ပှၤ​တနီၤ​လၢ​အိၣ်​လၢ​တၢ်ဘူၣ်​တၢ်ဘါ ခဲလၢာ်​အကျါ​န့ၣ် အဲၣ်ဒိး​မၤ​တၢ်ဘၣ်​ယွၤ​အသး​န့ၣ်​လီၤ. ကစၢ်​ယွၤ​ထံၣ်ဘၣ်​ပှၤ​တဖၣ်​အံၤ​ဒီး သးအိၣ်​အဝဲသ့ၣ်​လီၤ. တၢ်အံၤ​မ့ၢ်​တၢ်သးခု​ကစီၣ်​လီၤ. ဘၣ်ဆၣ် တၢ်ဘူၣ်​တၢ်ဘါ​န့ၣ် ပှၤ​သူ​အီၤ​လၢ က​မၤဝဲ​တၢ်အၢ​တၢ်သီ​အဂီၢ်​အဃိ မ့ၢ်​တၢ်​လၢ​အ​လီၤသးအုး​ဒိၣ်မး​လီၤ. (၂ ကရံၣ်သူး ၄:၃, ၄; ၁၁:၁၃-၁၅) တၢ်ကစီၣ်​ပာ်ဖျါ​ထီၣ်ဝဲ​လၢ တၢ်ဘူၣ်​တၢ်ဘါ​တနီၤ​ပၣ်ဃုာ်​လၢ တၢ်မၤ​ဆူၣ်​မၤစိး, တၢ်​မၤသံ​မၤ​ဝီ, တၢ်ဒုး​တၢ်ယၤ, ဒီး​တၢ်မၤ​တရီတပါ​ဖိသၣ်​လီၤ. တၢ်အံၤ​မၤ​သးအုး ပှၤ​တဖၣ်​လၢ​အဲၣ် ဒိး​မၤ​တၢ်ဘၣ်​ယွၤ​အသး​န့ၣ်​လီၤ. —ဖး မးသဲ ၂၄:၃-၅, ၁၁, ၁၂ တက့ၢ်.

 တၢ်ဘူၣ်​တၢ်ဘါ​အမ့ၢ်​အတီ​န့ၣ် မၤ​လၤကပီၤ​ယွၤ​သနာ်က့ တၢ်ဘူၣ်​တၢ်ဘါ​အ​ကမၣ်​န့ၣ် မၤ​သးအုး​ကစၢ်​အသး​လီၤ. ဒီး​အဝဲသ့ၣ်​အ​တၢ်​သိၣ်လိ​တဖၣ်​န့ၣ် တ​ဒိးသန့ၤ​ထီၣ် အသး​လၢ​လံာ်စီဆှံ​ပူၤ​ဘၣ်. အဝဲသ့ၣ်​သိၣ်လိ​ဝဲ တၢ်သိၣ်​တၢ်သီ​အ​ကမၣ်​လၢ ဘၣ်ဃး​ဒီး​ယွၤ ဒီး​တၢ်သံ​အဂ့ၢ်​န့ၣ်​လီၤ. ဘၣ်ဆၣ် ယဟိဝၤ​ယွၤ​အဲၣ်ဒိးဝဲ​လၢ ပှၤကညီ​တဖၣ်​က​သ့ၣ်ညါ​ထီၣ် တၢ်မ့ၢ်​တၢ်တီ​လၢ ဘၣ်ဃး​ဒီး​အီၤ​လီၤ.—ဖး စံၣ်တဲၤ​တဲလီၤ​တၢ် ၉:၅, ၁၀; ၁ တံၤမသ့း ၂:၃-၅ တက့ၢ်.

 တၢ်ဘူၣ်​တၢ်ဘါ​တဖၣ်​လၢ စံး​လီၤအသး​လၢ​အ​အဲၣ်​ကစၢ်​ယွၤ​ဘၣ်ဆၣ် အဲၣ်ဝဲ​ဟီၣ်ခိၣ်​လၢ​မုၣ်ကီၤလံၢ်​ပၢဝဲ​န့ၣ် လီန့ၢ်​ဝဲ​ကစၢ်​တန့ၢ်ဘၣ်. (ယၤကိာ် ၄:၄) ယွၤ​အ​ကလုၢ်​ကထါ ကိးဝဲ​တၢ်ဘူၣ်​တၢ်ဘါ​အ​ကမၣ်​ခဲလၢာ်​လၢ “ဘၤဘူၤလိၣ်​ဖးဒိၣ်” လီၤ. ထံလုၣ်ဘၢ​တၢ်​ဖဲ စီၤ​နိအၤ​အ​စိၤ​ဝံၤ​အလီၢ်​ခံ တၢ်ဘူၣ်​တၢ်ဘါ​အ​ကမၣ် စးထီၣ်​အသး​လၢ ဝ့ၢ်​ဘၤ​ဘူၣ်​လိၣ်​အ​ပူၤ​န့ၣ်​လီၤ. တ​ယံာ်လၢၤဘၣ် တၢ်ဘူၣ်​တၢ်ဘါ​လၢ အ​လီန့ၢ်​ပှၤ​ဟီၣ်ခိၣ်​ဖိ​ဒီး မၤနး​မၤဖှီၣ် ပှၤကညီ​တဖၣ်​န့ၣ် ကစၢ်​ယွၤ​က​မၤ​ဟးဂီၤ​ကွံာ်ဝဲ သတူၢ်​ကလာ်​လီၤ.—ဖး လီၣ်ဖျါ ၁၇:၁, ၂, ၅, ၁၆, ၁၇; ၁၈:၈ တက့ၢ်.

 ဘၣ်ဆၣ် တၢ်သးခု​ကစီၣ်​အိၣ်​ဒံးဝဲ​လီၤ. ပှၤ​အိၣ်​လၢ တၢ်ဘူၣ်​တၢ်ဘါ​အ​ကမၣ်​အ​ပူၤ​ဘၣ်ဆၣ် မ့ၢ်​အဲၣ်ဒိး​မၤ​တၢ်ဘၣ်​ယွၤ​အသး​န့ၣ် ကစၢ်​တ​သးပ့ၤနီၣ်​အဝဲသ့ၣ်​ဘၣ်. ကစၢ်​ပာ်ဖှိၣ်​ထီၣ်​ပှၤ​တဖၣ်​အံၤ ခီဖျိ​သိၣ်လိ​အဝဲသ့ၣ်​လၢ တၢ်မ့ၢ်​တၢ်တီ​န့ၣ်​လီၤ.—ဖး မံကၤ ၄:၂, ၅ တက့ၢ်.

 ယဟိဝၤ​ယွၤ​သးအိၣ် ပှၤလၢ​အ​အဲၣ်​တၢ်မ့ၢ်​တၢ်တီ​ဒီး အဲၣ်ဒိး​မၤ​တၢ်ဂ့ၤ​န့ၣ်​လီၤ. ကစၢ်​ဟ့ၣ်သဆၣ်​ထီၣ်​အဝဲသ့ၣ်​လၢ က​ဟးထီၣ်​လၢ တၢ်ဘူၣ်​တၢ်ဘါ​အ​ကမၣ်​အ​ပူၤ​လီၤ. ပှၤလၢ​အ​အဲၣ်​ယွၤ​န့ၣ် အသး​အိၣ်​ဆီတလဲ​ကွံာ်ဝဲ အ​တၢ်အိၣ်မူ​အကျဲ​လၢ အ​တဂ့ၤ​တဘၣ်​တဖၣ်​န့ၣ်​လီၤ.—ဖး လီၣ်ဖျါ ၁၈:၄ တက့ၢ်.

 လၢ​တၢ​ယၤဖှိၣ်​နံၣ်​အတီၢ်ပူၤ, ဖဲ​ပှၤလၢ​အ​အဲၣ်ဒိး​မၤ တၢ်ဘၣ်​ယွၤ​အသး​တဖၣ် နၢ်ဟူ​ဘၣ်​ဝဲ​တၢ်သးခု​ကစီၣ်​လၢ တၢ်မၢဖိ​တဖၣ်​အ​အိၣ်​အဆၢ​ကတီၢ် အဝဲသ့ၣ်​တူၢ်လိာ်ဝဲ​လၢ တၢ်သးခု​အ​ပူၤ​လီၤ. အဝဲသ့ၣ်​မၤလိ တၢ်အိၣ်မူ​ကျဲ​အသီ​လၢ ယဟိဝၤ​ယွၤ​အ​အိၣ်​လီၤ. လၢတၢ်န့ၣ်​အဃိ အဝဲသ့ၣ်​ဒိးန့ၢ်​ဘၣ်​တၢ်အိၣ်မူ​လၢ အပှဲၤ​ဒီး​အခီပညီ ဒီး​တၢ်​မုၢ်လၢ်​န့ၣ်​လီၤ. အဝဲသ့ၣ်​တူၢ်လိာ်​တၢ်သးခု​ကစီၣ်​ဒီး ပာ်​ယဟိဝၤ​ယွၤ​အ​တၢ်မၤ​လၢညါ​အဃိ ကဲထီၣ်​တၢ်​ဒိဂ့ၤတဲာ်ဘၣ်​လၢ​ပဂီၢ်လီၤ.—ဖး ၁ သ့းစၤလနံ ၁:၈, ၉; ၂:၁၃ တက့ၢ်.

 ပှၤလၢ​အ​ဟးထီၣ်​လၢ တၢ်ဘူၣ်​တၢ်ဘါ​အ​ကမၣ်​အ​ပူၤ​န့ၣ် ယဟိဝၤ​ယွၤ​တူၢ်လိာ်မုာ်​အီၤ​လၢ က​ကဲထီၣ်​အ​ဒူၣ်ဖိ​ထၢဖိ​လီၤ. န​မ့ၢ်​တူၢ်လိာ် ယဟိဝၤ​ယွၤ​အ​တၢ်​ကွဲမုာ်​န့ၣ် န​က​ကဲထီၣ် ကစၢ်​အ​တံၤသကိး​လီၤ. တကးဒံးဘၣ် န​က​ဒိးန့ၢ်​ဘၣ် ဟံၣ်ဖိ​ဃီဖိ​အသီ​လၢ အ​ဘူၣ်ထီၣ်​ဘါထီၣ်​ယဟိဝၤ​ယွၤ လၢ​အ​အိၣ်ဒီး​တၢ်အဲၣ်​တၢ်ကွံ ဒီး​န​က​ဒိးန့ၢ်​ဘၣ်​စ့ၢ်ကီး တၢ်မူ​အထူ​အယိာ်​လီၤ.—ဖး မၢ်ကူး ၁၀:၂၉, ၃၀; ၂ ကရံၣ်သူး ၆:၁၇, ၁၈ တက့ၢ်.

 ကစၢ်​ယွၤ​က​စံၣ်ညီၣ် တၢ်ဘူၣ်​တၢ်ဘါ​အ​ကမၣ်​န့ၣ် မ့ၢ်​တၢ်သးခု​ကစီၣ်​လီၤ. တၢ်အံၤ​က​မၤ​ထူၣ်ဖျဲး​ထီၣ် ပှၤ​ဟီၣ်ခိၣ်​ဖိ​တဖၣ် လၢ​တၢ်နး​တၢ်ဖှီၣ်​အ​ပူၤ​လီၤ. တၢ်ဘူၣ်​တၢ်ဘါ​အ​ကမၣ်​န့ၣ် တ​လီန့ၢ်​ဒီး​တ​မၤ​လီၤဖး​ပှၤ​ဟီၣ်ခိၣ်​ဖိ နီတဘျီ​လၢၤဘၣ်. ပှၤ​ကိးဂၤ​ဒဲး​က​ဘူၣ်ထီၣ်​ဘါထီၣ်​ဝဲ ယွၤ​အမ့ၢ်​အတီ​ထဲ​တဂၤဧိၤ လၢ​တၢ်ဃူ​တၢ်ဖိး​အ​ပူၤ​လီၤ.—ဖး လီၣ်ဖျါ ၁၈:၂၀, ၂၁; ၂၁:၃, ၄ တက့ၢ်.