ယ့ၣ်ၡူးမ့ၢ်ပှၤလၢပှၤပှဲၤတဂၤအဃိ အဝဲတလဲၤခီဖျိဘၣ်​ တၢ်ကိၢ်တၢ်ဂီၤ ဒီးတၢ်ကီတၢ်ခဲအါမံၤ ဒ်ပှၤဂၤတဖၣ်အသိးဘၣ်. ဘၣ်ဆၣ်​ အဝဲပာ်ဖျါထီၣ်​ တၢ်သူၣ်အိၣ်သးအိၣ်​ လၢပှၤဂၤအဖီခိၣ်, အဝဲသးအိၣ်​ မၤစၢၤပှၤဂၤ အါန့ၢ်ပှၤလိၣ်ဘၣ်ဝဲဒံး. မ့ၢ်လၢ တၢ်သးကညီၤ ထိၣ်ဟူးထိၣ်ဂဲၤထီၣ်အီၤလၢ ကမၤစၢၤပှၤဂၤအဃိလီၤ. ဒ်သိး နကသ့ၣ်ညါအါထီၣ်အဂီၢ် ကွၢ်လၢ အဆၢဒိၣ်​ ၃၂, ၃၇, ၅၇, ၉၉.

ယ့ၣ်ၡူးန့ၣ်​ တပာ်ထီၣ်ထီအသးဘၣ်​ ဒီးတဆိကမိၣ်လီၤအသးလၢ အဂ့ၤန့ၢ်ဒံး ပှၤဂၤဘၣ်. အဃိ ပှၤသးစၢ်မ့ၢ်ဂ့ၤ ပှၤသးပှၢ်မ့ၢ်ဂ့ၤ လဲၤရ့အီၤဘူၣ်ဝဲ. အဝဲသ့ၣ်​ သ့ၣ်ညါဝဲလၢ ယ့ၣ်ၡူးသးအိၣ်အီၤအဃိ ဖဲယ့ၣ်ၡူးအိၣ်ဒီးအဝဲသ့ၣ်အခါ အဝဲသ့ၣ်​ အိၣ်ဒီးတၢ်သူၣ်မံသးမုာ်. နဖးကွၢ်သ့ဖဲ အဆၢဒိၣ်​ ၂၅, ၂၇, ၉၅.

ဖဲယ့ၣ်ၡူး အိၣ်ထဲတဂၤအခါမ့ၢ်ဂ့ၤ အိၣ်ဒီးအပျဲၢ်အဘီၣ်တဖၣ်အခါမ့ၢ်ဂ့ၤ အဝဲဃ့ဘါထုကဖၣ်တၢ်လၢ အပၢ်အအိၣ်​ လၢတၢ်သူၣ်ဆူၣ်သးဆူၣ်အပူၤ ထီဘိလီၤ. ယ့ၣ်ၡူးတဃ့ဘါထုကဖၣ်တၢ် ထဲလၢအအီၣ်တၢ် အဆၢကတီၢ်ဘၣ်. အဝဲဃ့ဘါထုကဖၣ်တၢ်လၢ တၢ်ဆၢကတီၢ်အဂၤစ့ၢ်ကီး. အဝဲဃ့ဘါထုကဖၣ်တၢ် ဒ်သိး ကစံးဘျုးစံးဖှိၣ်အပၢ်, ကစံးထီၣ်ပတြၢၤအပၢ် ဒီးဖဲအဝဲ ကဘၣ်မၤတၢ်ဆၢတဲာ်လၢ အရ့ဒိၣ်အခါ ဃ့ဝဲတၢ်ဟံးစုနဲၣ်ကျဲလၢ အပၢ်အအိၣ်. ဆိကမိၣ်ကွၢ် တၢ်အဒိဖဲ အဆၢဒိၣ်​ ၂၄, ၃၄, ၉၁, ၁၂၂, ၁၂၃.

ဖဲယ့ၣ်ၡူး လိၣ်ဘၣ်တၢ်အိၣ်ဘှံးအိၣ်သါ အဆၢကတီၢ်အခါဒၣ်လဲာ် အဝဲတပာ်ဆိ အတၢ်လိၣ်ဘၣ်လၢညါဘၣ်. လၢတၢ်န့ၣ်အလီၢ် အဝဲပာ်ဆိ ပှၤဂၤအတၢ်လိၣ်ဘၣ်လၢညါ. အဝဲ တအဲၣ်လီၤထဲအသးဘၣ်. ဘၣ်ဃးဒီး တၢ်ဂ့ၢ်တခါအံၤစ့ၢ်ကီး အဝဲပာ်လီၤ ဒိဂ့ၤတဲာ်ဘၣ်လၢ ပကကွၢ်လိမၤဒိးအီၤအဂီၢ်. နကထံၣ်ဘၣ်​ အဒိအတဲာ်ဖဲ အဆၢဒိၣ်​ ၁၉, ၄၁, ၅၂.

ယ့ၣ်ၡူးတသိၣ်လိဝဲထဲလၢ ပကဘၣ်ပျၢ် ပှၤဂၤအတၢ်ကမၣ်ဘၣ်. အဝဲပာ်ဖျါထီၣ်ဝဲလၢ အပျၢ်ပှၤဂၤ အတၢ်ကမၣ်​ ဖဲအရ့ဒီး အပျဲၢ်အဘီၣ်ဒီး ပှၤဂၤတဖၣ်အခါလီၤ. နထံၣ်ဘၣ်​ တၢ်အဒိသ့ဖဲ အဆၢဒိၣ်​ ၂၆, ၄၀, ၆၄, ၈၅, ၁၃၁.

ဝံတဖၣ်​ တဲဆိပာ်ဝဲလၢ ပှၤယူဒၤဖိ အါတက့ၢ်န့ၣ်​ တတူၢ်လိာ်အီၤလၢအမ့ၢ် မ့းၡံအၤဘၣ်​ ဒီးအဒုၣ်တဖၣ်စ့ၢ်ကီး ကမၤသံအီၤ. အဃိ ဖဲယ့ၣ်ၡူး မၤတၢ်စံၣ်တဲၤတဲလီၤ တၢ်မၤအခါ အဝဲမ့ၢ်မၤဝံၤတၢ်မံၤန့ၣ်​ မၤဝဲသ့. ဘၣ်ဆၣ်​ အဝဲတမၤဝဲဒ်န့ၣ်ဘၣ်, လၢတၢ်န့ၣ်အလီၢ် အဝဲသးဆူၣ်လၢ တၢ်ဘူၣ်တၢ်ဘါ အမ့ၢ်အတီအဂီၢ်. တကးဒံးဘၣ်​ အဝဲပာ်လီၤ ဒိဂ့ၤတဲာ်ဘၣ်​ လၢတၢ်သူၣ်ဆူၣ်သးဆူၣ်​ လၢအပျဲၢ်အဘီၣ်​ လၢကထံၣ်ဘၣ်​ တၢ်ကီတၢ်ခဲ ဒီးတၢ်ထီဒုၣ်ထီဒါတဖၣ်အဂီၢ်. ကွၢ် အဆၢဒိၣ်​ ၁၆, ၇၂, ၁၀၃.

ယ့ၣ်ၡူးန့ၣ်​ အိၣ်ဒီးတၢ်သ့ၣ်ညါနၢ်ပၢၢ် ဒီးတၢ်ကူၣ်သ့ တကးဒံးဘၣ်​ အဝဲဂ့ၤဒိၣ်န့ၢ်ဒံး ပှၤဟီၣ်ခိၣ်ဖိလၢ အတလၢတပှဲၤတဖၣ်​ လၢကျဲအါဘိ. အဝဲမ့ၢ် ပှၤလၢပှၤပှဲၤတဂၤအဃိ အတၢ်သ့တၢ်ဘၣ်​ ဒီးအတၢ်ဆိကမိၣ်န့ၣ်​ ဂ့ၤဒိၣ်န့ၢ်ဒံး ပှၤလၢအဃၢၤတဖၣ်. ဘၣ်ဆၣ်​ အဝဲမၤန့ၢ်တၢ်လၢ ပှၤဂၤအဂီၢ် လၢတၢ်ဆီၣ်လီၤသးအပူၤ. နထံၣ်ဘၣ်​ တၢ်မၤလိတဖၣ်သ့ဖဲ အဆၢဒိၣ်​ ၁၀, ၆၂, ၆၆, ၉၄, ၁၁၆.

ဖဲယ့ၣ်ၡူး အတၢ်မၢဖိတဖၣ်​ ဒီးပှၤဂၤတဖၣ်​ တကွၢ်လိမၤဒိးအီၤ ဒီးတမၤထွဲဒ် တၢ်လၢအတဲဝဲတဖၣ်​ အခါဒၣ်လဲာ် ယ့ၣ်ၡူး ပာ်ဖျါထီၣ်​ တၢ်ဝံသးစူၤထီဘိ. ဒ်သိး အဝဲသ့ၣ်​ သုးဘူးအသးလၢ ယဟိဝၤယွၤ​ အအိၣ်ကန့ၢ်အဂီၢ် ယ့ၣ်ၡူးသိၣ်လိ အဝဲသ့ၣ်လၢ တၢ်ဆီၣ်လီၤသးအပူၤ တဘျီဝံၤတဘျီ. ယ့ၣ်ၡူး ပာ်ဖျါထီၣ်​ တၢ်ဝံသးစူၤန့ၣ်​ နကထံၣ်ဘၣ်အီၤဖဲ အဆၢဒိၣ်​ ၇၄, ၉၈, ၁၁၈, ၁၃၅.