တၢ်သဘံၣ်ဘုၣ်ခဲလၢာ်အကတၢၢ်
တၢ်ဂ့ၢ်ခဲလၢာ်လၢ စီၤထူထူတဲဝဲဘၣ်ဃး ယဟိဝၤယွၤအဂ့ၢ်တဖၣ်န့ၣ် ထုးန့ၢ်နီၢ်နီၢ်စီၤသးတီအသးလီၤ. ဘၣ်ဆၣ်, တၢ်တမံၤမံၤ မၤတံာ်တာ်အသးဒံးအဖၢလီၤ. အဝဲသံကွၢ်ဝဲစီၤထူထူလၢ “ယဟိဝၤမ့မ့ၢ်ကစၢ်လၢ အတ့လီၤတၢ်ခဲလၢာ်လၢ အိၣ်ဒီးတၢ်အဲၣ်ဒီး တၢ်စိတၢ်ကမီၤန့ၣ် ဘၣ်မနုၤအဃိ တၢ်နးတၢ်ဖှီၣ်ဘၣ်အိၣ်အါမးလၢ ဟီၣ်ခိၣ်ချၢလဲၣ်. ဘၣ်မနုၤအဃိ ပအိၣ်ဒီးတၢ်သဘံၣ်ဘုၣ်အါမးလဲၣ်.”
စီၤထူထူစံးဝဲ စီၤသးတီလၢ “တၢ်သံကွၢ်အံၤဂ့ၤဒိၣ်မးလီၤ. ပှၤအါမးဆိကမိၣ်ဘၣ်ဝဲ ဘၣ်ဃးဒီးတၢ်အံၤလီၤ. ဖဲပဆိကမိၣ်ကွၢ် ယဟိဝၤယွၤအတၢ်ဂ့ၤတၢ်ဝါတဖၣ်အခါ ကြၢးဖျါတြၢၤကလာ်လၢ ခ့ခါခဲအံၤ တၢ်အိၣ်အသးအအၢအသီလၢ ဟီၣ်ခိၣ်ချၢတဖၣ်န့ၣ် တမ့ၢ်ယွၤအတၢ်အဲၣ်ဒိးလၢ အဖိလၢဟီၣ်ခိၣ်ချၢတဖၣ်အဂီၢ်ဘၣ်န့ၣ်လီၤ. လၢတၢ်န့ၣ်အဃိ, ဘၣ်မနုၤလၢတၢ်သ့ၣ်တဖၣ်ကဲထီၣ်အသးလဲၣ်န့ၣ် ပကနၢ်ပၢၢ်အဂီၢ် လိၣ်လၢပကဘၣ်သ့ၣ်ညါ ယွၤအတၢ်တိာ်ပာ်အခီၣ်ထံးလၢ ဟီၣ်ခိၣ်အဂီၢ်ဒီး တၢ်မၤအသးလၢကစၢ်အတၢ်တိာ်ပာ်အံၤဒ်လဲၣ်န့ၣ်လီၤ.”
အခါဖဲန့ၣ်, စီၤထူထူတဲနၢ်ပၢၢ်ဝဲ စီၤသးတီလၢ ဖဲယဟိဝၤယွၤ မၤဝံၤဝဲတၢ်ဘၣ်တ့တၢ်မၤလၢဟီၣ်ခိၣ်အခါ ကစၢ်အသးမၤသးဒ်လဲၣ်အဂ့ၢ်န့ၣ်လီၤ. တၢ်အံၤမ့ၢ်လံာ်စီဆှံအဆၢလၢ စီၤထူထူဖးန့ၢ်ဝဲလီၤ.
-
“ယွၤကွၢ်အတ့လီၤတၢ်တမံၤလၢ်လၢ်န့ၣ်, ဒီးထံၣ်ဝဲလၢအဂ့ၤမးလီၤ.”—၁ မိၤၡ့ ၁:၃၁.
ယဟိဝၤအတၢ်ဘၣ်တ့လၢ အလီၤဆီကတၢၢ်န့ၣ် မ့ၢ်ပှၤကညီအဆိကတၢၢ်ခံဂၤလီၤ. အဝဲသ့ၣ်အမံၤမ့ၢ်အၤဒၣ်ဒီးအံၣ်အုလီၤ. ယွၤတ့လီၤအဝဲသ့ၣ်လၢ တၢ်လၢတၢ်ပှဲၤဒ်အစုတၢ်ဘၣ်တ့အဂၤတဖၣ်အသိးလီၤ. လၢတၢ်န့ၣ်အဃိ, အဝဲသ့ၣ်အိၣ်မူလၢဟီၣ်ခိၣ်ချၢလီၤထူလီၤယိာ်သ့ဝဲလီၤ. ယွၤပာ်အဝဲသ့ၣ်လၢ ဖီကရၢၢ်ဃံလၤတဖျၢၣ်လၢ ပှၤကိးလၢဧ့ၤဒ့ၣ်တၤသၣ်လီၢ်န့ၣ်လီၤ. ဖဲန့ၣ်န့ၣ်, အဝဲသ့ၣ်ကအိၣ်ဘၣ် မုာ်မုာ်ခုၣ်ခုၣ်အဂီၢ်ဘၣ်တၢ်ဟ့ၣ်အီၤတၢ်ကိးမံၤဒဲးလၢ အဝဲသ့ၣ်လိၣ်ဘၣ်၁ မိၤၡ့ ၂:၈, ၉) အါန့ၢ်အန့ၣ် ယဟိဝၤစံးဘၣ်အဝဲသ့ၣ်လၢ ကအိၣ်ဖျဲၣ်ထီၣ်အဖိအါအါဂီၢ်ဂီၢ်ဒီး မၤပှဲၤဟီၣ်ခိၣ်ဒီး မၤနၢၤအီၤလီၤ. (၁ မိၤၡ့ ၁:၂၈) တၢ်အံၤအဲၣ်ဒိးစံးဝဲလၢ လၢခံန့ၣ် ဟီၣ်ခိၣ်ဒီဘ့ၣ်ကကဲထီၣ် ပၤရဒံစူးဖးဒိၣ်တခါလၢ ပှဲၤဒီးဒူၣ်ဖိထၢဖိလၢ အိၣ်ဒီးတၢ်လၢတၢ်ပှဲၤဒီး တၢ်သူၣ်ခုသးခုန့ၣ်လီၤ. မ့ၢ်မးတၢ်မုၢ်လၢ်လၢ အဂ့ၤဒိၣ်မးလီၤ.
ဝဲန့ၣ်လီၤ. တၢ်တလၢပှဲၤဘၣ်န့ၣ်တအိၣ်နီတမံၤဘၣ်. (တၢ်မနုၤကမၣ်လဲၣ်. စီၤထူထူဒုးနဲၣ်ဝဲ စီၤသးတီလၢ တၢ်တဲနၢ်ပၢၢ်ယိယိဖိတမံၤလၢ လံာ်စီဆှံပူၤလီၤ.
-
“မ်ဒ်န့ၣ်ဒီး ဒ်တၢ်ဒဲးဘးဟဲနုာ်ဆူ ဟီၣ်ခိၣ်ချၢလၢ ပှၤတဂၤအဃိ, ဒီးတၢ်သံတၢ်ပှၢ်လၢ တၢ်ဒဲးဘးအဃိအသိးန့ၣ်, ဒီးဒ်န့ၣ်အသိး ပှၤခဲလၢာ်မၤတ့ၢ်တၢ်ဒဲးဘးသတးဒီး ပှၤခဲလၢာ်ဘၣ်တၢ်သံတၢ်ပှၢ်”လီၤ—ရိမ့ၤ ၅:၁၂.
ဒ်ပၢ်လၢအိၣ်ဒီးတၢ်အဲၣ်တဂၤအသိး ယဟိဝၤယွၤ ဟ့ၣ်ဝဲအၤဒၣ်ဒီးအံၣ်အုတၢ်ဘျၢ မ့တမ့ၢ်တၢ်သိၣ်တၢ်သီလီၤတံၢ်တဖၣ်, ဒ်သိးအဝဲသ့ၣ် ကအိၣ်မူဘၣ်ဝဲထီဘိဒီး ကအံးထွဲကွၢ်ထွဲဝဲ ပၤရဒံစူးအဂီၢ်လီၤ. (၁ မိၤၡ့ ၂:၁၅-၁၇) ဒီးဒ်ပၢ်လၢအိၣ်ဒီးတၢ်ကူၣ်သ့တဂၤအသိး ယဟိဝၤတမၢဆူၣ်အဝဲသ့ၣ်လၢ ကမၤထွဲတၢ်လၢကစၢ်စံးဝဲအသိးဘၣ်ဆၣ် ကစၢ်ဟ့ၣ်အီၤအခွဲးလၢ ကပာ်ဖျါအတၢ်အဲၣ်ကစၢ်ခီဖျိဃုထၢဝဲလၢ ကမ့ၢ်ဖိလၢအိၣ်ဒီးတၢ်ဒိကနၣ်တဖၣ်လီၤ. ဒ်ပဝဲသ့ၣ်အသိး အၤဒၣ်ဒီးအံၣ်အု အိၣ်ဒီးတၢ်သဘျ့လၢဃုထၢတၢ်လၢအသးဒၣ်ဝဲသ့လီၤ. အဝဲသ့ၣ်မၤတ့ၢ်ဝဲတၢ်မနုၤလဲၣ်.
လီၤသးအုးမးလၢ အၤဒၣ်ဒီးအံၣ်အုဃုထၢဝဲလၢ တမၤထွဲအတၢ်ဘၣ်တ့ကစၢ်အတၢ်နဲၣ်လိဘၣ်န့ၣ်လီၤ. အဝဲသ့ၣ်မၤဝဲလၢ အသးဒၣ်ဝဲလီၤ. လၢတၢ်အံၤအဃိ အဝဲသ့ၣ်ကဲထီၣ် ပှၤတၢ်ဒဲးဘးဖိဒီး တလၢပှဲၤလၢၤဘၣ်. တယံာ်ဘၣ်ဒီး အၤဒၣ်ဒီးအံၣ်အု ဘၣ်ပှၢ်ထီၣ်ဒီး ဘၣ်သံဝဲဒၣ်န့ၣ်လီၤ. လီၤတံၢ်လၢ တၢ်အံၤမ့ၢ်ယဟိဝၤစံးတ့ၢ်ဝဲတၢ်ကမၤအသးလၢ အဝဲသ့ၣ်မ့ၢ်တဒိကနၣ်ကစၢ်အတၢ်သိၣ်တၢ်သီဘၣ်န့ၣ်လီၤ.—၁ မိၤၡ့ ၂:၁၇.
ပဝဲသ့ၣ်ခဲလၢာ် ပမ့ၢ်အၤဒၣ်ဒီးအံၣ်အုအစၢၤအသွဲၣ်အဃိ ပန့ၢ်သါဘၣ်အဝဲသ့ၣ်အတၢ်တလၢတပှဲၤန့ၣ်လီၤ. လၢတၢ်န့ၣ်အဃိ ပသးပှၢ်ထီၣ်ဒီးပဘၣ်သံလီၤ. ဘၣ်ဆၣ်, စီၤထူထူဒုးနာ်နီၢ်နီၢ်စီၤသးတီလၢ ယဟိဝၤအတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်န့ၣ်တဆီတလဲအသးဘၣ်. ဒ်ပၢ်လၢအိၣ်ဒီးတၢ်အဲၣ်တဂၤအသိး ယဟိဝၤအဲၣ်ဒိးဒံးဝဲလၢ ပှၤကညီတဖၣ် က
မုာ်လၤတၢ်အိၣ်မူလၢ ဟီၣ်ခိၣ်ပၤရဒံစူးပူၤအဖၢလီၤ. စီၤထူထူဒုးနဲၣ်ဝဲ စီၤသးတီဒီးနီၢ်အဲၣ်ဖီလၢ လံာ်စီဆှံအဆၢအံၤလီၤ.-
“အဂ့ၢ်ဒ်အံၤ, ယွၤလၢအတ့လီၤမူခိၣ်စံးဒ်အံၤ, အဝဲဒၣ်မ့ၢ်ယွၤလၢအတ့လီၤဟီၣ်ခိၣ်ဒီးမၤအီၤ, အဝဲဒၣ်ဒုးအိၣ်ကျၢၤအီၤလီၤ. တမ့ၢ်ဘၣ်ဒ်သိးအကအိၣ်ကလီဒီးတ့လီၤဝဲဘၣ်. မ့ၢ်ဒ်သိးအကအိၣ်ဒီး ပှၤအိၣ်ဝဲဆိးဝဲလၢအဖီခိၣ်လီၤ.”—ယၡါယၤ ၄၅:၁၈.
စီၤထူထူ ဒုးသ့ၣ်နီၣ်ထီၣ်က့ၤဝဲ စီၤသးတီဒီးနီၢ်အဲၣ်ဖီလၢ လံာ်စီဆှံတၢ်စံးပာ်လၢ လီၤဘၣ်သူၣ်ဘၣ်သးတဖၣ်န့ၣ်လီၤ. တၢ်ဆူးတၢ်ဆါ, တၢ်အ့ၣ်စူၢ်အ့ၣ်ထုး, တၢ်တူၢ်ဘၣ်ခီၣ်ဘၣ်တအိၣ်လၢၤဘၣ်. တၢ်အီၣ်တၢ်အီကအိၣ်အါအါဂီၢ်ဂီၢ်ဒီး ဟံၣ်လၢအဂ့ၤကအိၣ်လၢ ပှၤကိးဂၤဒဲးအဂီၢ်လီၤ. တၢ်သံစ့ၢ်ကီး တအိၣ်လၢၤဘၣ်. တၢ်ဆိၣ်ဂ့ၤတဖၣ်အံၤန့ၣ် လၢပှၤဟီၣ်ခိၣ်ဖိတဖၣ်အဂီၢ် မ့ၢ်ယွၤအတၢ်တိာ်ပာ်အခီၣ်ထံး လၢတလဲလိာ်အသးအကျါတနီၤလီၤ. တၢ်န့ၣ်မ့ၢ်တၢ်အိၣ်မူလၢ အကတၢၢ်တအိၣ်လၢ ဟီၣ်ခိၣ်ပၤရဒံစူးအပူၤန့ၣ်လီၤ. စီၤထူထူဒုးနဲၣ်ဝဲ စီၤသးတီလၢတၢ်စံးပာ်အံၤလီၤ.
-
“ပှၤတီပှၤလိၤန့ၢ်ဘၣ်သါထံဧိၤကီၢ်ဧိၤ, ဒီးအိၣ်ဝဲဆိးဝဲလီၤစိၤလီၤထီလီၤ.”—စံးထီၣ်ပတြၢၤ ၃၇:၂၉.
တၢ်အံၤမ့ၢ် ယဟိဝၤယွၤအတၢ်စံးပာ်ဒီး ကဟဲကဲထီၣ်ဝဲ သပှၢ်တၢၢ်လီၤ.