တၢ်မၤလိ ၂၀
တၢ်ထီဒုၣ်ထီဒါ အိၣ်နာ်က့ ယဟိဝၤယွၤ အကလုၢ်ကထါ “ဆဲးရၤလီၤအသး ဒီးမၤနၢၤတၢ်”
ဒ်သိးပှၤအါဂၤကနၢ်ဟူဘၣ် တၢ်သးခုကစီၣ်အဂီၢ် စီၤပီလူး ဒီးစီၤအပီးလိၤ မၤစၢၤဝဲဒ်လဲၣ်
တၢ်ဂ့ၢ်ဒိးသန့ၤထီၣ်သးလၢ မၤတၢ် ၁၈:၂၃–၁၉:၄၁
၁, ၂. (က) လၢဝ့ၢ်အ့းဖ့းစူးန့ၣ် စီၤပီလူး ဒီးအသကိးတဖၣ် ထံၣ်ဘၣ်ဒီးတၢ်အိၣ်သးလၢ အလီၤဘၣ်ယိၣ်ဒ်လဲၣ်. (ခ) လၢတၢ်မၤလိအံၤတခါအံၤန့ၣ် ပကတဲသကိး တၢ်ဂ့ၢ်မနုၤလဲၣ်.
လၢဝ့ၢ်အ့းဖ့းစူး အကျဲမုၢ်ဖးဒိၣ်တဖၣ်အပူၤ ဖဲပှၤဆါတၢ်တဖၣ် အိၣ်ဝဲအလီၢ်န့ၣ် ပှၤအိၣ်ဝဲအါမး. ဒီးပှၤသ့ၣ်တဖၣ်အံၤပိာ်ထီၣ်ဝဲ ပှၤဂီၢ်မုၢ်လၢ အသးပှံၢ်ထီၣ်တၢ်တဖၣ်အခံ. ဒီးအဝဲသ့ၣ်လဲၤဝဲဆူ ဘျီၣ်ကွၢ်ကီတၢ်အလီၢ် လၢပှၤတြီၢ်ဝဲ ၂၅,၀၀၀. ဘၣ်မနုၤအဃိ ပှၤသးပှံၢ်ထီၣ်တၢ်လဲၣ်န့ၣ် အဝဲသ့ၣ်အါတက့ၢ်တသ့ၣ်ညါဝဲဘၣ်. သနာ်က့ အဝဲသ့ၣ်သ့ၣ်ညါဝဲလၢ တၢ်ကဲထီၣ်သးတခါအံၤ ဘၣ်ဃးလိာ်သးဒီး အဝဲသ့ၣ်အတၢ်လုၢ်ဟံၣ် ဒီးအကစၢ်မုၣ် နီၢ်အၢ်တ့းမံၤ. အဃိ အဝဲသ့ၣ် ကိးပသူထီၣ်ဝဲလၢ “ပှၤအ့းဖ့းစူးဖိ အကစၢ်မုၣ် နီၢ်အၢ်တ့းမံၤန့ၣ် အစိကမီၤဒိၣ်ဝဲဒိၣ်မး.”—မၤတၢ် ၁၉:၃၄.
၂ ဒ်သိးယွၤအဘီအမုၢ်တၢ်သးခုကစီၣ် တရၤလီၤသးတဂ့ၤအဂီၢ် မုၣ်ကီၤလံၢ်သူဝဲ ပှၤဂီၢ်မုၢ်လၢ အအၢအသီတဖၣ်. တကးဒံးဘၣ် အသူဝဲ တၢ်မၤအၢမၤသီ ဒီးတၢ်အဂၤတဖၣ် ဒ်သိးဒီး ကမၤပတုာ်ဝဲ တၢ်စံၣ်တဲၤတဲလီၤတၢ်မၤအဂီၢ်. လၢတၢ်မၤလိတခါအံၤ ပကတဲသကိး ကျဲတဖၣ်လၢ မုၣ်ကီၤလံၢ်သူဝဲ ဒ်သိးကမၤပတုာ်ဝဲ တၢ်စံၣ်တဲၤတဲလီၤတၢ်မၤ ဒီးကမၤဟးဂီၤဝဲ ခရံာ်ဖိလၢညါတဖၣ် အတၢ်ဃူတၢ်ဖိး. တကးဒံးဘၣ် ပကမၤလိဘၣ်လၢ အတၢ်မၤတဖၣ်အံၤ တကဲထီၣ်လိၣ်ထီၣ်ဘၣ် ဒီး “ယဟိဝၤယွၤ အကလုၢ်ကထါန့ၣ် ဆဲးရၤလီၤအသး ဒီးမၤနၢၤတၢ်.” (မၤတၢ် ၁၉:၂၀) ခီဖျိလၢ ယဟိဝၤယွၤ အတၢ်မၤစၢၤအဃိ ခရံာ်ဖိတဖၣ်အံၤ ဆဲးစံၣ်တဲၤတဲလီၤတၢ် ဒီးဆဲးအိၣ်ဃူအိၣ်ဖိးန့ၢ်ဝဲ. ခရံာ်ဖိလၢ မုၢ်မဆါတနံၤအံၤစ့ၢ်ကီး ယဟိဝၤယွၤ မၤစၢၤအဝဲသ့ၣ်ဒ်န့ၣ်. ယဟိဝၤယွၤ ကမၤစၢၤပှၤ ဘၣ်ဆၣ် ဒ်ခရံာ်ဖိလၢညါတဖၣ်အသိး ပကဘၣ်မၤတၢ်ဆူၣ်ဆူၣ်စ့ၢ်ကီး. ပမ့ၢ်မၤဒ်န့ၣ်န့ၣ် ယဟိဝၤယွၤအသးစီဆှံ ကမၤစၢၤပှၤဒ်သိး ပကအိၣ်ဒီးတၢ်ဂ့ၤတၢ်ဝါလၢ အကမၤစၢၤပှၤဒ်သိး ပဆဲးစံၣ်တဲၤတဲလီၤတၢ် ကန့ၢ်အဂီၢ်. အဆိကတၢၢ်န့ၣ် ပကတဲသကိး စီၤအပီးလိၤ အဒိအတဲာ်.
“အဝဲမ့ၢ် ပှၤလၢအ . . . နၢၤတၢ်ကွဲးအသးတဖၣ်” (မၤတၢ် ၁၈:၂၄-၂၈)
၃, ၄. ဘၣ်ဃးဒီး စီၤအပီးလိၤန့ၣ် နီၢ်ပြံစကံးလၤ ဒီးစီၤအကူလၤ သ့ၣ်ညါထီၣ်ဝဲ တၢ်ဂ့ၢ်မနုၤလဲၣ် ဒီးအဝဲသ့ၣ် မၤစၢၤအီၤဒ်လဲၣ်.
၃ ဖဲစီၤပီလူး လဲၤလၢမံၤၡၢၤနရံၤအတၢ်လဲၤ သၢဘျီတဘျီအခါ တချုးလၢအလဲၤတုၤလၢ ဝ့ၢ်အ့းဖ့းစူးဒံးဘၣ်န့ၣ် စီၤအပီးလိၤ လၢအကဲဝဲပှၤယူဒၤဖိတဂၤန့ၣ် လဲၤတုၤလၢ ဝ့ၢ်အ့းဖ့းစူး. စီၤအပီးလိၤန့ၣ် အအိၣ်ဟဲလၢ ဝ့ၢ်အလ့းစၣ်ဒြူး လၢအအိၣ်လၢ ကီၢ်အဲၤကူပတူးအပူၤ. ဒီးအဝဲအိၣ်ဒီး တၢ်ဂ့ၤတၢ်ဝါအါမံၤ, အတဲတၢ်သ့မး တကးဒံးဘၣ် အမ့ၢ် “ပှၤလၢအ . . . နၢၤတၢ်ကွဲးအသးတဖၣ်” ဒီးခီဖျိလၢ “သးစီဆှံအဃိ အသးဆူၣ်ဒိၣ်မး.” အဃိအဝဲစံၣ်တဲၤတဲလီၤဝဲ ပှၤယူဒၤဖိလၢ ဘူၣ်ဘျီၣ်ပူၤ လၢတၢ်သးဆူၣ် ဒီးတၢ်သးဒူအပူၤ.—မၤတၢ် ၁၈:၂၄, ၂၅.
၄ နီၢ်ပြံစကံးလၤ ဒီးစီၤအကူလၤ နၢ်ဟူဘၣ်ဝဲ တၢ်လၢစီၤအပီးလိၤတဲဝဲတဖၣ်. ဒီးစီၤအပီးလိၤန့ၣ် “သိၣ်လိဝဲ ယ့ၣ်ၡူးအဂ့ၢ် ဘၣ်လီၤတံၢ်လီၤဆဲး” အဃိ အဝဲသ့ၣ်သးခုဒိၣ်မး. ဘၣ်ဆၣ် တယံာ်ဘၣ်န့ၣ် နီၢ်ပြံစကံးလၤ ဒီးစီၤအကူလၤ သ့ၣ်ညါထီၣ်ဝဲလၢ စီၤအပီးလိၤန့ၣ် အတသ့ၣ်ညါဝဲ တၢ်ဂ့ၢ်လၢ အရ့ဒိၣ်ဒိၣ်မး တခါဒံးဘၣ်. အဝဲ “သ့ၣ်ညါဝဲထဲ စီၤယိၤဟၣ် အတၢ်ဒိးဘျၢအဂ့ၢ်လီၤ.” ပှၤဒီမိၢ်ဝၤခံဂၤအံၤ အအိၣ်ဒီးတၢ်ဆီၣ်လီၤသး ဒီးအဝဲသ့ၣ် ကဲပှၤဆးဒဲ သနာ်က့ အဝဲသ့ၣ်တပျံၤဝဲ စီၤအပီးလိၤ လၢအတဲတၢ်သ့မး ဒီးအအိၣ်ဒီးတၢ်ကူၣ်ဘၣ်ကူၣ်သ့ လၢအပတီၢ်ထီမးတဂၤအံၤဘၣ်. အဃိ “အဝဲသ့ၣ် က့ၤကိးအီၤ ဒီးတဲနၢ်ပၢၢ်အါထီၣ်အီၤ ကစၢ်ယွၤအကျဲ လီၤတံၢ်လီၤဆဲး.” (မၤတၢ် ၁၈:၂၅, ၂၆) ဖဲန့ၣ်အဆၢကတီၢ် စီၤအပီးလိၤ မၤဝဲဒ်လဲၣ်. စီၤအပီးလိၤ ပာ်ဖျါထီၣ် တၢ်ဆီၣ်လီၤသး လၢအမ့ၢ် ခရံာ်ဖိ အတၢ်ဂ့ၤတၢ်ဝါလၢ အရ့ဒိၣ်ဒိၣ်မးတခါ.
၅, ၆. ဘၣ်မနုၤအဃိ ယဟိဝၤယွၤ သူဝဲစီၤအပီးလိၤလၢ အတၢ်မၤအပူၤ သ့ဒိၣ်ထီၣ်လဲၣ် ဒီးလၢစီၤအပီးလိၤ အဒိအတဲာ်န့ၣ် ပန့ၢ်ဘၣ် တၢ်မၤလိဒ်လဲၣ်.
၅ စီၤအပီးလိၤတူၢ်လိာ်ဝဲ နီၢ်ပြံစကံးလၤ ဒီးစီၤအကူလၤ အတၢ်မၤစၢၤအဃိ အဝဲကဲထီၣ် ပှၤမၤယဟိဝၤယွၤအတၢ်မၤ လၢအဂ့ၤဒိၣ်န့ၢ်အလီၢ်တဂၤ. အဝဲလဲၤလၢ အဃါယၤ ကီၢ်ရ့ၣ် ဒီး “အဝဲကဲထီၣ် တၢ်မၤစၢၤ” လၢခရံာ်ဖိဖဲန့ၣ်တဖၣ်အဂီၢ် “ဒိၣ်မး.” တကးဒံးဘၣ် ပှၤယူဒၤဖိတဖၣ်လၢ အအိၣ်ဖဲန့ၣ် ဒီးအတတူၢ်လိာ် ယ့ၣ်ၡူး ဒ်မ့းၡံအၤအသိးဘၣ်န့ၣ် အဝဲစံၣ်တဲၤတဲလီၤဝဲဂ့ၤဂ့ၤ. ဘၣ်ဃးဒီး စီၤအပီးလိၤန့ၣ် စီၤလူၤကၣ် ကွဲးဝဲလၢ “အဝဲပာ်ဖျါထီၣ်လၢ ကမျၢၢ်အမဲာ်ညါ လၢတၢ်သးဆူၣ်အပူၤ လီၤတံၢ်လီၤဆဲးလၢ ပှၤယူဒၤဖိတဖၣ် အတၢ်ထံၣ်န့ၣ် ကမၣ်ဝဲလီၤ. ဒီးအဝဲဒုးနဲၣ် အဝဲသ့ၣ် တၢ်ကွဲးအသးတဖၣ်လၢ အပာ်ဖျါထီၣ်ဝဲလၢ ယ့ၣ်ၡူးမ့ၢ်ခရံာ်.” (မၤတၢ် ၁၈:၂၇, ၂၈) တကးဒံးဘၣ် စီၤအပီးလိၤ ကဲထီၣ်တၢ်မၤစၢၤလၢ ခရံာ်ဖိတၢ်အိၣ်ဖှိၣ်အဂီၢ်ဒိၣ်မး. ခီဖျိလၢ စီၤအပီးလိၤအဃိ ပှၤအါဂၤ နၢ်ဟူဘၣ် “ယဟိဝၤယွၤ အကလုၢ်ကထါ.” အဃိ လၢစီၤအပီးလိၤ အဒိအတဲာ်န့ၣ် ပန့ၢ်ဘၣ် တၢ်မၤလိဒ်လဲၣ်.
၆ ခရံာ်ဖိတဖၣ် ကဘၣ်အိၣ်ဒီး တၢ်ဆီၣ်လီၤသးန့ၣ် မ့ၢ်တၢ်လၢ အရ့ဒိၣ်ဒိၣ်မး. ပဝဲတဂၤဘၣ်တဂၤန့ၣ် ပအိၣ်ဒီး တၢ်သ့တၢ်ဘၣ်လၢ အလီၤဆီလိာ်သး. ပဝဲတနီၤန့ၣ် ပအိၣ်ဒီးတၢ်သ့တၢ်ဘၣ် တမံၤမံၤ ဒီးတနီၤန့ၣ် အိၣ်ဒီးတၢ်လဲၤခီဖျိ မ့တမ့ၢ် သ့ၣ်ညါနၢ်ပၢၢ်တၢ်အါမး. ဘၣ်ဆၣ် ပမ့ၢ်အိၣ်ဒီး တၢ်ဆီၣ်လီၤသးမၣ် ယဟိဝၤယွၤကသူပှၤ. ပမ့ၢ်တအိၣ်ဒီး တၢ်ဆီၣ်လီၤသးဘၣ်န့ၣ် ပတၢ်သ့တၢ်ဘၣ် ကကဲထီၣ် တၢ်ကလီကလီ. တကးဒံးဘၣ် ပမ့ၢ်တပလီၢ်ပသးဘၣ်န့ၣ် ပကပာ်ထီၣ်ထီဘၣ်ပသးလၢ ပတၢ်သ့တၢ်ဘၣ်အဃိ. (၁ ကရံၣ် ၄:၇; ယၤ ၄:၆) ဘၣ်ဆၣ် ပမ့ၢ်အိၣ်ဒီးတၢ်ဆီၣ်လီၤသးန့ၣ် ပကထံၣ်ပှၤဂၤလၢ အဝဲသ့ၣ်န့ၣ် ဂ့ၤဒိၣ်န့ၢ်ဒံးပှၤ. (ဖံလံး ၂:၃) ဒီးဖဲပှၤဘှီဘၣ်ထီၣ်ပှၤအခါ ပတသးထီၣ်တၢ်ဘၣ် ဒီးပကပျဲလၢ ပှၤဂၤသိၣ်လိပှၤ. တကးဒံးဘၣ် ခီဖျိလၢ သးစီဆှံ အတၢ်ဟံးစုနဲၣ်ကျဲအဃိ တၢ်ကရၢကရိ မ့ၢ်မၤတၢ်တမံၤမံၤလၢ အတဘၣ်လိာ်သးဒီး ပတၢ်ထံၣ်ဘၣ်န့ၣ် ပတပာ်ထီၣ်ထီသး ဒီးဆဲးဆိကမိၣ်လၢ ပတၢ်ထံၣ်န့ၣ် ဘၣ်ဝဲဘၣ်. ပမ့ၢ်ဆဲးအိၣ်ဒီးတၢ်ဆီၣ်လီၤသးန့ၣ် ယဟိဝၤယွၤဒီးအဖိခွါ သူပှၤကသ့.—လူၤကၣ် ၁:၅၁, ၅၂.
၇. ဘၣ်ဃးဒီး တၢ်ဆီၣ်လီၤသးန့ၣ် စီၤပီလူး ဒီးစီၤအပီးလိၤ ပာ်လီၤတၢ်အဒိလၢ ပဂီၢ်ဒ်လဲၣ်.
၇ ပမ့ၢ်အိၣ်ဒီး တၢ်ဆီၣ်လီၤသးန့ၣ် ကမၤစၢၤပှၤဒ်သိး ပတပြၢလိာ်သးဒီး ပှၤဂၤဘၣ်. မုၣ်ကီၤလံၢ်န့ၣ် အအဲၣ်ဒိးဒုးအိၣ်ထီၣ် တၢ်လီၤမုၢ်လီၤဖးလၢ ခရံာ်ဖိလၢညါတဖၣ်အကျါဒိၣ်မး. စီၤအပီးလိၤ ဒီးစီၤပီလူးန့ၣ် အဝဲသ့ၣ် သိၣ်လိတၢ်သ့ ဒီးသိၣ်လိတၢ်ဂ့ၤမး အဃိ အဝဲသ့ၣ် မ့ၢ်ပြၢလိာ်အသး ဒ်သိးအကကဲထီၣ် ပှၤအရ့ဒိၣ်ကတၢၢ်လၢ တၢ်အိၣ်ဖှိၣ်ပူၤန့ၣ် မုၣ်ကီၤလံၢ် ကသးခုဒိၣ်မး. လၢဝ့ၢ်ကရံၣ်သူးအပူၤန့ၣ် ခရံာ်ဖိတနီၤ တဲဝဲလၢ “ယမ့ၢ်စီၤပီလူးအပျဲၢ်” ဒီးအဂၤတနီၤန့ၣ် တဲဝဲလၢ “ယၤန့ၣ် ယမ့ၢ်စီၤအပီးလိၤအပျဲၢ်” အဃိ အညီဒိၣ်မးလၢ စီၤပီလူး ဒီးစီၤအပီးလိၤ ကပြၢလိာ်သး. ဘၣ်ဆၣ် အဝဲသ့ၣ်ခံဂၤလၢာ်န့ၣ် တဟ့ၣ်ဂံၢ်ဟ့ၣ်ဘါ ပှၤဂၤလၢကအိၣ်လၢ အဝဲသ့ၣ်အအိၣ်တကပၤနီတဂၤဘၣ်. တကးဒံးဘၣ် လၢတၢ်ဆီၣ်လီၤသးအပူၤ စီၤပီလူး ပတြၢၤဝဲ စီၤအပီးလိၤ အတၢ်စံၣ်တဲၤတဲလီၤတၢ်မၤ ဒီးအဟ့ၣ်လီၤအါထီၣ်အီၤမူဒါတနီၤ. စီၤအပီးလိၤစ့ၢ်ကီး အမၤထွဲဝဲ စီၤပီလူး အတၢ်ဟံးစုနဲၣ်ကျဲ. (၁ ကရံၣ် ၁:၁၀-၁၂; ၃:၆, ၉; တံတူး ၃:၁၂, ၁၃) စီၤပီလူး ဒီးစီၤအပီးလိၤန့ၣ် အဝဲသ့ၣ် အိၣ်ဒီးတၢ်ဆီၣ်လီၤသး ဒီးမၤသကိးတၢ် ဃူဃူဖိးဖိး. အဃိ အဝဲသ့ၣ် အဒိအတဲာ်န့ၣ် ကဲဘျုးလၢ ပဂီၢ်စ့ၢ်ကီး.
“ဂုာ်ကျဲးစၢး ထုးန့ၢ်အဝဲသ့ၣ်အသး ဘၣ်ဃးဒီး ယွၤအဘီမုၢ်အဂ့ၢ်” (မၤတၢ် ၁၈:၂၃; ၁၉:၁-၁၀)
၈. ဖဲစီၤပီလူး ဟဲက့ၤလၢ ဝ့ၢ်အ့းဖ့းစူးအခါ အဟဲက့ၤဝဲလၢ ကျဲဖဲလဲၣ်တဘိလဲၣ် ဒီးဘၣ်မနုၤဃိလဲၣ်.
၈ စီၤပီလူး အၢၣ်လီၤပာ်စၢၤလၢ အကဟဲက့ၤလၢ ဝ့ၢ်အ့းဖ့းစူး. ဒီးဒ်အအၢၣ်လီၤဝဲအသိး အဝဲဟဲက့ၤဝဲ. a (မၤတၢ် ၁၈:၂၀, ၂၁) ဘၣ်ဆၣ် စီၤပီလူး ဟဲက့ၤလၢ ဝ့ၢ်အ့းဖ့းစူးလၢ ကျဲဖဲလဲၣ်တဘိလဲၣ်. လၢအခီၣ်ထံးန့ၣ် စီၤပီလူး စးထီၣ်ဝဲ အမံၤၡၢၤနရံၤအတၢ်လဲၤ သၢဘျီတဘျီလၢ ဝ့ၢ်အၣ်တံၤအီာ် လၢအအိၣ်လၢ ကီၢ်စူၤရံအပူၤ. အဃိ ဒ်သိးဒီး အဝဲကဟဲက့ၤလၢ ဝ့ၢ်အ့းဖ့းစူးအဂီၢ် အမ့ၢ်လဲၤလၢ စ့းလူကံၤ ဒီးဒိးထီၣ်ကဘီ ဒီးလဲၤဝဲတဘျီဃီလၢ ဝ့ၢ်အ့းဖ့းစူးန့ၣ် ကဘူးထီၣ်တစဲး. ဘၣ်ဆၣ် အဝဲတလဲၤဝဲဒ်န့ၣ်ဘၣ် အလဲၤဝဲလၢ “ထံလီၢ်ကီၢ်ပူၤ” တကပၤ. ဒ် မၤတၢ် ၁၈:၂၃ ဒီး မၤတၢ် ၁၉:၁ ပာ်ဖျါထီၣ်ဝဲအသိး ပမ့ၢ်ဒွးကွၢ် စီၤပီလူးအတၢ်လဲၤတခါအံၤန့ၣ် ကအိၣ်ဝဲလၢ အမံးလာ် တကထိ မ့တမ့ၢ် ၁,၆၀၀ ကံလိမံထၢၣ်ညါ. ဘၣ်မနုၤအဃိ စီၤပီလူး ဃုထၢဝဲလၢ အကဟဲက့ၤလၢ ကျဲဖးယံၤ ဒီးအကီအခဲအံၤလဲၣ်. မ့ၢ်လၢ အဝဲအဲၣ်ဒိး “ဟ့ၣ်ဂံၢ်ဟ့ၣ်ဘါဝဲ ယ့ၣ်ၡူးအပျဲၢ်အဘီၣ် ခဲလၢာ်” အဃိ အဝဲဟဲက့ၤလၢ ကျဲတဘိန့ၣ်. (မၤတၢ် ၁၈:၂၃) ဒ်အမံၤၡၢၤနရံၤအတၢ်လဲၤ လၢအပူၤကွံာ် ခံဘျီအသိး စီၤပီလူး အတၢ်လဲၤတဘျီအံၤစ့ၢ်ကီး ကကီခဲဝဲ. ဘၣ်ဆၣ် အထံၣ်ဝဲလၢ တၢ်မၤတခါအံၤန့ၣ် အကဲဘျုးဒိၣ်မး. ဆၢကတီၢ်ခဲအံၤစ့ၢ်ကီး ကဝီၤအပှၤကွၢ်တၢ်ဒီးအမါန့ၣ် အိၣ်ဒီး တၢ်ပာ်သူၣ်ပာ်သး ဒ်စီၤပီလူးအသိး. အဝဲသ့ၣ် ဟ့ၣ်လီၤအသးဒ်အံၤအဃိ ပစံးဘျုးအဝဲသ့ၣ်ဒိၣ်မး.
၉. ဘၣ်မနုၤအဃိ ပှၤတနီၤန့ၣ် ဘၣ်ဒိးဘျၢထံလၢ အသီတဘျီလဲၣ် ဒီးလၢအဝဲသ့ၣ် အအိၣ်န့ၣ် ပန့ၢ်ဘၣ် တၢ်မၤလိဒ်လဲၣ်.
၉ ဖဲစီၤပီလူး လဲၤတုၤလၢ ဝ့ၢ်အ့းဖ့းစူးအခါ အထံၣ်ဝဲ ပှၤဘျၢတၢ် စီၤယိၤဟၣ် အပျဲၢ်အဘီၣ် ၁၂ ဂၤ. အဝဲသ့ၣ်န့ၣ် ဒိးဘျၢထံလၢ စီၤယိၤဟၣ် အတၢ်ဒိးဘျၢ. ဘၣ်ဆၣ် ဖဲန့ၣ်အခါ စီၤယိၤဟၣ်အတၢ်ဒိးဘျၢန့ၣ် အဘျုးတအိၣ်လၢၤဘၣ်. ဒီးလီၤဂာ်လၢ ပှၤတဖၣ်အံၤ သ့ၣ်ညါဝဲ သးစီဆှံအဂ့ၢ်ထဲတစဲး ဒီးဘၣ်သ့ၣ်သ့ၣ် တသ့ၣ်ညါဝဲ နီတစဲးဘၣ်. အဃိ စီၤပီလူးတဲဘၣ်အဝဲသ့ၣ်လၢ ပှၤကဘၣ်ဒိးဘျၢထံလၢယ့ၣ်ၡူးအမံၤန့ၣ် မ့ၢ်တၢ်လၢအရ့ဒိၣ်ဒိၣ်မး. ဒီးဒ်စီၤအပီးလိၤအသိး အဝဲသ့ၣ်ဆီၣ်လီၤသး ဒီးသးအိၣ်မၤလိတၢ် ဒီးအဝဲသ့ၣ်ဒိးဘျၢထံလၢ ယ့ၣ်ၡူးအမံၤ. အဝဲသ့ၣ် ဒိးဘျၢထံ ဝံၤအလီၢ်ခံ အဝဲသ့ၣ်ဒိးန့ၢ်ဘၣ် သးစီဆှံ ဒီးအဝဲသ့ၣ်တနီၤန့ၣ် ဒိးန့ၢ်ဘၣ်ဝဲ တၢ်ဟ့ၣ်လၢအလီၤလး. အဃိ ပသ့ၣ်ညါဘၣ်လၢ ပှၤလၢအသးအိၣ် မၤထွဲဝဲ တၢ်ကရၢကရိ အတၢ်ဟံးစုနဲၣ်ကျဲန့ၣ် ယဟိဝၤယွၤ ဆိၣ်ဂ့ၤအဝဲသ့ၣ်.—မၤတၢ် ၁၉:၁-၇.
၁၀. ဘၣ်မနုၤအဃိ စီၤပီလူး လဲၤစံၣ်တဲၤတဲလီၤက့ၤတၢ်လၢ တၢ်သိၣ်လိနဲၣ်လိ ဘျီၣ်ဒိၣ်လဲၣ် ဒီးဖဲပစံၣ်တဲၤတဲလီၤတၢ်အခါ ပကွၢ်လိ စီၤပီလူးကသ့ဒ်လဲၣ်.
၁၀ တယံာ်ဘၣ်ဒီး တၢ်ကဲထီၣ်သးလၢ အဂၤတမံၤ. စီၤပီလူး စံၣ်တဲၤတဲလီၤတၢ် လၢတၢ်သးဆူၣ် ဖဲဘူၣ်ဘျီၣ်အပူၤ သၢလါညါ. ပှၤလၢ စီၤပီလူး စံၣ်တဲၤတဲလီၤဝဲတဖၣ်န့ၣ် စီၤပီလူး “ဂုာ်ကျဲးစၢး ထုးန့ၢ်အဝဲသ့ၣ်အသး ဘၣ်ဃးဒီး ယွၤအဘီမုၢ်အဂ့ၢ်” ဘၣ်ဆၣ် ပှၤတနီၤန့ၣ် တဒိကနၣ်ဝဲဘၣ် ဒီးထီဒါက့ၤအီၤ. ဘၣ်ဆၣ် စီၤပီလူး တမၤလၢာ်ဂီၤ အတၢ်ဆၢကတီၢ်ဒီး ပှၤလၢအ “တဲအၢတဲသီ တၢ်မ့ၢ်တၢ်တီအကျဲအံၤ” ဘၣ်. အဃိ အလဲၤစံၣ်တဲၤတဲလီၤက့ၤတၢ်လၢ တၢ်သိၣ်လိနဲၣ်လိ ဘျီၣ်ဒိၣ်အပူၤ. (မၤတၢ် ၁၉:၈, ၉) အဃိ ပှၤလၢအအဲၣ်ဒိးသ့ၣ်ညါအါထီၣ် ယွၤအဘီအမုၢ်အဂ့ၢ်န့ၣ် အဝဲသ့ၣ် ဘၣ်လဲၤဝဲလၢ တၢ်သိၣ်လိနဲၣ်လိ ဘျီၣ်ဒိၣ်. ဒ်စီၤပီလူးအသိး တဘျီတခီၣ် ပဝဲစ့ၢ်ကီး ပမ့ၢ်သ့ၣ်ညါထီၣ်လၢ ဟံၣ်ကစၢ် တအဲၣ်ဒိးဒိကနၣ်ပှၤဘၣ် မ့တမ့ၢ် အိၣ်ဒၣ်အအဲၣ်ဒိး တဲအါတဲစှၤတၢ်ဒီးပှၤန့ၣ် ပတလိၣ်ဆဲးတဲသကိးတၢ်ဒီး အဝဲသ့ၣ်လၢၤဘၣ်. ပှၤလၢအလီၤဂာ်ဒီးသိ လၢကဘၣ်နၢ်ဟူ တၢ်ကစီၣ်လၢ ပတဲန့ၣ် အိၣ်ဝဲအါမးဒံး.
၁၁, ၁၂. (က) စီၤပီလူး စံၣ်တဲၤတဲလီၤတၢ်ဆူၣ်မး ဒီးသးအိၣ်ဆီတလဲအသး ဒ်တၢ်အိၣ်သးအိၣ်ဝဲအသိးန့ၣ် ပသ့ၣ်ညါဘၣ်ဒ်လဲၣ်. (ခ) ယဟိဝၤပှၤအုၣ်အသးတဖၣ် စံၣ်တဲၤတဲလီၤတၢ်ဆူၣ်မး ဒီးအသးအိၣ်ဆီတလဲအသး ဒ်တၢ်အိၣ်သးအိၣ်ဝဲအသိးန့ၣ် ပသ့ၣ်ညါဘၣ်ဒ်လဲၣ်.
၁၁ စီၤပီလူး စံၣ်တဲၤတဲလီၤတၢ်လၢ တၢ်သိၣ်လိနဲၣ်လိ ဘျီၣ်ဒိၣ်န့ၣ် ကစးထီၣ်ဝဲလၢ ဂီၤခီ ၁၁ နၣ်ရံၣ် တုၤလၢ ဟါခီ ၄ နၣ်ရံၣ်. (တၢ်မၤနီၣ်လၢ မၤတၢ် ၁၉:၉, nwtsty.) တၢ်ဆၢကတီၢ်အံၤန့ၣ် ကမ့ၢ်ဝဲ တၢ်ကိၢ်ဆူၣ်ကတၢၢ် အဆၢကတီၢ်လၢ တနံၤအတီၢ်ပူၤ. ဒီးကဘၣ်ဖဲ ပှၤအါဂၤ အိၣ်ဘှံးလၢတၢ်မၤ ဒီးအီၣ်တၢ်အဆၢကတီၢ်. စီၤပီလူး မ့ၢ်ဆဲးစံၣ်တဲၤတဲလီၤတၢ်ဒ်အံၤ ကိးနံၤဒဲးန့ၣ် လၢခံနံၣ်အတီၢ်ပူၤ အစံၣ်တဲၤတဲလီၤတၢ် အနၣ်ရံၣ်ကအိၣ်ဝဲ ၃,၀၀၀ ဘျဲၣ်ညါ. b အဃိ တၢ်သးခုကစီၣ်န့ၣ် ဆဲးရၤလီၤအသး ဒီးမၤနၢၤတၢ်. စီၤပီလူးန့ၣ် အစံၣ်တဲၤတဲလီၤတၢ်ဆူၣ်မး ဒီးအသးအိၣ်ဆီတလဲအသး ဒ်တၢ်အိၣ်သးအိၣ်ဝဲအသိး. ဒ်သိး ပှၤအါဂၤကနၢ်ဟူဘၣ် တၢ်သးခုကစီၣ်အဂီၢ် အဆီတလဲ အတၢ်ဆၢကတီၢ် ဒီးတၢ်လီၢ်တၢ်ကျဲ. အမၤဒ်အံၤအဃိ ကဲဘျုးဒ်လဲၣ်. လံာ်စီဆှံတဲဝဲလၢ “ပှၤလၢအအိၣ်လၢ အၤစံကီၢ်ရ့ၣ်အပူၤ လၢအမ့ၢ် ပှၤယူဒၤဖိမ့ၢ်ဂ့ၤ, ပှၤကြံးဖိမ့ၢ်ဂ့ၤ, နၢ်ဟူဘၣ်ဝဲ ကစၢ်အကလုၢ်ကထါ.” (မၤတၢ် ၁၉:၁၀) အဃိ ပထံၣ်ဘၣ်လၢ စီၤပီလူးန့ၣ် အစံၣ်တဲၤတဲလီၤတၢ် လီၤတံၢ်လီၤဆဲး.
ပဂုာ်ကျဲးစၢး လဲၤစံၣ်တဲၤတဲလီၤတၢ်လၢ ပှၤအိၣ်ဝဲအလီၢ် ဒီးဖဲပှၤချုးအခါ
၁၂ ယဟိဝၤပှၤအုၣ်အသး လၢပစိၤခဲအံၤစ့ၢ်ကီး အဝဲသ့ၣ် စံၣ်တဲၤတဲလီၤတၢ်ဆူၣ်မး ဒီးအဝဲသ့ၣ် သးအိၣ်ဆီတလဲအသး ဒ်တၢ်အိၣ်သးအိၣ်ဝဲအသိး. ပဝဲယဟိဝၤပှၤအုၣ်အသးန့ၣ် ပလဲၤစံၣ်တဲၤတဲလီၤတၢ်ဖဲ ပှၤချုးအဆၢကတီၢ် ဒီးဖဲပှၤအိၣ်ဝဲအလီၢ်. ပစံၣ်တဲၤတဲလီၤတၢ်လၢ ကျဲပူၤ, လၢပှၤဆါတၢ်ပှ့ၤတၢ်အလီၢ် ဒီးလၢပှၤအိၣ်အါအလီၢ်. တကးဒံးဘၣ် ပစံၣ်တဲၤတဲလီၤတၢ်လၢ လီတဲစိအပူၤ ဒီးကွဲးလံာ်ပရၢစ့ၢ်ကီး. ပမ့ၢ်လဲၤစံၣ်တဲၤတဲလီၤတၢ်လၢ တဟံၣ်ဘၣ်တဟံၣ်န့ၣ် ပကျဲးစၢးလဲၤဖဲ တၢ်ဆၢကတီၢ်လၢ ပှၤအိၣ်လၢဟံၣ်အခါ.
တၢ်စံၣ်တဲၤတဲလီၤ “ဆဲးရၤလီၤအသး ဒီးမၤနၢၤ” တၢ်ဝံတၢ်နါတဖၣ် (မၤတၢ် ၁၉:၁၁-၂၂)
၁၃, ၁၄. (က) ယဟိဝၤယွၤ မၤစၢၤစီၤပီလူး လၢကမၤမနုၤလဲၣ်. (ခ) စီၤစက့းဝၤ အဖိခွါတဖၣ် အတၢ်ဆိကမိၣ်န့ၣ် ကမၣ်ဒ်လဲၣ် ဒီးခရံာ်ဖိလၢ ပစိၤခဲအံၤစ့ၢ်ကီး အဝဲသ့ၣ် အတၢ်ဆိကမိၣ်န့ၣ် ကမၣ်ဒ်လဲၣ်.
၁၃ လၢလံာ်မၤတၢ်အပူၤန့ၣ် စီၤလူၤကၣ် ဆဲးကွဲးဝဲလၢ ယဟိဝၤယွၤ မၤစၢၤစီၤပီလူး ဒ်သိး အကမၤ “တၢ်လီၤလးဖးဒိၣ်တဖၣ်.” တၢ်ကံးညာ် ဒီးတၢ်ကူတၢ်သိးလၢ စီၤပီလူး သူတ့ၢ်ဝဲတဖၣ်န့ၣ် ပှၤလဲၤစိာ်ဝဲလၢ ပှၤဆူးပှၤဆါတဖၣ်အအိၣ် ဒီးအဝဲသ့ၣ် ဘျါက့ၤဝဲ. တကးဒံးဘၣ် ပှၤသူဝဲ တၢ်ကံးညာ် ဒီးတၢ်ကူတၢ်သိးတဖၣ်အံၤ ဒီးပှၤနီဟးထီၣ်ကွံာ်တၢ်နါတဖၣ် န့ၢ်ဝဲစ့ၢ်ကီး. c (မၤတၢ် ၁၉:၁၁, ၁၂) ပှၤနီဟးထီၣ်ကွံာ် တၢ်ဝံတၢ်နါတဖၣ်န့ၢ်ဝဲအဃိ ပှၤအါဂၤသးခုဝဲ ဘၣ်ဆၣ် ပှၤတနီၤန့ၣ် တဘၣ်သူၣ်ဘၣ်သးဝဲဘၣ်.
၁၄ “ပှၤယူဒၤဖိတနီၤလၢ အဟးဝ့ၤဝီၤနီဟးထီၣ် တၢ်ဝံတၢ်နါတဖၣ်စ့ၢ်ကီး” အဝဲသ့ၣ်မၤတၢ်လီၤလး ဒ်စီၤပီလူးအသိး. ဒီးအဝဲသ့ၣ်တနီၤန့ၣ် ဂုာ်ကျဲးစၢးဝဲဒ်သိး ကသူဝဲ စီၤပီလူး ဒီးယ့ၣ်ၡူးအမံၤ ဒ်သိးကနီဟးထီၣ်ကွံာ် တၢ်ဝံတၢ်နါလၢပှၤလိၤ. အဒိ စီၤလူၤကၣ်တဲဝဲလၢ ပှၤလုၢ်တၢ်ဒိၣ်အခိၣ် စီၤစက့းဝၤ အဖိခွါနွံဂၤန့ၣ် အမၤဝဲဒ်န့ၣ်. ဘၣ်ဆၣ် တၢ်ဝံတၢ်နါ တဲအဝဲသ့ၣ်လၢ “ယသ့ၣ်ညါယ့ၣ်ၡူး ဒီးယသ့ၣ်ညါ စီၤပီလူးလီၤ. ဘၣ်ဆၣ် သုမ့ၢ်မတၤတဖၣ်လဲၣ်.” ဒီးပိာ်ခွါလၢ တၢ်ဝံတၢ်နါ အိၣ်လၢအလိၤတဂၤန့ၣ် ဖုထီၣ်လၢ အဝဲသ့ၣ်အလိၤ အဃိ အဝဲသ့ၣ်ဘၣ်ဒိဘၣ်ထံး ဒီးဃ့ၢ်ထီၣ်ကွံာ်လၢ ဘ့ၣ်ဆ့လီၤ. (မၤတၢ် ၁၉:၁၃-၁၆) အဃိ ပှၤအိၣ်ဖဲန့ၣ်ခဲလၢာ် သ့ၣ်ညါထီၣ်ဝဲလၢ ယဟိဝၤယွၤ ဟ့ၣ်စီၤပီလူးလၢ တၢ်စိတၢ်ကမီၤ ဘၣ်ဆၣ် တဟ့ၣ်ဝဲ ပှၤပိာ်ခွါလၢ အအိၣ်လၢ တၢ်ဘူၣ်တၢ်ဘါကမၣ်အပူၤလၢ တၢ်စိတၢ်ကမီၤန့ၣ်ဘၣ်. ခဲအံၤစ့ၢ်ကီး ပှၤလၢအကကွဲၢ်တဖၣ်န့ၣ် အဝဲသ့ၣ် ဆိမိၣ်ဝဲလၢ ထဲဒၣ်အဝဲသ့ၣ် မ့ၢ်သ့ၣ်ညါယ့ၣ်ၡူးအမံၤ မ့တမ့ၢ် အဝဲသ့ၣ် မ့ၢ်ကိးလီၤသးလၢခရံာ်ဖိန့ၣ် ကစၢ်ယွၤ ဘၣ်သူၣ်ဘၣ်သးအဝဲသ့ၣ်လံ. ဘၣ်ဆၣ် ယ့ၣ်ၡူးအတၢ်ကတိၤန့ၣ် ပာ်ဖျါထီၣ်ဝဲလၢ ထဲဒၣ်ပှၤလၢ အမၤဝဲအပၢ်အိၣ်လၢမူခိၣ် အတၢ်ဘၣ်သးန့ၣ် အိၣ်ဒီးတၢ်မုၢ်လၢ်လၢခါဆူညါ.—မး ၇:၂၁-၂၃.
၁၅. ဘၣ်ဃးဒီး တၢ်ဝံတၢ်နါအတၢ်ဖံးတၢ်မၤ ဒီးတၢ်ဖိတၢ်လံၤလၢ အဘၣ်ထွဲလိာ်သးဒီး တၢ်ဝံတၢ်နါ အတၢ်ဖံးတၢ်မၤန့ၣ် ပကွၢ်လိ ပှၤအ့းဖ့းစူးဖိ ကသ့ဒ်လဲၣ်.
၁၅ ဖဲပှၤသ့ၣ်ညါထီၣ်လၢ စီၤစက့းဝၤ အဖိခွါတဖၣ် အတၢ်စိတၢ်ကမီၤ တအိၣ်ဘၣ်အခါ ပှၤအါဂၤ ကဲထီၣ်ဝဲခရံာ်ဖိ ဒီးပာ်တ့ၢ်ကွံာ်ဝဲ တၢ်ဝံတၢ်နါ အတၢ်ဖံးတၢ်မၤ. ပှၤအ့းဖ့းစူးဖိ အါဂၤန့ၣ် အဝဲသ့ၣ် နာ်ဝဲ တၢ်မၤကဒါပှၤမဲာ် အတၢ်ဖံးတၢ်မၤတဖၣ်. ဒီးအဝဲသ့ၣ် သူဝဲ တၢ်အူတၢ်သမူတၢ်, တၢ်ဖိတၢ်လံၤလၢ အဘၣ်ဃးဒီး တၢ်ဝံတၢ်နါ ဒီးလံာ်လဲၢ်လၢ ပှၤကွဲးဝဲဘၣ်ဃးဒီး တၢ်မၤကဒါပှၤမဲာ်. ဘၣ်ဆၣ် ပှၤအ့းဖ့းစူးဖိအါဂၤလၢ အနာ်ဝဲ ကစၢ်ယွၤန့ၣ် အဝဲသ့ၣ် ဟဲစိာ်ဝဲ အလံာ်အလဲၢ်လၢ အဘၣ်ဃးဒီး တၢ်မၤကဒါပှၤမဲာ် အတၢ်ဖံးတၢ်မၤတဖၣ်. ဒီးလံာ်လဲၢ်တဖၣ်အံၤ အပှ့ၤဒိၣ်မး သနာ်က့ အဝဲသ့ၣ် ဒွဲၣ်အူထီၣ်ဝဲလၢ ပှၤအါဂၤအမဲာ်ညါ. d အဃိ စီၤလူၤကၣ် ကွဲးဝဲလၢ “အဃိ ယဟိဝၤယွၤ အကလုၢ်ကထါန့ၣ် ဆဲးရၤလီၤအသး ဒီးမၤနၢၤတၢ်.” (မၤတၢ် ၁၉:၁၇-၂၀) ပထံၣ်ဘၣ်လၢ ယဟိဝၤယွၤ ဒီးပှၤလၢအဘူၣ်ထီၣ်ဘါထီၣ်အီၤတဖၣ်န့ၣ် မၤနၢၤဝဲ တၢ်ဘူၣ်တၢ်ဘါကမၣ် ဒီးတၢ်ဝံတၢ်နါ အတၢ်ဖံးတၢ်မၤတဖၣ်. ပှၤလၢအအိၣ်ဒီး တၢ်သးတီတဖၣ်အံၤန့ၣ် ပာ်လီၤတၢ်ဒိတၢ်တဲာ် လၢအဂ့ၤ လၢပဂီၢ်စ့ၢ်ကီး. မုၢ်မဆါတနံၤအံၤ ပအိၣ်ဘၣ်လၢ ပှၤလၢ အဘၣ်သူၣ်ဘၣ်သး တၢ်ဝံတၢ်နါ အတၢ်ဖံးတၢ်မၤတဖၣ်အကျါ. အဃိ ပမ့ၢ်သ့ၣ်ညါလီၤပသးလၢ ပအိၣ်ဒီး တၢ်ဖိတၢ်လံၤတမံၤမံၤလၢ အဘၣ်ဃးလိာ်သးဒီး တၢ်ဝံတၢ်နါန့ၣ် ပကြၢးကွၢ်လိ ပှၤအ့းဖ့းစူးဖိတဖၣ် ဒီးမၤဟးဂီၤကွံာ် တၢ်ဖိတၢ်လံၤတဖၣ်အံၤတဘျီဃီ. ဒီးမ့ၢ်ကီဝဲ ထဲလဲၣ်ဂ့ၤထဲလဲၣ်ဂ့ၤ ပတမၤဘၣ်ဃးပသးဒီး တၢ်ဝံတၢ်နါ အတၢ်ဖံးတၢ်မၤလၢ အလီၤသးဘၣ်အၢတဖၣ်အံၤဘၣ်.
“တၢ်သဘံၣ်သဘုၣ် ဟဲအိၣ်ထီၣ်ဝဲ” (မၤတၢ် ၁၉:၂၃-၄၁)
“သကိးသ့ၣ်ဧၢ, ဒ်သုသ့ၣ်ညါအသိး ပကဲဒိၣ်ထီၣ်လၢ တၢ်မၤအံၤအဃိလီၤ.”—မၤတၢ် ၁၉:၂၅
၁၆, ၁၇. (က) စီၤဒ့ၤမ့ၤတြံ ဒုးအိၣ်ထီၣ် တၢ်တၢထီၣ်တၢလီၤလၢ ဝ့ၢ်အ့းဖ့းစူး အပူၤဒ်လဲၣ်. (ခ) ပှၤအ့းဖ့းစူးဖိတဖၣ် နာ်ဝဲ အတၢ်ဘူၣ်တၢ်ဘါ ထဲတခီတၢၤန့ၣ် အဝဲသ့ၣ် ပာ်ဖျါထီၣ်ဝဲဒ်လဲၣ်.
၁၆ စီၤလူၤကၣ် ဆဲးပာ်ဖျါထီၣ်ဝဲလၢ မုၣ်ကီၤလံၢ်သူဝဲ ပှၤအၢပှၤသီတဖု. အဝဲတဲဝဲလၢ “ဘၣ်ဃးဒီး တၢ်မ့ၢ်တၢ်တီအကျဲန့ၣ် တၢ်သဘံၣ်သဘုၣ် ဟဲအိၣ်ထီၣ်ဝဲလီၤ.” တၢ်အိၣ်သးတခါအံၤန့ၣ် အလီၤဘၣ်ယိၣ်ဒိၣ်မး. e (မၤတၢ် ၁၉:၂၃) စီၤဒ့ၤမ့ၤတြံ လၢအကဲ ပှၤပိာ်စ့တဂၤန့ၣ် ဒုးအိၣ်ထီၣ်ဝဲ တၢ်ကီတၢ်ခဲ. အတဲဘၣ်ဝဲ အသကိးလၢ အတ့ဆါ တၢ်ဂီၤတၢ်ဖှီၣ်တဖၣ်လၢ အဝဲသ့ၣ်ဃုကျိၣ်ဃုစ့လၢ တၢ်မၤတခါအံၤ ဒီးမ့ၢ်လၢ ခရံာ်ဖိတဖၣ်န့ၣ် တဘူၣ်ထီၣ်ဘါထီၣ် တၢ်ဂီၤတၢ်ဖှီၣ်ဘၣ်အဃိ တၢ်ဂ့ၢ်လၢ စီၤပီလူးတဲဝဲတဖၣ်န့ၣ် ကမၤဘၣ်ဒိဝဲ ပှၤဆါတၢ်ဂီၤတၢ်ဖှီၣ်တဖၣ်န့ၣ် အစံပွါယ့. စီၤဒ့ၤမ့ၤတြံ သ့ၣ်ညါဝဲလၢ ပှၤဂီၢ်မုၢ်တဖၣ်န့ၣ် ပာ်ကဖၢလၢအသးလၢ အဝ့ၢ် ဒီးအပှၤကလုာ်အဖီခိၣ်. အဃိ အဝဲဟ့ၣ်ပလီၢ်ဝဲ ပှၤဂီၢ်မုၢ်တဖၣ်လၢ အဝဲသ့ၣ် မ့ၢ်ဒိကနၣ်ဝဲ စီၤပီလူးအတၢ်ကတိၤန့ၣ် “ပှၤကထံၣ် ပကစၢ်မုၣ်ဖးဒိၣ် နီၢ်အၢ်တ့းမံၤ အတၢ်လုၢ်ဟံၣ်အံၤ ဒ်သိးဒီး တၢ်ကလီကလီ.”—မၤတၢ် ၁၉:၂၄-၂၇.
၁၇ စီၤဒ့ၤမ့ၤတြံန့ၣ် ဂုာ်ကျဲးစၢးတဲတၢ်ဒ်သိး ပှၤဂီၢ်မုၢ်တဖၣ် တအဲၣ်ဒိးဒိကနၣ် စီၤပီလူးတဲတၢ်တဂ့ၤအဂီၢ်. တကးဒံးဘၣ် ပှၤပိာ်စ့တဖၣ်န့ၣ် သးပှံၢ်ထီၣ်တၢ်ဒိၣ်မး ဒီးအဝဲသ့ၣ်တဲဝဲလၢ “ပှၤအ့းဖ့းစူးဖိ အကစၢ်မုၣ် နီၢ်အၢ်တ့းမံၤန့ၣ် အစိကမီၤဒိၣ်ဝဲဒိၣ်မး.” ပှၤဝ့ၢ်ဖိတဖၣ် ပာ်ဖှိၣ်ထီၣ်အသး ဒီးတၢ်တၢထီၣ်တၢလီၤ အိၣ်ထီၣ်ဝဲ. f စီၤပီလူး အိၣ်ဒီးတၢ်သးဒူဒိၣ်မး ဒီးအအဲၣ်ဒိး လဲၤနုာ်လၢ ပှၤဂီၢ်မုၢ်တဖၣ်အကျါ လၢဘျီၣ်ကွၢ်ကီတၢ်အလီၢ် ဒီးတဲတၢ်ဒီးပှၤဂီၢ်မုၢ်. ဘၣ်ဆၣ် ပှၤလၢအစူၢ်က့ၤနာ်က့ၤတၢ်တဖၣ်န့ၣ် တြီအီၤဒ်သိး အတထံၣ်ဘၣ် တၢ်လီၤဘၣ်ယိၣ်တဂ့ၤအဂီၢ်. ဖဲန့ၣ်အဆၢကတီၢ် စီၤအလ့းစၣ်ဒြူး လၢအကဲဝဲ ပှၤယူဒၤဖိတဂၤန့ၣ် အဲၣ်ဒိး တဲပၠး ပှၤဂီၢ်မုၢ်လၢ ပှၤယူဒၤဖိ ဒီးခရံာ်ဖိတဖၣ်န့ၣ် လီၤဆီလိာ်အသးဒ်လဲၣ်အဂ့ၢ်. ဘၣ်ဆၣ် ပှၤဂီၢ်မုၢ်တဖၣ်န့ၣ် တကနၣ်အီၤဘၣ်. ဖဲပှၤသ့ၣ်ညါလၢ အကဲဝဲ ပှၤယူဒၤဖိအခါ ပှၤတဟ့ၣ်အခွဲးလၢ အကတဲတၢ်ဘၣ်. ဒီးပှၤဂီၢ်မုၢ်တဖၣ်န့ၣ် ဆဲးကိးပသူထီၣ်ဝဲလၢ “ပှၤအ့းဖ့းစူးဖိ အကစၢ်မုၣ် နီၢ်အၢ်တ့းမံၤန့ၣ် အစိကမီၤဒိၣ်ဝဲဒိၣ်မး.” အဝဲသ့ၣ် ကိးပသူထီၣ်ဝဲ ဒ်န့ၣ်ကအိၣ်ဝဲ ခံနၣ်ရံၣ်ညါ. ပှၤလၢအနာ် အတၢ်ဘူၣ်တၢ်ဘါ ထဲတခီတၢၤန့ၣ် အိၣ်တုၤလၢပစိၤခဲအံၤ. အဝဲသ့ၣ်န့ၣ် အခိၣ်ကိၤ ဒီးတအဲၣ်ဒိး ဒိကနၣ်တၢ်ဘၣ်.—မၤတၢ် ၁၉:၂၈-၃၄.
၁၈, ၁၉. (က) ပှၤဘၣ်မူဘၣ်ဒါတဂၤ မၤဘှ့ၣ်ဝဲ ပှၤဂီၢ်မုၢ်လၢ အသးဒိၣ်ထီၣ်တၢ်တဖၣ် လၢဝ့ၢ်အ့းဖ့းစူးအပူၤဒ်လဲၣ်. (ခ) တဘျီတခီၣ်န့ၣ် ယဟိဝၤယွၤ အပှၤဂီၢ်မုၢ်တဖၣ် ဒိးန့ၢ်ဘၣ်တၢ်ဒီသဒၢလၢ ပှၤဘၣ်မူဘၣ်ဒါတဖၣ်အအိၣ်ဒ်လဲၣ်. ဒီးဒ်သိး ပကဒိးန့ၢ်ဘၣ် တၢ်ဒီသဒၢလၢ ပှၤဘၣ်မူဘၣ်ဒါတဖၣ်အအိၣ်အဂီၢ် ပကဘၣ်မၤဒ်လဲၣ်.
၁၈ လၢခံကတၢၢ်န့ၣ် ပှၤဘၣ်မူဘၣ်ဒါတဂၤ မၤဘှ့ၣ်ဝဲ ပှၤဂီၢ်မုၢ်တဖၣ်န့ၢ်ဝဲ. အဝဲတဲတၢ် သ့သ့ဘၣ်ဘၣ် ဒီးတဲဘၣ် ပှၤဂီၢ်မုၢ်လၢ အသးပှံၢ်ထီၣ်တၢ်လၢ ခရံာ်ဖိတဖၣ်န့ၣ် တမၤဘၣ်ဒိအဝဲသ့ၣ် အတၢ်လုၢ်ဟံၣ် ဒီးအကစၢ်မုၣ်ဘၣ်. ဒီးအတဲဝဲလၢ စီၤပီလူး ဒီးအသကိးတဖၣ်န့ၣ် တမၤကမၣ်ဝဲ အဝဲသ့ၣ် အကစၢ်မုၣ် အၢ်တ့းမံၤ အတၢ်လုၢ်ဟံၣ်ဘၣ်. ဒီးပှၤဘၣ်မူဘၣ်ဒါတဂၤအံၤ တဲဘၣ်ပှၤဂီၢ်မုၢ်လၢ အဝဲသ့ၣ် မ့ၢ်တဘၣ်သူၣ်ဘၣ်သးဝဲ စီၤပီလူး ဒီးအသကိးဘၣ်န့ၣ် အဝဲသ့ၣ်ကြၢးတဲဝဲ ပှၤလၢအအိၣ်ဒီး တၢ်စိတၢ်ကမီၤတဖၣ်. တကးဒံးဘၣ် အဟ့ၣ်ပလီၢ်ဝဲ ပှၤဂီၢ်မုၢ်လၢ အမၤတၢထီၣ်တၢလီၤတၢ်တဖၣ်လၢ တၢ်လၢအဝဲသ့ၣ် မၤဝဲန့ၣ် ထီဒါလိာ်သးဒီး ပဒိၣ်အတၢ်သိၣ်တၢ်သီ. ပှၤဂီၢ်မုၢ်တဖၣ် အိၣ်ဘှ့ၣ်ဝဲန့ၣ် ဘၣ်သ့ၣ်သ့ၣ် ကမ့ၢ်လၢတၢ်ကတိၤတခါအံၤအဃိ. ဝံၤဒီး ပှၤဘၣ်မူဘၣ်ဒါတဂၤအံၤ ပျဲက့ၤပှၤဂီၢ်မုၢ်တဖၣ်လီၤ. အဝဲတဲတၢ် သ့သ့ဘၣ်ဘၣ် အဃိ ပှၤဂီၢ်မုၢ်တဖၣ်အသးခုၣ်လီၤက့ၤဝဲ.—မၤတၢ် ၁၉:၃၅-၄၁.
၁၉ ပှၤဘၣ်မူဘၣ်ဒါလၢ အသးဂ့ၤတဖၣ် ဒီသဒၢဝဲ ယ့ၣ်ၡူးအခ့အပှၤဒ်အံၤန့ၣ် တမ့ၢ်ဝဲ အဆိကတၢၢ်တဘျီ ဒီးအလီၢ်ခံကတၢၢ်တဘျီဘၣ်. တၢ်မၢဖိယိၤဟၣ် ထံၣ်ဘၣ်ဝဲ တၢ်ထံၣ်လၢညါခီလၢ ဖဲမုၢ်နံၤခံကတၢၢ်တဖၣ် အဆၢကတီၢ်န့ၣ် “ဟီၣ်ခိၣ်” ယူၢ်လီၤကွံာ်ဝဲ “ထံကျိ.” အအဲၣ်ဒိးတဲဝဲ ဖဲယ့ၣ်ၡူးအပျဲၢ်အဘီၣ် ထံၣ်ဘၣ်ဒီး မုၣ်ကီၤလံၢ် အတၢ်မၤအၢမၤနးအခါ ပှၤတနီၤ ကမၤစၢၤအဝဲသ့ၣ်. (လီၣ် ၁၂:၁၅, ၁၆) ဒီးတၢ်ကဲထီၣ်သးဒ်န့ၣ် သပှၢ်တၢၢ်. အါဘျီန့ၣ် ပထံၣ်ဘၣ်လၢ စံၣ်ညီၣ်ကွီၢ်လၢ အတီအလိၤတနီၤန့ၣ် မၤစၢၤဝဲ ပဝဲယဟိဝၤပှၤအုၣ်အသးတဖၣ် ဒ်သိး ပကဘူၣ်ထီၣ်ဘါထီၣ်ဘၣ်တၢ် လၢတၢ်သဘျ့ ဒီးကစံၣ်တဲၤတဲလီၤဘၣ် တၢ်သးခုကစီၣ်အဂီၢ်. စံၣ်ညီၣ်ကွီၢ်တဖၣ် မၤစၢၤပှၤဒ်အံၤန့ၣ် မ့ၢ်လၢအဝဲသ့ၣ်ထံၣ်ဘၣ်လၢ ပအိၣ်ဒီး လုၢ်လၢ်သကဲာ်ပဝး လၢအဂ့ၤအဃိ. စီၤပီလူးစ့ၢ်ကီး ဘၣ်သ့ၣ်သ့ၣ် ကမ့ၢ်လၢ ပှၤဘၣ်မူဘၣ်ဒါလၢ ဝ့ၢ်အ့းဖ့းစူးန့ၣ် ထံၣ်ဘၣ်ဝဲ အလုၢ်လၢ်သကဲာ်ပဝး လၢအဂ့ၤအဃိ ပှၤပာ်ကဲအီၤ ဒီးအဲၣ်ဒိးလၢအကပူၤဖျဲး. (မၤတၢ် ၁၉:၃၁) ပလုၢ်လၢ်သကဲာ်ပဝးန့ၣ် အကဲဘျုးဝဲသ့ဒိၣ်မးအဃိ ဒ်သိးပှၤဂၤ ကဘၣ်သူၣ်ဘၣ်သးပှၤအဂီၢ် ပကြၢးမၤတၢ်တီတီလိၤလိၤ ဒီးအိၣ်ဒီး လုၢ်လၢ်သကဲာ်ပဝး လၢအဂ့ၤထီဘိ.
၂၀. (က) ဖဲနဆိကမိၣ်ထံ ကစၢ်ယွၤအကလုၢ်ကထါ ရၤလီၤအသး ဒီးမၤနၢၤတၢ် လၢအပူၤကွံာ် ဒီးလၢပစိၤခဲအံၤအခါ နသးမၤသးဒ်လဲၣ်. (ခ) နပာ်လီၤနသးလၢ နကမၤမနုၤလဲၣ်.
၂၀ နမ့ၢ်ဆိကမိၣ်ထံ ကစၢ်ယွၤကလုၢ်ကထါ ရၤလီၤအသး ဒီးမၤနၢၤတၢ် လၢခရံာ်ဖိအစိၤန့ၣ် နကသးခုဒိၣ်မး. ဒီးလၢပစိၤခဲအံၤစ့ၢ်ကီး ပသ့ၣ်ညါဘၣ်လၢ ယဟိဝၤယွၤ မၤစၢၤပှၤဒ်န့ၣ်အဃိ ပသးခုစ့ၢ်ကီး. အဃိ လၢတၢ်မၤနၢၤတခါအံၤအကျါန့ၣ် နပၣ်ဃုာ် မ့ၢ်သ့ထဲတစဲးဖိသနာ်က့ နအဲၣ်ဒိးပၣ်ဃုာ်ဧါ. နမ့ၢ်အဲၣ်ဒိးပၣ်ဃုာ်န့ၣ် မၤထွဲတၢ်မၤလိလၢ ပမၤလိတ့ၢ်အီၤတဖၣ်အံၤ. ဆဲးအိၣ်ဒီးတၢ်ဆီၣ်လီၤသး, မၤထွဲ ယဟိဝၤယွၤ အတၢ်ဟံးစုနဲၣ်ကျဲ, ဆဲးဂုာ်ကျဲးစၢးဆူၣ်ဆူၣ်, ဟးဆှဲး တၢ်ဝံတၢ်နါအတၢ်ဖံးတၢ်မၤ, မၤတၢ်တီတီလိၤလိၤ ဒီးပာ်ဖျါထီၣ် လုၢ်လၢ်သကဲာ်ပဝးလၢအဂ့ၤ.
a ကွၢ်တၢ်လွံၢ်နၢၣ် လၢအမ့ၢ် “ ဝ့ၢ်အ့းဖ့းစူး—အၤစံအဝ့ၢ်ခိၣ်.”
b ဖဲစီၤပီလူးအိၣ်လၢ ဝ့ၢ်အ့းဖ့းစူးအခါ အကွဲးဝဲ ၁ ကရံၣ်သူး စ့ၢ်ကီး.
c တၢ်ကတိၤလၢအမ့ၢ် တၢ်ကံးညာ်န့ၣ် ဘၣ်သ့ၣ်သ့ၣ် ကအဲၣ်ဒိးတဲဝဲ တၢ်ကံးညာ်လၢ စီၤပီလူး စၢဃာ်ဝဲလၢ အမဲာ်တီးခိၣ် ဒ်သိးအကပၢၤသုတလီၤလၢ အမဲာ်ချံပူၤတဂ့ၤအဂီၢ်. ဒီးတၢ်ကူတၢ်သိးန့ၣ် အဲၣ်ဒိးတဲဝဲ တၢ်မၤအတၢ်ကူတၢ်သိးလၢ စီၤပီလူးစၢဃာ်ဝဲလၢ အယီၢ်ဒ့အလိၤ. ဒီးစီၤပီလူးမၤဝဲဒ်အံၤန့ၣ် အပာ်ဖျါထီၣ်ဝဲလၢ ဖဲအတစံၣ်တဲၤတဲလီၤတၢ်ဘၣ်အခါန့ၣ် အမၤဝဲ ပှၤဆးဒဲအတၢ်မၤ. ဘၣ်သ့ၣ်သ့ၣ် ကမ့ၢ်ဝဲလၢ ဂီၤခီ ဂီၤဂီၤ.—မၤတၢ် ၂၀:၃၄, ၃၅.
d စီၤလူၤကၣ် တဲဝဲလၢ လံာ်တဖၣ်အံၤအလီၤလၢဝဲ စ့ညၣ်အဘ့ၣ် ၅၀,၀၀၀ ညါ. ဒီးစ့တဖၣ်အံၤ မ့မ့ၢ်ဘၣ်ဖုး စ့ဒန့ၤရံၤန့ၣ် ဖဲန့ၣ်အဆၢကတီၢ်ပှၤကန့ၢ်ဘၣ်ဝဲ စ့ဒန့ၤရံၤ ၅၀,၀၀၀ အဂီၢ်ပှၤကဘၣ်မၤတၢ် အသီ ၅၀,၀၀၀ ညါ. အဃိ အဝဲသ့ၣ် မ့ၢ်မၤတၢ်ကိးနံၤဒဲးန့ၣ် ကဘၣ်မၤတၢ် ယံာ်ဝဲ ၁၃၇ နံၣ်ညါ.
e ပှၤတနီၤတဲဝဲလၢ ဖဲစီၤပီလူးတဲဝဲ ပှၤကရံၣ်သူးဖိတဖၣ်လၢ “ပကမူဧါ တမူဧါန့ၣ် ပတသ့ၣ်ညါလၢၤဘၣ်” အခါ အအဲၣ်ဒိးတဲဝဲ တၢ်အိၣ်သးလၢ အထံၣ်ဘၣ်ဝဲဖဲ ဝ့ၢ်အ့းဖ့းစူးအပူၤ. (၂ ကရံၣ် ၁:၈) ဘၣ်ဆၣ် ဖဲစီၤပီလူးတဲဝဲလၢ တၢ်သဘံၣ်သဘုၣ် ဟဲအိၣ်ထီၣ်ဝဲအခါန့ၣ် ဘၣ်သ့ၣ်သ့ၣ် အကအဲၣ်ဒိးတဲဝဲ တၢ်အိၣ်သးလၢ အလီၤဘၣ်ယိၣ်ဖးဒိၣ်တခါ. အဒိ အကွဲးဝဲလၢအ “ဒုးလိာ်သးဒီး ဆၣ်ဖိကီၢ်ဖိအမံၤလၢ အဒူအဃိၤတဖၣ် လၢဝ့ၢ်အ့းဖ့းစူးအပူၤ.” ဘၣ်သ့ၣ်သ့ၣ် အဝဲကအဲၣ်ဒိးတဲဝဲ အတၢ်လဲၤခီဖျိ ဖဲအဘၣ်ဒုးလိာ်အသးဒီး ဆၣ်ဖိကီၢ်ဖိလၢ တၢ်လိၣ်ကွဲအပျီပူၤ မ့တမ့ၢ် ဖဲပှၤမၤအၢမၤနးအီၤအခါ. (၁ ကရံၣ် ၁၅:၃၂) အတၢ်ကတိၤအံၤ အကဲဝဲတၢ်အဒိသ့ မ့တမ့ၢ်အကဲဝဲ တၢ်အနီၢ်ကီၢ်သ့.
f ပှၤလၢအမၤသကိးတၢ် ဒ်သိးဒီး ပှၤပိာ်စ့တဖၣ်အံၤန့ၣ် ဖျါလီၤဂာ်လၢ အစိအကမီၤ အိၣ်အါမး. အဒိ အနံၣ်တကယၤ ဝံၤအလီၢ်ခံ ပှၤကုၢ်ကိၣ်လၢ အမၤသကိးတၢ်တဖုန့ၣ် ဒုးအိၣ်ထီၣ်ဝဲ တၢ်တၢထီၣ်တၢလီၤ ဒ်အံၤလၢ ဝ့ၢ်အ့းဖ့းစူးအပူၤစ့ၢ်ကီး.
