ကစၢ်​ယွၤ​ကွဲမုာ်​ပှၤ​ကိး​ကလုာ်​ဒဲး​လၢ က​သုးဘူး​အသး​ဆူ​အ​အိၣ် လၢ​တၢ်​ထုကဖၣ်​လီၤ. (စံးထီၣ်​ပတြၢၤ ၆၅:၂) ဘၣ်ဆၣ် ကစၢ်​တ​ဒိကနၣ် ပှၤ​ကိးဂၤ​ဒဲး​အ​တၢ်​ထုကဖၣ်​ဘၣ်. အဒိ, ပိာ်ခွါ​တဂၤ လၢ​မၤအၢ​မၤသီ​အမါ မ့ၢ်​ဃ့​ထုကဖၣ်​န့ၣ် ဘၣ်​သ့ၣ်​သ့ၣ်​ကစၢ်​ယွၤ​တ​ဒိကနၣ်​ဝဲ​ဘၣ်. (၁ ပ့းတရူး ၃:၇) ဖဲ​ပှၤ​အံၣ်စရ့လး​ဖိ​တဖၣ် ဆဲး​မၤဝဲ​တၢ်အၢ​တၢ်သီ​တဘျီ​ဝံၤ​တဘျီ​အခါ ကစၢ်​ယွၤ​တ​ဒိကနၣ် အဝဲသ့ၣ်​အ​တၢ်​ထုကဖၣ်​ဘၣ်. ဘၣ်ဆၣ် ပှၤ​မၤတ့ၢ်​တၢ်ကမၣ်​ဖးဒိၣ် မ့ၢ်​ပီၢ်ယၢ်​လီၤ​က့ၤ​အသး​န့ၣ် ကစၢ်​ယွၤ​က​ဒိကနၣ် အဝဲသ့ၣ်​အ​တၢ်​ထုကဖၣ်​လီၤ. ဖျါတြၢၢ်ကလာ်​လၢ တၢ်​ထုကဖၣ်​န့ၣ် မ့ၢ်​တၢ်ခွဲး​တၢ်ယာ်​လီၤဆီ​တခါ​လီၤ.—ဖး ယၡါယၤ ၁:၁၅; ၅၅:၇ တက့ၢ်.

 ကွၢ်​တၢ်ဂီၤမူ​လၢ​အမ့ၢ် မ့ၢ်​ကစၢ်​ယွၤ​ဒိကနၣ် ပှၤ​ကိးဂၤ​ဒဲး အ​တၢ်​ထုကဖၣ်​ဧါ

 ယဟိဝၤ​ယွၤ​မ့ၢ်​ပ​တၢ်ဘၣ်တ့​ကစၢ် ဒီး​ယွၤ​အမ့ၢ်​အတီ​ထဲ​တဂၤဧိၤ​အဃိ ပ​ကြၢး​ဃ့​ဘါ​ထုကဖၣ်​ထဲ လၢ​အဝဲ​အ​အိၣ်​န့ၣ်​လီၤ. (မးသဲ ၄:၁၀; ၆:၉) ခီဖျိ​ပ​တလၢ​တ​ပှဲၤ​အဃိ ပ​ကြၢး​ဃ့​ထုကဖၣ်​လၢ ယ့ၣ်ၡူး​အ​မံၤ​လီၤ. မ့ၢ်​လၢ​အဝဲ​တူၢ်သံ​အသး​လၢ ပ​တၢ်ဒဲးဘး​အဃိ​လီၤ. (ယိၤဟၣ် ၁၄:၆) ယဟိဝၤ​ယွၤ​တဘၣ်​အသး​လၢ တၢ်​ထုကဖၣ်​လၢ ပ​တိၢ်ရူး မ့တမ့ၢ် ပ​ကွဲး​ပာ်​အီၤ​ဘၣ်. ကစၢ်​အဲၣ်ဒိးတၢ်​ထုကဖၣ်​လၢ​အ​ဟဲထီၣ်​လၢ​ပ​သးပူၤ​န့ၣ်​လီၤ.—ဖး မးသဲ ၆:၇; ဖံလံးပံၤ ၄:၆, ၇ တက့ၢ်.

 ပ​မ့ၢ်​ဃ့​ထုကဖၣ်​လၢ ပ​သးပူၤ​ဒၣ်လဲာ် တၢ်ဘၣ်တ့​ကစၢ်​နၢ်ဟူ​ဝဲ​လီၤ. (၁ ၡမူၤအ့လး ၁:၁၂, ၁၃) ကစၢ်​ကွဲမုာ်​ပှၤလၢ ပ​က​ဃ့​ထုကဖၣ် ကိး​ဆၢကတီၢ်​ဒဲး ဒ်သိး​ဒီး​တချုး​ပ​မံ​အဆၢ​ကတီၢ်, ဖဲ​ပ​မံ​ပၢၢ်ထီၣ်​အဆၢ​ကတီၢ်, ဖဲ​ပ​က​အီၣ်တၢ်​အဆၢ​ကတီၢ်, ဒီး​ဖဲ​ပ​ကွၢ်ဆၢၣ်မဲာ်​ဘၣ် တၢ်ကီ​တၢ်ခဲ​အဆၢ​ကတီၢ်​န့ၣ်​လီၤ.—ဖး စံးထီၣ်​ပတြၢၤ ၅၅:၂၂; မးသဲ ၁၅:၃၆ တက့ၢ်.

 ပ​က​သုးဘူး​ပ​သး​ဆူ​ယွၤ​အိၣ်​န့ၣ် တညီဘၣ်. မ့ၢ်​လၢ​ပ​အိၣ်မူ​ဘၣ်​လၢ ပှၤ​တ​နာ်​ကစၢ်​ယွၤ​အကျါ ဒီး​အဝဲသ့ၣ်​တဖၣ်​န့ၣ် ဒုၣ်ဒွဲၣ်​စံးအၢ ကစၢ်​အ​တၢ်စံးပာ်​လၢ က​ဒုးအိၣ်​ထီၣ် တၢ်မုာ်​တၢ်ခုၣ်​လၢ ဟီၣ်ခိၣ်​အဃိ​လီၤ. (၂ တံၤမသ့း ၃:၁, ၄; ၂ ပ့းတရူး ၃:၃, ၁၃) လၢတၢ်န့ၣ်​အဃိ​ပ​လိၣ်ဘၣ် ပှၤ​စူၢ်​တၢ်နာ်​တၢ်​ကဒဲကဒဲ​တဖၣ် အ​တၢ်​ဟ့ၣ်ဂံၢ်​ဟ့ၣ်ဘါ​ဒီး အဝဲသ့ၣ်​စ့ၢ်ကီး လိၣ်ဘၣ်​ဝဲ​ပ​တၢ်​ဟ့ၣ်ဂံၢ်​ဟ့ၣ်ဘါ​န့ၣ်​လီၤ.—ဖး ဧ့ၤဘြံၤ ၁၀:၂၄, ၂၅ တက့ၢ်.

  တၢ်​ရ့လိာ်သး​ဒီး​ပှၤလၢ​အ​အဲၣ်​ယွၤ​န့ၣ် မၤစၢၤ​ပှၤလၢ ပ​က​သုးဘူး​ပ​သး​ဆူ​ယွၤ​အ​အိၣ်​လီၤ. ယဟိဝၤ​ပှၤအုၣ်​အသး​တဖၣ် အ​တၢ်​အိၣ်ဖှိၣ်​ရိဖှိၣ်​န့ၣ် ဟ့ၣ်​ပှၤ​တၢ်ခွဲး​တၢ်ယာ်​လၢ ပ​က​ဒိးန့ၢ်​ဘၣ်​တၢ်ဂံၢ်​တၢ်ဘါ​လၢ ပှၤဂၤ​အ​တၢ်စူၢ်​တၢ်နာ်​န့ၣ်​လီၤ.—ဖး ရိမ့ၤ ၁:၁၁, ၁၂ တက့ၢ်.

 န​သုးဘူး​န​သး​ဆူ ယဟိဝၤ​ယွၤ​အ​အိၣ်​သ့​ခီဖျိ န​ဆိကမိၣ်​ထံ​တၢ်​လၢ န​မၤလိ​န့ၢ်​လၢ ယွၤ​အ​ကလုၢ်​ကထါ​အ​ပူၤ​လီၤ. ဆိကမိၣ်​ကွၢ် ယွၤ​အ​တၢ်ဖံး​တၢ်မၤ, အ​တၢ်ဟ့ၣ်ကူၣ်​ဒီး အ​တၢ်စံးပာ်​တဖၣ် လီၤတံၢ်​လီၤဆဲး​တက့ၢ်. တၢ်​ဃ့​ထုကဖၣ်​ဒီး တၢ်​ဆိကမိၣ်​ထံ​န့ၣ် မၤစၢၤ​ပှၤ​ဒ်သိး ပ​က​ပာ်လုၢ်​ပာ်ပှ့ၤ ကစၢ်​ယွၤ​အ​တၢ်အဲၣ် ဒီး​အ​တၢ်ဟ့ၣ်ကူၣ်​လီၤ.—ဖး ယိၤၡူ ၁:၈; စံးထီၣ်​ပတြၢၤ ၁:၁-၃ တက့ၢ်.

 န​မ့ၢ်​နာ်န့ၢ်​ယွၤ​ဒီး သန့ၤ​န​သး​လၢ​အီၤ​န့ၣ် န​က​ဘူးထီၣ်​ဒီး​အီၤ​လီၤ. ဘၣ်ဆၣ်​တၢ်နာ်​န့ၣ် လီၤဂာ်​ဒ်​တၢ်မုၢ်​တၢ်ဘိ​လၢ လိၣ်ဘၣ်​ဝဲ​ဟီၣ်ခိၣ်​ညၣ် ထ့ၣ်​အသိး​န့ၣ်​လီၤ. လၢတၢ်န့ၣ်​ဃိ န​က​ဘၣ်​မၤ ဂၢၢ်​မၤကျၢၤ​ထီၣ်​န တၢ်စူၢ်​တၢ်နာ်​ထီဘိ ခီဖျိ​ဆိကမိၣ်​ထံ​ကဒါက့ၤ တၢ်​လၢ​န​နာ်​သ့ၣ်​တဖၣ်​န့ၣ်​လီၤ.—ဖး မးသဲ ၄:၄; ဧ့ၤဘြံၤ ၁၁:၁, ၆ တက့ၢ်.

 ယဟိဝၤ​ယွၤ​အံးထွဲ​ကွၢ်ထွဲဝဲ ပှၤလၢ​အ​အဲၣ်အီၤ​တဖၣ်​လီၤ. တၢ်​လၢ က​ဟဲ​မၤဘၣ်ဒိ​အဝဲသ့ၣ်​အ​တၢ်နာ်​ဒီး အ​တၢ်​မုၢ်လၢ်​လၢ​အမ့ၢ်​တၢ်မူ အထူ​အယိာ်​န့ၣ် ကစၢ်​တ​ဟ့ၣ်​အခွဲး​ဘၣ်. (စံးထီၣ်​ပတြၢၤ ၉၁:၁, ၂, ၇-၁၀) ကစၢ်​ဟ့ၣ်ပလီၢ်​ပှၤလၢ ပ​က​ဟးဆှဲး​တၢ်အိၣ်မူ​အကျဲ​လၢ က​မၤဘၣ်ဒိ​ပ​တၢ်​အိၣ်ဆူၣ် အိၣ်​ချ့​ဒီး ပ​တၢ်​သူၣ်ခု​သးခု​လီၤ. လၢန့ၣ်​အမဲာ်​ညါ ယဟိဝၤ​ယွၤ​သိၣ်လိ​ပှၤလၢ တၢ်အိၣ်မူ​ကျဲ​လၢ အဂ့ၤ​ကတၢၢ်​န့ၣ်​လီၤ.—ဖး စံးထီၣ်​ပတြၢၤ ၇၃:၂၇, ၂၈; ယၤကိာ် ၄:၄, ၈ တက့ၢ်.