တၢ်မၤလိ ၅
“လၢပကဒိကနၣ် ပှၤကညီအလီၢ် ပကဘၣ်ဒိကနၣ် ကစၢ်ယွၤ အကလုၢ်”
တၢ်မၢဖိတဖၣ် ပာ်လီၤတၢ်အဒိအတဲာ်လၢ ခရံာ်ဖိလၢအမ့ၢ်အတီခဲလၢာ်အဂီၢ်
တၢ်ဂ့ၢ်ဒိးသန့ၤထီၣ်သးလၢ မၤတၢ် ၅:၁၂–၆:၇
၁-၃. (က) ဘၣ်မနုၤအဃိ ပှၤက့ၤကိး တၢ်မၢဖိတဖၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အမဲာ်ညါလဲၣ် ဒီးအဝဲသ့ၣ်ကမၤဝဲဒ်လဲၣ်န့ၣ် ကသန့ၤထီၣ်သးလၢ တၢ်ဂ့ၢ်မနုၤလဲၣ်. (ခ) တၢ်မၢဖိတဖၣ် မၤဝဲဒ်လဲၣ်န့ၣ် ဘၣ်မနုၤအဃိ ပဘၣ်သးသ့ၣ်ညါလဲၣ်.
ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အစံၣ်ညီၣ်ကွီၢ်တဖၣ် သးပှံၢ်ထီၣ်တၢ်ဒိၣ်မး. ယ့ၣ်ၡူးအတၢ်မၢဖိတဖၣ် ဆၢထၢၣ်လၢ စံၣ်ညီၣ်ကွီၢ်တဖၣ်အံၤ အမဲာ်ညါ ဒီးပှၤသမံသမိးအဝဲသ့ၣ်. ဘၣ်မနုၤအဃိ ပှၤသမံသမိးအဝဲသ့ၣ်လဲၣ်. စီၤယိၤသးကၤယါဖၤ လၢအကဲ ပှၤလုၢ်တၢ်ခိၣ် အဒိၣ်ကတၢၢ် ဒီးအကဲစ့ၢ်ကီး ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အခိၣ်န့ၣ် တဲအဝဲသ့ၣ်ဆူၣ်ဆူၣ်လၢ “ပမၤလိာ်သု လီၤတံၢ်လီၤဆဲး ဒ်သိး သုတဆဲးသိၣ်လိတၢ်လၢ ယ့ၣ်ၡူး အမံၤအပူၤတဂ့ၤ.” စီၤကၤယါဖၤ သးပှံၢ်ထီၣ်တၢ် ဒီးအတဘၣ်သး ကိးထီၣ်ယ့ၣ်ၡူးအမံၤနီတစဲးဘၣ် ဒီးအဆဲးတဲဝဲလၢ “သုမၤပှဲၤ ယရူၤၡလ့ၣ်ဒီး သုတၢ်သိၣ်လိတဖၣ် ဒီးသုပာ်လီၤသုသးလၢ သုကပာ်ဒ့ၣ်ပာ်ကမၣ်ပှၤလၢ ပှၤတဂၤအံၤ အတၢ်သံအဃိ.” (မၤတၢ် ၅:၂၈) အခီပညီန့ၣ် တၢ်မၢဖိတဖၣ် တဘၣ်စံၣ်တဲၤတဲလီၤတၢ်လၢၤဘၣ် အဝဲသ့ၣ်မ့ၢ်ဆဲးစံၣ်တဲၤတဲလီၤတၢ်န့ၣ် အကဘၣ်တၢ်စံၣ်ညီၣ်.
၂ ယ့ၣ်ၡူးန့ၢ်ဘၣ် တၢ်စိတၢ်ကမီၤလၢ ကစၢ်ယွၤအအိၣ် ဒီးယ့ၣ်ၡူးမၤလိာ် တၢ်မၢဖိတဖၣ်လၢ အဝဲသ့ၣ် ကဘၣ်စံၣ်တဲၤတဲလီၤတၢ်. အဃိ တၢ်မၢဖိတဖၣ် ကမၤဝဲဒ်လဲၣ်. (မး ၂၈:၁၈-၂၀) တၢ်မၢဖိတဖၣ်အံၤ ကပျံၤပှၤကညီ ဒီးတစံၣ်တဲၤတဲလီၤတၢ်လၢၤဘၣ်ဧါ. မ့တမ့ၢ် အဝဲသ့ၣ် ကဆဲးစံၣ်တဲၤတဲလီၤတၢ် ဒူဒူဧါ. အဝဲသ့ၣ်ကမၤဝဲဒ်လဲၣ်န့ၣ် ကသန့ၤထီၣ်သးလၢ အဝဲသ့ၣ်ကကနၣ် ကစၢ်ယွၤကလုၢ်ဧါ မ့တမ့ၢ် ပှၤကညီကလုၢ်ဟီဧါ. လၢတၢ်သးဆူၣ်အပူၤ တၢ်မၢဖိပ့းတရူး တဲတၢ်ဒူဒူ ဒီးတဲတၢ်ပျီပျီလၢ တၢ်မၢဖိခဲလၢာ်အဂီၢ်.
၃ ဖဲပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် မၤပျံၤမၤဖုး တၢ်မၢဖိတဖၣ်အခါ အဝဲသ့ၣ် မၤက့ၤဝဲဒ်လဲၣ်န့ၣ် ပဘၣ်သးသ့ၣ်ညါ သပှၢ်တၢၢ်. ပဝဲစ့ၢ်ကီး ကစၢ်ယွၤမၤလိာ်ပှၤလၢ ပကဘၣ်စံၣ်တဲၤတဲလီၤတၢ် ဒီးဖဲပစံၣ်တဲၤတဲလီၤတၢ်အခါ ဘၣ်သ့ၣ်သ့ၣ် ပကထံၣ်ဘၣ် တၢ်မၤအၢမၤနး. (မး ၁၀:၂၂) တကးဒံးဘၣ် ပှၤလၢအထီဒါတၢ်တဖၣ် ကကျဲးစၢးမၤကီမၤခဲပှၤ မ့တမ့ၢ် ကတြီပတၢ်စံၣ်တဲၤတဲလီၤတၢ်မၤ. ဖဲန့ၣ်အခါ ပကမၤဒ်လဲၣ်. ပကကွၢ်သကိး ဘၣ်ဃးဒီး တချုးဖဲ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် a သမံသမိး တၢ်မၢဖိတဖၣ်ဒံးဘၣ်အခါ တၢ်ကဲထီၣ်သးဒီး အဝဲသ့ၣ်ဒ်လဲၣ် ဒီးတၢ်မနုၤမၤစၢၤ အဝဲသ့ၣ်လၢ အကအိၣ်ဒီးတၢ်သးဒူလဲၣ်. ဒီးပမၤလိန့ၢ်တၢ်လၢ အဝဲသ့ၣ်အအိၣ်ကသ့ဒ်လဲၣ်.
“ယဟိဝၤယွၤ အမူခိၣ်ကလူး အိးထီၣ်ဝဲ ဃိာ်အတြဲၤ” (မၤတၢ် ၅:၁၂-၂၁)
၄, ၅. ဘၣ်မနုၤအဃိ စီၤကၤယါဖၤ ဒီးပှၤစးဒူၤကဲတဖၣ် “သူၣ်က့ၣ်သးက့ၣ်ထီၣ်တၢ် ဒိၣ်မး” လဲၣ်.
၄ ပကနီၣ်ဘၣ်ဖဲ ပှၤတဲစီၤပ့းတရူးဒီးစီၤယိၤဟၣ် အဆိကတၢၢ်တဘျီလၢ အဝဲသ့ၣ် တဘၣ်စံၣ်တဲၤတဲလီၤတၢ် လၢၤတဂ့ၤအခါ အဝဲသ့ၣ်တဲက့ၤဝဲလၢ “တၢ်လၢပထံၣ်ဘၣ် ဒီးတၢ်လၢပနၢ်ဟူဘၣ်တဖၣ်န့ၣ် ပဘၣ်စံၣ်တဲၤတဲလီၤအီၤ ဒီးပပတုာ်တသ့ဘၣ်.” (မၤတၢ် ၄:၂၀) ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် မၤလိာ် စီၤပ့းတရူးဒီးစီၤယိၤဟၣ် ဒ်န့ၣ်သနာ်က့ အဝဲသ့ၣ်ဒီးတၢ်မၢဖိအဂၤတဖၣ် ဆဲးစံၣ်တဲၤတဲလီၤတၢ်လၢ တၢ်လုၢ်ဟံၣ်ပူၤဒံး. တၢ်မၢဖိတဖၣ် မၤတၢ်လီၤလး ဒ်သိးဒီး မၤဘျါက့ၤပှၤဆါ ဒီးနီဟးထီၣ်ကွံာ် တၢ်နါတဖၣ်. အဝဲသ့ၣ်မၤဝဲဖဲ “စီၤၡလိၤမိၤ အကျဲလၢ အအိၣ်ဒီးအခိၣ်ဒုး.” တၢ်လီၢ်တခါအံၤအအိၣ်လၢ တၢ်လုၢ်ဟံၣ်အမုၢ်ထီၣ်တကပၤ ဒီးပှၤယူဒၤဖိတဖၣ်အိၣ်ဖှိၣ်ဖဲ တၢ်ခိၣ်ဒုးအဖီလာ်အါမး. တကးဒံးဘၣ် စီၤပ့းတရူးအကဒု မ့ၢ်လီၤဘၣ်လၢ ပှၤဆါလၢအအိၣ်ဖဲန့ၣ်တဖၣ်အလိၤန့ၣ် အဝဲသ့ၣ်တၢ်ဆါဘျါက့ၤဝဲ. ပှၤဆါလၢအတၢ်ဆါဘျါက့ၤန့ၣ် အဝဲသ့ၣ်တူၢ်လိာ်တၢ်သးခုကစီၣ်. အဃိ ပထံၣ်ဘၣ်လၢ “ပိာ်မုၣ်ဒီးပိာ်ခွါလၢ အစူၢ်က့ၤနာ်က့ၤ ကစၢ်န့ၣ် အါထီၣ်ဝဲကွ့ၢ်ကွ့ၢ်.”—မၤတၢ် ၅:၁၂-၁၅.
၅ စီၤကၤယါဖၤ ဒီးပှၤစးဒူၤကဲ လၢအကဲ တၢ်ဘူၣ်တၢ်ဘါခိၣ်နၢ်တဖၣ်န့ၣ် အဝဲသ့ၣ် “သူၣ်က့ၣ်သးက့ၣ်ထီၣ်တၢ် ဒိၣ်မး” အဃိ အဝဲသ့ၣ် ဖၢနုာ်လီၤတၢ်မၢဖိတဖၣ် လၢဃိာ်ပူၤ. (မၤတၢ် ၅:၁၇, ၁၈) ဘၣ်မနုၤအဃိ ပှၤစးဒူၤကဲတဖၣ် သးပှံၢ်ထီၣ်တၢ်လဲၣ်. တၢ်မၢဖိတဖၣ် သိၣ်လိဝဲလၢ ယ့ၣ်ၡူးဂဲၤဆၢထၢၣ်သမူထီၣ်က့ၤလံ သနာ်က့ ပှၤစးဒူၤကဲတဖၣ် တနာ်လၢ တၢ်ဂဲၤဆၢထၢၣ်သမူထီၣ်က့ၤအိၣ်ဘၣ်. တၢ်မၢဖိတဖၣ်တဲလၢ ထဲဒၣ်ပှၤလၢအနာ် ယ့ၣ်ၡူးန့ၣ်အဝဲသ့ၣ် ကန့ၢ်ဘၣ်တၢ်အုၣ်က့ၤခီၣ်က့ၤ. ဘၣ်ဆၣ် ပှၤစးဒူၤကဲတဖၣ် ဘၣ်ယိၣ်ဝဲလၢ ပှၤမ့ၢ်တူၢ်လိာ်ယ့ၣ်ၡူး ဒ်အဝဲသ့ၣ်အခိၣ်န့ၣ် ရိမ့ၤအပဒိၣ် ကစံၣ်ညီၣ်အဝဲသ့ၣ်. (ယိၤဟၣ် ၁၁:၄၈) ခီဖျိလၢ တၢ်ဂ့ၢ်တဖၣ်အံၤအဃိ ပှၤစးဒူၤကဲ တဘၣ်သးလၢ တၢ်မၢဖိတဖၣ် ကစံၣ်တဲၤတဲလီၤတၢ် နီတစဲးဘၣ်.
၆. ဆၢကတီၢ်ခဲအံၤ တၢ်ဂ့ၢ်ခိၣ်သ့ၣ်လၢ ယဟိဝၤယွၤအခ့အပှၤ ထံၣ်ဘၣ်ဒီးတၢ်မၤအၢမၤနးန့ၣ် ခီဖျိလၢ မတဂၤအဃိလဲၣ်. ဒီးဘၣ်မနုၤအဃိ ပတကမၢကမၣ်ဘၣ်လဲၣ်.
၆ ဆၢကတီၢ်ခဲအံၤစ့ၢ်ကီး တၢ်ဂ့ၢ်ခိၣ်သ့ၣ်လၢ ယဟိဝၤယွၤအခ့အပှၤ ထံၣ်ဘၣ်ဒီး တၢ်မၤအၢမၤနးန့ၣ် ခီဖျိလၢ တၢ်ဘူၣ်တၢ်ဘါကမၣ် ခိၣ်နၢ်တဖၣ် မၤဝဲဒ်သိးဒီး ပှၤအဂၤ ကမၤအၢမၤနးပှၤ. အဝဲသ့ၣ်သူပဒိၣ်ပပှၢ် ဒီးမံဒံယါတၢ်ကစီၣ် လၢကမၤပတုာ် ပတၢ်စံၣ်တဲၤတဲလီၤတၢ်မၤအဂီၢ်. ပမ့ၢ်ထံၣ်ဘၣ် တၢ်အိၣ်သးဒ်အံၤန့ၣ် ပတလိၣ် ကမၢကမၣ်ဘၣ်. ခီဖျိလၢ လံာ်စီဆှံတၢ်ကစီၣ် လၢပတဲန့ၣ် ကမၤစၢၤပှၤဂၤလၢ အကသ့ၣ်ညါထီၣ် တၢ်ဘူၣ်တၢ်ဘါခိၣ်နၢ်တဖၣ် အတၢ်လံၣ်တၢ်လီ. အဃိ ပှၤသးဘျၢလၢ အတူၢ်လိာ်တၢ်မ့ၢ်တၢ်တီန့ၣ် အဝဲသ့ၣ်ထူၣ်ဖျဲးထီၣ်လၢ တၢ်စူၢ်တၢ်နာ် ဒီးလုၢ်လၢ်လၢ အတဘၣ်လိာ်သးဒီး လံာ်စီဆှံဘၣ်. (ယိၤဟၣ် ၈:၃၂) ဒီးလံာ်စီဆှံတၢ်ကစီၣ်လၢ ပတဲန့ၣ် တၢ်ဘူၣ်တၢ်ဘါခိၣ်နၢ်တဖၣ် တဘၣ်သးဝဲဘၣ် အဃိ အဝဲသ့ၣ်မၤအၢမၤနးပှၤ.
၇, ၈. မူခိၣ်ကလူး အတၢ်မၤလိာ်န့ၣ် ကဲဘျုးလၢ တၢ်မၢဖိအဂီၢ်ဒ်လဲၣ် ဒီးပကဘၣ် သံကွၢ်လီၤပသးဒ်လဲၣ်.
၇ ဖဲတၢ်မၢဖိတဖၣ် အိၣ်ခိးတၢ်လၢဃိာ်ပူၤအခါ အဝဲသ့ၣ် ကဆိမိၣ်ဘၣ်လၢ မ့ၢ်အဒုၣ်အဒါ ကမၤသံအဝဲသ့ၣ် ခီဖျိလၢ အတၢ်နာ်အဃိဧါ. (မး ၂၄:၉) ဘၣ်ဆၣ် ဖဲတၢ်တနၤန့ၣ် တၢ်ကဲထီၣ်သးလၢ အလီၤကမၢကမၣ်တခါလၢ “ယဟိဝၤယွၤ အမူခိၣ်ကလူး အိးထီၣ်ဝဲ ဃိာ်အတြဲၤတဖၣ်.” b (မၤတၢ် ၅:၁၉) ဝံၤဒီးမူခိၣ်ကလူး မၤလိာ်အဝဲသ့ၣ် လီၤတံၢ်လီၤဆဲးလၢ “လဲၤဆၢထၢၣ်လၢ တၢ်လုၢ်ဟံၣ်အပူၤ ဒီးဆဲးတဲဘၣ်ပှၤဂီၢ်မုၢ်.” (မၤတၢ် ၅:၂၀) ခီဖျိလၢ တၢ်မၤလိာ်အံၤအဃိ တၢ်မၢဖိသ့ၣ်ညါဝဲလၢ တၢ်လၢအဝဲသ့ၣ်မၤတ့ၢ်ဝဲန့ၣ် အကဲတၢ်လၢအဘၣ်. တကးဒံးဘၣ် မူခိၣ်ကလူးအတၢ်ကတိၤန့ၣ် မၤဆူၣ်ထီၣ်အဝဲသ့ၣ်အသး ဒီးအဝဲသ့ၣ်မ့ၢ်ထံၣ်ဘၣ် တၢ်ကီတၢ်ခဲဒ်လဲၣ်နာ်က့ အဝဲသ့ၣ်ကဆဲး အိၣ်ဒီးတၢ်သးတီ. တၢ်မၢဖိတဖၣ် အတၢ်နာ်ဆူၣ်ထီၣ် ဒီးအအိၣ်ဒီးတၢ်သးဒူ အဃိ အဝဲသ့ၣ် “လဲၤနုာ်လီၤဝဲလၢ တၢ်လုၢ်ဟံၣ်အပူၤဂီၤဂီၤ ဒီးသိၣ်လိတၢ်.”—မၤတၢ် ၅:၂၁.
၈ ပဝဲကိးဂၤဒဲး ပကဘၣ် သံကွၢ်လီၤပသးလၢ ‘ယမ့ၢ်ထံၣ်ဘၣ်ဒီး တၢ်အိၣ်သးဒ်န့ၣ်န့ၣ် မ့ၢ်ယအိၣ်ဒီး တၢ်နာ်ဒီးတၢ်သးဒူ လၢယကဆဲး စံၣ်တဲၤတဲလီၤတၢ်အဂီၢ်ဧါ.’ တၢ်မၤ အရ့ဒိၣ်တခါလၢအမ့ၢ် “အုၣ်အသး လီၤတံၢ်လီၤဆဲး ဘၣ်ဃးဒီး ယွၤအဘီမုၢ် အဂ့ၢ်” န့ၣ်ပသ့ၣ်ညါလၢ မူခိၣ်ကလူးဆီၣ်ထွဲမၤစၢၤဝဲအဃိ ပသးဆူၣ်ထီၣ်ဒိၣ်မး.—မၤတၢ် ၂၈:၂၃; လီၣ် ၁၄:၆, ၇.
“လၢပကဒိကနၣ် ပှၤကညီအလီၢ် ပကဘၣ်ဒိကနၣ် ကစၢ်ယွၤ အကလုၢ်” (မၤတၢ် ၅:၂၁-၃၃)
“အဝဲသ့ၣ် ဟဲက့ၤကိးဝဲ တၢ်မၢဖိတဖၣ် ဒီးဒုးဆၢထၢၣ် အဝဲသ့ၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပှၤဘၣ်မူဘၣ်ဒါတဖၣ် အမဲာ်ညါ.”—မၤတၢ် ၅:၂၇
၉-၁၁. ဖဲပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် တဲဘၣ်တၢ်မၢဖိလၢ တဘၣ်စံၣ်တဲၤတဲလီၤတၢ်လၢၤတဂ့ၤအခါ တၢ်မၢဖိတဖၣ်မၤဝဲဒ်လဲၣ်. ဒီးတၢ်မၢဖိတဖၣ် ပာ်လီၤတၢ်ဒိတၢ်တဲာ်အဂ့ၤလၢ ခရံာ်ဖိအမ့ၢ်အတီတဖၣ် အဂီၢ်ဒ်လဲၣ်.
၉ စီၤကၤယါဖၤ ဒီးပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပှၤစံၣ်ညီၣ်ကွီၢ်တဖၣ်န့ၣ် အိၣ်ကတီၤသးလၢ ကစံၣ်ညီၣ် တၢ်မၢဖိတဖၣ်လံ. အဝဲသ့ၣ်မၢလီၤ ပှၤပၢၤတၢ်ဖိ လၢကလဲၤကိးန့ၢ် တၢ်မၢဖိတဖၣ် ဘၣ်ဆၣ် မူခိၣ်ကလူး မၤထူၣ်ဖျဲးထီၣ် တၢ်မၢဖိတဖၣ်လံန့ၣ် အဝဲသ့ၣ်တသ့ၣ်ညါဝဲဘၣ်. ထံၣ်တမှံကွၢ်လၢ ပှၤပၢၤတၢ်ဖိ ထံၣ်လၢ ဃိာ်အတြဲၤတဖၣ်န့ၣ် ပံးဃာ်အသးကျၢၤကျၢၤ ဒီး “ပှၤခိးတၢ်ဖိတဖၣ် ဆၢထၢၣ်ဝဲလၢ တြဲၤအခီၣ်ထံး.” ဘၣ်ဆၣ် ဖဲအဝဲသ့ၣ် တထံၣ်ပှၤဃိာ်ဖိ လၢဃိာ်ပူၤ လၢၤဘၣ်အခါ အဝဲသ့ၣ် ကမၢကမၣ်ဒိၣ်မး. (မၤတၢ် ၅:၂၃) တၢ်မၢဖိတဖၣ် လီၤဘၣ်လၢဃိာ်ပူၤန့ၣ် ခီဖျိလၢ အဝဲသ့ၣ်စံၣ်တဲၤတဲလီၤ ယ့ၣ်ၡူးအဂ့ၢ်. ဒီးခဲအံၤန့ၣ် ပှၤကွၢ်ထွဲ တၢ်လုၢ်ဟံၣ်အခိၣ် သ့ၣ်ညါဝဲလၢ တၢ်မၢဖိတဖၣ်အိၣ်လၢ တၢ်လုၢ်ဟံၣ်ပူၤ ဒီးစံၣ်တဲၤတဲလီၤ ဘၣ်ဃးဒီး ယ့ၣ်ၡူးခရံာ်အဂ့ၢ် ကဒီးလံ. အဃိ ပှၤကွၢ်ထွဲ တၢ်လုၢ်ဟံၣ်အခိၣ် ဒီးပှၤပၢၤတၢ်ဖိတဖၣ် ကရီလဲၤလၢတၢ်လုၢ်ဟံၣ် ဒ်သိးကဖီၣ်န့ၢ် တၢ်မၢဖိတဖၣ် ဒီးဟဲက့ၤကိးအဝဲသ့ၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အမဲာ်ညါ.
၁၀ လၢတၢ်မၤလိအံၤအခီၣ်ထံးန့ၣ် ပထံၣ်ဘၣ်လၢ တၢ်ဘူၣ်တၢ်ဘါခိၣ်နၢ်တဖၣ် တဲဘၣ်တၢ်မၢဖိတဖၣ်လၢ တဘၣ်စံၣ်တဲၤတဲလီၤတၢ်လၢၤဘၣ်. တၢ်မၢဖိတဖၣ် မၤဝဲဒ်လဲၣ်. ပထံၣ်ဘၣ်လၢ စီၤပ့းတရူး တဲဆၢက့ၤ တၢ်ဘူၣ်တၢ်ဘါခိၣ်နၢ် ဒူဒူဒ်အံၤ. “လၢပကဒိကနၣ် ပှၤကညီအလီၢ် ပကဘၣ်ဒိကနၣ် ကစၢ်ယွၤ အကလုၢ်.” (မၤတၢ် ၅:၂၉) တၢ်မၢဖိတဖၣ် ပာ်လီၤတၢ်ဒိတၢ်တဲာ်အဂ့ၤလၢ ခရံာ်ဖိအမ့ၢ်အတီတဖၣ် ကမၤထွဲဝဲ. ကစၢ်ယွၤတဲဝဲလၢ ပကဘၣ်ကနၣ် ပှၤလၢအပၢတၢ်တဖၣ်အကလုၢ် သနာ်က့ အဝဲသ့ၣ် မ့ၢ်မၢပမၤတၢ်လၢ ကစၢ်ယွၤတဘၣ်သး မ့တမ့ၢ် အဝဲသ့ၣ်မ့ၢ်မၢပပတုာ်မၤတၢ်လၢ ကစၢ်ယွၤမၢပမၤန့ၣ် ပတလိၣ်ကနၣ် အဝဲသ့ၣ်ကလုၢ်ဘၣ်. အဃိ လၢပစိၤခဲအံၤ “ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢ ပဖီခိၣ်တဖၣ်” မ့ၢ်တြီ ပတၢ်စံၣ်တဲၤတဲလီၤတၢ်မၤ သနာ်က့ ပကဘၣ်ဆဲးဒိကနၣ် ကစၢ်ယွၤအကလုၢ် ဒီးဆဲးစံၣ်တဲၤတဲလီၤ တၢ်သးခုကစီၣ်. (ရိ ၁၃:၁) ဘၣ်ဆၣ် ပကဘၣ်အိၣ်ဒီး တၢ်ပလီၢ်သး ဒီးဆဲးစံၣ်တဲၤတဲလီၤ ဘီမုၢ်တၢ်သးခုကစီၣ်လၢ တၢ်ကူၣ်သ့အပူၤ.
၁၁ ခီဖျိလၢ တၢ်မၢဖိတဖၣ် စံးဆၢက့ၤတၢ်ဒူဒူအဃိ စံၣ်ညီၣ်ကွီၢ်တဖၣ် သးဒိၣ်ထီၣ်အဝဲသ့ၣ်ဒိၣ်မး. အဃိ အဝဲသ့ၣ် ပာ်လီၤသးလၢက “မၤသံ” တၢ်မၢဖိတဖၣ်ညါ. (မၤတၢ် ၅:၃၃) တၢ်မၢဖိလၢ အသးဆူၣ်တဖၣ်အံၤ ဆိမိၣ်ဝဲလၢ အဝဲသ့ၣ်ကဘၣ်သံ ဘၣ်ဆၣ် ယဟိဝၤယွၤမၤစၢၤ အဝဲသ့ၣ်လၢ တၢ်လီၤလးအပူၤ.
“သုမၤဟးဂီၤအီၤ တန့ၢ်ဘၣ်” (မၤတၢ် ၅:၃၄-၄၂)
၁၂, ၁၃. (က) စီၤကမၤလ့လး ဟ့ၣ်ကူၣ် ပှၤလၢအမၤသကိးတၢ်ဒီးအီၤတဖၣ်ဒ်လဲၣ် ဒီးအဝဲသ့ၣ်မၤဝဲဒ်လဲၣ်. (ခ) ဆၢကတီၢ်ခဲအံၤ ယဟိဝၤယွၤမၤစၢၤ အပှၤဂီၢ်မုၢ်ဒ်လဲၣ် ဒီးပမ့ၢ် “ဘၣ်တူၢ်တၢ်လၢ တၢ်တီတၢ်လိၤအဃိ” န့ၣ်ပနာ်န့ၢ် ကစၢ်ယွၤသ့ဒ်လဲၣ်.
၁၂ စီၤကမၤလ့လးန့ၣ် အတဲန့ၢ်တၢ်လၢ တၢ်မၢဖိတဖၣ်အဂီၢ်. c ဒီးအီၤန့ၣ် အကဲ “သရၣ်လၢအသိၣ်လိ စီၤမိၤၡ့ အတၢ်သိၣ်တၢ်သီ ဒီးပှၤခဲလၢာ် ယူးယီၣ်ပာ်ကဲအီၤ ဒိၣ်မး.” တကးဒံးဘၣ် အကဲပှၤလၢ အတီခိၣ်ရိၤမဲတၢ် ဒီး “အဝဲဟ့ၣ်လီၤ တၢ်ကလုၢ်လၢ ပှၤကဆှၢထီၣ် တၢ်မၢဖိတဖၣ်လၢ တၢ်ချၢတစိၢ်ဖိ.” အဃိ ပသ့ၣ်ညါဘၣ်လၢ ပှၤလၢမၤသကိးတၢ်ဒီးအီၤစ့ၢ်ကီး ပာ်ကဲအီၤဒိၣ်မး. (မၤတၢ် ၅:၃၄) စီၤကမၤလ့လး တဲဘၣ်ဃးဒီး လၢအပူၤကွံာ် ပှၤထီဒါတၢ်အခိၣ်တဂၤဂၤ မ့ၢ်သံန့ၣ် ပှၤလၢအပိာ်အခံတဖၣ် လီၤပြံလီၤပြါဝဲ. ခီဖျိလၢ တၢ်မၢဖိတဖၣ် အသရၣ်ယ့ၣ်ၡူး သံတယံာ်ဒံးဘၣ်အဃိ စီၤကမၤလ့လးဟ့ၣ်ကူၣ် စံၣ်ညီၣ်ကွီၢ်တဖၣ်လၢ အဝဲသ့ၣ် ကဝံသးစူၤ ဒီးနၢ်ပၢၢ်စၢၤ တၢ်မၢဖိတဖၣ်. ဒီးအတဲဝဲလၢ “မၤတံာ်တာ် ပှၤတဖၣ်အံၤတဂ့ၤ. ပျဲအဝဲသ့ၣ်ဟီ, တၢ်ရဲၣ်တၢ်ကျဲၤတခါအံၤ ဒီးတၢ်မၤအံၤ မ့ၢ်ဟဲလၢ ပှၤဟီၣ်ခိၣ်ဖိ အအိၣ်န့ၣ် အကဟးဂီၤကွံာ်ဝဲလီၤ. ဘၣ်ဆၣ် အမ့ၢ်ဟဲလၢ ကစၢ်ယွၤ အအိၣ်န့ၣ် သုမၤဟးဂီၤအီၤ တန့ၢ်ဘၣ်, တကးဒံးဘၣ် ဘၣ်သ့ၣ်သ့ၣ် သုကကဲထီၣ်ပှၤလၢ အထီဒါ ကစၢ်ယွၤ.” (မၤတၢ် ၅:၃၈, ၃၉) စီၤကမၤလ့လးန့ၣ် အတဲတၢ်သ့သ့ဘၣ်ဘၣ် လၢအထုးန့ၢ်ပှၤသး. အဃိ စံၣ်ညီၣ်ကွီၢ်တဖၣ် တူၢ်လိာ် အတၢ်ဟ့ၣ်ကူၣ် သနာ်က့ အဝဲသ့ၣ်တီၢ် တၢ်မၢဖိတဖၣ် ဒီးတဲအဝဲသ့ၣ်လၢ “အသုတဆဲး စံၣ်တဲၤတဲလီၤတၢ်လၢ ယ့ၣ်ၡူးအမံၤ အပူၤတဂ့ၤ.”—မၤတၢ် ၅:၄၀.
၁၃ ဆၢကတီၢ်ခဲအံၤ ယဟိဝၤယွၤသူဝဲ ပှၤလၢအအိၣ်ဒီး တၢ်စိတၢ်ကမီၤ ဒ်သိးဒီး စီၤကမၤလ့လး လၢကမၤစၢၤ အပှၤဂီၢ်မုၢ်သ့. (ကတိၤ ၂၁:၁) တကးဒံးဘၣ် ယဟိဝၤယွၤ ကသူအသးစီဆှံလၢ ကထိးဘၣ် ပှၤလၢအပၢတၢ်, စံၣ်ညီၣ်ကွီၢ် ဒီးပှၤလၢအဒုးအိၣ်ထီၣ် တၢ်သိၣ်တၢ်သီတဖၣ်အသးလၢ ကမၤဝဲဒ်သိးဒီး ယဟိဝၤယွၤအတၢ်ဘၣ်သး. (ဃ့ ၂:၄-၈) ဘၣ်ဆၣ် ကစၢ်ယွၤမ့ၢ်ပျဲလၢ ပက “ဘၣ်တူၢ်တၢ်လၢ တၢ်တီတၢ်လိၤအဃိ” န့ၣ်ပနာ်န့ၢ်အီၤလၢ အမၤစၢၤပှၤသ့. ကစၢ်ယွၤ ကမၤစၢၤပှၤလၢ တၢ်ဂ့ၢ်ခံမံၤ. (၁ ပ့း ၃:၁၄) တၢ, ဒ်သိးပလဲၤခီဖျိတၢ်ကန့ၢ်အဂီၢ် အကဟ့ၣ်ပှၤတၢ်ဂံၢ်တၢ်ဘါ. (၁ ကရံၣ် ၁၀:၁၃) ခံ, ပှၤထီဒါပှၤတဖၣ် “မၤဟးဂီၤ” ကစၢ်ယွၤအတၢ်မၤ “တန့ၢ်ဘၣ်.”—ၡါ ၅၄:၁၇.
၁၄, ၁၅. (က) ဖဲပှၤတီၢ်တၢ်မၢဖိတဖၣ်အခါ အဝဲသ့ၣ်မၤက့ၤဝဲဒ်လဲၣ် ဒီးဘၣ်မနုၤအဃိလဲၣ်. (ခ) တဲဖျါထီၣ်တၢ်လဲၤခီဖျိတခါ လၢအပာ်ဖျါထီၣ် ယဟိဝၤယွၤအပှၤဂီၢ်မုၢ် ထံၣ်ဘၣ်ဒီးတၢ်မၤအၢမၤနး သနာ်က့ အအိၣ်ဒီးတၢ်သးခုဒံး.
၁၄ တၢ်မၢဖိတဖၣ်န့ၣ် ပှၤတီၢ်အဝဲသ့ၣ် သနာ်က့ အဝဲသ့ၣ်သးတလီၤစၢ် ဒီးတတူၢ်ၡူအသးဘၣ်. ပထံၣ်ဘၣ်လၢ အဝဲသ့ၣ် “ဟးထီၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပှၤဘၣ်မူဘၣ်ဒါတဖၣ် အမဲာ်ညါ ပှဲၤဒီးတၢ်သးခု.” (မၤတၢ် ၅:၄၁) တၢ်မၢဖိတဖၣ်အံၤ ပှၤတီၢ်အဝဲသ့ၣ် ဒီးမၤအၢမၤနးအဝဲသ့ၣ်အဃိ ကဆါဘၣ်အဝဲသ့ၣ်ဖးဒိၣ်ညါ. သနာ်က့ ဘၣ်မနုၤအဃိ အဝဲသ့ၣ် အိၣ်ဒီးတၢ်သးခုဒံးလဲၣ်. ခီဖျိလၢ အဝဲသ့ၣ် သ့ၣ်ညါဝဲလၢ အဝဲသ့ၣ် တီဒီးယဟိဝၤယွၤ ဒီးကွၢ်လိယ့ၣ်ၡူးအဃိ အဝဲသ့ၣ်သးခု.—မး ၅:၁၁, ၁၂.
၁၅ ဆၢကတီၢ်ခဲအံၤ ပမ့ၢ်ဘၣ်တူၢ်တၢ်လၢ တၢ်သးခုကစီၣ်အဃိနာ်က့ ပသးခု ဒ်သိးဒီး ပဒီပုၢ်ဝဲၢ်မုၣ်ခွါလၢ တၢ်မၢဖိအစိၤ. (၁ ပ့း ၄:၁၂-၁၄) ပတဘၣ်သးလၢ ပှၤကမၤပျံၤမၤဖုး, မၤအၢမၤနး ဒီးဖၢနုာ်ပှၤလၢ ဃိာ်ပူၤဘၣ်. ဘၣ်ဆၣ် ပမ့ၢ်ထံၣ်ဘၣ်ဒီး တၢ်အိၣ်သးဒ်အံၤနာ်က့ ပမ့ၢ်တီဒီး ယဟိဝၤယွၤန့ၣ် ပကသးခု. အဒိ ဒီပုၢ်ဝဲၢ်ခွါဟဲနရံၤ ဒီနံး ထံၣ်ဘၣ်ဒီး ပဒိၣ်လၢအအၢအသီ အတၢ်မၤအၢမၤနး တဘျုးနံၣ်ညါ. အတဲဝဲလၢ ဖဲ ၁၉၄၄ လါအီကူးန့ၣ် ပှၤအိၣ်ဒီးတၢ်စိတၢ်ကမီၤတဖၣ် ပာ်လီၤသးလၢ ကဖၢနုာ်အီၤဒီးအကၠီလၢ ဃိာ်ပူၤ. ပှၤထီဒါတၢ်တဖၣ် တဲဝဲလၢ “အဝဲသ့ၣ် သ့ၣ်ညါလၢ အမ့ၢ်ဘၣ်သံလၢ အတၢ်နာ်အဃိ နာ်က့အသးခု. အဃိ ပှၤမ့ၢ်ကျဲးစၢး တဲအဝဲသ့ၣ် ဒ်လဲၣ်ဒ်လဲၣ်နာ်က့ အဝဲသ့ၣ်တမၤထွဲဘၣ်.” ဒီပုၢ်ဝဲၢ်ခွါဒီနံး တဲဝဲလၢ “ယတဘၣ်သးသံဘၣ်. သနာ်က့ ဖဲယထံၣ်ဘၣ်ဒီး တၢ်မၤအၢမၤနးအခါ ယဆဲးတီဒီးယဟိဝၤယွၤ ဒီးယအိၣ်ဒီး တၢ်သးဒူ ဒီးတၢ်ပာ်ကဲလီၤနီၢ်ကစၢ်သးအဃိ ယသးခု.”—ယၤ ၁:၂-၄.
ဒ်တၢ်မၢဖိတဖၣ်အသိး ပစံၣ်တဲၤတဲလီၤတၢ် “လၢတဟံၣ်ဘၣ်တဟံၣ်”
၁၆. တၢ်မၢဖိတဖၣ် စံၣ်တဲၤတဲလီၤတၢ် လီၤတံၢ်လီၤဆဲးဒ်လဲၣ်. ပမၤထွဲ ဒ်တၢ်မၢဖိလၢညါတဖၣ် မၤဝဲအသိးဒ်လဲၣ်.
၁၆ တၢ်မၢဖိတဖၣ် တထုးယံာ်အသးဘၣ် ဒီးစံၣ်တဲၤတဲလီၤက့ၤတၢ် တဘျီဃီ. အဝဲသ့ၣ်တပျံၤတၢ်ဘၣ် ဒီးဆဲး “စံၣ်တဲၤတဲလီၤ တၢ်သးခုကစီၣ် လၢအဘၣ်ဃးဒီး ယ့ၣ်ၡူးခရံာ်လၢ တၢ်လုၢ်ဟံၣ်ပူၤ ဒီးလၢတဟံၣ်ဘၣ်တဟံၣ် ကိးနံၤဒဲး.” d (မၤတၢ် ၅:၄၂) အဝဲသ့ၣ်သးဆူၣ်ဒိၣ်မး ဒီးပာ်လီၤသးလၢ ကဆဲးစံၣ်တဲၤတဲလီၤတၢ် လီၤတံၢ်လီၤဆဲး. ပထံၣ်ဘၣ်လၢ အဝဲသ့ၣ်လဲၤစံၣ်တဲၤတဲလီၤတၢ် လၢပှၤဟံၣ် ဒ်ယ့ၣ်ၡူးခရံာ် မၤလိာ်အဝဲသ့ၣ်အသိး. (မး ၁၀:၇, ၁၁-၁၄) တကးဒံးဘၣ် အဝဲသ့ၣ် မၤပှဲၤ ယရူၤၡလ့ၣ်ဒီး အဝဲသ့ၣ်တၢ်သိၣ်လိတဖၣ်. ဆၢကတီၢ်ခဲအံၤ ပှၤအါဂၤသ့ၣ်ညါဝဲလၢ ယဟိဝၤပှၤအုၣ်အသးတဖၣ် စံၣ်တဲၤတဲလီၤတၢ် ဒ်တၢ်မၢဖိလၢညါတဖၣ် မၤဝဲအသိး. တကးဒံးဘၣ် လၢပလီၢ်ကဝီၤန့ၣ် ပဘၣ်သးစံၣ်တဲၤတဲလီၤတၢ် လီၤတံၢ်လီၤဆဲး ဒီးပဘၣ်သးလၢ ပှၤကိးဂၤဒဲး ကနၢ်ဟူဘၣ် တၢ်သးခုကစီၣ်အဃိ ပကျဲးစၢး လဲၤစံၣ်တဲၤတဲလီၤတၢ် လၢတဟံၣ်ဘၣ်တဟံၣ်. ဖဲမုၢ်နံၤခံကတၢၢ်အံၤ ပထံၣ်ဘၣ်လၢ ပှၤလၢအကကွဲၢ်တဖၣ် တူၢ်လိာ်ဝဲ ဘီမုၢ်တၢ်သးခုကစီၣ်. ဒီးပှၤအါတက့ၢ်န့ၣ် နၢ်ဟူဘၣ် တၢ်သးခုကစီၣ် အဆိကတၢၢ်တဘျီ ဖဲယဟိဝၤပှၤအုၣ်အသးတဖၣ် ဟဲလၢအဝဲသ့ၣ်အဟံၣ်အခါ. အဃိ ပထံၣ်ဘၣ်လၢ ယဟိဝၤယွၤဆိၣ်ဂ့ၤ ပတၢ်စံၣ်တဲၤတဲလီၤတၢ်မၤ သပှၢ်တၢၢ်.
ပိာ်ခွါလၢ အတုၤထီၣ်ထီၣ်ဘးတနီၤက “ကွၢ်ထွဲ တၢ်မၤအံၤ အဂီၢ်” (မၤတၢ် ၆:၁-၆)
၁၇-၁၉. တၢ်ကီတၢ်ခဲ မနုၤအိၣ်ထီၣ်လဲၣ်. ဒီးဒ်သိး တၢ်ဂ့ၢ်ကီ ကဘၣ်ဂီၢ်ထီၣ်က့ၤအဂီၢ် တၢ်မၢဖိတဖၣ် ဟံးစုနဲၣ်ကျဲဝဲ ဒ်လဲၣ်.
၁၇ တၢ်အိၣ်ဖှိၣ်အသီတဖျၢၣ်အံၤ ထံၣ်ဘၣ်တၢ်ကီတၢ်ခဲ လၢအဂၤတမံၤ. လၢတၢ်အိၣ်ဖှိၣ်ပူၤန့ၣ် ဒီပုၢ်ဝဲၢ်လၢ အကွၢ်ဒိၣ်ဆံးလိာ်သး အိၣ်ဝဲ. လၢဝ့ၢ်ယရူၤၡလ့ၣ်အပူၤ ပှၤလၢအဒိးဘျၢထံဝံၤ အါတက့ၢ်န့ၣ် အကဲ ပှၤတမှံၤ ဒီးတချုးလၢ အဝဲသ့ၣ်က့ၤလၢ အတၢ်လီၢ်ဒံးဘၣ်န့ၣ် အဝဲသ့ၣ် ဘၣ်သးမၤလိအါထီၣ်တၢ်. အဃိ ဒီပုၢ်ဝဲၢ်လၢ ဝ့ၢ်ယရူၤၡလ့ၣ်န့ၣ် မၤဘူၣ်လီၤကျိၣ်စ့ ဒ်သိးဒီပုၢ်ဝဲၢ် ကအီၣ်ဘၣ်အီဘၣ် ဒီးကန့ၢ်ဘၣ်တၢ်လၢ အဝဲသ့ၣ်လိၣ်ဘၣ်. (မၤတၢ် ၂:၄၄-၄၆; ၄:၃၄-၃၇) ဖဲန့ၣ်အဆၢကတီၢ် တၢ်ကီတၢ်ခဲအိၣ်ထီၣ်ဝဲတခါ. မုၣ်ကမဲလၢ အတဲကြံးကျိာ်န့ၣ် “တဒိးန့ၢ်ဘၣ် တၢ်အီၣ်တၢ်အီလၢ ပှၤနီၤလီၤဝဲလၢ တနံၤဘၣ်တနံၤအဂီၢ်ဘၣ်.” (မၤတၢ် ၆:၁) မ့မ့ၢ်မုၣ်ကမဲလၢ အတဲဧ့ၤဘြံၤကျိာ်န့ၣ် အန့ၢ်ဘၣ် တၢ်အီၣ်တၢ်အီ. ပထံၣ်ဘၣ်လၢ တၢ်ကွၢ်ဒိၣ်ဆံးလိာ်သး အိၣ်ထီၣ်ဖဲန့ၣ်အဃိ လၢတၢ်အိၣ်ဖှိၣ်ပူၤန့ၣ် တၢ်တဃူတဖိး ဒီးတၢ်လီၤဖး အိၣ်ထီၣ်ဝဲသ့ညီညီဖိ.
၁၈ တၢ်မၢဖိတဖၣ်လၢ အမ့ၢ် ပှၤပၢဆှၢတၢ်ကမံးတံာ်န့ၣ် အဝဲသ့ၣ် တၢ်မၤအါလၢ တၢ်အိၣ်ဖှိၣ်ကဒိၣ်ထီၣ်ထီထီၣ်အဂီၢ်. အဃိ အဝဲသ့ၣ်တဲဝဲလၢ ပက “ပာ်ပတုာ် တၢ်သိၣ်လိကစၢ်ယွၤ အကလုၢ်ကထါ ဒ်သိး ပကလဲၤနီၤလီၤက့ၤ တၢ်အီၣ်တၢ်အီ” န့ၣ်တကြၢးတဘၣ်ဘၣ်. (မၤတၢ် ၆:၂) တၢ်ဂ့ၢ်ကီအံၤ ကဘၣ်ဂီၢ်ထီၣ်က့ၤအဂီၢ် တၢ်မၢဖိတဖၣ်မၢ ပှၤဃုထၢထီၣ် ပိာ်ခွါနွံဂၤ “လၢအအိၣ်ဒီး သးစီဆှံဒီးတၢ်ကူၣ်သ့ လၢလၢပှဲၤပှဲၤ” ဒ်သိးက “ကွၢ်ထွဲ တၢ်မၤအံၤအဂီၢ်.” (မၤတၢ် ၆:၃) အဝဲသ့ၣ် လိၣ်ဘၣ် ပိာ်ခွါလၢ အတုၤထီၣ်ထီၣ်ဘး ခီဖျိလၢ တၢ်မၤအံၤ ကပၣ်ဃုာ်ဒီး တၢ်ဟ့ၣ်လီၤတၢ်အီၣ်တၢ်အီ, တၢ်ကွၢ်ထွဲစ့, တၢ်ပှ့ၤတၢ်ဖိတၢ်လံၤ ဒီးကဘၣ်ကွဲးနီၣ်ဃာ် တၢ်လၢအဝဲသ့ၣ်မၤဝဲခဲလၢာ်. ပိာ်ခွါလၢ ဒီပုၢ်ဝဲၢ်ဃုထၢထီၣ်ဝဲတဖၣ်န့ၣ် အမံၤအိၣ်လၢ ကြံးကျိာ်ခဲလၢာ်အဃိ ညီလၢ မုၣ်ကမဲလၢ ပှၤကွၢ်ဆံးအဝဲသ့ၣ်န့ၣ် ကနာ်န့ၢ်ပိာ်ခွါတဖၣ်အံၤ. တၢ်မၢဖိတဖၣ် ဆိမိၣ်ထံ ပိာ်ခွါတဖၣ်အံၤအဂ့ၢ် ဒီးဃ့ထုကဖၣ်ဝံၤအလီၢ်ခံ အဝဲသ့ၣ် ပာ်ထီၣ် ပိာ်ခွါနွံဂၤလၢက “ကွၢ်ထွဲ တၢ်မၤအံၤအဂီၢ်.” e
၁၉ ပိာ်ခွါနွံဂၤလၢ အန့ၢ်ဘၣ်မူဒါလၢ ကဘၣ်နီၤလီၤတၢ်အီၣ်တဖၣ်န့ၣ် မ့ၢ်အဝဲသ့ၣ်တအိၣ်ဒီး မူဒါလၢ ကဘၣ်စံၣ်တဲၤတဲလီၤတၢ်လၢၤဘၣ်ဧါ. တမ့ၢ်ဒ်န့ၣ်ဘၣ်. စီၤစတ့းဖၣ်န့ၣ် အပၣ်ဃုာ်လၢ ပိာ်ခွါနွံဂၤအံၤအကျါ ဒီးအကဲပှၤလၢအသးဆူၣ် ဒီးသးဒူလၢ ကစံၣ်တဲၤတဲလီၤ တၢ်သးခုကစီၣ်. (မၤတၢ် ၆:၈-၁၀) စီၤဖံလံးပူးစ့ၢ်ကီး အပၣ်ဃုာ်လၢ ပိာ်ခွါနွံဂၤအံၤအကျါ ဒီးလံာ်စီဆှံ ကိးအီၤလၢ “ပှၤစံၣ်တဲၤတဲလီၤ တၢ်သးခုကစီၣ်တဂၤ.” (မၤတၢ် ၂၁:၈) အဃိ ပထံၣ်ဘၣ်လၢ ပိာ်ခွါနွံဂၤအံၤ အကဲပှၤစံၣ်တဲၤတဲလီၤတၢ်ဖိလၢ အသးဆူၣ်နီၢ်ကီၢ်.
၂၀. ဆၢကတီၢ်ခဲအံၤ ယဟိဝၤယွၤအပှၤဂီၢ်မုၢ်တဖၣ် မၤထွဲ ဒ်တၢ်မၢဖိတဖၣ် မၤဝဲအသိး ဒ်လဲၣ်.
၂၀ ဆၢကတီၢ်ခဲအံၤ ယဟိဝၤယွၤအပှၤဂီၢ်မုၢ်တဖၣ် မၤထွဲ ဒ်တၢ်မၢဖိတဖၣ် မၤဝဲအသိး. ဒီပုၢ်ဝဲၢ်ခွါလၢ အန့ၢ်ဘၣ်မူဒါလၢ တၢ်အိၣ်ဖှိၣ်အပူၤန့ၣ် အဝဲသ့ၣ်ကဘၣ်အိၣ်ဒီး တၢ်ထံၣ်ဒ်ယဟိဝၤယွၤအသိး ဒီးအဝဲသ့ၣ် ကဘၣ်ပာ်ဖျါထီၣ် ခရံာ်ဖိအတၢ်ဂ့ၤတၢ်ဝါ လၢအတၢ်အိၣ်မူပူၤ. လၢပှၤပၢဆှၢတၢ်ကမံးတံာ် အတၢ်ဟံးစုနဲၣ်ကျဲအဖီလာ် ဒီပုၢ်ဝဲၢ်ခွါလၢ အမၤထွဲ လံာ်စီဆှံ အတၢ်ဟံးစုနဲၣ်ကျဲ ဒီးအတုၤထီၣ်ထီၣ်ဘးတဖၣ်န့ၣ် ပှၤပာ်ထီၣ် အဝဲသ့ၣ်လၢ ကကဲထီၣ်တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်အပှၤမၤစၢၤတၢ် လၢတၢ်အိၣ်ဖှိၣ်အပူၤ. f (၁ တံၤ ၃:၁-၉, ၁၂, ၁၃) ဒီပုၢ်ဝဲၢ်ခွါလၢ အတုၤထီၣ်ထီၣ်ဘးတဖၣ်အံၤ အဝဲသ့ၣ်မၤထွဲ တၢ်ကွဲးအသးလၢ လံာ်စီဆှံအပူၤအဃိ ပတဲလၢ သးစီဆှံဃုထၢထီၣ်အဝဲသ့ၣ်သ့. အဝဲသ့ၣ် မၤတၢ်ဆူၣ်ဆူၣ်လၢတၢ်အိၣ်ဖှိၣ်အဂီၢ်. အဒိ တၢ်အိၣ်ဖှိၣ်သးပှၢ်တဖၣ် ရဲၣ်ကျဲၤဝဲ ဒ်သိးကမၤစၢၤ ဒီပုၢ်ဝဲၢ်သးပှၢ် လၢအလိၣ်ဘၣ် တၢ်မၤစၢၤတဖၣ်. (ယၤ ၁:၂၇) တၢ်အိၣ်ဖှိၣ်သးပှၢ်တနီၤန့ၣ် အဝဲသ့ၣ်မၤစၢၤတၢ်လၢ ကတ့ထီၣ် ဘီမုၢ်ဘျီၣ်ဒိၣ်, ရဲၣ်ကျဲၤတၢ်လၢ တၢ်အိၣ်ဖှိၣ်ဖးဒိၣ်, မ့တမ့ၢ် မၤစၢၤတၢ်လၢ ကမံးတံာ်လၢ အဆဲးကျိးဒီး တၢ်ဆါဟံၣ်. ဒီးဖဲတၢ်အိၣ်ဖှိၣ်သးပှၢ်တဖၣ် တီခိၣ်ရိၤမဲတၢ်လၢ တၢ်လဲၤဟးအိၣ်သကိး ဒီပုၢ်ဝဲၢ်မုၣ်ခွါ ဒီးသိၣ်လိတၢ်အခါ တၢ်အိၣ်ဖှိၣ်အပှၤမၤစၢၤတၢ်တဖၣ် မၤစၢၤတၢ်လၢ တၢ်အိၣ်ဖှိၣ်အပူၤအါမး. တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ်တဖၣ်အံၤ အဝဲသ့ၣ်အိၣ်ဒီး မူဒါလၢ တၢ်အိၣ်ဖှိၣ်အပူၤ ဒီးတၢ်ကရၢကရိပူၤနာ်က့ အဝဲသ့ၣ်ကဘၣ် ဆဲးစံၣ်တဲၤတဲလီၤ ဘီမုၢ်တၢ်သးခုကစီၣ်စ့ၢ်ကီး.—၁ ကရံၣ် ၉:၁၆.
“ကစၢ်ယွၤ အကလုၢ်ကထါ ဆဲးရၤလီၤအသး” (မၤတၢ် ၆:၇)
၂၁, ၂၂. ယဟိဝၤယွၤ ဆိၣ်ဂ့ၤတၢ်အိၣ်ဖှိၣ်အသီတဖျၢၣ်အံၤ ဒ်လဲၣ်.
၂၁ ခရံာ်ဖိတၢ်အိၣ်ဖှိၣ်အသီတဖျၢၣ်အံၤ ထံၣ်ဘၣ်ဒီး ပှၤထီဒါတၢ် အတၢ်မၤအၢမၤနး တကးဒံးဘၣ် တၢ်ကွၢ်ဒိၣ်ဆံးလိာ်သး အိၣ်ထီၣ်လၢတၢ်အိၣ်ဖှိၣ်ပူၤနာ်က့ ခီဖျိလၢ ယဟိဝၤယွၤ အတၢ်မၤစၢၤအဃိ အဝဲသ့ၣ်ထူၣ်ဖျဲးထီၣ်လၢ တၢ်လီၤဘၣ်ယိၣ်တဖၣ်အံၤ. ပထံၣ်ဘၣ်လၢ ယဟိဝၤယွၤ ဆိၣ်ဂ့ၤအဝဲသ့ၣ် ခီဖျိလၢ “ကစၢ်ယွၤ အကလုၢ်ကထါ ဆဲးရၤလီၤအသး ဒီးယ့ၣ်ၡူး အပျဲၢ်အဘီၣ်တဖၣ် ဆဲးအါထီၣ်ဝဲလၢ ဝ့ၢ်ယရူၤၡလ့ၣ်အပူၤ ဒီဒူၣ်လီၤ. ဒီးပှၤလုၢ်တၢ်ဒိၣ် အါဂၤန့ၣ် ကဲထီၣ်ဝဲပှၤလၢ အစူၢ်က့ၤနာ်က့ၤတၢ်.” (မၤတၢ် ၆:၇) လၢလံာ်မၤတၢ်အပူၤန့ၣ် ပထံၣ်ဘၣ်လၢ ယဟိဝၤယွၤ ဆိၣ်ဂ့ၤတၢ်အိၣ်ဖှိၣ် အတၢ်ဒိၣ်ထီၣ်ထီထီၣ် ဒ်န့ၣ်အိၣ်ဝဲအါမး. (မၤတၢ် ၉:၃၁; ၁၂:၂၄; ၁၆:၅; ၁၉:၂၀; ၂၈:၃၁) ဆၢကတီၢ်ခဲအံၤစ့ၢ်ကီး လၢဟီၣ်ခိၣ်ဒီဘ့ၣ်န့ၣ် ပနၢ်ဟူဘၣ် တၢ်စံၣ်တဲၤတဲလီၤတၢ်မၤ လဲၤထီၣ်လဲၤထီအဃိ ပသးခုဖးဒိၣ်.
၂၂ ဖဲတၢ်မၢဖိအစိၤ တၢ်ဘူၣ်တၢ်ဘါခိၣ်နၢ်လၢ အသးပှံၢ်ထီၣ်တၢ်တဖၣ်န့ၣ် အဝဲသ့ၣ် ဆဲးမၤအၢမၤနးတၢ်ဒံး. ဒီးတယံာ်လၢၤဘၣ်န့ၣ် တၢ်မၤအၢမၤနး ကအိၣ်အါထီၣ်စ့ၢ်ကီး. တၢ်မၤလိလၢခံတခါန့ၣ် ပကထံၣ်ဘၣ်လၢ စီၤစတ့းဖၣ် ထံၣ်ဘၣ်ဒီး တၢ်မၤအၢမၤနးအံၤဒ်လဲၣ်.
a ကွၢ်တၢ်လွံၢ်နၢၣ် လၢအမ့ၢ် “ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်”
b ဘၣ်ဃးဒီး မူခိၣ်ကလူးအဂ့ၢ်န့ၣ် လံာ်မၤတၢ် ပာ်ဖျါထီၣ်ဝဲ အိၣ်လၢအဘျီ ၂၀ ညါ. ဒီးတၢ်ဂ့ၢ်အံၤ မ့ၢ်ဝဲ အဆိကတၢၢ်တဘျီလၢ လံာ်မၤတၢ်ပာ်ဖျါထီၣ် မူခိၣ်ကလူးအဂ့ၢ်. အဒိ မၤတၢ် ၁:၁၀ ပာ်ဖျါထီၣ်ဝဲ “ပှၤခံဂၤလၢ အသိးဆ့ကၤဝါ” န့ၣ်အကဲစ့ၢ်ကီး မူခိၣ်ကလူး.
c ကွၢ်တၢ်လွံၢ်နၢၣ် လၢအမ့ၢ် “ စီၤကမၤလ့လးန့ၣ် တၢ်ဘူၣ်တၢ်ဘါခိၣ်နၢ်တဖၣ် ပာ်ကဲအီၤ”
d ကွၢ်တၢ်လွံၢ်နၢၣ် လၢအမ့ၢ် “ စံၣ်တဲၤတဲလီၤတၢ် ‘လၢတဟံၣ်ဘၣ်တဟံၣ်’”
e ပိာ်ခွါတဖၣ်လၢ ကဘၣ် “ကွၢ်ထွဲ တၢ်မၤအံၤ” ဘၣ်သ့ၣ်သ့ၣ် အကဘၣ်အိၣ်ဒီးတၢ်ဂ့ၤတၢ်ဝါ ဒ်သိးဒီး တၢ်အိၣ်ဖှိၣ်သးပှၢ်တဖၣ် ခီဖျိလၢ မူဒါလၢအဝဲသ့ၣ် န့ၢ်ဘၣ်ဝဲန့ၣ် အကဲမူဒါဖးဒိၣ်အဃိ. သနာ်က့ လၢခရံာ်ဖိတၢ်အိၣ်ဖှိၣ်ပူၤန့ၣ် ပှၤဃုထၢထီၣ် တၢ်အိၣ်ဖှိၣ်သးပှၢ်တဖၣ် မ့တမ့ၢ် ပှၤကွၢ်ထွဲတၢ်တဖၣ်လၢ အခါဖဲလဲၣ်န့ၣ် လံာ်စီဆှံတပာ်ဖျါထီၣ် လီၤတံၢ်လီၤဆဲးဘၣ်.
f လၢတၢ်မၢဖိအစိၤန့ၣ် ပိာ်ခွါလၢအတုၤထီၣ်ထီၣ်ဘးတဖၣ် အိၣ်ဒီးတၢ်ခွဲးတၢ်ယာ်လၢ ကပာ်ထီၣ်တၢ်အိၣ်ဖှိၣ်သးပှၢ်. (မၤတၢ် ၁၄:၂၃; ၁ တံၤ ၅:၂၂; တံတူး ၁:၅) ဆၢကတီၢ်ခဲအံၤ ပှၤပၢဆှၢတၢ်ကမံးတံာ် ပာ်ထီၣ်ကဝီၤအပှၤကွၢ်တၢ်. ဒီးမ့မ့ၢ်လၢကဝီၤအပှၤကွၢ်တၢ်န့ၣ် ပာ်ထီၣ်တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ်တဖၣ်.
