တၢ်မၤလိ ၂
“သုကကဲထီၣ် ယပှၤအုၣ်အသးတဖၣ်”
ယ့ၣ်ၡူး ကတဲာ်ကတီၤဆိပာ်စၢၤ အတၢ်မၢဖိလၢ ကတီခိၣ်ရိၤမဲ တၢ်စံၣ်တဲၤတဲလီၤတၢ်မၤ
တၢ်ဂ့ၢ်ဒိးသန့ၤထီၣ်သးလၢ မၤတၢ် ၁:၁-၂၆
၁-၃. ယ့ၣ်ၡူး က့ၤထီၣ်လၢမူခိၣ်ဒ်လဲၣ် ဒီးတၢ်သံကွၢ်အိၣ်ထီၣ်ဒ်လဲၣ်.
ဖဲယ့ၣ်ၡူးသံအခါ အတၢ်မၢဖိတဖၣ် သးအုးဒိၣ်မး. ဘၣ်ဆၣ် ဖဲယ့ၣ်ၡူးသမူထီၣ်က့ၤအခါ အတၢ်မၢဖိတဖၣ် သးခုညါ. စးထီၣ်လၢ ယ့ၣ်ၡူးဂဲၤဆၢထၢၣ်သမူထီၣ်က့ၤန့ၣ် ယ့ၣ်ၡူးလီၣ်ဖျါထီၣ်အသးလၢ အဝဲသ့ၣ်အမဲာ်ညါ တဘျုးဘျီညါ ဒီးယ့ၣ်ၡူးသိၣ်လိ ဒီးဟ့ၣ်ဂံၢ်ဟ့ၣ်ဘါအဝဲသ့ၣ်. တၢ်မၢဖိတဖၣ်အံၤ အိၣ်ဒီးယ့ၣ်ၡူးမုာ်မး ဒီးအဝဲသ့ၣ် တဘၣ်သးလၢ ယ့ၣ်ၡူးက့ၤသဒၣ်အဝဲသ့ၣ်လၢ မူခိၣ်ဘၣ်. ဘၣ်ဆၣ် ယ့ၣ်ၡူးအိၣ်ဒီးအဝဲသ့ၣ် အိၣ်ဝဲအသီ ၄၀ လံအဃိ ယ့ၣ်ၡူး လီၣ်ဖျါထီၣ်အသးလၢ အဝဲသ့ၣ်အမဲာ်ညါ လၢခံကတၢၢ်တဘျီ ဝံၤဒီးယ့ၣ်ၡူး က့ၤထီၣ်လၢမူခိၣ်.
၂ ဖဲတၢ်မၢဖိတဖၣ် အိၣ်ဒီးယ့ၣ်ၡူးလၢ ကစၢၢ်သ့ၣ်စၤယံးအလိၤအခါ တၢ်လၢယ့ၣ်ၡူးတဲအဝဲသ့ၣ်န့ၣ် အဝဲသ့ၣ်ကနၣ်ဝဲထံထံ. တၢ်မၢဖိတဖၣ်အံၤ ဘၣ်သးလၢ ယ့ၣ်ၡူး ကသိၣ်လိအဝဲသ့ၣ်ဒံး ဘၣ်ဆၣ် ယ့ၣ်ၡူး တဲတၢ်ဝံၤဘျီ ယ့ၣ်ၡူး ယူာ်ထီၣ်အစု ဒီးဆိၣ်ဂ့ၤအဝဲသ့ၣ်. ဝံၤဒီးယ့ၣ်ၡူးန့ၣ် အဘၣ်တၢ်ဟံးထီၣ်အီၤလၢမူခိၣ်. ဖဲယ့ၣ်ၡူး က့ၤထီၣ်လၢမူခိၣ်အခါ အတၢ်မၢဖိတဖၣ် ဆဲးကွၢ်ထီၣ်တၢ်လၢမူခိၣ် ဘၣ်ဆၣ် တၢ်အၢၣ်တလိၣ် မၤဘၢယ့ၣ်ၡူးအဃိ အဝဲသ့ၣ်တထံၣ် ယ့ၣ်ၡူးလၢၤဘၣ်. ယ့ၣ်ၡူး လီၤမၢ်လံနာ်က့ အဝဲသ့ၣ် ဆဲးကွၢ်ထီၣ်တၢ်လၢမူခိၣ်ဒံး.—လူၤကၣ် ၂၄:၅၀; မၤတၢ် ၁:၉, ၁၀.
၃ တၢ်ကဲထီၣ်သးတဘျီအံၤ အကဲဝဲ တၢ်ဆီတလဲဖးဒိၣ်တခါလၢ တၢ်မၢဖိတဖၣ်အဂီၢ်. အဝဲသ့ၣ် အကစၢ်ယ့ၣ်ၡူးခရံာ် က့ၤထီၣ်လၢမူခိၣ်လံအဃိ ခဲအံၤအဝဲသ့ၣ် ကမၤဝဲဒ်လဲၣ်. ပသ့ၣ်ညါလၢ ယ့ၣ်ၡူး ကတဲာ်ကတီၤဆိပာ်စၢၤ အဝဲသ့ၣ်လၢ ကမၤဝံၤက့ၤ တၢ်မၤလၢယ့ၣ်ၡူးစးထီၣ်မၤဝဲ. ယ့ၣ်ၡူး ကတဲာ်ကတီၤပာ်စၢၤ အတၢ်မၢဖိတဖၣ်လၢ ကဟံထီၣ်ဖီၣ်ထီၣ်မူဒါဒ်လဲၣ် ဒီးအဝဲသ့ၣ် မၤထွဲဝဲဒ်လဲၣ်. ဒီးပဝဲခရံာ်ဖိ လၢဆၢကတီၢ်ခဲအံၤန့ၣ် ပန့ၢ်ဘၣ်တၢ်မၤလိဒ်လဲၣ်. ပကသ့ၣ်ညါဘၣ် တၢ်စံးဆၢလၢ လံာ်မၤတၢ် အဆၢဒိၣ်တၢအပူၤ.
“အဝဲလီၣ်ဖျါထီၣ်အသး . . . လီၤတံၢ်လီၤဆဲးလၢ အမူဝဲ” (မၤတၢ် ၁:၁-၅)
၄. လၢလံာ်မၤတၢ်န့ၣ် စီၤလူၤကၣ် စးထီၣ်အတၢ်ကွဲးဒ်လဲၣ်.
၄ ဖဲစီၤလူၤကၣ် ကွဲးလံာ်မၤတၢ်အခါ အစးထီၣ်အတၢ်ကွဲး ဒ်သိးဒီးအတဲသကိးတၢ်ဒီး စီၤသီးဖံၤလူးလၢ အကဲပှၤတဂၤဃီလၢ စီၤလူၤကၣ်ကွဲးန့ၢ်အီၤလံာ်လၢ လံာ်လူၤကၣ်အပူၤ. a လၢလံာ်မၤတၢ်အပူၤန့ၣ် စီၤလူၤကၣ်တဲဖျါထီၣ်က့ၤ တၢ်ဂ့ၢ်အလီၢ်ခံကတၢၢ်တနီၤ လၢအအိၣ်လၢ လံာ်လူၤကၣ်အပူၤ. ဒီးဖဲန့ၣ် အသူဝဲ တၢ်ကတိၤလီၤဆီလိာ်သး ဒီးအကွဲးအါထီၣ် တၢ်ဂ့ၢ်တၢ်ကျိၤတနီၤ လီၤတံၢ်လီၤဆဲး အဃိ ပသ့ၣ်ညါဘၣ်လၢ လံာ်မၤတၢ်န့ၣ် အဆဲးလိာ်သးဒီး လံာ်လူၤကၣ်.
၅, ၆. (က) ယ့ၣ်ၡူးအပျဲၢ်အဘီၣ်တဖၣ် အတၢ်နာ် ကဂၢၢ်ကျၢၤဒိၣ်ထီၣ်အဂီၢ် တၢ်မနုၤမၤစၢၤ အဝဲသ့ၣ်လဲၣ်. (ခ) ခရံာ်ဖိလၢဆၢကတီၢ်ခဲအံၤ အတၢ်နာ်န့ၣ် သန့ၤထီၣ်အသးလၢ တၢ်အုၣ်သး “လီၤတံၢ်လီၤဆဲး” အဖီခိၣ်ဒ်လဲၣ်.
၅ ယ့ၣ်ၡူးအပျဲၢ်အဘီၣ်တဖၣ် အတၢ်နာ် ကဂၢၢ်ကျၢၤထီၣ်အဂီၢ် တၢ်မနုၤမၤစၢၤအဝဲသ့ၣ်လဲၣ်. ဖဲ မၤတၢ် ၁:၃ န့ၣ်ပဖးဘၣ်လၢ ယ့ၣ်ၡူးန့ၣ် “အဝဲလီၣ်ဖျါထီၣ်အသးလၢ အတၢ်မၢဖိတဖၣ် အမဲာ်ညါအါဘျီ ဒ်သိးအကပာ်ဖျါထီၣ်ဝဲ လီၤတံၢ်လီၤဆဲးလၢ အဝဲမူဝဲ.” စီၤလူၤကၣ် လၢအမ့ၢ်ပှၤ “လၢအဘၣ်တၢ်အဲၣ်အီၤ” တဂၤန့ၣ် လၢလံာ်စီဆှံအပူၤ အမ့ၢ်ပှၤထဲတဂၤလၢ အသူဝဲတၢ်ကတိၤ လၢအမ့ၢ် “ပာ်ဖျါထီၣ်ဝဲ လီၤတံၢ်လီၤဆဲး.” (ကလီး ၄:၁၄) တၢ်ကတိၤအံၤန့ၣ် ပှၤသူအီၤလၢ တၢ်ကွဲးနီၣ်ကွဲးဃါလၢ ကသံၣ်ကသီတပၤ ဒီးပှၤသူဝဲဖဲ ပှၤပာ်ဖျါထီၣ် တၢ်အုၣ်သးလၢအအိၣ် လီၤတံၢ်လီၤဆဲး ဒီးပှၤနာ်အီၣ်သ့. ယ့ၣ်ၡူးနာ်က့ ပာ်ဖျါထီၣ်ဝဲ တၢ်အုၣ်သးလီၤတံၢ်လီၤဆဲးလၢ အမူဝဲ. အဒိ ယ့ၣ်ၡူးလီၣ်ဖျါထီၣ်အသးလၢ အပျဲၢ်အဘီၣ်တဖၣ် အမဲာ်ညါ အါဘျီ. တဘျီတခီၣ်န့ၣ် အဝဲလီၣ်ဖျါထီၣ်အသးလၢ အပျဲၢ်အဘီၣ် တဂၤခံဂၤ အမဲာ်ညါ, တဘျီတခီၣ် လၢတၢ်မၢဖိခဲလၢာ် အမဲာ်ညါ ဒီးဘၣ်တဘျီန့ၣ် အဝဲလီၣ်ဖျါထီၣ်အသးလၢ ခရံာ်ဖိ ၅၀၀ ဘျဲၣ်အမဲာ်ညါ. (၁ ကရံၣ် ၁၅:၃-၆) ယ့ၣ်ၡူးလီၣ်ဖျါထီၣ်အသးအံၤ အကဲဝဲ တၢ်အုၣ်သးလီၤတံၢ်လီၤဆဲးလၢ အမူဝဲ.
၆ ခရံာ်ဖိအမ့ၢ်အတီ လၢဆၢကတီၢ်ခဲအံၤစ့ၢ်ကီး အဝဲသ့ၣ်အတၢ်နာ်န့ၣ် သန့ၤထီၣ်အသးလၢ တၢ်အုၣ်သးလၢအ “လီၤတံၢ်လီၤဆဲး” အါမးအဖီခိၣ်. အဒိ ယ့ၣ်ၡူးအိၣ်မူလၢ ဟီၣ်ခိၣ်ချၢ, အတူၢ်သံသးလၢ ပတၢ်ဒဲးဘးအဃိ ဒီးအဂဲၤဆၢထၢၣ်သမူထီၣ်က့ၤန့ၣ် တၢ်အုၣ်သးအိၣ်ဝဲအါမး. ပှၤလၢအထံၣ်ဘၣ် တၢ်ကဲထီၣ်သးဒီးယ့ၣ်ၡူး ဒ်အံၤန့ၣ် လံာ်စီဆှံပာ်ဖျါထီၣ်န့ၢ်ပှၤ တၢ်အုၣ်သးအါမး. အဃိ ပမ့ၢ်ဃ့ထုကဖၣ်, ဃုသ့ၣ်ညါတၢ်ဂ့ၢ်တဖၣ်အံၤ ဒီးပမ့ၢ်ထံၣ် တၢ်အုၣ်သးလီၤတံၢ်လီၤဆဲးန့ၣ် ပတၢ်နာ် ကဂၢၢ်ကျၢၤဒိၣ်ထီၣ်. ဒီးတၢ်နာ်အမ့ၢ်အတီန့ၣ် ကမၤစၢၤပှၤဒ်သိး ပကန့ၢ်ဘၣ် တၢ်မူအထူအယိာ်.—ယိၤဟၣ် ၃:၁၆.
၇. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အသိၣ်လိ ဒီးအစံၣ်တဲၤတဲလီၤ တၢ်ဂ့ၢ်မနုၤလဲၣ်.
၇ ယ့ၣ်ၡူး “စံၣ်တဲၤတဲလီၤ ယွၤအဘီအမုၢ်” အဂ့ၢ်စ့ၢ်ကီး. အဒိ ယ့ၣ်ၡူးၡဲပၠး ဝံအတၢ်စံးပာ် လၢအပာ်ဖျါထီၣ်ဝဲ မ့းၡံအၤ ကဘၣ်တူၢ်တၢ်နးတၢ်ဖှီၣ် ဒီးအကဘၣ်သံ. (လူၤကၣ် ၂၄:၁၃-၃၂, ၄၆, ၄၇) ယ့ၣ်ၡူး ပာ်ဖျါထီၣ်လၢ အမ့ၢ်မ့းၡံအၤ ဒီးကစၢ်ယွၤဃုထၢအီၤလၢ အကကဲ ကစၢ်ယွၤအဘီအမုၢ် အစီၤပၤ. အဃိ ဖဲအအိၣ်လၢ ဟီၣ်ခိၣ်ချၢအခါ တၢ်ဂ့ၢ်အရ့ဒိၣ်လၢ အစံၣ်တဲၤတဲလီၤဝဲထီဘိန့ၣ် အကဲဝဲ ကစၢ်ယွၤအဘီအမုၢ်အဂ့ၢ်. ဒီးဆၢကတီၢ်ခဲအံၤ ယ့ၣ်ၡူးအပျဲၢ်အဘီၣ်စ့ၢ်ကီး စံၣ်တဲၤတဲလီၤဝဲ တၢ်ဂ့ၢ်အရ့ဒိၣ်တခါအံၤ.—မး ၂၄:၁၄; လူၤကၣ် ၄:၄၃.
“ပၢၢ်တုၤလၢ ဟီၣ်ခိၣ်ဒီဘ့ၣ်” (မၤတၢ် ၁:၆-၁၂)
၈, ၉. (က) ယ့ၣ်ၡူး အတၢ်မၢဖိတဖၣ် အတၢ်ထံၣ်ကမၣ်ခံခါန့ၣ် မ့ၢ်မနုၤလဲၣ်. (ခ) ယ့ၣ်ၡူး ဘှီဘၣ်ထီၣ် အဝဲသ့ၣ်တၢ်ထံၣ်ဒ်လဲၣ် ဒီးပန့ၢ်ဘၣ်တၢ်မၤလိဒ်လဲၣ်.
၈ ဖဲတၢ်မၢဖိတဖၣ် အိၣ်လၢကစၢၢ်သ့ၣ်စၤယံးလိၤအခါ အဝဲသ့ၣ် ထံၣ်ဖှိၣ်လိာ်သးဒီးယ့ၣ်ၡူး လၢအလီၢ်ခံကတၢၢ်တဘျီ. အဃိ အဝဲသ့ၣ် သံကွၢ်ယ့ၣ်ၡူးလၢ “ကစၢ်ဧၢ, နကသူၣ်ထီၣ်က့ၤ ဘီမုၢ်လၢ အံၣ်စရ့လးအပူၤ လၢဆၢကတီၢ်ခဲအံၤဧါ.” (မၤတၢ် ၁:၆) တၢ်မၢဖိတဖၣ် သံကွၢ်ယ့ၣ်ၡူး ဒ်အံၤအဃိ အဝဲသ့ၣ်ပာ်ဖျါထီၣ်လၢ အအိၣ်ဒီး တၢ်ထံၣ်လၢအကမၣ်ခံခါ. တၢ, အဝဲသ့ၣ် ဆိမိၣ်ဝဲလၢ ကစၢ်ယွၤအဘီမုၢ် ကပၢတၢ်လၢဟီၣ်ခိၣ် လၢအံၣ်စရ့လးအပူၤ. ခံ, အဝဲသ့ၣ် ဆိမိၣ်ဝဲလၢ ဖဲအဝဲသ့ၣ်အစိၤန့ၣ် ကစၢ်ယွၤအဘီမုၢ် ကစးထီၣ်ပၢတၢ် “လၢဆၢကတီၢ်” ဖဲန့ၣ်တဘျီဃီ. အဃိ ယ့ၣ်ၡူးဘှီဘၣ်ထီၣ် အဝဲသ့ၣ်တၢ်ထံၣ်ဒ်လဲၣ်.
၉ ယ့ၣ်ၡူးသ့ၣ်ညါဝဲလၢ လၢခံအသီတဆံန့ၣ် တၢ်မၢဖိတဖၣ် အတၢ်ထံၣ်လၢအကမၣ် တၢတခါန့ၣ် ကဘၣ်ထီၣ်က့ၤဝဲ, မ့ၢ်လၢ ယဟိဝၤယွၤ ဃုထၢထီၣ်ဝဲ အံၣ်စရ့လး လၢနီၢ်သးတခီ ဒ်အပှၤဂီၢ်မုၢ်အသိး. အဃိ ပှၤအံၣ်စရ့လးဖိ အကလုာ်ဒူၣ်န့ၣ် တကဲဘၣ် ကစၢ်ယွၤအပှၤဂီၢ်မုၢ် လီၤလီၤဆီဆီတဒူၣ်လၢၤဘၣ်. မ့မ့ၢ် အဝဲသ့ၣ် တၢ်ထံၣ်လၢအကမၣ် ခံခါတခါန့ၣ် ယ့ၣ်ၡူး တဲဘၣ်အဝဲသ့ၣ်လၢ “ပှၤလၢအအိၣ်ဒီးတၢ်ခွဲးတၢ်ယာ်လၢ ကပာ်ပနီၣ်ဝဲ တၢ်ဆၢကတီၢ် ဒီးမုၢ်နံၤမုၢ်သီတဖၣ်န့ၣ် မ့ၢ်ဝဲထဲပၢ်တဂၤလီၤ. ဒီးတလိၣ်လၢ သုကသ့ၣ်ညါဘၣ်.” (မၤတၢ် ၁:၇) ယဟိဝၤယွၤန့ၣ် အကဲပှၤထဲတဂၤလၢ အအိၣ်ဒီးတၢ်ခွဲးတၢ်ယာ်လၢ ကပာ်ပနီၣ်ဝဲ တၢ်ဆၢကတီၢ် ဒီးမၤလၢပှဲၤအတၢ်ဘၣ်သး. အဃိ ဘၣ်ဃးဒီး တၢ်အကတၢၢ်ကဟဲ အဆၢကတီၢ်န့ၣ် ယ့ၣ်ၡူးနာ်က့ တဲဝဲလၢ “မုၢ်နံၤအဝဲန့ၣ် ဒီးနၣ်ရံၣ်အဝဲန့ၣ်” အတသ့ၣ်ညါဝဲဘၣ်, ဘၣ်ဆၣ် ပှၤလၢအသ့ၣ်ညါန့ၣ်မ့ၢ် “ထဲဒၣ် ပၢ်တဂၤလီၤ.” (မး ၂၄:၃၆) ခရံာ်ဖိလၢ ဆၢကတီၢ်ခဲအံၤစ့ၢ်ကီး တအိၣ်ဒီးတၢ်ခွဲးတၢ်ယာ်လၢ ကပာ်ပနီၣ်ဝဲ တၢ်အကတၢၢ်ကဟဲ အဆၢကတီၢ်ဖဲလဲၣ်ဘၣ်အဃိ အဝဲသ့ၣ်တလိၣ်သးကိၢ်တၢ်ဘၣ်.
၁၀. ယ့ၣ်ၡူး အတၢ်မၢဖိတဖၣ် အိၣ်ဒီးတၢ်ပာ်သးလၢအဂ့ၤဒ်လဲၣ် ဒီးဘၣ်မနုၤအဃိ ပဘၣ်ကွၢ်လိ အဝဲသ့ၣ်လဲၣ်.
၁၀ ယ့ၣ်ၡူး အတၢ်မၢဖိတဖၣ် အိၣ်ဒီးတၢ်ထံၣ်လၢအကမၣ်နာ်က့ ပတဘၣ် ဆိမိၣ်ဆံးအဝဲသ့ၣ်ဘၣ်. မ့ၢ်လၢအဝဲသ့ၣ်န့ၣ် အိၣ်ဒီးတၢ်နာ် လၢအဂၢၢ်ကျၢၤဒိၣ်မး ဒီးအဝဲသ့ၣ် အိၣ်ဒီးတၢ်ဆီၣ်လီၤသးလၢ ကဘှီဘၣ်ထီၣ်က့ၤ အတၢ်ထံၣ်. တကးဒံးဘၣ် အဝဲသ့ၣ်တၢ်ထံၣ် မ့ၢ်ကမၣ်နာ်က့ အဝဲသ့ၣ် အိၣ်ဒီးတၢ်ပာ်သးလၢအဂ့ၤ. ယ့ၣ်ၡူး ဟ့ၣ်ပလီၢ် အပျဲၢ်အဘီၣ်တဖၣ်လၢ “အိၣ်ပလီၢ်သုသး ထီဘိ.” (မး ၂၄:၄၂; ၂၅:၁၃; ၂၆:၄၁) အဃိ ယ့ၣ်ၡူး အတၢ်မၢဖိတဖၣ်အံၤ အိၣ်ပလီၢ်အသး ဒီးခိးကွၢ်ဝဲတၢ်လၢ ယဟိဝၤယွၤကမၤဝဲတဖၣ်. ပဝဲစ့ၢ်ကီး ပကဘၣ် အိၣ်ဒီးတၢ်ပာ်သး ဒ်သိးဒီးတၢ်မၢဖိတဖၣ်အံၤ. ဒီးခီဖျိလၢ ပအိၣ်မူဘၣ်လၢ “မုၢ်နံၤခံကတၢၢ်” အဃိ ပကဘၣ် အိၣ်ပလီၢ်သး အါန့ၢ်အဝဲသ့ၣ်ဒံး.—၂ တံၤ ၃:၁-၅.
၁၁, ၁၂. (က) ယ့ၣ်ၡူး မၢအတၢ်မၢဖိတဖၣ် မၤမနုၤလဲၣ်. (ခ) ဘၣ်မနုၤအဃိ ယ့ၣ်ၡူး တဲအဝဲသ့ၣ်လၢ အဝဲသ့ၣ် ကန့ၢ်ဘၣ်သးစီဆှံလဲၣ်.
၁၁ ယ့ၣ်ၡူး ဒုးသ့ၣ်နီၣ်ထီၣ် အတၢ်မၢဖိတဖၣ်လၢ အဝဲသ့ၣ် ကဘၣ်သးစၢၢ်ဆၢ တၢ်ဂ့ၢ်လၢအရ့ဒိၣ် မနုၤတမံၤလဲၣ်. ယ့ၣ်ၡူး တဲအဝဲသ့ၣ်လၢ “ဖဲသးစီဆှံဟဲလီၤလၢ သုလိၤအခါ သုကဒိးန့ၢ်ဘၣ် တၢ်စိတၢ်ကမီၤ ဒီးသုကကဲထီၣ် ယပှၤအုၣ်အသးတဖၣ်လၢ ဝ့ၢ်ယရူၤၡလ့ၣ်အပူၤ, လၢယူဒၤ အဟီၣ်ကဝီၤဒီဘ့ၣ်, လၢၡၤမရံအပူၤ ဒီးပၢၢ်တုၤလၢ ဟီၣ်ခိၣ်ဒီဘ့ၣ်.” (မၤတၢ် ၁:၈) အဆိကတၢၢ်န့ၣ် တၢ်မၢဖိတဖၣ် ကဘၣ်စံၣ်တဲၤတဲလီၤ ယ့ၣ်ၡူး အတၢ်ဂဲၤဆၢထၢၣ်သမူထီၣ်က့ၤအဂ့ၢ် လၢဝ့ၢ်ယရူၤၡလ့ၣ် လၢအမ့ၢ်တၢ်လီၢ်လၢ ပှၤမၤသံယ့ၣ်ၡူး. ဝံၤဒီး အဝဲသ့ၣ် ကစံၣ်တဲၤတဲလီၤတၢ်လၢ ယူဒၤအဟီၣ်ကဝီၤဒီဘ့ၣ်, လၢၡၤမရံအပူၤ ဒီးတုၤလၢတၢ်လီၢ်အဂၤအါတီၤ.
၁၂ တချုးလၢ ယ့ၣ်ၡူး မၢအတၢ်မၢဖိတဖၣ် လဲၤစံၣ်တဲၤတဲလီၤတၢ်ဒံးဘၣ်န့ၣ် ယ့ၣ်ၡူး တဲဘၣ်အဝဲသ့ၣ်လၢ အဝဲသ့ၣ်ကန့ၢ်ဘၣ် သးစီဆှံအတၢ်မၤစၢၤ. လၢလံာ်မၤတၢ်အပူၤ တၢ်ကတိၤ လၢအမ့ၢ် “သးစီဆှံ” န့ၣ်အိၣ်ဝဲအဘျီ ၄၀ ဘျဲၣ်ညါ ဒီးဖဲအံၤန့ၣ် ယ့ၣ်ၡူး တဲဖျါထီၣ်ဝဲ အဆိကတၢၢ်တဘျီ. ဒီးလံာ်မၤတၢ် ပာ်ဖျါထီၣ်ဝဲ အဘျီအါမးလၢ ပကမၤ ယဟိဝၤယွၤ အတၢ်မၤအဂီၢ် ပလိၣ်ဘၣ် သးစီဆှံအတၢ်မၤစၢၤ. ခဲအံၤ ပလိၣ်ဘၣ် ယဟိဝၤယွၤ အသးစီဆှံ အါန့ၢ်ဒံးလၢညါအဃိ အရ့ဒိၣ်လၢ ပကဃ့ယဟိဝၤယွၤလၢ အကဟ့ၣ်ပှၤ အသးစီဆှံ ထီဘိ.—လူၤကၣ် ၁၁:၁၃.
၁၃. ယဟိဝၤယွၤ အခ့အပှၤတဖၣ် ဘၣ်စံၣ်တဲၤတဲလီၤတၢ် ပၢၢ်တုၤဖဲလဲၣ် ဒီးဘၣ်မနုၤအဃိ ပဘၣ်စံၣ်တဲၤတဲလီၤတၢ်ဆူၣ်ဆူၣ်လဲၣ်.
၁၃ ဖဲတၢ်မၢဖိတဖၣ်အစိၤန့ၣ် တၢ်မၢဖိတဖၣ် တစံၣ်တဲၤတဲလီၤဘၣ်တၢ် “ပၢၢ်တုၤလၢ ဟီၣ်ခိၣ်ဒီဘ့ၣ်” ဘၣ်. သနာ်က့ ယဟိဝၤပှၤအုၣ်အသးလၢ ဆၢကတီၢ်ခဲအံၤန့ၣ် စံၣ်တဲၤတဲလီၤတၢ်လၢ ဟီၣ်ခိၣ်ဒီဘ့ၣ်. တၢ်မၤလိ လၢအပူၤကွံာ်တခါန့ၣ် ပာ်ဖျါထီၣ်ဝဲလၢ ယဟိဝၤပှၤအုၣ်အသးတဖၣ် သ့ၣ်ညါဝဲလၢ ကစၢ်ယွၤဘၣ်သးလၢ ပှၤကိးကလုာ်ဒဲး ကနၢ်ဟူဘၣ် ဘီမုၢ်တၢ်သးခုကစီၣ်အဃိ အဝဲသ့ၣ် စံၣ်တဲၤတဲလီၤတၢ် လၢတၢ်သးဆူၣ်. (၁ တံၤ ၂:၃, ၄) တၢ်စံၣ်တဲၤတဲလီၤတၢ်မၤအံၤ ကမၤပူၤဖျဲးပှၤသးသမူအဃိ နၤမီၤ နစံၣ်တဲၤတဲလီၤတၢ် ဆူၣ်ဆူၣ်စ့ၢ်ကီးဧါ. တၢ်စံၣ်တဲၤတဲလီၤတၢ်မၤအံၤ ကမၤသးခုနသး အါန့ၢ်တၢ်မၤအဂၤဒံး ဒီးနကမၤ တၢ်မၤတခါအံၤအဂီၢ် ယဟိဝၤယွၤ ကမၤစၢၤနၤ. အဃိ ဒ်သိးနမၤတၢ်မၤတခါအံၤ ကသ့ဂ့ၤဂ့ၤအဂီၢ် နကဘၣ်မၤဒ်လဲၣ် ဒီးနကဘၣ်အိၣ်ဒီး တၢ်ပာ်သးဒ်လဲၣ်န့ၣ် လံာ်မၤတၢ် ကပာ်ဖျါထီၣ်ဝဲ.
၁၄, ၁၅. (က) ဘၣ်ဃးဒီး ယ့ၣ်ၡူး ဟဲက့ၤအဂ့ၢ်န့ၣ် မူခိၣ်ကလူးခံဂၤ အဲၣ်ဒိးတဲဝဲ အခီပညီဒ်လဲၣ်. (ကွၢ်စ့ၢ်ကီး တၢ်ဂ့ၢ်အဘျဲၣ်.) (ခ) ယ့ၣ်ၡူး ကဟဲက့ၤ ‘ဒ်ပှၤထံၣ် အဝဲက့ၤထီၣ်’ အသိးဒ်လဲၣ်.
၁၄ လၢတၢ်မၤလိတခါအံၤ အခီၣ်ထံးန့ၣ် ပထံၣ်ဘၣ်လၢ ယ့ၣ်ၡူးက့ၤထီၣ်လၢမူခိၣ် ဒီးအပျဲၢ်အဘီၣ် တထံၣ်အီၤလၢၤဘၣ်. သနာ်က့ အပျဲၢ်အဘီၣ် ၁၁ ဂၤန့ၣ် ဆဲးကွၢ်ထီၣ်တၢ်လၢ မူခိၣ်. အဃိ မူခိၣ်ကလူးခံဂၤ လီၣ်ဖျါထီၣ်သး လၢအဝဲသ့ၣ်မဲာ်ညါ ဒီးတဲဝဲလၢ “ပှၤကၤလံၤလါဖိ သ့ၣ်ဧၢ, ဘၣ်မနုၤအဃိ သုအိၣ်ဆၢထၢၣ်ဒ်အံၤ ဒီးကွၢ်ထီၣ်တၢ်လၢ မူခိၣ်လဲၣ်. ယ့ၣ်ၡူးလၢ အဘၣ်တၢ်ဟံးထီၣ်အီၤ လၢသုအိၣ် ဆူမူခိၣ်တဂၤအံၤ ကဟဲက့ၤဒ်သုထံၣ် အဝဲက့ၤထီၣ်လၢ မူခိၣ်အသိးလီၤ.” (မၤတၢ် ၁:၁၁) မ့ၢ်မူခိၣ်ကလူး ဘၣ်သးတဲဝဲလၢ ဖဲယ့ၣ်ၡူးဟဲက့ၤအခါ ပှၤကထံၣ်အီၤလၢ အနီၢ်ကစၢ်နီၢ်ကီၢ် ဒ်သိးဒီး တၢ်ဘူၣ်တၢ်ဘါတနီၤ သိၣ်လိဝဲန့ၣ်ဧါ. တမ့ၢ်ဒ်န့ၣ်ဘၣ်. ပသ့ၣ်ညါဘၣ်ဒ်လဲၣ်.
၁၅ မူခိၣ်ကလူး တဲဝဲလၢ ယ့ၣ်ၡူး ကဟဲက့ၤ “ဒ်သုထံၣ် အဝဲက့ၤထီၣ်” အသိး. b အဃိ ယ့ၣ်ၡူး က့ၤထီၣ်လၢမူခိၣ် ဒ်လဲၣ်. ဖဲမူခိၣ်ကလူးခံဂၤ တဲတၢ်ဒီး တၢ်မၢဖိတဖၣ်အခါ ယ့ၣ်ၡူးလီၤမၢ်လံ. ပှၤလၢအထံၣ်ဘၣ် ယ့ၣ်ၡူး က့ၤထီၣ်လၢ အပါအအိၣ်လၢမူခိၣ်န့ၣ် အိၣ်ဒၣ်ထဲပှၤစှၤဂၤ လၢအမ့ၢ် အတၢ်မၢဖိတဖၣ်. ဒီးယ့ၣ်ၡူး ဟဲက့ၤ ဒ်အက့ၤထီၣ်အသိးနီၢ်ကီၢ်လီၤ. ဆၢကတီၢ်ခဲအံၤ ပှၤလၢအနၢ်ပၢၢ်လံာ်စီဆှံတဖၣ် ကွၢ်ဝဲတၢ်ပနီၣ် ဒီးသ့ၣ်ညါဝဲလၢ ခဲအံၤယ့ၣ်ၡူးပၢတၢ်လၢ ကစၢ်ယွၤအဘီမုၢ်လံ. (လူၤကၣ် ၁၇:၂၀) အဃိ ဒ်သိးပကသ့ၣ်ညါလၢ ယ့ၣ်ၡူးပၢတၢ်လံအဂီၢ် ပကဘၣ် ကွၢ်တၢ်အုၣ်သး ဒီးတဲပၠးပှၤဂၤ ဒ်သိးအဝဲသ့ၣ်စ့ၢ်ကီး ကဘူၣ်ထီၣ်ဘါထီၣ် ယဟိဝၤယွၤ ဒီးမၤအတၢ်မၤအဂီၢ်.
“လၢပှၤခံဂၤအံၤအကျါ ဒုးနဲၣ်ပှၤ ပှၤလၢနဃုထၢအီၤတဂၤ” (မၤတၢ် ၁:၁၃-၂၆)
၁၆-၁၈. (က) မၤတၢ် ၁:၁၃, ၁၄ ပာ်ဖျါထီၣ်ဝဲ ခရံာ်ဖိလၢညါတဖၣ် အိၣ်ဖှိၣ်တပူၤဃီအဂ့ၢ်န့ၣ် ပန့ၢ်ဘၣ် တၢ်မၤလိဒ်လဲၣ်. (ခ) လၢယ့ၣ်ၡူးအမိ နီၢ်မၤရံအအိၣ်န့ၣ် ပန့ၢ်ဘၣ်တၢ်မၤလိဒ်လဲၣ်. (ဂ) ဘၣ်မနုၤအဃိ အရ့ဒိၣ်လၢ ခရံာ်ဖိလၢဆၢကတီၢ်ခဲအံၤ ကထီၣ်တၢ်အိၣ်ဖှိၣ် တပူၤဃီလဲၣ်.
၁၆ တၢ်မၢဖိတဖၣ် “က့ၤဝဲလၢ ယရူၤၡလ့ၣ် လၢတၢ်သးခု ဖးဒိၣ်.” (လူၤကၣ် ၂၄:၅၂) ဘၣ်ဆၣ် အဝဲသ့ၣ် ကမၤထွဲ ယ့ၣ်ၡူး အတၢ်ဟံးစုနဲၣ်ကျဲ ဒီးယ့ၣ်ၡူး အတၢ်မၤလိာ်ဒ်လဲၣ်. ဖဲ မၤတၢ် ၁:၁၃, ၁၄ န့ၣ် ပထံၣ်ဘၣ်လၢ အဝဲသ့ၣ် အိၣ်ဖှိၣ်တပူၤဃီလၢ ဒၢးတဖျၢၣ်လၢ “ဟံၣ်ဖီခိၣ်တတီၤ” ဒီးဘၣ်ဃးဒီး တၢ်အိၣ်ဖှိၣ်တခါအံၤ ပသ့ၣ်ညါဘၣ် တၢ်ဂ့ၢ်လၢ အလီၤသူၣ်အိၣ်သးအိၣ်တနီၤ. ဖဲတၢ်မၢဖိအစိၤ လၢကီၢ်ပာ်လဲးစတဲန့ၣ် ဟံၣ်တဖၣ်အိၣ်ဒီးဒၢးလၢ ဟံၣ်ဖီခိၣ်တတီၤ ဒီးနဘၣ်လဲၤထီၣ်ဃီလၢ အအိၣ်လၢဟံၣ်ချၢ. ဘၣ်သ့ၣ်သ့ၣ် ဒၢးတဖျၢၣ်လၢ “ဟံၣ်ဖီခိၣ်တတီၤ” အံၤကဲဝဲ စီၤမၢ်ကူးအမိ အဟံၣ်လၢ မၤတၢ် ၁၂:၁၂ ပာ်ဖျါထီၣ်ဝဲ. ဒ်လဲၣ်ဂ့ၤဒ်လဲၣ်ဂ့ၤ လီၤဂာ်လၢ ခရံာ်အပျဲၢ်အဘီၣ်တဖၣ် အိၣ်ဖှိၣ်ဝဲလၢ တၢ်လီၢ်ယိယိဖိတတီၤ. ဘၣ်ဆၣ် ဖဲတၢ်တနံၤန့ၣ် မတဂၤသ့ၣ်တဖၣ် အိၣ်ဖှိၣ်တပူၤဃီလဲၣ် ဒီးအဝဲသ့ၣ် မၤမနုၤလဲၣ်.
၁၇ ဖဲတၢ်မၢဖိတဖၣ် အိၣ်ဖှိၣ်သကိးတဘျီအံၤန့ၣ် တအိၣ်ထဲ ပှၤပိာ်ခွါဘၣ်. အိၣ်ဒီး “ပိာ်မုၣ်တနီၤ” ဒီးယ့ၣ်ၡူးအမိ နီၢ်မၤရံပၣ်ဃုာ်စ့ၢ်ကီး. ဒီးဖဲန့ၣ် ပထံၣ်ဘၣ်နီၢ်မၤရံအဂ့ၢ် အလီၢ်ခံကတၢၢ်တဘျီလၢ လံာ်စီဆှံပာ်ဖျါထီၣ်ဝဲ. နီၢ်မၤရံ အိၣ်ဖှိၣ်သကိး ဒီးဘူၣ်ထီၣ်ဘါထီၣ် ယဟိဝၤယွၤ ဃုာ်ဒီးဒီပုၢ်ဝဲၢ်မုၣ်ခွါအဂၤအဃိ ပသ့ၣ်ညါဘၣ်လၢ နီၢ်မၤရံ ကဲပှၤလၢအဆီၣ်လီၤသး ဒီးအတဆိမိၣ်လီၤသးလၢ အကဲပှၤလၢအရ့ဒိၣ်ဘၣ်. တကးဒံးဘၣ် ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ နီၢ်မၤရံအဖိခွါ အဂၤလွံၢ်ဂၤန့ၣ် တစူၢ်က့ၤနာ်က့ၤတၢ်ဒံးဘၣ်. မ့မ့ၢ်ခဲအံၤန့ၣ် အဝဲသ့ၣ် ကဲထီၣ်ခရံာ်ဖိ ဒီးအိၣ်ဒီးနီၢ်မၤရံ တပူၤဃီဖဲန့ၣ်အဃိ နီၢ်မၤရံကသးခုဒိၣ်မး. (မး ၁၃:၅၅; ယိၤဟၣ် ၇:၅) စးထီၣ်လၢ ယ့ၣ်ၡူးသံ ဒီးဂဲၤဆၢထၢၣ်သမူထီၣ်က့ၤဝံၤအလီၢ်ခံ ပထံၣ်ဘၣ်လၢ အဒီပုၢ်ဝဲၢ်ခွါတဖၣ်န့ၣ် အတၢ်ပာ်သူၣ်ပာ်သး ဆီတလဲက့ၤဝဲ.—၁ ကရံၣ် ၁၅:၇.
၁၈ ဘၣ်မနုၤအဃိ ယ့ၣ်ၡူးအပျဲၢ်အဘီၣ်တဖၣ် အိၣ်ဖှိၣ်တပူၤဃီဖဲ တၢ်တနံၤန့ၣ်လဲၣ်. ဖဲတၢ်တနံၤန့ၣ် အဝဲသ့ၣ်ခဲလၢာ် “ဆဲးဃ့ထုကဖၣ်တၢ် တလီၢ်လီၢ်လၢ တၢ်သးတဖျၢၣ်ဃီအပူၤ.” (မၤတၢ် ၁:၁၄) ခရံာ်ဖိတဖၣ် အိၣ်ဖှိၣ်တပူၤဃီ ဒ်သိးကဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်တၢ်အရ့ဒိၣ် လၢအဝဲသ့ၣ်အဂီၢ်. အဃိ ဖဲပအိၣ်ဖှိၣ် တပူၤဃီအခါ ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ, ပန့ၢ်ဘၣ်တၢ်သိၣ်လိနဲၣ်လိ, တၢ်ဟံးစုနဲၣ်ကျဲ ဒီးပဘူၣ်ထီၣ်ဘါထီၣ်ဘၣ် ယဟိဝၤယွၤ. ဒီးဖဲပထီၣ်တၢ်အိၣ်ဖှိၣ်အခါ ပသးဝံၣ်တၢ် ဒီးပဃ့ထုကဖၣ်တၢ်န့ၣ် အရ့ဒိၣ်လၢပဂီၢ်. ပမၤဒ်အံၤန့ၣ် မ့ၢ်ဝဲကျဲတဘိလၢ ပစံးထီၣ်ပတြၢၤ ယဟိဝၤယွၤ ဒီးပမၤသးခုအသး. အဃိ ပတဘၣ်ဟးဆှဲး တၢ်အိၣ်ဖှိၣ်ဘၣ် ဒီးပကဘၣ် ဆဲးထီၣ်တၢ်အိၣ်ဖှိၣ်ထီဘိ.—ဧ့ၤ ၁၀:၂၄, ၂၅.
၁၉-၂၁. (က) စီၤပ့းတရူး မၤတၢ်ဆူၣ်ဆူၣ်လၢ တၢ်အိၣ်ဖှိၣ်အဂီၢ်န့ၣ် ပန့ၢ်ဘၣ်တၢ်မၤလိဒ်လဲၣ်. (ခ) ဘၣ်မနုၤအဃိ ပှၤကဘၣ်ဃုထၢထီၣ် ပှၤအသီတဂၤလၢ စီၤယူဒၤအလီၢ်လဲၣ် ဒီးပှၤဃုထၢတၢ် အကျိၤအကျဲန့ၣ် ပန့ၢ်ဘၣ်တၢ်မၤလိဒ်လဲၣ်.
၁၉ လၢခံတယံာ်ဘၣ်န့ၣ် တၢ်ဂ့ၢ်ကီအိၣ်ထီၣ်တခါလၢ တၢ်ကရၢကရိအပူၤ ဒီးခရံာ်ဖိလၢညါတဖၣ် ဃုထၢထီၣ် တၢ်မၢဖိပ့းတရူးလၢ ကကွၢ်ရဲၣ်ကျဲၤ တၢ်ဂ့ၢ်ကီတခါအံၤ. (အဆၢဖိ ၁၅-၂၆) စီၤပ့းတရူးသမၢ ယ့ၣ်ၡူးသၢဘျီန့ၣ် အိၣ်ဝဲစှၤကိာ်နွံဒံးလီၤ. ဘၣ်ဆၣ် အဆီတလဲအသး ဒီးကစၢ်ယွၤသူဒံးအီၤလၢ အတၢ်ဖံးတၢ်မၤအဂီၢ်အဃိ ကဲထီၣ်တၢ်ဂံၢ်တၢ်ဘါ လၢပဂီၢ်ဒိၣ်မး. (မၢ်ကူး ၁၄:၇၂) ပဝဲခဲလၢာ်န့ၣ် ပတလၢတပှဲၤဘၣ်အဃိ ပမၤကမၣ်ဘၣ်တၢ်သ့. သနာ်က့ ပသ့ၣ်ညါလၢ ယဟိဝၤယွၤမ့ၢ် “ပှၤလၢအဂ့ၤ ဒီးပျၢ်ကွံာ်တၢ်ကမၣ်ညီ” အဃိ ပမ့ၢ်ပီၢ်ယၢ်လီၤက့ၤပသးနီၢ်ကီၢ်န့ၣ် ယဟိဝၤယွၤ ကပျၢ်ကွံာ် ပတၢ်ကမၣ်.—စံး ၈၆:၅.
၂၀ စီၤယူဒၤ ဆါလီၤကွံာ်ယ့ၣ်ၡူးအဃိ စီၤပ့းတရူး သ့ၣ်ညါဝဲလၢ ပှၤကဘၣ်ဃုထၢထီၣ်က့ၤ ပှၤအသီတဂၤလၢ စီၤယူဒၤအလီၢ်. သနာ်က့ ပှၤကဘၣ်ဃုထၢထီၣ် မတဂၤလဲၣ်. တၢ်မၢဖိအသီတဂၤလၢ ပှၤကဃုထၢထီၣ်အီၤန့ၣ် ကဘၣ်မ့ၢ်ပှၤလၢ အလဲၤဃုာ်တၢ်ဒီးယ့ၣ်ၡူး ဒီးအကဘၣ်မ့ၢ် ပှၤတဂၤလၢ အထံၣ်ဘၣ် ယ့ၣ်ၡူး ဂဲၤဆၢထၢၣ်သမူထီၣ်က့ၤ လၢတၢ်သံ. (မၤတၢ် ၁:၂၁, ၂၂) အဃိ အလီၤပလိာ်သးဒီး ယ့ၣ်ၡူး အတၢ်အၢၣ်လီၤလၢ အတဲဘၣ်အတၢ်မၢဖိလၢ “သုဝဲလၢ အပိာ်ယခံန့ၣ် ကဆ့ၣ်နီၤလၢ လီၢ်ပစိာ် ၁၂ ဖျၢၣ်အဖီခိၣ် ဒီးကစံၣ်ညီၣ် အံၣ်စရ့လး ၁၂ ဒူၣ်.” (မးသဲ ၁၉:၂၈) ဒီးလီၤဂာ်လၢ တၢ်မၢဖိ ၁၂ ဂၤလၢ အပိာ်ယ့ၣ်ၡူးအခံန့ၣ် ယဟိဝၤယွၤ ဘၣ်သးလၢ အဝဲသ့ၣ်ကကဲထီၣ် “လၢၢ်အခီၣ်ထံး ၁၂ ဖျၢၣ်” လၢဝ့ၢ်ယရူၤၡလ့ၣ် အသီအဂီၢ်. (လီၣ် ၂၁:၂, ၁၄) ပထံၣ်ဘၣ်စ့ၢ်ကီး ဝံအတၢ်စံးပာ် လၢအတဲဝဲလၢ “အမူဒါလၢ အမ့ၢ်ပှၤကွၢ်ထွဲတၢ်န့ၣ် မ်ပှၤအဂၤတဂၤ ဟံးန့ၢ်က့ၤအီၤ.” အဃိ ယဟိဝၤယွၤ ဒုးသ့ၣ်ညါ စီၤပ့းတရူးလၢ ဝံအတၢ်စံးပာ်အံၤ အဘၣ်ဃးဒီး စီၤယူဒၤ.—စံး ၁၀၉:၈.
၂၁ ပှၤဃုထၢထီၣ် တၢ်မၢဖိအသီတဂၤဒ်လဲၣ်. လၢညါ ပှၤမ့ၢ်ဃုထၢထီၣ်တၢ်န့ၣ် ညီနုၢ်ပှၤဖးတၢ်. (ကတိၤ ၁၆:၃၃) ဘၣ်ဆၣ် တၢ်ဃုထၢအံၤန့ၣ် အကဲဝဲအလီၢ်ခံကတၢၢ်တဘျီ လၢလံာ်စီဆှံပာ်ဖျါထီၣ်ဝဲ ဘၣ်ဃးဒီးပှၤဃုထၢထီၣ်တၢ် ခီဖျိပှၤဖးတၢ်. အဃိ ဖဲကစၢ်ယွၤ အသးစီဆှံလီၤဝဲ ဝံၤအလီၢ်ခံ ပှၤတဃုထၢထီၣ်တၢ်ခီဖျိ ပှၤဖးတၢ်ဒ်အံၤလၢၤဘၣ်. လၢညါန့ၣ် ဘၣ်မနုၤအဃိ ပှၤသူဝဲတၢ်ဖးလဲၣ်. ဖဲတၢ်မၢဖိတဖၣ် ကဃုထၢထီၣ် တၢ်မၢဖိအသီတဂၤအခါ အဝဲသ့ၣ်ဃ့ထုကဖၣ်လၢ “ပကစၢ် ယဟိဝၤယွၤ လၢအသ့ၣ်ညါပှၤခဲလၢာ် အသးဧၢ, လၢပှၤခံဂၤအံၤအကျါ ဒုးနဲၣ်ပှၤ ပှၤလၢနဃုထၢအီၤတဂၤ.” (မၤတၢ် ၁:၂၃, ၂၄) အဃိ ပထံၣ်ဘၣ်လၢ တၢ်မၢဖိတဖၣ် ဘၣ်သးဝဲလၢ ယဟိဝၤယွၤ ကဃုထၢပှၤလၢအဘၣ်သးဝဲ တဂၤဂၤ ဒီးပှၤဃုထၢထီၣ်ဝဲ စီၤမးသံ. စီၤမးသံန့ၣ် ဘၣ်သ့ၣ်သ့ၣ်အကဲဝဲ ယ့ၣ်ၡူးအပျဲၢ်အဘီၣ်တဂၤလၢ ပှၤအဂၤ ၇၀ အကျါ လၢယ့ၣ်ၡူးမၢလီၤအဝဲသ့ၣ်လၢ ကလဲၤစံၣ်တဲၤတဲလီၤတၢ်. အဃိ စီၤမးသံကဲထီၣ် တၢ်မၢဖိတဂၤလၢ “တၢ်မၢဖိတဆံခံဂၤ” c အကျါ.—မၤတၢ် ၆:၂.
၂၂, ၂၃. ဒီပုၢ်ဝဲၢ်ခွါလၢ အကွၢ်ထွဲတၢ်အိၣ်ဖှိၣ်လၢ ဆၢကတီၢ်ခဲအံၤန့ၣ် ဘၣ်မနုၤအဃိ ပကဘၣ်ဒိကနၣ် အဝဲသ့ၣ်လဲၣ်.
၂၂ တၢ်ဂ့ၢ်တခါအံၤ ဒုးသ့ၣ်ညါပှၤ တၢ်အရ့ဒိၣ်တမံၤ. လၢကစၢ်ယွၤ အပှၤဂီၢ်မုၢ်အကျါန့ၣ် ကဘၣ်အိၣ်ဒီး ပှၤလၢအရဲၣ်ကျဲၤတၢ်. ဒီးဆၢကတီၢ်ခဲအံၤ ဒီပုၢ်ဝဲၢ်ခွါတနီၤလၢ အတုၤထီၣ်ထီၣ်ဘး ဒ်လံာ်စီဆှံ အတၢ်သိၣ်တၢ်သီ အိၣ်ဝဲအသိးန့ၣ် ပှၤဃုထၢထီၣ်အဝဲသ့ၣ်လၢ ကကဲထီၣ်ပှၤတီခိၣ်ရိၤမဲတၢ်. အဃိ တချုးလၢ တၢ်အိၣ်ဖှိၣ်သးပှၢ်တဖၣ် ဃုထၢထီၣ် အဝဲသ့ၣ်ဒံးဘၣ်န့ၣ် တၢ်အိၣ်ဖှိၣ်သးပှၢ်တဖၣ် ဃုကွၢ်ဝဲ လံာ်စီဆှံ အတၢ်သိၣ်တၢ်သီ ဒီးဆိမိၣ်ထံဝဲလၢ ဒီပုၢ်ဝဲၢ်ခွါတဂၤန့ၣ် တုၤထီၣ်ထီၣ်ဘးလၢ ကကဲထီၣ်ပှၤတီခိၣ်ရိၤမဲတၢ်ဧါ. ဒီးအဝဲသ့ၣ် ဃ့ယဟိဝၤယွၤ အသးစီဆှံလၢ ကဟံးစုနဲၣ်ကျဲအဝဲသ့ၣ်စ့ၢ်ကီး. ခီဖျိလၢ အဝဲသ့ၣ်မၤဝဲဒ်န့ၣ်အဃိ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤန့ၣ် ကထံၣ်ဝဲလၢ ဒီပုၢ်ဝဲၢ်ခွါလၢ ပှၤဃုထၢထီၣ်တဂၤအံၤ ပှၤဃုထၢထီၣ်အီၤ ခီဖျိသးစီဆှံ. အဃိ ပမ့ၢ်ဒိကနၣ်ဒီးမၤထွဲ တၢ်အိၣ်ဖှိၣ်သးပှၢ်တဖၣ် အတၢ်ဟံးစုနဲၣ်ကျဲန့ၣ် တၢ်အိၣ်ဖှိၣ် ကအိၣ်ဒီး တၢ်ဃူတၢ်ဖိး.—ဧ့ၤ ၁၃:၁၇.
ပကဘၣ်ဒိကနၣ် ဒီးမၤထွဲ ဒီပုၢ်ဝဲၢ်ခွါလၢ အကွၢ်ထွဲ တၢ်အိၣ်ဖှိၣ်တဖၣ် အတၢ်ဟံးစုနဲၣ်ကျဲ
၂၃ ဖဲယ့ၣ်ၡူးဂဲၤဆၢထၢၣ်သမူထီၣ်က့ၤ ဝံၤအလီၢ်ခံ အလီၣ်ဖျါထီၣ်အသးလၢ အပျဲၢ်အဘီၣ်တဖၣ် အမဲာ်ညါ တဘျုးဘျီညါ. တကးဒံးဘၣ် တၢ်ဆီတလဲအိၣ်ထီၣ်အဃိ ယ့ၣ်ၡူးအပျဲၢ်အဘီၣ်တဖၣ် သးဆူၣ်ထီၣ် ဒီးအဝဲသ့ၣ် အိၣ်ကတဲာ်ကတီၤသးလၢ တၢ်လၢအဝဲသ့ၣ်ကဘၣ်မၤဝဲ လၢခါဆူညါအဂီၢ်. တၢ်မၤလိလၢခံတခါန့ၣ် ပကတဲသကိး တၢ်ကဲထီၣ်သး လၢအရ့ဒိၣ်တခါအံၤ.
a လၢလံာ်လူၤကၣ်အပူၤန့ၣ် စီၤလူၤကၣ်ကိးဝဲ ပိာ်ခွါတဂၤအံၤလၢ “ပှၤဒိၣ်ပှၤပှၢ် စီၤသီးဖံၤလူး.” အဃိ ပှၤတနီၤဆိမိၣ်ဝဲလၢ ဖဲန့ၣ်အဆၢကတီၢ် ဘၣ်သ့ၣ်သ့ၣ် စီၤသီးဖံၤလူးန့ၣ် အကဲပှၤဒိၣ်ပှၤပှၢ် လၢအပတီၢ်ထီတဂၤ ဒီးလီၤဂာ်လၢ အတကဲခရံာ်ဖိဒံးဘၣ်. (လူၤကၣ် ၁:၃) ဘၣ်ဆၣ် ဖဲလံာ်မၤတၢ်အပူၤန့ၣ် စီၤလူၤကၣ် ကိးအီၤယိယိဖိလၢ “စီၤသီးဖံၤလူးဧၢ.” ပှၤကူၣ်ဘၣ်ကူၣ်သ့တနီၤ တဲဝဲလၢ ဘၣ်သ့ၣ်သ့ၣ် စီၤသီးဖံၤလူး ဖးဝဲလံာ်လူၤကၣ် ဝံၤအလီၢ်ခံမၣ် အကဲထီၣ်ခရံာ်ဖိ. အဃိ စီၤလူၤကၣ်ကိးအမံၤ ယိယိဖိ ဒ်သိးဒီး ဒီပုၢ်ဝဲၢ်ခွါတဂၤ.
b ဖဲအံၤန့ၣ် လံာ်စီဆှံသူဝဲ ကြံးတၢ်ကတိၤ လၢအမ့ၢ် ထြိးဖိး လၢအခီပညီမ့ၢ်ဝဲ “လၢကျဲဒ်န့ၣ်” ဒီးတသူဝဲ မီဖံ လၢအခီပညီမ့ၢ်ဝဲ “အက့ၢ်အဂီၤ” ဘၣ်.
c လၢခံစီၤပီလူးန့ၣ် ပှၤဃုထၢထီၣ်အီၤလၢ “တၢ်မၢဖိလၢ ပှၤကလုာ်တဖၣ်အဂီၢ်” ဘၣ်ဆၣ် အတပၣ်ဃုာ်လၢ တၢ်မၢဖိ ၁၂ ဂၤအကျါဘၣ်. (ရိ ၁၁:၁၃; ၁ ကရံၣ် ၁၅:၄-၈) ဖဲယ့ၣ်ၡူး အိၣ်လၢဟီၣ်ခိၣ်ချၢ ဒီးစံၣ်တဲၤတဲလီၤတၢ်အခါ စီၤပီလူးတပိာ်ဘၣ် ယ့ၣ်ၡူးအခံဘၣ် အဃိ စီၤပီလူးတန့ၢ်ဘၣ် တၢ်ခွဲးတၢ်ယာ်လၢ ကပၣ်ဃုာ်လၢ တၢ်မၢဖိ ၁၂ ဂၤအကျါဘၣ်.
