တၢ်မၤလိ ၈
အတၢ်မုၢ်လၢ် တလၢပှဲၤဘၣ်ဆၣ် ဆဲးလဲၤဝဲဆူညါ
၁. ဘၣ်မနုၤအဃိ ဝ့ၢ်ၡံလိၤပှဲၤဒီးတၢ်သူၣ်အုးသးအုးလဲၣ်.
ဝ့ၢ်ၡံလိၤလီၤထွံလီၤယွၤလၢ မဲာ်ထံမဲာ်နိအပူၤလံ. စီၤၡမူၤအ့လးနၢ်ဟူဘၣ်ဝဲ တၢ်ဟီၣ်တၢ်ယၢၤသီၣ်ထီၣ်ဝဲလၢ ဟံၣ်တဖျၢၣ်ဘၣ်တဖျၢၣ်အပူၤလီၤ. ပိာ်မုၣ်ဒီးဖိဒံဖိသၣ်တဖၣ် ဟီၣ်ကိးပသူထီၣ်ဝဲ ပှဲၤဒီးတၢ်သူၣ်အုးသးအုး မ့ၢ်လၢအဝဲသ့ၣ်နၢ်ဟူဘၣ်တၢ်ကစီၣ် လၢအပၢ်မ့ၢ်ဂ့ၤ, ဝၤမ့ၢ်ဂ့ၤ, ဖိခွါတဖၣ်မ့ၢ်ဂ့ၤ ဒီပုၢ်ဝဲၢ်ခွါတဖၣ်မ့ၢ်ဂ့ၤ တဟဲက့ၤကဒါက့ၤ ဆူဟံၣ်နီတဘျီလၢၤဘၣ်အဃိန့ၣ်လီၤ. ပူၤကွံာ်တယံာ်ဒံးဘၣ် ပှၤအံၣ်စရ့လးအသုးဖိအဂၤ ၄,၀၀၀ လီၤဃံၤဝဲလၢတၢ်ဒုးအကျါ ဒီးခဲအံၤန့ၣ် သံကဒီးဝဲအဂၤ ၃၀,၀၀၀ ဃၣ်ဃၣ်လၢပှၤဖလ့ၡသးဖိအမဲာ်ညါလီၤ.—၁ မူၤ. ၄:၁, ၂, ၁၀.
၂, ၃. ဝ့ၢ်ၡံလိၤအတၢ်လၤကပီၤ လီၤမၢ်ကွံာ်ဝဲလၢကျဲဒ်လဲၣ်.
၂ ဘၣ်ဆၣ် တၢ်လၢအလီၤသူၣ်အုးသးအုးလၢ ပှၤအံၣ်စရ့လးဖိတဖၣ်အဂီၢ်န့ၣ် အိၣ်ဒံးဝဲလီၤ. ပှၤတနီၤဘၣ်တၢ်ဆှၢလီၤအီၤဆူ ဝ့ၢ်ၡံလိၤ ဒ်သိးအဝဲသ့ၣ်ကလဲၤစိာ်ဝဲ တၢ်အၢၣ်လီၤအီလီၤအတလါဆူ ဝ့ၢ်အချၢန့ၣ်လီၤ. ဒီးပှၤလုၢ်တၢ်အခိၣ်စီၤဧ့လံၤ အဖိခွါလၢအအၢအသီ စီၤဃၤဖနံဒီးစီၤဖံၤနဃၣ်န့ၣ် ပၣ်ဃုာ်လၢ ပှၤသ့ၣ်တဖၣ်အံၤအကျါလီၤ. တၢ်အၢၣ်လီၤအီလီၤအတလါန့ၣ် မ့ၢ်တၢ်ပနီၣ်တခါလၢ အပာ်ဖျါထီၣ်ဝဲလၢ ယဟိဝၤယွၤအိၣ်ဒီးအပှၤဂီၢ်မုၢ် ဒီးညီနုၢ်ဘၣ်တၢ်ပာ်အီၤလၢ ဒၢးစီဆှံကတၢၢ်လၢ ဒဲစီဆှံအပူၤလီၤ. ဘၣ်ဆၣ် ပှၤဟးဆိကမိၣ်တၢ်တကျးဒးလၢ တၢ်အၢၣ်လီၤအီလီၤအတလါန့ၣ် ကကဲထီၣ်ဝဲတၢ်ဟဲဝံလၢအဂ့ၤ ဒ်သိးအဝဲသ့ၣ်မၤနၢၤတၢ်ဒုးကသ့အဂီၢ်လီၤ. လၢတၢ်န့ၣ်အဃိ အဝဲသ့ၣ် လဲၤစိာ်ဝဲဆူ တၢ်ဒုးအပျီပူၤန့ၣ်လီၤ. ဘၣ်ဆၣ်သနာ်က့ ပှၤဖလ့ၡသးဖိမၤန့ၢ် တၢ်အၢၣ်လီၤအီလီၤအတလါ ဒီးမၤသံဝဲစီၤဃၤဖနံဒီး စီၤဖံၤနဃၣ်န့ၣ်လီၤ.—၁ မူၤ. ၄:၃-၁၁.
၃ တၢ်အၢၣ်လီၤအီလီၤအတလါ အိၣ်ဝဲဖဲဒဲစီဆှံလၢ ဝ့ၢ်ၡံလိၤအပူၤန့ၣ် အိၣ်လံ အနံၣ်လၢအကယၤတဖၣ်လံ. ဘၣ်ဆၣ်အခဲအံၤ တၢ်အၢၣ်လီၤအီလီၤအတလါ လဲၤတုၤဝဲလၢပှၤဖလ့ၡသးဖိအစုပူၤလီၤ. ဖဲစီၤဧ့လံၤလၢအသးအိၣ် ၉၈ နံၣ်တဂၤ နၢ်ဟူဘၣ်ဝဲတၢ်ကစီၣ်အံၤအဆၢကတီၢ်န့ၣ် လီၤကဒါလၢအချၢဃံဒီး သံဝဲလီၤ. ဒီးဖဲမုၢ်နံၤအဝဲန့ၣ် အဒဲၣ်မုၣ်လၢအကဲထီၣ်မုၣ်ကမဲန့ၣ် အိၣ်ဖျဲၣ်ထီၣ်အဖိဝံၤဒီး သံဝဲစ့ၢ်ကီးလီၤ. ဒီးတချုးလၢအဒဲၣ်မုၣ်တဂၤအံၤသံအခါန့ၣ် စံးဝဲလၢ “တၢ်လၤကပီၤ လဲၤသဒၣ်လံအံၣ်စရ့လးလံ.” ဒ်အဝဲတဲဝဲအသိး ဝ့ၢ်ၡံလိၤအတၢ်လၤကပီၤ အမုၢ်လီၤနုာ်ဝဲလံ. —၁ မူၤ. ၄:၁၂-၂၂.
၄. လၢတၢ်မၤလိအံၤအပူၤ ပကသမံသမိးကွၢ် တၢ်ဂ့ၢ်မနုၤလဲၣ်.
၄ ဖဲစီၤၡမူၤအ့လးကွၢ်ဆၢၣ်မဲာ်ဘၣ်ဝဲ တၢ်လၢအလီၤသူၣ်အုးသးအုးသ့ၣ်တဖၣ်အံၤ အဆၢကတီၢ်န့ၣ် အဝဲမၤဝဲဒ်လဲၣ်. ပှၤဂီၢ်မုၢ်တဖုအံၤ တဒိးန့ၢ်ဘၣ်ယဟိဝၤယွၤအတၢ်ဘၣ်သး ဒီးအတၢ်ဒီသဒၢလၢၤဘၣ်. လၢတၢ်န့ၣ်အဃိ ဒ်သိးစီၤၡမူၤအ့လးမၤစၢၤက့ၤ အဝဲသ့ၣ်ကသ့အဂီၢ် မ့ၢ်အတၢ်နာ်ကဂၢၢ်ကျၢၤဝဲဒံးဧါ. မုၢ်မဆါတနံၤညါအံၤ ပဝဲစ့ၢ်ကီးပတၢ်နာ်ဘၣ်တၢ်မၤကွၢ်အီၤ ခီဖျိလၢတၢ်ကီတၢ်ခဲဒီး တၢ်လၢအလီၤသူၣ်အုးသးအုးတဖၣ်န့ၣ်လီၤ. လၢတၢ်န့ၣ်အဃိ ပကသမံသမိးကွၢ် စီၤၡမူၤအ့လးအဒိအတဲာ်န့ၣ် ကဲထီၣ်တၢ်မၤစၢၤ လၢပဂီၢ်သ့ဝဲဒ်လဲၣ်အဂ့ၢ်န့ၣ်လီၤ.
အဝဲ “မၤတၢ်တီတၢ်လိၤ”
၅, ၆. ဖဲအနံၣ် ၂၀ အတီၢ်ပူၤန့ၣ် လံာ်စီဆှံပာ်ဖျါထီၣ်တၢ်ဂ့ၢ်မနုၤလဲၣ်. ဒီးဖဲန့ၣ်အဆၢကတီၢ် စီၤၡမူၤအ့လးကမၤဝဲ တၢ်မနုၤလဲၣ်.
၅ တၢ်မၤအသးလၢထးတဖၣ်အံၤ ဝံၤအလီၢ်ခံလံာ်စီဆှံ တကွဲးဖျါထီၣ်ဝဲ စီၤၡမူၤအ့လးအဂ့ၢ်လၢၤဘၣ်. လၢတၢ်န့ၣ်အလီၢ် ကွဲးဖျါထီၣ်ဝဲ တလါစီဆှံအဂ့ၢ်လီၤ. ဒီးပထံၣ်ဘၣ်လၢ ပှၤဖလ့ၡသးဖိတဖၣ် က့ၤစိာ်ဝဲတလါစီဆှံအဃိ တူၢ်ဘၣ်တၢ်နးတၢ်ဖှီၣ် ဒီးဟ့ၣ်က့ၤဝဲပှၤအံၣ်စရ့လးဖိတဖၣ်လီၤ. ဖဲပထံၣ်ဘၣ်ကဒီး စီၤၡမူၤအ့လးအဂ့ၢ်လၢ လံာ်စီဆှံအပူၤန့ၣ် တၢ်ဆၢကတီၢ်လဲၤပူၤကွံာ်ဝဲ အနံၣ် ၂၀ ဃၣ်ဃၣ်လံ. (၁ မူၤ. ၇:၂) မ့မ့ၢ်ဒ်န့ၣ်န့ၣ် ဖဲအနံၣ် ၂၀ အတီၢ်ပူၤစီၤၡမူၤအ့လး မၤဝဲတၢ်မနုၤလဲၣ်. ပမ့ၢ်ကွၢ်လံာ်စီဆှံ အတၢ်ပာ်ဖျါန့ၣ် ပတယာ်ဘၣ်ဝဲလီၤ.
ဒ်သိး ယွၤအပှၤဂီၢ်မုၢ် ကလဲၤခီဖျိဝဲတၢ်လၢအလီၤသူၣ်အုးသးအုးဒိၣ်ဒိၣ်ကလဲာ်အဂီၢ် စီၤၡမူၤအ့လးမၤစၢၤအဝဲသ့ၣ် ကသ့ဒ်လဲၣ်
၆ တချုးလၢအနံၣ် ၂၀ အံၤစးထီၣ်အသးဒံးဘၣ်န့ၣ် လံာ်စီဆှံစံးဝဲလၢ “စီၤၡမူၤအ့လးအကလုၢ်အကထါ အိၣ်ဒီးအံၣ်စရ့လးခဲလၢာ်လီၤ.” (၁ မူၤ. ၄:၁) ဒီးဖဲအနံၣ် ၂၀ အံၤပူၤကွံာ်ဝံၤအလီၢ်ခံန့ၣ် လံာ်စီဆှံစံးဝဲလၢ တနံၣ်ဘၣ်တနံၣ်န့ၣ် စီၤၡမူၤအ့လးလဲၤအိၣ်သကိးဝဲ ပှၤအံၣ်စရ့လးဖိအဝ့ၢ်သၢဖျၢၣ် ဒ်သိးကစံးဆၢက့ၤဝဲ တၢ်သံကွၢ်တဖၣ်ဒီး လၢတၢ်မူးတၢ်ရၢ်အဂီၢ်လီၤ. ဝံၤဒီးအဝဲက့ၤကဒါက့ၤဆူ အတၢ်အိၣ်တၢ်ဆိးအလီၢ်လၢ ဝ့ၢ်ရၤမါလီၤ. (၁ မူၤ. ၇:၁၅-၁၇) လံာ်စီဆှံပာ်ဖျါထီၣ်ဝဲလၢ စီၤၡမူၤအ့လးန့ၣ် မ့ၢ်ပှၤတဂၤလၢအမၤတၢ်ဆူၣ်ထီဘိလီၤ. လၢတၢ်န့ၣ်အဃိ ပသ့ၣ်ညါဘၣ်လၢ အနံၣ် ၂၀ အတီၢ်ပူၤန့ၣ် စီၤၡမူၤအ့လးအတၢ်မၤကအိၣ်ဝဲ အကလုာ်ကလုာ်လီၤ.
ဖဲအနံၣ် ၂၀ အတီၢ်ပူၤ စီၤၡမူၤအ့လး မၤဝဲတၢ်မနုၤလဲၣ်န့ၣ် လံာ်စီဆှံတပာ်ဖျါထီၣ်ဝဲဘၣ်, ဘၣ်ဆၣ် ပနာ်သ့လၢ အဝဲမၤဝဲယဟိဝၤယွၤ အတၢ်မၤလၢ တၢ်သးဆူၣ်အပူၤ
၇, ၈. (က) စီၤၡမူၤအ့လး စံးဘၣ်ပှၤဂီၢ်မုၢ်တဖၣ်ဒ်လဲၣ်. (ခ) ပှၤဂီၢ်မုၢ်တဖၣ် မၤဝဲဒ်လဲၣ်.
၇ စီၤဧ့လံၤအဖိခွါတဖၣ် မၤတၢ်အၢတၢ်သီဒီး မၤကမၣ်မုၣ်ကမၣ်ခွါအဃိ ပှၤဂီၢ်မုၢ်တဖၣ် အတၢ်နာ်စှၤလီၤဝဲကယီကယီလီၤ. လၢတၢ်န့ၣ်အဃိဖျါလၢ အဝဲသ့ၣ်အကျါအါဂၤန့ၣ် စးထီၣ်ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်လီၤ. ဘၣ်ဆၣ်သနာ်က့ စီၤၡမူၤအ့လးစံးဘၣ်ပှၤဂီၢ်မုၢ်လၢ “သုမ့ၢ်ဟဲက့ၤကဒါက့ၤဆူယွၤအအိၣ် လၢသုသးဒီဖျၢၣ်ညါဒီး, သုးကွံာ်ပှၤတခီဘီမုၢ်ဖိအကစၢ်တဖၣ်, ဒီးအၤၡတြိးလၢသုအိၣ်တက့ၢ်, ဒီးသုသးန့ၣ်ကတဲာ်ကတီၤအီၤလၢယွၤအဂီၢ်, ဒီးမၤထဲအဝဲတဂၤဧိၤန့ၣ်အတၢ်တက့ၢ်. ဒီးကမၤပူၤမၤဖျဲးသုလၢ ပှၤဖလ့ၡသးဖိအစုပူၤလီၤ.”—၁ မူၤ. ၇:၃.
၈ ပှၤအံၣ်စရ့လးဖိ ဘၣ်တၢ်မၤနးမၤဖှီၣ်အီၤလၢ “ပှၤဖလ့ၡသးဖိအစုပူၤ” လီၤ. ခီဖျိလၢ ပှၤဖလ့ၡသးဖိမၤနၢၤကွံာ်ဝဲ အံၣ်စရ့လးအသုးမုၢ်သံၣ်ဘိတဖၣ်အဃိ အဝဲသ့ၣ်ဆိကမိၣ်လီၤအသးလၢ ဆီၣ်တံၢ်မၤနၢၤဝဲ ကစၢ်ယွၤအပှၤဂီၢ်မုၢ်အံၤ ဖဲဒၣ်အသးသ့ဝဲလီၤ. ဘၣ်ဆၣ် စီၤၡမူၤအ့လးဒုးနာ်န့ၢ်ပှၤဂီၢ်မုၢ်လၢ အဝဲသ့ၣ်မ့ၢ်ဟဲက့ၤကဒါက့ၤဆူ ယဟိဝၤယွၤအအိၣ်န့ၣ် တၢ်အိၣ်အသးတဖၣ်ကဆီတလဲဝဲလီၤ. မ့ၢ်အဝဲသ့ၣ် သးအိၣ်ဟဲက့ၤဝဲစ့ၢ်ကီးဧါ. လံာ်စီဆှံပာ်ဖျါထီၣ်ဝဲလၢ အဝဲသ့ၣ်ပာ်တ့ၢ်ကွံာ်အတၢ်ဂီၤတၢ်ဖှီၣ်ဒီး “မၤထဲယွၤအတၢ်ဧိၤလီၤ.” လၢတၢ်န့ၣ်အဃိ စီၤၡမူၤအ့လးကိးအိၣ်ဖှိၣ်ပှၤဂီၢ်မုၢ်တဖၣ်လၢ ဝ့ၢ်မံးစပၤလၢအအိၣ်ဝဲလၢ ကစၢၢ်ကလိအကျါ လၢယရူၤၡလ့ၣ်ကလံၤစိးတခီန့ၣ်လီၤ. ဖဲန့ၣ်န့ၣ် အဝဲသ့ၣ်ဒုၣ်တၢ်အီၣ်တၢ်အီ ဒီးပီၢ်ယၢ်လီၤက့ၤအသး လၢအဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်အဃိန့ၣ်လီၤ.—ဖး ၁ ၡမူၤအ့လး ၇:၄-၆ တက့ၢ်.
ပှၤဖလ့ၡသးဖိနၢ်ဟူဘၣ်ဝဲလၢ ပှၤအံၣ်စရ့လးဖိအိၣ်ဖှိၣ်ရိဖှိၣ်ဝဲအဃိ ဆိကမိၣ်ဝဲလၢ ကျဲအိးဟိထီၣ်အသးလၢ အဝဲသ့ၣ်ကမၤဟးဂီၤကွံာ် ပှၤဂီၢ်မုၢ်အံၤလီၤ
၉. ဘၣ်မနုၤအဃိ ပှၤဖလ့ၡသးဖိတဖၣ် ဆိကမိၣ်ဝဲလၢကျဲအိးဟိထီၣ်အသး လၢအဝဲသ့ၣ်အဂီၢ်လဲၣ်. ဖဲတၢ်ကီတၢ်ခဲဘၣ် ကစၢ်ယွၤအပှၤဂီၢ်မုၢ်တဖၣ်အခါ အဝဲသ့ၣ်မၤဝဲဒ်လဲၣ်.
၉ ပှၤဖလ့ၡသးဖိနၢ်ဟူဘၣ်ဝဲလၢ ပှၤအံၣ်စရ့လးဖိအိၣ်ဖှိၣ်ရိဖှိၣ်ဝဲအဃိ ဆိကမိၣ်ဝဲလၢ ကျဲအိးဟိထီၣ်အသးလၢ အဝဲသ့ၣ်ကမၤဟးဂီၤကွံာ်ပှၤဂီၢ်မုၢ်အံၤလီၤ. လၢတၢ်န့ၣ်အဃိ အဝဲသ့ၣ်ဆှၢလီၤအပှၤသုးဖိဆူ ဝ့ၢ်မံးစပၤဒ်သိးကမၤသံကွံာ် ယဟိဝၤယွၤအပှၤဂီၢ်မုၢ်လီၤ. ဖဲပှၤအံၣ်စရ့လးဖိတဖၣ် နၢ်ဟူဘၣ်ဝဲတၢ်ဂ့ၢ်အံၤအခါ အဝဲသ့ၣ်သူၣ်ပျံၤသးဖုးတၢ်ဒိၣ်မးအဃိ မၢဝဲစီၤၡမူၤအ့လးဃ့ထုကဖၣ်တၢ် လၢအဝဲသ့ၣ်အဂီၢ်လီၤ. ဒီးစီၤၡမူၤအ့လးဃ့ထုကဖၣ်တၢ် တကးဒံးဘၣ်လုၢ်ထီၣ်တၢ်ဆူ ယဟိဝၤယွၤအအိၣ်စ့ၢ်ကီးလီၤ. ဖဲန့ၣ်အခါ ပှၤဖလ့ၡသးဖိအသုးမုၢ်သံၣ်ဘိတဖၣ် ဟဲဘူးထီၣ်လၢ အဝဲသ့ၣ်အအိၣ်လံ. ဘၣ်ဆၣ် ယဟိဝၤယွၤစံးဆၢက့ၤ စီၤၡမူၤအ့လးအတၢ်ထုကဖၣ် ခီဖျိလၢ မၢလီၤဝဲ “လီသီၣ်လၢတၢ်သီၣ်ဖးဒိၣ် လၢပှၤဖလ့ၡသးဖိအလိၤ” လီၤ.—၁ မူၤ. ၇:၇-၁၀.
၁၀, ၁၁. (က) လီသီၣ်လၢ ယဟိဝၤယွၤပျၢ်လီၤဝဲလၢမူခိၣ်န့ၣ် ဘၣ်မနုၤအဃိလီၤဆီဝဲလဲၣ်. (ခ) တၢ်ဒုးလၢဝ့ၢ်မံးစပၤန့ၣ် မၤအသးဒ်လဲၣ်.
၁၀ မ့ၢ်နဆိကမိၣ်လၢ ပှၤဖလ့ၡသးဖိတဖၣ်အတၢ်ပာ်သူၣ်ပာ်သး ကလီၤဂာ်ဒ်ဖိသၣ်လၢ အနၢ်ဟူဘၣ်ဝဲလီသီၣ်တစဲးတမွဲးဒီး က့ၤဃ့ၢ်အိၣ်ခူသူၣ်လၢအမိၢ်အဟုးလာ်ဧါ. တမ့ၢ်ဘၣ်. အဝဲသ့ၣ်မ့ၢ်ပှၤသုးဖိလၢ အလဲၤခီဖျိတၢ်ဒုးတၢ်ယၤအါမး ဒီးတပျံၤတၢ်ညီညီဘၣ်. ဘၣ်ဆၣ်လၢညါန့ၣ် အဝဲသ့ၣ်တနၢ်ဟူဘၣ်ဝဲ လီသီၣ်ဒ်အံၤနီတဘျီဘၣ်. မ့ၢ်အလီၤဆီလၢ အဝဲသ့ၣ်အဂီၢ်ဒ်လဲၣ်. မ့ၢ်အသီၣ်ဒိၣ်တလၢအဃိဧါ. မ့ၢ် “တၢ်သီၣ်ဖးဒိၣ်” အံၤသီၣ်ထီၣ်ဝဲဖဲ မူခိၣ်တအၢၣ်အုးအဆၢကတီၢ်အဃိဧါ. မ့တမ့ၢ်ဘၣ်န့ၣ် မ့ၢ်အဝဲသ့ၣ်အခိၣ်နူာ်ဘံဘူ ခီဖျိလၢတၢ်သီၣ်တသြီထီၣ်ဝဲလၢ ကစၢၢ်ကလိကျါအဃိဧါ. ဒ်လဲၣ်ဂ့ၤဒ်လဲၣ်ဂ့ၤ ပှၤဖလ့ၡသးဖိတဖၣ် သူၣ်ကနိးသးကနိးဒိၣ်မး ဒီးအဝဲသ့ၣ်မၤဘူး ပှၤအံၣ်စရ့လးဖိတဘူၣ်လၢၤဘၣ်. ပှၤဖလ့ၡသးဖိ ဃ့ၢ်ပူၤဖျဲးအသးဘၣ်ဆၣ် ပှၤအံၣ်စရ့လးဖိတဖၣ် ဟးထီၣ်လၢဝ့ၢ်မံးစပၤအပူၤဒီး လူၤဒုးအဝဲသ့ၣ် လၢကျဲတဘျုးမံးလာ် တုၤလီၤလၢဝ့ၢ်ယရူၤၡလ့ၣ် အမုၢ်နုာ်ကလံၤထံးတခီလီၤ.—၁ မူၤ. ၇:၁၁.
၁၁ တၢ်ဒုးတဘျီညါအံၤ မ့ၢ်တၢ်လၢအရ့ဒိၣ်လၢ ကစၢ်ယွၤအပှၤဂီၢ်မုၢ်အဂီၢ်လီၤ. စးထီၣ်ဖဲန့ၣ် တုၤလီၤလၢစီၤၡမူၤအ့လး ကဲဒံးပှၤစံၣ်ညီၣ်ကွီၢ်အဆၢကတီၢ်န့ၣ် ပှၤဖလ့ၡသးဖိတဖၣ် ၡူဝဲထီဘိလီၤ. လၢတၢ်န့ၣ်အဃိ ဝ့ၢ်တဝ့ၢ်ဘၣ်တဝ့ၢ်န့ၣ် ဘၣ်တၢ်ဟ့ၣ်က့ၤအီၤလၢ ယွၤအပှၤဂီၢ်မုၢ်တဖၣ်အစုပူၤလီၤ.—၁ မူၤ. ၇:၁၃, ၁၄.
၁၂. စီၤၡမူၤအ့လး “မၤတၢ်တီတၢ်လိၤ” လၢကျဲဒ်လဲၣ်. ဘၣ်မနုၤအဃိ အတၢ်ဖံးတၢ်မၤ ကဲဘျုးကဲဖှိၣ်အါမးလဲၣ်.
၁၂ တၢ်ဆၢကတီၢ်လဲၤပူၤကွံာ်ဝဲဖးယံာ် ဝံၤအလီၢ်ခံတၢ်မၢဖိပီလူး ကွဲးနီၣ်ဃာ်ဝဲစီၤၡမူအ့လးအမံၤ လၢပှၤစံၣ်ညီၣ်ကွီၢ်ဒီးဝံလၢအ “မၤတၢ်တီတၢ်လိၤ” တဖၣ်အကျါန့ၣ်လီၤ. (ဧ့ၤ. ၁၁:၃၂, ၃၃) မ့ၢ်လၢစီၤၡမူၤအ့လးမၤတၢ်ဘၣ်ယွၤအသး ဒီးမၤစၢၤပှၤအဂၤတဖၣ် လၢအဝဲသ့ၣ်ကမၤဝဲ ဒ်သိးဒီးအီၤအဃိန့ၣ်လီၤ. ဒီးစီၤၡမူၤအ့လး အတၢ်ဖံးတၢ်မၤ ကဲဘျုးကဲဖှိၣ်အါမးလီၤ. မ့ၢ်လၢ အဝဲအိၣ်ခိးယဟိဝၤယွၤ လၢတၢ်သူၣ်စူၤသးစူၤအပူၤတကးဒံးဘၣ် ဖဲအတၢ်မုၢ်လၢ် တလၢပှဲၤထီၣ်အဆၢကတီၢ်ဒၣ်လဲာ် အဝဲဆဲးမၤယွၤအတၢ်မၤထီဘိအဃိလီၤ. ဒီးအဝဲပာ်ဖျါထီၣ် တၢ်စံးဘျုးစံးဖှိၣ်စ့ၢ်ကီးလီၤ. အဒိ ဖဲပှၤမၤနၢၤတၢ်လၢ ဝ့ၢ်မံးစပၤဝံၤအလီၢ်ခံ စီၤၡမူၤအ့လးသူၣ်ထီၣ်ဝဲ လၢၢ်တဖျၢၣ်ဒ်သိး ကမၤလၤကပီၤယဟိဝၤယွၤအဂီၢ်န့ၣ်လီၤ.—၁ မူၤ. ၇:၁၂.
၁၃. (က) ပမ့ၢ်အဲၣ်ဒိးကွၢ်လိမၤဒိး စီၤၡမူၤအ့လးန့ၣ် ပကဘၣ်အိၣ်ဒီး တၢ်ဂ့ၤတၢ်ဝါမနုၤတဖၣ်လဲၣ်. (ခ) ပကဘၣ်ကွၢ်လိမၤဒိး စီၤၡမူၤအ့လးအတၢ်ဂ့ၤတၢ်ဝါတဖၣ် စးထီၣ်လၢဆၢကတီၢ်ဖဲလဲၣ်.
၁၃ မ့ၢ်နအဲၣ်ဒိး “မၤတၢ်တီတၢ်လိၤ” စ့ၢ်ကီးဧါ. မ့မ့ၢ်ဒ်န့ၣ်န့ၣ် ကွၢ်လိမၤဒိးစီၤၡမူၤအ့လး အတၢ်သူၣ်စူၤသးစူၤ, အတၢ်ဆီၣ်လီၤသးဒီး အတၢ်သ့ၣ်ညါဆၢက့ၤတၢ်အဘျုးတက့ၢ်. (ဖး ၁ ပ့းတရူး ၅:၆ တက့ၢ်.) ပဝဲကိးဂၤဒဲး ပအဲၣ်ဒိးမၤဒိၣ်ထီၣ် ပတၢ်ဂ့ၤတၢ်ဝါတဖၣ်အံၤလီၤ. ခီဖျိလၢ စီၤၡမူၤအ့လးမၤဒိၣ်ထီၣ်အတၢ်ဂ့ၤတၢ်ဝါတဖၣ်အံၤ လၢအနီၢ်ဆံးခါလံၤလံၤအဃိ ကဲထီၣ်တၢ်မၤစၢၤလၢအဂီၢ် ဖဲအသးပှၢ်ထီၣ်ဒီး တူၢ်ဘၣ်တၢ်လၢအလီၤသူၣ်အုးသးအုးအခါန့ၣ်လီၤ.
“အဖိခွါတဖၣ်န့ၣ် တလဲၤဘၣ်လၢအကျဲတဖၣ်အပူၤဘၣ်”
၁၄, ၁၅. (က) ဖဲစီၤၡမူၤအ့လး “သးပှၢ်” ထီၣ်ဝဲအခါအဝဲကွၢ်ဆၢၣ်မဲာ်ဘၣ်ဝဲ တၢ်လၢအလီၤသးဘၣ်ဖှီၣ် ဒ်လဲၣ်တခါလဲၣ်. (ခ) စီၤၡမူၤအ့လး မ့ၢ်ပၢ်တဂၤလၢအလီၤဂာ်ဒ် စီၤဧ့လံၤအသိးဧါ. တဲဖျါထီၣ်တက့ၢ်.
၁၄ ဖဲလံာ်စီဆှံပာ်ဖျါထီၣ်ဝဲ စီၤၡမူၤအ့လးအဂ့ၢ်လၢခံတဘျီန့ၣ် “အသးပှၢ်တ့ၢ်” လံ. ဖဲန့ၣ်အဆၢကတီၢ် အဝဲအိၣ်ဒီးအဖိခွါလၢအဒိၣ်တုာ်ခိၣ်ပှဲၤခံဂၤ လၢအမ့ၢ်စီၤယိၤအ့လး ဒီးစီၤအဘံယၤန့ၣ်လီၤ. ဒီးစီၤၡမူၤအ့လးဟ့ၣ်လီၤအဝဲသ့ၣ် မူဒါလၢကမၤစၢၤအီၤဒီး စံၣ်ညီၣ်တၢ်အဂီၢ်န့ၣ်လီၤ. ဘၣ်ဆၣ် အဝဲနာ်အီၣ်အဖိခွါတဖၣ်န့ၣ် ကမၣ်ဝဲလံ. စီၤၡမူၤအ့လး မၤတၢ်တီတီလိၤလိၤဒီး မ့ၢ်ပှၤဂ့ၤပှၤဝါသနာ်က့ မ့မ့ၢ်အဖိခွါတဖၣ်န့ၣ် သူအတၢ်ခွဲးတၢ်ယာ်လၢ အနီၢ်ကစၢ်အဘျုးအဂီၢ်, စံၣ်ညီၣ်တၢ်တတီတလိၤ ဒီးဟံးန့ၢ်ခိၣ်ဖးလၢကမၤတၢ် တတီတလိၤအဂီၢ်လီၤ.—၁ မူၤ. ၈:၁-၃.
၁၅ ဘၣ်တနံၤန့ၣ် အံၣ်စရ့လးအပှၤသူၣ်က့သးပှၢ်တဖၣ် လဲၤဝဲဆူစီၤၡမူၤအ့လးအအိၣ်ဒီး ကဒူးကဒ့ၣ်တၢ်လၢအလိၤလီၤ. အဝဲသ့ၣ်စံးဘၣ်အီၤလၢ “နဖိခွါတဖၣ်န့ၣ် တမၤထွဲနဒိနတဲာ်ဘၣ်.” (၁ မူၤ. ၈:၄, ၅, ခ့ခါစှီၤကျိာ်) မ့ၢ်စီၤၡမူၤအ့လးသ့ၣ်ညါဝဲလၢ အဖိခွါတဖၣ် မၤကမၣ်တၢ်ဒ်အံၤဧါ. လံာ်စီဆှံတပာ်ဖျါဝဲဘၣ်. ဘၣ်ဆၣ်စီၤၡမူၤအ့လးန့ၣ် တလီၤဂာ်ဒ်သိးစီၤဧ့လံၤ လၢအတမၤလၢပှဲၤပၢ်အမူဒါဘၣ်. စီၤဧ့လံၤန့ၣ်တသိၣ်ဝဲ အဖိခွါတဖၣ်လၢအမၤတၢ်အၢတၢ်သီ တကးဒံးဘၣ် မၤလၤကပီၤအဝဲသ့ၣ် အါန့ၢ်ဒံးယဟိဝၤယွၤအဃိ ယဟိဝၤယွၤသိၣ်က့ၤသီက့ၤအီၤ ဒီးစံၣ်ညီၣ်အီၤလီၤ. (၁ မူၤ. ၂:၂၇-၂၉) မ့မ့ၢ်စီၤၡမူၤအ့လးန့ၣ် ယဟိဝၤယွၤ တထံၣ်လၢ အမၤဝဲတၢ်ကမၣ်ဒ်အံၤဘၣ်.
စီၤၡမူၤအ့လး အဖိခွါတဖၣ် တပိာ်ကျဲအဃိ အတၢ်မုၢ်လၢ်ဟးဂီၤဝဲ ဘၣ်ဆၣ်အဝဲမၤဝဲဒ်လဲၣ်
၁၆. ခီဖျိလၢ ဖိလံၤတဖၣ်တဒိကနၣ်မိၢ်ပၢ်အကလုၢ်အဃိ မိၢ်ပၢ်တဖၣ်ကတူၢ်ဘၣ်ဝဲဒ်လဲၣ်, မိၢ်ပၢ်တဖၣ် မ့ၢ်ဆိကမိၣ်ထံစီၤၡမူၤအ့လး အဒိအတဲာ်န့ၣ် ကဒိးန့ၢ်ဘၣ်တၢ်ဟံးစုနဲၣ်ကျဲ ဒီးတၢ်ဂံၢ်တၢ်ဘါဒ်လဲၣ်.
၁၆ ဖဲစီၤၡမူၤအ့လးသ့ၣ်ညါထီၣ်ဝဲလၢ အဖိခွါတဖၣ်မၤတၢ်အၢအၢသီသီအဆၢကတီၢ် အဝဲကမဲာ်ဆှးဝဲထဲလဲၣ်, ဒီးအသူၣ်ကကိၢ်သးကဂီၤဒီး အသးကဘၣ်ဖှီၣ်ဝဲထဲလဲၣ်န့ၣ် လံာ်စီဆှံတပာ်ဖျါထီၣ်ဝဲဘၣ်. မုၢ်မဆါတနံၤညါအံၤ ဟီၣ်ခိၣ်ပှဲၤဝဲဒီး ဖိတဖၣ်လၢအတဒိကနၣ် အမိၢ်အပၢ်အကလုၢ်ဘၣ်. လၢတၢ်န့ၣ်အဃိ မိၢ်ပၢ်လၢအတူၢ်ဘၣ်တၢ်ဒ်သိးဒီး စီၤၡမူၤအ့လးန့ၣ် ကအိၣ်ဝဲဒီဒူၣ်ညါလီၤ. (ဖး ၂ တံၤမသ့း ၃:၁-၅ တက့ၢ်.) ဘၣ်ဆၣ်အဝဲသ့ၣ် မ့ၢ်ဆိကမိၣ်ထံ စီၤၡမူၤအ့လးအဒိအတဲာ်န့ၣ် ကဒိးန့ၢ်ဘၣ်ဝဲ တၢ်ဟံးစုနဲၣ်ကျဲ ဒီးတၢ်ဂံၢ်တၢ်ဘါလီၤ. စီၤၡမူၤအ့လးအဖိခွါတဖၣ် မ့ၢ်တပိာ်ကျဲဘၣ်ဆၣ် အဝဲတဂုၤက့ၤဆူအလီၢ်ခံ နီတစဲးဘၣ်, ဆဲးမၤယွၤအတၢ်မၤလၢ တၢ်သးတီအပူၤလီၤ. ပကဘၣ်သ့ၣ်နီၣ်ထီၣ်က့ၤလၢ ပတဲပဖိမ့ၢ်တန့ၢ်ဘၣ် ဒီးပသိၣ်အီၤမ့ၢ်တန့ၢ်သနာ်က့ ပတၢ်ဒိဂ့ၤတဲာ်ဘၣ်န့ၣ် ထုးန့ၢ်အဝဲသ့ၣ်အသးသ့ဝဲလီၤ. ဒ်လဲၣ်ဂ့ၤဒ်လဲၣ်ဂ့ၤ ဒ်စီၤၡမူၤအ့လးအသိး မိၢ်ပၢ်တဖၣ်န့ၣ် မၤသးခုယဟိဝၤယွၤအသးသ့ဝဲလီၤ.
“ပာ်န့ၢ်ပှၤလၢစီၤပၤတဂၤ”
၁၇. ပှၤသူၣ်က့သးပှၢ်တဖၣ် မၢဝဲစီၤၡမူၤအ့လး မၤန့ၢ်အီၤတၢ်မနုၤလဲၣ်, ဒီးအဝဲသ့ၣ်အတၢ်ဃုထၢအံၤ စီၤၡမူၤအ့လးထံၣ်ဝဲဒ်လဲၣ်.
၁၇ စီၤၡမူၤအ့လးအဖိခွါတဖၣ် အတၢ်သူၣ်လီသးကွံဒီး အတၢ်အဲၣ်လီၤထဲအသးန့ၣ် ကမၤဘၣ်ဒိပှၤဂီၢ်မုၢ်ထဲလဲၣ်န့ၣ် အဝဲသ့ၣ်တဆိကမိၣ်ကွၢ်ဝဲဘၣ်. ဘၣ်ဆၣ်ဒ်တၢ်ဆၢကတီၢ် လဲၤပူၤကွံာ်ဝဲအသိး အံၣ်စရ့လးအပှၤသူၣ်က့သးပှၢ်တဖၣ် လဲၤတဲဘၣ်စီၤၡမူၤအ့လးလၢ “ပာ်န့ၢ်ပှၤလၢစီၤပၤတဂၤ လၢအကစံၣ်ညီၣ်ပှၤ, ဒ်ကယဲၢ်ပှၤကလုာ်ခဲလၢာ်အသိးန့ၣ်တက့ၢ်.” မ့ၢ်စီၤၡမူၤအ့လးတူၢ်ဘၣ်ဝဲလၢ ပှၤဂီၢ်မုၢ်တဖၣ်စူးကွံာ်ညိကွံာ်အီၤဧါ. စီၤၡမူၤအ့လး ကဲတ့ၢ်ဝဲပှၤစံၣ်ညီၣ်ကွီၢ်လၢ ပှၤအံၣ်စရ့လးဖိအဖီခိၣ်န့ၣ် အိၣ်လံအနံၣ်အါမးလံ. ဘၣ်ဆၣ်ခဲအံၤန့ၣ် အဝဲသ့ၣ်တလီကီဝဲ ပှၤဒ်သိးဒီးစီၤၡမူၤအ့လး လၢအမ့ၢ်ဝံတဂၤဘၣ်. အဝဲသ့ၣ်လီကီဝဲ စီၤပၤလၢ အကကဲထီၣ်စ့ၢ်ကီး ပှၤစံၣ်ညီၣ်ကွီၢ်လၢအဝဲသ့ၣ်အဂီၢ်လီၤ. မ့ၢ်လၢကလုာ်အဂၤတဖၣ်လၢ အအိၣ်ဖဲအဝဲသ့ၣ်အကပိာ်ကပၤန့ၣ် အိၣ်ဒီးစီၤပၤအဃိ အဝဲသ့ၣ်စ့ၢ်ကီးလီကီဝဲစီၤပၤလီၤ. စီၤၡမူၤအ့လးကမၤဝဲဒ်လဲၣ်. ပဖးဘၣ်လၢ အဝဲသ့ၣ်အတၢ်ဃုထၢအံၤ “မ့ၢ်တၢ်အၢလၢ စီၤၡမူၤအ့လးအမဲာ်” ညါလီၤ.—၁ မူၤ. ၈:၅, ၆.
၁၈. ယဟိဝၤယွၤမၤမုာ်ထီၣ်က့ၤဝဲ စီၤၡမူၤအ့လးအသးလၢ ကျဲဒ်လဲၣ်, ဒီးပာ်ဖျါထီၣ်ဝဲ ပှၤအံၣ်စရ့လးဖိအတၢ်ကမၣ် လၢကျဲဒ်လဲၣ်.
၁၈ ဖဲစီၤၡမူၤအ့လး ဃ့ဘါထုကဖၣ်တၢ် ဘၣ်ဃးဒီးတၢ်ဂ့ၢ်အံၤအဆၢကတီၢ် ယဟိဝၤယွၤစံးဘၣ်အီၤလၢ “ကယဲၢ်တၢ်လၢပှၤဂီၢ်မုၢ်စံးဘၣ်နၤန့ၣ် ကနၣ်အကလုၢ်တက့ၢ်. အဂ့ၢ်ဒ်အံၤ, တမ့ၢ်ဘၣ်အညိကွံာ်နၤဘၣ်, မ့ၢ်အညိကွံာ်ယၤ, ဒ်သိးယသုတကဲစီၤပၤလၢအဖီခိၣ်တဂ့ၤလီၤ.” ယဟိဝၤယွၤအတၢ်ကတိၤတဖၣ်အံၤ ကမၤမုာ်ထီၣ်စီၤၡမူၤအ့လးအသး ဘၣ်ဆၣ်ဖျါလၢ ပှၤဂီၢ်မုၢ်တဖၣ်အံၤ တပာ်ကဲဝဲ သ့တၢ်လၢာ်ကစၢ်နီတစဲးဘၣ်. ယဟိဝၤယွၤမၢဝဲ ဝံၡမူၤအ့လးဟ့ၣ်ပလီၢ်ဝဲ ပှၤအံၣ်စရ့လးဖိတဖၣ်လၢ အဝဲသ့ၣ်မ့ၢ်ပာ်ထီၣ်စီၤပၤတဂၤန့ၣ် စီၤပၤကဃ့တၢ်လၢအဝဲသ့ၣ်အအိၣ် အါမးလီၤ. ဘၣ်ဆၣ်ဖဲ စီၤၡမူၤအ့လး ဟ့ၣ်ပလီၢ်ပှၤဂီၢ်မုၢ်အခါ အဝဲသ့ၣ်တဂုၤက့ၤဆူအလီၢ်ခံ နီတစဲးဘၣ်. ဒီးအဝဲသ့ၣ်စံးကဒီးဝဲလၢ “တမ့ၢ်ဘၣ်, မ့ၢ်ပကအိၣ်ဒီးစီၤပၤလၢ ပဖီခိၣ်တဂၤလီၤ.” ခီဖျိလၢ စီၤၡမူၤအ့လးဒိကနၣ်ဝဲ ကစၢ်ယွၤအကလုၢ်ထီဘိအဃိ အဝဲလဲၤဖှူဝဲပှၤလၢ ကစၢ်ယွၤဃုထၢထီၣ်အီၤတဂၤလၢသိ ဒ်သိးကကဲထီၣ်စီၤပၤအဂီၢ်လီၤ.—၁ မူၤ. ၈:၇-၁၉.
၁၉, ၂၀. (က) ဖဲယဟိဝၤယွၤမၢဝဲ စီၤၡမူၤအ့လး ပာ်ထီၣ်စီၤပၤအဆၢကတီၢ်န့ၣ် အဝဲပာ်ဖျါထီၣ်အတၢ်ဒိကနၣ်လၢ ကျဲဒ်လဲၣ်. (ခ) စီၤၡမူၤအ့လး ဆဲးမၤစၢၤဝဲယဟိဝၤယွၤအပှၤဂီၢ်မုၢ်တဖၣ်အံၤ လၢကျဲဒ်လဲၣ်.
၁၉ မ့ၢ်စီၤၡမူၤအ့လး ဒိကနၣ်ကစၢ်ယွၤအကလုၢ်လၢ တၢ်သးအိၣ်အပူၤနီၢ်ကီၢ်ဧါ, မ့တမ့ၢ်ဘၣ်န့ၣ် မ့ၢ်အဝဲမၤဝံၤတၢ်မံၤဧါ. မ့ၢ်အဝဲဟ့ၣ်အခွဲးလၢ တၢ်သူၣ်တမုာ်သးတမုာ် အဂံၢ်ကစဲၤလီၤလၢ အသးကံၢ်ပူၤဧါ. ပှၤအါဂၤကဲထီၣ်အသးဒ်န့ၣ် သ့ဝဲလီၤ. ဘၣ်ဆၣ် စီၤၡမူၤအ့လးတမ့ၢ်ပှၤဒ်န့ၣ်ဘၣ်. အဝဲအၢၣ်လီၤတူၢ်လိာ်ဝဲလၢ စီၤစီလူးမ့ၢ်ပှၤတဂၤလၢ ယဟိဝၤယွၤဃုထၢအီၤဒီး ဖှူအီၤလၢသိန့ၣ်လီၤ. တကးဒံးဘၣ် ဒ်သိးစီၤၡမူၤအ့လးကပာ်ဖျါထီၣ်ဝဲလၢ အဒိးပၢအသးလၢ စီၤပၤတဂၤအံၤအဖီလာ်အဂီၢ် အဝဲနၢမူအီၤန့ၣ်လီၤ. ဒီးအဝဲစံးဘၣ်ပှၤဂီၢ်မုၢ်လၢ “ကွၢ်ပှၤလၢယွၤဃုထၢအီၤတက့ၢ်. အဂ့ၢ်ဒ်အံၤ, ပှၤဒ်အဝဲဒၣ်အသိးန့ၣ် တအိၣ်ဘၣ်လၢပှၤဂီၢ်မုၢ်အကျါဘၣ်.”—၁ မူၤ. ၁၀:၁, ၂၄.
၂၀ ပှၤလၢယဟိဝၤယွၤ ဃုထၢအီၤတဂၤအံၤ စီၤၡမူၤအ့လးတကွၢ်လၢ အတၢ်အၢတခီဘၣ်, ကွၢ်ဝဲလၢ အတၢ်ဂ့ၤတခီလီၤ. ဒီးစီၤၡမူၤအ့လး တလူၤပှၤဂီၢ်မုၢ်အသးဘၣ်. လၢတၢ်န့ၣ်အလီၢ် အဝဲဂုာ်ကျဲးစၢးပၢၤဃာ်ဝဲ အတၢ်သးတီလၢယွၤအဖီခိၣ်လီၤ. (၁ မူၤ. ၁၂:၁-၄) တကးဒံးဘၣ် အဝဲမၤလၢပှဲၤအမူဒါ ဒီးဟ့ၣ်ပလီၢ်ဝဲ ကစၢ်ယွၤအပှၤဂီၢ်မုၢ်လၢ ဘၣ်ဃးဒီးတၢ်လၢ အကမၤဘၣ်ဒိအဝဲသ့ၣ် အတၢ်ရ့လိာ်သးဒီး ယဟိဝၤယွၤလီၤ. ဒီးစီၤၡမူၤအ့လးဟ့ၣ်ဂံၢ်ဟ့ၣ်ဘါ အဝဲသ့ၣ်ဒ်သိး ကတီဒီးယဟိဝၤယွၤအဂီၢ်လီၤ. စီၤၡမူၤအ့လး အတၢ်ကတိၤတဖၣ် ထုးန့ၢ်အဝဲသ့ၣ်အသးအဃိ ဃ့ကညးဝဲစီၤၡမူၤအ့လး ဒ်သိးကဃ့ဘါထုကဖၣ်တၢ်လၢ အဝဲသ့ၣ်အဂီၢ်လီၤ. ဒီးစီၤၡမူၤအ့လး စံးဆၢက့ၤအီၤလၢ “မ့မ့ၢ်ယဲဒၣ်အံၤလၢ ယဘါထုကဖၣ်န့ၢ်သုဂီၢ်န့ၣ် မ်ယသုတဆိတ့ၢ်ဒီး မၤကမၣ်ဘၣ်ယွၤတဂ့ၤ. ယကသိၣ်လိသုလၢကျဲအဂ့ၤအဝါ, ဒီးအတီအလိၤလီၤ.”—၁ မူၤ. ၁၂:၂၁-၂၄.
စီၤၡမူၤအ့လး အဒိအတဲာ်သိၣ်လိပှၤလၢ ပတဘၣ်ဟ့ၣ်အခွဲးလၢ တၢ်သူၣ်က့ၣ်သးကါ မ့တမ့ၢ်တၢ်သးဆါ ကအိၣ်ထီၣ်လၢပသးပူၤဘၣ်
၂၁. နသးမ့ၢ်ဟးဂီၤ ဖဲပှၤတဂၤဂၤဒိးန့ၢ်ဘၣ်မူဒါ မ့တမ့ၢ် တၢ်ခွဲးတၢ်ယာ်တမံၤမံၤအဆၢကတီၢ်န့ၣ် စီၤၡမူၤအ့လးအဒိအတဲာ် မၤစၢၤနၤသ့ဒ်လဲၣ်.
၂၁ ဖဲပှၤတဂၤဂၤဒိးန့ၢ်ဘၣ် မူဒါမ့တမ့ၢ် တၢ်ခွဲးတၢ်ယာ်တမံၤမံၤအဆၢကတီၢ် မ့ၢ်နသးဟးဂီၤ အိၣ်ဝဲတဘျီဘျီဧါ. စီၤၡမူၤအ့လး အဒိအတဲာ်သိၣ်လိပှၤလၢ ပတဘၣ်ဟ့ၣ်အခွဲးလၢ တၢ်သူၣ်က့ၣ်သးကါ မ့တမ့ၢ်တၢ်သးဆါ ကအိၣ်ထီၣ်လၢပသးပူၤဘၣ်. (ဖး ကတိၤဒိ ၁၄:၃၀ တက့ၢ်.) ကစၢ်ယွၤဟ့ၣ်လီၤ အခ့အပှၤကိးဂၤဒဲး တၢ်ဖံးတၢ်မၤလၢအလီၤသူၣ်မံသးမုာ်န့ၣ်လီၤ.
“နသးကအုးလၢ စီၤစီလူးအဃိဆံးယံာ်လဲၣ်”
၂၂. ဘၣ်မနုၤအဃိ တကီဝဲလၢစီၤၡမူၤအ့လး ကထံၣ်ဘၣ်စီၤစီလူး အတၢ်ဂ့ၤတၢ်ဝါတဖၣ်လဲၣ်.
၂၂ စီၤၡမူၤအ့လး ကထံၣ်ဝဲစီၤစီလူးအတၢ်ဂ့ၤတၢ်ဝါတဖၣ်န့ၣ် တကီလၢအဂီၢ်ဘၣ်. မ့ၢ်လၢစီၤစီလူး မ့ၢ်ပိာ်ခွါလၢအလီၤပတြၢၤဒိၣ်မးအဃိလီၤ. အဒိ အဝဲမ့ၢ်ပှၤလၢ အနီၢ်ထီ, ဒိၣ်တၢ်ဂ့ၤ, အိၣ်ဒီးတၢ်သူၣ်ဒူသးဒူဒီး တၢ်ကူၣ်သ့တကးဒံးဘၣ် လၢအခီၣ်ထံးန့ၣ် အဝဲမ့ၢ်ပှၤလၢ အအိၣ်ဒီးတၢ်ဆီၣ်လီၤသးလီၤ. (၁ မူၤ. ၁၀:၂၂, ၂၃, ၂၇) ဘၣ်ဆၣ် လၢတၢ်ဂ့ၤတၢ်ဝါတဖၣ်အံၤ အမဲာ်ညါအဝဲအိၣ်စ့ၢ်ကီးဒီး တၢ်သဘျ့လၢ ကဃုထၢတၢ်လၢ အတၢ်အိၣ်မူအပူၤလီၤ. (၅ မိၤ. ၃၀:၁၉) မ့ၢ်အဝဲသူဝဲ အတၢ်သဘျ့အံၤလၢ ကျဲဒ်လဲၣ်.
၂၃. စီၤစီလူး အတၢ်ဂ့ၤတၢ်ဝါ လီၤမၢ်ကွံာ်ဝဲဖဲလဲၣ်တခါလဲၣ်, ဒီးအဝဲပာ်ဖျါထီၣ် တၢ်ပာ်ထီၣ်ထီအသး ဒံးယံာ်ဒံးအါထီၣ်လၢ ကျဲဒ်လဲၣ်.
၂၃ လီၤသးအုးဒိၣ်မးလၢ ပှၤတနီၤနီၤန့ၣ် ဖဲအဝဲသ့ၣ်ဒိးန့ၢ်ဘၣ် တၢ်အလီၢ်အလၤအခါ ဟးဝဲအခီၣ် တတုၤလီၤလၢၤဘၣ်. ဒီးတယံာ်တမီၢ်န့ၣ် စီၤစီလူးစ့ၢ်ကီး ဆိကမိၣ်ဒိၣ်လီၤအသးလီၤ. တၢ်သိၣ်တၢ်သီလၢ ယဟိဝၤယွၤဟ့ၣ်လီၤအီၤ ခီဖျိလၢစီၤၡမူၤအ့လးန့ၣ် အဝဲတဒိကနၣ်ဝဲဘၣ်. ဘၣ်တဘျီ အဝဲအိၣ်ခိးဝဲတကဲလၢၤဘၣ်အဃိ လုၢ်ထီၣ်တၢ်လၢ စီၤၡမူၤအ့လးကဘၣ်လုၢ်ထီၣ်ဝဲလီၤ. လၢတၢ်န့ၣ်အဃိ စီၤၡမူၤအ့လးသိၣ်အီၤ ဒီးတဲဆိပာ်ဝဲလၢ စီၤစီလူးအဖိအလံၤတဖၣ်န့ၣ် တကဲထီၣ်ဘၣ်ဝဲစီၤပၤ နီတဂၤလၢၤဘၣ်. ဘၣ်ဆၣ် အဝဲတဟံးန့ၢ်တၢ်မၤလိဘၣ်, ဒီးအနၢ်က့ၣ်ဒိၣ်န့ၢ်ဒံးလၢညါလီၤ.—၁ မူၤ. ၁၃:၈, ၉, ၁၃, ၁၄.
၂၄. (က) ဖဲစီၤစီလူးလဲၤဒုးတၢ်ဒီး ပှၤဧမၤလ့းဖိအခါ အဝဲတဒိကနၣ်ယွၤအကလုၢ်န့ၣ် ပာ်ဖျါဝဲဒ်လဲၣ်. (ခ) ဖဲစီၤစီလူးဘၣ်တၢ်သိၣ်အီၤအခါ အဝဲမၤဝဲဒ်လဲၣ်, ဒီးယဟိဝၤယွၤ ဆၢတဲာ်လီၤအသးဒ်လဲၣ်.
၂၄ ယဟိဝၤယွၤသူဝဲ စီၤၡမူၤအ့လးဒ်သိး ကတဲဘၣ်စီၤစီလူးလၢ အဝဲကဘၣ်လဲၤဒုးဝဲ ပှၤဧမၤလ့းဖိလီၤ. ဒီးယဟိဝၤယွၤမၤလိာ်အီၤလၢ ကဘၣ်မၤသံဝဲစီၤပၤအၤကးလီၤ. ဘၣ်ဆၣ် စီၤစီလူးပျဲဝဲ လၢ စီၤပၤအၤကးကအိၣ်မူဒံးဝဲလီၤ. တကးဒံးဘၣ် တၢ်လၢယဟိဝၤယွၤစံးဝဲလၢ အဝဲကဘၣ်မၤဟးဂီၤဝဲတဖၣ်န့ၣ် အဝဲတမၤဟးဂီၤကွံာ်ဝဲခဲလၢာ်ဘၣ်. လၢတၢ်န့ၣ်အလီၢ် အဝဲဟံးန့ၢ်ဝဲတၢ်လၢအဂ့ၤကတၢၢ်လီၤ. ဖဲစီၤၡမူၤအ့လး ဟဲသိၣ်အီၤအဆၢကတီၢ် ဖျါလၢစီၤစီလူးအတၢ်ပာ်သူၣ်ပာ်သးန့ၣ် ဆီတလဲဝဲဖးဒိၣ်လံ. အဝဲတဲပူၤဖျဲးအသး, ပာ်တီပာ်လိၤ တၢ်လၢအမၤဝဲတဖၣ် ဒီးပာ်တၢ်ကမၣ်လၢ ပှၤဂီၢ်မုၢ်အလိၤလီၤ. ဒီးဖဲစီၤစီလူးဂုာ်ကျဲးစၢးမၤဆံးလီၤစှၤလီၤ အတၢ်ကမၣ်အဆၢကတီၢ် အဝဲစံးဝဲလၢ တၢ်လၢပှၤဟံးန့ၢ်ဝဲတနီၤန့ၣ် မ့ၢ်ဝဲဒၣ်လၢပှၤကလုၢ်ထီၣ်အီၤဆူ ယဟိဝၤယွၤအအိၣ်အဂီၢ်လီၤ. ဖဲန့ၣ်အဆၢကတီၢ် စီၤၡမူၤအ့လးစံးဝဲလၢ “ကွၢ်ကွၢ်, ဒိကနၣ်တၢ်န့ၣ်ဂ့ၤန့ၢ်လုၢ်တၢ်” န့ၣ်လီၤ. ယဟိဝၤယွၤဆၢတဲာ်အသးလၢ အဝဲကထုးထီၣ်ကွံာ်စီၤစီလူးလၢ စီၤပၤအလီၢ်ဒီး ကဟ့ၣ်က့ၤဝဲပှၤလၢ အဂ့ၤန့ၢ်အီၤန့ၣ်လီၤ. ခီဖျိလၢ စီၤၡမူၤအ့လးအိၣ်ဒီး တၢ်သူၣ်ဒူသးဒူအဃိ အဝဲသိၣ်က့ၤသီက့ၤစီၤစီလူးဒီး တဲဘၣ်အီၤလၢ ယဟိဝၤယွၤအတၢ်ဆၢတဲာ်န့ၣ်လီၤ. *—၁ မူၤ. ၁၅:၁-၃၃.
၂၅, ၂၆. (က) ဘၣ်မနုၤအဃိ စီၤၡမူၤအ့လးသူၣ်အုးသးအုးလဲၣ်, ဒီးယဟိဝၤယွၤ သိၣ်အီၤဒ်လဲၣ်. (ခ) ဖဲစီၤၡမူၤအ့လးလဲၤဝဲဆူ စီၤယံးၡဲအဟံၣ်အဆၢကတီၢ်န့ၣ် အဝဲဒိးန့ၢ်ဘၣ်တၢ်မၤလိဒ်လဲၣ်.
၂၅ ခီဖျိလၢ စီၤစီလူးတအိၣ်ဒီးတၢ်ဒိကနၣ်အဃိ စီၤၡမူၤအ့လး အသူၣ်ကိၢ်သးဂီၤဝဲဒိၣ်မးလီၤ. လၢတၢ်န့ၣ်အဃိ အဝဲကိးပသူထီၣ်ဝဲဆူ ယဟိဝၤယွၤအအိၣ် ဒီတနၤညါလီၤ. ဒီးအသးအုးဒိၣ်မးလၢအဃိလီၤ. စီၤၡမူၤအ့လး ထံၣ်ဘၣ်ဝဲလၢစီၤစီလူး အိၣ်ဒီးတၢ်သ့တၢ်ဘၣ်ဒီး မုၢ်လၢ်ဝဲလၢစီၤစီလူးကမၤတၢ် လၢအဂ့ၤအါမးဘၣ်ဆၣ် အတၢ်မုၢ်လၢ် လီၤညွံးလီၤဘဲကွံာ်လၢာ်လံ. ဒီးစီၤစီလူးအတၢ်ပာ်သူၣ်ပာ်သးန့ၣ် တဒ်သိးဒီးလၢညါလၢၤဘၣ်. ဒီးအတၢ်ဂ့ၤတၢ်ဝါလၢညါတဖၣ်န့ၣ် လီၤမၢ်ကွံာ်ဝဲတကးဒံးဘၣ် အဝဲထီဒါဝဲယဟိဝၤယွၤလီၤ. လၢတၢ်န့ၣ်အဃိ စီၤၡမူၤအ့လးတလဲၤထံၣ်လိာ်အသးဒီးအီၤလၢၤဘၣ်. ဘၣ်ဆၣ် ဒ်တၢ်ဆၢကတီၢ်လဲၤပူၤကွံာ်ဝဲအသိး ယဟိဝၤယွၤသိၣ်ဝဲ စီၤၡမူၤအ့လးလၢတၢ်အဲၣ်တၢ်ကွံအပူၤ ဒီးတဲဘၣ်အီၤလၢ “နသးကအုးလၢ စီၤစီလူးအဃိဆံးယံာ်လဲၣ်, အဂ့ၢ်ဒ်အံၤ, ယညိကွံာ်အီၤလၢစီၤပၤအလီၢ် လၢအံၣ်စရ့လးအဖီခိၣ်လံ. မၤပှဲၤနနၢၤတကျီၣ်ဒီးသိ, ဒီးလဲၤတၢ်တက့ၢ်. ယကဒုးလဲၤနၤဆူပှၤဘ့ၤသလ့ဃ့ၣ်ဖိ စီၤယံးၡဲအအိၣ်လီၤ. အဂ့ၢ်ဒ်အံၤ, ယထံၣ်န့ၢ်စီၤပၤလၢယဂီၢ် လၢအဖိခွါအကျါလံ.”—၁ မူၤ. ၁၅:၃၄, ၃၅; ၁၆:၁.
၂၆ ပှၤဟီၣ်ခိၣ်ဖိလၢ အတလၢတပှဲၤ မ့ၢ်တတီဒီးယွၤသနာ်က့ ယဟိဝၤယွၤအတၢ်တိာ်ပာ် ကဟဲလၢထီၣ်ပှဲၤထီၣ်ဝဲကိးဘျီဒဲးလီၤ. ပှၤတဂၤမ့ၢ်တမၤ ယဟိဝၤယွၤအတၢ်မၤလၢၤဘၣ်န့ၣ် ကစၢ်ယွၤကဃုထၢထီၣ်ဝဲ ပှၤအသီတဂၤဒ်သိး ကမၤလၢပှဲၤအတၢ်ဘၣ်သးအဂီၢ်န့ၣ်လီၤ. လၢတၢ်န့ၣ်အဃိ စီၤၡမူၤအ့လး တသူၣ်အုးသးအုးလၢ စီၤစီလူးအဃိလၢၤဘၣ်. ဒ်ယဟိဝၤယွၤနဲၣ်လိအီၤအသိး အဝဲလဲၤဝဲဆူ စီၤယံးၡဲအဟံၣ်လၢ ဝ့ၢ်ဘ့ၤသလ့ဃ့ၣ်ဒီး ထံၣ်ဘၣ်ဝဲစီၤယံးၡဲအဖိခွါလၢ အဒိၣ်တၢ်ဂ့ၤတဖၣ်လီၤ. ယဟိဝၤယွၤတဲဆိဃာ်ဝဲ စီၤၡမူၤအ့လးလၢ တဘၣ်ကွၢ်တၢ်လၢ အအိၣ်ဖျါလၢခိတဂ့ၤ. (ဖး ၁ ၡမူၤအ့လး ၁၆:၇ တက့ၢ်.) လၢခံကတၢၢ်န့ၣ် စီၤၡမူၤအ့လးထံၣ်လိာ်အသးဒီး စီၤယံးၡဲအဖိခွါလၢအဆံးကတၢၢ်စီၤဒၤဝံးလီၤ. ဒီးအဝဲမ့ၢ် ပှၤတဂၤလၢ ယဟိဝၤယွၤဃုထၢထီၣ်အီၤလီၤ.
စီၤၡမူၤအ့လး ထံၣ်ဘၣ်ဝဲလၢ ဖဲတၢ်ကီတၢ်ခဲ ဟဲကဲထီၣ်အသးအဆၢကတီၢ် ယဟိဝၤယွၤမၤဘၣ်လိာ်က့ၤအီၤသ့ ဒီးလၢတၢ်ကီတၢ်ခဲအလီၢ်န့ၣ် ယဟိဝၤယွၤဒုးအိၣ်ထီၣ် တၢ်ဆိၣ်ဂ့ၤသ့ဝဲ
၂၇. (က) ဒ်သိးစီၤၡမူၤအ့လး အတၢ်နာ်ကဒိၣ်ထီၣ်ဝဲအဂီၢ်န့ၣ် တၢ်မနုၤမၤစၢၤအီၤလဲၣ်. (ခ) နမ့ၢ်ဆိကမိၣ်ထံ စီၤၡမူၤအ့လးအဒိအတဲာ်န့ၣ် နကတူၢ်ဘၣ်ဒ်လဲၣ်.
၂၇ တချုးလၢစီၤၡမူၤအ့လးသံအခါ အဝဲထံၣ်ဘၣ်ဝဲလၢ ယဟိဝၤယွၤဃုထၢထီၣ် စီၤဒၤဝံးလၢစီၤစီလူးအလီၢ်န့ၣ် မ့ၢ်တၢ်လၢအကြၢးဝဲဘၣ်ဝဲ သပှၢ်ကတၢၢ်လီၤ. စီၤစီလူးလီၤထွံလီၤယွၤလၢ တၢ်သူၣ်က့ၣ်သးကါအပူၤ တုၤဒၣ်လဲာ်အဝဲလူၤဃုမၤသံဝဲ စီၤဒၤဝံးန့ၣ်လီၤ. မ့မ့ၢ်စီၤဒၤဝံးန့ၣ် အိၣ်ဒီးတၢ်သးဒူ, တၢ်နာ် ဒီးတၢ်သးတီတကးဘၣ် မၤတၢ်တီတၢ်လိၤန့ၣ်လီၤ. စီၤၡမူၤအ့လးအတၢ်နာ် ဒံးယံာ်ဒံးအါထီၣ်ဝဲ တုၤလၢအသံတစုလီၤ. မ့ၢ်လၢအဝဲထံၣ်ဘၣ်လၢ ဖဲအတၢ်မုၢ်လၢ်တလၢပှဲၤ ဒီးဖဲတၢ်ကီတၢ်ခဲ ဟဲကဲထီၣ်သးအဆၢကတီၢ် ယဟိဝၤယွၤမၤဘၣ်ဘျီးဘၣ်ဒါက့ၤသ့ဝဲလီၤ. ဒီးလၢတၢ်ကီတၢ်ခဲအလီၢ်န့ၣ် ယဟိဝၤယွၤဒုးအိၣ်ထီၣ် တၢ်ဆိၣ်ဂ့ၤသ့ဝဲလီၤ. စီၤၡမူၤအ့လး အတၢ်လဲၤခီဖျိလၢ အနံၣ် ၁၀၀ ဃၣ်ဃၣ်အတီၢ်ပူၤန့ၣ် မ့ၢ်တၢ်လၢအလီၤပတြၢၤဝဲဒိၣ်မးလီၤ. လၢတၢ်န့ၣ်အဃိ ဖဲအဝဲသံအဆၢကတီၢ် ပှၤအံၣ်စရ့လးဖိခဲလၢာ် သူၣ်အုးသးအုးဒိၣ်မးလီၤ. မုၢ်မဆါတနံၤညါအံၤ ယဟိဝၤယွၤအခ့အပှၤတဖၣ် ကြၢးသံကွၢ်လီၤအသးလၢ ‘မ့ၢ်ယကကွၢ်လိမၤဒိး စီၤၡမူၤအ့လးအဒိအတဲာ်ဧါ.’
^ လံာ်အဆၢ. 24 စီၤပၤလၢအအၢအသီတဂၤအံၤ ဒီးအဟံၣ်ဖိဃီဖိန့ၣ် တကြၢးဒီးတၢ်သးကညီၤဘၣ်. စီၤၡမူၤအ့လးမၤသံဝဲ စီၤပၤအၤကးလၢ အနီၢ်ကစၢ်လီၤ. နံၣ်လၢအကယၤတဖၣ်လဲၤပူၤကွံာ်ဝဲဒီး “ပှၤအကၤကးဖိ စီၤဟၤမၣ်” ဂုာ်ကျဲးစၢးမၤသံကွံာ်ဝဲ ကစၢ်ယွၤအပှၤဂီၢ်မုၢ်ကိးဂၤဒဲးလီၤ. ဖျါလၢအဝဲ ကဟဲလီၤစၢၤလီၤသွဲၣ်လၢ စီၤပၤအၤကးလီၤ. —အ့ၤစတၢ် ၈:၃; ကွၢ်တၢ်မၤလိ ၁၅ ဒီး ၁၆ လၢလံာ်အံၤအပူၤတက့ၢ်.
တၢ်ဂ့ၤအဂၤလၢ နကဘၣ်သး
ကွၢ်လိမၤဒိးအဝဲသ့ၣ်အတၢ်နာ်
စီၤၡမူၤအ့လး—အဝဲ “ဒိၣ်ထီၣ်ဝဲလၢယွၤအမဲာ်ညါ”
ဖဲစီၤၡမူၤအ့လး အနီၢ်ဆံးဆံးဖိအခါ အတၢ်အိၣ်မူလီၤဆီဒီး ဖိသၣ်အဂၤတဖၣ်ဒ်လဲၣ်. ဖဲစီၤၡမူၤအ့လးအိၣ်လၢ ဒဲစီဆှံအခါ ဒ်သိးအတၢ်နာ်ကဒိၣ်ထီၣ်အဂီၢ် တၢ်မနုၤမၤစၢၤအီၤလဲၣ်.
တၢ်ဖးလံာ်စီဆှံဒ်တၢ်ဂဲၤဒိပူနီၢ်နီၢ်
“အိၣ်ဒီးတၢ်သးဒူ ဒီးပာ်ဆူၣ်ထီၣ်နသး ဒီးမၤတၢ်တက့ၢ်”
စီၤပၤဒၤဝံး သ့ၣ်ညါနၢ်ပၢၢ်ဘၣ်ဝဲလၢ တၢ်သးဒူ ဒီးတၢ်နာ်ကစၢ်ယွၤန့ၣ် ကဘၣ်ပာ်ဖျါထီၣ်လၢ တၢ်မၤန့ၣ်လီၤ. မုၢ်မဆါတနံၤအံၤ ဖဲပကွၢ်ဆၢၣ်မဲာ်ဘၣ် တၢ်ကီတၢ်ခဲအခါ ပဟံးန့ၢ် တၢ်ဂံၢ်တၢ်ဘါလၢ စီၤဒၤဝံး အတၢ်ကတိၤတဖၣ်သ့လီၤ.
ကွၢ်လိမၤဒိးအဝဲသ့ၣ်အတၢ်နာ်
ဝံအ့ၤလံယၤ—အဝဲ အိၣ်ခိးဒီးဆိးသီ
ဖဲဝံအ့ၤလံယၤအိၣ်ခိးဝဲလၢ ယဟိဝၤယွၤကမၤလၢပှဲၤ အတၢ်အၢၣ်လီၤအခါ အဝဲပာ်ဒိၣ်ဝဲတၢ်ထုကဖၣ်န့ၣ်ပာ်ဖျါထီၣ်ဝဲ လၢကျဲဒ်လဲၣ်.
လံာ်စီဆှံ အတၢ်သိၣ်လိတဖၣ်
တၢ်ပီးတၢ်လီတဖၣ်လၢ တၢ်မၤလိလံာ်စီဆှံအဂီၢ်
ဒ်သိး နမၤလိလံာ်စီဆှံကမုာ် ဒီးကထုးန့ၢ်နသးအဂီၢ် ဃုထၢ တၢ်ပီးတၢ်လီလၢ တၢ်မၤလိလံာ်စီဆှံအဂီၢ် တဖၣ်အံၤတက့ၢ်.
လံာ်စီဆှံ အတၢ်သိၣ်လိတဖၣ်
မၤလိကွၢ် လံာ်စီဆှံဒီးပှၤ
မၤလိသကိး တၢ်မၤလိလံာ်စီဆှံ လၢတလိၣ်ဟ့ၣ်စ့ဘၣ်ဒီး ပှၤလၢအကမၤလိနၤ လံာ်စီဆှံတဂၤ.
