တၢ်ကတိၤကျၢၢ်တံၢ်
“သုကကွၢ်လိပှၤလၢအနာ်တၢ်ဒီး ဝံသးစူၤတၢ်သတးဒီး န့ၢ်သါတၢ်စံးပာ်တဖၣ်လီၤ.” —ဧ့ၤဘြံၤ ၆:၁၂.
၁, ၂. ခဲအံၤန့ၣ် ဘၣ်မနုၤအဃိ အရ့ဒိၣ်ဒိၣ်မးလၢ ပကမၤဒိၣ်ထီၣ်အါထီၣ်ပတၢ်နာ်လဲၣ်. ဟ့ၣ်တၢ်အဒိတက့ၢ်.
တၢ်နာ်မ့ၢ်တၢ်ဂ့ၤတၢ်ဝါ လၢအလီၤဘၣ်သူၣ်ဘၣ်သးတခါန့ၣ်လီၤ. ဒီးမ့ၢ်တၢ်လၢအရ့ဒိၣ်လၢပဂီၢ်စ့ၢ်ကီးလီၤ. ခဲအံၤပတၢ်နာ်မ့ၢ်တအိၣ်ဘၣ်န့ၣ် အရ့ဒိၣ်ဒိၣ်မးလၢ ပကဘၣ်ဒုးအိၣ်ထီၣ်ပတၢ်နာ်န့ၣ်လီၤ. ဒီးပတၢ်နာ်မ့ၢ်အိၣ်လံန့ၣ် အရ့ဒိၣ်စ့ၢ်ကီးလၢ ပကဘၣ်ဒီသဒၢအီၤဒီး မၤဒိၣ်ထီၣ်အါထီၣ်အီၤလီၤ. ဘၣ်မနုၤအဃိလဲၣ်.
၂ ထံၣ်ကမှံကွၢ်လၢ နဘၣ်လဲၤခီဂာ်ဝဲမဲးမုၢ်ပျီဖးလဲၢ်တတီၤဒီး နအဲၣ်ဒိးအီထံသပှၢ်ကတၢၢ်တက့ၢ်. ဖဲနဃုထံၣ်န့ၢ်ထံဒီး ဟံးန့ၢ်အီၤအခါ အရ့ဒိၣ်ဒိၣ်မးလၢ နကဒီသဒၢအီၤလၢမုၢ် ဒ်သိးထံအသဝံသုတဟးထီၣ်ဒီး လၢာ်ကွံာ်တဂ့ၤအဂီၢ်လီၤ. တကးဒံးဘၣ် နကဘၣ်ဃုကျဲလၢနကမၤပှဲၤ နထံထီဘိဒ်သိးကအိၣ်ဝဲ လၢလၢလီၢ်လီၢ်တုၤလၢနလဲၤခီဂာ်မဲးမုၢ်ပျီန့ၢ်ဝဲတစုလီၤ. မုၢ်မဆါတနံၤအံၤ ပအိၣ်မူဘၣ်လၢဟီၣ်ခိၣ်လၢအ လီၤဂာ်ဒ်မဲးမုၢ်ပျီအသိး, ခီဖျိလၢပှၤအါတက့ၢ် တအဲၣ်ဒိးဘူၣ်ထီၣ်ဘါထီၣ် ယဟိဝၤယွၤအဃိလီၤ. မ့မ့ၢ်တၢ်နာ်နီၢ်နီၢ်န့ၣ် ကၤဒိၣ်မးအဃိ လီၤဂာ်ဒ်ထံလၢမဲးမုၢ်ပျီအသိးလီၤ. ဒီးဒ်ထံလၢမဲးမုၢ်ပျီအသိး ပမ့ၢ်တဒီသဒၢပတၢ်နာ် ဒီးပမ့ၢ်တမၤဒိၣ်ထီၣ်အါထီၣ်အီၤထီဘိန့ၣ် ကလီၤမၢ်ကွံာ်ဝဲချ့သဒံးလီၤ. ဒီးထံမ့ၢ်တအိၣ်ဘၣ်န့ၣ် ပကသံဝဲလီၤ. ဒ်န့ၣ်အသိးပတၢ်နာ်မ့ၢ်တအိၣ်ဘၣ်န့ၣ် ပကသံလၢနီၢ်သးတခီလီၤ.—ရိ. ၁:၁၇.
၃. ဒ်သိးပမၤဒိၣ်ထီၣ်အါထီၣ် ပတၢ်နာ်ကသ့အဂီၢ် ယဟိဝၤယွၤပာ်ဖျါထီၣ်န့ၢ်ပှၤတၢ်မနုၤလဲၣ်, ဒီးပကဘၣ်မၤ တၢ်မနုၤလဲၣ်.
၃ ယဟိဝၤယွၤသ့ၣ်ညါဝဲလၢ ပလိၣ်ဘၣ်တၢ်နာ်သပှၢ်ကတၢၢ် ဒီးသ့ၣ်ညါစ့ၢ်ကီးဝဲလၢ မုၢ်မဆါတနံၤညါအံၤန့ၣ် ကီဒိၣ်မးလၢပကမၤဒိၣ်ထီၣ်အါထီၣ် ပတၢ်နာ်န့ၣ်လီၤ. လၢတၢ်န့ၣ်အဃိ ယဟိဝၤယွၤ ပာ်ဖျါထီၣ်န့ၢ်ပှၤ, ပှၤလၢအဒိဂ့ၤတဲာ်ဘၣ်အဂ့ၢ် လၢလံာ်စီဆှံအပူၤ ဒ်သိးပကကွၢ်လိအဝဲသ့ၣ်အဂီၢ်လီၤ. တၢ်မၢဖိပီလူးဟ့ၣ်သဆၣ်ထီၣ်ပှၤလၢပ “ကကွၢ်လိပှၤလၢအနာ်တၢ်ဒီး ဝံသးစူၤတၢ်သတးဒီး န့ၢ်သါတၢ်စံးပာ်တဖၣ်လီၤ.” (ဧ့ၤ. ၆:၁၂) လၢတၢ်န့ၣ်အဃိ ယဟိဝၤယွၤအတၢ်ကရၢကရိ ဟ့ၣ်ဂံၢ်ဟ့ၣ်ဘါပှၤလၢ ပကဂုာ်ကျဲးစၢးကွၢ်လိမၤဒိး ပှၤတီပှၤလိၤလၢညါတဖၣ် လၢဘၣ်တၢ်ပာ်ဖျါထီၣ်အီၤလၢ လံာ်တဘ့ၣ်အံၤအပူၤန့ၣ်လီၤ. ဘၣ်ဆၣ်ခဲအံၤန့ၣ် ပကဘၣ်မၤတၢ်မနုၤလဲၣ်. (၁) ပကဘၣ်မၤဂၢၢ်ကျၢၤထီၣ်ပတၢ်နာ်ထီဘိ (၂) ပကဘၣ်ဆိကမိၣ် ပတၢ်မုၢ်လၢ်ထီဘိလီၤ.
၄. မုၣ်ကီၤလံၢ် အဲၣ်ဒိးလၢပတၢ်နာ် ကကဲထီၣ်အသးဒ်လဲၣ်, ဘၣ်ဆၣ် ဘၣ်မနုၤအဃိ ပတကြၢးဘၣ်ယိၣ်တၢ်အါတလၢလဲၣ်.
၄ မၤဂၢၢ်ကျၢၤထီၣ်နတၢ်နာ် ထီဘိတက့ၢ်. ပဒုၣ်ပဒါမုၣ်ကီၤလံၢ် ဂုာ်ကျဲးစၢးဝဲဒ်သိး ပတၢ်နာ်ကလီၤစှၤအဂီၢ်လီၤ. အဝဲမ့ၢ်ပှၤလၢ အပၢဟီၣ်ခိၣ်ဒီဘ့ၣ် ဒီးခီဖျိလၢပအိၣ်မူဘၣ်လၢ အတၢ်ရဲၣ်တၢ်ကျဲၤအပူၤအဃိ ကီဒိၣ်မးလၢပကမၤဂၢၢ်ကျၢၤထီၣ် ပတၢ်နာ်န့ၣ်လီၤ. မုၣ်ကီၤလံၢ်န့ၣ် မ့ၢ်ဒုၣ်ဒါလၢအဂံၢ်ဆူၣ်ဘါဆူၣ်ဘၣ်ဆၣ် မ့ၢ်ပကြၢးဘၣ်ယိၣ်တၢ်လၢ ပမၤဂၢၢ်ကျၢၤထီၣ်ပတၢ်နာ်တသ့လၢၤဘၣ်ဧါ. တမ့ၢ်လ့ၤတက့ၤဘၣ်. ပမ့ၢ်ဂုာ်ကျဲးစၢးမၤဒိၣ်ထီၣ်ပတၢ်နာ်န့ၣ် ယဟိဝၤယွၤကကဲထီၣ်ပတံၤသကိးန့ၣ်လီၤ. ဒီးကစၢ်ယွၤမ့ၢ်အိၣ်လၢ ပအိၣ်တပၤန့ၣ် ပတြီဆၢမုၣ်ကီၤလံၢ်သ့ဝဲတကးဒံးဘၣ် အဝဲကဃ့ၢ်ကွံာ်လၢပအိၣ်လီၤ. (ယၤ. ၄:၇) ပတြီဆၢအီၤသ့ခီဖျိလၢ ပဟံးန့ၢ်တၢ်ဆၢကတီၢ်ကိးနံၤဒဲး ဒ်သိးပကမၤဒိၣ်ထီၣ်အါထီၣ် ပတၢ်နာ်အဂီၢ်လီၤ. ပမၤအီၤကသ့ဒ်လဲၣ်.
၅. ပှၤတီပှၤလိၤလၢညါတဖၣ်န့ၣ် ဒုးအိၣ်ထီၣ်အတၢ်နာ်လၢကျဲဒ်လဲၣ်. တဲဖျါထီၣ်တက့ၢ်.
၅ ဒ်ပသ့ၣ်ညါဘၣ်အသိး ပှၤတီပှၤလိၤလၢညါတဖၣ်အံၤ တအိၣ်ဖျဲၣ်ထီၣ်ဃုာ်ဒီး တၢ်နာ်ဘၣ်. အဝဲသ့ၣ်အတၢ်အိၣ်မူ ပာ်ဖျါထီၣ်ဝဲလၢ တၢ်နာ်န့ၣ်ဟဲအိၣ်ထီၣ်ဝဲ ခီဖျိလၢယဟိဝၤယွၤအသးစီဆှံန့ၣ်လီၤ. (ကလၤ. ၅:၂၂, ၂၃) မ့ၢ်လၢအဝဲသ့ၣ် ဃ့ထုကဖၣ်လၢကဒိးန့ၢ်ဘၣ်ဝဲ ယဟိဝၤယွၤအတၢ်မၤစၢၤအဃိ ကစၢ်မၤဂၢၢ်ကျၢၤထီၣ် အဝဲသ့ၣ်အတၢ်နာ်ထီဘိလီၤ. မ်ပကွၢ်လိအဝဲသ့ၣ်တက့ၢ်. ပဝဲစ့ၢ်ကီးပကဘၣ် ဃ့ယဟိဝၤယွၤအသးစီဆှံ ဒီးဂုာ်ကျဲးစၢးအိၣ်မူဒ် ပဃ့ထုကဖၣ်အသိးန့ၣ်လီၤ. ပမ့ၢ်မၤဒ်န့ၣ်န့ၣ် ယဟိဝၤယွၤကဟ့ၣ်ပှၤ သးစီဆှံသပှၢ်ကတၢၢ်လီၤ. (လူၤကၣ် ၁၁:၁၃) ပကဘၣ်မၤဒံး တၢ်မနုၤလဲၣ်.
၆. ဖဲပဖးလံာ်စီဆှံအခါ ဒ်သိးပကဒိးန့ၢ်ဘၣ်တၢ်အဘျုး လၢလၢပှဲၤပှဲၤအဂီၢ် ပကဘၣ်မၤဒ်လဲၣ်.
၆ လံာ်တဘ့ၣ်အံၤ ပာ်ဖျါထီၣ်ဝဲပှၤတနီၤနီၤလၢ အအိၣ်ဒီးတၢ်စူၢ်တၢ်နာ်လီၤလီၤဆီဆီန့ၣ်လီၤ. ဘၣ်ဆၣ်ပှၤအဂၤတဖၣ်လၢ လံၤတဘ့ၣ်အံၤတပာ်ဖျါထီၣ်အဂ့ၢ်န့ၣ် အိၣ်ဒံးဝဲဒီဒူၣ်လီၤ. (ဖး ဧ့ၤဘြံၤ ၁၁:၃၂ တက့ၢ်.) ပမ့ၢ်ဃုသ့ၣ်ညါအဝဲသ့ၣ်တဂၤစုာ်စုာ်အဂ့ၢ် လီၤတံၢ်လီၤဆဲးန့ၣ် ပကဒိးန့ၢ်ဘၣ်တၢ်အဘျုးအါမးလီၤ. ဘၣ်ဆၣ်ပမ့ၢ်ဖးဝံၤတၢ်မံၤန့ၣ် ပတၢ်နာ်တဒိၣ်ထီၣ်အါထီၣ်ထဲထဲန့ၣ်ဘၣ်. ပမ့ၢ်အဲၣ်ဒိးဒိးန့ၢ်ဘၣ်အဘျုးလၢလၢပှဲၤပှဲၤန့ၣ် ပကဘၣ်ဟံးန့ၢ်တၢ်ဆၢကတီၢ်ဒီး ဃုသ့ၣ်ညါပှၤသ့ၣ်တဖၣ်အံၤ အတၢ်အိၣ်သးထံထံဆးဆးလီၤ. ဒီးပမ့ၢ်သ့ၣ်နီၣ်ထီၣ်လၢ ပှၤပိာ်မုၣ်ဒီးပိာ်ခွါလၢအတလၢတပှဲၤသ့ၣ်တဖၣ်အံၤ “မ့ၢ်ပှၤကညီ, ဒ်ပဝဲအသိး” န့ၣ်အဝဲသ့ၣ်အတၢ်လဲၤခီဖျိ ကထိၣ်ဟူးထိၣ်ဂဲၤထီၣ်ပှၤန့ၣ်လီၤ. (ယၤ. ၅:၁၇) ပမ့ၢ်ဆိကမိၣ်ကွၢ် တၢ်လၢပှၤတီပှၤလိၤတဖၣ်အံၤ ကွၢ်ဆၢၣ်မဲာ်ဘၣ်ဝဲ ဒီးအဝဲသ့ၣ်တူၢ်ဘၣ်တၢ်ဒ်လဲၣ်အဂ့ၢ်န့ၣ် ပကသ့ၣ်ညါဘၣ်လၢ အဝဲသ့ၣ်လီၤဂာ်ဒ်ပဝဲအသိး ဒီးပဒိသူၣ်ဒိသးအီၤသ့ဝဲလီၤ.
၇–၉. (က) ပှၤတီပှၤလိၤလၢညါတဖၣ် မ့ၢ်ဒိးန့ၢ်ဘၣ်တၢ်ခွဲးတၢ်ယာ် လၢကမၤဝဲယဟိဝၤယွၤအတၢ်မၤ ဒ်ပမၤအီၤလၢမုၢ်မဆါတနံၤအံၤအသိးန့ၣ် အဝဲသ့ၣ်ကတူၢ်ဘၣ်ဒ်လဲၣ်. (ခ) ဘၣ်မနုၤအဃိ ပကြၢးမၤဂၢၢ်ကျၢၤထီၣ်ပတၢ်နာ် ခီဖျိလၢပတၢ်မၤလဲၣ်.
၇ ပမၤဂၢၢ်ကျၢၤထီၣ်ပတၢ်နာ် ခီဖျိလၢပတၢ်ဆၢတဲာ်ဒီး ပတၢ်မၤသ့ဝဲစ့ၢ်ကီးလီၤ. ဒ်လံာ်စီဆှံတဲဝဲအသိး “တၢ်နာ်တအိၣ်ဘၣ်ဒီး တၢ်မၤတဖၣ်မ့ၢ်တၢ်သံ” လီၤ. (ယၤ. ၂:၂၆) ပှၤပိာ်မုၣ်ဒီးပိာ်ခွါလၢ လံာ်တဘ့ၣ်အံၤအပူၤ မ့ၢ်ဒိးန့ၢ်ဘၣ်တၢ်မၤလၢ ယဟိဝၤယွၤဟ့ၣ်လီၤပှၤလၢ မုၢ်မဆါတနံၤအံၤန့ၣ် အဝဲသ့ၣ်ကသးခုဝဲထဲလဲၣ်န့ၣ် ဆိကမိၣ်ကွၢ်တက့ၢ်.
၈ အဒိ, လၢညါန့ၣ်ယဟိဝၤယွၤ မ့ၢ်တဲဘၣ်စီၤအၤဘြၤဟၣ်လၢ နတလိၣ်ဘူၣ်ထီၣ်ဘါထီၣ်ယၤလၢ တၢ်လုၢ်လီၢ်လၢပှၢ်မုၢ်ကနၢလၢၤဘၣ်, နဘူၣ်ထီၣ်ဘါထီၣ်ယၤလၢ ဒီပုၢ်ဝဲၢ်အါဂၤအကျါ လၢဘီမုၢ်ဘျီၣ်ဒိၣ်ဒီး လၢတၢ်အိၣ်ဖှိၣ်ဖးဒိၣ်သ့ဝဲန့ၣ် စီၤအၤဘြၤဟၣ်အသးကမၤအသးဒ်လဲၣ်. ဒီးဖဲန့ၣ်န့ၣ် စီၤအၤဘြၤဟၣ်မ့ၢ်နၢ်ဟူဘၣ် ယွၤအတၢ်စံးပာ်လၢ အဝဲထံၣ်စိဝဲထဲလၢအယံၤ, ဘၣ်တၢ်တဲဖျါထီၣ်အခီပညီလီၤတံၢ်လီၤဆဲးန့ၣ် အဝဲကတူၢ်ဘၣ်ဒ်လဲၣ်. (ဖး ဧ့ၤဘြံၤ ၁၁:၁၃ တက့ၢ်.) ဒီးကစၢ်ယွၤမ့ၢ်တဲဘၣ် ဝံအ့ၤလံယၤလၢ နတလိၣ်မၤသံဘဧၤလးအဝံတဖၣ်လၢၤဘၣ်. ဒီးတလိၣ်လၢနဘၣ်အိၣ်လၢ စီၤပၤအၢအၢသီသီအတၢ်ပၢအဖီလာ်လၢၤဘၣ်. လၢတၢ်န့ၣ်အလီၢ် ကစၢ်ယွၤမ့ၢ်တဲဘၣ်အီၤလၢ နကဘၣ်လဲၤစိာ်တၢ်သးခုကစီၣ်ဆူ ပှၤလၢနခိၣ်နဃၢၤအအိၣ်န့ၣ် အဝဲကတူၢ်ဘၣ်ဒ်လဲၣ်. ပှၤတီပှၤလိၤလၢညါတဖၣ်အံၤ မ့ၢ်ဒိးန့ၢ်ဘၣ်တၢ်ခွဲးတၢ်ယာ် ဒ်ပဝဲဒၣ်အသိးန့ၣ် အဝဲသ့ၣ်ကသးခုဝဲဒိၣ်မးလီၤ.
၉ ပဝဲခဲလၢာ် မ်ပမၤဂၢၢ်ကျၢၤထီၣ်ပတၢ်နာ် ခီဖျိလၢပတၢ်မၤတက့ၢ်. ပမ့ၢ်မၤဒ်န့ၣ်န့ၣ် မ့ၢ်ဒၣ်ပမၤထွဲ ပှၤတီပှၤလိၤလၢညါတဖၣ်လၢအိၣ်ဒီးတၢ်နာ် အဒိအတဲာ်န့ၣ်လီၤ. ဒ်တၢ်ကတိၤအိးထီၣ် ပာ်ဖျါထီၣ်ဝဲအသိး ပကတူၢ်ဘၣ်လၢအဝဲသ့ၣ် ကဲထီၣ်ပတံၤသကိးန့ၣ်လီၤ. ဘၣ်ဆၣ် တယံာ်တမီၢ်န့ၣ် ပကရ့လိာ်ဘၣ်ပသးဒီး အဝဲသ့ၣ်အနီၢ်ကီၢ်လီၤ.
၁၀. လၢပၤရဒံစူးအပူၤန့ၣ် တၢ်မနုၤကမၤသးခုပသးလဲၣ်.
၁၀ ဆိကမိၣ် နတၢ်မုၢ်လၢ်ထီဘိတက့ၢ်. ပှၤတီပှၤလိၤလၢညါတဖၣ်န့ၣ် ဟံးန့ၢ်တၢ်ဂံၢ်တၢ်ဘါလၢ တၢ်မုၢ်လၢ်လၢယဟိဝၤယွၤ ဟ့ၣ်လီၤအဝဲသ့ၣ်န့ၣ်လီၤ. မ့မ့ၢ်နၤန့ၣ် မ့ၢ်နမၤဒ်န့ၣ်စ့ၢ်ကီးဧါ. အဒိ, ဖဲ “ပှၤသံအတီ . . . ဂဲၤဆၢထၢၣ်က့ၤ” ဒီးပထံၣ်လိာ်ဘၣ်ပသးဒီး အဝဲသ့ၣ်အဆၢကတီၢ် ပကသးခုထဲလဲၣ်န့ၣ် ဆိကမိၣ်ကွၢ်တက့ၢ်. (ဖး မၤတၢ် ၂၄:၁၅ တက့ၢ်.) မ့ၢ်နအဲၣ်ဒိးသံကွၢ်အဝဲသ့ၣ် တၢ်သံကွၢ်မနုၤတဖၣ်လဲၣ်.
၁၁, ၁၂. ဖဲဟီၣ်ခိၣ်သီန့ၣ် နကအဲၣ်ဒိးသံကွၢ် (က) စီၤဟ့းဘ့းလး, (ခ) စီၤနိအၤ, (ဂ) စီၤအၤဘြၤဟၣ်, (ဃ) နီၢ်ရူၤသး, (င) နီၢ်အဘံးကါယံးလး ဒီး (စ) နီၢ်အ့ၤစတၢ် လၢတၢ်သံကွၢ်မနုၤတဖၣ်လဲၣ်.
၁၁ ဖဲနထံၣ်လိာ်သးဒီး စီၤဟ့းဘ့းလးအခါ နတအဲၣ်ဒိးသံကွၢ်အီၤ အမိၢ်အပၢ်အဂ့ၢ်ဘၣ်ဧါ. ဒီးနကအဲၣ်ဒိးသံကွၢ်အီၤလၢ “မ့ၢ်နတဲသကိးတၢ်ဒီး ခ့ရူာ်တဖၣ်လၢအခိးဝဲ ဧ့ၤဒ့ၣ်တၤသၣ်လီၢ်န့ၣ် အိၣ်တဘျီဘျီဧါ, ဒီးအဝဲသ့ၣ်စံးဆၢက့ၤနၤဒ်လဲၣ်.” မ့မ့ၢ်စီၤနိအၤန့ၣ် နကအဲၣ်ဒိးသံကွၢ်အီၤဒ်လဲၣ်. အဒိ နကသံကွၢ်အီၤလၢ “မ့ၢ်နပျံၤ ပှၤနီၢ်ဒိၣ်ဖိတဘျီဘျီဧါ, ဖဲနအိၣ်လၢကဘီပူၤ ဒီတနံၣ်အတီၢ်ပူၤန့ၣ် နအံးထွဲကွၢ်ထွဲဆၣ်ဖိကီၢ်ဖိတဖၣ်ဒ်လဲၣ်.” ဒီးနမ့ၢ်ထံၣ်လိာ်သးဒီး စီၤအၤဘြၤဟၣ်န့ၣ် နကအဲၣ်ဒိးသံကွၢ်အီၤလၢ “မ့ၢ်နတဲသကိးတၢ်ဒီး စီၤၡ့ၣ်အိၣ်တဘျီဘျီဧါ, မ့ၢ်မတၤသိၣ်လိနၤလၢ ယဟိဝၤယွၤအဂ့ၢ်လဲၣ်, ဖဲနဟးထီၣ်လၢ ဝ့ၢ်အူၢ်အခါန့ၣ် နတူၢ်ဘၣ်ဒ်လဲၣ်.”
၁၂ ပှၤပိာ်မုၣ်လၢ ကဂဲၤဆၢထၢၣ်သမူထီၣ်က့ၤတဖၣ်စ့ၢ်ကီး နအဲၣ်ဒိးသံကွၢ်အီၤ တၢ်သံကွၢ်မနုၤတဖၣ်လဲၣ်. နကအဲၣ်ဒိးသံကွၢ်လၢ “နီၢ်ရူၤသးဧၢ, ဘၣ်မနုၤအဃိ နအဲၣ်ဒိးဘူၣ်ထီၣ်ဘါထီၣ် ယဟိဝၤယွၤလဲၣ်” “နီၢ်အဘံးကါယံးလးဧၢ နကက့ၤတဲဘၣ်နဝၤလၢ နမၤစၢၤစီၤဒၤဝံးအဂ့ၢ်န့ၣ် မ့ၢ်နပျံၤတၢ်ဧါ” “နီၢ်အ့ၤစတၢ်ဧၢ, လံာ်စီဆှံကွဲးဖျါထီၣ်ဝဲ တၢ်မၤအသးဒီးနၤအဂ့ၢ်ဝံၤအလီၢ်ခံန့ၣ် နၤဒီးစီၤမၢ်ဒကဲၤ သုတၢ်အိၣ်မူမၤအသးဒ်လဲၣ်.”
၁၃. (က) ပှၤလၢအဂဲၤဆၢထၢၣ်သမူထီၣ်က့ၤတဖၣ် ကအဲၣ်ဒိးသံကွၢ်နၤ တၢ်သံကွၢ်မနုၤတဖၣ်လဲၣ်. (ခ) နအိၣ်ဒီးတၢ်ခွဲးတၢ်ယာ်လၢ နကထံၣ်လိာ်သးဒီး ပှၤတီပှၤလိၤလၢညါတဖၣ်အဃိ နတူၢ်ဘၣ်ဒ်လဲၣ်.
၁၃ ပှၤတီပှၤလိၤလၢညါတဖၣ်စ့ၢ်ကီး ကအဲၣ်ဒိးသံကွၢ်နၤ တၢ်သံကွၢ်တဘျုးဖျၢၣ်ညါ. မုၢ်နံၤခံကတၢၢ်မၤအသးဒ်လဲၣ် ဒီးဖဲတၢ်ဆၢကတီၢ်လၢအကီအခဲအံၤအတီၢ်ပူၤ ကစၢ်ယွၤဆိၣ်ဂ့ၤဝဲ အပှၤဂီၢ်မုၢ်ဒ်လဲၣ်အဂ့ၢ်န့ၣ် ပကတဲဘၣ်အဝဲသ့ၣ်လၢ တၢ်သူၣ်ဖှံသးညီအပူၤလီၤ. ဒီးဖဲအဝဲသ့ၣ် နၢ်ဟူဘၣ်ဝဲလၢ ယဟိဝၤယွၤမၤလၢထီၣ်ပှဲၤထီၣ် အတၢ်စံးပာ်ခဲလၢာ်အဂ့ၢ်န့ၣ် ကထုးန့ၢ်အဝဲသ့ၣ်အသးဒိၣ်မးလီၤ. ဖဲန့ၣ်အဆၢကတီၢ် ပတလိၣ်ထံၣ်ကမှံကွၢ် ပှၤတီပှၤလိၤလၢညါတဖၣ်အံၤအဂ့ၢ်လၢၤဘၣ်. အဝဲသ့ၣ်ကအိၣ်ဒီးပှၤလၢ ပၤရဒံစူးအပူၤသပှၢ်ကတၢၢ်လီၤ. လၢတၢ်န့ၣ်အဃိ ခဲအံၤန့ၣ် မ်ပဆဲးကွၢ်လိမၤဒိး ပှၤတီပှၤလိၤလၢညါတဖၣ် ဒီးဂုာ်ကျဲးစၢးလၢအဂ့ၤကတၢၢ်ဒ်သိး ပှၤသ့ၣ်တဖၣ်အံၤ ကကဲထီၣ်ပှၤနီၢ်ကီၢ်လၢပဂီၢ်တက့ၢ်. နမ့ၢ်မၤဒ်န့ၣ်န့ၣ် နၤဒီးနတံၤသကိးတဖၣ်အံၤ ကဘူၣ်ထီၣ်ဘါထီၣ်ဘၣ် ယဟိဝၤယွၤလၢ တၢ်သူၣ်ဖှံသးညီအပူၤ လီၤထူလီၤယိာ်န့ၣ်လီၤ.
