ယဟိဝၤ​ယွၤ​တ့လီၤ ပိာ်မုၣ်​အဆိ​ကတၢၢ်​တဂၤန့ၣ်​ အ​ကဲ​ဝဲ​နီၢ်​အံၣ်အု. ဒီး​ကစၢ်ယွၤ​ဟ့ၣ်လီၤ နီၢ်​အံၣ်အု​လၢ စီၤ​အၤဒၣ်​အအိၣ်​ ဒ်သိး​အဝဲသ့ၣ်​ က​ကဲထီၣ်​ဒီမိၢ်ဝၤ.—၁ မိၤၡ့ ၂:၂၁, ၂၂.

အ​ခီၣ်ထံးခါ ဖဲ​ယဟိဝၤ​ယွၤ​တ့လီၤ နီၢ်​အံၣ်အု​ဒီး​စီၤ​အၤဒၣ်​ အဆၢ​ကတီၢ်န့ၣ်​ အဝဲသ့ၣ်​အ​တၢ်ဆိကမိၣ်​ ဒီး​အ​နီၢ်ခိ​န့ၣ်​ လၢပှဲၤ​ဝဲ.

အဝဲသ့ၣ်​ အိၣ်​ဝဲ​လၢ ဧ့ၤဒ့ၣ်​တၤသၣ်​အလီၢ်.တၢ်လီၢ်​တတီၤအံၤ ဃံလၤ​ဝဲ​ဒိၣ်မး, အိၣ်ဒီး​ထံကျိ​တဖၣ်​ ဒီး​သ့ၣ်ထူၣ်​လၢ အအိၣ်​ဒီး​အသၣ်​တဖၣ်​ ဒီး​ဆၣ်ဖိ​ကီၢ်ဖိ​တဖၣ်​ အိၣ်​ဝဲ​ဒီဒူၣ်. တၢ်လီၢ်​အံၤ ကဲဝဲ ပၤရဒံစူး.

ယဟိဝၤ​ယွၤ တဲ​တၢ်ဒီး​အဝဲသ့ၣ်​ ဒီး​သိၣ်လိ​အဝဲသ့ၣ်​လီၤ. အဝဲသ့ၣ်​မ့ၢ်​ဒိကနၣ်​ ယဟိဝၤ​ယွၤ​အကလုၢ်​န့ၣ်​ အဝဲသ့ၣ်​ ကအိၣ်မူဘၣ်ဝဲ လီၤထူ​လီၤယိာ်​လၢ ဟီၣ်ခိၣ်​ပၤရဒံစူး​အပူၤ.

လၢခံ မူခိၣ်​ကလူး​တဂၤ ထီဒါ ကစၢ်​ယွၤ. မူခိၣ်​ကလူး​လၢ အအၢ​အသီ​တဂၤအံၤ ကဲဝဲ မုၣ်ကီၤလံၢ်.

ယဟိဝၤ​ယွၤ ဒုးနဲၣ်​နီၢ်​အံၣ်အု​ဒီး​စီၤ​အၤဒၣ်​လၢ သ့ၣ်​တထူၣ်​လၢ တၤသၣ်လီၢ်​အ​ပူၤ ဒီး​တဲ​ဘၣ်​အဝဲသ့ၣ်​လၢ သု​မ့ၢ်​အီၣ်​သ့ၣ်​တထူၣ်​အံၤ​အသၣ်​န့ၣ်​ သု​က​သံ.

မုၣ်ကီၤလံၢ် တ​အဲၣ်ဒိး​လၢ နီၢ်​အံၣ်အု​ဒီး​စီၤ​အၤဒၣ်​ ကဒိကနၣ်​ ယဟိဝၤ​ယွၤ အကလုၢ်ဘၣ်. အဃိ အ​ဝဲ​သူ ဂုၢ်​တဘိ​လၢ က​တဲ​နီၢ်​အံၣ်အု​လၢ န​မ့ၢ်​အီၣ်​သ့ၣ်​တထူၣ်​အံၤ​အသၣ်န့ၣ်​ န​တသံဘၣ်​ ဒီး​န​က​လီၤဂာ်​ဒ်သိးဒီး ကစၢ်​ယွၤ. နီၢ်ကီၢ်န့ၣ်​ တၢ်​ကတိၤ​တဖၣ်အံၤ ကဲဝဲ တၢ်လံၣ်​တၢ်လီ.—၁ မိၤၡ့ ၃:၁-၅.