တၢ်မၤလိ ၃
“လၢထီၣ်ပှဲၤထီၣ်ဒီး သးစီဆှံ”
တၢ်မၤအသးဖဲ သးစီဆှံဟဲလီၤလၢ ဘူၣ်ယဲၢ်ဆံအမုၢ်နံၤ
တၢ်ဂ့ၢ်ဒိးသန့ၤထီၣ်သးလၢ မၤတၢ် ၂:၁-၄၇
၁. တဲဖျါထီၣ် တၢ်မၤအသးဖဲ ဘူၣ်ယဲၢ်ဆံအမုၢ်နံၤန့ၣ် ပှၤမၤမနုၤလဲၣ်.
လၢဝ့ၢ်ယရူၤၡလ့ၣ် အကျဲမုၢ်ပူၤန့ၣ် ပှၤအိၣ်ဝဲဒီဒူၣ် ဒီးတၢ်သီၣ်သထြုးညါ. a လၢတၢ်လုၢ်ဟံၣ်ဟီန့ၣ် မ့ၣ်အူခုၣ်ထီၣ် ဒီးပှၤလ့ၤဝံဖိတဖၣ် သးဝံၣ်စံးထီၣ်ပတြၢၤ ယဟိဝၤယွၤ. (စံးထီၣ်ပတြၢၤ ၁၁၃ တုၤလၢ ၁၁၈) တကးဒံးဘၣ် လၢကျဲပူၤန့ၣ် ပှၤတမှံၤအိၣ်ဝဲဒီဒူၣ် ဒီးကျဲကတံာ်ညါ. ပှၤတမှံၤတဖၣ်အံၤ အိၣ်ဟဲလၢတၢ်လီၢ် ဒ်သိးဒီး ဧ့ၤလၣ်, မ့းစပတၤမံ, ကးပၤဒကံ, ပီၣ်တူး, အဲၤကူပတူး ဒီးရိမ့ၤ ဒီးဘၣ်ဟဲဝဲဖးယံၤညါ. b ပှၤတမှံၤတဖၣ်အံၤ ဟဲမၤမနုၤလဲၣ်. အဝဲသ့ၣ်ဟဲဒ်သိးဒီး ကမၤဝဲဘူၣ်ယဲၢ်ဆံ လၢပှၤကိးဝဲလၢ “တၤသၣ်ဆိတဖၣ် အနံၤ.” (၄ မိၤ ၂၈:၂၆) ဘူၣ်ယဲၢ်ဆံအံၤ ပှၤမၤဝဲတနံၣ်တဘျီ ဒီးအကဲဝဲမုၢ်နံၤလၢ ပှၤပာ်ပနီၣ်ဝဲလၢ ပှၤကူးဘုမုယီၤဝံၤ ဒီးပှၤစးထီၣ်ကူးဘုကၠူၣ် အဆၢကတီၢ်. အဃိ ဘူၣ်တခါအံၤ အကဲဝဲဘူၣ်လၢ အလီၤသးခုဒိၣ်မး.
၂. ဖဲ ခ.န ၃၃ ဘူၣ်ယဲၢ်ဆံအမုၢ်နံၤန့ၣ် တၢ်လီၤလးမနုၤ ကဲထီၣ်သးလဲၣ်.
၂ ဖဲ ခ.န ၃၃ တၢ်ယီၤထီၣ်သီအဆၢကတီၢ် ကဘၣ်ဖဲဂီၤခီ ၉ နၣ်ရံၣ်န့ၣ် တၢ်လီၤလး ကဲထီၣ်သးတခါ. ဖဲန့ၣ်အဆၢကတီၢ် “တၢ်သီၣ်တခါ ဟဲလီၤလၢမူခိၣ် သတူၢ်ကလာ် လီၤဂာ်ဒ် ကလံၤအူတၢ် ဆူၣ်ဆူၣ်အသိး.” (မၤတၢ် ၂:၂) တၢ်သီၣ်ဖးဒိၣ်အံၤ သီၣ်ဝဲလၢဟံၣ်လၢ ယ့ၣ်ၡူးအပျဲၢ်အဘီၣ်အဂၤ ၁၂၀ အိၣ်ဖှိၣ်ဝဲတဖျၢၣ်န့ၣ်အပူၤ. ဝံၤဒီး တၢ်ကဲထီၣ်သးလၢ အလီၤကမၢကမၣ်တခါ. ယ့ၣ်ၡူးအပျဲၢ်အဘီၣ်တဖၣ်န့ၣ် ထံၣ်ဝဲ တၢ်လၢအလီၤဂာ်ဒီးပျ့ၤတဖၣ် အိၣ်ဖျါထီၣ် ဒ်မ့ၣ်အူလၣ်အသိး ဒီးဟဲလီၤလၢအဝဲသ့ၣ်အလိၤ တဂၤတခါ. c အဃိ အဝဲသ့ၣ် “လၢထီၣ်ပှဲၤထီၣ်ဒီး သးစီဆှံ” ဒီးစးထီၣ်တဲတၢ်လၢ ကျိာ်အဂၤတဖၣ်. ယ့ၣ်ၡူးအပျဲၢ်အဘီၣ်တဖၣ် ဟးထီၣ်လၢဟံၣ်တဖျၢၣ်န့ၣ်ဝံၤဒီး အဝဲသ့ၣ်ထံၣ်ဝဲ ပှၤတမှံၤဒီဒူၣ် လၢဝ့ၢ်ယရူၤၡလ့ၣ် အကျဲမုၢ်အပူၤ. ပှၤတမှံၤတဖၣ်နၢ်ဟူ ယ့ၣ်ၡူးအပျဲၢ်အဘီၣ်တဖၣ် “တဲတၢ်လၢ အဝဲသ့ၣ်အနီၢ်ကစၢ်အကျိာ်.” (မၤတၢ် ၂:၁-၆) ဒီးခီဖျိလၢ ယ့ၣ်ၡူးအပျဲၢ်အဘီၣ်တဖၣ်န့ၣ် တဲတၢ်ဒီးပှၤတမှံၤတဖၣ်အံၤလၢ ပှၤတမှံၤအကျိာ်အဃိ ပှၤတမှံၤတဖၣ်အံၤ ကမၢကမၣ်ဒိၣ်မး.
၃. (က) ဘၣ်မနုၤအဃိ ခ.န ၃၃ ဘူၣ်ယဲၢ်ဆံအမုၢ်နံၤန့ၣ် အကဲဝဲ မုၢ်နံၤအရ့ဒိၣ်လၢ ခရံာ်ဖိအမ့ၢ်အတီအဂီၢ်လဲၣ်. (ခ) “မူခိၣ်ဘီမုၢ် အသီးခွဲး” သၢဘိအကျါ အဆိကတၢၢ်တဘိန့ၣ် စီၤပ့းတရူး သူဝဲဖဲ ခ.န ၃၃ ဘူၣ်ယဲၢ်ဆံအမုၢ်နံၤန့ၣ်ဒ်လဲၣ်.
၃ တၢ်ကဲထီၣ်သးတခါအံၤ အရ့ဒိၣ်ဒိၣ်မးလၢ တၢ်ဘူၣ်တၢ်ဘါ အမ့ၢ်အတီအဂီၢ်, မ့ၢ်လၢ ဖဲန့ၣ်အဆၢကတီၢ် ခရံာ်ဖိလၢ အဘၣ်တၢ်ဒိးဖှူအီၤ လၢအမ့ၢ် အံၣ်စရ့လးလၢနီၢ်သးတခီန့ၣ် ဟဲအိၣ်ထီၣ်ဝဲ. (ကလၤ ၆:၁၆) ဒီးတၢ်ကဲထီၣ်သး အရ့ဒိၣ်လၢအဂၤ အိၣ်ဒံးတခါဒံး. တၢ်တနံၤန့ၣ် ဖဲစီၤပ့းတရူး တဲတၢ်ဒီး ပှၤကမျၢၢ်အခါ အသူဝဲ “မူခိၣ်ဘီမုၢ် အသီးခွဲး” သၢဘိအကျါ အဆိကတၢၢ်တဘိ. ဒီးမူခိၣ်ဘီမုၢ် အသီးခွဲးတဖၣ်အံၤ ကကဲထီၣ်တၢ်မၤစၢၤလၢ ပှၤကလုာ်ဂၤတဖၣ် ကန့ၢ်ဘၣ် တၢ်ခွဲးတၢ်ယာ်လီၤဆီစ့ၢ်ကီး. (မး ၁၆:၁၈, ၁၉) မူခိၣ်ဘီမုၢ် အသီးခွဲး အဆိကတၢၢ်တဘိန့ၣ် ကဲထီၣ်တၢ်မၤစၢၤလၢ ပှၤယူဒၤဖိ ဒီးပှၤလၢအနုာ်လီၤလၢ ပှၤယူဒၤဖိအတၢ်ဘူၣ်တၢ်ဘါအပူၤ ဒ်သိးအဝဲသ့ၣ် ကတူၢ်လိာ် တၢ်သးခုကစီၣ် ဒီးကန့ၢ်ဘၣ် ကစၢ်ယွၤ အသးစီဆှံအဂီၢ်. d အဃိ အဝဲသ့ၣ် ကကဲထီၣ် အံၣ်စရ့လး လၢနီၢ်သးတခီ ဒီးအဝဲသ့ၣ် ကအိၣ်ဒီး တၢ်ခွဲးတၢ်ယာ်လၢ ကပၢတၢ် ဒ်စီၤပၤတဖၣ် ဒီးပှၤလုၢ်တၢ်ဒိၣ်တဖၣ် လၢမ့းၡံအၤ အဘီမုၢ်အပူၤ. (လီၣ် ၅:၉, ၁၀) တကးဒံးဘၣ် လၢခံပှၤၡၤမရံဖိ ဒီးပှၤကလုာ်အဂၤတဖၣ် ကန့ၢ်ဘၣ်စ့ၢ်ကီး တၢ်ခွဲးတၢ်ယာ်လီၤဆီအံၤ. အဃိဘၣ်ဃးဒီး တၢ်ကဲထီၣ်သးဖဲ ခ.န ၃၃ ဘူၣ်ယဲၢ်ဆံအမုၢ်နံၤန့ၣ် ခရံာ်ဖိလၢ မုၢ်မဆါတနံၤအံၤ န့ၢ်ဘၣ်တၢ်မၤလိဒ်လဲၣ်.
“အိၣ်ဖှိၣ်ဝဲလၢ တၢ်လီၢ်တပူၤဃီ” (မၤတၢ် ၂:၁-၄)
၄. ခရံာ်ဖိ တၢ်အိၣ်ဖှိၣ် စးထီၣ်အသးဖဲ ခ.န ၃၃ ဒီးအနီၣ်ဂံၢ် ဆဲးအါထီၣ်ဝဲ တုၤလီၤလၢပစိၤခဲအံၤဒ်လဲၣ်.
၄ ခရံာ်ဖိ တၢ်အိၣ်ဖှိၣ် စးထီၣ်အသးဖဲ ယ့ၣ်ၡူးအပျဲၢ်အဘီၣ် အဂၤ ၁၂၀ “အိၣ်ဖှိၣ်ဝဲလၢ တၢ်လီၢ်တပူၤဃီ” လၢဟံၣ်ဖီခိၣ်တတီၤ ဒီးဖဲန့ၣ်သးစီဆှံ ဟဲလီၤလၢအဝဲသ့ၣ်အလိၤ. (မၤတၢ် ၂:၁) ဖဲန့ၣ်ဝံၤအလီၢ်ခံ တၢ်တနံၤန့ၣ် ပှၤဒိးဘျၢထံလၢ အကထိညါအဃိ ခရံာ်ဖိအနီၣ်ဂံၢ် ဟဲအါထီၣ်ဝဲ. ထဲန့ၣ်တကးဒံးဘၣ် ခရံာ်ဖိအနီၣ်ဂံၢ် ဟဲအါထီၣ်ဝဲ တုၤလီၤလၢပစိၤခဲအံၤ. ဒီးတချုးလၢ တၢ်အကတၢၢ် ဟဲတုၤဒံးဘၣ်န့ၣ် ခရံာ်ဖိတဖၣ်လၢ အဘူၣ်ထီၣ်ဘါထီၣ် ယဟိဝၤယွၤန့ၣ် ရၤလီၤဝဲ “ဘီမုၢ်တၢ်သးခုကစီၣ်” ဒီး “စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ ဒ်သိး ကကဲထီၣ် တၢ်အုၣ်အသးလၢ ပှၤကလုာ်ခဲလၢာ် အဂီၢ်.”—မး ၂၄:၁၄.
၅. ပဝဲခရံာ်ဖိလၢ စိၤခဲအံၤမ့ၢ်ဂ့ၤ လၢတၢ်မၢဖိအစိၤမ့ၢ်ဂ့ၤ ခီဖျိလၢ ပရ့လိာ်သးဒီး ဒီပုၢ်ဝဲၢ်မုၣ်ခွါအဃိ ပန့ၢ်ဘၣ်တၢ်ဆိၣ်ဂ့ၤဒ်လဲၣ်.
၅ ခရံာ်ဖိ တၢ်အိၣ်ဖှိၣ်အံၤ ကကဲထီၣ်တၢ်မၤစၢၤ ဒီးတၢ်ဟ့ၣ်ဂံၢ်ဟ့ၣ်ဘါလၢ ပှၤလၢအဘၣ်တၢ်ဒိးဖှူအီၤအဂီၢ် ဒီးလၢခံ ကကဲထီၣ်တၢ်မၤစၢၤလၢ “သိလၢအဂၤတဖၣ်” အဂီၢ်စ့ၢ်ကီး. (ယိၤဟၣ် ၁၀:၁၆) အဒိ စီၤပီလူး ပာ်လုၢ်ပာ်ပှ့ၤဝဲ တၢ်မၤစၢၤ ဒီးတၢ်ဟ့ၣ်ဂံၢ်ဟ့ၣ်ဘါလၢ အန့ၢ်ဘၣ်ဝဲလၢ ဒီပုၢ်ဝဲၢ်မုၣ်ခွါ လၢဝ့ၢ်ရိမ့ၤအအိၣ်. အဃိ စီၤပီလူး ကွဲးန့ၢ်အဝဲသ့ၣ် လံာ်ပရၢ ဒီးတဲဝဲလၢ “ယအဲၣ်ဒိးထံၣ်သု သပှၢ်တၢၢ်ဒ်သိး ယကဟ့ၣ်နီၤလီၤသု နီၢ်သးအတၢ်ဟ့ၣ်တခါ လၢအကဒုးဆူၣ်ထီၣ် သုဂံၢ်သုဘါအဂီၢ်လီၤ. ယမ့ၢ်တဲအဂၤတမံၤန့ၣ် မ့ၢ်ဒ်သိး ပကဟ့ၣ်ဂံၢ်ဟ့ၣ်ဘါလိာ်သး ယၢ်ခီယၢ်ခီ ခီဖျိလၢ ပတၢ်နာ်လီၤ.”—ရိ ၁:၁၁, ၁၂.
၆, ၇. ခရံာ်ဖိ တၢ်အိၣ်ဖှိၣ် လၢပစိၤခဲအံၤန့ၣ် မၤထွဲဝဲယ့ၣ်ၡူးအတၢ်မၤလိာ်ဒ်လဲၣ် ဒီးဒ်သိးအဝဲသ့ၣ် ကစံၣ်တဲၤတဲလီၤဘၣ် ပှၤကိးကလုာ်ဒဲးအဂီၢ် အဝဲသ့ၣ်မၤဝဲဒ်လဲၣ်.
၆ ယ့ၣ်ၡူး ဟ့ၣ်လီၤအပျဲၢ်အဘီၣ် တၢ်မၤတခါလၢအကီဘၣ်ဆၣ် အလီၤသူၣ်ပိၢ်သးဝး. ယ့ၣ်ၡူး တဲဘၣ်အဝဲသ့ၣ်လၢ “လဲၤဒုးကဲထီၣ် ကယဲၢ်ပှၤကလုာ်တဖၣ် လၢယပျဲၢ်ယဘီၣ်တက့ၢ်. ဒီးဒိးဘျၢ အဝဲသ့ၣ်လၢ ပၢ် ဒီးဖိခွါ ဒီးသးစီဆှံအမံၤအပူၤတက့ၢ်. သိၣ်လိအဝဲသ့ၣ် ဒ်သိးအဝဲသ့ၣ်ကမၤထွဲ တၢ်လၢယမၤလိာ်သု ခဲလၢာ်တက့ၢ်.” (မး ၂၈:၁၉, ၂၀) အဃိ ပထံၣ်ဘၣ်လၢ ခရံာ်ဖိလၢ တၢ်မၢဖိအစိၤတဖၣ် မၤဝဲတၢ်မၤတခါအံၤ ဒီးပဝဲခရံာ်ဖိလၢစိၤခဲအံၤန့ၣ် ပမၤတၢ်မၤတခါအံၤစ့ၢ်ကီး.
၇ လၢပစိၤခဲအံၤန့ၣ် ယဟိဝၤယွၤသူဝဲ အပှၤအုၣ်အသးတဖၣ် လၢကမၤဝဲတၢ်မၤလၢ ယ့ၣ်ၡူး ဟ့ၣ်လီၤဝဲတခါအံၤ. ပသ့ၣ်ညါလၢ ပကစံၣ်တဲၤတဲလီၤဘၣ် ပှၤလၢအတဲကျိာ် အကလုာ်ကလုာ်အဂီၢ်ကကီဝဲ ဘၣ်ဆၣ် ပဝဲယဟိဝၤပှၤအုၣ်အသးတဖၣ်န့ၣ် ပထုးထီၣ်လံာ်လဲၢ်လၢ အသန့ၤထီၣ်သးလၢလံာ်စီဆှံ လၢကျိာ် ၁,၀၀၀ ဘျဲၣ်ညါ. ဒီးပမ့ၢ်လဲၤထီၣ်တၢ်အိၣ်ဖှိၣ်မၢ်မၢ်, စံၣ်တဲၤတဲလီၤတၢ်ဆူၣ်ဆူၣ် ဒီးမၤစၢၤပှၤဂၤလၢ ကကဲထီၣ် ယ့ၣ်ၡူးအပျဲၢ်အဘီၣ်န့ၣ် ပကန့ၢ်ဘၣ်တၢ်သးခု. တကးဒံးဘၣ် ပပၣ်ဃုာ်လၢ ပှၤစှၤဂၤလၢအအိၣ်လၢဟီၣ်ခိၣ်ဒီဘ့ၣ် လၢအစံၣ်တဲၤတဲလီၤ ယဟိဝၤယွၤအဂ့ၢ် လီၤတံၢ်လီၤဆဲးအဃိ ပတၢ်မၤအံၤ ပထံၣ်လၢ အကဲဝဲ တၢ်ခွဲးတၢ်ယာ် လီၤဆီဖးဒိၣ်တခါလၢပဂီၢ်.
၈. လၢတၢ်အိၣ်ဖှိၣ်ပူၤန့ၣ် ပန့ၢ်ဘၣ် တၢ်မၤစၢၤဒ်လဲၣ်.
၈ ဒ်သိးဒီး ပလဲၤခီဖျိ တၢ်ဆၢကတီၢ်လီၤဆီလၢ အကီအခဲကန့ၢ် ဒီးပကဆဲးအိၣ်ဒီး တၢ်သးခုအဂီၢ် ယဟိဝၤယွၤ ဟ့ၣ်ပှၤဒီပုၢ်ဝဲၢ်မုၣ်ခွါ လၢအအိၣ်လၢ ဟီၣ်ခိၣ်ဒီဘ့ၣ်ညါ. အဒိ စီၤပီလူး ကွဲးန့ၢ်ဝဲ ဧ့ၤဘြံၤခရံာ်ဖိတဖၣ်လၢ “မ်ပဆိကမိၣ်န့ၢ်တၢ်လၢ တဂၤဒီးတဂၤအဂီၢ် ဒ်သိးကထိၣ်ဟူးထိၣ်ဂဲၤထီၣ်လိာ်သး လၢပကပာ်ဖျါထီၣ် တၢ်အဲၣ်တၢ်ကွံ ဒီးတၢ်မၤလၢအဂ့ၤတဖၣ် န့ၣ်တက့ၢ်. မ်ပသုတဟးဆှဲး ပတၢ်အိၣ်ဖှိၣ် ဒ်ပှၤတနီၤနီၤအလုၢ်အလၢ် အိၣ်ဝဲအသိးတဂ့ၤ. မ်ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ဒီးဒ်သုထံၣ်မုၢ်နံၤ ဟဲဘူးထီၣ်ဝဲအသိး မ်သုမၤအါထီၣ် တၢ်သ့ၣ်တဖၣ်န့ၣ်တက့ၢ်.” (ဧ့ၤ ၁၀:၂၄, ၂၅) ဒ်သိး ပကဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤအဂီၢ် ယဟိဝၤယွၤ ဟ့ၣ်ပှၤတၢ်ဟ့ၣ်လၢအမ့ၢ် ခရံာ်ဖိ တၢ်အိၣ်ဖှိၣ်. အဃိ ပကဘၣ် ရ့လိာ်သးဒီးပဒီပုၢ်ဝဲၢ်မုၣ်ခွါ ဘူးဘူးတံၢ်တံၢ်, ပတဘၣ်ဟးဆှဲး တၢ်အိၣ်ဖှိၣ်ဘၣ် ဒီးပကဘၣ် ထီၣ်တၢ်အိၣ်ဖှိၣ်ထီဘိ.
“အဝဲသ့ၣ် တဂၤစုာ်စုာ် နၢ်ဟူဘၣ် . . . တၢ်လၢ အဝဲသ့ၣ် အနီၢ်ကစၢ်အကျိာ်” (မၤတၢ် ၂:၅-၁၃)
“ပနၢ်ဟူ အဝဲသ့ၣ်တဲ ကစၢ်ယွၤ အတၢ်လီၤလိၢ်လီၤလးတဖၣ်အဂ့ၢ် လၢပနီၢ်ကစၢ်အကျိာ်.”—မၤတၢ် ၂:၁၁
၉, ၁၀. ဒီပုၢ်ဝဲၢ်မုၣ်ခွါတနီၤန့ၣ် ဒ်သိးအဝဲသ့ၣ် ကစံၣ်တဲၤတဲလီၤတၢ်လၢ ကျိာ်အဂၤအဂီၢ် အဝဲသ့ၣ် မၤဝဲဒ်လဲၣ်.
၉ ထံၣ်တမှံကွၢ်ဖဲ ခ.န ၃၃ ဘူၣ်ယဲၢ်ဆံအမုၢ်နံၤန့ၣ် ပှၤယူဒၤဖိ ဒီးပှၤလၢအနုာ်လီၤလၢ ပှၤယူဒၤဖိအတၢ်ဘူၣ်တၢ်ဘါအပူၤတဖၣ် ကသးခုဝဲဒိၣ်မး. ပှၤတဖၣ်အံၤ ဘၣ်သ့ၣ်သ့ၣ် အဝဲသ့ၣ်အါတက့ၢ်န့ၣ် တဲဝဲကျိာ်လၢ ပှၤအါဂၤတဲဝဲ ဒ်သိးဒီး ကြံးကျိာ် မ့တမ့ၢ် ဧ့ၤဘြံၤကျိာ်. သနာ်က့ ခဲအံၤန့ၣ် “အဝဲသ့ၣ် တဂၤစုာ်စုာ် နၢ်ဟူဘၣ် [ယ့ၣ်ၡူး အပျဲၢ်အဘီၣ်တဖၣ်] တဲတၢ်လၢ အဝဲသ့ၣ်အနီၢ်ကစၢ်အကျိာ်.” (မၤတၢ် ၂:၆) အဃိ တၢ်သးခုကစီၣ်လၢ အဝဲသ့ၣ်နၢ်ဟူဘၣ်ဝဲလၢ အနီၢ်ကစၢ်အကျိာ်န့ၣ် ကထိးဘၣ်အသးဖးဒိၣ်ညါ. ပဝဲခရံာ်ဖိလၢ စိၤခဲအံၤန့ၣ် ပတန့ၢ်ဘၣ်တၢ်လီၤလး ဒ်လၢညါအသိး လၢပကတဲကျိာ်အဂၤဘၣ်. သနာ်က့ ပဝဲအါဂၤန့ၣ် ပထဲးဂံၢ်ထဲးဘါ, ဟ့ၣ်လီၤ ပတၢ်ဆၢကတီၢ်လၢ ပကမၤလိ ကျိာ်အသီ ဒ်သိးပကရၤလီၤဘၣ် ဘီမုၢ်တၢ်သးခုကစီၣ် လၢပှၤကိးကလုာ်ဒဲးအအိၣ်. ဒီးပဝဲတနီၤန့ၣ် ပမၤလိကျိာ်အဂၤ ဒ်သိးပကမၤစၢၤတၢ်လၢ တၢ်အိၣ်ဖှိၣ်လၢ ပှၤတဲကျိာ်အဂၤ မ့တမ့ၢ် လဲၤမၤစၢၤတၢ်လၢ ထံကီၢ်အဂၤ. ဒီးအါဘျီန့ၣ် ပှၤလၢအကနၣ် တၢ်သးခုကစီၣ်တဖၣ် ထံၣ်ဝဲပတၢ်ဂုာ်ကျဲးစၢးအဃိ တၢ်သးခုကစီၣ် လၢပတဲန့ၣ် ထုးန့ၢ်အဝဲသ့ၣ်အသး.
၁၀ အဒိ ဒီပုၢ်ဝဲၢ်မုၣ် ခရံၣ်စတံ ဒီးဒီပုၢ်ဝဲၢ်မုၣ်ခွါ အဂၤနွံဂၤန့ၣ် မၤလိဝဲ ကူၤကၠၢၤရးထံၤအကျိာ်. လၢတၢ်မၤလီၢ်န့ၣ် ဒီပုၢ်ဝဲၢ်မုၣ် ခရံၣ်စတံ မ့ၢ်ထံၣ်လိာ်သးဒီး ပိာ်မုၣ်လၢအမၤသကိးတၢ်ဒီးအီၤ လၢအတဲ ကူၤကၠၢၤရးထံၤအကျိာ်န့ၣ် ဒီပုၢ်ဝဲၢ်မုၣ်အံၤ ဆၢဂ့ၤဆၢဝါအီၤလၢ ကူၤကၠၢၤရးထံၤအကျိာ်. အဃိ ပိာ်မုၣ်တဂၤအံၤ ကမၢကမၣ် ဒီးဘၣ်သးသ့ၣ်ညါဝဲလၢ ဘၣ်မနုၤအဃိ ဒီပုၢ်ဝဲၢ်မုၣ် ခရံၣ်စတံ မၤလိဝဲ ကျိာ်လၢအကီ ဒ်သိးဒီး ကူၤကၠၢၤရးထံၤအကျိာ်လဲၣ်. ဒီပုၢ်ဝဲၢ်မုၣ် ခရံၣ်စတံ မၤဝဲဒ်န့ၣ်အဃိ ထုးန့ၢ်ဝဲပိာ်မုၣ်တဂၤအံၤအသး. ဒီးပိာ်မုၣ်တဂၤအံၤ တဲဘၣ် ဒီပုၢ်ဝဲၢ်မုၣ် ခရံၣ်စတံလၢ “ဘၣ်သ့ၣ်သ့ၣ် တၢ်ဂ့ၢ်လၢနကတဲန့ၣ် ကဘၣ်မ့ၢ် တၢ်ဂ့ၢ်လၢအရ့ဒိၣ်ဖးဒိၣ်ညါ.”
၁၁. ဒ်သိး ပကစံၣ်တဲၤတဲလီၤဘၣ်တၢ် လၢကျိာ်အဂၤအဂီၢ် ပသူတၢ်ပီးတၢ်လီ မနုၤသ့လဲၣ်.
၁၁ ပသ့ၣ်ညါလၢ ပှၤမၤလိကျိာ်အဂၤ တသ့ကိးဂၤဒဲးဘၣ်. သနာ်က့ ပအိၣ်ကတဲာ်ကတီၤသးလၢ ပကစံၣ်တဲၤတဲလီၤ ဘီမုၢ်တၢ်သးခုကစီၣ် လၢပှၤလၢအတဲကျိာ်အဂၤ ကသ့ဒ်လဲၣ်. အဒိ ပသူ JW Language® ဒီးမၤလိန့ၢ် တၢ်ကတိၤတဖျၢၣ်ခံဖျၢၣ် ဒ်သိးပကဆၢဂ့ၤဆၢဝါ ပှၤလၢအအိၣ်လၢ ပလီၢ်ကဝီၤတဖၣ်သ့. တကးဒံးဘၣ် ပမ့ၢ်မၤလိ တၢ်ကတိၤတကျိၤခံကျိၤ လၢအဝဲသ့ၣ်အကျိာ်န့ၣ် ကမၤစၢၤအဝဲသ့ၣ်လၢ အဝဲသ့ၣ် ကဘၣ်သးမၤလိ လံာ်စီဆှံစ့ၢ်ကီး. ဒီးပတဲပၠးအဝဲသ့ၣ်လၢ jw.org ပှာ်ယဲၤသန့ (ဝဲးပဆဲး) အဂ့ၢ်သ့. ဒီးလၢဝဲးပဆဲးအပူၤ တၢ်ဂီၤမူ ဒီးလံာ်လဲၢ်တဖၣ် မ့ၢ်အိၣ်လၢ အနီၢ်ကစၢ်အကျိာ်န့ၣ် ပဒုးနဲၣ်အဝဲသ့ၣ်သ့စ့ၢ်ကီး. ပဒီပုၢ်ဝဲၢ်မုၣ်ခွါလၢ တၢ်မၢဖိအစိၤတဖၣ် ထံၣ်ဘၣ်ဝဲလၢ ဖဲပှၤအိၣ်လၢတၢ်လီၢ်အါတီၤ နၢ်ဟူဘၣ် တၢ်သးခုကစီၣ်လၢ “အဝဲသ့ၣ်အနီၢ်ကစၢ် အကျိာ်” အခါ ပဒီပုၢ်ဝဲၢ်မုၣ်ခွါတဖၣ် သးခုဒိၣ်မး. အဃိ ပဝဲစ့ၢ်ကီး ပမ့ၢ်သူတၢ်ပီးတၢ်လီလၢ တၢ်စံၣ်တဲၤတဲလီၤအဂီၢ်န့ၣ် ပကန့ၢ်ဘၣ် တၢ်သးခုအါမး.
“စီၤပ့းတရူး . . . ဆၢထၢၣ်” (မၤတၢ် ၂:၁၄-၃၇)
၁၂. (က) ဝံယိၤအ့လး အတၢ်စံးပာ်န့ၣ် ဟဲလၢထီၣ်ပှဲၤထီၣ်ဖဲ ခ.န. ၃၃ ဘူၣ်ယဲၢ်ဆံအမုၢ်နံၤန့ၣ်ဒ်လဲၣ်. (ခ) ဘၣ်မနုၤအဃိ ယ့ၣ်ၡူးအပျဲၢ်အဘီၣ်တဖၣ် သ့ၣ်ညါဝဲလၢ ဝံယိၤအ့လး အတၢ်စံးပာ်အံၤ ကဟဲလၢထီၣ်ပှဲၤထီၣ်ဝဲလဲၣ်.
၁၂ “စီၤပ့းတရူး . . . ဆၢထၢၣ်” ဒီးတဲတၢ်လၢ ပှၤဂီၢ်မုၢ်လၢ အတဲကျိာ်အကလုာ်ကလုာ်အမဲာ်ညါ. (မၤတၢ် ၂:၁၄) စီၤပ့းတရူး တဲဝဲလၢ ကစၢ်ယွၤဟ့ၣ်ဝဲ ယ့ၣ်ၡူးအပျဲၢ်အဘီၣ်တဖၣ်လၢ သးစီဆှံ ဒ်သိးအဝဲသ့ၣ် ကတဲတၢ်လၢကျိာ်အဂၤ ဒီးတဲစ့ၢ်ကီးဝဲလၢ တၢ်လီၤလးတခါအံၤ အမၤလၢပှဲၤထီၣ် ဝံယိၤအ့လး အတၢ်စံးပာ် လၢအတဲဝဲလၢ “ယကလူလီၤ ယသးစီဆှံလၢ ပှၤအကလုာ်ကလုာ်အလိၤ.” (ယိၤအ့လး ၂:၂၈) ဒီးတချုးလၢ ယ့ၣ်ၡူးက့ၤထီၣ်လၢမူခိၣ်ဒံးဘၣ်န့ၣ် အတဲဘၣ် အပျဲၢ်အဘီၣ်တဖၣ်လၢ “ယကဃ့တၢ်လၢ ပၢ်အအိၣ် ဒီးအဝဲကဟ့ၣ်သု ပှၤမၤစၢၤတၢ်လၢ အဂၤတဂၤ” လၢယ့ၣ်ၡူးအဲၣ်ဒိးတဲဝဲ လၢအမ့ၢ် “သးစီဆှံ.”—ယိၤဟၣ် ၁၄:၁၆, ၁၇.
၁၃, ၁၄. ဒ်သိး စီၤပ့းတရူး ကထုးန့ၢ် ပှၤဒိကနၣ်တၢ်ဖိအသးအဂီၢ် အမၤဝဲဒ်လဲၣ် ဒီးပကွၢ်လိ အသိၣ်လိတၢ် အကျိၤအကျဲ ကသ့ဒ်လဲၣ်.
၁၃ စီၤပ့းတရူး ကျၢၢ်တံၢ်က့ၤအတၢ်ကတိၤ ဒီးတဲဘၣ်ပှၤကမျၢၢ်လၢ “မ်ပှၤအံၣ်စရ့လးဖိခဲလၢာ် သ့ၣ်ညါသပှၢ်ကတၢၢ်လၢ ယ့ၣ်ၡူးလၢ သုမၤသံအီၤလၢ သ့ၣ်တၢၣ်အလိၤတဂၤန့ၣ် ကစၢ်ယွၤ ဒုးကဲထီၣ်အီၤလၢ ကစၢ် ဒီးခရံာ်လံ.” (မၤတၢ် ၂:၃၆) ပှၤကမျၢၢ်လၢ အကနၣ်တၢ်လၢစီၤပ့းတရူးတဲဝဲန့ၣ် အဝဲသ့ၣ် တထံၣ်ဘၣ် ပှၤမၤသံယ့ၣ်ၡူး ဒီးပျၤထီအီၤလၢ သ့ၣ်တၢၣ်အလိၤ လၢအဝဲသ့ၣ်အနီၢ်ကစၢ်ဘၣ်. ဘၣ်ဆၣ် ပှၤတဖၣ်အံၤ အမ့ၢ်ဝဲ ကလုာ်ဒူၣ်တဒူၣ်လၢ အမၤသံယ့ၣ်ၡူးအဃိ တၢ်ကမၣ်လီၤတီလၢ အဝဲသ့ၣ်အဖီခိၣ်စ့ၢ်ကီး. သနာ်က့ ပထံၣ်ဘၣ်လၢ စီၤပ့းတရူး တဲတၢ်ဒီး ပှၤကမျၢၢ်တဖၣ်အံၤ လၢတၢ်ပာ်ကဲ ဒီးတဲတၢ်လၢ ကထုးန့ၢ်အဝဲသ့ၣ်အသး. စီၤပ့းတရူး တဃုအဝဲသ့ၣ် အတၢ်ကမၣ်ဘၣ်, ဘၣ်ဆၣ် အဘၣ်သးမၤစၢၤ အဝဲသ့ၣ်ဒ်သိး အဝဲသ့ၣ် ကပီၢ်ယၢ်လီၤက့ၤသး. ခီဖျိလၢ တၢ်လၢစီၤပ့းတရူးတဲဝဲအဃိ ပှၤကမျၢၢ်တဖၣ်အံၤ သးထီၣ်အီၤဧါ. အဝဲသ့ၣ် တသးထီၣ်အီၤဘၣ်. သနာ်က့ ပှၤကမျၢၢ်တဖၣ်အံၤအ “သးဘၣ်ဒိဒိၣ်မး.” အဃိ အဝဲသ့ၣ် တဲဝဲလၢ “ပကဘၣ်မၤဒ်လဲၣ်.” စီၤပ့းတရူး တဲတၢ်ဒီးပှၤကမျၢၢ်တဖၣ်အံၤ လၢတၢ်ပာ်ကဲ ဒီးတၢ်ကတိၤလၢ အတဲဝဲန့ၣ် ထုးန့ၢ်အဝဲသ့ၣ်အသးအဃိ အဝဲသ့ၣ်အါဂၤ ပီၢ်ယၢ်လီၤက့ၤသး.—မၤတၢ် ၂:၃၇.
၁၄ ဒ်သိး ပတဲတၢ်ကထုးန့ၢ်ပှၤသးအဂီၢ် ပကဘၣ်ကွၢ်လိ စီၤပ့းတရူးအဒိအတဲာ်. ဖဲပစံၣ်တဲၤတဲလီၤတၢ်အခါ ဟံၣ်ကစၢ် မ့ၢ်တဲတၢ်ဂ့ၢ်လၢ အတဘၣ်လိာ်သးဒီး လံာ်စီဆှံတၢ်သိၣ်လိဘၣ်န့ၣ် ပတလိၣ်တဲသကိး တၢ်ဂ့ၢ်တဖၣ်န့ၣ်ခဲလၢာ်ဘၣ်. ပမ့ၢ်တဲသကိး တၢ်ဂ့ၢ်လၢ အဝဲသ့ၣ်တူၢ်လိာ်ဝဲန့ၣ် ကဂ့ၤဒိၣ်န့ၢ်ဒံး ပတဲသကိး တၢ်ဂ့ၢ်လၢ အဝဲသ့ၣ်တတူၢ်လိာ်ဝဲဘၣ်ဒံး. ဒီးလၢတၢ်ကူၣ်သ့အပူၤ ပကမၤစၢၤဘၣ် ဟံၣ်ကစၢ်ဒ်သိး အဝဲသ့ၣ်ကနၢ်ပၢၢ် လံာ်စီဆှံအတၢ်သိၣ်လိ. တကးဒံးဘၣ် ပမ့ၢ်ကွၢ်လိ ဒီးမၤထွဲ စီၤပ့းတရူး သိၣ်လိတၢ် အကျိၤအကျဲန့ၣ် ပှၤလၢအသးဘျၢတဖၣ် ကသးအိၣ် ကနၣ်ပှၤအါထီၣ်.
“သုဝဲတဂၤစုာ်စုာ်န့ၣ် ဒိးဘျၢထံ” (မၤတၢ် ၂:၃၈-၄၇)
၁၅. (က) စီၤပ့းတရူး တဲဘၣ် ပှၤကမျၢၢ်လၢ မနုၤလဲၣ် ဒီးအဝဲသ့ၣ် နၢ်ဟူဝဲဝံၤဒီး အဝဲသ့ၣ် မၤဝဲဒ်လဲၣ်. (ခ) ဘၣ်မနုၤအဃိ ပှၤအကထိတဖၣ်လၢ အနၢ်ဟူဘၣ်တၢ်သးခုကစီၣ် ဖဲဘူၣ်ယဲၢ်ဆံအမုၢ်နံၤန့ၣ် ဒိးဘျၢထံန့ၢ်ဝဲ တနံၤဃီဃီလဲၣ်.
၁၅ ဖဲ ခ.န ၃၃ ဘူၣ်ယဲၢ်ဆံအမုၢ်နံၤန့ၣ် စီၤပ့းတရူး တဲဘၣ် ပှၤယူဒၤဖိ ဒီးပှၤလၢအနုာ်လီၤလၢ ပှၤယူဒၤဖိအတၢ်ဘူၣ်တၢ်ဘါအပူၤလၢ “ပီၢ်ယၢ်လီၤက့ၤသုသး ဒီးသုဝဲတဂၤစုာ်စုာ်န့ၣ် ဒိးဘျၢထံ.” (မၤတၢ် ၂:၃၈) အဃိ ပှၤဒိးဘျၢထံ ဘူးကအိၣ်ဝဲ အဂၤ ၃,၀၀၀ ဒီးလီၤဂာ်လၢ အဝဲသ့ၣ် ဒိးဘျၢထံလၢ ထံကမါ လၢဝ့ၢ်ယရူၤၡလ့ၣ်အပူၤ မ့တမ့ၢ် ထံကမါလၢ အအိၣ်ဘူးဒီး ဝ့ၢ်ယရူၤၡလ့ၣ်. e မ့ၢ်ပှၤတဖၣ်အံၤ ဒိးဘျၢထံဆိတလၢဧါ. တၢ်မၤအသးတခါအံၤန့ၣ် မ့ၢ်အဟ့ၣ်သဆၣ်ထီၣ်ဝဲ ပှၤမၤလိလံာ်စီဆှံဖိ ဒီးဖိသၣ်လၢ အမိအပါကဲ ယဟိဝၤပှၤအုၣ်အသးတဖၣ်လၢ အဝဲသ့ၣ်ကကရီ ဒိးဘျၢထံအဂီၢ်ဧါ. တမ့ၢ်ဒ်န့ၣ်ဘၣ်. ပှၤယူဒၤဖိ ဒီးပှၤလၢအနုာ်လီၤလၢ ပှၤယူဒၤဖိအတၢ်ဘူၣ်တၢ်ဘါအပူၤန့ၣ် အဝဲသ့ၣ်ကဲပှၤလၢ အမၤလိ ကစၢ်ယွၤ အကလုၢ်ကထါဂ့ၤဂ့ၤ ဒီးအဝဲသ့ၣ် ပၣ်ဃုာ်လၢ ကလုာ်ဒူၣ်လၢ အဟ့ၣ်လုၢ်ထီၣ်အသးလၢ ယဟိဝၤယွၤအအိၣ် အကျါလံ. တကးဒံးဘၣ် အဝဲသ့ၣ်တနီၤန့ၣ် အိၣ်လၢတၢ်လီၢ်ဖးယံၤ ဘၣ်ဆၣ်ဟဲဝဲလၢ ဘူၣ်လၢပှၤမၤဝဲ ကိးနံၣ်ဒဲးအံၤအဃိ အဝဲသ့ၣ် ပာ်ဖျါထီၣ်လၢ အသးဆူၣ်လၢ နီၢ်သးတကပၤ. တကးဒံးဘၣ် အဝဲသ့ၣ် တူၢ်လိာ်ဝဲလၢ ယ့ၣ်ၡူးခရံာ်ကဲပှၤအရ့ဒိၣ်တဂၤလၢ ကမၤလၢပှဲၤထီၣ် ကစၢ်ယွၤ အတၢ်တိာ်ပာ်. အဃိ ဖဲန့ၣ်ဝံၤအလီၢ်ခံ အဝဲသ့ၣ် ဆဲးဘူၣ်ထီၣ်ဘါထီၣ် ယဟိဝၤယွၤ ဒ်ယ့ၣ်ၡူးအပျဲၢ်အဘီၣ်လၢ အဒိးဘျၢထံဝံၤတဂၤအသိး.
၁၆. ခရံာ်ဖိလၢ တၢ်မၢဖိအစိၤတဖၣ် ပာ်ဖျါထီၣ် အတၢ်သးအိၣ်ဟ့ၣ်တၢ်ဒ်လဲၣ်.
၁၆ ယဟိဝၤယွၤဆိၣ်ဂ့ၤဝဲ ပှၤကမျၢၢ်လၢ အဒိးဘျၢထံတဖၣ်န့ၣ် သပှၢ်တၢၢ်. ပထံၣ်ဘၣ်လၢ “ပှၤလၢအစူၢ်က့ၤနာ်က့ၤတၢ် ကိးဂၤဒဲးန့ၣ် အိၣ်ဝဲတပူၤဃီ ဒီးတၢ်လၢအအိၣ်ဒီး အဝဲသ့ၣ်န့ၣ် အဝဲသ့ၣ် ဟ့ၣ်နီၤလီၤလိာ်အသးလီၤ. ဒီးအဝဲသ့ၣ်ဆါလီၤကွံာ် အတၢ်စုလီၢ်ခီၣ်ခိၣ် ဒီးအတၢ်ဖိတၢ်လံၤတဖၣ် ဒီးဟ့ၣ်နီၤလီၤ ပှၤကိးဂၤဒဲး လၢကျိၣ်စ့ ဒ်ပှၤတဂၤစုာ်စုာ် အတၢ်လိၣ်ဘၣ် အိၣ်ဝဲအသိးလီၤ.” f (မၤတၢ် ၂:၄၄, ၄၅) ဆၢကတီၢ်ခဲအံၤ ပဝဲခရံာ်ဖိ အမ့ၢ်အတီကိးဂၤဒဲးန့ၣ် ပကဘၣ်ကွၢ်လိ ခရံာ်ဖိလၢ တၢ်မၢဖိအစိၤတဖၣ် အတၢ်အဲၣ် ဒီးတၢ်သးအိၣ်ဟ့ၣ်တၢ်.
၁၇. ဒ်သိး ပှၤတဂၤ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် အကဘၣ်မၤ မနုၤလဲၣ်.
၁၇ လံာ်စီဆှံ ပာ်ဖျါထီၣ်ဝဲလၢ တချုးလၢပှၤတဂၤ ဟ့ၣ်လုၢ်ထီၣ်သး ဒီးဒိးဘျၢထံဒံးဘၣ်န့ၣ် တၢ်လၢအကဘၣ်မၤဝဲအိၣ်တနီၤ. အဆိကတၢၢ်န့ၣ် အကဘၣ်မၤလိ ကစၢ်ယွၤ အကလုၢ်ကထါ. (ယိၤဟၣ် ၁၇:၃) အကဘၣ် ပာ်ဖျါထီၣ်လၢ အအိၣ်ဒီးတၢ်နာ်, ပာ်ဖျါထီၣ်လၢ အသးအုးလၢ တၢ်ကမၣ်လၢအမၤတ့ၢ်ဝဲ ဒီးပီၢ်ယၢ်လီၤက့ၤသးနီၢ်ကီၢ်. (မၤတၢ် ၃:၁၉) တကးဒံးဘၣ် အကဘၣ်ဆီတလဲအသး မ့တမ့ၢ် ဃၣ်လိၤက့ၤအသး ဒီးမၤတၢ်လၢ အဘၣ်ကစၢ်ယွၤအသး. (ရိ ၁၂:၂; အ့း ၄:၂၃, ၂၄) လၢခံ အဟ့ၣ်လုၢ်ထီၣ်အသး လၢကစၢ်ယွၤအအိၣ် ခီဖျိအဃ့ထုကဖၣ် မ့ၢ်ဝံၤမၣ် အကဘၣ်ဒိးဘျၢထံ.—မးသဲ ၁၆:၂၄; ၁ ပ့း ၃:၂၁.
၁၈. ယ့ၣ်ၡူးအပျဲၢ်အဘီၣ်လၢ အဟ့ၣ်လုၢ်ထီၣ်သး ဒီးဒိးဘျၢထံဝံၤတဂၤန့ၣ် န့ၢ်ဘၣ် တၢ်ခွဲးတၢ်ယာ်လီၤဆီ မနုၤလဲၣ်.
၁၈ နၤန့ၣ်နကဲ ယ့ၣ်ၡူးအပျဲၢ်အဘီၣ်လၢ အဟ့ၣ်လုၢ်ထီၣ်သး ဒီးဒိးဘျၢထံဝံၤတဂၤဧါ. နမ့ၢ်ကဲ ယ့ၣ်ၡူးအပျဲၢ်အဘီၣ်တဂၤန့ၣ် ပာ်လုၢ်ပာ်ပှ့ၤ တၢ်ခွဲးတၢ်ယာ်လီၤဆီလၢ နန့ၢ်ဘၣ်တခါအံၤ. ဒ်ခရံာ်ဖိလၢ အဒိးန့ၢ်ဘၣ် သးစီဆှံ လၢတၢ်မၢဖိအစိၤတဖၣ်အသိး နၤစ့ၢ်ကီး ယဟိဝၤယွၤ ကသူနၤအဂ့ၤကတၢၢ်လၢ နကမၤအတၢ်ဘၣ်သး ဒီးစံၣ်တဲၤတဲလီၤတၢ် လီၤတံၢ်လီၤဆဲး.
a ကွၢ်တၢ်လွံၢ်နၢၣ် လၢအမ့ၢ် “ ဝ့ၢ်ယရူၤၡလ့ၣ်မ့ၢ်ဝဲ ယူဒၤတၢ်ဘူၣ်တၢ်ဘါ အဝဲၤလီၢ်ခိၣ်သ့ၣ်”
b ကွၢ်တၢ်လွံၢ်နၢၣ် လၢအမ့ၢ် “ ရိမ့ၤမ့ၢ်ဝဲ ဘီမုၢ်လၢအဒိၣ်စိတဘ့ၣ် အဝ့ၢ်ခိၣ်;” “ ပှၤယူဒၤဖိလၢ အအိၣ်လၢ မ့းစပတၤမံ ဒီးအဲၤကူပတူး” ဒီး “ ခရံာ်ဖိ လၢအအိၣ်လၢ ပီၣ်တူး”
c “ပျ့ၤတဖၣ်” န့ၣ်အတကဲ မ့ၣ်အူနီၢ်ကီၢ်ဘၣ်, ဘၣ်ဆၣ် အဖျါလီၤဂာ် “ဒ်မ့ၣ်အူလၣ်အသိး.” အဃိ ဖဲသးစီဆှံ ဟဲလီၤလၢ ယ့ၣ်ၡူးအပျဲၢ်အဘီၣ်တဖၣ်အလိၤအခါ ပှၤထံၣ်ဝဲလၢ အဖျါလီၤဂာ်ဒ်သိးဒီး မ့ၣ်အူလၣ်.
d ကွၢ်တၢ်လွံၢ်နၢၣ် လၢအမ့ၢ် “ ပှၤလၢအနုာ်လီၤလၢ ပှၤယူဒၤဖိအတၢ်ဘူၣ်တၢ်ဘါအပူၤန့ၣ် အဝဲသ့ၣ် မ့ၢ်မတဂၤသ့ၣ်တဖၣ်လဲၣ်”
e ပမ့ၢ်ထိၣ်သတြီၤဒီးလၢညါန့ၣ် ဖဲလါအီကူး ၇, ၁၉၉၃ နံၣ်န့ၣ်ပှၤ ၇,၄၀၂ ဂၤဒိးဘျၢထံလၢ ထံကမါဃုဖျၢၣ်အပူၤ လၢယဟိဝၤပှၤအုၣ်အသး အတၢ်အိၣ်ဖှိၣ်ဖးဒိၣ် လၢပှၤမၤဝဲဖဲ ခံၣ်အဲၤ, ကီၢ်ယူၣ်ခြ့. တၢ်ဒိးဘျၢထံတဘျီအံၤ အယံာ်ဝဲ ခံနၣ်ရံၣ်ဒီးတဆံယဲၢ်မံးနံး.
f တၢ်ရဲၣ်တၢ်ကျဲၤတခါအံၤ မၤစၢၤဝဲ ပှၤတမှံၤလၢ အအိၣ်ဟဲလၢ တၢ်လီၢ်ဖးယံၤတဖၣ် ဒ်သိး အဝဲသ့ၣ် ကဆဲးအိၣ်လၢ ဝ့ၢ်ယရူၤၡလ့ၣ် ကန့ၢ်ယံာ်ထီၣ်တစဲးဖိ ဒီးမၤလိအါထီၣ် ဘၣ်ဃးဒီး အတၢ်စူၢ်တၢ်နာ်အသီအံၤအဂ့ၢ်. အဝဲသ့ၣ် ဟ့ၣ်နီၤလီၤလိာ်သးတၢ်န့ၣ် ခီဖျိလၢ အဝဲသ့ၣ်သးအိၣ်ဟ့ၣ်ဝဲ ဒီးအဝဲသ့ၣ် အဲၣ်လိာ်သးအဃိ. တမ့ၢ်ခီဖျိလၢ ပှၤမၢဆူၣ်အဝဲသ့ၣ်အဃိဘၣ်.—မၤတၢ် ၅:၁-၄.
