပီၤလၢ ပှၤခဲလၢာ်အကျါတက့ၢ်.”
-
‘ဟးဆှဲးတၢ်မၤကမၣ်မုၣ်ကမၣ်ခွါတက့ၢ်.’
-
“ကယဲၢ်ပှၤလၢအကွၢ်ပိာ်မုၣ်ဒီး အသးကတၢကိးဂၤဒဲးန့ၣ် အဲၣ်ဘၢလံတၢ်ဒီးအီၤလၢအသးကံၢ်ပူၤလံ.”
တၢ်ယူးယီၣ်ပာ်ကဲလၢ ဟံၣ်ဃီပူၤ
-
“ယူးယီၣ်နမိၢ်ဒီးနပၢ်တက့ၢ်.”
-
“ကနၣ်နပၢ်လၢအထီၣ်ဖိနၤအကလုၢ်တက့ၢ်. ဒီးတုၤနမိၢ်သးပှၢ်ဒီး, မၤတရီတပါအီၤတဂ့ၤ.”
-
“ဘၣ်ဆၣ်ဒီးသုဝဲဒၣ်အံၤ, ဒ်သုအဲၣ်လီၤသုသးအသိး, တဂၤအဲၣ်အမါ, တဂၤအဲၣ်အမါဒၣ်ဝဲတက့ၢ်. ဒီးပိာ်မုၣ်န့ၣ်မ်အယူးယီၣ်အဝၤတက့ၢ်.”
ပှၤလၢအိၣ်ဒီးလံာ်စီဆှံတဖၣ်အဂီၢ်, ပဃုထၢထီၣ်တၢ်ယၢၤဖျါထီၣ်လၢထးတဖၣ် အခီၣ်ထံးလီၤ.
အ့းဖ့းစူး ၄:၂၈; ၂ သ့းစၤလနံ ၃:၁၀
