တၢ်မၤလိ ၁၀
“ယဟိဝၤယွၤ အကလုၢ်ကထါ ရၤလီၤအသး” အါထီၣ်
စီၤပ့းတရူး ဟးထီၣ်ဘၣ်လၢဃိာ်ပူၤ ဒီးခရံာ်ဖိတဖၣ် ထံၣ်ဘၣ် တၢ်မၤအၢမၤနးသနာ်က့ အဝဲသ့ၣ် ဆဲးစံၣ်တဲၤတဲလီၤ တၢ်သးခုကစီၣ်
တၢ်ဂ့ၢ်ဒိးသန့ၤထီၣ်သးလၢ မၤတၢ် ၁၂:၁-၂၅
၁-၄. စီၤပ့းတရူးထံၣ်ဘၣ်ဒီး တၢ်အိၣ်သးလၢ အကီအခဲဒ်လဲၣ်. ဒီးနမ့ၢ်အိၣ်ဘၣ်လၢ စီၤပ့းတရူးအလီၢ်န့ၣ် နကတူၢ်ဘၣ်ဒ်လဲၣ်.
ဖဲစီၤပ့းတရူး လဲၤနုာ်လီၤလၢဃိာ်ပူၤဝံၤဒီး ပှၤသုးဖိတဖၣ် ပံးကွံာ်တြဲၤအခါ ခီဖျိလၢတြဲၤန့ၣ် ဒိၣ်ဝဲအဃိ တၢ်သီၣ်ဖးဒိၣ်ညါ. ပှၤစၢတံၢ်ဃာ် စီၤပ့းတရူး ဒီးရိမ့ၤသုးဖိခံဂၤ လၢပျံၤထး ဒီးအဝဲသ့ၣ် လဲၤကိးစီၤပ့းတရူး လၢဃိာ်ဒၢးပူၤ. ဖဲန့ၣ်ဝံၤအလီၢ်ခံ ပှၤကမၤအီၤဒ်လဲၣ်န့ၣ် ဒ်သိးအကသ့ၣ်ညါအဂီၢ် ဘၣ်သ့ၣ်သ့ၣ် အကဘၣ်အိၣ်ခိးဝဲ တဘျုးသီညါ. ဒီးလၢဃိာ်ပူၤန့ၣ် စီၤပ့းတရူး ကထံၣ်ဝဲထဲ ဃိာ်အဒူၣ်, ထးအဒူၣ် တဘိတဘိ, ပျံၤထးလၢ ပှၤစၢဃာ်အီၤ ဒီးပှၤခိးတၢ်ဖိတဖၣ်. တၢ်လၢအဂၤန့ၣ် အတထံၣ်ဝဲ နီတမံၤဘၣ်.
၂ လၢခံ စီၤပ့းတရူး နၢ်ဟူဝဲလၢ ပှၤကစံၣ်ညီၣ်သံအီၤ. ဒီးဟ့ၤရိာ် အကြံးပၤ တၢတဂၤ ပာ်လီၤသးလၢ အကမၤသံ စီၤပ့းတရူးစ့ၢ်ကီး. a အဃိ ဒ်သိးပှၤကမျၢၢ် ကဘၣ်သူၣ်ဘၣ်သးအီၤအဂီၢ် ဘူၣ်လဲၤကပာ်မ့ၢ်ဝံၤန့ၣ် ဟ့ၤရိာ် အကြံးပၤ ကဟ့ၣ်လီၤကွံာ် စီၤပ့းတရူး လၢပှၤကမျၢၢ်အအိၣ် ဒ်သိး ပှၤကမၤသံကွံာ်အီၤအဂီၢ်. ဟ့ၤရိာ် အကြံးပၤ အိၣ်ဒီး တၢ်စိတၢ်ကမီၤအဃိ တမ့ၢ်အတဲပျံၤတဲဖုးတၢ်ဘၣ်. ပသ့ၣ်ညါဘၣ်လၢ ဖဲပူၤကွံာ် တယံာ်ဒံးဘၣ်န့ၣ် ဟ့ၤရိာ် အကြံးပၤ မၤသံကွံာ်ဝဲ တၢ်မၢဖိယၤကိာ်.
၃ ထံၣ်တမှံကွၢ် တချုးဖဲ ဟ့ၤရိာ် အကြံးပၤ ကမၤသံစီၤပ့းတရူး တနၤန့ၣ် တၢ်မၤအသးဒ်လဲၣ်. ဖဲစီၤပ့းတရူးအိၣ်လၢ ဃိာ်လၢအခံးဒိၣ်မးတဖျၢၣ် အပူၤအခါ အကဆိမိၣ်ဝဲမနုၤလဲၣ်. ဘၣ်သ့ၣ်သ့ၣ် စီၤပ့းတရူး ကနီၣ်ဘၣ်က့ၤလၢ ပူၤကွံာ်စှၤကိာ်နံၣ်န့ၣ် ယ့ၣ်ၡူးတဲဘၣ်အီၤလၢ မုၢ်ကအိၣ်ဝဲတနံၤန့ၣ် ပှၤကဖီၣ်နၤ, ပှၤကလဲၤကိးနၤလၢ တၢ်လီၢ်လၢ နတဘၣ်သးလဲၤဘၣ် ဒီးပှၤကမၤသံနၤ. (ယိၤဟၣ် ၂၁:၁၈, ၁၉) ဘၣ်သ့ၣ်သ့ၣ် စီၤပ့းတရူးကဆိမိၣ်ဝဲလၢ တဘျီညါအံၤဒု အကဘၣ်သံလီၤ.
၄ နမ့ၢ်အိၣ်ဘၣ်လၢ စီၤပ့းတရူးအလီၢ်န့ၣ် နကတူၢ်ဘၣ်ဒ်လဲၣ်. ပှၤအါဂၤန့ၣ် အသးကဟးဂီၤ ဒီးကဆိမိၣ်ဘၣ်လၢ အတၢ်မုၢ်လၢ်တအိၣ်လၢၤဘၣ်. ဘၣ်ဆၣ် ခရံာ်ဖိလၢ အမ့ၢ်အတီန့ၣ် သ့ၣ်ညါဝဲလၢ အတၢ်အိၣ်သး မ့ၢ်အိၣ်ဒ်လဲၣ်သနာ်က့ အဝဲသ့ၣ်တၢ်မုၢ်လၢ် တလၢာ်ဒံးဘၣ်. ဖဲပှၤမၤအၢမၤနး စီၤပ့းတရူး ဒီးခရံာ်ဖိအဂၤတဖၣ်အခါ အဝဲသ့ၣ် မၤက့ၤဝဲဒ်လဲၣ်န့ၣ် ပကွၢ်လိ အဒိအတဲာ်သ့.
“တၢ်အိၣ်ဖှိၣ်ဖိတဖၣ် ဃ့ထုကဖၣ်တၢ် . . . ဆူၣ်ဆူၣ်” (မၤတၢ် ၁၂:၁-၅)
၅, ၆. (က) ဘၣ်မနုၤအဃိ ဟ့ၤရိာ် အကြံးပၤ တၢတဂၤ မၤအၢမၤနး ခရံာ်ဖိလဲၣ် ဒီးအမၤအၢမၤနးဝဲဒ်လဲၣ်. (ခ) ဖဲစီၤယၤကိာ်သံအခါ ဘၣ်မနုၤအဃိ ဒီပုၢ်ဝဲၢ်မုၣ်ခွါတဖၣ် သးဘၣ်ဒိလဲၣ်.
၅ တၢ်မၤလိ လၢအပူၤကွံာ်တခါန့ၣ် ပသ့ၣ်ညါဘၣ်လၢ စီၤကန့လံး ဒီးအဟံၣ်ဖိဃီဖိ လၢအကဲ ပှၤကလုာ်အဂၤတဖၣ် ကဲထီၣ်ဝဲခရံာ်ဖိ. အဃိ ခရံာ်ဖိဒီပုၢ်ဝဲၢ်မုၣ်ခွါတဖၣ် သးခုဒိၣ်မး. ဘၣ်ဆၣ် ဖဲပှၤယူဒၤဖိလၢ အတကဲခရံာ်ဖိတဖၣ် သ့ၣ်ညါဝဲလၢ ပှၤယူဒၤဖိလၢ အကဲခရံာ်ဖိတဖၣ် ဘူၣ်ထီၣ်ဘါထီၣ်တၢ် တပူၤဃီဒီး ပှၤကလုာ်ဂၤတဖၣ်အခါ အဝဲသ့ၣ်ဖုးဘၣ်သးညါ.
၆ ဟ့ၤရိာ် အကြံးပၤ တၢတဂၤအံၤ လၢထံဂ့ၢ်ကီၢ်ဂ့ၢ်တကပၤန့ၣ် အခိၣ်နူာ်ဖၠဲးမး. ခီဖျိလၢ တၢ်အိၣ်သး ကဲထီၣ်ဒ်အံၤအဃိ တၢ်ခွဲးတၢ်ယာ်လၢ ဟ့ၤရိာ် အကြံးပၤအဂီၢ် အိၣ်အါမး. ဒီးအလီကီဝဲလၢ ပှၤယူဒၤဖိတဖၣ် ကဘၣ်သးအီၤအဃိ အမၤအၢမၤနးဝဲ ခရံာ်ဖိတဖၣ်. ထဲန့ၣ်တကးဒံးဘၣ် ဘၣ်သ့ၣ်သ့ၣ် ဟ့ၤရိာ် အကြံးပၤ သ့ၣ်ညါဘၣ်ဝဲလၢ တၢ်မၢဖိယၤကိာ်န့ၣ် အရ့လိာ်သးဒီးယ့ၣ်ၡူး ဘူးဘူးတံၢ်တံၢ်လီၤ. အဃိ စီၤပၤဟ့ၤရိာ် “မၤသံ စီၤယိၤဟၣ် အဒီပုၢ်ဝဲၢ်ခွါ စီၤယၤကိာ်လၢနး.” (မၤတၢ် ၁၂:၂) တၢ်ကဲထီၣ်သး ဒ်န့ၣ်အဃိ တၢ်အိၣ်ဖှိၣ်ဖိတဖၣ် ကသးဘၣ်ဒိဒိၣ်မး. အဒိ ပှၤလၢအထံၣ်ဘၣ် ယ့ၣ်ၡူး လဲလိာ်အသး ဒီးမၤတၢ်လီၤလး လၢအဂၤတနီၤ လၢတၢ်မၢဖိအဂၤ တထံၣ်ဘၣ်ဝဲဘၣ်န့ၣ် အိၣ်ထဲ တၢ်မၢဖိသၢဂၤ ဒီးလၢအကျါတဂၤန့ၣ် ပၣ်ဃုာ်ဒီး စီၤယၤကိာ်. (မး ၁၇:၁, ၂; မၢ်ကူး ၅:၃၇-၄၂) စီၤယၤကိာ် ဒီးအဒီပုၢ်ဝဲၢ်ခွါ စီၤယိၤဟၣ်န့ၣ် ခီဖျိလၢ အဝဲသ့ၣ်သးဆူၣ်အဃိ ယ့ၣ်ၡူးကိးအဝဲသ့ၣ်လၢ “လီသီၣ်အဖိခွါ.” (မၢ်ကူး ၃:၁၇) တၢ်မၢဖိယၤကိာ်န့ၣ် အအိၣ်ဒီးတၢ်သးဒူ, တၢ်သးတီ ဒီးဒီပုၢ်ဝဲၢ်မုၣ်ခွါ အဲၣ်အီၤအဃိ ဖဲအသံအခါ ဒီပုၢ်ဝဲၢ်မုၣ်ခွါတဖၣ် သးဘၣ်ဒိဒိၣ်မး.
၇, ၈. ဖဲစီၤပ့းတရူး အိၣ်လၢဃိာ်ပူၤအခါ တၢ်အိၣ်ဖှိၣ်ဖိတဖၣ် မၤဝဲဒ်လဲၣ်.
၇ ဒ်ဟ့ၤရိာ် အကြံးပၤ မုၢ်လၢ်ဝဲအသိး ဖဲစီၤယၤကိာ်သံအခါ ပှၤယူဒၤဖိတဖၣ်သးခုဝဲ. ခီဖျိလၢ တၢ်ဂ့ၢ်အံၤအဃိ ဟ့ၤရိာ် အကြံးပၤ ပာ်လီၤသးလၢ အကမၢအၢမၤနး စီၤပ့းတရူး. ဖဲတၢ်မၤလိအံၤ အခီၣ်ထံးန့ၣ် ပထံၣ်ဘၣ်လၢ ဟ့ၤရိာ် အကြံးပၤ ဖီၣ်ဝဲစီၤပ့းတရူး ဘၣ်ဆၣ် အကနီၣ်ဘၣ်က့ၤလၢ အပူၤကွံာ်န့ၣ် ပှၤဖၢနုာ် တၢ်မၢဖိ လၢဃိာ်ပူၤသနာ်က့ အဝဲသ့ၣ်ပူၤဖျဲးထီၣ်သ့ဒံး. ဒီးဒ်တၢ်မၤလိ ၅ လၢလံာ်တဘ့ၣ်အံၤအပူၤ ပာ်ဖျါထီၣ်ဝဲအသိး ဟ့ၤရိာ် အကြံးပၤ မၢပှၤစၢဃာ်စီၤပ့းတရူး လၢပျံၤထး လၢသုးဖိခံဂၤအဘၢၣ်စၢၤ. တကးဒံးဘၣ် ဒ်သိးစီၤပ့းတရူး တထူၣ်ဖျဲးထီၣ်တဂ့ၤအဂီၢ် အဟ့ၣ်လီၤ သုးဖိ ၁၆ ဂၤမူဒါလၢ အဝဲသ့ၣ် ကအိၣ်ခိးတၢ် လၢမုၢ်နၤဒီးမုၢ်ဆါ. စီၤပ့းတရူး မ့ၢ်ထူၣ်ဖျဲးထီၣ်န့ၣ် ပှၤသုးဖိလၢ အခိးတၢ်တဖၣ် ကဘၣ်တၢ်စံၣ်ညီၣ်သံအီၤ. စီၤပ့းတရူး ထံၣ်ဘၣ်ဒီး တၢ်အိၣ်သး လၢအကီအခဲဒ်န့ၣ်အဃိ ဒီပုၢ်ဝဲၢ်မုၣ်ခွါတဖၣ် မၤစၢၤအီၤကသ့ဒ်လဲၣ်.
၈ တၢ်အိၣ်ဖှိၣ်ဖိတဖၣ် ကဘၣ်မၤမနုၤလဲၣ်န့ၣ် အဝဲသ့ၣ် သ့ၣ်ညါဝဲဂ့ၤဂ့ၤ. ပထံၣ်ဘၣ်ဖဲ မၤတၢ် ၁၂:၅ န့ၣ်တဲဝဲလၢ “စီၤပ့းတရူး အိၣ်ဒံးလၢ ဃိာ်ပူၤ ဘၣ်ဆၣ် တၢ်အိၣ်ဖှိၣ်ဖိတဖၣ် ဃ့ထုကဖၣ် တၢ်လၢအဂီၢ် ဆူၣ်ဆူၣ်.” အဝဲသ့ၣ်အဲၣ်ဘၣ် စီၤပ့းတရူးဒိၣ်မးအဃိ အဝဲသ့ၣ်ဃ့ထုကဖၣ် လၢစီၤပ့းတရူးအဂီၢ် လၢသးဒီဖျၢၣ်. ဒီးဖဲစီၤယၤကိာ်သံအခါ ပထံၣ်ဘၣ်လၢ တၢ်အိၣ်ဖှိၣ်ဖိတဖၣ် အတၢ်နာ်တလီၤစှၤဘၣ်, အဝဲသ့ၣ်နာ်ဒံးဝဲလၢ ယဟိဝၤယွၤ ဒိကနၣ်အဝဲသ့ၣ် တၢ်ထုကဖၣ်. ယဟိဝၤယွၤန့ၣ် အပာ်လုၢ်ပာ်ပှ့ၤ ပတၢ်ထုကဖၣ်ဒိၣ်မး. ဒီးပတၢ်ထုကဖၣ် မ့ၢ်ဘၣ်လိာ်သးဒီး ယဟိဝၤယွၤ အတၢ်ဘၣ်သးန့ၣ် အကစံးဆၢပှၤ. (ဧ့ၤ ၁၃:၁၈, ၁၉; ယၤ ၅:၁၆) ပဝဲခရံာ်ဖိ လၢဆၢကတီၢ်ခဲအံၤန့ၣ် ပကဘၣ်ဟံန့ၢ်တၢ်မၤလိလၢ တၢ်ဂ့ၢ်အရ့ဒိၣ်တခါအံၤ.
၉. ခရံာ်ဖိလၢညါတဖၣ် ဃ့ထုကဖၣ်န့ၢ်တၢ်လၢ စီၤပ့းတရူးအဂီၢ်န့ၣ် ပကွၢ်လိအဝဲသ့ၣ် ကသ့ဒ်လဲၣ်.
၉ ပဒီပုၢ်ဝဲၢ်မုၣ်ခွါတဖၣ် ထံၣ်ဘၣ်ဒီး တၢ်မၤအၢမၤနး, ပဒိၣ်တြီဃာ် တၢ်စံၣ်တဲၤတဲလီၤတၢ်မၤ မ့တမ့ၢ် အဝဲသ့ၣ် ထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံး. မ့ၢ်နသ့ၣ်ညါ ဒီပုၢ်ဝဲၢ်မုၣ်ခွါလၢ အထံၣ်ဘၣ်ဒီး တၢ်ကီတၢ်ခဲဒ်အံၤအိၣ်ဧါ. မ့ၢ်အိၣ်န့ၣ် နဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်သ့. ဘၣ်သ့ၣ်သ့ၣ် နကသ့ၣ်ညါ ဒီပုၢ်ဝဲၢ်လၢ အအိၣ်ဒီးတၢ်ကီတၢ်ခဲ ဒ်သိးဒီး ဟံၣ်ဖိဃီဖိတၢ်ကီတၢ်ခဲ, ထံၣ်ဘၣ်ဒီး တၢ်လၢအမၤလီၤစၢ် အဝဲသ့ၣ်အသး ဒီးထံၣ်ဘၣ်ဒီး တၢ်ကီတၢ်ခဲ ခီဖျိလၢ အဝဲသ့ၣ်အတၢ်နာ်အဃိ. တကးဒံးဘၣ် နသ့ၣ်ညါလၢ ယဟိဝၤယွၤန့ၣ် အကဲ “ပှၤလၢအဒိကနၣ် တၢ်ထုကဖၣ်တဂၤ.” အဃိ တချုးလၢ နဃ့ထုကဖၣ်ဒံးဘၣ်အခါ နမ့ၢ်ဆိမိၣ်ပာ်စၢၤ အဝဲသ့ၣ်အဂ့ၢ်န့ၣ် ဖဲနဃ့ထုကဖၣ်အခါ နယၢၤထီၣ်ဃုာ် အဝဲသ့ၣ်အမံၤလၢ တၢ်ထုကဖၣ်အပူၤသ့. (စံး ၆၅:၂) နၤစ့ၢ်ကီး ဖဲနထံၣ်ဘၣ်ဒီး တၢ်ကီတၢ်ခဲအခါ နကလိၣ်ဘၣ်လၢ ဒီပုၢ်ဝဲၢ်မုၣ်ခွါတဖၣ် ဃ့ထုကဖၣ်န့ၢ်တၢ်လၢနဂီၢ်.
ဒီပုၢ်ဝဲၢ်မုၣ်ခွါလၢ အအိၣ်လၢဃိာ်ပူၤ ခီဖျိလၢအတၢ်နာ်အဃိန့ၣ် ပဃ့ထုကဖၣ်န့ၢ် လၢအဝဲသ့ၣ်အဂီၢ်
“ပိာ်ထီၣ်ယခံနီၤ” (မၤတၢ် ၁၂:၆-၁၁)
၁၀, ၁၁. ယဟိဝၤယွၤ အမူခိၣ်ကလူးတဂၤ မၤပူၤဖျဲးထီၣ် စီၤပ့းတရူး လၢဃိာ်ပူၤဒ်လဲၣ်.
၁၀ ဖဲစီၤပ့းတရူး ထံၣ်ဘၣ်ဒီး တၢ်လီၤဘၣ်ယိၣ်အခါ မ့ၢ်အဘၣ်ယိၣ်တၢ်ဧါ တဘၣ်ယိၣ်တၢ်ဧါန့ၣ် ပတသ့ၣ်ညါဘၣ်. ဖဲစီၤပ့းတရူး အိၣ်လၢဃိာ်ပူၤ အလီၢ်ခံကတၢၢ်တနၤန့ၣ် အမံကမၣ်ဘၣ်သး လၢသုးဖိခံဂၤ အဘၢၣ်စၢၤ. သုးဖိခံဂၤန့ၣ် အိၣ်ပလီၢ်သးဂ့ၤမး. စီၤပ့းတရူး နာ်န့ၢ်ယဟိဝၤယွၤ လၢလၢပှဲၤပှဲၤ ဒီးအသ့ၣ်ညါဝဲလၢ တၢ်မ့ၢ်ကဲထီၣ်သးဒီးအီၤ ဒ်လဲၣ်သနာ်က့ ယဟိဝၤယွၤ တသးပ့ၤနီၣ် အီၤဘၣ်. (ရိ ၁၄:၇, ၈) ဘၣ်ဆၣ် တၢ်လီၤလး ကမၤအသးဒီး စီၤပ့းတရူးတခါန့ၣ် ဘၣ်သ့ၣ်သ့ၣ် စီၤပ့းတရူး တဆိမိၣ်ဘၣ်ဝဲ နီတဘျီဘၣ်. လၢဃိာ်ပူၤန့ၣ် တၢ်ကပီၤထီၣ် သတူၢ်ကလာ်, မူခိၣ်ကလူးတဂၤ ဆၢထၢၣ်ဖဲန့ၣ် ဒီးအကိးပၢၢ်ထီၣ် စီၤပ့းတရူး. မ့မ့ၢ် ပှၤခိးဃိာ်ဖိတဖၣ်န့ၣ် အဝဲသ့ၣ်တထံၣ် မူခိၣ်ကလူးဘၣ်. ဒီးပျံၤထးလၢ ပှၤစၢဃာ် စီၤပ့းတရူးအစုကျၢၤကျၢၤန့ၣ် လီၤဃဲၣ်ကွံာ်ဝဲ ညီညီဖိ.
“အဝဲသ့ၣ် တုၤဃီၤဝဲလၢ တြဲၤထးလၢ ပှၤလဲၤလၢ ဝ့ၢ်ပူၤလီၤ. ဒီးတြဲၤန့ၣ် အိးထီၣ်အသးလၢ အနီၢ်ကစၢ်.”—မၤတၢ် ၁၂:၁၀
၁၁ မူခိၣ်ကလူးတဂၤ တဲဘၣ်စီၤပ့းတရူးလၢ “ဂဲၤဆၢထၢၣ် ချ့ချ့. . . . သိးထီၣ် ဆ့ကူဆ့ကၤ ဒီးဒိးထီၣ် နခီၣ်ဖံးဟီ. . . . သိးထီၣ် နဆ့ကၤလၢ အဖီခိၣ်တဘ့ၣ်.” စီၤပ့းတရူး မၤဝဲ ဒ်မူခိၣ်ကလူးတဲအီၤ တဘျီဃီ. လၢခံ မူခိၣ်ကလူး တဲအီၤလၢ “ပိာ်ထီၣ်ယခံနီၤ.” ဒီးစီၤပ့းတရူး ပိာ်ထီၣ်မူခိၣ်ကလူးအခံ. အဝဲသ့ၣ် ဟးထီၣ်လၢဃိာ်ပူၤ ဒီးလဲၤတလၢဝဲ သုးဖိလၢ အအိၣ်ခိးတၢ် လၢတၢ်ချၢ. ဒီးအဝဲသ့ၣ်လဲၤဃီၤဝဲ ကယီကယီ တုၤလၢ တြဲၤထးဖးဒိၣ်အခီၣ်ထံး. ဘၣ်သ့ၣ်သ့ၣ် စီၤပ့းတရူး ကဆိမိၣ်ဝဲလၢ အဝဲသ့ၣ်လဲၤတလၢဝဲ တြဲၤထးဖးဒိၣ်တခါအံၤ ကန့ၢ်ဒ်လဲၣ်. စီၤပ့းတရူး မ့ၢ်ဆိမိၣ်ဘၣ်ဝဲ ဒ်န့ၣ်သနာ်က့ အတဆိမိၣ်ဒ်န့ၣ်ယံာ်ယံာ်ဘၣ်. ဖဲအဝဲသ့ၣ်လဲၤတုၤလၢ တြဲၤထးဖးဒိၣ်အခီၣ်ထံးအခါ တြဲၤ “အိးထီၣ်အသးလၢ အနီၢ်ကစၢ်.” အဃိ အဝဲသ့ၣ် လဲၤတလၢဝဲ တြဲၤထးဖးဒိၣ်အံၤချ့မး ဒီးအဝဲသ့ၣ် လဲၤလီၤဝဲလၢ ကျဲတဘိ ဝံၤဒီးမူခိၣ်ကလူးန့ၣ် လီၤမၢ်ကွံာ်ဝဲ. စီၤပ့းတရူး အိၣ်တီၢ်လၢ ကျဲပူၤထဲတဂၤ ဝံၤဘျီ အသ့ၣ်ညါလီၤသးလၢ တၢ်ကဲထီၣ်သးအံၤ တမ့ၢ်ဝဲ တၢ်ထံၣ်လၢညါခီဘၣ်, အကဲဝဲ တၢ်နီၢ်ကီၢ်အဃိ အသ့ၣ်ညါဘၣ်ဝဲလၢ အပူၤဖျဲးထီၣ်လံ.—မၤတၢ် ၁၂:၇-၁၁.
၁၂. ပမ့ၢ်ဆိမိၣ်ထံ ယဟိဝၤယွၤ မၤပူၤဖျဲးထီၣ် စီၤပ့းတရူးအဂ့ၢ်န့ၣ် ဘၣ်မနုၤအဃိ အမၤမုာ်ပသးလဲၣ်.
၁၂ ဟ့ၤရိာ် အကြံးပၤ အဘီမုၢ်န့ၣ် ဒိၣ်စိလၢဟီၣ်ခိၣ်ဒီဘ့ၣ် ဒီးအပဒိၣ်တဖၣ် ဆီၣ်ထွဲအီၤ. ဟ့ၤရိာ် အကြံးပၤ ဖၢနုာ်ဝဲစီၤပ့းတရူး လၢဃိာ်ပူၤ ဘၣ်ဆၣ် ယဟိဝၤယွၤ မၤပူၤဖျဲးဝဲ စီၤပ့းတရူး လၢဃိာ်ပူၤညီညီဖိလီၤ. ပသ့ၣ်ညါဘၣ်လၢ ယဟိဝၤယွၤ အိၣ်ဒီးတၢ်စိတၢ်ကမီၤ လၢအကမၤပူၤဖျဲး အခ့အပှၤအဃိ ပသးခုဒိၣ်မး. ဘၣ်ဆၣ် ယဟိဝၤယွၤ တမၤတၢ်လီၤလးလၢ ကမၤပူၤဖျဲး အခ့အပှၤ ခဲလၢာ်ဘၣ်. အဒိ ပထံၣ်ဘၣ်လၢ ယဟိဝၤယွၤ တမၤပူၤဖျဲး စီၤယၤကိာ်လၢ တၢ်သံဘၣ်. တကးဒံးဘၣ် လၢခံဖဲယ့ၣ်ၡူး အတၢ်ကတိၤလၢ အတဲဘၣ် စီၤပ့းတရူး ဟဲလၢပှဲၤထီၣ်ဝဲအခါ ယဟိဝၤယွၤ တမၤပူၤဖျဲးစ့ၢ်ကီး စီၤပ့းတရူးလၢ တၢ်သံဘၣ်. အဃိ ခရံာ်ဖိလၢ ဆၢကတီၢ်ခဲအံၤစ့ၢ်ကီး တမုၢ်လၢ်ဝဲလၢ ယဟိဝၤယွၤ ကမၤပူၤဖျဲးအဝဲသ့ၣ်လၢ တၢ်လီၤလးအပူၤဘၣ်. ဘၣ်ဆၣ် ပသ့ၣ်ညါလၢ ယဟိဝၤယွၤန့ၣ် အတဆီတလဲ နီတဘျီဘၣ်. (မၤ ၃:၆) တၢ်သံန့ၣ် လီၤဂာ်ဒ်သိးဒီး ဃိာ်တဖျၢၣ်လၢ ပထူၣ်ဖျဲးထီၣ် တန့ၢ်ဘၣ်. သနာ်က့ တယံာ်လၢၤဘၣ်န့ၣ် ယဟိဝၤယွၤ ကသူအဖိခွါလၢ ကမၤသမူထီၣ်က့ၤ ပှၤသံလၢအကကွဲၢ်တဖၣ်. (ယိၤဟၣ် ၅:၂၈, ၂၉) ဆၢကတီၢ်ခဲအံၤ ဖဲပထံၣ်ဘၣ် တၢ်မၤကွၢ်အခါ တၢ်အၢၣ်လီၤအံၤ ကမၤစၢၤပှၤလၢ ပကအိၣ်ဒီး တၢ်သးဒူ.
“အဝဲသ့ၣ် ထံၣ်အီၤ ဒီးကမၢကမၣ်ဝဲ ဒိၣ်မး” (မၤတၢ် ၁၂:၁၂-၁၇)
၁၃-၁၅. (က) ဖဲစီၤပ့းတရူးဟဲတုၤလၢ နီၢ်မၤရံအဟံၣ်ပူၤအခါ ဒီပုၢ်ဝဲၢ်မုၣ်ခွါလၢ အအိၣ်ဖှိၣ်ဖဲန့ၣ်တဖၣ် တူၢ်ဘၣ်ဝဲဒ်လဲၣ်. (ခ) လံာ်မၤတၢ်ဆဲးပာ်ဖျါထီၣ်က့ၤ တၢ်ဂ့ၢ်မနုၤလဲၣ် ဒီးစီၤပ့းတရူး ဆဲးမၤစၢၤ ဒီပုၢ်ဝဲၢ်မုၣ်ခွါတဖၣ်ဒ်လဲၣ်.
၁၃ ဖဲစီၤပ့းတရူး အိၣ်လၢကျဲပူၤ လၢတၢ်ခံးကျါအခါ အကဆိမိၣ်ဘၣ်ဝဲလၢ အကဘၣ်လဲၤဖဲလဲၣ်. စီၤပ့းတရူး သ့ၣ်ညါဝဲလၢ ခရံာ်ဖိဒီပုၢ်ဝဲၢ်မုၣ်လၢ အမံၤမ့ၢ်နီၢ်မၤရံန့ၣ် အဟံၣ်အိၣ်ဘူးဝဲအဃိ စီၤပ့းတရူး ပာ်လီၤသးလၢ အကလဲၤလၢ နီၢ်မၤရံအဟံၣ်. နီၢ်မၤရံန့ၣ် ဖျါလၢအကဲမုၣ်ကမဲ ဒီးအတၢ်အိၣ်တၢ်ယၢၤ, အအိၣ်ဒီး ဟံၣ်ဖးဒိၣ်တဖျၢၣ် ဒီးပှၤမၤတၢ်အိၣ်ဖှိၣ် လၢအဟံၣ်ပူၤ. နီၢ်မၤရံန့ၣ်အကဲ စီၤယိၤဟၣ် လၢပှၤကိးအီၤလၢ စီၤမၢ်ကူးတဂၤန့ၣ်အမိ. စီၤမၢ်ကူးတဂၤအံၤ လံာ်မၤတၢ် ပာ်ဖျါထီၣ်အဂ့ၢ် ဖဲအံၤန့ၣ် အဆိကတၢၢ်တဘျီ ဒီးလၢခံန့ၣ် စီၤပ့းတရူးပာ်အီၤဒ်သိး အဖိခွါတဂၤ. (၁ ပ့း ၅:၁၃) ဖဲတၢ်တနၤန့ၣ် တၢ်ခံးယိာ်လံ သနာ်က့ တၢ်အိၣ်ဖှိၣ်ဖိတဖၣ် အိၣ်လၢနီၢ်မၤရံအဟံၣ်ပူၤ ဒီးအဝဲသ့ၣ် ဃ့ထုကဖၣ်တၢ်လၢ စီၤပ့းတရူးအဂီၢ်ဆူၣ်ဆူၣ်. ဘၣ်သ့ၣ်သ့ၣ် အဝဲသ့ၣ် ကဃ့ထုကဖၣ် ဒ်သိးစီၤပ့းတရူး ကပူၤဖျဲးထီၣ်အဂီၢ်. ဒီးယဟိဝၤယွၤ ကစံးဆၢအဝဲသ့ၣ် အတၢ်ထုကဖၣ်ဒ်န့ၣ်န့ၣ် အဝဲသ့ၣ်တဆိမိၣ်ဘၣ် နီတဘျီဘၣ်.
၁၄ စီၤပ့းတရူး ဒိတကျိာ်ဝဲ ဟံၣ်ကရၢၢ်အပဲတြီ. ဒီးနီၢ်ရိဒ့ၤ လၢအကဲကုၢ်မုၣ်န့ၣ် ဟဲလၢပဲတြီ အခီၣ်ထံး. ပှၤမံၤဒ်သိးဒီး နီၢ်ရိဒ့ၤန့ၣ် အိၣ်အါမး ဒီးအမံၤအံၤ လၢကြံးကျိာ်န့ၣ် အခီပညီ မ့ၢ်ဝဲ “ဖီတၤဆှုၣ်.” ဖဲနီၢ်ရိဒ့ၤနၢ်ဟူ စီၤပ့းတရူး အကလုၢ်အခါ အကမၢကမၣ်ဝဲ တုၤလၢအသးပ့ၤနီၣ် အိးထီၣ်န့ၢ် စီၤပ့းတရူး အပဲတြီ. အကရီ က့ၤဃ့ၢ်နုာ်လၢဟံၣ်ပူၤ ဒီးတဲဘၣ်တၢ်အိၣ်ဖှိၣ်ဖိတဖၣ်လၢ စီၤပ့းတရူးအိၣ်လၢ ဟံၣ်မဲာ်ညါလံ. အဝဲသ့ၣ်တဲဝဲလၢ နီၢ်ရိဒ့ၤန့ၣ် ဟးတဲကြီတၢ်. ဘၣ်ဆၣ် ဒ်သိး ပှၤကနာ်အီၣ်အီၤအဂီၢ် နီၢ်ရိဒ့ၤ ကျဲးစၢးတဲဝဲသပှၢ်ပှၢ်. ဒီးပှၤအဂၤတနီၤန့ၣ် ဆိမိၣ်ဝဲလၢ နီၢ်ရိဒ့ၤ နၢ်ဟူပှၤကလုၢ် ဘၣ်ဆၣ် အကကဲ မူခိၣ်ကလူးတဂၤလၢ အတဲန့ၢ်တၢ်လၢ စီၤပ့းတရူးအဂီၢ်ဧါသၢၤ. (မၤတၢ် ၁၂:၁၂-၁၅) ဖဲန့ၣ်အဆၢကတီၢ် စီၤပ့းတရူးဆဲး ဒိတကျိာ်ပဲတြီအဃိ အဝဲသ့ၣ် လဲၤအိးထီၣ်န့ၢ်ဝဲ အပဲတြီ.
၁၅ လၢပဲတြီမဲာ်ညါန့ၣ် “အဝဲသ့ၣ် ထံၣ် [စီၤပ့းတရူး] ဒီးကမၢကမၣ်ဝဲ ဒိၣ်မး.” (မၤတၢ် ၁၂:၁၆) ခီဖျိလၢ အဝဲသ့ၣ်သးခု ဒီးသီၣ်သဲအဃိ စီၤပ့းတရူးမၢ အဝဲသ့ၣ်အိၣ်ဘှ့ၣ် ဒီးစီၤပ့းတရူး တဲဘၣ်အဝဲသ့ၣ်လၢ တၢ်ကဲထီၣ်သးဒီးအီၤခဲလၢာ်. ဝံၤဘျီ စီၤပ့းတရူး မၢပှၤတဲဘၣ်က့ၤ စီၤယၤကိာ် ဒီးဒီပုၢ်ဝဲၢ်ခွါအဂၤတဖၣ် ဘၣ်ဃးဒီး တၢ်ကဲထီၣ်သးဒီးအီၤအဂ့ၢ်. လၢခံ ဒ်သိးဒီး စီၤပၤဟ့ၤရိာ် အသုးဖိတဖၣ် ဟးဃုအီၤ တဘၣ်တဂ့ၤအဂီၢ် စီၤပ့းတရူး ဟးထီၣ်ကွံာ်ဝဲဖဲန့ၣ်. ဖဲစီၤပ့းတရူး ဟးထီၣ်ဝဲလၢ နီၢ်မၤရံအဟံၣ် ပူၤပူၤဖျဲးဖျဲးအခါ ပသ့ၣ်ညါလၢ ဒီပုၢ်ဝဲၢ်မုၣ်ခွါဖဲန့ၣ်တဖၣ် ကသးခုဝဲဒိၣ်မး. ဒီးစီၤပ့းတရူး လဲၤအိၣ်လၢ တၢ်လီၢ်လၢအပူၤဖျဲးတတီၤ ဒီးဆဲးမၤဝဲ ကစၢ်ယွၤအတၢ်မၤ လၢတၢ်သးတီအပူၤ. ဘၣ်ဃးဒီး စီၤပ့းတရူးအဂ့ၢ်န့ၣ် လံာ်မၤတၢ်ပာ်ဖျါထီၣ်ဝဲ ပှဲၤအံၤလီၤ. ဘၣ်ဆၣ် ဖဲမၤတၢ် အဆၢဒိၣ် ၁၅ အပူၤန့ၣ် ပထံၣ်ဘၣ် စီၤပ့းတရူးအဂ့ၢ်တဘျီကဒီး. ဖဲန့ၣ် စီၤပ့းတရူး ပၣ်ဃုာ်လၢ ပှၤမၤဘၣ်ဂီၢ်ထီၣ်က့ၤ တၢ်ဂ့ၢ်ကီဘၣ်ဃးဒီး တၢ်ကူးတရံးအဂ့ၢ်. မ့မ့ၢ် လံာ်မၤတၢ်အဆၢဒိၣ် အဂၤတဖၣ်န့ၣ် ပာ်ဖျါထီၣ်က့ၤထဲ တၢ်မၢဖိပီလူး အတၢ်စံၣ်တဲၤတဲလီၤတၢ်မၤ ဒီးအတၢ်လဲၤတၢ်က့ၤအဂ့ၢ်. ဘၣ်ဆၣ် ပသ့ၣ်ညါသပှၢ်တၢၢ်လၢ စီၤပ့းတရူး မ့ၢ်လဲၤတုၤလၢ တၢ်လီၢ်တတီၤဂ့ၤ တတီၤဂ့ၤန့ၣ် အမၤဆူၣ်ထီၣ် ဒီပုၢ်ဝဲၢ်မုၣ်ခွါတဖၣ် အတၢ်နာ်.
၁၆. ဘၣ်မနုၤအဃိ ပနာ်လၢ ခါဆူညါန့ၣ် ပကန့ၢ်ဘၣ် တၢ်သးခုအါမးလဲၣ်.
၁၆ တဘျီတခီၣ် ယဟိဝၤယွၤ မၤစၢၤအခ့အပှၤတဖၣ် အါန့ၢ်ဒံး အဝဲသ့ၣ်ဆိမိၣ်ဝဲဒံး. အဃိ အဝဲသ့ၣ်သးခုဒိၣ်မး. ဖဲစီၤပ့းတရူး ထူၣ်ဖျဲးထီၣ်တနၤန့ၣ် ဒီပုၢ်ဝဲၢ်မုၣ်ခွါတဖၣ် သးခုဝဲဒိၣ်မး. ဆၢကတီၢ်ခဲအံၤစ့ၢ်ကီး ဖဲယဟိဝၤယွၤ ဆိၣ်ဂ့ၤပှၤအခါ ပကသးခုဒ်န့ၣ်. (ကတိၤ ၁၀:၂၂) ခါဆူညါန့ၣ် ပကထံၣ်ဘၣ် ယဟိဝၤယွၤ အတၢ်အၢၣ်လီၤတဖၣ် ကဟဲလၢပှဲၤထီၣ်လၢ ဟီၣ်ခိၣ်ဒီဘ့ၣ်ညါ. ဒီးတၢ်လၢ ကစၢ်ယွၤ ကမၤန့ၢ်ပှၤလၢခါဆူညါန့ၣ် ကဂ့ၤဒိၣ်န့ၢ်ဒံး ပထံၣ်တမှံအီၤ ခဲအံၤဒံး. အဃိ ပမ့ၢ်ဆဲးတီဒီး ယဟိဝၤယွၤန့ၣ် ခါဆူညါ ပကန့ၢ်ဘၣ် တၢ်သးခုအါမး.
“ယဟိဝၤယွၤ အမူခိၣ်ကလူး တီၢ်အီၤ” (မၤတၢ် ၁၂:၁၈-၂၅)
၁၇, ၁၈. ဘၣ်မနုၤအဃိ ပှၤပာ်ဒိၣ် ဟ့ၤရိာ် အကြံးပၤလဲၣ်.
၁၇ စီၤပ့းတရူး ထူၣ်ဖျဲးထီၣ်လၢ ဃိာ်ပူၤအဃိ ဟ့ၤရိာ် အကြံးပၤ ကမၢကမၣ်ဝဲ ဒီးအသးပှံၢ်ထီၣ်တၢ်ဒိၣ်မး. အဃိ အဟ့ၣ်လီၤတၢ်ကလုၢ်လၢ ပှၤကလူၤဃု စီၤပ့းတရူး တဘျီဃီ. ဝံၤဒီး အသမံသမိးဝဲ ပှၤသုးဖိတဖၣ်လၢ အအိၣ်ခိးဝဲ စီၤပ့းတရူး. ပှၤသုးဖိတဖၣ်အံၤ “ကဘၣ်တၢ်စံၣ်ညီၣ်” ဒီးဖျါလၢ ပှၤကမၤသံကွံာ် အဝဲသ့ၣ်. (မၤတၢ် ၁၂:၁၉) စီၤပၤဟ့ၤရိာ်န့ၣ် အကဲပှၤလၢ အတၢ်သးကညီၤ ဒီးအတၢ်ဒိသူၣ်ဒိသး တအိၣ်ဘၣ်. အကဲပှၤလၢ အအၢအသီအဃိ အကဘၣ် တၢ်စံၣ်ညီၣ်အီၤ စ့ၢ်ကီးဧါ.
၁၈ ဟ့ၤရိာ် အကြံးပၤန့ၣ် အတမၤသံဘၣ် စီၤပ့းတရူးဘၣ်အဃိ ဘၣ်သ့ၣ်သ့ၣ် အကမဲာ်ဆှး. ဘၣ်ဆၣ် တယံာ်ဘၣ်န့ၣ် အန့ၢ်ဘၣ်တၢ်ခွဲးတၢ်ယာ် အသီတဘျီလၢ အကပာ်ထီၣ်ထီအသး. ဒီးဖဲန့ၣ် အဒုၣ်ဒါတနီၤ ဟဲလၢအအိၣ် ဒ်သိးဒီး ကမၤဃူမၤဖိးတၢ်ဒီးအီၤ. အဃိ အအိၣ်ဒီး တၢ်ခွဲးတၢ်ယာ်လၢ အကတဲလီၤတၢ်လၢ ကမျၢၢ်တဖၣ် အမဲာ်ညါ. စီၤလူၤကၣ် ကွဲးဝဲလၢ တချုးလၢ ဟ့ၤရိာ် အကြံးပၤ ကတဲလီၤတၢ်လၢ ကမျၢၢ်မဲာ်ညါ ဒံးဘၣ်န့ၣ် “စီၤပၤဟ့ၤရိာ် ကူထီၣ်ကၤထီၣ်ဝဲ စီၤပၤအကူအကၤ.” ကၠိၤစံဖၢၤ လၢအကဲပှၤယူဒၤဖိ အပှၤကူၣ်ဘၣ်ကူၣ်သ့လၢ တၢ်စံၣ်စိၤတဲစိၤတကပၤစ့ၢ်ကီး တဲဝဲလၢ ဟ့ၤရိာ် အကြံးပၤ အဆ့ကၤန့ၣ် ပှၤတ့အီၤလၢစ့ညၣ် အဃိ ဖဲတၢ်ကပီၤဆဲးလီၤဘၣ်အီၤအခါ အဖျါကပြုၢ်ကပြီၤအဃိ ပှၤကမျၢၢ်အါဂၤ ဆိမိၣ်ဝဲလၢ အလီၤဂာ်ဒ်သိးဒီး ယွၤတဂၤ. ဖဲစီၤပၤလၢ အပာ်ထီၣ်ထီသးတဂၤအံၤ တဲလီၤတၢ်လၢ ကမျၢၢ်မဲာ်ညါအခါန့ၣ် ပှၤကမျၢၢ်တဖၣ် ကိးပသူထီၣ်ဝဲလၢ “အကဲယွၤတဂၤ အကလုၢ်လီၤ, တမ့ၢ် ပှၤကညီ အကလုၢ်ဘၣ်.”—မၤတၢ် ၁၂:၂၀-၂၂.
၁၉, ၂၀. (က) ဘၣ်မနုၤအဃိ ယဟိဝၤယွၤစံၣ်ညီၣ် ဟ့ၤရိာ် အကြံးပၤလဲၣ်. (ခ) မ့ၢ်လၢပသ့ၣ်ညါဘၣ် ဟ့ၤရိာ် အကြံးပၤ သံဝဲသတူၢ်ကလာ်အဃိ မၤမုာ်ထီၣ်ပသးဒ်လဲၣ်.
၁၉ ပှၤလၢအကြၢးဒိးန့ၢ် တၢ်လၤကပီၤဒ်အံၤန့ၣ် မ့ၢ်ထဲဒၣ်ကစၢ်ယွၤတဂၤလီၤ. ဒီးတၢ်ကဲထီၣ်သးအံၤ ကစၢ်ယွၤထံၣ်ဝဲ. ဖဲပှၤကမျၢၢ်ပတြၢၤ ဟ့ၤရိာ် အကြံးပၤအခါ အမ့ၢ်တတူၢ်လိာ်ဝဲဘၣ် ဒီးအမ့ၢ်ဆီၣ်လီၤသးန့ၣ်သ့ သနာ်က့ အတမၤဝဲဒ်န့ၣ်ဘၣ်. အဃိ တၢ်ကဲထီၣ်သးဒီးအီၤန့ၣ် လီၤဂာ်ဒ်သိး လံာ်ကတိၤဒိ တဲဝဲလၢ “တၢ်ပာ်ထီၣ်ထီသးန့ၣ် ဆှၢပှၤလၢ တၢ်ဟးဂီၤ.” (ကတိၤ ၁၆:၁၈) ဟ့ၤရိာ် အကြံးပၤလၢ အပာ်ထီၣ်ထီသး တဂၤအံၤ “ယဟိဝၤယွၤ အမူခိၣ်ကလူး တီၢ်အီၤ တဘျီဃီ” အဃိ “ထိးကလဲာ် အိၣ်ပှဲၤအကိပူၤ ဒီးအသံဝဲ.” အတၢ်သံအံၤ လီၤပျံၤလီၤဖုး ဒီးလီၤသးဘၣ်အၢဒိၣ်မး. (မၤတၢ် ၁၂:၂၃) ကၠိၤစံဖၢၤ ကွဲးဝဲစ့ၢ်ကီးလၢ ဟ့ၤရိာ် အကြံးပၤန့ၣ် ဆိးက့ထီၣ်သတူၢ်ကလာ် ဒီးအသ့ၣ်ညါလီၤသးလၢ ခီဖျိလၢ အတူၢ်လိာ်ဝဲ ပှၤကမျၢၢ်တဖၣ် အတၢ်စံးပတြၢၤအဃိ အကဘၣ်သံ. ဒီးအဆဲးတဲဝဲလၢ ဟ့ၤရိာ် အကြံးပၤန့ၣ် အဆိးက့ထီၣ်ယဲၢ်သီ ဒီးအသံ. b
၂၀ တဘျီတခီၣ် ပထံၣ်ဘၣ်လၢ ပှၤအၢပှၤသီတဖၣ်န့ၣ် အဝဲသ့ၣ်မၤတၢ်အၢတၢ်သီ ဒီဒူၣ်သနာ်က့ အဝဲသ့ၣ် တဘၣ်တၢ်စံၣ်ညီၣ်ဘၣ်. ခီဖျိလၢ “ဟီၣ်ခိၣ်ခဲလၢာ်န့ၣ် အိၣ်ဝဲလၢ မုၣ်ကီၤလံၢ် အစုပူၤ” အဃိ ပမ့ၢ်ထံၣ်ဘၣ်ဒ်အံၤန့ၣ် ပတဘၣ်ကမၢကမၣ်ဘၣ်. (၁ ယိၤဟၣ် ၅:၁၉) ကစၢ်ယွၤအခ့အပှၤ လၢအသးတီတနီၤန့ၣ် ထံၣ်ဘၣ်တၢ်ကီတၢ်ခဲ သနာ်က့ မ့မ့ၢ်ပှၤအၢပှၤသီတဖၣ်န့ၣ် မၤတၢ်အၢတၢ်သီဘၣ်ဆၣ် အဝဲသ့ၣ်တထံၣ်ဘၣ် တၢ်ကီတၢ်ခဲဘၣ်. အဃိ ဖဲပထံၣ်ဘၣ်ဒီး တၢ်တတီတလိၤအခါ တၢ်ဂ့ၢ်တခါအံၤ ကမၤမုာ်ထီၣ်ပသး. တၢ်ဂ့ၢ်တခါအံၤ ပာ်ဖျါထီၣ်ဝဲစ့ၢ်ကီးလၢ ယဟိဝၤယွၤ ကစံၣ်ညီၣ် ပှၤအၢပှၤသီ ဒီးပာ်ဖျါထီၣ်န့ၢ်ပှၤလၢ ယဟိဝၤယွၤန့ၣ် အအဲၣ်တၢ်တီတၢ်လိၤ. (စံး ၃၃:၅) တယံာ်လၢၤဘၣ်န့ၣ် ယဟိဝၤယွၤ အတၢ်တီတၢ်လိၤ ကအိၣ်ပှဲၤလၢ ဟီၣ်ခိၣ်ဒီဘ့ၣ်ညါ.
၂၁. ဖဲမၤတၢ် အဆၢဒိၣ် ၁၂ န့ၣ် ပန့ၢ်ဘၣ်တၢ်မၤလိ အရ့ဒိၣ်မနုၤလဲၣ် ဒီးတၢ်ဂ့ၢ်အံၤ မၤမုာ်ထီၣ်ပသးလၢ ဆၢကတီၢ်ခဲအံၤဒ်လဲၣ်.
၂၁ “ယဟိဝၤယွၤ အကလုၢ်ကထါ ရၤလီၤအသး ဒီးပှၤစူၢ်က့ၤနာ်က့ၤတၢ် အါထီၣ်ဝဲ” အဃိ တၢ်ဂ့ၢ်အံၤ မၤဆူၣ်ထီၣ် ပဂံၢ်ပဘါဒိၣ်မး. (မၤတၢ် ၁၂:၂၄) တၢ်ဂ့ၢ်အံၤ ပာ်ဖျါထီၣ်လၢ တၢ်စံၣ်တဲၤတဲလီၤတၢ်မၤ ကဆဲးရၤလီၤအသး ဒီးအဒုးသ့ၣ်ညါပှၤလၢ ယဟိဝၤယွၤ ကဆိၣ်ဂ့ၤဝဲ ပတၢ်စံၣ်တဲၤတဲလီၤတၢ်မၤ လၢဆၢကတီၢ်ခဲအံၤစ့ၢ်ကီး. တၢ်ဂ့ၢ်ဖဲ မၤတၢ် အဆၢဒိၣ် ၁၂ န့ၣ်တပာ်ဖျါထီၣ်ထဲ တၢ်မၢဖိတဂၤအတၢ်သံ ဒီးတၢ်မၢဖိ လၢအဂၤတဂၤ ထူၣ်ဖျဲးထီၣ်လၢ ဃိာ်ပူၤအဂ့ၢ်ဘၣ်. ဘၣ်ဆၣ် ပထံၣ်ဘၣ်စ့ၢ်ကီးလၢ ဒ်သိး မုၣ်ကီၤလံၢ် မၤဟးဂီၤ ခရံာ်ဖိတၢ်အိၣ်ဖှိၣ် ဒီးမၤပတုာ် တၢ်စံၣ်တဲၤတဲလီၤတၢ်မၤ တန့ၢ်တဂ့ၤအဂီၢ် ယဟိဝၤယွၤ မၤစၢၤအခ့အပှၤ. ပသ့ၣ်ညါဘၣ်လၢ မုၣ်ကီၤလံၢ်မ့ၢ်ဂ့ၤ ပှၤလၢအကျဲးစၢး မၤပတုာ် ပတၢ်စံၣ်တဲၤတဲလီၤတၢ်မၤမ့ၢ်ဂ့ၤ အဝဲသ့ၣ် အတၢ်ကျဲးစၢးန့ၣ် ကကဲထီၣ် တၢ်ကလီကလီ. (ၡါ ၅၄:၁၇) မ့မ့ၢ်ပှၤလၢ အဘူၣ်ထီၣ်ဘါထီၣ် ယဟိဝၤယွၤ ဒီးပိာ်ယ့ၣ်ၡူးခရံာ်အခံန့ၣ် ပှၤမၤပတုာ် အဝဲသ့ၣ်အတၢ်မၤ တန့ၢ်ဘၣ်. တၢ်ဂ့ၢ်အံၤ ဟ့ၣ်ဂံၢ်ဟ့ၣ်ဘါပှၤဒိၣ်မး တမ့ၢ်ဧါ. ဆၢကတီၢ်ခဲအံၤ ပအိၣ်ဒီး တၢ်ခွဲးတၢ်ယာ်လၢ ပစံၣ်တဲၤတဲလီၤဘၣ် “ယဟိဝၤယွၤ အကလုၢ်ကထါ” အဃိ ပသးခုဒိၣ်မး.
a ကွၢ်တၢ်လွံၢ်နၢၣ် လၢအမ့ၢ် “ ဟ့ၤရိာ် အကြံးပၤ တၢတဂၤ.”
b ပှၤကွဲးလံာ်ဖိလၢ အကဲကသံၣ်သရၣ်တဂၤ ကွဲးဝဲလၢ ဟ့ၤရိာ် အကြံးပၤ တၢတဂၤ အတၢ်ဆါလၢ ကၠိၤစံဖၢၤ ဒီးစီၤလူၤကၣ်ကွဲးဝဲန့ၣ် ဘၣ်သ့ၣ်သ့ၣ် အကဲထီၣ်သး ခီဖျိလၢ ထိးကလဲာ် အိၣ်ကတာ်လၢ အပှံာ်ပူၤပှဲၤပှဲၤ အဃိအသံဝဲ. တဘျီတခီၣ် ထိးကလဲာ်တဖၣ်အံၤ ဟဲထီၣ် ဖဲပှၤဆါတဂၤဘှိးထီၣ် မ့တမ့ၢ် ဖဲပှၤဆါတဂၤသံအခါ အဟးထီၣ်လၢ ပှၤဆါအလိၤ. လံာ်တဘ့ၣ်တဲဝဲလၢ “ခီဖျိလၢ စီၤလူၤကၣ် ကဲကသံၣ်သရၣ်အဃိ အကွဲးဖျါထီၣ် တၢ်ကဲထီၣ်သးဒီး ဟ့ၤရိာ် အကြံးပၤ တၢတဂၤ ဘၣ်ဝဲလီၤတံၢ်လီၤဆဲး. အဃိ ပသ့ၣ်ညါဘၣ်လၢ ဟ့ၤရိာ် အကြံးပၤ တၢတဂၤ အတၢ်သံန့ၣ် လီၤပျံၤလီၤဖုး ဒီးလီၤသးဘၣ်အၢဒိၣ်မး.”
