တၢ်မၤလိ ၁၈
“ဃုကစၢ်ယွၤ” ဒီး “ထံၣ်န့ၢ်အီၤ သပှၢ်ကတၢၢ်”
စီၤပီလူး ဆီတလဲ တၢ်စံၣ်တဲၤတဲလီၤတၢ် အကျိၤအကျဲ ဒီးစံၣ်တဲၤတဲလီၤဝဲ တၢ်ဂ့ၢ်လၢ ပှၤဒိကနၣ်အီၤတဖၣ် သးအိၣ်ဒိကနၣ်ဝဲ
တၢ်ဂ့ၢ်ဒိးသန့ၤထီၣ်သးလၢ မၤတၢ် ၁၇:၁၆-၃၄
၁-၃. (က) ဖဲစီၤပီလူး အိၣ်လၢဝ့ၢ်အၤသ့ၣ်အခါ ဘၣ်မနုၤအဃိ အသးဘၣ်တံာ်တာ် ဒိၣ်မးလဲၣ်. (ခ) ပမ့ၢ်မၤလိ စီၤပီလူး အဒိအတဲာ်န့ၣ် ပကသ့ၣ်ညါဘၣ် တၢ်ဂ့ၢ်မနုၤလဲၣ်.
ဖဲစီၤပီလူးအိၣ်လၢ ဝ့ၢ်အၤသ့ၣ်လၢ အအိၣ်လၢ ကြံးကီၢ်အခါ အသးဘၣ်တံာ်တာ်ဒိၣ်မး. ဝ့ၢ်အၤသ့ၣ်န့ၣ် အကဲဝဲ တၢ်လီၢ်ခိၣ်သ့ၣ်တခါလၢ ပှၤသိၣ်လိဝဲ စိခြ့ထံ, ဖျ့ထိၤ, အဲရံစတီထိၤ အတၢ်သိၣ်လိတဖၣ်. ဒီးပှၤအၤသ့ၣ်ဖိတဖၣ်န့ၣ် ပာ်ဒိၣ်တၢ်ဘူၣ်တၢ်ဘါဒိၣ်မး. အဝဲသ့ၣ် ဘူၣ်ထီၣ်ဘါထီၣ်ဝဲ ယွၤအိၣ်ဝဲအါမးအဃိ ဖဲစီၤပီလူး လဲၤလၢတၢ်လီၢ် တတီၤဂ့ၤတတီၤဂ့ၤန့ၣ် အထံၣ်ဝဲ ထဲတၢ်ဂီၤတၢ်ဖှီၣ်တဖၣ်. လၢတၢ်လုၢ်ဟံၣ်ပူၤမ့ၢ်ဂ့ၤ, လၢပှၤဆါတၢ်ပှ့ၤတၢ်အလီၢ်မ့ၢ်ဂ့ၤ လၢကျဲပူၤမ့ၢ်ဂ့ၤ အိၣ်ထဲတၢ်ဂီၤတၢ်ဖှီၣ်လီၤ. ဒီးကစၢ်ယွၤ အတၢ်ထံၣ် ဘၣ်ဃးဒီး တၢ်ဘါတၢ်ဂီၤတၢ်ဖှီၣ် အိၣ်ဒ်လဲၣ်န့ၣ် စီၤပီလူး သ့ၣ်ညါဝဲ. (၂ မိၤ ၂၀:၄, ၅) အဃိ ဒ်ယဟိဝၤယွၤအသိး စီၤပီလူးစ့ၢ်ကီး သးဘၣ်အၢဝဲ တၢ်ဂီၤတၢ်ဖှီၣ်တဖၣ်.
၂ ဖဲစီၤပီလူး လဲၤနုာ်လီၤလၢ တၢ်ဆါတၢ်ပှ့ၤအလီၢ်အခါ အဝဲကဖုးဘၣ်အသးဒိၣ်မး. ဖဲကလံၤစိး မုၢ်နုာ်တခီ အနၢၣ်ထံး လၢအအိၣ်ဘူးဒီး ပှၤဆါတၢ်ပှ့ၤတၢ် အတၢ်နုာ်လီၤအလီၢ်န့ၣ် အထံၣ်ဘၣ်ဝဲ ကစၢ်ဟ့ၢ်မ့ၤ အဂီၤလၢအလီၤသးဘၣ်အၢ အိၣ်ဝဲဒီဒူၣ်. စီၤပီလူးန့ၣ် အသးဆူၣ်လၢ တၢ်စံၣ်တဲၤတဲလီၤတၢ်မၤအဂီၢ်ဒိၣ်မး ဒီးတၢ်လီၢ်တတီၤအံၤန့ၣ် အိၣ်ထဲ ပှၤဘါထီၣ်တၢ်ဂီၤတၢ်ဖှီၣ်လဲလဲ အဃိ အကစံၣ်တဲၤတဲလီၤ အဝဲသ့ၣ်ဒ်လဲၣ်. မ့ၢ်အဝဲကပၢၤအသး ဒီးတဲတၢ်ဒီးပှၤဂၤ လၢတၢ်ပာ်ကဲအပူၤဧါ, အဝဲကဟးဃုတဲတၢ်ဂ့ၢ် သ့သ့ဘၣ်ဘၣ်ဒ်လဲၣ်. မ့ၢ်အဝဲကမၤစၢၤဘၣ် ပှၤတဂၤဂၤ ဒ်သိး အကသ့ၣ်ညါထီၣ် ယွၤလၢအမ့ၢ်အတီဧါ.
၃ ဖဲ မၤတၢ် ၁၇:၂၂-၃၁ န့ၣ်ပထံၣ်ဘၣ်လၢ စီၤပီလူးတဲတၢ်ဒီး ပှၤအၤသ့ၣ်ဖိလၢ အအိၣ်ဒီး တၢ်ကူၣ်သ့တဖၣ် ဒီးအဝဲတဲတၢ် လီၤထုးန့ၢ်သူၣ်ထုးန့ၢ်သး, တဲတၢ်သ့သ့ဘၣ်ဘၣ် ဒီးအိၣ်ဒီး တၢ်ပဲာ်ထံနီၤဖးတၢ်. ဖဲပမၤလိ စီၤပီလူးအဂ့ၢ်အခါ ပကသ့ၣ်ညါဘၣ်လၢ ဒ်သိး ပှၤဒိကနၣ်တၢ်ဖိတဖၣ် ကနၢ်ပၢၢ်တၢ်ဂ့ၢ်လၢ ပတဲအဂီၢ် ပကဘၣ်ဟးဃုတဲ တၢ်ဂ့ၢ်သ့သ့ဘၣ်ဘၣ်ဒ်လဲၣ်.
သိၣ်လိတၢ်လၢ “တၢ်ဆါတၢ်ပှ့ၤအလီၢ်” (မၤတၢ် ၁၇:၁၆-၂၁)
၄, ၅. လၢဝ့ၢ်အၤသ့ၣ်အပူၤန့ၣ် စီၤပီလူး လဲၤစံၣ်တဲၤတဲလီၤတၢ်လၢ တၢ်လီၢ်ဖဲလဲၣ် ဒီးပှၤဖဲန့ၣ်တဖၣ်န့ၣ် အကဲပှၤဒ်လဲၣ်.
၄ ဖဲစီၤပီလူး လဲၤလၢမံၤၡၢၤနရံၤ အတၢ်လဲၤ ခံဘျီတဘျီအခါ ကဘၣ်ဖဲ ခ.န ၅၀ န့ၣ်အလဲၤလၢ ဝ့ၢ်အၤသ့ၣ်. a ဖဲန့ၣ်န့ၣ် စီၤပီလူး အိၣ်ခိးဝဲ စီၤစံလၤ ဒီးစီၤတံၤမသ့း လၢအအိၣ်ဟဲက့ၤလၢ ဝ့ၢ်ဘ့းရံၤ ဒီးဖဲန့ၣ်အခါအ “သိၣ်လိဝဲ ပှၤယူဒၤဖိ” လၢ “ဘူၣ်ဘျီၣ်အပူၤ” ဒ်ညီနုၢ်အသိး. တကးဒံးဘၣ် အဝဲလဲၤစ့ၢ်ကီးလၢ ဝ့ၢ်အၤသ့ၣ် “လၢတၢ်ဆါတၢ်ပှ့ၤအလီၢ်” ဒ်သိးအကစံၣ်တဲၤတဲလီၤဝဲ ပှၤလၢအတမ့ၢ် ပှၤယူဒၤဖိတဖၣ်. (မၤတၢ် ၁၇:၁၇) ဝ့ၢ်အၤသ့ၣ် အတၢ်ဆါတၢ်ပှ့ၤအလီၢ်န့ၣ် အိၣ်ဝဲ ၁၂ အ့ကၢၢ် ဒီးအအိၣ်ဝဲလၢ အခရီၣ်ပီလဲး အကလံၤစိး မုၢ်နုာ်တခီ. တၢ်ဆါတၢ်ပှ့ၤအလီၢ်အံၤန့ၣ် တမ့ၢ်ထဲ ပှၤဆါတၢ်ပှ့ၤတၢ်ဘၣ် အမ့ၢ်စ့ၢ်ကီး တၢ်လီၢ်လၢ ပှၤကမၤတၢ်အိၣ်ဖှိၣ်အဂီၢ်. လံာ်တဘ့ၣ် တဲဝဲလၢ တၢ်လီၢ်တတီၤအံၤန့ၣ်မ့ၢ်ဝဲ “တၢ်လီၢ်ခိၣ်သ့ၣ်တတီၤလၢ ပှၤမၤစံပွါယ့, ထံဂ့ၢ်ကီၢ်ဂ့ၢ် ဒီးအပာ်ဖျါထီၣ်ဝဲ တၢ်ဆဲးတၢ်လၤ.” ပှၤအၤသ့ၣ်ဖိတဖၣ်န့ၣ် လဲၤတဲသကိးတၢ်ဖဲ တၢ်လီၢ်အဝဲန့ၣ်မုာ်မး, အဝဲသ့ၣ် တဲသကိးဝဲ တၢ်ဂ့ၢ်လၢ အဒိၣ်အယိာ်.
၅ စီၤပီလူး ကစံၣ်တဲၤတဲလီၤဝဲ ပှၤလၢတၢ်ဆါတၢ်ပှ့ၤအလီၢ်တဖၣ်အံၤအဂီၢ် တညီဝဲဘၣ်. ပှၤဖဲန့ၣ်တနီၤန့ၣ် အကဲဝဲ ပှၤအ့းပံၤကူၤရူးဖိ ဒီးပှၤစတီးအၤဖိ. ပှၤအ့းပံၤကူၤရူးဖိ ဒီးပှၤစတီးအၤဖိခံဒူၣ်န့ၣ် အတၢ်ထံၣ် တဒ်သိးလိာ်အသးဘၣ်. b ပှၤအ့းပံၤကူၤရူးဖိတဖၣ်န့ၣ် နာ်ဝဲလၢ တၢ်သးသမူန့ၣ် ဟဲကဲထီၣ်အတၢ်ဒၣ်ဝဲ. အဃိ အဝဲသ့ၣ် နာ်ဝဲလၢ “နမ့ၢ်သံန့ၣ် နတတူၢ်ဘၣ် တၢ်နးတၢ်ဖှီၣ် နီတမံၤလၢၤဘၣ်အဃိ နတလိၣ်ပျံၤ ကစၢ်ယွၤဘၣ်. နမၤတၢ်ဂ့ၤသ့ ဒီးနဝံသးစူၤ တၢ်အၢတၢ်သီသ့စ့ၢ်ကီး.” မ့မ့ၢ် ပှၤစတီးအၤဖိတဖၣ်န့ၣ် တနာ်ကစၢ်ယွၤဘၣ်. အဝဲသ့ၣ် နာ်ဝဲလၢ ပှၤကဘၣ် အိၣ်ဒီးတၢ်ကူၣ်သ့ ဒီးတၢ်သ့ၣ်ညါနၢ်ပၢၢ်န့ၣ် အရ့ဒိၣ်ဒိၣ်မး. ပှၤအ့းပံၤကူၤရူးဖိမ့ၢ်ဂ့ၤ ပှၤစတီးအၤဖိမ့ၢ်ဂ့ၤ တနာ်ဝဲ တၢ်ဂဲၤဆၢထၢၣ်သမူထီၣ်က့ၤ လၢခရံာ်အပျဲၢ်အဘီၣ်တဖၣ် သိၣ်လိဝဲန့ၣ်ဘၣ်. အဃိ အဝဲသ့ၣ်ခံဖုလၢာ်န့ၣ် အတၢ်စူၢ်တၢ်နာ် လီၤဆီလိာ်အသးဒီး ခရံာ်ဖိ အတၢ်စူၢ်တၢ်နာ် လၢအမ့ၢ်အတီ လၢစီၤပီလူး စံၣ်တဲၤတဲလီၤဝဲ.
၆, ၇. ဖဲစီၤပီလူး စံၣ်တဲၤတဲလီၤတၢ်အခါ ကြံးအပှၤကူၣ်ဘၣ်ကူၣ်သ့တဖၣ် မၤဝဲဒ်လဲၣ် ဒီးမုၢ်မဆါတနံၤအံၤ ပထံၣ်ဘၣ်ဒီး တၢ်အိၣ်သးဒ်န့ၣ် ဒ်လဲၣ်.
၆ ဖဲစီၤပီလူး စံၣ်တဲၤတဲလီၤတၢ်အခါ ကြံးအပှၤကူၣ်ဘၣ်ကူၣ်သ့တဖၣ် မၤဝဲဒ်လဲၣ်. အဝဲသ့ၣ်တနီၤ ကိးဝဲ စီၤပီလူးလၢ “ပှၤလၢအဟး တဲကြီတၢ်” မ့တမ့ၢ် “ပှၤဟးထၢ တၢ်ချံ.” (မၤတၢ် ၁၇:၁၈) ပှၤကူၣ်ဘၣ်ကူၣ်သ့တဂၤ တဲဝဲလၢ “တၢ်ကတိၤတဖျၢၣ်အံၤ လၢအခီၣ်ထံးန့ၣ် အဲၣ်ဒိးတဲဝဲ ထိၣ်ဆံးဆံးဖိလၢ အဟးဝ့ၤဝီၤထၢအီၣ်ဘု. ဒီးလၢခံန့ၣ် ပှၤသူဝဲတၢ်ကတိၤအံၤ ဒ်သိး ပှၤကကိးဝဲ ပှၤလၢအဟးဝ့ၤဝီၤထၢ တၢ်အီၣ်လၢအအိၣ်တ့ၢ် ဒီးတၢ်ဖိတၢ်လံၤ အကူာ်အခီတဖၣ် လၢပှၤဆါတၢ်ပှ့ၤတၢ်အလီၢ်. လၢခံန့ၣ် ပှၤသူဝဲ တၢ်ကတိၤအံၤ ဒ်တၢ်ကတိၤဒိ ဒ်သိး ပှၤကကိးဝဲ ပှၤလၢအဟးတဲက့ၤ တၢ်ဂ့ၢ်တၢ်ကျိၤလၢ အခိၣ်အခံတအိၣ်ဘၣ် ဒီးအတနၢ်ပၢၢ်ဝဲ တၢ်လၢအတဲဝဲတဖၣ် မူာ်မူာ်နီၢ်နီၢ်ဘၣ်.” အဃိ ပသ့ၣ်ညါဘၣ်လၢ ကြံးအပှၤကူၣ်ဘၣ်ကူၣ်သ့န့ၣ် အဲၣ်ဒိးတဲဝဲလၢ စီၤပီလူးန့ၣ် အတကျၢဘၣ် ဒီးအဟးတဲက့ၤ ပှၤတၢ်ကတိၤလၢ အနၢ်ဟူဘၣ်ဝဲ. ပကမၤလိဘၣ်လၢ စီၤပီလူးန့ၣ် ပှၤကိးအီၤဒ်န့ၣ်ဘၣ်ဆၣ် အသးတဟးဂီၤဘၣ်.
၇ လၢပစိၤခဲအံၤစ့ၢ်ကီး ပှၤမၤပှၤ ဒ်စီၤပီလူးအသိး. ခီဖျိလၢ ပတၢ်စူၢ်တၢ်နာ် ဒိးသန့ၤထီၣ်သးလၢ လံာ်စီဆှံ အဃိ ပှၤဟးကိးကြီန့ၢ်ပမံၤ ဒ်သိးကမၤမဲာ်ဆှးပှၤအဂီၢ်. သရၣ်တနီၤ တဲဝဲလၢ တၢ်သိၣ်လိလၢအမ့ၢ် တၢ်သးသမူအတၢ်လဲလိာ်သး တဆီဘၣ်တဆီန့ၣ် ပနာ်န့ၢ်အီၤသ့ ဒီးအတဲဝဲလၢ နမ့ၢ်ကဲ ပှၤလၢအဖၠဲးန့ၣ် နကတူၢ်လိာ် တၢ်သိၣ်လိတခါအံၤ. ဒီးအဝဲသ့ၣ် တဲဝဲလၢ ပှၤလၢ အတတူၢ်လိာ် တၢ်သိၣ်လိတခါအံၤဘၣ်န့ၣ် အကဲပှၤလၢ အတကျၢဘၣ်. ဒီးအဝဲသ့ၣ် အဲၣ်ဒိးဝဲလၢ ပှၤဂၤကထံၣ်ပှၤ ဒ်ပှၤလၢ အဟးတဲကြီတၢ် ခီဖျိလၢ ပဟးတဲဘၣ်ပှၤဂၤလၢ လံာ်စီဆှံ ဒီးတၢ်အုၣ်အသးလၢ တၢ်ဘၣ်တ့ခဲလၢာ်အကစၢ် အိၣ်ဝဲအဃိ. ပှၤမ့ၢ်တဲပှၤဒ်န့ၣ် သနာ်က့ ပသးတဟးဂီၤဘၣ်. လၢတၢ်န့ၣ်အလီၢ် ပတဲဘၣ်ပှၤဂၤလၢ တၢ်သးဒူအပူၤလၢ ပတၢ်ဘၣ်တ့ကစၢ် ယဟိဝၤယွၤ လၢအဖၠဲးဒိၣ်မးတဂၤန့ၣ် တ့လီၤဝဲ တၢ်သးသမူ ခဲလၢာ်လၢ ဟီၣ်ခိၣ်ချၢ.—လီၣ် ၄:၁၁.
၈. (က) ပှၤတနီၤန့ၣ် ဖဲအနၢ်ဟူဘၣ် စီၤပီလူး အတၢ်စံၣ်တဲၤတဲလီၤအဂ့ၢ်အခါ မၤဝဲဒ်လဲၣ်. (ခ) ဘၣ်မနုၤ ပှၤလဲၤကိး စီၤပီလူးလၢ အၤရံအါဖကၢးလဲၣ်. (ကွၢ်တၢ်ဂ့ၢ်အဘျဲၣ်.)
၈ မ့မ့ၢ် ပှၤအဂၤတနီၤလၢ အနၢ်ဟူဘၣ် စီၤပီလူး စံၣ်တဲၤတဲလီၤတၢ်လၢ တၢ်ဆါတၢ်ပှ့ၤအလီၢ်န့ၣ် တဲဝဲလၢ “ဖျါလၢအဝဲ စံၣ်တဲၤတဲလီၤတၢ် ဘၣ်ဃးဒီး ပှၤထံဂၤကီၢ်ဂၤဖိ အယွၤတဖၣ်အဂ့ၢ်.” (မၤတၢ် ၁၇:၁၈) မ့ၢ်စီၤပီလူး စံၣ်တဲၤတဲလီၤဝဲ ပှၤအၤသ့ၣ်ဖိတဖၣ်လၢ ယွၤလၢအသီတဂၤအဂ့ၢ်ဧါ. မ့မ့ၢ်ဘၣ်ဖုးဒ်န့ၣ်န့ၣ် တၢ်လီၤဘၣ်ယိၣ် အိၣ်လၢအဂီၢ်ဒိၣ်မး. လၢအပူၤကွံာ်န့ၣ် ပှၤပာ်ဒ့ၣ်ပာ်ကမၣ်စိခြ့ထံ ဒီးမၤသံအီၤ, မ့ၢ်လၢ အမၤဝဲဒ်န့ၣ် ဒီးတၢ်ဂ့ၢ်အဂၤတနီၤအဃိ. အဝဲသ့ၣ် ဆိကမိၣ်ဝဲလၢ စီၤပီလူး မၤဝဲဒ်န့ၣ်အဃိ ပှၤလဲၤကိးစီၤပီလူး လၢအၤရံအါဖကၢး ဒ်သိးအကၡဲပၠးဝဲ ပှၤအၤသ့ၣ်ဖိတဖၣ် လၢတၢ်ဂ့ၢ်လၢ အတဲဝဲတဖၣ်. c အဃိ စီၤပီလူး ကစံၣ်တဲၤတဲလီၤဝဲ ပှၤလၢအတသ့ၣ်ညါ လံာ်စီဆှံအဂ့ၢ်ဘၣ်တဖၣ် ဒ်လဲၣ်.
“ပှၤအၤသ့ၣ်ဖိသ့ၣ်ဧၢ, ယထံၣ်ဘၣ်လၢ” (မၤတၢ် ၁၇:၂၂, ၂၃)
၉-၁၁. (က) ဖဲစီၤပီလူး စးထီၣ်တဲတၢ်ဒီး ပှၤအၤသ့ၣ်ဖိတဖၣ်အခါ အဃုတဲဝဲတၢ်ဂ့ၢ် သ့သ့ဘၣ်ဘၣ်ဒ်လဲၣ်. (ခ) ဖဲပလဲၤစံၣ်တဲၤတဲလီၤတၢ် အခါ ပကွၢ်လိ စီၤပီလူး အဒိအတဲာ် ကသ့ဒ်လဲၣ်.
၉ ပကသ့ၣ်နီၣ်ထီၣ်လၢ စီၤပီလူးန့ၣ် အထံၣ်ဘၣ်ဝဲ တၢ်ဂီၤတၢ်ဖှီၣ်တဖၣ်အဃိ အသးဘၣ်တံာ်တာ်ဝဲဒိၣ်မး. အတတဲဆါဝဲ တၢ်ဘါတၢ်ဂီၤတၢ်ဖှီၣ် လိၤလိၤဘၣ်. အပာ်အသးမုာ်မုာ် ဒီးဃုတဲတၢ်ဂ့ၢ်တၢ်ကျိၤ သ့သ့ဘၣ်ဘၣ် ဒ်သိး ကထုးန့ၢ်ဝဲ ပှၤဒိကနၣ်တၢ်ဖိတဖၣ်အသး. အတဲဝဲလၢ “ပှၤအၤသ့ၣ်ဖိသ့ၣ်ဧၢ, ယထံၣ်ဘၣ်လၢ တၢ်ခဲလၢာ်အပူၤန့ၣ် သုယူးယီၣ် ကစၢ်တဖၣ် အါန့ၢ်ဒံး ပှၤဂၤ.” (မၤတၢ် ၁၇:၂၂) ပမ့ၢ်တဲလၢ ကျဲအဂၤတဘိန့ၣ် လီၤဂာ်ဒ်သိး စီၤပီလူး တဲအဝဲသ့ၣ်လၢ ‘ယထံၣ်ဘၣ်လၢ သုအဲၣ်ထူအဲၣ်ယွၤဒိၣ်မး.’ အဝဲသ့ၣ် သးဆူၣ်လၢ တၢ်ဘူၣ်တၢ်ဘါအဂီၢ်အဃိ စီၤပီလူး ပတြၢၤအဝဲသ့ၣ် လၢတၢ်ကူၣ်သ့အပူၤ. စီၤပီလူးသ့ၣ်ညါဝဲလၢ ပှၤတနီၤန့ၣ် တၢ်ဘူၣ်တၢ်ဘါကမၣ် အတၢ်သိၣ်လိ ဒိၣ်စိလၢ အဖီခိၣ်သနာ်က့ အဝဲသ့ၣ်န့ၣ် အကဲဒံးပှၤဂ့ၤ ဒီးဘၣ်သးသ့ၣ်ညါဝဲ တၢ်မ့ၢ်တၢ်တီဒံး. စီၤပီလူး အနီၢ်ကစၢ်ဒၣ်ဝဲစ့ၢ်ကီး လၢအပူၤကွံာ်န့ၣ် အကဲပှၤဒ်န့ၣ်. အတဲဝဲလၢ “ယတသ့ၣ်ညါဘၣ်အဃိ ယမၤဘၣ် ဒီးယတၢ်နာ် တအိၣ်ဘၣ်.”—၁ တံၤ ၁:၁၃.
၁၀ စီၤပီလူး တဲဝဲလၢ အထံၣ်ဘၣ်ဝဲ တၢ်အုၣ်အသးလၢ အပာ်ဖျါထီၣ်ဝဲ ပှၤအၤသ့ၣ်ဖိတဖၣ်န့ၣ် ပာ်ဒိၣ် တၢ်ဘူၣ်တၢ်ဘါဒိၣ်မး. အတဲဝဲလၢ အထံၣ်ဝဲလၢ တၢ်လုၢ်လီၢ်တခါအလိၤန့ၣ် ပှၤကွဲးလီၤဃာ် တၢ်ကတိၤလၢအမ့ၢ် “ယွၤလၢ ပတသ့ၣ်ညါအီၤဘၣ် တဂၤအဂီၢ်.” လံာ်တဘ့ၣ် တဲဝဲလၢ “ပှၤကြံးဖိတဖၣ် ဒီးပှၤတနီၤန့ၣ် ဖဲအဝဲသ့ၣ် ပာ်စီဆှံဝဲ တၢ်လုၢ်လီၢ် တဖျၢၣ်ဖျၢၣ်အခါ လၢတၢ်လုၢ်လီၢ်အလိၤန့ၣ် ညီနုၢ် အဝဲသ့ၣ် ကွဲးလီၤဝဲလၢ ‘ယွၤလၢ ပတသ့ၣ်ညါအီၤဘၣ် တဂၤအဂီၢ်.’ မ့ၢ်လၢ အဝဲသ့ၣ် ဘၣ်ယိၣ်ဝဲလၢ အဝဲသ့ၣ် ကသးပ့ၤနီၣ်ဘၣ်ဖုး ယွၤတဂၤဂၤ လၢအတၢ်ဘူၣ်ထီၣ်ဘါထီၣ်အပူၤ ဒီးယွၤတဂၤန့ၣ် ကသးပှံၢ်ထီၣ်ဘၣ်အဝဲသ့ၣ်.” အဃိ တၢ်လုၢ်လီၢ်အံၤန့ၣ် အပာ်ဖျါထီၣ်ဝဲလၢ ပှၤအၤသ့ၣ်ဖိတဖၣ်န့ၣ် နာ်ဝဲလၢ ယွၤလၢအဝဲသ့ၣ် တသ့ၣ်ညါဝဲဘၣ်န့ၣ် အိၣ်ဝဲတဂၤ. ဒ်သိး စီၤပီလူး ကစံၣ်တဲၤတဲလီၤ တၢ်သးခုကစီၣ်အဂီၢ် အတဲဝဲတၢ်လုၢ်လီၢ်တခါအံၤအဂ့ၢ်. အတဲဝဲလၢ “ယွၤလၢ သုဘူၣ်ထီၣ်ဘါထီၣ် ဘၣ်ဆၣ် သုတသ့ၣ်ညါအီၤဘၣ် တဂၤန့ၣ် ယစံၣ်တဲၤတဲလီၤသုလၢ အဂ့ၢ်.” (မၤတၢ် ၁၇:၂၃) စီၤပီလူးတဲတၢ် သ့သ့ဘၣ်ဘၣ်အဃိ ကဲဘျုးဝဲဒိၣ်မး. အတစံၣ်တဲၤတဲလီၤဝဲ ယွၤလၢအသီတဂၤအဂ့ၢ် ဒ်ပှၤဆိကမိၣ်ဝဲ အသိးဘၣ်. စီၤပီလူး တဲဘၣ်အဝဲသ့ၣ်လၢ ယွၤလၢအမ့ၢ်အတီ လၢအဝဲသ့ၣ် တသ့ၣ်ညါဝဲဘၣ်တဂၤအဂ့ၢ်ဟီ.
၁၁ ဖဲပလဲၤစံၣ်တဲၤတဲလီၤတၢ်အခါ ပကွၢ်လိ စီၤပီလူး ကသ့ဒ်လဲၣ်. ပှၤတဂၤပာ်ဒိၣ် တၢ်ဘူၣ်တၢ်ဘါဧါ တပာ်ဒိၣ်ဝဲဘၣ်ဧါန့ၣ် ပသ့ၣ်ညါသ့ခီဖျိ ပပလီၢ်သးလၢ အတၢ်ကူတၢ်သိး, အတၢ်ကယၢကယဲ ဒီးအတၢ်ဖိတၢ်လံၤတနီၤ လၢအအိၣ်လၢ အဟံၣ်. ဒီးပတဲအီၤ ဒ်အံၤသ့စ့ၢ်ကီး ‘ယကွၢ်နၤန့ၣ် ဖျါလၢ နပာ်ဒိၣ် တၢ်ဘူၣ်တၢ်ဘါ. ယအဲၣ်ဒိး တဲသကိးတၢ်ဒီး ပှၤဒ်သိးနၤလီၤ.’ ပမ့ၢ်သ့ၣ်ညါ အတၢ်စူၢ်တၢ်နာ်န့ၣ် ပဃုတဲတၢ်ဂ့ၢ်လၢ အဝဲကတူၢ်လိာ်ဝဲအဂီၢ်သ့. ပကဘၣ် သ့ၣ်နီၣ်ထီၣ်လၢ ပတၢ်တိာ်ပာ်န့ၣ် တမ့ၢ်လၢ ပကလဲၤတဲဟးဂီၤ အဝဲသ့ၣ် အတၢ်စူၢ်တၢ်နာ်ဘၣ်. ပကဘၣ် သ့ၣ်နီၣ်ထီၣ်လၢ ပဒီပုၢ်ဝဲၢ်မုၣ်ခွါ အါဂၤစ့ၢ်ကီး လၢအပူၤကွံာ်န့ၣ် အဝဲသ့ၣ်နာ်ဝဲ သပှၢ်တၢၢ်လၢ တၢ်ဘူၣ်တၢ်ဘါကမၣ် အတၢ်သိၣ်လိတဖၣ်န့ၣ် ဘၣ်စ့ၢ်ကီး.
ဃုတဲတၢ်ဂ့ၢ်တၢ်ကျိၤ သ့သ့ဘၣ်ဘၣ် လၢနပှၤဒိကနၣ်တၢ်ဖိတဖၣ် ကဘၣ်သူၣ်ဘၣ်သးဝဲ
ကစၢ်ယွၤ “အိၣ်တယံၤဒီး ပဝဲနီတဂၤဘၣ်” (မၤတၢ် ၁၇:၂၄-၂၈)
၁၂. လၢတၢ်အိၣ်သးအဖီခိၣ် စီၤပီလူး ဆီတလဲ အတၢ်စံၣ်တဲၤတဲလီၤ အကျိၤအကျဲ ဒ်လဲၣ်.
၁၂ စီၤပီလူး ဃုတဲဝဲ တၢ်ဂ့ၢ်လၢ ပှၤအၤသ့ၣ်ဖိတဖၣ် ကဘၣ်သးဝဲအဂီၢ်လံ သနာ်က့ အဝဲဆဲးစံၣ်တဲၤတဲလီၤတၢ် ကန့ၢ်ဒံးဧါ. စီၤပီလူး သ့ၣ်ညါဝဲလၢ ပှၤဒိကနၣ်အီၤ အါတက့ၢ်န့ၣ် အကဲဝဲ ကြံးအပှၤကူၣ်ဘၣ်ကူၣ်သ့တဖၣ် ဒီးအဝဲသ့ၣ် တသ့ၣ်ညါ လံာ်စီဆှံဘၣ်အဃိ အဆီတလဲက့ၤ အတၢ်စံၣ်တဲၤတဲလီၤတၢ် အကျိၤအကျဲ. အဆိကတၢၢ်န့ၣ် အတဲဝဲ တၢ်ဂ့ၢ်လၢ လံာ်စီဆှံပူၤ ဘၣ်ဆၣ် အတကိးထီၣ်ဝဲ လံာ်စီဆှံအဆၢတဖၣ်ဘၣ်. ဒီးအဂၤတခါန့ၣ် အသူဝဲ တၢ်ကတိၤလၢအမ့ၢ် “ပ” ဒီး “ပဝဲ” အဃိ အပာ်ဖျါထီၣ်လၢ အနၢ်ပၢၢ်စၢၤ ပှၤဒိကနၣ်တၢ်ဖိတဖၣ် ဒီးအီၤစ့ၢ်ကီး အဒ်သိးဒီး ပှၤဒိကနၣ်တၢ်ဖိတဖၣ်လီၤ. တကးဒံးဘၣ် အတဲဝဲ တၢ်ဂ့ၢ်တၢ်ကျိၤလၢ ကြံးအလံာ်အလဲၢ်တဖၣ်အပူၤ အဃိ အပာ်ဖျါထီၣ်ဝဲလၢ တၢ်လၢအတဲဝဲတဖၣ်န့ၣ် အိၣ်လၢ အဝဲသ့ၣ် အလံာ်အလဲၢ်တဖၣ်အပူၤ. ပကဆဲး မၤလိသကိး တၢ်ဂ့ၢ်လၢ စီၤပီလူးတဲဝဲ. စီၤပီလူး တဲဘၣ်ဝဲ ပှၤအၤသ့ၣ်ဖိတဖၣ် လၢတၢ်မ့ၢ်တၢ်တီ ဘၣ်ဃးဒီး ယွၤလၢအဝဲသ့ၣ် တသ့ၣ်ညါဝဲဘၣ်တဂၤအဂ့ၢ် ဒ်လဲၣ်.
၁၃. စီၤပီလူး ပာ်ဖျါထီၣ်ဝဲလၢ တၢ်အိၣ်လၢမူခိၣ် ဒီးဟီၣ်ခိၣ်ပူၤ ခဲလၢာ်န့ၣ် ဟဲကဲထီၣ်ဒ်လဲၣ် ဒီးအတၢ်ကတိၤတဖၣ်အံၤန့ၣ် ပာ်ဖျါထီၣ်ဝဲ တၢ်မနုၤလဲၣ်.
၁၃ ကစၢ်ယွၤတ့လီၤ တၢ်ခဲလၢာ်. စီၤပီလူး တဲဝဲလၢ “ကစၢ်ယွၤလၢ အတ့လီၤ ဟီၣ်ခိၣ်ဒီးတၢ်အိၣ်လၢ အပူၤခဲလၢာ်န့ၣ် အမ့ၢ်ဝဲ မူခိၣ်ဒီးဟီၣ်ခိၣ် အကစၢ်အဃိ အဝဲတအိၣ်လၢ တၢ်လုၢ်ဟံၣ်လၢ ပှၤတ့ထီၣ်ဝဲလၢပှၤစု အပူၤဘၣ်.” d (မၤတၢ် ၁၇:၂၄) တၢ်အိၣ်လၢ မူခိၣ်ဒီးဟီၣ်ခိၣ် ခဲလၢာ်န့ၣ် တဟဲကဲထီၣ်ဒၣ်အတၢ်ဘၣ်. ယွၤလၢအမ့ၢ်အတီတဂၤ တ့လီၤဝဲ တၢ်ခဲလၢာ်. (စံး ၁၄၆:၆) ကြံးအကစၢ်မုၣ် အဲသနၤ ဒီးယွၤအဂၤတဖၣ် ကဒိးန့ၢ်ဘၣ် တၢ်မၤလၤကပီၤအဂီၢ် အဝဲသ့ၣ် လိၣ်ဘၣ်ဝဲ တၢ်လုၢ်ဟံၣ် ဒီးတၢ်လုၢ်လီၢ်တဖၣ်. ဘၣ်ဆၣ် မ့မ့ၢ် ယွၤလၢအတ့လီၤ တၢ်ခဲလၢာ်တဂၤန့ၣ် အကဲဝဲ ယွၤလၢအဒိၣ်အထီကတၢၢ် လၢမူခိၣ် ဒီးဟီၣ်ခိၣ် အဃိ အဝဲတအိၣ်လၢ တၢ်လုၢ်ဟံၣ်လၢ ပှၤတ့အီၤလၢ ပှၤစုဘၣ်. (၁ စီၤပၤ ၈:၂၇) စီၤပီလူး အတၢ်ကတိၤန့ၣ် ပာ်ဖျါထီၣ်ဝဲ လီၤတံၢ်လီၤဆဲးလၢ ယွၤလၢအမ့ၢ်အတီတဂၤန့ၣ် အစိအကမီၤ ဒိၣ်န့ၢ်ဒံး တၢ်ဂီၤတၢ်ဖှီၣ်လၢ ပှၤဟီၣ်ခိၣ်ဖိတဖၣ်တ့ဝဲ လၢအအိၣ်လၢ တၢ်လုၢ်ဟံၣ်တဖၣ်အပူၤ စၢၢ်တလၢၢ်ဒံး.—ၡါ ၄၀:၁၈–၂၆.
၁၄. ကစၢ်ယွၤ တလိၣ်ဘၣ်တၢ်လၢပအိၣ် နီတမံၤဘၣ်န့ၣ် စီၤပီလူး ပာ်ဖျါထီၣ်ဝဲဒ်လဲၣ်.
၁၄ ကစၢ်ယွၤန့ၣ် တလိၣ်ဘၣ်ဝဲ ပှၤဟီၣ်ခိၣ်ဖိတဖၣ် အတၢ်မၤစၢၤဘၣ်. ပှၤလၢအဘါ တၢ်ဂီၤတၢ်ဖှီၣ်တဖၣ်န့ၣ် ကယၢကယဲထီၣ်ဝဲ အတၢ်ဂီၤတၢ်ဖှီၣ်တဖၣ်လၢ တၢ်ကံးညာ်လၢ အဃံအလၤ, လဲၤဟ့ၣ်ဝဲတၢ်ဟ့ၣ်လၢ အလုၢ်ဒိၣ်ပှ့ၤဒိၣ်တဖၣ် ဒီးလုၢ်ထီၣ်န့ၢ်ဝဲ တၢ်အီၣ်တၢ်အီတဖၣ်. အဝဲသ့ၣ် ဆိကမိၣ်ဝဲလၢ အတၢ်ဂီၤတၢ်ဖှီၣ်တဖၣ် လိၣ်ဘၣ်ဝဲ တၢ်သ့ၣ်တဖၣ်န့ၣ်. ဘၣ်ဆၣ် ကြံးအပှၤကူၣ်ဘၣ်ကူၣ်သ့ လၢအဒိကနၣ် စီၤပီလူး တနီၤန့ၣ် ဘၣ်သ့ၣ်သ့ၣ် ကဆိကမိၣ်ဘၣ်ဝဲလၢ ယွၤတဖၣ် တလိၣ်ဘၣ်တၢ်လၢ ပှၤဟီၣ်ခိၣ်ဖိအအိၣ် နီတမံၤဘၣ်. အဃိ အဝဲသ့ၣ် ကတူၢ်လိာ်ဝဲ စီၤပီလူး အတၢ်ကတိၤလၢအမ့ၢ် ကစၢ်ယွၤ “တလိၣ်ဘၣ် ပှၤဟီၣ်ခိၣ်ဖိတဖၣ် မၤန့ၢ်တၢ်လၢ အဂီၢ်နီတမံၤဘၣ်.” တၢ်ဘၣ်တ့ကစၢ်န့ၣ် အတလိၣ်ဘၣ် တၢ်လၢ ပှၤဟီၣ်ခိၣ်ဖိအအိၣ် နီတမံၤဘၣ်. လၢတၢ်န့ၣ်အလီၢ် ကစၢ်ယွၤ ဟ့ၣ်လီၤပှၤ “သးသမူ, ဒုးကသါပှၤ ဒီးဟ့ၣ်ပှၤတၢ်အဂၤ ခဲလၢာ်” ဒီးဟ့ၣ်လီၤပှၤ မုၢ်, တၢ်စူၤထံ ဒီးဟီၣ်ခိၣ်ညၣ်လၢ အဒုးမဲထီၣ်သၣ်ထီၣ်တၢ်. (မၤတၢ် ၁၇:၂၅; ၁ မိၤ ၂:၇) အဃိ ကစၢ်ယွၤ လၢအဟ့ၣ်လီၤပှၤ တၢ်ခဲလၢာ်တဂၤအံၤ တလိၣ်ဘၣ်တၢ်လၢပအိၣ် နီတမံၤဘၣ်.
၁၅. ပှၤအၤသ့ၣ်ဖိတဖၣ်န့ၣ် အဆိကမိၣ်လီၤသးလၢ အဂ့ၤဒိၣ်န့ၢ်ဒံး ပှၤလၢအတကဲ ပှၤကြံးဖိတဖၣ်အဃိ စီၤပီလူး ဘှီဘၣ်ထီၣ် အဝဲသ့ၣ်ဒ်လဲၣ် ဒီးပန့ၢ်ဘၣ် တၢ်မၤလိလၢ စီၤပီလူးအအိၣ် ဒ်လဲၣ်.
၁၅ ကစၢ်ယွၤတ့လီၤ ပှၤဟီၣ်ခိၣ်ဖိ. ပှၤအၤသ့ၣ်ဖိတဖၣ်န့ၣ် အဆိကမိၣ်ဝဲလၢ အဂ့ၤဒိၣ်န့ၢ်ဒံး ပှၤလၢအတမ့ၢ် ပှၤကြံးဖိတဖၣ်. ဘၣ်ဆၣ် တၢ်ပာ်သူၣ်ပာ်သးတခါအံၤန့ၣ် တဘၣ်လိာ်သးဒီး လံာ်စီဆှံ အတၢ်သိၣ်တၢ်သီဘၣ်. (၅ မိၤ ၁၀:၁၇) ဘၣ်ဃးဒီး တၢ်ဂ့ၢ်တခါအံၤန့ၣ် စီၤပီလူး တဲတၢ်ဒီး အဝဲသ့ၣ်လၢ တၢ်ကူၣ်သ့အပူၤ. အဝဲတဲဝဲလၢ ကစၢ်ယွၤ “ဒုးအိၣ်ထီၣ် ပှၤဟီၣ်ခိၣ်ဖိ ကိးကလုာ်ဒဲး . . . ခီဖျိလၢ ပိာ်ခွါတဂၤ.” အဃိ ပှၤလၢ အဒိကနၣ်အီၤတဖၣ်န့ၣ် ကဆိကမိၣ်ထံထီၣ်တၢ်တစဲး. (မၤတၢ် ၁၇:၂၆) စီၤပီလူး တဲဝဲ စီၤအၤဒၣ်အဂ့ၢ် လၢအအိၣ်လၢ လံာ် ၁ မိၤၡ့ အပူၤ ဒီးစီၤအၤဒၣ်န့ၣ် ပှၤဟီၣ်ခိၣ်ဖိခဲလၢာ် ဟဲလီၤစၢၤလီၤသွဲၣ်လၢအအိၣ်. (၁ မိၤ ၁:၂၆-၂၈) ပှၤဟီၣ်ခိၣ်ဖိခဲလၢာ်န့ၣ် အဟဲလီၤစၢၤလၢ ပှၤထဲတဂၤအအိၣ်အဃိ ကလုာ်ဒူၣ်တဒူၣ်ဂ့ၤတဒူၣ်ဂ့ၤ တဂ့ၤန့ၢ် ကလုာ်ဒူၣ်အဂၤ နီတဒူၣ်ဘၣ်. ဖဲန့ၣ်န့ၣ် ပှၤလၢအဒိကနၣ် စီၤပီလူးတဲတၢ်တဖၣ်န့ၣ် ကနၢ်ပၢၢ်ထီၣ် တၢ်လၢစီၤပီလူး အဲၣ်ဒိးတဲဝဲ. အဃိ ပန့ၢ်ဘၣ် တၢ်မၤလိ ဒ်လဲၣ်. ဖဲပဟးစံၣ်တဲၤတဲလီၤတၢ်အခါ ပအဲၣ်ဒိး တဲနၢ်ပၢၢ်ပှၤဂၤ တၢ်မ့ၢ်တၢ်တီ လၢတၢ်ကူၣ်သ့အပူၤ ဘၣ်ဆၣ် ပတအဲၣ်ဒိး မၤလီၤစှၤ တၢ်မ့ၢ်တၢ်တီ အကံၢ်အစီ ဒ်သိး ပှၤဂၤကသးအိၣ်တူၢ်လိာ်ဝဲ အဂီၢ်ဘၣ်.
၁၆. ကစၢ်ယွၤ တိာ်ပာ်ဝဲလၢ ပှၤဟီၣ်ခိၣ်ဖိတဖၣ် ကမၤမနုၤလဲၣ်.
၁၆ ကစၢ်ယွၤ အဲၣ်ဒိးဝဲလၢ ပှၤဟီၣ်ခိၣ်ဖိတဖၣ် ကရ့ဒီးအီၤ ဘူးဘူးတံၢ်တံၢ်. ပှၤကူၣ်ဘၣ်ကူၣ်သ့ လၢအဒိကနၣ် စီၤပီလူးတဖၣ်န့ၣ် တဲအါလိာ်အသး ဘၣ်ဃးဒီး တၢ်အိၣ်မူ ကပှဲၤဒီး တၢ်သးခုနီၢ်ကီၢ်အဂီၢ် ပကဘၣ်မၤဒ်လဲၣ်အဂ့ၢ်. အဝဲသ့ၣ် တဲအါလိာ်သး တၢ်ဂ့ၢ်တခါအံၤ အိၣ်ဝဲဖးယံာ်လံသနာ်က့ အတထံၣ်န့ၢ် တၢ်စံးဆၢလၢ အလီၤသူၣ်မံသးမုာ်ဘၣ်. ဘၣ်ဆၣ် စီၤပီလူး ပာ်ဖျါထီၣ်ဝဲ ဘၣ်ဃးဒီး တၢ်ဘၣ်တ့ကစၢ် တိာ်ပာ်ဝဲလၢ ပှၤဟီၣ်ခိၣ်ဖိတဖၣ် ကမၤမနုၤလဲၣ်. အဝဲတဲဝဲလၢ “ဃု ကစၢ်ယွၤ . . . ပှၤမ့ၢ်ဂုာ်ကျဲးစၢးဃု ကစၢ်ယွၤန့ၣ် ပှၤကထံၣ်န့ၢ်အီၤ သပှၢ်ကတၢၢ်လီၤ. နီၢ်ကီၢ်န့ၣ် ကစၢ်ယွၤ အိၣ်တယံၤဒီး ပဝဲနီတဂၤဘၣ်.” (မၤတၢ် ၁၇:၂၇) အဃိ ကစၢ်ယွၤလၢ ပှၤအၤသ့ၣ်ဖိတဖၣ် တသ့ၣ်ညါဝဲတဂၤအံၤန့ၣ် ပှၤအၤသ့ၣ်ဖိတဖၣ် သ့ၣ်ညါထီၣ်ဝဲအဂ့ၢ်သ့. အဝဲ အိၣ်တယံၤဒီး ပှၤလၢ အဃုအီၤနီၢ်ကီၢ် ဒီးပှၤလၢ အဲၣ်ဒိးသ့ၣ်ညါအီၤန့ၣ်ဘၣ်. (စံး ၁၄၅:၁၈) စီၤပီလူး တဲဝဲ တၢ်ကတိၤ လၢအမ့ၢ် “ပဝဲ” အဃိ အပာ်ဖျါထီၣ်လၢ ပှၤလၢအကဘၣ် “ဃု” မ့တမ့ၢ် “ဂုာ်ကျဲးစၢးဃု” ကစၢ်ယွၤ အကျါန့ၣ် ပၣ်ဃုာ်ဒီးအနီၢ်ကစၢ်စ့ၢ်ကီး.
၁၇, ၁၈. ဘၣ်မနုၤအဃိ ပှၤဟီၣ်ခိၣ်ဖိတဖၣ် ကဘၣ်အိၣ်ဒီးသးလၢ အဲၣ်ဒိးသ့ၣ်ညါ ကစၢ်ယွၤလဲၣ်. ဘၣ်ဃးဒီး စီၤပီလူး စံၣ်တဲၤတဲလီၤတၢ် အကျိၤအကျဲန့ၣ် ပန့ၢ်ဘၣ် တၢ်မၤလိဒ်လဲၣ်.
၁၇ ပှၤဟီၣ်ခိၣ်ဖိ ကဘၣ်အိၣ်ဒီး သးလၢအဲၣ်ဒိးသ့ၣ်ညါ ကစၢ်ယွၤ. စီၤပီလူး တဲဝဲလၢ “ပမူ, ပဟူးပဂဲၤ ဒီးပဟဲကဲထီၣ်” ခီဖျိလၢ ကစၢ်ယွၤအဃိ. ဘၣ်ဃးဒီး တၢ်ကတိၤလၢ စီၤပီလူး တဲဝဲအံၤန့ၣ် ပှၤကူၣ်ဘၣ်ကူၣ်သ့တနီၤ တဲဝဲလၢ စီၤပီလူးန့ၣ် အတဲဝဲ ပှၤကြံးဖိလၢ အကွဲးထါ အံဖံၤမံနဒံၤ အတၢ်ကတိၤ. အံဖံၤမံနဒံၤန့ၣ် အအိၣ်မူတ့ၢ်လၢ အပူၤကွံာ်ဖးယံာ် ဒီးပှၤအၤသ့ၣ်ဖိတဖၣ် ပာ်ကဲအီၤဒိၣ်မး. တကးဒံးဘၣ် စီၤပီလူး တဲဘၣ်အဝဲသ့ၣ် တၢ်ဂ့ၢ်အဂၤတခါလၢ ဘၣ်ဃးဒီး ဘၣ်မနုၤအဃိ ပှၤဟီၣ်ခိၣ်ဖိတဖၣ်န့ၣ် ကြၢးဃုသ့ၣ်ညါ ကစၢ်ယွၤအဂ့ၢ်လဲၣ်. ဘၣ်ဃးဒီး ကစၢ်ယွၤန့ၣ် စီၤပီလူး တဲဝဲလၢ “ဒ်ပှၤကွဲးထါလၢ သုကျါတနီၤ တဲဝဲအသိး ‘ပဝဲစ့ၢ်ကီး ပမ့ၢ်အဝဲဒၣ် အဖိတဖၣ်လီၤ.’” (မၤတၢ် ၁၇:၂၈) စီၤပီလူး ပာ်ဖျါထီၣ်ဝဲလၢ ပှၤဟီၣ်ခိၣ်ဖိတဖၣ်န့ၣ် ကဘၣ်အိၣ်ဒီး တၢ်ရ့လိာ်သးဒီး ကစၢ်ယွၤ, မ့ၢ်လၢကစၢ်ယွၤန့ၣ် အတ့လီၤဝဲ ပှၤဟီၣ်ခိၣ်ဖိတဂၤ လၢပှၤဟီၣ်ခိၣ်ဖိ ခဲလၢာ် ဟဲလီၤစၢၤလၢအအိၣ်အဃိ. စီၤပီလူး ဟံန့ၢ်ဝဲ တၢ်ကတိၤလၢ ကြံးအလံာ်အလဲၢ်တဖၣ်အပူၤ အဃိ ပှၤဒိကနၣ်အီၤတဖၣ်အံၤ ကဘၣ်သူၣ်ဘၣ်သး တၢ်လၢအတဲဝဲ. e ပဝဲစ့ၢ်ကီး ဒ်စီၤပီလူးအသိး ဖဲပစံၣ်တဲၤတဲလီၤတၢ်အခါ ပတဲတၢ်ကတိၤလၢ လံာ်ပီညါဂံၢ်ထံး ဒီးလံာ်လဲၢ်အဂၤတဖၣ် ဖဲအကြၢးသ့. အဒိ ပမ့ၢ်ဟံန့ၢ် တၢ်ဂ့ၢ်တၢ်ကျိၤလၢ လံာ်လဲၢ်လၢ ပှၤနာ်န့ၢ်အီၤသ့ ဒီးတဲဘၣ် ပှၤလၢအတကဲ ယဟိဝၤပှၤအုၣ်အသးတဖၣ်လၢ တၢ်ဘူၣ်တၢ်ဘါကမၣ် အတၢ်စူၢ်တၢ်နာ်တနီၤ ဟဲလီၤစၢၤဝဲ ဖဲလဲၣ်န့ၣ် ဘၣ်သ့ၣ်သ့ၣ် အဝဲသ့ၣ် ကတူၢ်လိာ်ဝဲ.
၁၈ စီၤပီလူး တဲဖျါထီၣ် တၢ်မ့ၢ်တၢ်တီ အရ့ဒိၣ်ဒိၣ်မး လၢအဘၣ်ဃးဒီး ကစၢ်ယွၤ ဒီးအဝဲသူဝဲ တၢ်ကတိၤသ့သ့ဘၣ်ဘၣ် လၢတၢ်ကူၣ်သ့အပူၤ. ဖဲစီၤပီလူးတဲဘၣ် ပှၤအၤသ့ၣ်ဖိတဖၣ်လၢ တၢ်မ့ၢ်တၢ်တီလၢ အရ့ဒိၣ်အံၤအခါ အဝဲအဲၣ်ဒိးလၢ ပှၤအၤသ့ၣ်ဖိတဖၣ် ကမၤမနုၤလဲၣ်န့ၣ် အတဲဖျါထီၣ်ဝဲ တဘျီဃီလီၤ. အတဲဝဲဒ်လဲၣ်.
“ပှၤခဲလၢာ်လၢ အအိၣ်လၢ တၢ်လီၢ်ကိးတီၤဒဲး . . . ကြၢးပီၢ်ယၢ်လီၤက့ၤအသး” (မၤတၢ် ၁၇:၂၉-၃၁)
၁၉, ၂၀. (က) ပှၤတကြၢး ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်လၢ ပှၤဟီၣ်ခိၣ်ဖိတ့ဝဲဘၣ်န့ၣ် စီၤပီလူး တဲဖျါထီၣ်ဝဲ လၢတၢ်ကူၣ်သ့အပူၤ ဒ်လဲၣ်. (ခ) ပှၤလၢအနၢ်ဟူ တၢ်လၢစီၤပီလူး တဲဝဲတဖၣ်န့ၣ် ကဘၣ်မၤမနုၤလဲၣ်.
၁၉ စီၤပီလူး ဟ့ၣ်ဂံၢ်ဟ့ၣ်ဘါဝဲ ပှၤလၢအဒိကနၣ်အီၤတဖၣ် လၢကမၤထွဲဝဲ တၢ်လၢအဝဲသ့ၣ် နၢ်ဟူဘၣ်ဝဲ. အဝဲသူက့ၤဝဲ တၢ်ကတိၤလၢ ကြံးအလံာ်အလဲၢ်တဖၣ်အပူၤ ဒီးတဲဝဲလၢ “အဃိ ဒ်ပမ့ၢ် ကစၢ်ယွၤ အဖိအလံၤအသိး ပတကြၢးဆိကမိၣ်လၢ ကစၢ်ယွၤန့ၣ် မ့ၢ်တၢ်လၢ အလီၤဂာ်ဒီး ထူ, စ့ မ့တမ့ၢ် လၢၢ်လၢ ပှၤဟီၣ်ခိၣ်ဖိစိးပျၤ ဒီးတ့ထီၣ်ဝဲန့ၣ်ဘၣ်.” (မၤတၢ် ၁၇:၂၉) ဆိကမိၣ်ကွၢ်နီၤ, ကစၢ်ယွၤ တ့လီၤပှၤဟီၣ်ခိၣ်ဖိအဃိ ကစၢ်ယွၤန့ၣ် အလီၤဂာ်ဒီး တၢ်ဂီၤတၢ်ဖှီၣ်လၢ ပှၤဟီၣ်ခိၣ်ဖိ တ့အီၤတဖၣ် ကသ့ဒ်လဲၣ်. ကစၢ်ယွၤန့ၣ် အတကဲဝဲ တၢ်ဂီၤတၢ်ဖှီၣ်လၢ ပှၤဟီၣ်ခိၣ်ဖိတ့ဝဲဘၣ်. အဃိ ပထံၣ်ဘၣ်လၢ ပှၤတကြၢး ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်ဘၣ်န့ၣ် စီၤပီလူး တဲနၢ်ပၢၢ်ဝဲ ပှၤအၤသ့ၣ်ဖိတဖၣ် လၢတၢ်ကူၣ်သ့အပူၤ. (စံး ၁၁၅:၄-၈; ၡါ ၄၄:၉-၂၀) စီၤပီလူး သူဝဲ တၢ်ကတိၤလၢ “ပတကြၢး” အဃိ ပှၤဒိကနၣ်တၢ်ဖိတဖၣ် ကတူၢ်လိာ် အတၢ်ဟ့ၣ်ကူၣ်အဂီၢ် ကညီဒိၣ်ဝဲတစဲး.
၂၀ စီၤပီလူး ပာ်ဖျါထီၣ်န့ၢ်ဝဲ ပှၤဒိကနၣ်တၢ်ဖိတဖၣ် ပျီပျီ လၢအဝဲသ့ၣ် ကဘၣ်မၤ တၢ်တမံၤမံၤ. အဝဲတဲဝဲလၢ “ဖဲပှၤတသ့ၣ်ညါအီၤ ဒံးဘၣ်အခါ ကစၢ်ယွၤ ကွၢ်ကပာ်ကွံာ် တၢ်ကမၣ်တဖၣ်အံၤလီၤ. သနာ်က့ မ့မ့ၢ်ခဲအံၤ အဝဲတဲဘၣ် ပှၤခဲလၢာ်လၢ အအိၣ်လၢ တၢ်လီၢ်ကိးတီၤဒဲးလၢ အဝဲသ့ၣ် ကြၢးပီၢ်ယၢ်လီၤက့ၤအသး.” (မၤတၢ် ၁၇:၃၀) စီၤပီလူး တဲဝဲလၢ ပှၤကဘၣ် ပီၢ်ယၢ်လီၤသးအဃိ ဘၣ်သ့ၣ်သ့ၣ် ပှၤလၢအဒိကနၣ်အီၤ တနီၤန့ၣ် ကဖုးဘၣ်အသး. ဘၣ်ဆၣ် စီၤပီလူး တဲနၢ်ပၢၢ်အဝဲသ့ၣ် တၢ်ဂ့ၢ်ဝံၤလံအဃိ အဝဲသ့ၣ် ကသ့ၣ်ညါလီၤအသးလၢ ကစၢ်ယွၤ ဟ့ၣ်အီၤသးသမူ ဒီးအဝဲသ့ၣ် အိၣ်မူဝဲ ဒ်လဲၣ်န့ၣ် အကဘၣ်ၡဲက့ၤတၢ်ဂ့ၢ်ဒီး ကစၢ်ယွၤ. အဝဲသ့ၣ် ကဘၣ်ဃု ကစၢ်ယွၤ, ဃုသ့ၣ်ညါ တၢ်မ့ၢ်တၢ်တီလၢ ဘၣ်ဃးဒီးယွၤ ဒီးအိၣ်မူဒ် ကစၢ်ယွၤ အတၢ်ဘၣ်သးအသိး. အဃိ ပှၤအၤသ့ၣ်ဖိတဖၣ်န့ၣ် ကဘၣ်တူၢ်လိာ်ဝဲလၢ တၢ်ဘါတၢ်ဂီၤတၢ်ဖှီၣ်န့ၣ် မ့ၢ်တၢ်လၢအကမၣ် ဒီးကဘၣ်ပာ်တ့ၢ်ကွံာ် တၢ်ဂီၤတၢ်ဖှီၣ်.
၂၁, ၂၂. စီၤပီလူး ကျၢၢ်တံၢ်ဝဲ အတၢ်ကတိၤ ဒ်လဲၣ်. ဒီးတၢ်ကတိၤတဖၣ်အံၤ အဘၣ်ထွဲဒီးပှၤဒ်လဲၣ်.
၂၁ စီၤပီလူး တဲဝဲ တၢ်ကတိၤကျၢၢ်တံၢ် လၢအကဟ့ၣ်ဆူၣ်ထီၣ်ပှၤသး. အဝဲတဲဝဲလၢ “[ကစၢ်ယွၤ] ပာ်ပနီၣ် မုၢ်နံၤလၢ အကစံၣ်ညီၣ်ဟီၣ်ခိၣ် တီတီလိၤလိၤ ခီဖျိပှၤတဂၤ လၢအဝဲ ဃုထၢထီၣ်ဝဲလီၤ. ဘၣ်ဃးဒီး တၢ်ဂ့ၢ်အံၤန့ၣ် အဝဲဟ့ၣ် ပှၤကိးဂၤဒဲး တၢ်အုၣ်အသး ခီဖျိလၢ အဝဲဒုးဂဲၤဆၢထၢၣ် ပှၤတဂၤန့ၣ်လၢ တၢ်သံအဃိလီၤ.” (မၤတၢ် ၁၇:၃၁) တၢ်စံၣ်ညီၣ်အနံၤ ကဟဲဝဲအဃိ အဝဲသ့ၣ် ကသ့ၣ်ညါထီၣ်ဝဲလၢ အကဘၣ်ဃု ယွၤလၢအမ့ၢ်အတီန့ၣ် အမ့ၢ်တၢ်လၢ အရ့ဒိၣ်ဒိၣ်မး. ပှၤလၢအကစံၣ်ညီၣ်တၢ်န့ၣ် အကဲမတဂၤလဲၣ်န့ၣ် စီၤပီလူး တတဲဖျါထီၣ် အမံၤဘၣ်. ဘၣ်ဆၣ် အဝဲတဲဝဲ ပှၤလၢအကစံၣ်ညီၣ်တၢ် တဂၤန့ၣ်အဂ့ၢ်. စီၤပီလူး တဲဝဲလၢ ပှၤလၢ အကစံၣ်ညီၣ်တၢ်တဂၤန့ၣ် လၢညါ အအိၣ်မူတ့ၢ်လၢဟီၣ်ခိၣ် ဒီးအသံ ဒီးကစၢ်ယွၤ ဒုးဂဲၤဆၢထၢၣ်သမူထီၣ်က့ၤအီၤ.
၂၂ စီၤပီလူး အတၢ်ကတိၤ ကျၢၢ်တံၢ်တခါအံၤန့ၣ် အဘၣ်ထွဲဒီးပှၤစ့ၢ်ကီး. ပသ့ၣ်ညါလၢ ပှၤလၢအကစံၣ်ညီၣ်တၢ် တဂၤန့ၣ် မ့ၢ်ဝဲယ့ၣ်ၡူးခရံာ် လၢကစၢ်ယွၤ ဒုးဂဲၤဆၢထၢၣ်သမူထီၣ်က့ၤအီၤ. (ယိၤ ၅:၂၂) ဒီးပသ့ၣ်ညါလၢ တၢ်စံၣ်ညီၣ် အမုၢ်နံၤန့ၣ် ကယံာ်ဝဲ အနံၣ်တကထိ ဒီးကတုၤဝဲ ဘူးထီၣ်လံ. (လီၣ် ၂၀:၄, ၆) ဖဲတၢ်စံၣ်ညီၣ် အမုၢ်နံၤ အတီၢ်ပူၤန့ၣ် ပှၤလၢအအိၣ်ဒီး တၢ်သးတီတဖၣ် ကန့ၢ်ဘၣ်ဝဲ တၢ်ဆိၣ်ဂ့ၤဒီဒူၣ် အဃိ ပတလိၣ်ပျံၤ တၢ်စံၣ်ညီၣ် အမုၢ်နံၤဘၣ်. တၢ်လီၤလးဖးဒိၣ်ကတၢၢ် လၢအမ့ၢ် ယ့ၣ်ၡူးခရံာ် အတၢ်ဂဲၤဆၢထၢၣ် သမူထီၣ်က့ၤန့ၣ် အဟ့ၣ်ပှၤ တၢ်အုၣ်အသးလၢ ပတၢ်မုၢ်လၢ်လၢ အဂ့ၤဒိၣ်မးတခါအံၤ ကဟဲလၢပှဲၤထီၣ်ဝဲ အနီၢ်ကီၢ်.
“ပှၤတနီၤ . . . ကဲထီၣ် ပှၤစူၢ်က့ၤနာ်က့ၤတၢ်” (မၤတၢ် ၁၇:၃၂-၃၄)
၂၃. ဖဲစီၤပီလူး စံၣ်တဲၤတဲလီၤတၢ်အခါ ပှၤလၢအဒိကနၣ်အီၤတဖၣ် မၤဝဲဒ်လဲၣ်.
၂၃ ဖဲစီၤပီလူး စံၣ်တဲၤတဲလီၤတၢ် ဒီးတဲဝဲ တၢ်ဂဲၤဆၢထၢၣ်သမူထီၣ်က့ၤ အဂ့ၢ်အခါ “ပှၤတနီၤ နံၤဘၣ်အီၤ.” ဒီးတနီၤန့ၣ် တသးအိၣ်တူၢ်လိာ်ဝဲဘၣ် သနာ်က့ အဝဲသ့ၣ် တဲဝဲလၢ “ပကဒိကနၣ် တၢ်ဂ့ၢ်တခါအံၤလၢနအိၣ် တဘျီကဒီးသၢၤ.” (မၤတၢ် ၁၇:၃၂) ဘၣ်ဆၣ် မ့မ့ၢ်ပှၤတနီၤန့ၣ် “ပိာ်ထီၣ် စီၤပီလူးအခံ ဒီးကဲထီၣ် ပှၤစူၢ်က့ၤနာ်က့ၤတၢ်လီၤ. ပှၤလၢအဝဲသ့ၣ် အကျါတနီၤန့ၣ် မ့ၢ်ဝဲ စီၤဒံၤနူၤစံၤ လၢအမ့ၢ် စံၣ်ညီၣ်ကွီၢ်တဂၤလၢ အၤရံအါဖကၢး အရူ, ပိာ်မုၣ်တဂၤလၢ အမံၤမ့ၢ် နီၢ်ဒမၤရံ ဒီးပှၤအဂၤတဖၣ်လီၤ.” (မၤတၢ် ၁၇:၃၄) ပဝဲစ့ၢ်ကီး ဖဲပဟးစံၣ်တဲၤတဲလီၤတၢ်အခါ ပထံၣ်ဘၣ်ဒီး တၢ်အိၣ်သးဒ်န့ၣ်. ပှၤတနီၤန့ၣ် တဲဆါပှၤ ဒီးတနီၤန့ၣ် အတဲတၢ်ဒီးပှၤ မုာ်မုာ်ဘၣ်ဆၣ် တသးအိၣ်တူၢ်လိာ် တၢ်လၢပတဲဘၣ်. ဘၣ်ဆၣ် ပှၤလၢအဒိကနၣ် ဘီမုၢ်တၢ်သးခုကစီၣ် ဒီးကဲထီၣ် ပဒီပုၢ်ဝဲၢ် အိၣ်ဝဲစ့ၢ်ကီး အဃိ ပသးခုဒိၣ်မး.
၂၄. စီၤပီလူး တဲတၢ်ဖဲ အၤရံအါဖကၢးန့ၣ် ပန့ၢ်ဘၣ် တၢ်မၤလိလၢအအိၣ် ဒ်လဲၣ်.
၂၄ ဖဲပမၤလိ စီၤပီလူးအဂ့ၢ်အခါ ပသ့ၣ်ညါဘၣ်လၢ ဒ်သိးပှၤကဘၣ်သူၣ်ဘၣ်သး တၢ်မ့ၢ်တၢ်တီလၢပတဲအဂီၢ် ပကဘၣ်တဲလၢ ကျဲဒ်လဲၣ် ဒီးပှၤကတူၢ်လိာ်လၢ အကဲတၢ်မ့ၢ်တၢ်တီအဂီၢ် ပကဘၣ်တဲဒ်လဲၣ်. တကးဒံးဘၣ် ပသ့ၣ်ညါဘၣ်လၢ ပှၤလၢအအိၣ်ဒီး တၢ်စူၢ်တၢ်နာ် လၢအကမၣ်တဖၣ်န့ၣ် ပကဘၣ်တဲတၢ်ဒီး အဝဲသ့ၣ်လၢ တၢ်သးစူၤ ဒီးတၢ်ကူၣ်သ့အပူၤဒ်လဲၣ်. ဒီးအဂၤတခါန့ၣ် ပန့ၢ်ဘၣ်တၢ်မၤလိ အရ့ဒိၣ်လၢ ပတကြၢး မၤစှၤလီၤ တၢ်မ့ၢ်တၢ်တီ အကံၢ်အစီ ဒ်သိးပှၤကနၣ် တၢ်ဂ့ၢ်လၢပတဲအီၤတဖၣ် ကမုာ်ဝဲအဂီၢ်ဘၣ်. ပမ့ၢ်ကွၢ်လိ စီၤပီလူး အဒိအတဲာ်န့ၣ် ပစံၣ်တဲၤတဲလီၤတၢ် ကသ့ဂ့ၤထီၣ်. ဒီးပှၤလၢ အတီခိၣ်ရိၤမဲတၢ်တဖၣ် မ့ၢ်ကွၢ်လိ စီၤပီလူး အဒိအတဲာ်န့ၣ် အဝဲသ့ၣ် သိၣ်လိတၢ်လၢ တၢ်အိၣ်ဖှိၣ်အပူၤ ကသ့ဂ့ၤဒိၣ်ထီၣ်. ပမ့ၢ်မၤဒ် စီၤပီလူး အသိးန့ၣ် ပမၤစၢၤပှၤဂၤ ဒ်သိးက “ဃု ကစၢ်ယွၤ” ဒီး “ထံၣ်န့ၢ်အီၤ သပှၢ်ကတၢၢ်” ကသ့ဝဲဂ့ၤဂ့ၤ.—မၤတၢ် ၁၇:၂၇.
a ကွၢ်တၢ်လွံၢ်နၢၣ် လၢအမ့ၢ် “ ဝ့ၢ်အၤသ့ၣ်—ဝ့ၢ်လၢပျၢၤလၢ အအိၣ်ဒီး တၢ်ဆဲးတၢ်လၤအါမး.”
b ကွၢ်တၢ်လွံၢ်နၢၣ် လၢအမ့ၢ် “ ပှၤအ့းပံၤကူၤရူးဖိ ဒီးပှၤစတီးအၤဖိ.”
c အၤရံအါဖကၢးန့ၣ် အိၣ်လၢ အခရီၣ်ပီလဲး အကလံၤစိး မုၢ်နုာ်တခီ ဒီးအကဲဝဲ တၢ်လီၢ်လၢ ဝ့ၢ်အၤသ့ၣ် အပှၤခိၣ်ပှၤနၢ် အိၣ်ဖှိၣ်ဝဲအလီၢ်. တၢ်ကတိၤလၢအမ့ၢ် “အၤရံအါဖကၢး” န့ၣ်ဘၣ်သ့ၣ်သ့ၣ် ကအဲၣ်ဒိးတဲဝဲ ပှၤခိၣ်ပှၤနၢ်တဖၣ် မ့တမ့ၢ် တၢ်လူၢ်ခိၣ် အၤရံအါဖကၢး. အဃိ ပှၤလဲၤကိး စီၤပီလူးလၢ တၢ်လူၢ်ဧါ မ့တမ့ၢ် ပှၤလဲၤကိးအီၤလၢ ပှၤခိၣ်ပှၤနၢ်တဖၣ် အိၣ်ဖှိၣ်ဝဲအလီၢ် လၢဘၣ်သ့ၣ်သ့ၣ် ကအိၣ်ဖဲ တၢ်ဆါတၢ်ပှ့ၤအလီၢ်ဧါန့ၣ် ပှၤကူၣ်ဘၣ်ကူၣ်သ့ တဂၤဒီးတဂၤ အတၢ်ထံၣ် လီၤဆီလိာ်အသး.
d ကြံးအတၢ်ကတိၤ ခီၣ်စမိး လၢပှၤကွဲးကျိာ်ထံအီၤလၢ “ဟီၣ်ခိၣ်” န့ၣ်အဲၣ်ဒိးတဲဝဲ တၢ်အိၣ်လၢ မူခိၣ်ဟီၣ်ခိၣ် လၢပထံၣ်အီၤသ့တဖၣ်. ဒီးမ့မ့ၢ်လၢ လံာ်စီဆှံပူၤန့ၣ် တၢ်ကတိၤတဖျၢၣ်အံၤ ညီနုၢ် အဲၣ်ဒိးတဲဝဲ ပှၤဟီၣ်ခိၣ်ဖိ. စီၤပီလူး သူဝဲတၢ်ကတိၤအံၤ ဒ်သိး ပှၤဒိကနၣ်တၢ်ဖိတဖၣ် ကဆဲးသးအိၣ် ဒိကနၣ်အီၤအဂီၢ်.
e စီၤပီလူး ဟံန့ၢ်ဝဲ တၢ်ကတိၤအံၤလၢ ပှၤစတီးအၤဖိ အါရထး အထါလၢ အမ့ၢ် ဖံၤနိမံနၤ. တၢ်ကတိၤလၢ စီၤပီလူး သူဝဲန့ၣ် အအိၣ်စ့ၢ်ကီးလၢ တၢ်သးဝံၣ်လၢ ကြံးစတီးအၤ အပှၤကွဲးလံာ်ဖိ ခလံသၢၤ ကွဲးန့ၢ်ဝဲ ကစၢ်စူ အပူၤ. တကးဒံးဘၣ် တၢ်ကတိၤအဝဲန့ၣ် အိၣ်စ့ၢ်ကီးလၢ ကြံးအလံာ်အလဲၢ်အဂၤတဖၣ်အပူၤ.
