အဆၢဒိၣ် ၁၂
ကတိၤတၢ်ကတိၤ “အဂ့ၤလၢအမၤထီၣ်မၤထီတၢ်” တက့ၢ်
“တၢ်ကတိၤအအၢအသီန့ၣ် မ်သုသုတဒုးဟဲထီၣ်လၢ သုကိာ်ပူၤနီတဘီတဂ့ၤ. ဒ်သိးပှၤနၢ်ဟူတၢ်တဖၣ် ကန့ၢ်ဘၣ်အဘျုးအဖှိၣ်ဒီး, ကတိၤတၢ်ဂ့ၤလၢ တၢ်မၤထီၣ်မၤထီတၢ် ဖဲအလီၢ်အိၣ်တက့ၢ်.”—အ့းဖ့းစူး ၄:၂၉.
၁-၃. (က) ယဟိဝၤဟ့ၣ်ပှၤ တၢ်ဟ့ၣ်မနုၤတမံၤလဲၣ်, ဒီးပသူနါစိၤဘၣ်အီၤသ့ဒ်လဲၣ်. (ခ) ပကအိၣ်ဂၢၢ်ဆိးကျၢၤလၢ ယွၤအတၢ်အဲၣ်ပူၤအဂီၢ်, လိၣ်လၢပကဘၣ်သူ တၢ်သ့ကတိၤတၢ်အတၢ်ဟ့ၣ်ဒ်လဲၣ်.
ပှၤလၢနအဲၣ်ဘၣ်အီၤတဂၤ နဟ့ၣ်အီၤတၢ်ဟ့ၣ်တမံၤဝံၤအလီၢ်ခံ အဝဲမ့ၢ်သူနါစိၤဝဲန့ၣ် နသးကမၤသးဒ်လဲၣ်. ပစံးအဒိ, နဟ့ၣ်အီၤသိလ့ၣ်တခိၣ်, ဒီးလၢခံနသ့ၣ်ညါဘၣ်လၢ အဝဲနီၣ်ဝဲသိလ့ၣ်လၢ တၢ်တပလီၢ်သးဒီး မၤဘၣ်ဒိပှၤဂၤလီၤ. နသးကဟးဂီၤတမ့ၢ်ဘၣ်ဧါ.
၂ တၢ်သ့ကတိၤတၢ်န့ၣ် မ့ၢ်တၢ်ဟ့ၣ်တမံၤလၢ ယဟိဝၤ, ကစၢ်လၢအဟ့ၣ် “ကယဲၢ်တၢ်ဟ့ၣ်အဂ့ၤအဝါ ဒီးကယဲၢ်တၢ်ဟ့ၣ်အလၢအပှဲၤတမံၤလၢ်လၢ်” အအိၣ်လီၤ. (ယၤကိာ် ၁:၁၇) ဆၣ်ဖိကီၢ်ဖိမနုၤဂ့ၤဂ့ၤ တဒိးန့ၢ်ဘၣ်ဝဲ တၢ်ဟ့ၣ်အံၤဘၣ်. ဒိးန့ၢ်ထဲဒၣ်ပဝဲသ့ၣ်လၢ ပကပာ်ဖျါ ပတၢ်ဆိကမိၣ်တကးဘၣ် ပကတဲဘၣ်ပှၤအဂၤလၢ ပသးအတၢ်တူၢ်ဘၣ်လီၤ. ဘၣ်ဆၣ်, ဒ်သိလ့ၣ်အသိး, ပသူနါစိၤဘၣ် တၢ်ဟ့ၣ်လၢအမ့ၢ် တၢ်သ့ကတိၤတၢ်အံၤသ့လီၤ. ဖဲပကတိၤတၢ်လၢ တၢ်တပလီၢ်သးအခါ မ့ၢ်ကဲထီၣ်တၢ်သးအုးဒီး မ့ၢ်ဘၣ်ဒိဆါပှၤဂၤန့ၣ် ယဟိဝၤအသးကအုးဆံးဒိၣ်လဲၣ်.
၃ ပကအိၣ်ဂၢၢ်ဆိးကျၢၤလၢ ယွၤအတၢ်အဲၣ်ပူၤအဂီၢ် လိၣ်လၢပကဘၣ်သူ တၢ်သ့ကတိၤတၢ်အတၢ်ဟ့ၣ်အံၤ ဒ်ကစၢ်လၢအဟ့ၣ်ပှၤတၢ်အံၤ အတၢ်ဘၣ်သးအသိးန့ၣ်လီၤ. ယဟိဝၤ ပာ်ဖျါဝဲ လီၤတံၢ်လီၤဆဲး ဘၣ်ဃးတၢ်ကတိၤလၢ အဝဲဘၣ်သူၣ်ဘၣ်သးဝဲန့ၣ်လီၤ. ကစၢ်အကလုၢ်ကထါစံးဝဲ “တၢ်ကတိၤ အအၢအသီန့ၣ် ဒုးထီၣ်ဖျဲးအီၤလၢ သုထးခိၣ်တဂ့ၤ. ကတိၤထဲတၢ်ကတိၤအဂ့ၤလၢ အမၤထီၣ်မၤထီၣ်တၢ်, လၢအဘၣ်ဘျီးဘၣ်ဒါတဖၣ်, ဒ်သိးဒီးပှၤလၢအနၢ်ဟူအီၤတဖၣ်ကန့ၢ်ဘျုးန့ၢ်ဖှိၣ် အဂီၢ်န့ၣ်တက့ၢ်.” (အ့းဖ့းစူး ၄:၂၉, ခစ) ဘၣ်မနုၤအဃိလိၣ်လၢ ပကဘၣ်ပၢၤ ပထးခိၣ်, ပကြၢးဟးဆှဲး တၢ်ကတိၤမနုၤတဖၣ်, ဒီးပကတိၤ “တၢ်ကတိၤလၢ အမၤထီၣ်မၤထီတၢ်” ကသ့ဒ်လဲၣ် အဂ့ၢ်န့ၣ် ပကသမံသမိးကွၢ်သကိးတက့ၢ်.
ဘၣ်မနုၤလိၣ်လၢပကဘၣ်ပၢၤ ပထးခိၣ်
၄, ၅. လံာ်စီဆှံတၢ်ကတိၤဒိတနီၤ ပာ်ဖျါဝဲ တၢ်ကတိၤအသဟီၣ်ဒ်လဲၣ်.
၄ တၢ်ဂ့ၢ်အကါဒိၣ်တမံၤလၢ ပကဘၣ်ပၢၤပထးခိၣ်န့ၣ် မ့ၢ်လၢတၢ်ကတိၤတဖၣ်န့ၣ် အိၣ်ဒီးအသဟီၣ်အဃိလီၤ. ကတိၤဒိ ၁၅:၄ စံးဝဲလၢ, “ပှၤအပျ့ၤလၢ အမၤမုာ်ထီၣ်က့ၤတၢ်န့ၣ် မ့ၢ်တၢ်မူအသ့ၣ်လီၤ. မ့မ့ၢ်လီတၢ်လၢအီၤန့ၣ် မၤကၢ်ပှၤအသးလီၤ.” ဒ်ထံန့ၣ် ဒုးမူထီၣ်က့ၤ သ့ၣ်လၢတအိဘၣ်ထံတထူၣ်အသိး, တၢ်ကတိၤလၢ အမုာ်န့ၣ် မၤသးဖှံပှၤလၢအနၢ်ဟူဘၣ် တၢ်အံၤန့ၣ်လီၤ. လၢအဝဲတခီန့ၣ်, တၢ်ကတိၤတလံာ်တဃီၤန့ၣ် မၤတမုာ်ပှၤသးလီၤ. မ့ၢ်လီၤ, တၢ်ကတိၤလၢ ပကတိၤတဖၣ်န့ၣ် အိၣ်ဒီးအသဟီၣ်လၢ မၤဆါပှၤမ့တမ့ၢ် မၤဘျါပှၤသ့လီၤ.—ကတိၤဒိ ၁၈:၂၁.
၅ ဘၣ်ဃးဒီး တၢ်ကတိၤအသဟီၣ်န့ၣ် တၢ်ကတိၤဒိအဂၤတမံၤ ပာ်ဖျါဝဲ တြၢၢ်ကလာ်ဒ်အံၤလီၤ, “တၢ်ကတိၤတၢ်လၢ တအိၣ်ဒီးတၢ်ဆိကမိၣ်ဆိကမးဘၣ်န့ၣ် မၤဆါတၢ်ယိာ်ဝဲထဲသိးသိး နးတဘ့ၣ်လၢ်လၢ်ဆဲးတၢ်န့ၣ်လီၤ.” (ကတိၤဒိ ၁၂:၁၈, ခစ) တၢ်ကတိၤတၢ်ချ့သဒံးလၢ တၢ်တဆိကမိၣ်အပူၤန့ၣ် မၤဆါပှၤသးဒီး မၤဟးဂီၤတၢ်ရ့လိာ်သးလီၤ. တၢ်ကတိၤလၢ ဆဲးတၢ်ဒ်နးအသိးအဃိ နသးဆါဘၣ်တဘျီဘျီဧါ. လၢအဂ့ၤတကပၤတခီ, တၢ်ကတိၤဒိအံၤ စံးဝဲလၢ, “မ့မ့ၢ်တၢ်ကတိၤတၢ်လၢ တၢ်ကူၣ်သ့ကူၣ်ဘၣ်အပူၤန့ၣ်, မၤဘျါက့ၤတၢ်သ့လီၤ.” ပှၤလၢအအိၣ်ဒီးတၢ်ကူၣ်သ့လၢ ဘၣ်ဃးဒီးယွၤ အတၢ်ကတိၤလၢ အိၣ်ဒီးတၢ်ဆိကမိၣ်န့ၣ် မၤဘျါသးလၢအဆါ ဒီးမၤဂ့ၤထီၣ်က့ၤ တၢ်ရ့လိာ်သးလီၤ. တဘျီခါ နတူၢ်ဘၣ် တၢ်ကတိၤလၢအိၣ်ဒီးတၢ်သးကညီၤ အသဟီၣ်မၤဘျါတၢ်န့ၣ် နသ့ၣ်နီၣ်ထီၣ်က့ၤသ့ဧါ. (ကတိၤဒိ ၁၆:၂၄) သ့ၣ်ညါပာ်လၢ တၢ်ကတိၤတဖၣ်န့ၣ် အိၣ်ဒီးအသဟီၣ်, ဒီးလီၤတံၢ်လၢ ပအဲၣ်ဒိးသူ တၢ်ကတိၤလၢ မၤဘျါပှၤဒီး တမၤဆါပှၤဂၤဘၣ်လီၤ.
တၢ်ကတိၤအမုာ်န့ၣ်မၤဖှံထီၣ်ပှၤသး
၆. ဘၣ်မနုၤအဃိ ပကပၢၤပထးခိၣ်အဂီၢ် ပကဘၣ်ဂုာ်ကျဲးစၢးနီၢ်နီၢ်လဲၣ်.
၆ ပမ့ၢ်ဂုာ်ကျဲးစၢးထဲလဲၣ်ဂ့ၤဂ့ၤ, ပပၢၤပထးခိၣ်တန့ၢ်လၢလၢပှဲၤပှဲၤဘၣ်. ဘၣ်ဆၣ်, တၢ်ဂ့ၢ်အိၣ်ထီၣ်ခံမံၤတမံၤလၢ ဘၣ်မနုၤလိၣ်လၢ ပကဘၣ်ပၢၤပထးခိၣ်လဲၣ်န့ၣ်လီၤ. တၢ်ဒဲးဘးဒီးတၢ်တလၢပှဲၤ ထိၣ်ဂဲၤထီၣ်ပှၤလၢ ပကသူနါစိၤ ပထးခိၣ်အဃိလီၤ. တၢ်ကတိၤမ့ၢ်တၢ်ဟဲထီၣ်လၢ ပသးပူၤ, ဒီး“ပှၤကညီအသးကူၣ်ထီၣ် တၢ်မၤအအၢအသီ” လီၤ. (၁ မိၤၡ့ ၈:၂၁; လူၤကၣ် ၆:၄၅) လၢတၢ်န့ၣ်အဃိ, ပကဘၣ်ဂဲၤပျုၢ်ကျဲးစၢးနီၢ်နီၢ်လၢ ပကပၢၤပထးခိၣ်အဂီၢ်န့ၣ်လီၤ. (ယၤကိာ် ၃:၂-၄) ပပၢၤပထးခိၣ်လၢလၢပှဲၤပှဲၤတန့ၢ်သနာ်က့, ပမၤဂ့ၤထီၣ်က့ၤ တၢ်သူပပျ့ၤသ့လီၤ. ဒ်ပှၤပီၢ်ထံတဂၤ ကျဲးစၢးပီၢ်ထီၣ်ကဒါက့ၤထံလၢ ထံကျိထးခီအသိး, လၢတၢ်တလၢပှဲၤအဃိ ပဝဲသ့ၣ်စ့ၢ်ကီး ပကဘၣ်ပၢၤ ပထးခိၣ်လၢ ပသုတသူနါစိၤအီၤတဂ့ၤလီၤ.
၇, ၈. လၢပတၢ်ကတိၤအဃိ ပကဘၣ်စံးဆၢတၢ်လၢ ယဟိဝၤအမဲာ်ညါ တုၤထဲလဲၣ်.
၇ တၢ်ဂ့ၢ်သၢဘီတဘီလၢ ပကဘၣ်ပၢၤပထးခိၣ်န့ၣ် လၢပတၢ်ကတိၤအဃိ ပကဘၣ်စံးဆၢတၢ်လၢ ယဟိဝၤအမဲာ်ညါလီၤ. ပသူပထးခိၣ်န့ၣ် ဘၣ်ဒိထဲဒၣ် ပတၢ်ရ့လိာ်သးဒီး ပှၤကညီကဒဲကဒဲ တကးဘၣ် ဘၣ်ဒိစ့ၢ်ကီး ပတၢ်ရ့လိာ်သးဒီးယွၤန့ၣ်လီၤ. ယၤကိာ် ၁:၂၆ စံးဝဲလၢ “ပှၤတဂၤဂၤ မ့ၢ်ဆိကမိၣ်လၢအမ့ၢ် ပှၤဘါယွၤဖိဒီး, မ့ၢ်တမၤနၢၤဘၣ်အပျ့ၤဘၣ်, မ့မ့ၢ်အလီလီၤအသးဒီး, အဝဲဒၣ် အတၢ်ဘူၣ်ထီၣ်ဘါထီၣ်န့ၣ် မ့ၢ်တၢ်ကလီကလီလီၤ.” ဒ်ပထံၣ်ဘၣ်လၢ တၢ်နီၤဖးလၢညါအသိး ပတၢ်ကတိၤန့ၣ် ဘၣ်ထွဲလိာ်သးဒီး ပတၢ်ဘူၣ်ထီၣ်ဘါထီၣ်လီၤ. ပမ့ၢ်တပၢၤပထးခိၣ်လၢ တၢ်ကတိၤဆါဒီး တၢ်ကတိၤမၤဘၣ်ဒိပှၤန့ၣ် ခရံာ်ဖိတၢ်မၤလၢပမၤတဖၣ် ကဲထီၣ်တၢ်ကလီကလီလၢ ယွၤအမဲာ်ညါလီၤ. လၢတၢ်န့ၣ်အဃိ, ပကဘၣ် သမံသမိးကွၢ်တၢ်အံၤ သပှၢ်ကတၢၢ် တမ့ၢ်ဘၣ်ဧါ.—ယၤကိာ် ၃:၈-၁၀.
၈ ဖျါတြၢၢ်ကလာ်လၢ ပအိၣ်ဒီးတၢ်ဂ့ၢ်လီၤတံၢ်လၢ ပကဘၣ်တြီဆၢ တၢ်သူကမၣ်ဘၣ် တၢ်ဟ့ၣ်လၢအမ့ၢ် တၢ်သ့ကတိၤတၢ်န့ၣ်လီၤ. တချုးလၢ ပသမံသမိး တၢ်ကတိၤလၢ အမၤထီၣ်မၤထီတၢ်လၢအဂ့ၤဒံးဘၣ်န့ၣ်, ပကသမံသမိးသကိး တၢ်ကတိၤလၢ ခရံာ်ဖိနီၢ်နီၢ်တဖၣ် တကြၢးကတိၤလၢ အတၢ်အိၣ်မူပူၤန့ၣ်လီၤ.
တၢ်ကတိၤလၢ မၤဟးဂီၤတၢ်
၉, ၁၀. (က) တၢ်ကတိၤမနုၤန့ၣ် ကဲထီၣ်ကိးနံၤဒဲး တၢ်ကတိၤလၢ မုၢ်မဆါတနံၤအံၤ ဟီၣ်ခိၣ်ချၢလဲၣ်. (ခ) ဘၣ်မနုၤအဃိ လိၣ်လၢပကဘၣ် ဂ့ၢ်လိာ် တၢ်ကတိၤလီၤသးဘၣ်အၢလဲၣ်. (ကွၢ်တၢ်ဂ့ၢ်တၢ်ကျိၤအဘျဲၣ်လၢ လံာ်ကဘျံးပၤအခီၣ်ထံးတက့ၢ်.)
၉ တၢ်ကတိၤလၢ လီၤသးဘၣ်အၢ. တၢ်ဆိၣ်, တၢ်ကတိၤအၢကတိၤသီ, ဒီးတၢ်ကတိၤလီၤသးဘၣ်အၢ အဂၤတဖၣ်န့ၣ် ပှၤသူအီၤ ကိးနံၤဒဲးလၢ မုၢ်မဆါတနံၤအံၤ ဟီၣ်ခိၣ်ချၢလီၤ. ပှၤအါဂၤသူဝဲ တၢ်ဆိၣ်တၢ်ထုလၢ ကမၤဆူၣ်ထီၣ် အတၢ်ကတိၤ မ့တမ့ၢ် တသ့ၣ်ညါဝဲ တၢ်ကတိၤလၢ ကဘၣ်သူဝဲအခါန့ၣ်လီၤ. ပှၤမၤလီၤနံၤတၢ်တဖၣ် ညီနုၢ်သူဝဲတၢ်ကတိၤ လၢပကနၢ်တမုာ်, တၢ်ကတိၤလၢ အပာ်ဖျါက့းလၢ ကမၤလီၤနံၤကမျၢၢ်အဂီၢ်လီၤ. ဘၣ်ဆၣ်, တၢ်ကတိၤလီၤသးဘၣ်အၢန့ၣ် တမ့ၢ်တၢ်လီၤနံၤဘၣ်. ပူၤကွံၤအနံၣ် ၂,၀၀၀ ဃၣ်ဃၣ်န့ၣ်, တၢ်မၢဖိပီလူး ဟ့ၣ်ပလီၢ် ကလီးစဲတၢ်အိၣ်ဖှိၣ်လၢ ကညိကွံာ်ဝဲ “တၢ်ကတိၤမဲာ်ဆှး” အဂီၢ်လီၤ. (ကလီးစဲ ၃:၈) ပီလူးစံးဘၣ် အ့းဖ့းစူးတၢ်အိၣ်ဖှိၣ်လၢ “တၢ်ကတိၤ လီၤလူလီၤဘျၢၣ်” န့ၣ်ပာ်ဃုာ်ဒီး တၢ်ကတိၤလၢ “တကြၢးဘၣ်တၢ်ယၢၤထီၣ်ဒၣ်လဲာ်” လၢခရံာ်ဖိနီၢ်နီၢ်အကျါဘၣ်လီၤ.—အ့းဖ့းစူး ၅:၃, ၄, ခစ.
၁၀ တၢ်ကတိၤလီၤသးဘၣ်အၢန့ၣ် ယဟိဝၤသးဟ့ဝဲလီၤ. ပှၤလၢအအဲၣ်ကစၢ်တဖၣ်စ့ၢ်ကီး သးဟ့ဝဲ တၢ်အံၤလီၤ. နီၢ်နီၢ်, ပတၢ်အဲၣ်ယဟိဝၤန့ၣ် ထိၣ်ဂဲၤပှၤလၢ ပကဟးဆှဲးတၢ်ကတိၤ လီၤသးဘၣ်အၢလီၤ. ဖဲတၢ်ပာ်ဖျါ “တၢ်ဖံးတၢ်ညၣ်တၢ်မၤ” အခါ, ပီလူးယၢၤဖျါထီၣ်ဝဲ “တၢ်အိၣ်မူ တကဆှီ” န့ၣ်ပာ်ဃုာ်ဒီးတၢ်ကတိၤလၢ ဘၣ်အၢဘၣ်သီတဖၣ်လီၤ. (ကလၤတံ ၅:၁၉-၂၁, ခစ) တၢ်အံၤမ့ၢ် တၢ်ဂ့ၢ်လၢအလီၤဘၣ်ယိၣ်ဘၣ်ဘီလီၤ. ပှၤတဂၤ ဘၣ်တၢ်ဟ့ၣ်ပလီၢ်အီၤ တလီၢ်လီၢ်သနာ်က့ အဝဲမ့ၢ်တပီၢ်ယၢ်လီၤက့ၤအသးဘၣ်ဒီး ညီနုၢ်မ့ၢ်သူဝဲတၢ်ကတိၤလၢ ယၢၤဖျါထီၣ် မ့တမ့ၢ် ဆီၣ်ထွဲလုၢ်လၢ်တဂ့ၤတဘၣ်, တၢ်လီၤမဲာ်ဆှး, တၢ်တတီတလိၤန့ၣ် အဝဲကဘၣ်တၢ်ပာ်ကတီၢ် တၢ်ရ့လိာ်သးဒီးအီၤလၢ တၢ်အိၣ်ဖှိၣ်ပူၤလီၤ. *
၁၁, ၁၂. (က) တၢ်တဲပှၤဂၤအဂ့ၢ်န့ၣ် ကဲထီၣ်တၢ်ဘၣ်ဒိဘၣ်ထံး လၢဖဲလဲၣ်အဆၢကတီၢ်လဲၣ်. (ခ) ဘၣ်မနုၤ ပှၤဘူၣ်ထီၣ်ဘါထီၣ်ယဟိဝၤတဖၣ် လိၣ်လၢကဘၣ်ဟးဆှဲးဝဲ တၢ်ကတိၤ ခဲၣ်သူခဲၣ်ဂီၤလဲၣ်.
၁၁ တၢ်ဃဲၤပှၤမီၣ်လၢ အဘၣ်ဒိပှၤ, တၢ်ကတိၤခဲၣ်သူခဲၣ်ဂီၤ. ပှၤကညီတဖၣ် တဲပှၤဂၤအဂ့ၢ် မ့တမ့ၢ် ပှၤဂၤအတၢ်အိၣ်မူအဂ့ၢ်လီၤ. တၢ်တဲပှၤဂၤအဂ့ၢ်န့ၣ် ဘၣ်ဒိပှၤထီဘိဧါ. တၢ်တဲပှၤဂၤအဂ့ၢ်လၢအဂ့ၤ မ့တမ့ၢ် တၢ်ကစီၣ်လၢအဘျုးအိၣ်ဒ်သိးဒီး ပှၤဒိးဘျၢထံတယံာ်ဒံးဘၣ်တဂၤအဂ့ၢ် မ့တမ့ၢ် ပှၤလၢအလိၣ်ဘၣ် တၢ်ကတိၤဟ့ၣ်ဂံၢ်ဟ့ၣ်ဘါတဂၤအဂ့ၢ်န့ၣ် ပစံးလၢတဂ့ၤတသ့ဘၣ်. ခရံာ်ဖိလၢနံၣ်တၢကယၤအပူၤတဖၣ်န့ၣ် သးစဲလိာ်သးတဂၤဒီးတဂၤအဘျုးဒီး တဲလိာ်သကိးအသး တၢ်ဂ့ၢ်အကြၢးအဘၣ် လၢဘၣ်ဃး ပှၤစူၢ်တၢ်နာ်တၢ်ကဒဲကဒဲလီၤ. (အ့းဖ့းစူး ၆:၂၁, ၂၂; ကလီးစဲ ၄:၈, ၉) ဘၣ်ဆၣ် တၢ်ဃဲၤပှၤဂၤအဂ့ၢ်န့ၣ် ဘၣ်ဒိပှၤသ့ ဖဲတၢ်ကတိၤမ့ၢ်ဒၢက့ၣ် မ့တမ့ၢ် တဲဖျါပှၤဂၤအတၢ်ခူသူၣ်အဂ့ၢ်အခါန့ၣ်လီၤ. အၢန့ၢ်အန့ၣ်, တၢ်အံၤကဲထီၣ် တၢ်ကတိၤခဲၣ်သူခဲၣ်ဂီၤ လၢအမၤဟးဂီၤတၢ်သ့ထီဘိလီၤ. တၢ်ကတိၤခဲၣ်သူခဲၣ်ဂီၤန့ၣ်မ့ၢ် “တၢ်ကတိၤလၢ အဆှိးကမၣ်ပှၤ. . . လၢအကတိၤဟးဂီၤပှၤမံၤဒီး မၤဘၣ်ဒိပှၤဂၤအလၤကပီၤလီၤ.” အဒိ, ပှၤဖၤရံၤၡဲတဖၣ်, လၢတၢ်သးက့ၣ်အပူၤ သူဝဲတၢ်ကတိၤခဲၣ်သူခဲၣ်ဂီၤဒီး ကူၣ်ထီၣ်ဝဲလၢ ပှၤသုတနာ်ယ့ၣ်ၡူးအဂီၢ်န့ၣ်လီၤ. (မးသဲ ၉:၃၂-၃၄; ၁၂:၂၂-၂၄) တၢ်ကတိၤခၢၣ်သူခၢၣ်ဂီၤန့ၣ် ဒုးအိၣ်ထီၣ်တၢ်အ့ၣ်လိာ်ဆိးက့လီၤ.—ကတိၤဒိ ၂၆:၂၀.
၁၂ ပှၤလၢအသူ တၢ်သ့ကတိၤတၢ်အတၢ်ဟ့ၣ် လၢအကမၤဘၣ်ဒိပှၤဂၤ မ့တမ့ၢ် ကမၤလီၤဖးတၢ်န့ၣ် ယဟိဝၤတပာ်တၢ်အံၤလၢ တၢ်ဖှံဖှံညီညီဘၣ်. ကစၢ်သးဟ့ပှၤလၢ “အထိၣ်အ့ၣ်လိာ်ဆိက့တၢ်လၢ ဒီပုၢ်ဝဲၢ်အကျါလီၤ.” (ကတိၤဒိ ၆:၁၆-၁၉) ကြံးခ်တၢ်ကတိၤလၢ ဘၣ်တၢ်ကွဲးကျိးအီၤလၢ “ပှၤကတိၤခၢၣ်သူ ခၢၣ်ဂီၤတၢ်” န့ၣ်မ့ၢ် ဒံၣ်အါဘိၣ်လိးစ် (dia’bolos), ဒီးကိးဝဲစၤတၣ်ဒ်န့ၣ်စ့ၢ်ကီးလီၤ. အဝဲမ့ၢ် “မုၣ်ကီၤလံၢ်”, ပှၤကတိၤခဲၣ်သူခဲၣ်ဂီၤ ယွၤလီၤ. (လီၣ်ဖျါ ၁၂:၉, ၁၀) လီၤတံၢ်လၢ ပကအဲၣ်ဒိးဟးဆှဲး တၢ်ကတိၤလၢ ကဒုးလီၤဂာ်ပှၤလၢ မုၣ်ကီၤလံၢ်လီၤ. တၢ်ကတိၤခဲၣ်သူခဲၣ်ဂီၤလၢ အထိၣ်ဂဲၤထီၣ် နီၢ်ခိတၢ်ဖံးတၢ်မၤဒ်သိး “တၢ်ဂ့ၢ်လိာ်ဘှီလိာ်” ဒီး “တၢ်လီၤမုၢ်လီၤဖး” န့ၣ်တၢ်တူၢ်လိာ်အီၤလၢ တၢ်အိၣ်ဖှိၣ်ပူၤတသ့ဘၣ်. (ကလၤတံ ၅:၁၉-၂၁) လၢတၢ်န့ၣ်အဃိ, တချုးနတဲပှၤတဂၤဂၤအဂ့ၢ်န့ၣ် သံကွၢ်လီၤက့ၤနသးလၢ ‘တၢ်အံၤမ့ၢ်ကစီဒီဧါ. မ့ၢ်တဲတၢ်အံၤန့ၣ် တၢ်သးကညီၤကအိၣ်ကစီဒီဧါ. တၢ်ကစီၣ်အံၤ လိၣ်လၢမ့တမ့ၢ် ကြၢးလၢကဘၣ်တဲအီၤကစီဒီဧါ.’—၁ သ့းစၤလနံ ၄:၁၁.
၁၃, ၁၄. (က) တၢ်ကတိၤတရီတပါန့ၣ် ဒုးအိၣ်ထီၣ် တၢ်အဘျုးအၢမနုၤလၢ ပှၤလၢနၢ်ဟူဘၣ်တၢ်အံၤအဂီၢ်လဲၣ်. (ခ) ဘၣ်မနုၤအဃိ ပှၤကတိၤဒုၣ်ဒွဲၣ်စံးအၢတၢ် တဂၤန့ၣ်တုၤလၢ တၢ်အိၣ်အသးလၢ အလီၤဘၣ်ယိၣ်အပူၤလဲၣ်.
၁၃ တၢ်ကတိၤတရီတပါ. ဒ်တၢ်ပာ်ဖျါလၢညါအသိး, တၢ်ကတိၤတဖၣ်အိၣ်ဒီးအသဟီၣ်လၢ အမၤဘၣ်ဒိတၢ်လီၤ. တၢ်အံၤမ့ၢ် တၢ်နီၢ်ကီၢ်လၢ တဘျီဘျီပှၤကညီတဖၣ် တလၢပှဲၤအဃိ, ပဝဲကိးဂၤဒဲး ပတဲဘၣ်တၢ်လၢ အဒုးသးအုးပှၤလီၤ. ဘၣ်ဆၣ်, လံာ်စီဆှံဟ့ၣ်ပလီၢ်ဝဲ တၢ်ကတိၤလၢ တကြၢးကတိၤလ့ၤတက့ၤလၢ ခရံာ်ဖိဟံၣ်ဃီပူၤ မ့တမ့ၢ် တၢ်အိၣ်ဖှိၣ်ပူၤန့ၣ်လီၤ. ပီလူးသိၣ်က့ၤသီက့ၤဝဲ ခရံာ်ဖိတဖၣ်လၢ “ကယဲၢ်တၢ်အခၣ်, ဒီးတၢ်သးဒိၣ်, ဒီးတၢ်သးဟ့, ဒီးတၢ်ကလာ်တၢ်, ဒီးဒုၣ်ဒွဲၣ်တၢ်, ဒီးကယဲၢ်တၢ်အအၢအသီခဲလၢာ်န့ၣ်, ကွံာ်တ့ၢ်ကွံာ်တက့ၢ်.” (အ့းဖ့းစူး ၄:၃၁) တၢ်ကတိၤတရီတပါလၢ ပာ်ဃုာ်ဒီး တၢ်မၤဟးဂီၤပှၤမံၤ, ဒီးမၤမဲာ်ဆှးပှၤအၢအၢသီသီန့ၣ် မၤဟးဂီၤပှၤဂၤအလၤကပီၤဒီး တူၢ်ဘၣ်ဝဲလၢ အဝဲအလုၢ်အပှ့ၤတအိၣ်ဘၣ်လီၤ. ဖိသၣ်လၢအသးအိၣ်ဒီး တၢ်သးကညီၤဒီး တၢ်နာ်နံတၢ်တဖၣ်န့ၣ် အသးဟးဂီၤလၢ တၢ်ကတိၤတရီတပါအဃိသ့လီၤ.—ကလီးစဲ ၃:၂၁.
၁၄ လံာ်စီဆှံ တြီဝဲတၢ်သူ တၢ်ကတိၤ ဒုၣ်ဒွဲၣ်စံးအၢလီၤ. ပှၤတဂၤမ့ၢ်အိၣ်ဒီး လုၢ်လၢ်လၢ ကတိၤတၢ်ဒ်သိးအံၤန့ၣ် တုၤလၢတၢ်အိၣ်အသးလၢ လီၤဘၣ်ယိၣ်အပူၤလီၤ. ပှၤကတိၤဒုၣ်ဒွဲၣ်စံးအၢတၢ် တဂၤမ့ၢ်တဒိကနၣ်ဝဲ တၢ်ဟ့ၣ်ပလီၢ်တလီၢ်လီၢ်လၢ ကလဲလိာ်အသးအဂီၢ်န့ၣ် တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤသ့လီၤ. အဝဲမ့ၢ်တလဲလိာ်အသးဒီး ကဘၣ်ဒုးလီၤမၢ်စ့ၢ်ကီး တၢ်ဆိၣ်ဂ့ၤလၢ ကအိၣ်မူဘၣ်လၢ ဟီၣ်ခိၣ်သီအပူၤန့ၣ်လီၤ. (၁ ကရံၣ်သူး ၅:၁၁- ၁၃; ၆:၉-၁၀) လၢတၢ်န့ၣ်အဃိ, ပမ့ၢ်အိၣ်ဒီးလုၢ်လၢ်လၢ ပကတိၤတၢ်လၢ အတဂ့ၤ, အတတီ, မ့တမ့ၢ် တၢ်သးကညီၤတအိၣ်န့ၣ် ပအိၣ်ဂၢၢ်ဆိးကျၢၤလၢ ယွၤအတၢ်အဲၣ်ပူၤတန့ၢ်ဘၣ်. တၢ်ကတိၤဒ်သိးန့ၣ်တဖၣ်န့ၣ် မ့ၢ်တၢ်ကတိၤလၢ မၤဟးဂီၤတၢ်လီၤ.
တၢ်ကတိၤ “အဂ့ၤလၢအမၤထီၣ်မၤထီတၢ်”တဖၣ်
၁၅. တၢ်ကတိၤမနုၤ “ဂ့ၤလၢတၢ်မၤထီၣ်မၤထီ”လဲၣ်.
၁၅ ပသူတၢ်ဟ့ၣ်လၢ အမ့ၢ်တၢ်သ့ကတိၤတၢ် ဒ်ကစၢ်လၢအဟ့ၣ်တၢ် အတၢ်ဘၣ်သးကသ့ ဒ်လဲၣ်. သ့ၣ်နီၣ်ထီၣ်လၢ ယွၤကလုၢ်ကထါ ဆီၣ်ထွဲပှၤလၢ ပကကတိၤ “တၢ်ဂ့ၤလၢ တၢ်မၤထီၣ်မၤထီ တၢ်ဖဲအလီၢ်အိၣ်တက့ၢ်.” (အ့းဖ့းစူး ၄:၂၉) ယဟိဝၤ ဘၣ်အသးဖဲ ပကတိၤတၢ်ကတိၤလၢ အမၤထီၣ်မၤထီတၢ်, အဟ့ၣ်ဂံၢ်ဟ့ၣ်ဘါတၢ်, ဒီးတၢ်ကတိၤလၢ အမၤဆူၣ်ထီၣ်ပှၤသး န့ၣ်လီၤ. တၢ်ကတိၤဒ်သိးန့ၣ်တဖၣ်န့ၣ် ကြၢးပဆိကမိၣ်ဝံၤမး ကတိၤအီၤလီၤ. လံာ်စီဆှံ တပာ်ဖျါဝဲ တၢ်ဘျၢလီၤတံၢ်လၢ ပကဘၣ်မၤထွဲတကးဘၣ် တပာ်ဖှိၣ်ဝဲ “တၢ်ကတိၤအဂ့ၤအဘၣ်” တဖၣ်အစရီဘၣ်. (တံတူး ၂:၈) ပကကတိၤ တၢ်ကတိၤလၢ “ဂ့ၤလၢတၢ်မၤထီၣ်မၤထီ အဂီၢ်” ပကဘၣ်ထၢနုာ် ပသးပူၤလၢ တၢ်ဂ့ၢ်ယိယိဖိလၢ အကါဒိၣ်သၢမံၤလီၤ. တၢ်န့ၣ်မ့ၢ်တၢ်ကတိၤလၢ အဂ့ၤ, အမ့ၢ်အတီ, ဒီးအိၣ်ဒီးတၢ်သးကညီၤလီၤ. ပကပာ်တၢ်ဂ့ၢ်တဖၣ်အံၤလၢ ပသးပူၤဒီး ပကသမံသမိးကွၢ်သကိး တၢ်အဒိအတဲာ်တနီၤလၢ တၢ်ကတိၤမၤထီၣ်မၤထီတၢ် အဂီၢ်တက့ၢ်.— ကွၢ်တၢ်လွံၢ်နၢၢ်လၢ လံာ်ကဘျံးပၤ ၁၄၀ အပူၤ “ယတၢ်ကတိၤ မၤထီၣ်မၤထီတၢ်ကစီဒီဧါ” တက့ၢ်.
၁၆, ၁၇. (က) ဘၣ်မနုၤအဃိ ကြၢးလၢပစံးပတြၢၤပှၤဂၤလဲၣ်. (ခ) လၢတၢ်အိၣ်ဖှိၣ်ပူၤ တၢ်ခွဲးတၢ်ယာ်မနုၤအိၣ်လၢ ပကစံးပတြၢၤပှၤဂၤလဲၣ်. လၢဟံၣ်ဃီပူၤတခီလဲၣ်.
၁၆ တၢ်စံးပတြၢၤလၢ သးဒီဖျၢၣ်. ယဟိဝၤဒီးယ့ၣ်ၡူး အၢၣ်လီၤဝဲလၢ လိၣ်လၢပှၤကဘၣ်ကတိၤ တၢ်ကတိၤစံးပတြၢၤဒီး တၢ်ကတိၤလၢ အပာ်ဖျါတၢ်ဘၣ်သူၣ်ဘၣ်သးလီၤ. (မးသဲ ၃:၁၇; ၂၅:၁၉-၂၃; ယိၤဟၣ် ၁:၄၇) ဒ်ခရံာ်ဖိတဖၣ်အသိး, ပဝဲစ့ၢ်ကီး ပစံးပတြၢၤပှၤဂၤလၢ တၢ်သးအိၣ်နီၢ်နီၢ်လီၤ. လၢမနုၤအဃိလဲၣ်. ကတိၤဒိ ၁၅:၂၃ စံးဝဲလၢ “တၢ်ကတိၤတထံၣ်လၢ ပှၤကတိၤဝဲဖဲ အဆၢအကတီၢ်ဒၣ်ဝဲန့ၣ် ဂ့ၤဆံးဒိၣ်လဲၣ်.” သံကွၢ်လီၤက့ၤနသးဒ်အံၤတက့ၢ် ‘ဖဲယဘၣ်တၢ်စံးပတြၢၤလၢ သးဒီဖျၢၣ်အခါ ယသးမၤသးဒ်လဲၣ်. တၢ်အံၤဒုးသူၣ်မံသးမုာ်ယၤဒီး ဒုးဆူၣ်ထီၣ်ယသးတမ့ၢ်ဘၣ်ဧါ.’ နီၢ်နီၢ်, တၢ်စံးပတြၢၤလၢ သးဒီဖျၢၣ်န့ၣ် ဒုးသ့ၣ်ညါနၤလၢ ပှၤတဂၤဂၤ ပာ်သူၣ်ပာ်သးလၢနၤ, အံးထွဲကွၢ်ထွဲနၤဒီး နတၢ်ဂုာ်ကျဲးစၢးန့ၣ် အဘျုးအိၣ်ဒိၣ်မးလီၤ. တၢ်မုာ်သူၣ်မုာ်သး ဒ်သိးအံၤန့ၣ် မၤထီၣ်မၤထီ နတၢ်နာ်လီၤက့ၤသးဒီး ထိၣ်ဂဲၤထီၣ်နၤလၢ နကမၤတၢ်ထဲးဂံၢ်ထဲးဘါလၢ ခါဆူညါအဂီၢ်ဒၣ်လဲာ်လီၤ. ဖဲနဒိးန့ၢ်ဘၣ်တၢ်စံးပတြၢၤအခါ နသးခုအဃိ, တသ့ဖဲအသ့ ကြၢးနစံးပတြၢၤ ပှၤဂၤတမ့ၢ်ဘၣ်ဧါ.—မးသဲ ၇:၁၂.
၁၇ သိၣ်လိနသးလၢ နကဃုပှၤဂၤအတၢ်ဂ့ၤဒီး ပာ်ဖျါနတၢ်စံးပတြၢၤတက့ၢ်. လၢတၢ်အိၣ်ဖှိၣ်အပူၤ, နကနၢ်ဟူဘၣ် တၢ်ကစီၣ်အမုာ်တယုၢ်ဖဲ တၢ်စူးရိအိၣ်ဖှိၣ်အခါ, နကပာ်သူၣ်ပာ်သးလၢ သးစၢ်တဂၤ ကျဲးစၢးမၤတုၤထီၣ်ထီၣ်ဘး နီၢ်သးအတၢ်တိာ်တဖၣ်, မ့တမ့ၢ် သးပှၢ်တဂၤ တုၤလၢမှံၤတုာ်ပှၢ်တီၤ အကတီၢ်သနာ်က့ ဟဲထီၣ်တၢ်အိၣ်ဖှိၣ်လၢ တၢ်သးတီလီၤ. တၢ်စံးပတြၢၤပှၤဒ်သိးန့ၣ်အဖၣ်လၢ သးဒီဖျၢၣ်န့ၣ် မၤမုာ်သူၣ်မုာ်သးအဝဲသ့ၣ်ဒီး မၤဆူၣ်ထီၣ်အဝဲသ့ၣ်အနီၢ်သးဂံၢ်ဘါလီၤ. လၢဟံၣ်ဃီပူၤန့ၣ်, မါဒီးဝၤတဖၣ် လိၣ်လၢကဘၣ် ပတြၢၤလိာ်သးလၢ သးဒီဖျၢၣ်ဒီး ကဘၣ်ကတိၤစံးဘျုးလိာ်သး တဂၤဒီးတဂၤလီၤ. (ကတိၤဒိ ၃၁:၁၀, ၂၈) လီၤဆီဒၣ်တၢ် ဖိသၣ်တဖၣ် ဂုၤထီၣ်ပသီထီၣ် ဖဲန့ၢ်ဘၣ်တၢ်ကဟုကယာ်အီၤဒီး တၢ်ပာ်လုၢ်ပာ်ပှ့ၤအီၤအခါလီၤ. ဒ်မုၢ်အတၢ်ကပီၤဒီး ထံန့ၣ် လိၣ်လၢသ့ၣ်တထူၣ်ကမူအဂီၢ်အသိး တၢ်စံးပတြၢၤဒီး တၢ်ကဟုကယာ်န့ၣ် လိၣ်လၢဖိသၣ်တဂၤအဂီၢ်လီၤ. မိၢ်ပၢ်သ့ၣ်ဧၢ, ကွၢ်ဃုတၢ်ခွဲးတၢ်ယာ်လၢ သုကစံးပတြၢၤသုဖိတဖၣ်လၢ အဝဲသ့ၣ်အတၢ်ဂ့ၤတၢ်ဝါဒီး အတၢ်ဂုာ်ကျဲးစၢးလၢ လီၤပတြၢၤတဖၣ်န့ၣ်တက့ၢ်. တၢ်စံးပတြၢၤဒ်သိးန့ၣ်တဖၣ်န့ၣ် ဟ့ၣ်ဂံၢ်ဟ့ၣ်ဘါ နဖိတဖၣ်ဒီး ဒုးအိၣ်ထီၣ် တၢ်နာ်န့ၢ်လီၤက့ၤသး, ဒီးထိၣ်ဂဲၤထီၣ်အီၤလၢ ကဂုာ်ကျဲးစၢးမၤတၢ်လၢအဘၣ်လီၤ.
၁၈, ၁၉. ဘၣ်မနုၤအဃိ တသ့ဖဲအသ့ ပကြၢးမၤမုာ်ထီၣ် ပှၤစူၢ်တၢ်နာ်တၢ်ကဒဲကဒဲတဖၣ်လဲၣ်. ဒီးပမၤကသ့ဒ်လဲၣ်.
၁၈ တၢ်မၤမုာ်ထီၣ်ပှၤသး. ယဟိဝၤ ကဟုကယာ်ဝဲ “ပှၤအသူၣ်ကၢ်အသးလီၤဒီး ပှၤဆီၣ်လီၤအသးလီၤ.” (ယၡါယၤ ၅၇:၁၅) ကစၢ်အကလုၢ်ကထါ ဟ့ၣ်သဆၣ်ထီၣ်ဝဲလၢ “မၤမုာ်ထီၣ်လိာ်သုသး” ဒီး “ပှၤလၢအသးတခုဘၣ်တဖၣ်န့ၣ်, မၤမုာ်ထီၣ်အီၤတက့ၢ်.” (၁ သ့းစၤလနံ ၅:၁၁, ၁၄) ပနာ်သ့လၢ ကစၢ်ယွၤပာ်အသးဒီး အသးခုဖဲ ပဂုာ်ကျဲးစၢး မၤမုာ်ထီၣ် ပှၤစူၢ်တၢ်နာ်တၢ် ကဒဲကဒဲလၢ အသးပှဲၤဒီးတၢ်သးအုးတဖၣ်လီၤ.
ယဟိဝၤဘၣ်အသးဖဲ ပကတိၤတၢ်ကတိၤလၢ မၤထီၣ်မၤထီပှၤဂၤအခါ
၁၉ ဘၣ်ဆၣ်, ခရံာ်ဖိကဒဲကဒဲလၢ အသးဟးဂီၤ မ့တမ့ၢ် အသူၣ်အုးသးအုးတဂၤန့ၣ် နကတိၤဟ့ၣ်ဂံၢ်ဟ့ၣ်ဘါအီၤကသ့ဒ်လဲၣ်. တဘၣ်ပာ်နသးလၢ နကဘၣ်သုးကျဲၤန့ၢ် အတၢ်ကီတၢ်ခဲတဂ့ၤ. တၢ်ဂ့ၢ်အါမးအပူၤ, တၢ်ကတိၤယိယိတဖၣ်န့ၣ် ဘၣ်တဘျီဘျီ ကဲထီၣ်တၢ်မၤစၢၤဒိၣ်မးလီၤ. ဒုးနာ်နီၢ်ကီၢ် ပှၤသူၣ်ကၢ်သးလီၤတဂၤလၢ နဘၣ်ယိၣ်တၢ်လၢအဂီၢ်န့ၣ်တက့ၢ်. ဃ့ဘါထုကဖၣ် နကလုၢ်ဒိၣ်ဒိၣ်ဒီး ပှၤအသးအုးတဂၤတက့ၢ်. အဝဲကသ့ၣ်ညါဝဲလၢ ပှၤအဂၤတဖၣ် ဒီးကစၢ်ယွၤအဲၣ်အီၤထဲလဲၣ်အဂီၢ် နကဃ့ကညး ယဟိဝၤလၢ ကမၤစၢၤအီၤသ့လီၤ. (ယၤကိာ် ၅:၁၄, ၁၅) ဒုးနာ်န့ၢ်အီၤလၢ ဒ်တၢ်အိၣ်ဖှိၣ်ဖိတဂၤအသိး တၢ်အိၣ်ဖှိၣ်လိၣ်ဘၣ်အီၤဒီး ပာ်လုၢ်ပာ်ပှ့ၤအီၤတက့ၢ်. (၁ ကရံၣ်သူး ၁၂:၁၂-၂၆) ဖးလံာ်စီဆှံလၢ အန့ၢ်ဂံၢ်န့ၢ်ဘါတဆၢဒီး ဒုးနာ်န့ၢ်အီၤလၢ ယဟိဝၤကဟုကယာ် အီၤနီၢ်နီၢ်န့ၣ်တက့ၢ်. (စံးထီၣ်ပတြၢၤ ၃၄:၁၈; မးသဲ ၁၀:၂၉-၃၁) ဟံးန့ၢ်တၢ်ဆၢကတီၢ် လၢလၢပှဲၤပှဲၤလၢ နကကတိၤ “တၢ်ကတိၤမုာ်” ဒီးပှၤလၢအသူၣ်အုးသးအုး န့ၣ်တက့ၢ်. တၢ်ကတိၤလၢဟဲလၢနသးပူၤန့ၣ် ကဒုးသ့ၣ်ညါအီၤသပှၢ်တၢၢ်လၢ အဝဲဒိးန့ၢ်ဘၣ် တၢ်အဲၣ်ဒီးတၢ်ပာ်လုၢ်ပာ်ပှ့ၤန့ၣ်လီၤ. —ကတိၤဒိ ၁၂:၂၅.
၂၀, ၂၁. တၢ်ဂ့ၢ်မနုၤတဖၣ် မၤကဲထီၣ်တၢ်ဟ့ၣ်ကူၣ် လၢအဘျုးအိၣ်လဲၣ်.
၂၀ တၢ်ဟ့ၣ်ကူၣ်လၢအဘျုးအိၣ်. ဒ်ပှၤတလၢပှဲၤတဖၣ်အသိး, ပဝဲသ့ၣ်ကိးဂၤဒဲး ပလိၣ်ဘၣ်တၢ်ဟ့ၣ်ကူၣ် တဘျီတခီၣ်လီၤ. လံာ်စီဆှံ ဟ့ၣ်သဆၣ်ထီၣ်ပှၤလၢ “ကနၣ်တၢ်ဒုးကူၣ်တၢ်, ဒီးကနၣ်တၢ်သိၣ်လိတၢ်, ဒ်သိးနကူၣ်တၢ်ကသ့ လၢနနံၣ်ဧိၤလါဧိၤ အခံကတၢၢ်န့ၣ်တက့ၢ်.” (ကတိၤဒိ ၁၉:၂၀) တမ့ၢ်ထဲဒၣ် ပှၤပၢဘၣ်ကွၢ်ထွဲတၢ်တဖၣ် ကဘၣ်ဟ့ၣ်ကူၣ် ပှၤဂၤဘၣ်, မိၢ်ပၢ်တဖၣ် ဟ့ၣ်ကူၣ်အဖိတဖၣ်သ့လီၤ. (အ့းဖ့းစူး ၆:၄) ဒီပုၢ်ဝဲၢ်မုၣ်လၢ အဒိၣ်တုာ်ခိၣ်ပှဲၤတဖၣ် လိၣ်လၢကဘၣ်ဟ့ၣ်ကူၣ် ပိာ်မုၣ်သးစၢ်တဖၣ်လီၤ. (တံတူး ၂:၃-၅) တၢ်အဲၣ်ပှၤဂၤန့ၣ် ထိၣ်ဂဲၤပှၤလၢ ပကဟ့ၣ်တၢ်ဟ့ၣ်ကူၣ်လၢ ပှၤတူၢ်လိာ်အီၤသ့ဒီး တမၤဘၣ်ဒိ ပှၤသးန့ၣ်လီၤ. တၢ်မနုၤကမၤစၢၤပှၤလၢ ပကဟ့ၣ်တၢ်ဟ့ၣ်ကူၣ် ဒ်သိးန့ၣ်လဲၣ်. ဆိကမိၣ် တၢ်ဂ့ၢ်သၢမံၤလၢ အမၤကဲထီၣ် တၢ်ဟ့ၣ်ကူၣ်လၢအဘျုးအိၣ်န့ၣ်တက့ၢ်. တၢ်သ့ၣ်တဖၣ်န့ၣ်မ့ၢ် ပှၤဟ့ၣ်ကူၣ်တၢ် အတၢ်ပာ်သူၣ်ပာ်သးဒီး တၢ်တိာ်, တၢ်ဂ့ၢ်ခီၣ်ထံးလၢ တၢ်ဟ့ၣ်ကူၣ်အဂီၢ်, ဒီးတၢ်ဟ့ၣ်ကူၣ်အက့ၢ်အဂီၤလီၤ.
၂၁ ကမ့ၢ်တၢ်ဟ့ၣ်ကူၣ် လၢအဘျုးအိၣ်အဂီၢ် ပှၤဟ့ၣ်ကူၣ်တၢ် ကဘၣ်စးထီၣ်လၢညါလီၤ. သံကွၢ်လီၤက့ၤနသးလၢ, ‘ယတူၢ်လိာ်တၢ်ဟ့ၣ်ကူၣ်ညီလၢ ဖဲလဲၣ်အဆၢကတီၢ်လဲၣ်. ဖဲနသ့ၣ်ညါလၢ ပှၤဟ့ၣ်ကူၣ်တၢ်တဂၤအံၤ ကဟုကယာ်နၤ, တမ့ၢ်လၢအသးဘၣ်တံာ်တာ်အဃိတဲနၤဘၣ်, ဒီးတဲနၤလၢ တၢ်သးဘျၢအခါ, နကတူၢ်လိာ်အဝဲအတၢ်ဟ့ၣ်ကူၣ်ညီကဒၣ်လီၤ. လၢတၢ်န့ၣ်အဃိ ဖဲနဟ့ၣ်ကူၣ်ပှၤဂၤအခါ, ကြၢးနဟ့ၣ်ကူၣ် ဒ်နတၢ်ပာ်သူၣ်ပာ်သးဒီး တၢ်တိာ်အသိးတမ့ၢ်ဘၣ်ဧါ. တၢ်ဟ့ၣ်ကူၣ်လၢ အဘျုးအိၣ်န့ၣ် ဒိးသန့ၤထီၣ်အသးလၢ ယွၤအကလုၢ်ကထါလီၤ. (၂ တံၤမသ့း ၃:၁၆) နမ့ၢ်အိးထီၣ်လံာ်စီဆှံဂ့ၤ တအိးထီၣ်ဂ့ၤ, နတၢ်ဟ့ၣ်ကူၣ် တမံၤလၢ်လၢ်န့ၣ် ကြၢးသန့ၤထီၣ်အသးလၢ လံာ်စီဆှံပူၤလီၤ. လၢတၢ်န့ၣ်အဃိ, ပှၤပၢဘၣ်ကွၢ်ထွဲတၢ်တဖၣ် ကဘၣ်ပလီၢ်အသးလၢ သုတမၢဆူၣ်ပှၤဂၤလၢ ကဘၣ်အိၣ်ဒီးတၢ်ထံၣ်ဒ် အဝဲသ့ၣ်အတၢ်ထံၣ်အသိးဘၣ်. အါန့ၢ်အန့ၣ် တသူနါစိၤဝဲ လံာ်စီဆှံအဆၢတဖၣ်လၢ ကလီၤဂာ်ဒ်သိး လံာ်စီဆှံဆီၣ်ထွဲ အဝဲသ့ၣ်အနီၢ်ကစၢ်ဒၣ်ဝဲ အတၢ်ထံၣ်တနီၤန့ၣ်ဘၣ်. တၢ်ဟ့ၣ်ကူၣ်မ့ၢ်လိၤကျဲန့ၣ် အဘျုးအိၣ်ဒိၣ်န့ၢ်တက့ၢ်လီၤ. တၢ်ဟ့ၣ်ကူၣ်လၢအိၣ်ဒီး တၢ်သးကညီၤန့ၣ် ပှၤတူၢ်လိာ်ဘၣ်အီၤညီဒီး တဘၣ်ဒိပှၤလၢအတူၢ်လိာ်တၢ် အလၤကပီၤဘၣ်.—ကလီးစဲ ၄:၆.
၂၂. ဘၣ်ဃးဒီး တၢ်သူတၢ်သ့ကတိၤတၢ် အတၢ်ဟ့ၣ်န့ၣ် နတၢ်ပာ်လီၤသး မ့ၢ်မနုၤလဲၣ်.
၂၂ နီၢ်နီၢ်, တၢ်ကတိၤန့ၣ် မ့ၢ်တၢ်ဟ့ၣ်လုၢ်ဒိၣ်ပှ့ၤဒိၣ်လၢယွၤအိၣ်လီၤ. ပတၢ်အဲၣ်ယဟိဝၤန့ၣ် ထိၣ်ဂဲၤထီၣ်ပှၤလၢ ပသုတသူကမၣ် တၢ်ဟ့ၣ်အံၤလီၤ. ပကသ့ၣ်နီၣ်သကိးလၢ တၢ်ကတိၤလၢ ပတဲပှၤဂၤန့ၣ် အိၣ်ဒီးအသဟီၣ်လၢ မၤထီၣ်မၤထီတၢ် မ့တမ့ၢ် မၤဟးဂီၤတၢ်န့ၣ်တက့ၢ်. လၢတၢ်န့ၣ်အဃိ, မ်ပကဂုာ်ကျဲးစၢးသူ တၢ်ဟ့ၣ်အံၤ ဒ်ကစၢ်လၢအဟ့ၣ်တၢ် အတၢ်ဘၣ်သး “လၢတၢ်မၤထီၣ်မၤထီအဂီၢ်” န့ၣ်တက့ၢ်. ပတၢ်ကတိၤန့ၣ် ကမ့ၢ်တၢ်ဆိၣ်ဂ့ၤလၢ ပှၤလၢပဃၢၤအဂီၢ်ဒီး ကမၤစၢၤပှၤလၢ ပကအိၣ်ဂၢၢ်ဆိးကျၢၤလၢ ယွၤအတၢ်အဲၣ်အပူၤလီၤ.
^ လံာ်အဆၢ. 10 ဒ်လံာ်စီဆှံပူၤသူဝဲအသိး, “တၢ်အိၣ်မူတကဆှီ” န့ၣ်မ့ၢ်တၢ်ကတိၤ အခီပညီလဲၢ်ဒိၣ်မးလၢ ပာ်ဃုာ်ဒီးတၢ်ဒဲးဘး အါမးလီၤ. တၢ်တကဆှီကိးမံၤဒဲးန့ၣ် တၢ်စံၣ်ညီၣ်ဘၢစံၣ်ညီၣ်ကွီၢ်အီၤ တန့ၢ်သနာ်က့, ပှၤတဂၤမ့ၢ်တပီၢ်ယၢ်လီၤအသးလၢ တၢ်မၤလုၢ်လၢ်လၢတကဆှီ တဂ့ၤတဘၣ်န့ၣ် တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤသ့လီၤ.—၂ ကရံၣ်သူး ၁၂:၂၁; အ့းဖ့းစူး ၄:၁၉; ကင်းမျှော်စင်၊ ၂၀၀၆၊ ဇူလိုင် ၁၅ ရက်ထုတ်၊ “စာၡုသူများထံမှ မေးခွန်းလွှာ” ကိုၡု။
