ဃ့ဘါထုကဖၣ်​ ဒီးကတဲာ်ကတီၤပာ်စၢၤအီၤဂ့ၤဂ့ၤတက့ၢ်. ဒ်သိးနကသးစၢၢ်ဆၢထဲတၢ်ဂ့ၢ်လၢ နတဲဘၣ်ပှၤဂၤ ဒီးနသုတသးစၢၢ်ဆၢလီၤနနီၢ်ကစၢ်သးတဂ့ၤအဂီၢ် ဃ့ဘါထုကဖၣ်တက့ၢ်. ဃုသ့ၣ်ညါပာ်စၢၤ တၢ်ဂ့ၢ်လၢနကတဲအီၤတဖၣ်တက့ၢ်. တဘၣ်တိၢ်ရူးတၢ်ကတိၤလၢ အအိၣ်လၢလံာ်ပူၤန့ၣ်တဂ့ၤ. လၢတၢ်န့ၣ်အလီၢ် ဒ်သိးနပှၤဒိကနၣ်တၢ်ဖိ ကနၢ်ပၢၢ်ဝဲတၢ်လၢ နတဲတဖၣ်အဂီၢ် တဲနၢ်ပၢၢ်အီၤလၢ နနီၢ်ကစၢ်အတၢ်ကတိၤတက့ၢ်.

တဲတၢ်လၢ တၢ်သူၣ်အိၣ်သးအိၣ်အပူၤတက့ၢ်. ဆိကမိၣ်ထီၣ်ဘၣ်ဃးဒီး ဘၣ်မနုၤအဃိ နပှၤဒိကနၣ်တၢ်ဖိ ကြၢးနၢ်ဟူဝဲ တၢ်ဂ့ၢ်လၢနကတဲအံၤန့ၣ်လဲၣ်. သူၣ်အိၣ်သးအိၣ်အဝဲသ့ၣ်တက့ၢ်. နမ့ၢ်မၤဒ်န့ၣ်န့ၣ်​ နတၢ်ပာ်မဲာ်ပာ်နါ, တၢ်နဲၣ်စုနဲၣ်ခီၣ်​ ဒီးနတၢ်ဟူးတၢ်ဂဲၤတဖၣ်န့ၣ်​ အဝဲသ့ၣ်ကသ့ၣ်ညါဝဲလၢ နသူၣ်အိၣ်သးအိၣ်အဝဲသ့ၣ်နီၢ်ကီၢ်လီၤ.

ကွၢ်တၢ်ဆူ နပှၤဒိကနၣ်တၢ်ဖိအအိၣ်တက့ၢ်. ဖဲနဟ့ၣ်တၢ်စံၣ်တဲၤတဲလီၤအခါ နကကွၢ်ပှၤမဲာ်အဂီၢ် မ့ၢ်တကဲထီၣ်​ တၢ်လီၤရၢၢ်လီၤစၢၢ်ဘၣ်န့ၣ်​ ကွၢ်တၢ်ဆူ နပှၤဒိကနၣ်တၢ်ဖိတဖၣ်​ အအိၣ်တက့ၢ်. လၢနကကွၢ် ပှၤဒိကနၣ်တၢ်ဖိခဲလၢာ်အလီၢ် ကွၢ်နပှၤဒိကနၣ်တၢ်ဖိ တဂၤဝံၤတဂၤတက့ၢ်.