တၢ်မၤလိ ၄
“တမ့ၢ် ပှၤကူၣ်ဘၣ်ကူၣ်သ့ဘၣ်, မ့ၢ်ဒၣ် ပှၤမုၢ်ဆ့ၣ်မုၢ်ဂီၤဖိ”
တၢ်မၢဖိတဖၣ် ပာ်ဖျါထီၣ်တၢ်သးဒူ ဒီးယဟိဝၤယွၤ ဆိၣ်ဂ့ၤအဝဲသ့ၣ်
တၢ်ဂ့ၢ်ဒိးသန့ၤထီၣ်သးလၢ မၤတၢ် ၃:၁–၅:၁၁
၁, ၂. ဖဲတၢ်လုၢ်ဟံၣ်အတြဲၤခီၣ်ထံးန့ၣ် စီၤပ့းတရူး ဒီးစီၤယိၤဟၣ် မၤဝဲတၢ်လီၤလးမနုၤလဲၣ်.
တၢ်ဆၢကတီၢ်ဘၣ်လၢ မုၢ်ဟါလီၤ ဒီးမုၢ်ဆဲးလီၤဘၣ်ဝဲ ပှၤဂီၢ်မုၢ်တဖၣ်. တယံာ်လၢၤဘၣ်န့ၣ် “တၢ်ဃ့ထုကဖၣ်တၢ် အဆၢကတီၢ်” a ကစးထီၣ်ဝဲ. (မၤတၢ် ၂:၄၆; ၃:၁) အဃိ ပထံၣ်ဘၣ်လၢ ပှၤယူဒၤဖိ လၢအသးတီတဖၣ် ဒီးခရံာ်အပျဲၢ်အဘီၣ်တဖၣ် လဲၤဝဲလၢတၢ်လုၢ်ဟံၣ်. စီၤပ့းတရူး ဒီးစီၤယိၤဟၣ်စ့ၢ်ကီး အိၣ်လၢပှၤဂီၢ်မုၢ်အကျါ ဒီးအဝဲသ့ၣ်လဲၤလၢ တၢ်လုၢ်ဟံၣ်အတြဲၤလၢ ပှၤကိးအီၤလၢ တြဲၤဃံလၤ. ခီဖျိလၢ ပှၤဟးထီၣ်ဟးလီၤ ဒီးပှၤတဲသကိးတၢ်အဃိ တၢ်လီၢ်တတီၤအံၤ တၢ်သီၣ်တၢ်သဲအါမး. တကးဒံးဘၣ် လၢပှၤဂီၢ်မုၢ်အကျါန့ၣ် အိၣ်ဝဲဒီး ပိာ်ခွါတဂၤလၢ အဃ့တၢ်လၢကျဲကပၤ. ပိာ်ခွါတဂၤအံၤ အသးနံၣ်အိၣ်ဝဲ အနံၣ် ၄၀ ဘျဲၣ် ဒီးအခီၣ်ဟးဂီၤလၢ အအိၣ်ဖျဲၣ်ထီၣ်အခါလံ.—မၤတၢ် ၃:၂; ၄:၂၂.
၂ ဖဲစီၤပ့းတရူး ဒီးစီၤယိၤဟၣ် လဲၤဘူးထီၣ်ဒီး ပိာ်ခွါတဂၤလၢ အဃ့တၢ်လၢကျဲကပၤအခါ ပိာ်ခွါတဂၤအံၤ ဃ့အဝဲသ့ၣ်စ့. စီၤပ့းတရူး ဒီးစီၤယိၤဟၣ် အိၣ်ပတုာ် ဒီးပိာ်ခွါတဂၤအံၤ ကွၢ်အဝဲသ့ၣ် ဒီးဆိမိၣ်ဝဲလၢ အဝဲသ့ၣ် ကဟ့ၣ်အီၤစ့. ဘၣ်ဆၣ် စီၤပ့းတရူး တဲဘၣ်ပိာ်ခွါတဂၤအံၤလၢ “ယထူဒီးယစ့ တအိၣ်ဘၣ်. ဘၣ်ဆၣ် တၢ်လၢ အအိၣ်ဒီးယၤန့ၣ် ယကဟ့ၣ်လီၤနၤလီၤ. လၢပှၤနစၤရ့းဖိ ယ့ၣ်ၡူးခရံာ် အမံၤအပူၤန့ၣ် ယကတဲနၤ, ဆၢထၢၣ်ဟးတက့ၢ်.” ဆိမိၣ်ကွၢ် ဖဲပှၤဂီၢ်မုၢ်တဖၣ် ထံၣ်ဝဲလၢ စီၤပ့းတရူး တွံၢ်ထီၣ်ပိာ်ခွါတဂၤအံၤအစု ဒီးပိာ်ခွါအံၤ ဆၢထၢၣ်ဝဲ အဆိကတၢၢ်တဘျီ လၢအတၢ်အိၣ်မူပူၤအခါ အဝဲသ့ၣ်ကမၢကမၣ် ဖးဒိၣ်ညါ. (မၤတၢ် ၃:၆, ၇) ဒီးဖဲပိာ်ခွါတဂၤအံၤ ကွၢ်လီၤအခီၣ် ဒီးခါထီၣ်အခီၣ် အဆိကတၢၢ်တခါန့ၣ် ထံၣ်တမှံကွၢ်လၢ အကသးခုထဲလဲၣ်. လၢတၢ်သးခုအပူၤ ပိာ်ခွါတဂၤအံၤ ဖုကဆဲးထီၣ် ဒီးစံးထီၣ်ပတြၢၤကစၢ်ယွၤလၢ အကလုၢ်ဖးဒိၣ်.
၃. တၢ်ဟ့ၣ်အလုၢ်ဒိၣ်ပှ့ၤဒိၣ်လၢ ပှၤဂီၢ်မုၢ် ဒီးပိာ်ခွါလၢ အခီၣ်ဘျါက့ၤတဂၤ န့ၢ်ဘၣ်ဝဲသ့န့ၣ် မ့ၢ်မနုၤလဲၣ်.
၃ ပှၤဂီၢ်မုၢ်တဖၣ် သူၣ်ခုသးခုဒိၣ်မးအဃိ အဝဲသ့ၣ်လဲၤလၢ စီၤၡလိၤမိၤ အကျဲလၢအိၣ်ဒီး အခိၣ်ဒုး ဒ်သိးကထံၣ်ဘၣ် စီၤပ့းတရူး ဒီးစီၤယိၤဟၣ်. လၢညါန့ၣ် ယ့ၣ်ၡူး ဆၢထၢၣ်သိၣ်လိတၢ် ဖဲတၢ်လီၢ်တတီၤအံၤ ဒီးခဲအံၤ စီၤပ့းတရူး ဆၢထၢၣ်ဖဲတၢ်လီၢ်တတီၤဃီ ဒီးတဲဘၣ် ပှၤဂီၢ်မုၢ်လၢ တၢ်လီၤလးတခါအံၤအဂ့ၢ်. (ယိၤဟၣ် ၁၀:၂၃) တၢ်လၢ စီၤပ့းတရူး တဲဘၣ် ပှၤဂီၢ်မုၢ် ဒီးပိာ်ခွါလၢ အခီၣ်ဘျါက့ၤတဂၤန့ၣ် အလီၤဂာ်ဒ်သိးဒီး တၢ်ဟ့ၣ်လၢ အလုၢ်ဒိၣ်ပှ့ၤဒိၣ်န့ၢ် ထူဒီးစ့ဒံး. တၢ်ဟ့ၣ်တခါအံၤ တမ့ၢ်ထဲလၢ အဝဲသ့ၣ်ကန့ၢ်ဘၣ် တၢ်ခွဲးတၢ်ယာ်လၢ အတၢ်အိၣ်ဆူၣ်အိၣ်ချ့ ကဂ့ၤထီၣ်က့ၤအဂီၢ်ဘၣ်. အဝဲသ့ၣ် ကန့ၢ်ဘၣ်စ့ၢ်ကီး တၢ်ခွဲးတၢ်ယာ်ဒ်သိး အကပီၢ်ယၢ်လီၤက့ၤသး, အတၢ်ဒဲးဘး ကဘၣ်တၢ်ထူးသံကွံာ်အီၤ ဒီးအဝဲသ့ၣ် ကကဲထီၣ်ဘၣ် ယ့ၣ်ၡူးခရံာ် အပျဲၢ်အဘီၣ်. ယ့ၣ်ၡူးခရံာ်န့ၣ် ယဟိဝၤယွၤ ဃုထၢထီၣ်အီၤလၢ “တၢ်မူအခိၣ်တဂၤ.”—မၤတၢ် ၃:၁၅.
၄. (က) စီၤပ့းတရူး ဒီးစီၤယိၤဟၣ် မၤဘျါက့ၤ ပိာ်ခွါတဂၤဝံၤအလီၢ်ခံ အဝဲသ့ၣ် ထံၣ်ဘၣ်ဒီး တၢ်ကီတၢ်ခဲဒ်လဲၣ်. (ခ) ပကတဲသကိး တၢ်သံကွၢ် မနုၤလဲၣ်.
၄ တၢ်တနံၤန့ၣ် အကဲဝဲ မုၢ်နံၤလၢ ပှၤသးပ့ၤနီၣ်ဝဲတန့ၢ်ဘၣ်. ပထံၣ်ဘၣ်လၢ စီၤပ့းတရူး မၤဘျါက့ၤ ပိာ်ခွါလၢအခီၣ်ဟးဂီၤတဂၤ ဒီးခဲအံၤ ပိာ်ခွါန့ၣ်အဟးသ့လံ. ဒီးပှၤလၢအကထိတဖၣ်န့ၣ် ဒ်သိးအဝဲသ့ၣ် ကမၤတၢ်ဘၣ်ကစၢ်ယွၤအသးအဂီၢ် စီၤပ့းတရူး တဲဘၣ်အဝဲသ့ၣ်လၢ ကစၢ်ယွၤ အတၢ်ဘၣ်သး. (ကလီး ၁:၉, ၁၀) တကးဒံးဘၣ် ခီဖျိလၢ တၢ်ကဲထီၣ်သး ဖဲတၢ်တနံၤန့ၣ်အဃိ ဒ်သိးခရံာ်အပျဲၢ်အဘီၣ် လၢအသးတီတဖၣ် တစံၣ်တဲၤတဲလီၤ ဘီမုၢ်တၢ်သးခုကစီၣ်လၢၤတဂ့ၤအဂီၢ် ပှၤလၢအအိၣ်ဒီး တၢ်စိတၢ်ကမီၤတဖၣ် ကျဲးစၢး မၤပတုာ်ဝဲအဝဲသ့ၣ် အတၢ်မၤ. (မၤတၢ် ၁:၈) ပှၤလၢအအိၣ်ဒီး တၢ်စိတၢ်ကမီၤတဖၣ် ဆိမိၣ်ဝဲလၢ စီၤပ့းတရူး ဒီးစီၤယိၤဟၣ်န့ၣ် “မ့ၢ်ဒၣ် ပှၤမုၢ်ဆ့ၣ်မုၢ်ဂီၤဖိ.” သနာ်က့ ဘၣ်ဃးဒီး စီၤပ့းတရူး ဒီးစီၤယိၤဟၣ် စံၣ်တဲၤတဲလီၤ ပှၤဂီၢ်မုၢ်န့ၣ် ပန့ၢ်ဘၣ်တၢ်မၤလိဒ်လဲၣ်. b (မၤတၢ် ၄:၁၃) ဒီးဖဲပှၤထီဒါ စီၤပ့းတရူး, စီၤယိၤဟၣ် ဒီးခရံာ်အပျဲၢ်အဘီၣ် အဂၤတဖၣ်အခါ အဝဲသ့ၣ် ပာ်ဖျါထီၣ် တၢ်သးဒူ. အဃိ ပကွၢ်လိ အဝဲသ့ၣ်အဒိအတဲာ် ကသ့ဒ်လဲၣ်.
တမ့ၢ်လၢအ “နီၢ်ကစၢ် အတၢ်စိတၢ်ကမီၤ” ဘၣ် (မၤတၢ် ၃:၁၁-၂၆)
၅. ဘၣ်ဃးဒီး စီၤပ့းတရူး တဲတၢ်ဒီး ပှၤဂီၢ်မုၢ်န့ၣ် ပန့ၢ်ဘၣ် တၢ်မၤလိဒ်လဲၣ်.
၅ စီၤပ့းတရူး ဒီးစီၤယိၤဟၣ် တဲတၢ်ဒီးပှၤဂီၢ်မုၢ် ဒီးအဝဲသ့ၣ် သ့ၣ်ညါဝဲလၢ ပှၤတနီၤလၢ ပှၤဂီၢ်မုၢ်အကျါန့ၣ် ဘၣ်သ့ၣ်သ့ၣ် ကပၣ်ဃုာ်ဒီး ပှၤလၢအမၢပှၤမၤသံယ့ၣ်ၡူး. (မၢ်ကူး ၁၅:၈-၁၅; မၤတၢ် ၃:၁၃-၁၅) အဃိ ဖဲစီၤပ့းတရူး တဲဝဲလၢ ပိာ်ခွါလၢအခီၣ်ဟးဂီၤတဂၤ ဘျါက့ၤလၢ ယ့ၣ်ၡူးအမံၤအခါ ပထံၣ်ဘၣ်လၢ စီၤပ့းတရူး အိၣ်ဒီးတၢ်သးဒူ ဖးဒိၣ်ညါ ဒီးအတဲဖျါထီၣ် တၢ်မ့ၢ်တၢ်တီဒူဒူ. အဃိ စီၤပ့းတရူး တဲပှၤဂီၢ်မုၢ်ဒူဒူလၢ လၢသုကျါတနီၤန့ၣ် ပၣ်ဃုာ်ဒီး ပှၤလၢအမၤသံယ့ၣ်ၡူးခရံာ်. သနာ်က့ စီၤပ့းတရူး တစၢဃာ်အဝဲသ့ၣ် တၢ်ကမၣ်ဘၣ်. စီၤပ့းတရူး သ့ၣ်ညါဝဲလၢ အဝဲသ့ၣ် “တသ့ၣ်ညါဝဲဘၣ်အဃိ မၤဘၣ်တၢ်ဒ်န့ၣ်.” (မၤတၢ် ၃:၁၇) စီၤပ့းတရူး ကိးအဝဲသ့ၣ်လၢ ဒီပုၢ်ဝဲၢ် ဒီးတဲဘၣ်အဝဲသ့ၣ်လၢ ဘီမုၢ်တၢ်သးခုကစီၣ်. အဝဲသ့ၣ် မ့ၢ်ပီၢ်ယၢ်လီၤက့ၤသး ဒီးစူၢ်က့ၤနာ်က့ၤခရံာ်န့ၣ် အဝဲသ့ၣ် ကန့ၢ်ဘၣ် “တၢ်မၤမုာ်ထီၣ်က့ၤ” လၢယဟိဝၤယွၤအအိၣ်. (မၤတၢ် ၃:၁၉) ပဝဲစ့ၢ်ကီး ဖဲပတဲပၠး ပှၤဂၤဘၣ်ဃးဒီး ကစၢ်ယွၤ အတၢ်စံၣ်ညီၣ်အကစီၣ်အခါ ပကဘၣ်အိၣ်ဒီး တၢ်သးဒူ ဒီးတဲတၢ်ဒူဒူ. တကးဒံးဘၣ် ကဘၣ်ပာ်ကဲပှၤဂၤ ဒီးပတဘၣ်စံၣ်ညီၣ်ပှၤဂၤဘၣ်. ပကဘၣ်ထံၣ်ပှၤဂၤလၢ မုၢ်ကအိၣ်ဝဲတနံၤ အဝဲသ့ၣ် ကဲထီၣ်ပဒီပုၢ်ဝဲၢ်မုၣ်ခွါသ့ ဒီးဒ်စီၤပ့းတရူးအသိး ပကဘၣ် တဲဘၣ်ပှၤဂၤလၢ ဘီမုၢ်တၢ်သးခုကစီၣ်.
၆. စီၤပ့းတရူး ဒီးစီၤယိၤဟၣ် ပာ်ဖျါထီၣ် တၢ်ဆီၣ်လီၤသးဒ်လဲၣ်.
၆ တၢ်မၢဖိတဖၣ်အံၤ ကဲပှၤလၢ အအိၣ်ဒီး တၢ်ဆီၣ်လီၤသး. တၢ်လီၤလးလၢ အဝဲသ့ၣ်မၤဝဲန့ၣ် တတဲဝဲလၢ အမၤဝဲခီဖျိ အနီၢ်ကစၢ် အတၢ်စိတၢ်ကမီၤဘၣ်. အဃိ စီၤပ့းတရူး တဲဘၣ်ပှၤဂီၢ်မုၢ်လၢ “ဘၣ်မနုၤအဃိ သုကွၢ်ထံပှၤဒီး ဆိကမိၣ်လၢ ပဒုးဟးပှၤတဂၤအံၤ ခီဖျိလၢ ပနီၢ်ကစၢ် အတၢ်စိတၢ်ကမီၤ မ့တမ့ၢ် ပတၢ်သးတီဒီးကစၢ်ယွၤ အဃိလဲၣ်.” (မၤတၢ် ၃:၁၂) စီၤပ့းတရူး ဒီးတၢ်မၢဖိအဂၤတဖၣ် သ့ၣ်ညါဝဲလၢ ဖဲအဝဲသ့ၣ် စံၣ်တဲၤတဲလီၤတၢ်အခါ တၢ်လၢအဝဲသ့ၣ်မၤဝဲ ကဲထီၣ်လိၣ်ထီၣ် တမံၤမံၤန့ၣ် တမ့ၢ်လၢ အနီၢ်ကစၢ် တၢ်စိတၢ်ကမီၤအဃိဘၣ် မ့ၢ်လၢကစၢ်ယွၤ အတၢ်စိတၢ်ကမီၤအဃိလီၤ. အဃိန့ၣ် ပထံၣ်ဘၣ်လၢ အဝဲသ့ၣ်အိၣ်ဒီး တၢ်ဆီၣ်လီၤသး ဒီးဘၣ်သးဝဲလၢ ပှၤဂီၢ်မုၢ်တဖၣ် ကစံးထီၣ်ပတြၢၤ ယဟိဝၤယွၤ ဒီးယ့ၣ်ၡူးဟီ.
၇, ၈. (က) ပမၤစၢၤပှၤဂၤ ဒီးဟ့ၣ်အဝဲသ့ၣ် တၢ်ခွဲးတၢ်ယာ် မနုၤသ့လဲၣ်. (ခ) ဆၢကတီၢ်ခဲအံၤ တၢ်အၢၣ်လီၤ လၢအမ့ၢ် “တၢ်မၤဂ့ၤထီၣ်က့ၤ တၢ်ခဲလၢာ် အဆၢကတီၢ်” န့ၣ်ဟဲလၢပှဲၤထီၣ်ဒ်လဲၣ်.
၇ ပဝဲစ့ၢ်ကီး ဖဲပလဲၤစံၣ်တဲၤတဲလီၤတၢ်အခါ ပကဘၣ်အိၣ်ဒီး တၢ်ဆီၣ်လီၤသး. ဆၢကတီၢ်ခဲအံၤ ကစၢ်ယွၤတဟ့ၣ်ဝဲ ခရံာ်ဖိတဖၣ် တၢ်စိတၢ်ကမီၤဒ်သိး ကမၤတၢ်လီၤလး ဒီးမၤဘျါက့ၤ တၢ်ဆူးတၢ်ဆါဘၣ်. သနာ်က့ ပမၤစၢၤပှၤဂၤဒ်သိး အဝဲသ့ၣ်ကစူၢ်က့ၤနာ်က့ၤ ကစၢ်ယွၤဒီးယ့ၣ်ၡူးခရံာ်သ့. ဒီးဒ်စီၤပ့းတရူး ဟ့ၣ်ပှၤဂီၢ်မုၢ် တၢ်ခွဲးတၢ်ယာ်လၢ အတၢ်ဒဲးဘးကပျၢ်ကွံာ်ဝဲ ဒီးကန့ၢ်ဘၣ် တၢ်မၤမုာ်ထီၣ်က့ၤလၢ ယဟိဝၤယွၤအအိၣ်အသိး ပဝဲစ့ၢ်ကီး ပမၤစၢၤပှၤဂၤဒ်န့ၣ်သ့. ကိးနံၣ်ဒဲးန့ၣ် ပှၤလၢအကထိတဖၣ် တူၢ်လိာ်ဝဲ တၢ်ခွဲးတၢ်ယာ်အံၤ ဒီးဒိးဘျၢထံ ဒ်သိးအဝဲသ့ၣ် ကကဲထီၣ် ယ့ၣ်ၡူးခရံာ်အပျဲၢ်အဘီၣ်.
၈ ဆၢကတီၢ်ခဲအံၤန့ၣ် ပအိၣ်မူဘၣ်လၢ တၢ်ဆၢကတီၢ်လၢ စီၤပ့းတရူး ကိးဝဲလၢ “တၢ်မၤဂ့ၤထီၣ်က့ၤ တၢ်ခဲလၢာ် အဆၢကတီၢ်” သပှၢ်တၢၢ်. ပထံၣ်ဘၣ်လၢ ကစၢ်ယွၤအဘီအမုၢ် စးထီၣ်ပၢတၢ်လၢမူခိၣ်ဖဲ ၁၉၁၄ နံၣ် ဒီးနံၣ်တနံၣ်အံၤ အမၤလၢပှဲၤထီၣ်ဝဲ ဝံအတၢ်စံးပာ်လၢ “ကစၢ်ယွၤ တဲဆိပာ်စၢၤဝဲခီဖျိလၢ ဝံစီဆှံလၢညါတဖၣ် အထးခိၣ်.” (မၤတၢ် ၃:၂၁; စံး ၁၁၀:၁-၃; ဒၤ ၄:၁၆, ၁၇) ခရံာ်စးထီၣ်ပၢတၢ်လၢမူခိၣ် တယံာ်ဘၣ်ဒီး အမၤစၢၤဝဲ အပျဲၢ်အဘီၣ်တဖၣ် ဒ်သိးဒီး အဝဲသ့ၣ် ကဒုးအိၣ်ထီၣ်က့ၤ တၢ်ဘူၣ်တၢ်ဘါ အမ့ၢ်အတီ လၢဟီၣ်ခိၣ်ချၢ. အဃိ ပှၤလၢအကကွဲၢ်တဖၣ် အိၣ်ဘၣ်လၢ နီၢ်သးပၤရဒံစူး ဒီးကဲထီၣ်ဝဲ ကစၢ်ယွၤအဘီအမုၢ် အထံဖိကီၢ်ဖိ ဒီးအဝဲသ့ၣ် ဘူၣ်ထီၣ်ဘါထီၣ် ယဟိဝၤယွၤ လၢတၢ်ဃူတၢ်ဖိးအပူၤ. ပှၤတဖၣ်အံၤ ပတုာ်ကွံာ်ဝဲ အလုၢ်လၢ်သကဲာ်ပဝး လၢအတဂ့ၤဘၣ် ဒီးအဝဲသ့ၣ် “ဒုးအိၣ်ထီၣ် လုၢ်လၢ်သကဲာ်ပဝးအသီ ဒ်ကစၢ်ယွၤအတၢ်ဘၣ်သး အိၣ်ဝဲအသိး.” (အ့း ၄:၂၂-၂၄) ပထံၣ်ဘၣ်လၢ ဒ်ကစၢ်ယွၤအသးစီဆှံ မၤဘျါက့ၤ ပိာ်ခွါလၢအခီၣ်ဟးဂီၤတဂၤအသိး ဆၢကတီၢ်ခဲအံၤစ့ၢ်ကီး ကစၢ်ယွၤအသးစီဆှံ မၤစၢၤဝဲပှၤအါဂၤ ဒ်သိးအဝဲသ့ၣ် ကဆီတလဲက့ၤအသး ဒီးဘူၣ်ထီၣ်ဘါထီၣ်က့ၤအီၤ. အဃိ ပသ့ၣ်ညါဘၣ်လၢ တၢ်ကဲထီၣ်သးဒ်အံၤသ့န့ၣ် တမ့ၢ်လၢ ပှၤဟီၣ်ခိၣ်ဖိ အတၢ်စိတၢ်ကမီၤအဃိဘၣ်. ဒီးဒ်စီၤပ့းတရူးအသိး ဖဲပသိၣ်လိပှၤဂၤအခါ ပကဘၣ်အိၣ်ဒီး တၢ်သးဒူ ဒီးသူကစၢ်ယွၤ အကလုၢ်ကထါ သ့သ့ဘၣ်ဘၣ်. ဒီးပှၤလၢပမၤစၢၤအီၤတဂၤဂၤ မ့ၢ်ကဲထီၣ် ခရံာ်အပျဲၢ်အဘီၣ်န့ၣ် အကဲထီၣ်ခီဖျိလၢ ကစၢ်ယွၤ တၢ်စိတၢ်ကမီၤအဃိ ဒီးတမ့ၢ်လၢ ပတၢ်သ့တၢ်ဘၣ် အဃိဘၣ်.
“ပဘၣ်စံၣ်တဲၤတဲလီၤအီၤ ဒီးပပတုာ်တသ့ဘၣ်” (မၤတၢ် ၄:၁-၂၂)
၉-၁၁. (က) ဖဲပှၤယူဒၤဖိခိၣ်နၢ်တဖၣ် နၢ်ဟူ စီၤပ့းတရူး ဒီးစီၤယိၤဟၣ် စံၣ်တဲၤတဲလီၤတၢ်အခါ အဝဲသ့ၣ် မၤဝဲဒ်လဲၣ်. (ခ) တၢ်မၢဖိခံဂၤအံၤ ပာ်လီၤသးလၢ ကဆဲးမၤမနုၤလဲၣ်.
၉ ခီဖျိလၢ ပှၤဂီၢ်မုၢ်တဖၣ် နၢ်ဟူဘၣ်တၢ်လၢ စီၤပ့းတရူးတဲဝဲ ဒီးထံၣ်ဘၣ် ပိာ်ခွါလၢ အခီၣ်ဘျါက့ၤတဂၤ ဖုကဆဲးထီၣ်လၢ တၢ်သးခုအဃိ အဝဲသ့ၣ်သူၣ်ခုသးခု ဒီးသီၣ်သဲဒိၣ်မး. ခီဖျိလၢ တၢ်သီၣ်တၢ်သဲဒိၣ်မး အဃိ ပှၤကွၢ်ထွဲ တၢ်လုၢ်ဟံၣ် အခိၣ် ဒီးပှၤလုၢ်တၢ်ဒိၣ်အခိၣ်တဖၣ် ကရီဟဲကွၢ်တၢ်. ဘၣ်သ့ၣ်သ့ၣ် အဝဲသ့ၣ်ကကဲ ပှၤစးဒူၤကဲ. ပှၤစးဒူၤကဲန့ၣ် အကဲပှၤထူးပှၤတီၤ ဒီးအဝဲသ့ၣ် ဆီၣ်ထွဲ ရိမ့ၤအတၢ်ပၢ. အဃိ အဝဲသ့ၣ် အိၣ်ဒီးတၢ်စိတၢ်ကမီၤ လၢထံဂ့ၢ်ကီၢ်ဂ့ၢ်တကပၤ. အဝဲသ့ၣ် တမၤထွဲ စီၤမိၤၡ့အတၢ်သိၣ်တၢ်သီ ဒ်သိးဒီး ပှၤဖၤရံၤၡဲဘၣ် ဒီးတနာ်စ့ၢ်ကီး တၢ်ဂဲၤဆၢထၢၣ်သမူထီၣ်က့ၤဘၣ်. c အဃိ ဖဲအဝဲသ့ၣ်ထံၣ် စီၤပ့းတရူး ဒီးစီၤယိၤဟၣ် သိၣ်လိတၢ်လၢ တၢ်လုၢ်ဟံၣ်ပူၤ ဘၣ်ဃးဒီး ယ့ၣ်ၡူး ဂဲၤဆၢထၢၣ်သမူထီၣ်က့ၤ အဂ့ၢ်န့ၣ် အဝဲသ့ၣ်သးပှံၢ်ထီၣ်တၢ်ဖးဒိၣ်.
၁၀ ပှၤလၢအထီဒါတၢ်တဖၣ်အံၤ အဝဲသ့ၣ် ဖီၣ်န့ၢ် စီၤပ့းတရူး ဒီးစီၤယိၤဟၣ် ဒီးပၢနုာ်အဝဲသ့ၣ် လၢဃိာ်ပူၤ. ဒီးလၢခံတနံၤန့ၣ် အဝဲသ့ၣ်လဲၤကိး စီၤပ့းတရူး ဒီးစီၤယိၤဟၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်တဖျၢၣ် အမဲာ်ညါ. ပှၤလၢအပၢတၢ်တဖၣ်အံၤ အဝဲသ့ၣ်ဆိမိၣ်ဒိၣ်လီၤသး ဒီးအထံၣ်လၢ စီၤပ့းတရူး ဒီးစီၤယိၤဟၣ်န့ၣ် “တမ့ၢ် ပှၤကူၣ်ဘၣ်ကူၣ်သ့ဘၣ်, မ့ၢ်ဒၣ် ပှၤမုၢ်ဆ့ၣ်မုၢ်ဂီၤဖိ” ဒီးအဝဲသ့ၣ် တမၤလိဘၣ်တၢ်လၢ တၢ်ဘူၣ်တၢ်ဘါ အကၠိဘၣ် အဃိ အဝဲသ့ၣ် တကြၢးသိၣ်လိ တၢ်လၢ တၢ်လုၢ်ဟံၣ်ပူၤဘၣ်. သနာ်က့ စီၤပ့းတရူး ဒီးစီၤယိၤဟၣ် တဲတၢ်ဒူဒူ ဒီးအိၣ်ဒီးတၢ်နာ်လၢ အဂၢၢ်ကျၢၤ အဃိ ပှၤတဖၣ်န့ၣ် ကမၢကမၣ်. စီၤပ့းတရူး ဒီးစီၤယိၤဟၣ် အိၣ်ဒီးတၢ်သ့တၢ်ဘၣ် ဒ်အံၤန့ၣ် ခီဖျိလၢ အဝဲသ့ၣ် “မ့ၢ်ပှၤလၢ အအိၣ်ဝဲဒီး ယ့ၣ်ၡူးလၢအပူၤကွံာ်.” (မၤတၢ် ၄:၁၃) ဒီးယ့ၣ်ၡူးသိၣ်လိ အဝဲသ့ၣ် ဒ်ပှၤလၢအအိၣ်ဒီး တၢ်စိတၢ်ကမီၤတဂၤအသိး တမ့ၢ်ဒ် ပှၤကွဲးလံာ်ဖိတဖၣ် အသိးဘၣ်.—မး ၇:၂၈, ၂၉.
၁၁ စံၣ်ညီၣ်ကွီၢ်အရူ မၤလိာ် တၢ်မၢဖိခံဂၤအံၤလၢ တဘၣ်စံၣ်တဲၤတဲလီၤတၢ်လၢၤဘၣ်. ဆၢကတီၢ်ဖဲန့ၣ် စံၣ်ညီၣ်ကွီၢ်အရူ အိၣ်ဒီးတၢ်စိကမီၤဒိၣ်မး အဃိ အဝဲသ့ၣ် မ့ၢ်ဟ့ၣ်လီၤတၢ်ကလုၢ်န့ၣ် ပှၤကဘၣ်မၤထွဲဝဲ. ဖဲပူၤကွံာ် တယံာ်ဒံးဘၣ်န့ၣ် ရူတဖျၢၣ်အံၤ စံၣ်ညီၣ်စ့ၢ်ကီး ယ့ၣ်ၡူးလၢ “အဝဲကြၢးသံ.” (မး ၂၆:၅၉-၆၆) သနာ်က့ စီၤပ့းတရူး ဒီးစီၤယိၤဟၣ် တပျံၤအဝဲသ့ၣ်ဘၣ်. ပှၤတဖၣ်န့ၣ် အကဲဒိၣ်, အအိၣ်ဒီး တၢ်ကူၣ်ဘၣ်ကူၣ်သ့ ဒီးတၢ်စိတၢ်ကမီၤ သနာ်က့ စီၤပ့းတရူး ဒီးစီၤယိၤဟၣ် တပျံၤတၢ်ဘၣ် ဒီးလၢတၢ်ပာ်ကဲအပူၤ အတဲက့ၤအဝဲသ့ၣ်လၢ “လၢပကဒိကနၣ် ကစၢ်ယွၤအလီၢ် ပမ့ၢ်ဒိကနၣ်က့ၤလၢ သုကလုၢ်န့ၣ် မ့ၢ်ကစၢ်ယွၤ ကထံၣ်ဝဲလၢ အဘၣ်ဧါ တဘၣ်ဘၣ်ဧါန့ၣ် ဆၢတဲာ်လၢ သုနီၢ်ကစၢ်တက့ၢ်. ဘၣ်ဆၣ် မ့မ့ၢ်ပှၤန့ၣ် တၢ်လၢပထံၣ်ဘၣ် ဒီးတၢ်လၢပနၢ်ဟူဘၣ်တဖၣ်န့ၣ် ပဘၣ်စံၣ်တဲၤတဲလီၤအီၤ ဒီးပပတုာ်တသ့ဘၣ်.”—မၤတၢ် ၄:၁၉, ၂၀.
၁၂. ဒ်သိး ပကအိၣ်ဒီးတၢ်သးဒူ ဒီးပတၢ်နာ် ကဂၢၢ်ကျၢၤဒိၣ်ထီၣ်အဂီၢ် ပကဘၣ်မၤ မနုၤလဲၣ်.
၁၂ နအိၣ်ဒီး တၢ်သးဒူ ဒ်သိးဒီး တၢ်မၢဖိခံဂၤအံၤ စ့ၢ်ကီးဧါ. နတၢ်ခွဲးတၢ်ယာ် မ့ၢ်အိၣ်လၢ နကစံၣ်တဲၤတဲလီၤ ပှၤလၢအကဲဒိၣ်, ပှၤလၢအအိၣ်ဒီး တၢ်ကူၣ်ဘၣ်ကူၣ်သ့ ဒီးတၢ်စိကမီၤန့ၣ် နတူၢ်ဘၣ်ဒ်လဲၣ်. အဒိ နဟံၣ်ဖိဃီဖိ, နသကိးလၢကၠိ ဒီးနသကိးလၢ တၢ်မၤလီၢ် မ့ၢ်တဲဆါ နတၢ်စူၢ်တၢ်နာ်န့ၣ် နတူၢ်ဘၣ်ဒ်လဲၣ်. နပျံၤအဝဲသ့ၣ်ဧါ. နမ့ၢ်ထံၣ်ဘၣ်ဒီး တၢ်အိၣ်သးဒ်အံၤနာ်က့ နလဲၤခီဖျိအီၤသ့. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ တၢ်မၢဖိတဖၣ် ကဘၣ်တဲဖျါထီၣ်အတၢ်နာ် လၢတၢ်သးဒူ ဒီးတၢ်ပာ်ကဲ ဒ်လဲၣ်န့ၣ် ယ့ၣ်ၡူးသိၣ်လိပာ်စၢၤအဝဲသ့ၣ်. (မး ၁၀:၁၁-၁၈) ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ အအၢၣ်လီၤ အပျဲၢ်အဘီၣ်တဖၣ်လၢ အကဆဲးအိၣ်ဒီး အဝဲသ့ၣ် “ကိးမုၢ်နံၤဒဲး တုၤလီၤလၢ တၢ်အကတၢၢ်.” (မး ၂၈:၂၀) ဆၢကတီၢ်ခဲအံၤ ယ့ၣ်ၡူးဟံးစုနဲၣ်ကျဲ “ကုၢ်လၢအတီ ဒီးအကူၣ်တၢ်သ့” လၢကသိၣ်လိပှၤ ဒ်သိးပကတဲဘၣ် ပှၤဂၤလၢပတၢ်နာ်. (မး ၂၄:၄၅-၄၇; ၁ ပ့း ၃:၁၅) အဒိ ပန့ၢ်ဘၣ် တၢ်သိၣ်လိတဖၣ်အံၤ ဖဲပထီၣ်တၢ်အိၣ်ဖှိၣ်အခါ ဒ်သိးဒီး ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ဒီးဖဲပဖး ပတၢ်ကရၢကရိ လံာ်လဲၢ်လၢ အသန့ၤထီၣ်သးလၢ လံာ်စီဆှံ ဒ်သိးဒီး “တၢ်သံကွၢ်တဖၣ်လၢ အတၢ်စံးဆၢအိၣ်လၢ လံာ်စီဆှံပူၤ” လၢအအိၣ်လၢ jw.org အပူၤ. အဃိ ပမ့ၢ်ထီၣ်တၢ်အိၣ်ဖှိၣ် ဒီးဖးတၢ်ကရၢကရိ လံာ်လဲၢ်တဖၣ်န့ၣ် ပကအိၣ်ဒီးတၢ်သးဒူ ဒီးပတၢ်နာ်စ့ၢ်ကီး ကဂၢၢ်ကျၢၤဒိၣ်ထီၣ်. တကးဒံးဘၣ် ပကသးဆူၣ်ဒ် တၢ်မၢဖိတဖၣ်အသိး ဒီးပကဘၣ်တဲဘၣ်က့ၤပှၤဂၤလၢ တၢ်မ့ၢ်တၢ်တီလၢ ပမၤလိဘၣ်တဖၣ်.
နကသးဆူၣ်လၢ နကတဲဘၣ်ပှၤဂၤလၢ တၢ်မ့ၢ်တၢ်တီလၢ နမၤလိဘၣ်
“အဝဲသ့ၣ် ဃ့ထုကဖၣ်တၢ်လၢ ကစၢ်ယွၤ အအိၣ်” (မၤတၢ် ၄:၂၃-၃၁)
၁၃, ၁၄. ပှၤမ့ၢ်ထီဒါပှၤန့ၣ် ပကဘၣ်မၤဒ်လဲၣ် ဒီးဘၣ်မနုၤအဃိလဲၣ်.
၁၃ ဖဲပှၤပျၢ်ထီၣ်က့ၤ စီၤပ့းတရူး ဒီးစီၤယိၤဟၣ် ဝံၤဘျီ အဝဲသ့ၣ်လဲၤထံၣ်လိာ်သး ဒီးဒီပုၢ်ဝဲၢ်မုၣ်ခွါတဖၣ် တဘျီဃီ. အဝဲသ့ၣ် “ဃ့ထုကဖၣ်တၢ်လၢ ကစၢ်ယွၤ အအိၣ်” တပူၤဃီ ဒ်သိး အဝဲသ့ၣ်ကအိၣ်ဒီး တၢ်သးဒူလၢ ကဆဲးစံၣ်တဲၤတဲလီၤတၢ်အဂီၢ်. (မၤတၢ် ၄:၂၄) စီၤပ့းတရူးသ့ၣ်ညါဝဲ ဂ့ၤဂ့ၤလၢ ပမ့ၢ်ဘၣ်သးမၤ ကစၢ်ယွၤအတၢ်ဘၣ်သးန့ၣ် ပသန့ၤသးလၢ ပနီၢ်ကစၢ်တၢ်ဂံၢ်တၢ်ဘါ တန့ၢ်ဘၣ်. ဖဲအပူၤကွံာ် စှၤကိာ်နွံန့ၣ် စီၤပ့းတရူးနာ်န့ၢ်လီၤသး ဒီးတဲဘၣ်ယ့ၣ်ၡူးလၢ “ပှၤအဂၤခဲလၢာ် မ့ၢ်လီၤဃံၢ် ခီဖျိ တၢ်လၢကကဲထီၣ် အသးဒီးနၤ အဃိဘၣ်ဆၣ် မ့မ့ၢ်ယၤန့ၣ် ယတလီၤဃံၢ် နီတဘျီဘၣ်.” ဘၣ်ဆၣ် ဒ်ယ့ၣ်ၡူးတဲပာ်စၢၤဝဲအသိး စီၤပ့းတရူး ပျံၤပှၤကညီ ဒီးအပာ်တ့ၢ်ကွံာ် ယ့ၣ်ၡူးလၢ အကဲအသကိး ဒီးအသရၣ်. သနာ်က့ စီၤပ့းတရူး န့ၢ်ဘၣ် တၢ်မၤလိဖးဒိၣ်လၢ အတၢ်ကမၣ်အံၤ.—မး ၂၆:၃၃, ၃၄, ၆၉-၇၅.
၁၄ ဒ်သိးပကမၤထွဲ တၢ်မၤလိာ်လၢ အဘၣ်ဃးဒီး ပကစံၣ်တဲၤတဲလီၤ ယ့ၣ်ၡူးခရံာ်အဂ့ၢ်အဂီၢ် ပအိၣ်ဒီး တၢ်သးဆူၣ်ထဲတခါန့ၣ် တလၢပှဲၤဒံးဘၣ်. အဒိ ပှၤလၢအထီဒါတၢ်တဖၣ် မ့ၢ်ကျဲးစၢးမၤဟးဂီၤ ပတၢ်နာ် မ့တမ့ၢ် မ့ၢ်ကျဲးစၢးမၤပတုာ် ပတၢ်စံၣ်တဲၤတဲလီၤန့ၣ် ပကဘၣ်ကွၢ်လိ စီၤပ့းတရူး ဒီးစီၤယိၤဟၣ်. ပကဘၣ်ဃ့ထုကဖၣ်လၢ ယဟိဝၤယွၤအအိၣ် ဒ်သိးပကအိၣ်ဒီး တၢ်ဂံၢ်တၢ်ဘါ. တကးဒံးဘၣ် ပကဘၣ်ဃ့ ပဒီပုၢ်ဝဲၢ်တဖၣ် အတၢ်မၤစၢၤ. တၢ်ကီတၢ်ခဲလၢ ပထံၣ်ဘၣ်တဖၣ်န့ၣ် ပကဘၣ်တဲဘၣ် တၢ်အိၣ်ဖှိၣ်သးပှၢ် ဒီးဒီပုၢ်ဝဲၢ်လၢ အဒိၣ်တုာ်ခိၣ်ပှဲၤတဖၣ်. ဒီးဖဲပှၤဂၤ ဃ့ထုကဖၣ်လၢ ပဂီၢ်အခါန့ၣ် ယဟိဝၤယွၤ နၢ်ဟူအဝဲသ့ၣ် အဃိအကဟ့ၣ်ပှၤ တၢ်ဂံၢ်တၢ်ဘါလၢ ပလိၣ်ဘၣ်.—အ့း ၆:၁၈; ယၤ ၅:၁၆.
၁၅. ပှၤလၢအပတုာ် စံၣ်တဲၤတဲလီၤတၢ်တတီၤဖိန့ၣ် မတဂၤအတၢ်လဲၤခီဖျိ ကမၤစၢၤအဝဲသ့ၣ်လဲၣ်.
၁၅ လၢအပူၤကွံာ် ခီဖျိလၢ ပှၤထီဒါနၤအဃိ နမ့ၢ်ပတုာ် စံၣ်တဲၤတဲလီၤတၢ် တတီၤဖိန့ၣ် တဘၣ်သးဟးဂီၤတဂ့ၤ. သ့ၣ်နီၣ်ထီၣ်လၢ တၢ်မၢဖိတဖၣ်နာ်က့ ဖဲယ့ၣ်ၡူးသံဝံၤ အလီၢ်ခံန့ၣ် အဝဲသ့ၣ်တစံၣ်တဲၤတဲလီၤတၢ်ဘၣ် အိၣ်တတီၤဖိညါ. ဘၣ်ဆၣ်လၢခံ အဝဲသ့ၣ် စံၣ်တဲၤတဲလီၤက့ၤတၢ်. (မး ၂၆:၅၆; ၂၈:၁၀, ၁၆-၂၀) တဘၣ်ပျဲလၢ နတၢ်ကမၣ်လၢ အပူၤကွံာ်တဖၣ် မၤဟးဂီၤနသးတဂ့ၤ. နတၢ်လဲၤခီဖျိ ဒီးတၢ်လၢနမၤလိဘၣ်တဖၣ်န့ၣ် သူအီၤဒ်သိး နဟ့ၣ်ဂံၢ်ဟ့ၣ်ဘါက့ၤ ပှၤဂၤ.
၁၆, ၁၇. ယ့ၣ်ၡူးအပျဲၢ်အဘီၣ်လၢ အအိၣ်လၢ ဝ့ၢ်ယရူၤၡလ့ၣ်အပူၤ အတၢ်ဃ့ထုကဖၣ်န့ၣ် ပန့ၢ်ဘၣ် တၢ်မၤလိဒ်လဲၣ်.
၁၆ ပှၤလၢအအိၣ်ဒီး တၢ်န့ၢ်စိန့ၢ်ကမီၤတဖၣ် မ့ၢ်ထီဒါပှၤန့ၣ် ပဘၣ်ဃ့ထုကဖၣ်ဒ်လဲၣ်. ပထံၣ်ဘၣ်လၢ ယ့ၣ်ၡူးအပျဲၢ်အဘီၣ်တဖၣ် တဃ့လၢ ယဟိဝၤယွၤ ကဒီသဒၢအဝဲသ့ၣ် ဒ်သိးအတထံၣ်ဘၣ် တၢ်မၤအၢမၤနး တဂ့ၤန့ၣ်ဘၣ်. အဝဲသ့ၣ် နီၣ်ဘၣ်က့ၤ ယ့ၣ်ၡူးတဲဝဲလၢ “အဝဲသ့ၣ် မ့ၢ်မၤအၢမၤနးယၤန့ၣ် အဝဲသ့ၣ် ကမၤအၢမၤနးသု စ့ၢ်ကီး.” (ယိၤဟၣ် ၁၅:၂၀) အဃိ ယ့ၣ်ၡူးအပျဲၢ်အဘီၣ်တဖၣ် ဃ့ယဟိဝၤယွၤလၢ “မ်နနၢ်ဟူ” ပှၤလၢအထီဒါတၢ်တဖၣ် အတၢ်တဲပျံၤတဲဖုး. (မၤတၢ် ၄:၂၉) ယ့ၣ်ၡူးအပျဲၢ်အဘီၣ်တဖၣ် သ့ၣ်ညါဝဲလၢ ကစၢ်ယွၤအတၢ်ဘၣ်သးန့ၣ် ကဲဝဲတၢ်အရ့ဒိၣ်ကတၢၢ်. ဒီးအဝဲသ့ၣ် သ့ၣ်ညါလၢ တၢ်မၤအၢမၤနး လၢအဝဲသ့ၣ် ထံၣ်ဘၣ်ဝဲန့ၣ် မၤလၢပှဲၤထီၣ် ဝံအတၢ်စံးပာ်. တကးဒံးဘၣ် ပှၤပၢတၢ်တဖၣ် မ့ၢ်တဲအဝဲသ့ၣ် ဒ်လဲၣ်ဂ့ၤဒ်လဲၣ်ဂ့ၤနာ်က့ အဝဲသ့ၣ် သ့ၣ်ညါဝဲစ့ၢ်ကီးလၢ ဒ်ယ့ၣ်ၡူး သိၣ်လိပာ်စၢၤအဝဲသ့ၣ်အသိး ကစၢ်ယွၤအတၢ်ဘၣ်သးက “မၤအသးလၢ ဟီၣ်ခိၣ်ချၢ” နီၢ်ကီၢ်.—မး ၆:၉, ၁၀.
၁၇ ဒ်သိး ယ့ၣ်ၡူးအပျဲၢ်အဘီၣ်တဖၣ် ကမၤယဟိဝၤယွၤ အတၢ်ဘၣ်သးအဂီၢ် အဝဲသ့ၣ်ဃ့ ယဟိဝၤယွၤလၢ “မၤစၢၤ ပဝဲနကုၢ်တဖၣ်အံၤ ဒ်သိး ပကဆဲးစံၣ်တဲၤတဲလီၤ နကလုၢ်ကထါ ဒူဒူ.” အဃိ ယဟိဝၤယွၤ မၤဝဲဒ်လဲၣ်. လံာ်စီဆှံပာ်ဖျါထီၣ်ဝဲလၢ “တၢ်လီၢ်လၢအဝဲသ့ၣ် အိၣ်ဖှိၣ်ဝဲ တပူၤဃီန့ၣ် ဟူးဝးဝဲဒီး သးစီဆှံ ဟဲလီၤလၢ အဝဲသ့ၣ်ခဲလၢာ်အလိၤ ဒီးအဝဲသ့ၣ် စံၣ်တဲၤတဲလီၤ ကစၢ်ယွၤ အကလုၢ်ကထါဒူဒူ.” (မၤတၢ် ၄:၂၉-၃၁) ဒ်သိးကစၢ်ယွၤအတၢ်ဘၣ်သး တလၢပှဲၤထီၣ်တဂ့ၤအဂီၢ် တၢ်တမံၤမၣ် မၤပတုာ်အီၤတန့ၢ်ဘၣ်. (ၡါ ၅၅:၁၁) အဃိ ပှၤလၢအထီဒါတၢ်တဖၣ် အစိကမီၤမ့ၢ်ဒိၣ်နာ်က့ ပမ့ၢ်ဃ့ထုကဖၣ်လၢ ယဟိဝၤယွၤအအိၣ်န့ၣ် အကဟ့ၣ်ပှၤ တၢ်ဂံၢ်တၢ်ဘါဒ်သိး ပကဆဲးစံၣ်တဲၤတဲလီၤတၢ်ဒူဒူ.
“တမ့ၢ်လၢ နလံၣ်အီၣ်လီအီၣ် ပှၤဟီၣ်ခိၣ်ဖိဘၣ်, မ့ၢ်ဒၣ် နလံၣ်အီၣ်လီအီၣ် ကစၢ်ယွၤ” (မၤတၢ် ၄:၃၂–၅:၁၁)
၁၈. ဒီပုၢ်ဝဲၢ်မုၣ်ခွါလၢ အအိၣ်လၢဝ့ၢ်ယရူၤၡလ့ၣ်န့ၣ် အဝဲသ့ၣ်မၤစၢၤလိာ်သး တဂၤဒီးတဂၤဒ်လဲၣ်.
၁၈ လၢခံတယံာ်ဘၣ် တၢ်အိၣ်ဖှိၣ်လၢ ဝ့ၢ်ယရူၤၡလ့ၣ်န့ၣ် ပှၤနီၣ်ဂံၢ်ဟဲအါထီၣ်ဝဲ ၅,၀၀၀ ဘျဲၣ်. d ယ့ၣ်ၡူးအပျဲၢ်အဘီၣ်တဖၣ်အံၤ အဝဲသ့ၣ်ဒိၣ်ထီၣ်တၢ်လီၢ် တဒ်သိးလိာ်သးဘၣ် သနာ်က့ အဝဲသ့ၣ် “အိၣ်ဒီး တၢ်သးတဖျၢၣ်ဃီ ဒီးတၢ်တိာ်ပာ် တမံၤဃီ.” (မၤတၢ် ၄:၃၂; ၁ ကရံၣ် ၁:၁၀) ယ့ၣ်ၡူးအပျဲၢ်အဘီၣ်တဖၣ် ဃ့ယဟိဝၤယွၤလၢ အကဆိၣ်ဂ့ၤအဝဲသ့ၣ် အတၢ်ကျဲးစၢး. တကးဒံးဘၣ် အဝဲသ့ၣ် မၤဂၢၢ်ကျၢၤထီၣ်လိာ်သးတၢ်နာ် ဒီးမၤစၢၤလိာ်သးလၢ နီၢ်ခိတၢ်လိၣ်ဘၣ်စ့ၢ်ကီး. (၁ ယိၤဟၣ် ၃:၁၆-၁၈) အဒိ ယ့ၣ်ၡူးအပျဲၢ်အဘီၣ် စီၤယိၤသး လၢတၢ်မၢဖိတဖၣ် ကိးစ့ၢ်ကီးအီၤလၢ စီၤဘၢ်နါဘၤန့ၣ် အဆါလီၤကွံာ် အဟီၣ်ခိၣ်လီၢ် ဒီးအဟ့ၣ်လီၤဝဲစ့ခဲလၢာ်လၢ တၢ်မၢဖိတဖၣ်အအိၣ်. ဒီးတၢ်မၢဖိတဖၣ် သူစ့အံၤလၢ ကမၤစၢၤဝဲ ပှၤလၢအဟဲလၢ တၢ်လီၢ်ယံၤတဖၣ် ဒ်သိးအဝဲသ့ၣ်ကဆဲးအိၣ်လၢ ဝ့ၢ်ယရူၤၡလ့ၣ် ဒီးကမၤလိအါထီၣ် ဘၣ်ဃးဒီး အတၢ်စူၢ်တၢ်နာ်အသီအံၤ အဂီၢ်.
၁၉. ဘၣ်မနုၤအဃိ ယဟိဝၤယွၤမၤသံ စီၤအနၤနံ ဒီးနီၢ်စးဖံးရးလဲၣ်.
၁၉ ပှၤဒီမိၢ်ဝၤခံဂၤ လၢအမ့ၢ် စီၤအနၤနံ ဒီးနီၢ်စးဖံးရး ဆါလီၤစ့ၢ်ကီး အဟီၣ်ခိၣ်လီၢ် ဒီးဟ့ၣ်လီၤတၢ်မၤဘူၣ်. အဝဲသ့ၣ် ပာ်မၤအသးလၢ အဟ့ၣ်လီၤစ့ခဲလၢာ်. ဘၣ်ဆၣ် အဝဲသ့ၣ် “ပာ်ခူသူၣ်ဝဲ စ့တနီၤလၢ အနီၢ်ကစၢ်အဂီၢ်.” (မၤတၢ် ၅:၂) ယဟိဝၤယွၤ မၤသံကွံာ် ပှၤဒီမိၢ်ဝၤခံဂၤအံၤန့ၣ် တမ့ၢ်လၢ အဝဲသ့ၣ်ဟ့ၣ်တၢ်မၤဘူၣ် စှၤဝဲအဃိဘၣ်. အဝဲသ့ၣ်သံဝဲခီဖျိလၢ အဝဲသ့ၣ်တဟ့ၣ်တၢ်လၢ တၢ်သးဘျၢအပူၤဘၣ် ဒီးအဝဲသ့ၣ်လံၣ်အီၣ်လီအီၣ် တၢ်မၢဖိတဖၣ်စ့ၢ်ကီး. တကးဒံးဘၣ် လံာ်စီဆှံတဲဝဲလၢ အဝဲသ့ၣ်န့ၣ် ‘တမ့ၢ်လၢ အလံၣ်အီၣ်လီအီၣ် ပှၤဟီၣ်ခိၣ်ဖိဘၣ်, မ့ၢ်ဒၣ် အလံၣ်အီၣ်လီအီၣ် ကစၢ်ယွၤ’ အဃိ. (မၤတၢ် ၅:၄) စီၤအနၤနံ ဒီးနီၢ်စးဖံးရးန့ၣ် ဘၣ်သးလၢ ပှၤဟီၣ်ခိၣ်ဖိ ကပတြၢၤအဝဲသ့ၣ်အါန့ၢ် အကန့ၢ်ဘၣ် ကစၢ်ယွၤအတၢ်ဘၣ်သးဒံး အဃိ အဝဲသ့ၣ်ခံဂၤန့ၣ် လီၤဂာ်ဒီး ပှၤပာ်မၤသးတဖၣ်လၢ ယ့ၣ်ၡူးပာ်ဒ့ၣ်ပာ်ကမၣ်ဝဲ.—မး ၆:၁-၃.
၂၀. ဖဲပဟ့ၣ် ယဟိဝၤယွၤတၢ်အခါ ပတၢ်ပာ်သူၣ်ပာ်သး ကဘၣ်အိၣ်ဒ်လဲၣ်.
၂၀ ဖဲတၢ်မၢဖိအစိၤ ယ့ၣ်ၡူးအပျဲၢ်အဘီၣ် လၢအအိၣ်လၢ ဝ့ၢ်ယရူၤၡလ့ၣ်န့ၣ် သးအိၣ်ဟ့ၣ်တၢ်အါမး. ဆၢကတီၢ်ခဲအံၤစ့ၢ်ကီး ယဟိဝၤပှၤအုၣ်အသးလၢ အကကွဲၢ်တဖၣ်န့ၣ် အဝဲသ့ၣ်ဟ့ၣ်တၢ်မၤဘူၣ် ဒ်သိးကဆီၣ်ထွဲ တၢ်စံၣ်တဲၤတဲလီၤတၢ်မၤလၢ ဟီၣ်ခိၣ်ဒီဘ့ၣ်. ပကဆီၣ်ထွဲတၢ်မၤအံၤအဂီၢ် ပှၤတမၢဆူၣ်ပှၤလၢ ပကဘၣ်ဟ့ၣ် တၢ်ဆၢကတီၢ် မ့တမ့ၢ် ဟ့ၣ်စ့န့ၣ်ဘၣ်. ယဟိဝၤယွၤ တဘၣ်သးလၢ ပကမၤအတၢ်မၤ ခီဖျိလၢ ပှၤမၢန့ၢ်ဆူၣ်ပှၤ မ့တမ့ၢ် ပမၤကၢၣ်ခုကၢၣ်ခုန့ၣ်ဘၣ်. (၂ ကရံၣ် ၉:၇) ပကဘၣ်နီၣ်ဘၣ်လၢ ပဟ့ၣ်ယဟိဝၤယွၤ အါမ့ၢ်ဂ့ၤ စှၤမ့ၢ်ဂ့ၤ ပမ့ၢ်ဟ့ၣ်အီၤလၢ တၢ်သးဘျၢအပူၤန့ၣ် ယဟိဝၤယွၤ ပာ်လုၢ်ပာ်ပှ့ၤပတၢ်ဟ့ၣ်. (မၢ်ကူး ၁၂:၄၁-၄၄) စီၤအနၤနံ ဒီးနီၢ်စးဖံးရးန့ၣ် အဲၣ်လီၤထဲအသး ဒီးဘၣ်သးလၢ ပှၤကပတြၢၤအဝဲသ့ၣ် အဃိ ပတအဲၣ်ဒိး လီၤဂာ်ဒီးအဝဲသ့ၣ်ဘၣ်. ပဘၣ်သးကွၢ်လိလၢ စီၤပ့းတရူး, စီၤယိၤဟၣ် ဒီးစီၤဘၢ်နါဘၤဟီ. အဃိ တၢ်ဂ့ၢ်ခိၣ်သ့ၣ်လၢ ပမၤယဟိဝၤယွၤအတၢ်မၤန့ၣ် ကဘၣ်မ့ၢ် ခီဖျိလၢ ပအဲၣ်ယဟိဝၤယွၤ ဒီးပအဲၣ် ပှၤလၢပဃၢၤတဖၣ် နီၢ်ကီၢ်အဃိ.—မး ၂၂:၃၇-၄၀.
a ဖဲပှၤလုၢ်ထီၣ်တၢ်လၢ ဂီၤခီဒီးဟါခီ အဆၢကတီၢ်န့ၣ် ပှၤဂီၢ်မုၢ်တဖၣ် လဲၤဃ့ထုကဖၣ်တၢ်လၢ တၢ်လုၢ်ဟံၣ်. ဟါခီတၢ်လုၢ်န့ၣ် ပှၤလုၢ်ထီၣ်ဝဲဖဲ ဟါလီၤခီ ၃ နၣ်ရံၣ်ဃၣ်ဃၣ်.
b ကွၢ်တၢ်လွံၢ်နၢၣ် လၢအမ့ၢ် “ စီၤပ့းတရူးကဲဝဲ ပှၤမၤညၣ်ဖိ ဒီးကဲထီၣ်က့ၤ တၢ်မၢဖိလၢ အသးဆူၣ်ဒိၣ်မးတဂၤ” ဒီး “ စီၤယိၤဟၣ်ကဲဝဲ ပှၤလၢ ယ့ၣ်ၡူးအဲၣ်ဝဲ”
c ကွၢ်တၢ်လွံၢ်နၢၣ် လၢအမ့ၢ် “ ပှၤလုၢ်တၢ်ခိၣ် အဒိၣ်ကတၢၢ် ဒီးပှၤလုၢ်တၢ်ဒိၣ်အခိၣ်တဖၣ်”
d ဖဲ ခ.န ၃၃ န့ၣ် လၢဝ့ၢ်ယရူၤၡလ့ၣ်အပူၤ ဘၣ်သ့ၣ်သ့ၣ် ပှၤဖၤရံၤၡဲ ကအိၣ်ထဲ ၆,၀၀၀ ဒီးပှၤစးဒူၤကဲန့ၣ် အနီၣ်ဂံၢ် ကအိၣ်စှၤတစဲး. ဖျါလၢ အဝဲသ့ၣ်ခံဒူၣ်အံၤ ဘၣ်သးဆဲးန့ၢ်ဘၣ် တၢ်စိတၢ်ကမီၤဒံး အဃိ အဝဲသ့ၣ်တဘၣ်သးလၢ တၢ်မၢဖိတဖၣ် ကဆဲးသိၣ်လိ ဘၣ်ဃးဒီး ယ့ၣ်ၡူးအဂ့ၢ်ဘၣ်.
