တၢ်စံးပာ်တဖၣ်လၢ ပနာ်န့ၢ်အီၤသ့
စီၤသးတီ ဆိကမိၣ်တၢ်အါမးလၢ ဘၣ်ဃးဒီး စီၤထူထူတဲအီၤန့ၣ်လီၤ. နီၢ်နီၢ်, စီၤသးတီနၢ်ဟူဘၣ်ဝဲလံာ်စီဆှံအဂ့ၢ်န့ၣ် တၢ်အံၤတမ့ၢ်အဆိကတၢၢ်တဘျီဘၣ်. ထီဘိအဝဲသ့ၣ်ညါပာ်ဝဲလၢ လံာ်အံၤမ့ၢ်လံာ်လၢအစီဆှံလီၤ. ဘၣ်ဆၣ်, ခဲအံၤအဝဲစးထီၣ်ဆိကမိၣ်ဝဲလၢ လံာ်စီဆှံမ့ၢ်ပာ်ဃုာ်ဒီး ဝံအတၢ်စံးပာ်အမ့ၢ်အတီနီၢ်နီၢ်န့ၣ် ဘၣ်သ့ၣ်သ့ၣ် လံာ်အံၤကမ့ၢ်လံာ်အစီဆှံ လၢပျၢၤတဘ့ၣ်တကးဘၣ်လီၤ. ဘၣ်ဆၣ်, အဝဲကမၢကမၣ်ဝဲလၢ စဲအ့ၣ်တၢ်ဂ့ၢ်ဒီး တၢ်စံၣ်စိၤတဲစိၤ တၢ်မၤအသးလၢအဘၣ် တုၤမုၢ်မဆါတနံၤအံၤတဖၣ်န့ၣ် ပိာ်ခွါလၢ အကွဲးလံာ်စီဆှံတဖၣ်သ့ၣ်ညါဆိပာ်ဝဲဒ်လဲၣ်န့ၣ်လီၤ. အဝဲသ့ၣ်မၤသ့ၣ်ညါဝဲဒ်လဲၣ်.
ကစၢ်ယွၤနဲၣ်လိပိာ်ခွါတဖၣ်လၢ ကကွဲးလီၤကစၢ်အတၢ်စံးပာ်လၢ ပတၢ်ကဲဘျုးအဂီၢ်
လၢခံတနံၤစီၤသးတီဒီးနီၢ်အဲၣ်ဖီ လဲၤဟးအိၣ်သကိးဝဲ စီၤထူထူဒီး နီၢ်သးဝါလီၤ. ဒီးစီၤသးတီ သံကွၢ်ဝဲတၢ်သံကွၢ်အံၤလီၤ. “ပှၤကွဲးတၢ်တဖၣ်န့ၣ် သ့ၣ်ညါဆိပာ်ဝဲ တၢ်ဂ့ၢ်ခဲလၢာ်အံၤဒ်လဲၣ်.”
စီၤထူထူတဲနၢ်ပၢၢ်ဝဲဒ်အံၤလီၤ “ပိာ်ခွါလၢအကွဲးတၢ်တဖၣ်န့ၣ် တမ့ၢ်ပှၤကွဲးတၢ်အထူအထံး မ့တမ့ၢ် ပှၤကွဲးဒုးအိၣ်ထီၣ်တၢ်ဘၣ်. အဝဲသ့ၣ်လီၤဂာ်ဒီး နဲၣ်ရွဲၣ်လၢ အကွဲးလီၤတၢ်ဂ့ၢ်လၢ ပှၤတဂၤဂၤဟ့ၣ်အီၤလီၤ. ပှၤကွဲးဒုးအိၣ်ထီၣ်လံာ်နီၢ်နီၢ်န့ၣ်မ့ၢ် ပှၤဟီၣ်ခိၣ်ဖိခဲလၢာ်အပၢ်န့ၣ်လီၤ.”
စီၤသးတီသံကွၢ်ဝဲ “ပှၤဟီၣ်ခိၣ်ဖိခဲလၢာ်အပၢ်ဧါ, အဝဲမ့ၢ်မတၤလဲၣ်.”
စီၤထူထူတဲနၢ်ပၢၢ်အီၤလၢ “အဝဲမ့ၢ်ကစၢ်လၢ ဟ့ၣ်ပှၤဟီၣ်ခိၣ်ဖိခဲလၢာ်အသးသမူလီၤ. ဒီးအဝဲလီၤဂာ်ဒ်ပၢ်ပှၤကညီအသိးဒီး အဝဲအိၣ်စ့ၢ်ကီးဒီးအမံၤလီၤ.” ထဲန့ၣ်ဒီး စီၤထူထူ အိးထီၣ်ဝဲ စံးထီၣ်ပတြၢၤ ၈၃:၁၈ လၢအလံာ်စီဆှံပူၤဒီး ဖးန့ၢ်ဝဲစီၤသးတီလီၤ.
-
“ဒီးကသ့ၣ်ညါလၢ နဲဒၣ်တဂၤဃီလၢနမံၤမ့ၢ် ယဟိဝၤန့ၣ် မ့ၢ်တၢ်ထီကတၢၢ်တဂၤလၢ ဟီၣ်ခိၣ်ဒီဘ့ၣ်ညါအဖီခိၣ်လီၤ.”
စီၤထူထူဒုးနဲၣ်ဝဲ စီၤသးတီလၢလံာ်စီဆှံအဂၤတဆၢလီၤ. တၢ်အံၤပာ်ဖျါဝဲ ယဟိဝၤဒ်ကစၢ်လၢ “ဒုးနဲၣ်တၢ်တုၤအကတၢၢ်, ဒီးလၢပျၢၤလံၤလံၤန့ၣ်တၢ်လၢ အတမၤဒံးဘၣ်အသးဘၣ်”န့ၣ်လီၤ. (ယၡါယၤ ၄၆:၁၀)ကတဲနၢ်ပၢၢ်ဝဲ လံာ်စီဆှံအဆၢအံၤအဂီၢ် စီၤထူထူစံးဝဲလၢ “ဒ်ပပၢ်ပှၤကညီန့ၣ် အိၣ်ဒီးတၢ်အိၣ်မူတၢ်လဲၤခီဖျိအါမးဒီး ညီနုၢ်သ့ၣ်ညါတၢ်အါန့ၢ်ဒံးပှၤအသိး, ပှၤဟီၣ်ခိၣ်ဖိခဲလၢာ်အပၢ် ယဟိဝၤန့ၣ် အတၢ်သ့ၣ်ညါနၢ်ပၢၢ်ဒီး တၢ်ကူၣ်ဘၣ်ကူၣ်သ့အါန့ၢ်ဒံးပှၤခဲလၢာ်ဒီး တဲဆိပာ်တၢ်လၢ ခါဆူညါဒၣ်လဲာ်သ့လီၤ. လၢတၢ်အံၤအဃိ, ကစၢ်ဒုးသ့ၣ်ညါ ပှၤကွဲးလံာ်စီဆှံတဖၣ်လၢ ခါဆူညါအဂ့ၢ်သ့န့ၣ်လီၤ.”
စီၤသးတီအဲၣ်ဒိးသ့ၣ်ညါဝဲလၢ “မ့ၢ်ယဟိဝၤသ့ၣ်ညါဆိပာ်ဝဲ အဝဲဒီးနီၢ်အဲၣ်ဖီအတၢ်အိၣ်သးလၢ ခါဆူညါန့ၣ်ဧါ” လီၤ.
စီၤထူထူတဲနၢ်ပၢၢ်ဝဲလၢ “ယဟိဝၤ တပာ်လီၤဆိပာ်ဝဲ ပှၤကညီတဂၤစုာ်စုာ် အတၢ်အိၣ်မူတၢ်ဟဲကဲထီၣ်အသးလၢခံကတၢၢ်ဘၣ်. ဘၣ်ဆၣ်, ဒ်ပၢ်တဂၤအသိး အဝဲသ့ၣ်ညါပတၢ်ကီတၢ်ခဲဒီး အဲၣ်ဒိးမၤစၢၤပှၤလီၤ.”
စီၤထူထူတဲဘၣ်စီၤသးတီလၢ လံာ်စီဆှံပူၤန့ၣ် အဝဲသ့ၣ်ဃုထံၣ်န့ၢ်ဝဲ ယွၤအတၢ်မၤစၢၤလၢ ကဒိးန့ၢ်ဘၣ်ဝဲ တၢ်သူၣ်ခုသးခုဒီး တၢ်ဃူတၢ်ဖိးလၢတၢ်အိၣ်မူပူၤသ့လီၤ. တၢ်ပာ်လီၤသးလၢအဝဲသ့ၣ်မၤဝဲန့ၣ် မုၢ်မဆါတနံၤအံၤဒီး ခါဆူညါ အဘျုးအိၣ်လၢအဝဲသ့ၣ်အဂီၢ်သ့ဒ်လဲၣ် အဂ့ၢ်န့ၣ် မၤလိဝဲသ့စ့ၢ်ကီးလီၤ.
စီၤသးတီ ဆိကမိၣ်ဝဲလၢ တၢ်ခဲလၢာ်အံၤန့ၣ်လီၤနာ်နီၢ်နီၢ်လီၤ. မ့ၢ်လၢအဝဲမ့ၢ်စ့ၢ်ကီးပၢ်တဂၤဒီး မၤတၢ်ကိးမံၤဒဲးလၢ အဖိတဖၣ်အတၢ်အိၣ်မူခါဆူညါ ကအိၣ်ဒီး တၢ်သူၣ်ခုသးခုအဂီၢ်အဃိလီၤ. စီၤထူထူအသးခုလၢ ဒုးနဲၣ်ဘၣ်ဝဲ စီၤသးတီဒီး နီၢ်အဲၣ်ဖီလၢ လံာ်စီဆှံပူၤတၢ်စံးပာ်တနီၤန့ၣ်လီၤ. တၢ်သ့ၣ်တဖၣ်အံၤန့ၣ် မ့ၢ်တၢ်တနီၤလၢစီၤထူထူဒုးနဲၣ်အဝဲသ့ၣ်န့ၣ်လီၤ.
-
“ဒုးအိၣ်ကတီၢ်တၢ်ဒုးတၢ်ယၤတဖၣ်တုၤလၢဟီၣ်ခိၣ်အကတၢၢ်လီၤ.”—စံးထီၣ်ပတြၢၤ ၄၆:၉.
-
“ဒီးကသူၣ်ဟံၣ်, ဒီးကအိၣ်ဝဲဆိးဝဲလၢအပူၤ, ဒီးကသူၣ်စပံးအလီၢ်, ဒီးကအီၣ်အတၤသၣ်လီၤ. တမၤဘၣ်ဟံၣ်ဒီးပှၤဂၤအိၣ်ဝဲဆိးဝဲလၢအပူၤဘၣ်. တသူၣ်ဘၣ်တၢ်ဒီးပှၤဂၤအီၣ်အတၤသၣ်ဘၣ်. အဂ့ၢ်ဒ်အံၤ, ဒ်သ့ၣ်တထံးအမုၢ်နံၤအသိးန့ၣ် ယပှၤဂီၢ်မုၢ်အမုၢ်နံၤကအိၣ်လီၤ.”—ယၡါယၤ ၆၅:၂၁, ၂၂.
-
“ဘုတစှီၤကအိၣ်လၢဟီၣ်ခိၣ်အပူၤ လၢကစၢၢ်ခိၣ်, ဒီးအသၣ်ကဟူးဝးဒ် လဘၤနိၣ်အသိးန့ၣ်လီၤ.”—စံးထီၣ်ပတြၢၤ ၇၂:၁၆.
-
“ဒီးယွၤကထွါကွံာ်အမဲာ်ထံခဲလၢာ်လၢအမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသးတအိၣ်လၢၤဘၣ်. အဂ့ၢ်ဒ်အံၤ, တၢ်အိၣ်လၢအခီၣ်ထံးတဖၣ်ပူၤကွံာ်လံ.”—လီၣ်ဖျါ ၂၁:၄.
လံာ်စီဆှံပာ်ဖျါဝဲ ဘၣ်ဃးဒီးခါဆူညါ လၢအလီၤကမၢကမၣ်လၢ အအိၣ်ခိးပှၤအဂ့ၢ်
စီၤသးတီ အသူၣ်ပိၢ်သးဝးခီဖျိလၢ လံာ်စီဆှံပူၤတၢ်စံးပာ်လၢ အလီၤကမၢကမၣ်တဖၣ်အံၤအဃိလီၤ. အဝဲဘၣ်သူၣ်ဘၣ်သးဝဲနီၢ်နီၢ် လၢပှၤခဲလၢာ် ကဘၣ်တၢ်မၤအီၤတီတီလိၤလိၤ, တၢ်ဆူးတၢ်ဆါဒီး တၢ်သံတအိၣ်နီတတီၤလၢၤ ဒီးတၢ်အီၣ်တၢ်အီကအိၣ်အါအါဂီၢ်ဂီၢ်လၢ ပှၤကိးဂၤဒဲးအဂီၢ်လီၤ. နီၢ်အဲၣ်ဖီစ့ၢ်ကီး ဘၣ်သူၣ်ဘၣ်သးဝဲ ဘၣ်ဆၣ်, ကဘၣ်နာ်ဝဲကီကီလီၤ.
စီၤထူထူစံးဝဲ “နီၢ်အဲၣ်ဖီဧၢ, နသးပူၤမၤအသးဒ်လဲၣ်န့ၣ် ယနၢ်ပၢၢ်ယဲဂ့ၤဂ့ၤလီၤ. ဘၣ်ဆၣ်, ဆိကမိၣ်တၢ်ဂ့ၢ်အံၤတက့ၢ်. ပထံၣ်ဘၣ်လၢ ဝံအတၢ်စံးပာ်လၢ လံာ်စီဆှံပူၤအါမးတဖၣ်န့ၣ် လၢပှဲၤတ့ၢ်လံလီၤ. တၢ်သ့ၣ်တဖၣ်အံၤ တဒုးနာ်န့ၢ်ပှၤလၢ တၢ်စံးပာ်တဖၣ်အံၤစ့ၢ်ကီးကဟဲလၢပှဲၤထီၣ်ဘၣ်ဧါ. နီၢ်နီၢ်, တၢ်တဖၣ်အံၤကဟဲလၢပှဲၤထီၣ်နီၢ်နီၢ်န့ၣ် ပှၤကွဲးဒုးအိၣ်ထီၣ်လံာ်စီဆှံအုၣ်ကီၤဝဲလၢ တၢ်ကတိၤတဖၣ်အံၤလီၤ– ‘ကွဲးတၢ်တက့ၢ်. အဂ့ၢ်ဒ်အံၤ, တၢ်ကတိၤအံၤမ့ၢ်အမ့ၢ်အတီ, ဒီးအကလုၢ်တီလီၤ.’”—လီၣ်ဖျါ ၂၁:၅.
တၢ်ဂ့ၤအဂၤလၢ နကဘၣ်သး
လံာ်စီဆှံ အတၢ်သိၣ်လိလၢ အရ့ဒိၣ်တဖၣ်
လံာ်စီဆှံန့ၣ် အမ့ၢ်အတီဧါ
ကစၢ်ယွၤ မ့ၢ်ဒုးအိၣ်ထီၣ်ဝဲ လံာ်စီဆှံ သၢပျၢၤန့ၣ် လံာ်အံၤ ကလီၤဆီန့ၢ်ဒံး လံာ်အဂၤတဖၣ်လီၤ.
