တၢ်သံကွၢ်နီၣ်ဂံၢ် ၅
ပှၤမ့ၢ်မၤနၢၤအီၣ်ယၤ လၢကၠိန့ၣ် ယကဘၣ်မၤဒ်လဲၣ်
မ့မ့ၢ်နၤန့ၣ် နကမၤဒ်လဲၣ်
ဆိကမိၣ်ကွၢ်တၢ်ဂ့ၢ်အံၤတက့ၢ်– တနံၤအံၤ ထီမၢၣ်(စ်)တအဲၣ်ဒိးလဲၤထီၣ်ကၠိနီတစဲးဘၣ်. ဒီးအဝဲတအဲၣ်ဒိး လဲၤထီၣ်ကၠိနီတဘျီလၢၤဘၣ်. အတံၤသကိးလၢကၠိတဖၣ်န့ၣ် တဲဟးဂီၤအဂ့ၢ်ဒီး ကိးလိာ်ကွဲန့ၢ်အမံၤလၢကမၤမဲာ်ဆှးအီၤလီၤ. တဘျီတခီၣ်န့ၣ် အသကိးတဖၣ်တီၢ်လီၤတဲာ်အလံာ် လၢအစုပူၤလီၤ. ဒီးဘၣ်တဘျီဘျီ အသကိးတဖၣ်ဟဲလၢအလီၢ်ခံဒီး လၢအဝဲသ့ၣ်အကျါတဂၤန့ၣ် ဆီၣ်ဝဲအချၢဃံလီၤ. ဖဲထီမၢၣ်(စ်)ကွၢ်ဆူအလီၢ်ခံအခါ ပှၤလၢအဆီၣ်အီၤတဂၤအံၤ ပာ်မၤအသးဒ်သိးအတမၤဝဲနီတမံၤဘၣ်. တၢ်မၤအသးဒ်အံၤန့ၣ် အိၣ်လံသၢလါလံ. ဒီးဖဲမဟါတနံၤန့ၣ် ပှၤလၢအမၤနၢၤအီၣ်အီၤတဖၣ် တဲပျံၤတဲဖုးဝဲထီမၢၣ်(စ်)လၢ အ့ထၢၣ်နဲးအပူၤလီၤ.
နမ့ၢ်အိၣ်ဘၣ်လၢ ထီမၢၣ်(စ်)အလီၢ်န့ၣ် နကမၤဒ်လဲၣ်.
ဟံးန့ၢ်တၢ်ဆၢကတီၢ် ဒီးဆိကမိၣ်ထံတၢ် တက့ၢ်
တၢ်လၢနမၤသ့န့ၣ်အိၣ်ဝဲလီၤ. ပတသူပစုခိၣ်သၣ် သနာ်က့ ပမၤနၢၤပှၤလၢအမၤနၢၤအီၣ်ပှၤသ့ဝဲလီၤ. လၢကျဲဒ်လဲၣ်.
-
တဘၣ်ပာ်ဖျါထီၣ်နတၢ်သးထီၣ်တဂ့ၤ. လံာ်စီဆှံတဲဝဲလၢ– “ပှၤလၢအသးတဆးတဖၣ်န့ၣ် ပျဲဟးထီၣ်အတၢ်သူၣ်ဒိၣ်သးဖျိး လၢာ်လၢာ်ဆ့ဆ့လီၤ. မ့မ့ၢ်, ပှၤလၢအအိၣ်ဒီးတၢ်သူၣ်ဆးသးဆးန့ၣ် အသးစူၤဒီးပၢၤဃာ်အသးန့ၣ်လီၤ.” (ကတိၤဒိ ၂၉:၁၁, ခ့ခါစှီၤကျိာ်) နမ့ၢ်သးထီၣ်တၢ်ဘၣ်ဆၣ် နမ့ၢ်ပၢၤနသးန့ၣ် ဘၣ်သ့ၣ်သ့ၣ် လၢခံအဝဲသ့ၣ်တအဲၣ်ဒိး ဟဲမၤဃုာ်နၤလၢၤဘၣ်.
-
တဘၣ်မၤဆၢက့ၤတၢ်တဂ့ၤ. လံာ်စီဆှံတဲဝဲလၢ– “သုတမၤဆၢတၢ်အၢလၢတၢ်အၢ, လၢပှၤနီတဂၤတဂ့ၤ.” (ရိမ့ၤ ၁၂:၁၇) နမ့ၢ်က့ၤမၤဆၢက့ၤ အဝဲသ့ၣ်လၢတၢ်အၢန့ၣ် အိၣ်ဒၣ်ထဲတၢ်အိၣ်သးကနးထီၣ်ဝဲလီၤ.
-
ဟးဆှဲးတၢ်အိၣ်သးလၢ ကဒုးအိၣ်ထီၣ်တၢ်လီၤဘၣ်ယိၣ်. လံာ်စီဆှံတဲဝဲလၢ– “ပှၤကူၣ်တၢ်ဘၣ်န့ၣ်, ထံၣ်ဘၣ်တၢ်အၢ, ဒီးပာ်တဒၢအသးလီၤ.” (ကတိၤဒိ ၂၂:၃) မ့ၢ်သ့န့ၣ်ဟးဆှဲးပှၤလၢ အမၤနၢၤအီၣ်တၢ်တဖၣ်ဒီး တၢ်အိၣ်သးလၢအကဒုးအိၣ်ထီၣ် တၢ်လီၤဘၣ်ယိၣ်တဖၣ်န့ၣ်တက့ၢ်.
-
တဲဆၢက့ၤအဝဲသ့ၣ်လၢ တၢ်ကူၣ်သ့အပူၤတက့ၢ်. လံာ်စီဆှံတဲဝဲလၢ– “စံးဆၢတၢ်မုာ်မုာ်န့ၣ် ဘိးဃၣ်ကွံာ်တၢ်သးထီၣ်လီၤ.” (ကတိၤဒိ ၁၅:၁) ပှၤမ့ၢ်တဲဆါနၤန့ၣ် နတဲဆၢက့ၤအီၤလၢ တၢ်လီၤနံၤသ့ဝဲလီၤ. အဒိ ပှၤမ့ၢ်တဲဆါနၤလၢ နဘီၣ်န့ၣ် နက့ၤတဲဆၢက့ၤအဝဲသ့ၣ်လၢ “ပှၤဘီၣ်န့ၣ် ပှၤလီၤအဲၣ်” လီၤ.
-
ဟးထီၣ်ကွံာ်လၢအဝဲသ့ၣ်အကျါ. နိရၤလၢအသးအိၣ် ၁၉ နံၣ်န့ၣ်တဲဝဲလၢ “နမ့ၢ်တတဲဆၢအဝဲသ့ၣ်တၢ်နီတမံၤဒီး ဟးထီၣ်ကွံာ်လၢအဝဲသ့ၣ်အကျါန့ၣ် မ့ၢ်နပာ်ဖျါထီၣ်လၢ နမ့ၢ်ပှၤလၢအဒိၣ်တုာ်ခိၣ်ပှဲၤတဂၤဒီး အိၣ်ဒီးတၢ်ပၢၤသူၣ်ပၢၤသးလီၤ.”—၂ တံၤမသ့း ၂:၂၄.
-
ဒုးအိၣ်ထီၣ်တၢ်နာ်န့ၢ်လီၤနသး. ပှၤလၢအမၤနၢၤအီၣ်တၢ်တဖၣ်န့ၣ် ညီနုၢ်အဲၣ်ဒိးမၤနၢၤဝဲ ပှၤလၢအတနာ်န့ၢ်လီၤအနီၢ်ကစၢ်အသး ဒီးမၤဆၢက့ၤတၢ်တဘူၣ်ဘၣ်တဖၣ်န့ၣ်လီၤ. ဘၣ်ဆၣ် နမ့မ့ၢ်ပှၤလၢ အနာ်န့ၢ်လီၤအသးဒီးတပျံၤတၢ်န့ၣ် ဘၣ်သ့ၣ်သ့ၣ် အဝဲသ့ၣ်မၤနၢၤနၤတဘူၣ်ဘၣ်.
-
တဲဘၣ်ပှၤတဂၤဂၤ. သရၣ်တဂၤတဲဝဲလၢ “ယဟ့ၣ်သဆၣ်ထီၣ်ပှၤလၢ အဘၣ်တၢ်မၤနၢၤအီၤတဖၣ် ဒ်သိးကတဲဖျါထီၣ်အတၢ်ဂ့ၢ်ဆူ ပှၤတဂၤဂၤအအိၣ်န့ၣ်လီၤ. အဝဲသ့ၣ်ကြၢးမၤဝဲဒ်န့ၣ်လီၤ. ဒီးအဝဲသ့ၣ်မ့ၢ်မၤဝဲဒ်အံၤန့ၣ် ကကဲထီၣ်တၢ်ဒီသဒၢလၢ ပှၤဂၤအဂီၢ်စ့ၢ်ကီးလီၤ.”
နမ့ၢ်အိၣ်ဒီး တၢ်နာ်န့ၢ်လီၤနသးန့ၣ် နကအိၣ်ဒီးတၢ်သူၣ်ဒူသးဒူအါန့ၢ်ဒံးပှၤလၢ အမၤနၢၤအီၣ်နၤတဂၤလီၤ
တၢ်ဂ့ၤအဂၤလၢ နကဘၣ်သး
ကးတိလၢ လၢၢ်ဘ့ၣ်ဘၣ်ဝါအလိၤ
ပတသူ ပစုခိၣ်သၣ် သနာ်က့ ပမၤနၢၤ ပှၤလၢအမၤနၢၤအီၣ်ပှၤသ့
ဃုသ့ၣ်ညါဘၣ်ဃးဒီး ဘၣ်မနုၤအဃိ ပှၤတနီၤန့ၣ် မၤနၢၤအီၣ်ဃီၣ်ပှၤလဲၣ် ဒီးနမ့ၢ်ထံၣ်ဘၣ်ဒီး တၢ်အိၣ်သးဒ်န့ၣ်န့ၣ် ဒ်သိးနလဲၤခီဖျိကန့ၢ်အဂီၢ် နကဘၣ်မၤဒ်လဲၣ်
