တၢ်မၤလိ ၁၆
“ဟဲလၢ ကီၢ်မၤက့းဒနံ”
ခီဖျိလၢ စီၤပီလူး ဒီးအသကိးတဖၣ် တူၢ်လိာ်ဝဲမူဒါ ဒီးအိၣ်ဒီး တၢ်တူၢ်န့ၢ်ခီၣ်ကဲအဃိ ပှၤအါဂၤ ဒိးန့ၢ်ဘၣ်အဘျုး
တၢ်ဂ့ၢ်ဒိးသန့ၤထီၣ်သးလၢ မၤတၢ် ၁၆:၆-၄၀
၁-၃. (က) သးစီဆှံ ဟံးစုနဲၣ်ကျဲဝဲ စီၤပီလူး ဒီးအသကိးတဖၣ်ဒ်လဲၣ်. (ခ) လၢတၢ်မၤလိတခါအံၤ ပကတဲသကိး တၢ်ဂ့ၢ်မနုၤလဲၣ်.
ပိာ်မုၣ်တဒူၣ် ဟးထီၣ်ဝဲလၢ ဝ့ၢ်ဖံလံးပံၤ လၢအအိၣ်လၢ မၤက့းဒနံ အဟီၣ်ကဝီၤအပူၤ. ဒီးလၢခံတယံာ်ဘၣ်န့ၣ် အဝဲသ့ၣ် လဲၤတုၤလၢ ထံကျိကၤခံဒဲး. ညီနုၢ်န့ၣ် အဝဲသ့ၣ်လဲၤဆ့ၣ်နီၤလၢ ထံကျိကၢၢ်နံၤ ဒီးဃ့ထုကဖၣ်လၢ အံၣ်စရ့လး အကစၢ် ယဟိဝၤယွၤအအိၣ်. တၢ်လၢ အဝဲသ့ၣ် မၤဝဲန့ၣ် ယဟိဝၤယွၤထံၣ်ဝဲ.—၂ ကွဲး ၁၆:၉; စံး ၆၅:၂.
၂ ဖဲန့ၣ်အဆၢကတီၢ် ပိာ်ခွါတဒူၣ် ဟးထီၣ်ဝဲလၢ ဝ့ၢ်လူစတြၤ လၢအအိၣ်လၢ ကလံၤထံးတခီ ဒီးအယံၤဒီး ဝ့ၢ်ဖံလံးပံၤ အမံးလာ် ၅၀၀ ဘျဲၣ် (၈၀၀ ကံလိမံထၢၣ်). လၢခံစှၤကိာ်သီန့ၣ် အဝဲသ့ၣ်လဲၤတုၤလၢ ရိမ့ၤအကျဲမုၢ်ခိၣ် လၢအလဲၤလၢ မုၢ်နုာ်တကပၤ ဖဲတၢ်လီၢ်လၢ ပှၤအိၣ်ဝဲအါကတၢၢ်အလီၢ် လၢအၤစံကီၢ်ရ့ၣ်အပူၤ. ပှၤပိာ်ခွါတဖၣ်အံၤ မ့ၢ်ဝဲ စီၤပီလူး, စီၤစံလၤ ဒီးစီၤတံၤမသ့း. အဝဲသ့ၣ် ဘၣ်သးတဲဘၣ်ပှၤအါဂၤ ဘၣ်ဃးဒီး ယ့ၣ်ၡူးခရံာ်အဂ့ၢ်အဃိ အဝဲသ့ၣ် သးဆူၣ်ဒိၣ်မး လၢကလဲၤဝဲလၢ ဝ့ၢ်အ့းဖ့းစူး ဒီးဝ့ၢ်အဂၤတဖၣ်. ဘၣ်ဆၣ် တချုးလၢ အဝဲသ့ၣ် စးထီၣ်အတၢ်လဲၤဒံးဘၣ်န့ၣ် ကစၢ်ယွၤ အသးစီဆှံ တြီအဝဲသ့ၣ်. ဒီးသးစီဆှံ တြီအဝဲသ့ၣ်ဒ်လဲၣ်န့ၣ် လံာ်စီဆှံ တပာ်ဖျါထီၣ်ဝဲဘၣ်. ဘၣ်မနုၤအဃိ ကစၢ်ယွၤ အသးစီဆှံ တပျဲအဝဲသ့ၣ် လဲၤစံၣ်တဲၤတဲလီၤတၢ်လၢ အၤစံကီၢ်ရ့ၣ်အပူၤဘၣ်လဲၣ်. ခီဖျိလၢ ယ့ၣ်ၡူးသူဝဲ ကစၢ်ယွၤ အသးစီဆှံ ဒ်သိး အကဟံးစုနဲၣ်ကျဲ စီၤပီလူး ဒီးအသကိးတဖၣ်အဃိ. ဒီးယ့ၣ်ၡူးအဲၣ်ဒိးလၢ အဝဲသ့ၣ်ကလဲၤလၢ အ့ၡၢၣ် မဲနၢၤ တကပၤ, လဲၤခီဂာ် ပီၣ်လဲၣ် အ့ကၠံၤအဲၤ ဒီးလဲၤလၢထံကျိကၤခံဒဲး အထံကၢၢ်နံၤ.
၃ ဖဲပဆိကမိၣ် ဘၣ်ဃးဒီး ယ့ၣ်ၡူး ဟံးစုနဲၣ်ကျဲဝဲ စီၤပီလူး ဒီးအသကိးတဖၣ် အတၢ်လဲၤလၢ ကီၢ်မၤက့းဒနံအခါ ပဟံန့ၢ်တၢ်မၤလိ အရ့ဒိၣ်တနီၤသ့. အဃိ ပကတဲသကိး တၢ်ကဲထီၣ်သးတနီၤ ဖဲစီၤပီလူးလဲၤဝဲ မံၤၡၢၤနရံၤ အတၢ်လဲၤ ခံဘျီတဘျီ လၢအကဘၣ်ဝဲဖဲ ခ.န ၄၉ အဆၢကတီၢ်.
“ကစၢ်ယွၤကိးဃီၤပှၤ” (မၤတၢ် ၁၆:၆-၁၅)
၄, ၅. (က) ဖဲစီၤပီလူး ဒီးအသကိးတဖၣ် လဲၤဘူးကတုၤလၢ ဘံၤသူၤနံအခါ တၢ်ကဲထီၣ်သးဒ်လဲၣ်. (ခ) စီၤပီလူး ဒီးအသကိးတဖၣ် ဆၢတဲာ်တၢ်ဒ်လဲၣ် ဒီးလၢခံ အဝဲသ့ၣ် ဒိးန့ၢ်ဘၣ်အဘျုးဒ်လဲၣ်.
၄ ကစၢ်ယွၤအသးစီဆှံ တပျဲဝဲလၢ စီၤပီလူး ဒီးအသကိးတဖၣ် ကလဲၤစံၣ်တဲၤတဲလီၤတၢ်လၢ အၤစံကီၢ်ရ့ၣ်အပူၤဘၣ်. အဃိ ဒ်သိးအဝဲသ့ၣ် ကစံၣ်တဲၤတဲလီၤဘၣ် ဝ့ၢ်တဖၣ်လၢ အအိၣ်လၢ ဘံၤသူၤနံအပူၤအဂီၢ် အဝဲသ့ၣ်လဲၤကဒါလၢ ကလံၤစိးတကပၤ. ဖဲအဝဲသ့ၣ် လဲၤကျဲလၢ ကီၢ်ဖြူၤကံ ဒီးကီၢ်ကလၤတံ အဘၢၣ်စၢၤအခါ အဝဲသ့ၣ်ဘၣ်လဲၤခီဂာ်ဝဲ ကျဲလၢဟီၣ်ခိၣ်ကမူၣ်အိၣ်အါ ဒီးတၢ်လီၢ်တဖၣ်န့ၣ် ပှၤကညီတအိၣ်အါအါဘၣ်. ဘၣ်ဆၣ် ဖဲအဝဲသ့ၣ်လဲၤ ဘူးကတုၤလၢ ဘံၤသူနံၤအခါ ယ့ၣ်ၡူး တပျဲအဝဲသ့ၣ်လဲၤဖဲန့ၣ်စ့ၢ်ကီးဘၣ်. (မၤတၢ် ၁၆:၆, ၇) ဖဲန့ၣ်အခါ အဝဲသ့ၣ် ကဘၣ်မၤဒ်လဲၣ်န့ၣ် တသ့ၣ်ညါဝဲဘၣ်. အဝဲသ့ၣ် သ့ၣ်ညါဝဲလၢ အကဘၣ် စံၣ်တဲၤတဲလီၤ တၢ်ဂ့ၢ်မနုၤလဲၣ် ဒီးကဘၣ် စံၣ်တဲၤတဲလီၤတၢ်ဒ်လဲၣ်, ဘၣ်ဆၣ် အဝဲသ့ၣ်ကဘၣ် လဲၤစံၣ်တဲၤတဲလီၤတၢ် ဖဲလဲၣ်န့ၣ် တသ့ၣ်ညါဝဲဘၣ်. အဝဲသ့ၣ်ကျဲးစၢး လဲၤစံၣ်တဲၤတဲလီၤတၢ်လၢ အၤစံကီၢ်ရ့ၣ် ဘၣ်ဆၣ် ကျဲတအိးထီၣ်လၢ အဝဲသ့ၣ်အဂီၢ်ဘၣ်. ဒီးအဝဲသ့ၣ်ကျဲးစၢး လဲၤစံၣ်တဲၤတဲလီၤတၢ်ကဒီး လၢဘံၤသူၤနံ သနာ်က့ ကျဲတအိးထီၣ်လၢ အဝဲသ့ၣ်အဂီၢ်ဘၣ်. ဘၣ်ဆၣ် စီၤပီလူး ပာ်လီၤအသးလၢ အကဆဲးလဲၤဝဲတုၤလၢ အထံၣ်န့ၢ်တၢ်လီၢ်လၢ အကစံၣ်တဲၤတဲလီၤဘၣ်တၢ်. စီၤပီလူး ပာ်လီၤအသးလၢ အကဆဲးလဲၤတၢ်န့ၣ် ဖျါလၢ အတဘၣ်ဘၣ်. ဘၣ်ဆၣ် အဆၢတဲာ်လီၤအသးဝံၤဒီး အဝဲသ့ၣ် လဲၤကဒါလၢမုၢ်နုာ်တခီ ဒီးလဲၤခီဂာ်ဝဲ ဝ့ၢ်တဖျၢၣ်ဘၣ်တဖျၢၣ် တုၤလီၤလၢ ဝ့ၢ်တြိၤအါ လၢအဘူးဒီး ကီၢ်မၤက့းဒနံ. အဃိ အဝဲသ့ၣ် ဘၣ်ဟးဝဲယံၤ အမံးလာ် ၃၅၀ (၅၅၀ ကံလိမံထၢၣ်) ညါ. (မၤတၢ် ၁၆:၈) စီၤပီလူးကျဲးစၢး စံၣ်တဲၤတဲလီၤတၢ်လၢ တၢ်လီၢ်သၢတီၤတတီၤ ဒီးခဲအံၤန့ၣ် ယ့ၣ်ၡူးပျဲဝဲလၢ အကစံၣ်တဲၤတဲလီၤတၢ်ဖဲန့ၣ်.
၅ ဖဲစီၤပီလူး ဒီးအသကိးတဖၣ် လဲၤလၢ ဝ့ၢ်တြိၤအါအခါ စီၤလူၤကၣ် လဲၤဒီးအဝဲသ့ၣ်စ့ၢ်ကီး. အဃိ စီၤလူၤကၣ် ကွဲးဖျါထီၣ် တၢ်ကဲထီၣ်သး ဒီးအတဲဝဲလၢ “ဖဲမုၢ်နၤခီန့ၣ် စီၤပီလူးထံၣ်ဝဲ တၢ်ထံၣ်လၢညါခီလၢ ပှၤမၤက့းဒနံခွါတဂၤ ဆၢထၢၣ် ဃ့ကညးအီၤလၢ ‘ဟဲလၢ ကီၢ်မၤက့းဒနံအပူၤ ဒီးမၤစၢၤပှၤမီၤ.’ မ့ၢ်လၢ ပနၢ်ပၢၢ်ထီၣ်လၢ ကစၢ်ယွၤကိးဃီၤပှၤ ဒ်သိးပကလဲၤ စံၣ်တဲၤတဲလီၤ အဝဲသ့ၣ်လၢ တၢ်သးခုကစီၣ် အဃိ ဖဲစီၤပီလူးထံၣ် တၢ်ထံၣ်လၢညါခီ ဝံၤတဘျီဃီန့ၣ် ပလဲၤလၢ ကီၢ်မၤက့းဒနံ.” a (မၤတၢ် ၁၆:၉, ၁၀) ခဲအံၤ စီၤပီလူးအကဘၣ် လဲၤစံၣ်တဲၤတဲလီၤတၢ် ဖဲလဲၣ်န့ၣ် အသ့ၣ်ညါဝဲလံ. စီၤပီလူး တပတုာ်အတၢ်လဲၤဘၣ် ဒီးအဆဲးလဲၤတၢ် တုၤအထံၣ်န့ၢ်တၢ်လီၢ် လၢအကစံၣ်တဲၤတဲလီၤဘၣ် တၢ်သးခုကစီၣ်အဃိ ပသ့ၣ်ညါလၢ အသးခုဒိၣ်မး. ဒီးအဝဲသ့ၣ်ဒီသကိးလွံၢ်ဂၤန့ၣ် ဒိးထီၣ်ကဘီ ဒီးလဲၤဝဲလၢ ကီၢ်မၤက့းဒနံ တဘျီဃီ.
“အဃိန့ၣ် ပဒိးထီၣ် ကဘီလၢ ဝ့ၢ်တြိၤအါ.”—မၤတၢ် ၁၆:၁၁
၆, ၇. (က) တၢ်ကဲထီၣ်သးဒီး စီၤပီလူးအတၢ်လဲၤတၢ်က့ၤဒ်လဲၣ် ဒီးပဟံန့ၢ် တၢ်မၤလိ ကသ့ဒ်လဲၣ်. (ခ) စီၤပီလူးအတၢ်လဲၤခီဖျိန့ၣ် ဟ့ၣ်ဂံၢ်ဟ့ၣ်ဘါပှၤ သ့ဒ်လဲၣ်.
၆ ဘၣ်ဃးဒီး တၢ်ဂ့ၢ်အံၤန့ၣ် ပန့ၢ်ဘၣ်တၢ်မၤလိဒ်လဲၣ်. ဆိကမိၣ်ကွၢ် စီၤပီလူး စးထီၣ်အတၢ်လဲၤလၢ အၤစံကီၢ်ရ့ၣ် ဝံၤအလီၢ်ခံမၣ် ကစၢ်ယွၤအသးစီဆှံ တြီအီၤလၢ ကစံၣ်တဲၤတဲလီၤတၢ်ဖဲန့ၣ်. ဒီးစီၤပီလူး ကျဲးစၢးလဲၤလၢ ဘံၤသူၤနံ ဘူးထီၣ်ကတုၤ ဝံၤအလီၢ်ခံမၣ် ယ့ၣ်ၡူးတဟ့ၣ်အခွဲးလၢ အကလဲၤဖဲန့ၣ်ဘၣ်. စီၤပီလူး လဲၤတုၤလၢ ဝ့ၢ်တြိၤအါ ဝံၤအလီၢ်ခံမၣ် ယ့ၣ်ၡူးဟံးစုနဲၣ်ကျဲအီၤလၢ အကဘၣ်လဲၤလၢ ကီၢ်မၤက့းဒနံ. ဆၢကတီၢ်ခဲအံၤစ့ၢ်ကီး ယ့ၣ်ၡူးကဲဝဲ တၢ်အိၣ်ဖှိၣ်အခိၣ်အဃိ အဟံးစုနဲၣ်ကျဲဝဲ တၢ်အိၣ်ဖှိၣ် ဒ်သိးဒီး တၢ်ကဲထီၣ်သး ဒီးစီၤပီလူးအံၤသ့. (ကလီး ၁:၁၈) အဒိ ဘၣ်သ့ၣ်သ့ၣ် ပကဆိကမိၣ်ပာ်စၢၤလၢ ပအဲၣ်ဒိးမၤ ပှၤလဲၤလၢညါ မ့တမ့ၢ် ပအဲၣ်ဒိးလဲၤလၢ တၢ်လီၢ်လၢ ပှၤလိၣ်ဘၣ် ပှၤစံၣ်တဲၤတဲလီၤတၢ်ဖိန့ၣ် ဖးယံာ်လံ. ဘၣ်ဆၣ် ပမၤဒ်ပဖီတၢၣ်အသိး ဝံၤအလီၢ်ခံမၣ် ဘၣ်သ့ၣ်သ့ၣ် ယ့ၣ်ၡူးကဟံးစုနဲၣ်ကျဲပှၤ ခီဖျိလၢ ကစၢ်ယွၤ အသးစီဆှံ. ဘၣ်မနုၤအဃိလဲၣ်. အဒိ ဆိကမိၣ်ကွၢ် ပှၤနီကါဖိတဂၤ ဖဲအနီကါအခါ အကါမ့ၢ်လဲၤမၣ် အဃၣ်ဝဲအကါအခိၣ် လၢအစ့ၣ်အထွဲကန့ၢ်. ပဝဲစ့ၢ်ကီး ဒ်သိး ပကမၤလၢပှဲၤ ပဖီတၢၣ်လၢ တၢ်စံၣ်တဲၤတဲလီၤတၢ်မၤအဂီၢ် ပမ့ၢ်ကျဲးစၢး ထဲးဂံၢ်ထဲးဘါဆိဆူၣ်ဆူၣ်မၣ် ယ့ၣ်ၡူးကဟံးစုနဲၣ်ကျဲပှၤ.
၇ ပကျဲးစၢးဆူၣ်ဆူၣ်လံ သနာ်က့ ပဖီတၢၣ် မ့ၢ်တလၢပှဲၤထီၣ် တဘျီဃီဘၣ်န့ၣ် ပကဘၣ်မၤဒ်လဲၣ်. ပကဆိကမိၣ်ဘၣ်လၢ ပတဒိးန့ၢ်ဘၣ် ကစၢ်ယွၤ အသးစီဆှံဘၣ်အဃိ မ့ၢ်ပကဟ့ၣ်အၡူဧါ. ပတဘၣ်ဟ့ၣ်အၡူဘၣ်. သ့ၣ်နီၣ်ထီၣ်လၢ စီၤပီလူးစ့ၢ်ကီး အကမၤလၢပှဲၤ အဖီတၢၣ်န့ၣ် တညီလၢအဂီၢ်ဘၣ်. ဘၣ်ဆၣ် စီၤပီလူးန့ၣ် ကျဲးစၢးဃုဝဲတၢ်လီၢ်သပှၢ်ပှၢ် တုၤလၢ အစံၣ်တဲၤတဲလီၤဘၣ်တၢ်. ပဝဲစ့ၢ်ကီး ပမ့ၢ်ဆဲးဃု “တြဲၤဖးဒိၣ်လၢ အဘၣ်ဃးဒီး တၢ်စံၣ်တဲၤတဲလီၤတၢ်မၤ” န့ၣ်ယဟိဝၤယွၤ ကဆိၣ်ဂ့ၤ ပတၢ်ကျဲးစၢး.—၁ ကရံၣ် ၁၆:၉.
၈. (က) ဝ့ၢ်ဖံလံးပံၤန့ၣ် မ့ၢ်ဝ့ၢ်ဒ်လဲၣ်တဖျၢၣ်လဲၣ်. (ခ) စီၤပီလူး စံၣ်တဲၤတဲလီၤတၢ်ဖဲ “တၢ်ဘါထုကဖၣ်တၢ် အလီၢ်” အဃိ အကဲဘျုးဒ်လဲၣ်.
၈ စီၤပီလူး ဒီးအသကိးတဖၣ် လဲၤတုၤလၢ ကီၢ်မၤက့းဒနံ ဝံၤအလီၢ်ခံ အဝဲသ့ၣ်လဲၤဝဲလၢ ဝ့ၢ်ဖံလံးပံၤ. ပှၤလၢအအိၣ် ဝ့ၢ်တဖျၢၣ်အံၤအပူၤန့ၣ် ကဲဝဲ ရိမ့ၤအပှၤထံဖိကီၢ်ဖိ. ဝ့ၢ်ဖံလံးပံၤန့ၣ် အလီၤဂာ်ဒ်သိးဒီး ဝ့ၢ်အံၤတလံ ဆံးဆံးဖိတဖျၢၣ် ဒီးပှၤရိမ့ၤသုးဖိ လၢအသးပှၢ် ဒီးအတမၤတၢ်လၢၤဘၣ်တဖၣ် အိၣ်ဝဲဖဲန့ၣ်အါမး. လၢဝ့ၢ်ချၢ ဖဲထံကျိဖိအကပၤန့ၣ် စီၤပီလူး ဒီးအသကိးတဖၣ် ထံၣ်ဝဲတၢ်လီၢ်တခါ ဒီးအဝဲသ့ၣ် ဆိကမိၣ်လၢ အကဲဝဲ “တၢ်ဘါထုကဖၣ်တၢ် အလီၢ်.” b ဖဲမုၢ်အိၣ်ဘှံးနံၤန့ၣ် အဝဲသ့ၣ်လဲၤဖဲန့ၣ် ဒီးထံၣ်ဝဲပိာ်မုၣ်တဖၣ်လၢ အဟဲဘူၣ်ထီၣ်ဘါထီၣ် ကစၢ်ယွၤ. အဝဲသ့ၣ်ဆ့ၣ်နီၤ တဲသကိးတၢ်ဒီး ပိာ်မုၣ်တဖၣ်လၢ အဟဲအိၣ်ဖှိၣ်ဖဲန့ၣ်. ဒီးပိာ်မုၣ်တဂၤလၢ အမံၤမ့ၢ် နီၢ်လူၤဒံန့ၣ် “ဒိကနၣ်တၢ် ဒီးယဟိဝၤယွၤ အိးထီၣ်အသး လၢလၢပှဲၤပှဲၤ.” လၢခံန့ၣ် အီၤဒီးပှၤလၢ အအိၣ်ဟံၣ်တဖျၢၣ်ဃီဒီးအီၤ ဒိးဘျၢထံ. ဒီးလၢခံ အကွဲမုာ် စီၤပီလူး ဒီးအသကိးတဖၣ်လၢ ကဟဲအိၣ်လၢအဟံၣ်. c—မၤတၢ် ၁၆:၁၃-၁၅.
၉. ဆၢကတီၢ်ခဲအံၤ ဒီပုၢ်ဝဲၢ်မုၣ်ခွါအါဂၤ ကွၢ်လိစီၤပီလူး အဒိအတဲာ်ဒ်လဲၣ် ဒီးယဟိဝၤယွၤ ဆိၣ်ဂ့ၤအဝဲသ့ၣ်ဒ်လဲၣ်.
၉ ဆိကမိၣ်ကွၢ် ဖဲနီၢ်လူၤဒံ ဒိးဘျၢထံအခါ စီၤပီလူး ဒီးအသကိးတဖၣ် ကသးခုထဲလဲၣ်. စီၤပီလူး တူၢ်လိာ်ဝဲ တၢ်ကွဲမုာ် ဒီးအ “ဟဲလၢကီၢ်မၤက့းဒနံအပူၤ” အဃိ အကသးခုဒိၣ်မး. ဒီးယဟိဝၤယွၤ သူဝဲ စီၤပီလူး ဒီးအသကိးတဖၣ် လၢကစံးဆၢဝဲ ပိာ်မုၣ်တဖၣ်လၢအပျံၤယွၤန့ၣ် အတၢ်ဃ့ထုကဖၣ်. ဆၢကတီၢ်ခဲအံၤ ဒီပုၢ်ဝဲၢ်မုၣ်ခွါအါဂၤ လၢအသးစၢ်မ့ၢ်ဂ့ၤ, သးပှၢ်မ့ၢ်ဂ့ၤ, အိၣ်သဘျ့မ့ၢ်ဂ့ၤ ဆီဟံၣ်ဆီဃီမ့ၢ်ဂ့ၤ လဲၤမၤစၢၤတၢ်လၢ တၢ်လီၢ်လၢ ပှၤလိၣ်ဘၣ် ပှၤစံၣ်တဲၤတဲလီၤတၢ်ဖိ. အဝဲသ့ၣ်မ့ၢ်ထံၣ်ဘၣ် တၢ်ကီတၢ်ခဲ ဘၣ်ဆၣ် ခီဖျိလၢ အဝဲသ့ၣ်ထံၣ်ဝဲ ပှၤလၢအတူၢ်လိာ် တၢ်မ့ၢ်တၢ်တီ ဒ်နီၢ်လူၤဒံအိၣ်ဝဲအဃိ အဝဲသ့ၣ်ဆဲးအိၣ်ဒီး တၢ်တူၢ်န့ၢ်ခီၣ်ကဲ ဒီးတၢ်သးခု. နၤစ့ၢ်ကီး နပာ်လီၤဖီတၢၣ်လၢ နကလဲၤမၤစၢၤတၢ် လၢတၢ်လီၢ်လၢ ပှၤလိၣ်ဘၣ် ပှၤစံၣ်တဲၤတဲလီၤတၢ်ဖိသ့ဧါ. နမ့ၢ်ပာ်လီၤဖီတၢၣ်ဒ်န့ၣ်န့ၣ် ယဟိဝၤယွၤ ကဆိၣ်ဂ့ၤနၤ. အဒိ ဒီပုၢ်ဝဲၢ်ခွါအဲရဲၤ လၢအအိၣ်အနံၣ် ၂၀ ဘျဲၣ်န့ၣ် အလဲၤအိၣ်လၢ ကီၢ်အမဲရကၤ အခၢၣ်သးတခီ. ဒ်ပှၤလၢအလဲၤမၤစၢၤတၢ်လၢ ထံကီၢ်အဂၤတဖၣ် တဲဝဲအသိး အီၤစ့ၢ်ကီး အတဲဝဲလၢ “ယလဲၤမၤစၢၤတၢ်လၢ တၢ်လီၢ်လၢပှၤလိၣ်ဘၣ် ပှၤစံၣ်တဲၤတဲလီၤတၢ်ဖိအဃိ ကဲထီၣ်တၢ်မၤစၢၤ လၢယဂီၢ်ဒိၣ်မး. ယထံၣ်ဘၣ်လၢ ယနီၢ်သးဆူၣ်ထီၣ် ဒီးယတၢ်ရ့လိာ်သးဒီး ယဟိဝၤယွၤဂ့ၤထီၣ်. ဒီးတၢ်လီၢ်ဖဲန့ၣ်န့ၣ် ယစံၣ်တဲၤတဲလီၤတၢ်မုာ်မး ဒီးယပှၤမၤလိလံာ်စီဆှံဖိအိၣ် ၈ ဂၤညါ.”
ဆၢကတီၢ်ခဲအံၤ ပတူၢ်လိာ် တၢ်ကွဲမုာ်လၢ လၢအမ့ၢ် “ဟဲလၢ ကီၢ်မၤက့းဒနံအပူၤ” ကသ့ဒ်လဲၣ်.
“ပှၤကမျၢၢ်တဖၣ် ထီဒါအဝဲသ့ၣ်” (မၤတၢ် ၁၆:၁၆-၂၄)
၁၀. တၢ်ဝံတၢ်နါ မၤတံာ်တာ် စီၤပီလူး ဒီးအသကိးတဖၣ်ဒ်လဲၣ်.
၁၀ ခီဖျိလၢ တၢ်သးခုကစီၣ်ရၤလီၤသးလၢ တၢ်လီၢ်အါတီၤ ဒီးပှၤအါဂၤ တူၢ်လိာ်တၢ်သးခုကစီၣ် ဒီးဒိးဘျၢထံအဃိ ပသ့ၣ်ညါလၢ မုၣ်ကီၤလံၢ် ဒီးအတၢ်ဝံတၢ်နါတဖၣ် ကသးပှံၢ်ထီၣ်တၢ်ဒိၣ်မး. အဃိ တၢ်ဝံတၢ်နါတဖၣ် မၤတံာ်တာ် စီၤပီလူး ဒီးအသကိးတဖၣ်န့ၣ် တမ့ၢ်တၢ်လီၤကမၢကမၣ်ဘၣ်. ဖဲစီၤပီလူး ဒီးအသကိးတဖၣ် လဲၤလၢ တၢ်ဘါထုကဖၣ်တၢ် အလီၢ်အခါ အဝဲသ့ၣ်ထံၣ်ဝဲ ပိာ်မုၣ်တဂၤလၢ တၢ်ဝံတၢ်နါအိၣ်လၢအလိၤ. ပိာ်မုၣ်အံၤ ခီဖျိလၢ တၢ်ဝံတၢ်နါအိၣ်လၢအလိၤ ဒီးအဖးတၢ်သ့အဃိ အကစၢ် ဒိးန့ၢ်ဘၣ်စ့ဒီဒူၣ်. ဒီးပိာ်မုၣ်တဂၤအံၤ ပိာ်ထီၣ်အဝဲသ့ၣ်အခံ ဒီးကိးပသူထီၣ်ဝဲလၢ “ပှၤတဖၣ်အံၤ မ့ၢ်ဝဲကစၢ်ယွၤလၢ အထီကတၢၢ်တဂၤ အကုၢ်တဖၣ် ဒီးစံၣ်တဲၤတဲလီၤသုလၢ တၢ်အုၣ်က့ၤခီၣ်က့ၤ အကျဲလီၤ.” တၢ်ဝံတၢ်နါ ဒုးကိးပသူထီၣ် ပိာ်မုၣ်တဂၤအံၤလၢ တၢ်ကတိၤတဖၣ်န့ၣ် ဒ်သိး ကပာ်ဖျါထီၣ်ဝဲလၢ တၢ်သ့တၢ်ဘၣ် လၢအအိၣ်ဒီး ပိာ်မုၣ်တဂၤအံၤ ဒီးစီၤပီလူး အတၢ်သိၣ်လိန့ၣ် ဟဲလၢ ကစၢ်ယွၤတဂၤဃီ အအိၣ်. အမၤဝဲဒ်န့ၣ်အဃိ ပှၤလၢအဆၢထၢၣ်ကွၢ်တၢ်တဖၣ် တသးစၢၢ်ဆၢ စီၤပီလူး ဒီးအသကိးတဖၣ်လၢၤဘၣ်. အဃိ ဒ်သိးပိာ်မုၣ် တကိးပသူလၢၤတဂ့ၤအဂီၢ် စီၤပီလူးနီဟးထီၣ်ကွံာ်ဝဲ တၢ်ဝံတၢ်နါလၢအလိၤ.—မၤတၢ် ၁၆:၁၆-၁၈.
၁၁. ဖဲတၢ်နါဟးထီၣ်လၢ ပိာ်မုၣ်တဂၤအလိၤ ဝံၤအလီၢ်ခံ တၢ်ကဲထီၣ်သးဒီး စီၤပီလူး ဒီးစီၤစံလၤဒ်လဲၣ်.
၁၁ ဖဲပိာ်မုၣ်တဂၤအံၤ အကစၢ်တဖၣ် ထံၣ်ဘၣ်ဝဲလၢ အတန့ၢ်ဘၣ် စ့လၢၤဘၣ်အခါ အဝဲသ့ၣ် သးပှံၢ်ထီၣ်တၢ်ဒိၣ်မး အဃိ အဝဲသ့ၣ်ဖီၣ်ဝဲ စီၤပီလူး ဒီးစီၤစံလၤ ဒီးလဲၤတွံၢ်အဝဲသ့ၣ်လၢ ပှၤဘၣ်မူဘၣ်ဒါအအိၣ် လၢတၢ်ဆါတၢ်ပှ့ၤအလီၢ်. ဒီးပိာ်မုၣ် အကစၢ်တဖၣ် သ့ၣ်ညါဝဲလၢ စံၣ်ညီၣ်ကွီၢ်တဖၣ် သးဟ့ဝဲ ပှၤယူဒၤဖိ ဒီးပာ်ဒိၣ်ဝဲ ပှၤရိမ့ၤဖိ. အဃိ အဝဲသ့ၣ်တဲဘၣ် စံၣ်ညီၣ်ကွီၢ်တဖၣ်လၢ ‘ပှၤယူဒၤဖိတဖၣ်အံၤ ဒုးအိၣ်ထီၣ် တၢ်ကီတၢ်ခဲ ခီဖျိ သိၣ်လိတၢ်အလုၢ်အလၢ်တဖၣ်လၢ ပဝဲပှၤရိမ့ၤဖိတဖၣ် တကြၢးတူၢ်လိာ် ဒီးမၤထွဲအီၤဘၣ်.’ ခီဖျိလၢ အဝဲသ့ၣ်တၢ်ကတိၤတဖၣ်အဃိ “ပှၤကမျၢၢ်တဖၣ် [လၢတၢ်ဆါတၢ်ပှ့ၤအလီၢ်] ထီဒါအဝဲသ့ၣ် [စီၤပီလူး ဒီးစီၤစံလၤ]” ဒီးကမျၢၢ်အပဒိၣ် ဖးဒိၣ်တဖၣ် ဟ့ၣ်လီၤတၢ်ကလုၢ် လၢ “ပှၤကတီၢ် အဝဲသ့ၣ်ဒီးနီၣ်တီၢ်.” ဝံၤဒီး ပှၤဖၢနုာ်အဝဲသ့ၣ် လၢဃိာ်ပူၤ. ပှၤခိးဃိာ်ဖိတဂၤ ဖၢနုာ်အဝဲသ့ၣ်လၢ ဃိာ်အဒၢးလၢ အအိၣ်လၢ ဃိာ်အခၢၣ်သး ဒီးကျီၤတံၢ်ဃာ် အဝဲသ့ၣ်အခီၣ်လၢ သ့ၣ်ကျီၤ. (မၤတၢ် ၁၆:၁၉-၂၄) ဖဲပှၤခိးဃိာ်ဖိတဂၤ ပံးကွံာ်ဃိာ်တြဲၤအခါ ခီဖျိလၢ တၢ်ခံးဒိၣ်မးအဃိ စီၤပီလူး ဒီးစီၤစံလၤ တထံၣ်တၢ်နီတမံၤလၢၤဘၣ်. ဘၣ်ဆၣ် ယဟိဝၤယွၤ ထံၣ်အဝဲသ့ၣ်.—စံး ၁၃၉:၁၂.
၁၂. (က) ယ့ၣ်ၡူးခရံာ် အပျဲၢ်အဘီၣ်တဖၣ် ထံၣ်ဝဲတၢ်မၤအၢမၤနးဒ်လဲၣ် ဒီးဘၣ်မနုၤအဃိလဲၣ်. (ခ) ဆၢကတီၢ်ခဲအံၤ မုၣ်ကီၤလံၢ် ဒီးပှၤလၢမုၣ်ကီၤလံၢ် ဒိၣ်စိလၢအဖီခိၣ်တဖၣ် ထီဒါဒံး ခရံာ်အပျဲၢ်အဘီၣ်ဒ်လဲၣ်.
၁၂ ဖဲယ့ၣ်ၡူး အိၣ်လၢဟီၣ်ခိၣ်ချၢအခါ အတဲဘၣ် အပျဲၢ်အဘီၣ်တဖၣ်လၢ “အဝဲသ့ၣ် ကမၤအၢမၤနးသု.” (ယိၤဟၣ် ၁၅:၂၀) အဃိ ဖဲစီၤပီလူး ဒီးအသကိးတဖၣ် လဲၤလၢ ကီၢ်မၤက့းဒနံအခါ အဝဲသ့ၣ် သ့ၣ်ညါဝဲလၢ ပှၤကထီဒါ အဝဲသ့ၣ်. ဖဲအဝဲသ့ၣ်ထံၣ်ဘၣ် တၢ်ထီဒုၣ်ထီဒါအခါ အဝဲသ့ၣ် သ့ၣ်ညါဘၣ်ဝဲလၢ ပှၤထီဒါအဝဲသ့ၣ်န့ၣ် ခီဖျိလၢ မုၣ်ကီၤလံၢ် သးပှံၢ်ထီၣ်အဝဲသ့ၣ် ဒီးတမ့ၢ်လၢ ကစၢ်ယွၤ တဘၣ်သးအဝဲသ့ၣ် အဃိဘၣ်. ခဲအံၤစ့ၢ်ကီး ပှၤလၢမုၣ်ကီၤလံၢ် ဒိၣ်စိလၢအဖီခိၣ်တဖၣ်န့ၣ် အဝဲသ့ၣ် အတၢ်ပာ်သး အိၣ်ဒ်သိးဒီး ပှၤလၢအမၤအၢမၤနး စီၤပီလူး ဖဲဝ့ၢ်ဖံလံးပံၤအပူၤ. အဒိ လၢကၠိမ့ၢ်ဂ့ၤ လၢတၢ်မၤလီၢ်မ့ၢ်ဂ့ၤ အဝဲသ့ၣ် တဲလံၣ်တဲလီပဂ့ၢ်အဃိ ပှၤထံၣ်ကမၣ်ပှၤ ဒီးထီဒါပှၤ. လၢထံကီၢ် တနီၤန့ၣ် ပှၤလၢအထီဒါ တၢ်ဘူၣ်တၢ်ဘါတဖၣ် တီၣ်ဖျါထီၣ်ပဂ့ၢ် လၢအကမၣ် လၢစံၣ်ညီၣ်ကွီၢ်အရူ ဒီးတဲဝဲလၢ ‘ယဟိဝၤပှၤအုၣ်အသးတဖၣ် ဒုးအိၣ်ထီၣ် တၢ်ကီတၢ်ခဲခီဖျိ အဝဲသ့ၣ်သိၣ်လိ လုၢ်လၢ်တဖၣ်လၢ ပှၤတဘၣ်သးတူၢ်လိာ် ဒီးမၤထွဲဝဲဘၣ်.’ ဒီးလၢတၢ်လီၢ်တနီၤန့ၣ် ပှၤမၤအၢမၤနး ပဒီပုၢ်ဝဲၢ်မုၣ်ခွါ ဒီးဖၢနုာ်အဝဲသ့ၣ်လၢဃိာ်ပူၤ. ဘၣ်ဆၣ် ပသ့ၣ်ညါလၢ ယဟိဝၤယွၤထံၣ်ဝဲ.—၁ ပ့း ၃:၁၂.
“ဒိးဘျၢထံတဘျီဃီ” (မၤတၢ် ၁၆:၂၅-၃၄)
၁၃. ဘၣ်မနုၤအဃိ ပှၤခိးဃိာ်ဖိတဂၤ သံကွၢ်ဝဲလၢ “ဒ်သိး ယကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ယကဘၣ်မၤဒ်လဲၣ်.”
၁၃ တၢ်တနံၤန့ၣ် ခီဖျိလၢ ပှၤထီဒါ ဒီးမၤအၢမၤနး စီၤပီလူး ဒီးစီၤစံလၤအဃိ အဝဲသ့ၣ် ဘၣ်တူၢ်တၢ် ကအိၣ်တဘျုးနၣ်ရံၣ်ညါ. သနာ်က့ ကဘၣ်ဖဲဖးဖီမုၢ်န့ၣ် အဝဲသ့ၣ် အိၣ်မုာ်ထီၣ်က့ၤအဃိ အဝဲသ့ၣ် “ဃ့ထုကဖၣ်တၢ် ဒီးသးဝံၣ် စံးထီၣ်ပတြၢၤကစၢ်ယွၤ.” ဒီးဖဲန့ၣ် ဟီၣ်ခိၣ်ဟူးဝဲ သတူၢ်ကလာ်အဃိ ဃိာ်န့ၣ်ဟူးဝဲ. ဖဲပှၤခိးဃိာ်ဖိတဂၤ ပၢၢ်ထီၣ်အခါ အထံၣ်ဝဲလၢတြဲၤအိးထီၣ်အသး ဒီးအဆိကမိၣ်ဝဲလၢ ပှၤဃိာ်ဖိတဖၣ် ဃ့ၢ်ပူၤဖျဲးကွံာ်လံ. အသ့ၣ်ညါဝဲလၢ ပှၤဃိာ်ဖိတဖၣ် မ့ၢ်ဃ့ၢ်ပူၤဖျဲးအသးန့ၣ် အကဘၣ်တၢ်စံၣ်ညီၣ်အဃိ အဝဲ “ထုးထီၣ်အနး ဒ်သိး အကမၤသံလီၤအသး.” ဘၣ်ဆၣ် စီၤပီလူး ကိးပသူထီၣ် ဒီးတဲအီၤလၢ “တဘၣ် မၤဆါလီၤနသးတဂ့ၤ, ပအိၣ်ဖဲအံၤ ကိးဂၤဒဲးလီၤ.” အဃိ ပှၤခိးဃိာ်ဖိတဂၤအံၤ သံကွၢ်ဝဲလၢ “ဒ်သိး ယကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ယကဘၣ်မၤဒ်လဲၣ်.” စီၤပီလူး ဒီးစီၤစံလၤ အုၣ်က့ၤခီၣ်က့ၤအီၤ တသ့ဘၣ်. ပှၤအုၣ်က့ၤခီၣ်က့ၤအီၤသ့န့ၣ် အိၣ်ဒၣ်ထဲ ယ့ၣ်ၡူးတဂၤလီၤ. အဃိ အဝဲသ့ၣ် တဲအီၤလၢ ဒ်သိးန “ကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် စူၢ်က့ၤနာ်က့ၤ ကစၢ်ယ့ၣ်ၡူးတက့ၢ်.”—မၤတၢ် ၁၆:၂၅-၃၁.
၁၄. (က) စီၤပီလူး ဒီးစီၤစံလၤ မၤစၢၤ ပှၤခိးဃိာ်ဖိတဂၤအံၤဒ်လဲၣ်. (ခ) စီၤပီလူး ဒီးစီၤစံလၤ ထံၣ်ဘၣ် တၢ်မၤအၢမၤနး သနာ်က့ အဝဲသ့ၣ် ဆဲးအိၣ်ဒီးတၢ်တူၢ်န့ၢ်ခီၣ်ကဲအဃိ အဝဲသ့ၣ် ဒိးန့ၢ်ဘၣ် တၢ်ဆိၣ်ဂ့ၤဒ်လဲၣ်.
၁၄ ပှၤခိးဃိာ်ဖိတဂၤအံၤ အသံကွၢ်တၢ်လၢ တၢ်သးအိၣ်နီၢ်ကီၢ်ဧါ. စီၤပီလူး သ့ၣ်ညါဝဲလၢ အသံကွၢ်တၢ်လၢ တၢ်သးအိၣ်နီၢ်ကီၢ်. ပှၤခိးဃိာ်ဖိတဂၤအံၤ အကဲဝဲ ပှၤကလုာ်အဂၤတဖၣ်အဃိ အတသ့ၣ်ညါဝဲ လံာ်စီဆှံ အတၢ်သိၣ်လိဘၣ်. ဒီးတချုးလၢ အကကဲထီၣ်ဘၣ် ခရံာ်ဖိတဂၤဒံးဘၣ်န့ၣ် အကဘၣ်မၤလိ ဒီးတူၢ်လိာ်ဝဲ တၢ်မ့ၢ်တၢ်တီ အခီၣ်ထံးခီၣ်ဘိ လၢအအိၣ်လၢ လံာ်စီဆှံအပူၤ. အဃိ စီၤပီလူး ဒီးစီၤစံလၤ ပာ်လီၤတၢ်ဆၢကတီၢ် ဒီးသိၣ်လိအီၤလၢ “ယဟိဝၤယွၤ အကလုၢ်ကထါ.” ဖဲစီၤပီလူး ဒီးစီၤစံလၤ သိၣ်လိဝဲ တၢ်မ့ၢ်တၢ်တီလၢ လံာ်စီဆှံအပူၤအခါ ဘၣ်သ့ၣ်သ့ၣ် အဝဲသ့ၣ်မၣ်တနီၣ်ဘၣ်လၢ အလိၤဆါ ခီဖျိလၢ ပှၤတီၢ်အဝဲသ့ၣ်အဃိဘၣ်. ပှၤခိးဃိာ်ဖိတဂၤအံၤ ထံၣ်ဝဲလၢ အဝဲသ့ၣ်အချၢဃံန့ၣ် အိၣ်ဒီးတၢ်ပူၤလီၢ်အဃိ အမၤကဆှီန့ၢ် အဝဲသ့ၣ်တၢ်ပူၤလီၢ်. ဖဲတၢ်တနၤန့ၣ် ပှၤခိးဃိာ်ဖိတဂၤအံၤ ဒီးအဟံၣ်ဖိဃီဖိန့ၣ် “ဒိးဘျၢထံတဘျီဃီ.” ပထံၣ်ဘၣ်လၢ စီၤပီလူး ဒီးစီၤစံလၤ ထံၣ်ဘၣ် တၢ်မၤအၢမၤနး သနာ်က့ အဝဲသ့ၣ် ဆဲးအိၣ်ဒီး တၢ်တူၢ်န့ၢ်ခီၣ်ကဲအဃိ အဝဲသ့ၣ် ဒိးန့ၢ်ဘၣ်တၢ်ဆိၣ်ဂ့ၤ.—မၤတၢ် ၁၆:၃၂-၃၄.
၁၅. (က) ယဟိဝၤပှၤအုၣ်အသးအါဂၤ ကွၢ်လိဝဲ စီၤပီလူး ဒီးစီၤစံလၤ အဒိအတဲာ်ဒ်လဲၣ်. (ခ) ဘၣ်မနုၤအဃိ ပကဘၣ် က့ၤအိၣ်သကိး ပှၤလၢအအိၣ်လၢ ပတၢ်စံၣ်တဲၤတဲလီၤ လီၢ်ကဝီၤ ထီဘိလဲၣ်.
၁၅ ဒ်စီၤပီလူး ဒီးစီၤစံလၤအသိး မုၢ်မဆါတနံၤအံၤ ယဟိဝၤပှၤအုၣ်အသးအါဂၤ လီၤဘၣ်လၢဃိာ်ပူၤသနာ်က့ အဝဲသ့ၣ် တဲဘၣ်ပှၤဂၤလၢ အတၢ်နာ်အဂ့ၢ် ဒီးယဟိဝၤယွၤ ဆိၣ်ဂ့ၤအဝဲသ့ၣ်. အဒိ လၢထံကီၢ်တဘ့ၣ်လၢ ပှၤတြီဃာ် ပတၢ်ကရၢကရိ တၢ်ဖံးတၢ်မၤန့ၣ် ဘၣ်တဘျီ ယဟိဝၤပှၤအုၣ်အသး လၢအအိၣ်ဖဲန့ၣ်တဖၣ် အမျးကယၤ ၄၀ န့ၣ်မၤလိဘၣ်ဝဲ တၢ်မ့ၢ်တၢ်တီ ဘၣ်ဃးဒီး ယဟိဝၤယွၤအဂ့ၢ် ဖဲအဝဲသ့ၣ် အိၣ်လၢဃိာ်ပူၤအခါ. (ၡါ ၅၄:၁၇) ပာ်သူၣ်ပာ်သးစ့ၢ်ကီးလၢ ပှၤခိးဃိာ်ဖိတဂၤအံၤ ဃ့တၢ်မၤစၢၤ ဖဲဟီၣ်ခိၣ်ဟူး ဝံၤအလီၢ်ခံ. ဒ်န့ၣ်အသိး ဆၢကတီၢ်ခဲအံၤစ့ၢ်ကီး ပှၤတနီၤန့ၣ် လၢအပူၤကွံာ် အဝဲသ့ၣ် တဘၣ်သးကနၣ်ဃုာ် ဘီမုၢ်တၢ်သးခုကစီၣ်အဂ့ၢ် နီတဘျီဘၣ်. ဘၣ်ဆၣ် ဖဲအဝဲသ့ၣ် ထံၣ်ဘၣ်တၢ်ကီတၢ်ခဲ ဝံၤအလီၢ်ခံ အဝဲသ့ၣ် သးအိၣ်ဒိကနၣ်ဝဲ တၢ်သးခုကစီၣ်. အဃိ ပမ့ၢ်က့ၤအိၣ်သကိး ပှၤလၢအအိၣ်လၢ ပတၢ်စံၣ်တဲၤတဲလီၤ လီၢ်ကဝီၤ ထီဘိန့ၣ် ဖဲအဝဲသ့ၣ် သးအိၣ်ဒိကနၣ်တၢ်အခါ ပပာ်ဖျါထီၣ်လၢ ပအိၣ်ကတီၤပသးလၢ ပကမၤစၢၤအဝဲသ့ၣ်.
“ခဲအံၤန့ၣ် အဝဲသ့ၣ် ကနီဟးထီၣ် ခူသူၣ်ပှၤဟီဧါ” (မၤတၢ် ၁၆:၃၅-၄၀)
၁၆. ပှၤတီၢ်စီၤပီလူး ဒီးစီၤစံလၤ ဝံၤအလီၢ်ခံ လၢခံတဂီၤန့ၣ် တၢ်ကဲထီၣ်သးဒ်လဲၣ်.
၁၆ ပှၤတီၢ်စီၤပီလူး ဒီးစီၤစံလၤ ဝံၤအလီၢ်ခံ လၢခံတဂီၤန့ၣ် ပှၤဘၣ်မူဘၣ်ဒါတဖၣ် မၢပှၤပျၢ်ကွံာ် အဝဲသ့ၣ်. ဘၣ်ဆၣ် စီၤပီလူး တဲဝဲလၢ “ပတၢ်ကမၣ် တအိၣ်နီတမံၤဘၣ် ဒီးပမ့ၢ်ပှၤရိမ့ၤဖိတဖၣ် သနာ်က့ အဝဲသ့ၣ်တီၢ်ပှၤလၢ ကမျၢၢ်အမဲာ်ညါ ဒီးဖၢနုာ်ပှၤလၢ ဃိာ်ပူၤလီၤ. ဒီးခဲအံၤန့ၣ် အဝဲသ့ၣ် ကနီဟးထီၣ် ခူသူၣ်ပှၤဟီဧါ. လ့ၤတက့ၤ တသ့ဘၣ်. အဝဲသ့ၣ် ကဘၣ်ဟဲ ဒီးဆှၢထီၣ်ပှၤလၢ အနီၢ်ကစၢ်လီၤ.” ဖဲပှၤဘၣ်မူဘၣ်ဒါတဖၣ် သ့ၣ်ညါဝဲလၢ စီၤပီလူး ဒီးစီၤစံလၤ ကဲဝဲရိမ့ၤအထံဖိကီၢ်ဖိအခါ ခီဖျိလၢ အဝဲသ့ၣ် မၤကမၣ်ဝဲ စီၤပီလူး ဒီးစီၤစံလၤ အတၢ်ခွဲးတၢ်ယာ် d အဃိ “အဝဲသ့ၣ်ပျံၤတၢ်.” တဘျီအံၤဒု တၢ်အိၣ်သး ဆီတလဲအသးလံ. ခီဖျိလၢ ပှၤတီၢ်တၢ်မၢဖိတဖၣ် လၢကမျၢၢ်အမဲာ်ညါအဃိ ပှၤဘၣ်မူဘၣ်ဒါတဖၣ် ကဘၣ်ဃ့ဝံသးစူၤက့ၤအဝဲသ့ၣ်လၢ ကမျၢၢ်အမဲာ်ညါစ့ၢ်ကီး. ဒီးအဝဲသ့ၣ် ဃ့ဝံသးစူၤ စီၤပီလူး ဒီးစီၤစံလၤဒ်သိး ကဟးထီၣ်ကွံာ်လၢ ဝ့ၢ်ဖံလံးပံၤအပူၤ. စီၤပီလူး ဒီးစီၤစံလၤ မၤထွဲဝဲ ဒ်ပှၤမၢအဝဲသ့ၣ်အသိး. ဘၣ်ဆၣ် တချုးလၢ အဝဲသ့ၣ် ဟးထီၣ်ဒံးဘၣ်န့ၣ် အဝဲသ့ၣ် ဟံန့ၢ်တၢ်ဆၢကတီၢ် ဒီးလဲၤဟ့ၣ်ဂံၢ်ဟ့ၣ်ဘါဝဲ ယ့ၣ်ၡူးအပျဲၢ်အဘီၣ် အသီတဖၣ် ဝံၤဒီးအဝဲသ့ၣ် ဟးထီၣ်ကွံာ်ဖဲန့ၣ်.
၁၇. ခီဖျိလၢ စီၤပီလူး ဒီးစီၤစံလၤ တူၢ်ဝဲတၢ်မၤအၢမၤနးအဃိ ခရံာ်ဖိအသီတဖၣ် န့ၢ်ဘၣ်တၢ်မၤလိဒ်လဲၣ်.
၁၇ စီၤပီလူး ဒီးစီၤစံလၤ မ့ၢ်တဲဆိလၢ အဝဲသ့ၣ်ကဲဝဲ ရိမ့ၤအထံဖိကီၢ်ဖိန့ၣ် ဘၣ်သ့ၣ်သ့ၣ် ပှၤတတီၢ်အဝဲသ့ၣ်ဘၣ်. (မၤတၢ် ၂၂:၂၅, ၂၆) ဘၣ်ဆၣ် အဝဲသ့ၣ် မ့ၢ်မၤဝဲဒ်န့ၣ်န့ၣ် ဘၣ်သ့ၣ်သ့ၣ် ခရံာ်ဖိလၢ အအိၣ်လၢ ဝ့ၢ်ဖံလံးပံၤအပူၤန့ၣ် ကဆိကမိၣ်ဝဲလၢ ဒ်သိး စီၤပီလူး ဒီးစီၤစံလၤ တထံၣ်ဘၣ် တၢ်မၤအၢမၤနး လၢခရံာ်အဃိတဂ့ၤအဂီၢ် အဝဲသ့ၣ်သူဝဲ အတၢ်ခွဲးတၢ်ယာ် ဒ်ရိမ့ၤအထံဖိကီၢ်ဖိအသိး. တကးဒံးဘၣ် ခရံာ်ဖိလၢ အတကဲ ရိမ့ၤအထံဖိကီၢ်ဖိတဖၣ်န့ၣ် တအိၣ်ဒီး တၢ်ခွဲးတၢ်ယာ် ဒ်ရိမ့ၤအထံဖိကီၢ်ဖိဘၣ်အဃိ ပှၤမ့ၢ်တီၢ်အဝဲသ့ၣ်န့ၣ် ပှၤရိမ့ၤဖိ အတၢ်သိၣ်တၢ်သီ ဒီသဒၢအဝဲသ့ၣ် တသ့ဘၣ်အဃိ ဘၣ်သ့ၣ်သ့ၣ် အဝဲသ့ၣ် အတၢ်နာ်ကလီၤစှၤ. အဃိ ဖဲစီၤပီလူး ဒီးအသကိးတဖၣ် တူၢ်ဝဲတၢ်မၤအၢမၤနးအခါ အဝဲသ့ၣ် ပာ်လီၤဝဲ တၢ်ဒိတၢ်တဲာ်အဂ့ၤ လၢခရံာ်ဖိအသီတဖၣ်အဂီၢ်. အဝဲသ့ၣ် အဒိအတဲာ်န့ၣ် ပာ်ဖျါထီၣ်လၢ ခရံာ်ဖိတဖၣ် မ့ၢ်ထံၣ်ဘၣ် တၢ်မၤအၢမၤနး သနာ်က့ အဝဲသ့ၣ် ဆဲးအိၣ်ဒီး တၢ်တူၢ်န့ၢ်ခီၣ်ကဲ ဒီးတၢ်သးတီသ့ဒံး. တကးဒံးဘၣ် ခီဖျိလၢ စီၤပီလူး ဒီးစီၤစံလၤ တဲဖျါထီၣ်ဝဲလၢ အဝဲသ့ၣ်ကဲဝဲ ရိမ့ၤအထံဖိကီၢ်ဖိအဃိ လၢခံန့ၣ် ပှၤဘၣ်မူဘၣ်ဒါတဖၣ် ဘၣ်အၢၣ်လီၤဝဲလၢ ကမျၢၢ်အမဲာ်ညါလၢ အဝဲသ့ၣ်မၤဝဲ စီၤပီလူး ဒီးစီၤစံလၤန့ၣ် တဘၣ်တၢ်သိၣ်တၢ်သီဘၣ်. ခါဆူညါစ့ၢ်ကီး ပှၤဘၣ်မူဘၣ်ဒါတဖၣ် ကဘၣ်မၤထွဲဝဲ ပှၤရိမ့ၤဖိ အတၢ်သိၣ်တၢ်သီ လီၤတံၢ်လီၤဆဲး ဒီးတဘၣ်မၤအၢမၤနးနါစိၤ ခရံာ်ဖိတဖၣ်ဘၣ်.
၁၈. (က) မုၢ်မဆါတနံၤအံၤ တၢ်အိၣ်ဖှိၣ်သးပှၢ်တဖၣ် ကွၢ်လိ စီၤပီလူး အဒိအတဲာ် ကသ့ဒ်လဲၣ်. (ခ) “ဒ်သိးကဒုးအိၣ်ထီၣ် ဒီးမၤဂၢၢ်မၤကျၢၤ ပတၢ်ခွဲးတၢ်ယာ်လၢ ပဒိၣ်အမဲာ်ညါ ဒ်သိးပစံၣ်တဲၤတဲလီၤ တၢ်သးခုကစီၣ် ကန့ၢ်အဂီၢ်” မုၢ်မဆါတနံၤအံၤ ပမၤဒ်လဲၣ်.
၁၈ မုၢ်မဆါတနံၤအံၤ တၢ်အိၣ်ဖှိၣ်သးပှၢ် လၢအတီခိၣ်ရိၤမဲ တၢ်အိၣ်ဖှိၣ်ဖိန့ၣ် အဝဲသ့ၣ် ပာ်လီၤအဒိအတဲာ် ဂ့ၤမး. တၢ်လၢအဝဲသ့ၣ် အဲၣ်ဒိးလၢ တၢ်အိၣ်ဖှိၣ်ဖိ ကမၤဝဲန့ၣ် အဝဲသ့ၣ် သးအိၣ်မၤဝဲစ့ၢ်ကီး. တကးဒံးဘၣ် ဒ်စီၤပီလူးအသိး ပကသူ ပတၢ်ခွဲးတၢ်ယာ် လၢအဘၣ်လိာ်သးဒီး ထံကီၢ်တၢ်သိၣ်တၢ်သီ ဒ်လဲၣ် ဒီးပကသူအီၤလၢ ပကဒီသဒၢလီၤပသး ဒ်လဲၣ်န့ၣ် ပဆိကမိၣ်ထံအီၤ လီၤတံၢ်လီၤဆဲး. ဒီးဒ်သိး ပကဆဲးဘူၣ်ထီၣ်ဘါထီၣ်ဘၣ် ယဟိဝၤယွၤ ဒီးဆဲးမၤ အတၢ်မၤအဂီၢ် တဘျီတခီၣ်န့ၣ် ပတီၣ်ဖျါထီၣ် ပတၢ်ခွဲးတၢ်ယာ်လၢ လီၢ်ကဝီၤအရူ, ထံကီၢ်အရူ လၢအဒိၣ်ကတၢၢ် ဒီးဟီၣ်ခိၣ်ဒီဘ့ၣ်အရူ လၢအဒိၣ်ကတၢၢ်. ဖဲပလဲၤလၢ စံၣ်ညီၣ်ကွီၢ်အရူအခါ ပတလဲၤဒ်သိး ပကဆီတလဲ ပဒိၣ်အတၢ်သိၣ်တၢ်သီဘၣ်. ဘၣ်ဆၣ် ပတၢ်တိာ်ပာ်န့ၣ် လီၤဂာ်ဒ်သိးဒီး တၢ်ဂ့ၢ်လၢ စီၤပီလူးကွဲးန့ၢ်ဝဲ တၢ်အိၣ်ဖှိၣ်ဖိ လၢအအိၣ်လၢ ဝ့ၢ်ဖံလံးပံၤ ဖဲအဟးထီၣ်လၢ ဃိာ်ပူၤဝံၤအလီၢ်ခံ အနံၣ်တဆံ. ဒီးဒ်စီၤပီလူးကွဲးဝဲအသိး ပလဲၤ “ဒ်သိးကဒုးအိၣ်ထီၣ် ဒီးမၤဂၢၢ်မၤကျၢၤ ပတၢ်ခွဲးတၢ်ယာ်လၢ ပဒိၣ်အမဲာ်ညါ ဒ်သိးပစံၣ်တဲၤတဲလီၤ တၢ်သးခုကစီၣ် ကန့ၢ်အဂီၢ်.” (ဖံလံး ၁:၇) ဘၣ်ဆၣ် စံၣ်ညီၣ်ကွီၢ်အရူ မ့ၢ်ဆၢတဲာ်တၢ် ဒ်လဲၣ်သနာ်က့ ဒ်စီၤပီလူး ဒီးအသကိးတဖၣ်အသိး ပပာ်လီၤပသးလၢ “ပကလဲၤ စံၣ်တဲၤတဲလီၤ . . . တၢ်သးခုကစီၣ်” လၢတၢ်လီၢ် တတီၤဂ့ၤ တတီၤဂ့ၤ ဖဲသးစီဆှံ ကဟံးစုနဲၣ်ကျဲပှၤ.—မၤတၢ် ၁၆:၁၀.
a ကွၢ်တၢ်လွံၢ်နၢၣ် လၢအမ့ၢ် “ စီၤလူၤကၣ်—ပှၤလၢအကွဲး လံာ်မၤတၢ်.”
b လၢဝ့ၢ်ဖံလံးပံၤ အပူၤန့ၣ် ခီဖျိလၢ ပှၤရိမ့ၤသုးဖိ လၢအသးပှၢ် ဒီးအတမၤတၢ်လၢၤဘၣ်တဖၣ် အိၣ်ဝဲဖဲန့ၣ်အါမးအဃိ ဘၣ်သ့ၣ်သ့ၣ် ပှၤတဟ့ၣ်အခွဲးလၢ ပှၤယူဒၤဖိ ကတ့ထီၣ် ဘူၣ်ဘျီၣ်ဘၣ်. မ့တမ့ၢ် ဘၣ်သ့ၣ်သ့ၣ် ခီဖျိလၢ ပှၤယူဒၤဖိပိာ်ခွါ အိၣ်စှၤန့ၢ်ဒံးအဂၤတဆံအဃိ ပှၤတတ့ထီၣ်ဘူၣ်ဘျီၣ်ဘၣ်.
c ကွၢ်တၢ်လွံၢ်နၢၣ် လၢအမ့ၢ် “ နီၢ်လူၤဒံ—ပှၤလၢ အဆါ တၢ်ကူတၢ်ကၤလၢ အလွဲၢ်လုး.”
d ပှၤရိမ့ၤဖိ အတၢ်သိၣ်တၢ်သီ တဲဝဲလၢ တချုးလၢ ပှၤကပာ်တၢ်ကမၣ် မ့တမ့ၢ် စံၣ်ညီၣ် ရိမ့ၤအထံဖိကီၢ်ဖိတဂၤဂၤ ဒံးဘၣ်န့ၣ် စံၣ်ညီၣ်ကွီၢ် ကဘၣ်ကနၣ်န့ၢ်အတၢ်ဂ့ၢ် မူာ်မူာ်နီၢ်နီၢ် ဒီးစံၣ်ညီၣ်န့ၢ်အတၢ်ဂ့ၢ် တီတီလိၤလိၤ.
