ပဝဲခဲလၢာ် ပလိၣ်ဘၣ်တၢ်ဟံးစုနဲၣ်ကျဲ
စီၤသးတီ အသူၣ်ကိၢ်သးဂီၤဒိၣ်မးလီၤ. တၢ်ဂ့ၢ်အါမံၤတဖၣ်မၤကိၢ်မၤဂီၤအီၤလီၤ. အဝဲကလုၢ်အီၣ် အဟံၣ်ဖိဃီဖိအဂီၢ် ဂုာ်ကျဲးစၢးဃုဝဲတၢ်မၤလၢ အဂၢၢ်ကျၢၤန့ၣ် ယံာ်တ့ၢ်မးလံလီၤ. အဝဲအဲၣ်ဒိးလၢအဖိတဖၣ် ကကဲထီၣ်ပှၤကူၣ်ဘၣ်ကူၣ်သ့ ဒီးအိၣ်ဒီးခါဆူညါလၢအဂ့ၤဒိၣ်န့ၢ်တက့ၢ်လီၤ. ဘၣ်ဆၣ်တၢ်ခဲလၢာ်အံၤ လီၤဂာ်လၢမၤဝဲတထီၣ်ဘးဘၣ်လီၤ. တၢ်လၢမုၢ်လၢ်ဝဲဒိၣ်ကတၢၢ်န့ၣ်မ့ၢ် တၢ်အိၣ်ဆူၣ်အိၣ်ချ့လီၤ. အဝဲမ့ၢ်အိၣ်ဆူၣ်အိၣ်ချ့ဒီး မၤတၢ်ကကဲ, ကွၢ်ထွဲအဟံၣ်ဖိဃီဖိကန့ၢ်ဒီး ဟ့ၣ်ဝဲဟံၣ်လဲစ့ၢ်ကီးကန့ၢ်လီၤ. ဘၣ်ဆၣ်, အဝဲဘၣ်ယိၣ်တၢ်ဒိၣ်မးလၢ အဝဲမ့ၢ်ဘၣ်တၢ်တမံၤမံၤဒီး မ့ၢ်မတၤကအံးထွဲကွၢ်ထွဲက့ၤ အဟံၣ်ဖိဃီဖိလဲၣ်န့ၣ်လီၤ.
စီၤသးတီအမါ နီၢ်အဲၣ်ဖီစ့ၢ်ကီးအိၣ်ဒီး တၢ်သူၣ်ကိၢ်သးဂီၤလီၤ. ခဲအံၤအဝဲသ့ၣ်ခံဂၤ အတၢ်ရ့လိာ်သးဖ့ၣ်ဆၢထီၣ်ဒိၣ်မးလီၤ. ဖဲစီၤသးတီဟဲက့ၤလၢတၢ်မၤအခါ လီၤဘှံးလီၤတီၤဝဲ ထီဘိလီၤ. နီၢ်အဲၣ်ဖီအဲၣ်ဒိးနီၢ်နီၢ်လၢ စီၤသးတီကမၤစၢၤအီၤဖဲ အဝဲသိၣ်လိအဖိတဖၣ်လၢ ကအိၣ်ဒီးလုၢ်လၢ်လၢအဂ့ၤဒီး တၢ်ယူးယီၣ်ပာ်ကဲဘၣ်ဆၣ် စီၤသးတီဟ့ၣ်အီၤတၢ်ဆၢကတီၢ်တန့ၢ်ဘၣ်. နီၢ်အဲၣ်ဖီအသးတမုာ်လၢ အဝဲဒီးစီၤသးတီ ကတိၤအါလိာ်အသးတၢ် ခဲအံၤခဲအံၤလၢအဖိတဖၣ် အမဲာ်ညါအဃိ တၢ်အံၤတဂ့ၤလၢအဖိတဖၣ်အဂီၢ်ဘၣ်. ဖိတဂၤမ့ၢ်တဆူၣ်တချ့ဒီး ကဘၣ်မၤဝဲဒ်လဲၣ်. ကသံၣ်ကသီဒီး ကလဲၤလၢတၢ်ဆါဟံၣ်အဂီၢ် ကဒိးန့ၢ်ကျိၣ်စ့ဖဲလဲၣ်. တၢ်လၢကဟဲကဲထီၣ်အသးသ့တဖၣ်အဂီၢ်ဒၣ်လဲာ် နီၢ်အဲၣ်ဖီဆိကမိၣ်ဝဲ တဘူၣ်လၢၤဘၣ်.
စီၤသးတီဒီးနီၢ်အဲၣ်ဖီ စ့ၢ်ကီးပာ်သူၣ်ပာ်သးဝဲ တၢ်အိၣ်သးလၢအဝဲသ့ၣ်အခိၣ်အဃၢၤန့ၣ် တလီၤဂာ်ဒ်လၢညါဘၣ်လီၤ. တဂၤဒီးတဂၤ ဟ့ၣ်လိာ်သးတၢ်ဆၢကတီၢ် န့ၢ်ဒၣ်တစဲးဒီး ပှၤလၢအခိၣ်အဃၢၤတဖၣ်အတၢ်သးအိၣ်မၤစၢၤလိာ်သး တဂၤဒီးတဂၤလၢ အဝဲသ့ၣ်ပာ်လုၢ်ပာ်ပှ့ၤဝဲန့ၣ် လီၤဂာ်လၢတအိၣ် ဒ်သိးလၢညါလၢၤဘၣ်န့ၣ်လီၤ. အဝဲသ့ၣ်ထံၣ်ဘၣ်ဝဲလၢ အတံၤသကိးဒီး အဘူးအတံၢ်ခဲလၢာ်န့ၣ် အိၣ်ဒီးတၢ်ကီတၢ်ခဲလၢ လီၤဂာ်ဒီးအဝဲသ့ၣ်ဒီး ဘၣ်ယိၣ်တၢ်လၢ ခါဆူညါအဂီၢ်လီၤ. လီၤဂာ်လၢမတၤတဂၤမး တအိၣ်ဒီးတၢ်သးခုနီၢ်နီၢ်ဘၣ်လီၤ. နီၢ်အဲၣ်ဖီ ညီနုၢ်ဆိကမိၣ်ဝဲဘၣ်ဃး တၢ်ကီတၢ်ခဲတဖၣ်အံၤအစၢဒီး မ့ၢ်ဒိးန့ၢ်ဘၣ်တၢ်ဃူတၢ်ဖိးဒီး တၢ်သူၣ်မံသးမုာ်န့ၣ် ကဂ့ၤဆံးဒိၣ်လဲၣ်န့ၣ်လီၤ. စီၤသးတီဒီးနီၢ်အဲၣ်ဖီ ဂုာ်ကျဲးစၢးဝဲသနာ်က့ လီၤဂာ်လၢ အဝဲသ့ၣ်အတၢ် ဂုာ်ကျဲးစၢးကိးမံၤဒဲးန့ၣ် အခီပညီတအိၣ်ဘၣ်လီၤ.
ဘၣ်တနံၤ, စီၤသးတီဒီးနီၢ်အဲၣ်ဖီ ကတိၤသကိးတၢ်ဘၣ်ဃး အဝဲသ့ၣ်အတၢ်ကီတၢ်ခဲလီၤ.
စီၤသးတီစံးဝဲ “ပမ့ၢ်ထံၣ်န့ၢ် တၢ်ဃူတၢ်ဖိးဒီး တၢ်သူၣ်ခုသးခုအကျဲန့ၣ်ကဂ့ၤဆံးဒိၣ်လဲၣ်” လီၤ.
နီၢ်အဲၣ်ဖီ စံးဆၢဝဲ “အိ, မ့ၢ်ယၢၣ်, ယဲစ့ၢ်ကီးယဆိကမိၣ်တ့ၢ်ဒ်န့ၣ်လီၤ. လီၤတံၢ်လၢ တၢ်အစၢကဘၣ်အိၣ်သပှၢ်တၢၢ်လၢ ပတၢ်ကီတၢ်ခဲ ခဲလၢာ်အဂီၢ်လီၤ.”
စီၤသးတီစံးဆၢက့ၤဝဲ “ဘၣ်ဆၣ်တၢ်ဘူၣ်တၢ်ဘါအတၢ်ဟ့ၣ်ကူၣ်ဒီး အတၢ်ဆိကမိၣ်လၢ ဘၣ်ဃးဒီးတၢ်အိၣ်မူန့ၣ်အိၣ်အါမးလီၤ. ပကဃုထံၣ်န့ၢ် တၢ်သူၣ်ခုသးခုအကျဲဒ်လဲၣ်. ပကသမံသမိးတၢ်သ့ၣ်တဖၣ်အံၤခဲလၢာ်ဒုတသ့ဘၣ်. အါန့ၢ်အန့ၣ် ပှၤကိးဂၤဒဲးစံးဝဲလၢ အိၣ်ဒီးတၢ်အစၢလၢ တၢ်အိၣ်မူတၢ်ကီတၢ်ခဲတဖၣ်အဂီၢ်လီၤ. ဘၣ်ဆၣ်နကအၢၣ်လီၤတူၢ်လိာ်လၢ တၢ်သ့ၣ်တဖၣ်န့ၣ်အဘျုးအိၣ်ဒၣ် တစဲးဖိလၢပှၤကညီတဖၣ်အဂီၢ်လီၤ. လၢယဂီၢ်ဒု, မ့ၢ်ဂုာ်ကျဲးစၢးသနာ်က့ အဘျုးတအိၣ်ဘၣ်လီၤ.”
နီၢ်အဲၣ်ဖီအၢၣ်လီၤတူၢ်လိာ်ဝဲ စီၤသးတီအတၢ်ကတိၤသနာ်က့ လၢအသးပူၤတခီ အဝဲအဲၣ်ဒိးထံၣ်န့ၢ်တၢ်မၤစၢၤတနီၤလၢ အဟံၣ်ဖိဃီဖိအဂီၢ်န့ၣ်လီၤ. အဝဲတယာ်ဝဲလၢ တၢ်မၤစၢၤအဂီၢ် ကျဲကအိၣ်တဘိဘိလီၤ.
ဘၣ်သ့ၣ်သ့ၣ်နၤစ့ၢ်ကီး နကဘၣ်ယိၣ်တၢ်ဘၣ်ဃးဒီး တၢ်ကီတၢ်ခဲတနီၤဒ် စီၤသးတီဒီးနီၢ်အဲၣ်ဖီ ကွၢ်ဆၢၣ်မဲာ်ဘၣ်ဝဲန့ၣ်လီၤ. အဝဲသ့ၣ်အတၢ်ကီတၢ်ခဲတဖၣ်န့ၣ် ညီနုၢ်ပှၤကွၢ်ဆၢၣ်မဲာ်ဘၣ်အီၤလၢ ဟီၣ်ခိၣ်ဒီဘ့ၣ်လီၤ. ပှၤအိၣ်လၢ တၢ်လီၢ်ကိးပူၤဒဲးန့ၣ် အဲၣ်ဒိးအိၣ်ဒီး တၢ်အိၣ်ဆူၣ်အိၣ်ချ့လၢအဂ့ၤ, တၢ်သူၣ်မံသးမုာ်ဒီး ဟံၣ်မုာ်ဃီပၢၤလီၤ. ဘၣ်ဆၣ်ကဒိးန့ၢ်ဘၣ် တၢ်ခဲလၢာ်အံၤအဂီၢ် လီၤဂာ်လၢကီခဲဒိၣ်မးလီၤ. တၢ်မုၢ်လၢ်အိၣ်လၢ ကထံၣ်န့ၢ် တၢ်ဃူတၢ်ဖိးဒီး တၢ်သူၣ်ခုသးခုအကျဲ ကစီဒီဧါ.
