ယွၤလၢအပှဲၤဒီးတၢ်ကူၣ်ဘၣ်ကူၣ်သ့ဒီး တၢ်စိတၢ်ကမီၤ
စီၤထူထူတဲနၢ်ပၢၢ်ဝဲလၢ ယွၤမၤကဲထီၣ်တၢ်တဖၣ်န့ၣ် ပာ်ဖျါစ့ၢ်ကီးဝဲယွၤအတၢ်ဂ့ၤတၢ်ဝါအဂၤတနီၤလီၤ. အဝဲဖးန့ၢ်ဝဲ စီၤသးတီဒီးနီၢ်အဲၣ်ဖီလၢ လံာ်စီဆှံအဆၢလၢအလီၤသးစဲအံၤလီၤ.
-
“နမၤတၢ်ဆံးအါလဲၣ်, ယွၤဧၢ. နမၤအီၤခဲလၢာ်လၢတၢ်ကူၣ်သ့လီၤ. ဟီၣ်ခိၣ်ပှဲၤဝဲဒီးနတၢ်ဖိတၢ်လံၤလီၤ.”—စံးထီၣ်ပတြၢၤ ၁၀၄:၂၄.
စီၤထူထူစံးဝဲ “တၢ်ဖိဃၢ်ပြံကဒံဖိဒၣ်လဲာ် ဒုးနဲၣ်ပှၤတၢ်တမံၤမံၤလၢ ဘၣ်ဃးဒီးယဟိဝၤယွၤအတၢ်ကူၣ်ဘၣ်ကူၣ်သ့လီၤ. အဒိ, လံာ်စီဆှံစံးဝဲဘၣ်ဃးဒီး တၢၢ်အတၢ်ကူၣ်ဘၣ်ကူၣ်သ့လၢန့ဆၢၣ်ဟ့ၣ်အီၤန့ၣ်လီၤ.”
စီၤထူထူဒုးသ့ၣ်နီၣ်က့ၤဝဲ စီၤသးတီလၢ ညီနုၢ်အဝဲသ့ၣ်ထံၣ်ဘၣ်ဝဲ တၢၢ်တဖၣ်အတၢ်မၤအါလၢ အ့ၣ်တဲာ်ဝဲသ့ၣ်လၣ်တဖၣ် လၢကစိာ်နုာ်ဝဲဆူအထၢပူၤအဂီၢ်လီၤ. ကဘၣ်မၤဝဲဒ်အံၤန့ၣ် အဝဲသ့ၣ် သ့ၣ်ညါဝဲဒ်လဲၣ်. ပှၤကွဲးလံာ်စီဆှံတဂၤတဲနၢ်ပၢၢ်ဝဲလၢ တၢၢ်န့ၣ်အိၣ်ဒီး “တၢ်ကူၣ်ဘၣ်ကူၣ်သ့ ဒိၣ်ဒိၣ်ကလဲာ်” လီၤ. မ့မ့ၢ်ဒ်န့ၣ်ဒီး, မတၤဒုးအိၣ်ထီၣ်တၢၢ်လဲၣ်. မတၤထၢနုာ်တၢ်ကူၣ်ဘၣ်ကူၣ်သ့လၢန့ဆၢၣ်ဟ့ၣ်အီၤအံၤဆူ တၢၢ်အပူၤလဲၣ်. လံာ်စီဆှံစံးဆၢဝဲလၢ မ့ၢ်ဒၣ် ယဟိဝၤ, ကစၢ်လၢအမၤကဲထီၣ်မူခိၣ်ဒီးဟီၣ်ခိၣ်လီၤ.—ကတိၤဒိ ၃၀:၂၄, ၂၅.
တၢ်ကူၣ်ဘၣ်ကူၣ်သ့လၢန့ဆၢၣ်ဟ့ၣ်အီၤန့ၣ် တဟဲကဲထီၣ်လၢ တၢ်ဘၣ်ဖုးဘၣ်ပျီၢ်အဃိဘၣ်
စီၤသးတီစံးဆၢဝဲလၢ “ယအၢၣ်လီၤတူၢ်လိာ်လၢ တၢ်ဘၣ်တ့လၢအိၣ်ဒီးတၢ်ကူၣ်ဘၣ်ကူၣ်သ့လၢန့ဆၢၣ်ဟ့ၣ်အီၤတဖၣ်အံၤ အတၢ်ဘၣ်တ့ကစၢ်ကဘၣ်အိၣ်ဝဲလီၤ.”
လၢခံစီၤထူထူစံးဝဲတၢ်တမံၤလၢ အထုးန့ၢ်စီၤသးတီဒီးနီၢ်အဲၣ်ဖီအသးဒိၣ်မးန့ၣ်လီၤ. စံးဝဲ “ပတၢ်အိၣ်မူ သန့ၤထီၣ်အသးလၢ ယဟိဝၤအတၢ်ကူၣ်ဘၣ်ကူၣ်သ့အဖီခိၣ်န့ၣ် သုသ့ၣ်ညါကစီဒီဧါ.” အဝဲသ့ၣ်ဆိကမိၣ်ဝဲလၢ တၢ်အံၤမ့ၢ်သ့ဒ်လဲၣ်န့ၣ်လီၤ.
ဟီၣ်ခိၣ်တရံးအသးလၢအကျံၣ်လိၤန့ၣ် ဒုးမူကဒီးသးသမူတဖၣ်လီၤ
စီၤထူထူတဲနၢ်ပၢၢ်ဝဲလၢ တၢ်အိၣ်အသးလၢ ဟီၣ်ခိၣ်လိၤတဖၣ်န့ၣ် မ့ၢ်တၢ်အဂ့ၤကတၢၢ်လၢ သးသမူတဖၣ် ကမူဝဲအဂီၢ်လီၤ. တၢ်အချ့လၢဟီၣ်ခိၣ်တရံးအသးလၢ အကျံၣ်လိၤဒီး တၢ်အချ့လၢ ဟီၣ်ခိၣ်အတၢ်လဲၤတရံးမုၢ်လၢ မူဖျၢၣ်အကျိၤအဃိ မုၢ်အဂံၢ်သဟီၣ်န့ၣ် ရၤလီၤအသးလၢ ဟီၣ်ခိၣ်လိၤလၢကျဲအဂ့ၤကတၢၢ်လီၤ. တၢ်ထုးဃၢန့ၣ် ပၢၤဃာ်ဝဲ ကလံၤလၢအဝးတရံးဟီၣ်ခိၣ် လၢပာ်ဃုာ်ဒီးဂာ်သဝံလၢ ကျဲၣ်ကျီအသးလီၤတံၢ်လီၤဆဲးတဖၣ်အံၤ သုတဖျိးထီၣ်ကွံာ်အဂီၢ်လီၤ. ဘၣ်ဆၣ်, တၢ်ထုးဃၢအံၤ တဆူၣ်တုၤဒၣ်လဲာ်လၢ ပဟူးဂဲၤတသ့န့ၣ်ဘၣ်. သးသမူတဖၣ်ကမူကဒီးအဂီၢ် လိၣ်ဘၣ်ဝဲ ထံစ့ၢ်ကီးအိၣ်ဝဲလီၤ. ဟီၣ်ခိၣ်ညၣ်ထ့ၣ်န့ၣ် ပှဲၤဒီးတၢ်န့ၢ်ဂံၢ်န့ၢ်ဘါလၢ အဃါဃုာ်ညီဒီးထံလၢ တၢ်မုၢ်တၢ်ဘိတဖၣ် ကစူၢ်သံးဝဲဒီးကသူဝဲအဂီၢ်လီၤ.
စီၤထူထူစံးဝဲလၢ “ယနာ်သပှၢ်ကတၢၢ်လၢ တၢ်ခဲလၢာ်တဖၣ်အံၤ တဟဲကဲထီၣ်အသးခီဖျိလၢ တၢ်မၤအသးဘၣ်ဖုးဘၣ်ပျီၢ်အဃိဘၣ်လီၤ. ယနာ်လၢ သးသမူတဖၣ်ကမူအဂီၢ်တၢ်လၢအလိၣ်ခဲလၢာ်န့ၣ် ယဟိဝၤယွၤ, လၢအမ့ၢ်တၢ်ကူၣ်ဘၣ်ကူၣ်သ့လၢ အကတၢၢ်တအိၣ်အဂံၢ်ခီၣ်ထံး,အံၤ မၤဝဲလီၤ.”
စီၤသးတီဒီးနီၢ်အဲၣ်ဖီ ကျၢၢ်ကျာ်အခိၣ်လၢ တၢ်သးလီၤပလိာ်လီၤ.
စီၤထူထူတဲဖျါထီၣ်ကဒီး ယွၤအတၢ်ဂ့ၤတၢ်ဝါအဂၤလၢအမ့ၢ်တၢ်စိတၢ်ကမီၤ လၢအထုးန့ၢ်ကဒီးအဝဲသ့ၣ်လီၤ. စီၤသးတီအဲၣ်ဒိးသ့ၣ်ညါဝဲ ဘၣ်ဃးဒီးယဟိဝၤအစိကမီၤန့ၣ် လံာ်စီဆှံပာ်ဖျါဝဲတၢ်မနုၤလဲၣ်န့ၣ်လီၤ. စီၤထူထူအိးထီၣ်လံာ်စီဆှံဒီး ဖးန့ၢ်အီၤလၢအဆၢဖိအံၤလီၤ.
-
“ကစၢ်ယွၤ[ယဟိဝၤ]ဧၢ, ကွၢ်ကွၢ်, နတ့လီၤဟီၣ်ခိၣ်ဒီးမူခိၣ်လၢနစိဒိၣ်နကမီၤထီ, ဒီးလၢနစုယူာ်ထီၣ်အသးလီၤ.”—ယံးရမံယၤ ၃၂:၁၇.
စီၤထူထူစံးဝဲ “ပသ့ၣ်ညါဘၣ် ယဟိဝၤအစိကမီၤအဒိၣ်အမုၢ်အံၤခီဖျိလၢ တၢ်ဆိကမိၣ်ကွၢ် မုၢ်အသဟီၣ်န့ၣ်လီၤ. ဖဲမူခိၣ်ကဆှီအနံၤ နလဲၤဂဲၤဆၢထၢၣ်လၢတၢ်ကိၢ်ကျါအခါ နတူၢ်ဘၣ်မုၢ်အတၢ်ကိၢ်တမ့ၢ်ဘၣ်ဧါ. မုၢ်အသဟီၣ်ဆူၣ်ထဲလဲၣ်န့ၣ် နဆိကမိၣ်ကွၢ်ဘၣ်ဧါ.”
စီၤသးတီစံးဆၢဝဲလၢ “ယကနၢ်ကွၢ်ဖဲအံၤန့ၣ် တၢ်ကိၢ်ဆူၣ်ဒိၣ်မးဖဲ တချုးတၢ်စူၤလီၤသီအဆၢကတီၢ်လီၤ.” ဒီးနီၢ်အဲၣ်ဖီစ့ၢ်ကီးအၢၣ်လီၤတူၢ်လိာ်ဝဲလီၤ.
ပှၤလၢအဒုးအိၣ်ထီၣ်မုၢ်န့ၣ် အစိကမီၤကဒိၣ်ဆံးဒိၣ်လဲၣ်
စီၤထူထူစံးဘၣ်အဝဲသ့ၣ်လၢ အဝဲဖးဘၣ်ဝဲလၢ မုၢ်အသးကံၢ်ပူၤန့ၣ် တၢ်ကိၢ်အနီၣ်ဂံၢ် အိၣ်ဝဲ ၂၇ ကကွဲၢ် ဒံၢ်ကရံၣ်ဖၣ်ရံၣ်ဟးထ်ဃၣ်ဃၣ်လီၤ. နဟံးန့ၢ်မုၢ်အသးကံၢ်ပူၤအက့ဖိထဲသိးဒီး ထးဘျးအခိၣ်စိးဖိမ့ၢ်သ့ဒီး မ့ၢ်ပာ်အီၤလၢ ဟီၣ်ခိၣ်လိၤန့ၣ်, နမ့ၢ်အိၣ်စီၤစူၤဒီးတၢ်ကိၢ်မိၢ်ပှၢ်ဆံးဆံးဖိအံၤအမံးလာ် ၁၀၀ ဃၣ်ဃၣ်ဒၣ်လဲာ် နအိၣ်ဆၢထၢၣ်လၢ အပူၤဖျဲးဒီးတၢ်ဘၣ်ယိၣ်တသ့ဘၣ်. စဲးကီာ် (second) ကိးစဲးကီာ်ဒဲးန့ၣ် မုၢ်ထုးထီၣ်ဝဲအဂံၢ်သဟီၣ်ပှဲၤသိးဒီး နူကျံာ်မ့ၣ်ပိၢ်အကကွဲၢ်လၢအကယၤတဖၣ် အတၢ်ပိၢ်ဖးလီၤ.
စီၤထူထူစံးကဒီးဝဲ “မုၢ်မ့ၢ်အိၣ်ဒီးအသဟီၣ်လီၤဘီလီၤမုၢ်ဒ်သိးအံၤန့ၣ်, ပှၤလၢအမၤကဲထီၣ်မုၢ်အံၤအစိကမီၤကအိၣ်ထဲလဲၣ်. ကစၢ်အစိကမီၤဒိၣ်ထဲလဲၣ်န့ၣ် ပဆိကမိၣ်ဒၣ်လဲာ်တဘၣ်ဘၣ်. ဖဲပကွၢ်ထံကွၢ်ဆးမုၢ်အခါ, ပထံၣ်ဘၣ် တၢ်အုၣ်အသးတဆံးတက့ၢ်လၢ ဘၣ်ဃးတၢ်ဘၣ်တ့ကစၢ် ယဟိဝၤ အစိကမီၤလၢ အကတၢၢ်တအိၣ်ဘၣ်လီၤ.”
စီၤသးတီဒီးနီၢ်အဲၣ်ဖီအသးလီၤပလိာ်ဒီးစီၤထူထူလၢ တၢ်လီၤကမၢကမၣ်ခဲလၢာ်န့ၣ် တမ့ၢ်ဟဲကဲထီၣ်လၢ တၢ်ဘၣ်ဖုးဘၣ်ပျီၢ်အဃိဘၣ်. တၢ်ဘၣ်တ့ကစၢ်ကဘၣ်အိၣ်ဝဲလီၤ. အဝဲသ့ၣ်နၢ်ပၢၢ်ထီၣ်ဝဲလၢ တၢ်ဘၣ်တ့ကစၢ်, ယဟိဝၤန့ၣ်မ့ၢ်ပှၤနီၢ်သးလၢတၢ်ထံၣ်အီၤတသ့သနာ်က့ ကစၢ်မ့ၢ်ပှၤနီၢ်နီၢ်လၢပာ်ဖျါ တၢ်အဲၣ်အလၢအပှဲၤ, တၢ်တီတၢ်လိၤ, တၢ်ကူၣ်ဘၣ်ကူၣ်သ့, ဒီးတၢ်စိတၢ်ကမီၤလၢတၢ်လၢမၤဝဲကိးမံၤဒဲးအပူၤလီၤ.
တၢ်ဂ့ၤအဂၤလၢ နကဘၣ်သး
လံာ်စီဆှံ အတၢ်သိၣ်လိလၢ အရ့ဒိၣ်တဖၣ်
ဘၣ်မနုၤအဃိ ကစၢ်ယွၤတ့လီၤဟီၣ်ခိၣ်လဲၣ်.
ဟီၣ်ခိၣ်လၢပအိၣ်အံၤ ပှဲၤဝဲဒီးတၢ်ဃံတၢ်လၤလီၤ. ကစၢ်ယွၤပာ်လီၤဝဲဟီၣ်ခိၣ်ဒီး မုၢ်အတၢ်ဒ့ၣ်စၢၤန့ၣ် တယံၤတလၢ ဒီးတဘူးတလၢဘၣ်. ဒီးယွၤဒုးဒ့ခံဝဲဟီၣ်ခိၣ်အံၤ ဖဲအကြၢးအဘၣ်. ဒီးဟီၣ်ခိၣ်အံၤ တရံးဝဲမုၢ်န့ၣ် တချ့တလၢ ဒီးတကဘှၢတလၢ စ့ၢ်ကီးဘၣ်. ဘၣ်မနုၤအဃိ ကစၢ်ယွၤ တ့လီၤဝဲဟီၣ်ခိၣ်အံၤ ဂ့ၤထဲအံၤညါလဲၣ်.
