တၢ်မၤလိ ၂
ကစၢ်ယွၤမ့ၢ်တံၤသကိးအဂ့ၤကတၢၢ်
တၢ်ကဲထီၣ်ယွၤအတံၤသကိးစံးတၢ်န့ၣ် မ့ၢ်တၢ်အဂ့ၤကတၢၢ် လၢတၢ်အကဲထီၣ်သ့လၢနၤခဲလၢာ်အကျါ န့ၣ်လီၤ. ကစၢ်ယွၤကသိၣ်လိန့ၢ်နၤ ဒ်သိးနအိၣ်ဂၢၢ်ဆိးကျၢၤဒီးတၢ်သူၣ်ဖှံသးညီ ကသ့န့ၣ်လီၤ; အဝဲကမၤပူၤဖျဲးနၤလၢ တၢ်စူာ်ကမၣ်နာ်ကမၣ် ဒီးတၢ်အလုၢ်အလၢ်တဖၣ် လၢကမၤကီမၤခဲမၤဘၣ်ဒိနၤန့ၣ်လီၤ. ကစၢ်ကဒိကနၣ် နတၢ်ထုကဖၣ်တဖၣ်န့ၣ်လီၤ. ကမၤစၢၤနၤလၢနကအိၣ်ဒီး တၢ်သူၣ်မုာ်သးခုၣ် ဒီးတၢ်စူၢ်ဂၢၢ်နာ်ကျၢၤန့ၣ်လီၤ. (စံးထီၣ်ပတြၢၤ ၇၁:၅; ၇၃:၂၈) ဖဲတၢ်နးတၢ်ဖှီၣ် အကတီၢ်န့ၣ် ကစၢ်ကမၤစၢၤနၤလီၤ. (စံးထီၣ်ပတြၢၤ ၁၈:၁၈) လၢန့ၣ်အမဲာ်ညါ ကစၢ်ယွၤဟ့ၣ်ဃာ်နၤ တၢ်မူအထူအယိာ် အတၢ်ဆိၣ်ဂ့ၤန့ၣ်လီၤ.—ရိမ့ၤ ၆:၂၃.
နသးမ့ၢ်အိၣ်ဃူလီၤပလိာ်ဒီးယွၤန့ၣ် နသးကအိၣ်ဃူလီၤပလိာ်ဒီး ကစၢ်အတံၤသကိးသ့ၣ်တဖၣ် စ့ၢ်ကီးန့ၣ်လီၤ. အဝဲသ့ၣ်တဖၣ်စ့ၢ်ကီး ကကဲထီၣ်နတံၤသကိးန့ၣ်လီၤ. နီၢ်နီၢ်တခီ အဝဲသ့ၣ်ကမၤအသးဒ် နဒီပုၢ်ဝဲၢ်မုၣ်, ဒီပုၢ်ဝဲၢ်ခွါတဖၣ် အသိးန့ၣ်လီၤ. အဝဲသ့ၣ်အံၤ, လၢတၢ်သးခုအဒိၣ်အမုာ်အပူၤ ကသိၣ်လိန့ၢ်နၤ ယွၤအဂ့ၢ်အကျိၤ, ကမၤစၢၤနၤ ဒီးကဆီၣ်ထွဲနခံန့ၣ်လီၤ.
ပဝဲသ့ၣ်တဖၣ်အံၤ ပတီၤတတုၤသိးဒီးကစၢ်ယွၤဘၣ်. ဖဲနဂုာ် ကျဲးစၢးကဲထီၣ်ယွၤအတံၤသကိးအခါ နကြၢးနၢ်ပၢၢ်တၢ်လၢ အကါဒိၣ်ဝဲတခါန့ၣ်လီၤ. တၢ်ရ့တံၤရ့သကိးဒီးကစၢ်ယွၤစံးတၢ်န့ၣ် တမ့ၢ်ပှၤအတီၤဒ်သိး အတၢ်ရ့လိာ်မုာ်လိာ်န့ၣ်ဘၣ်. ကစၢ်ယွၤန့ၣ် အသးပှၢ်န့ၢ်ပှၤဒိၣ်မး, ကူၣ်ဘၣ်ကူၣ်သ့န့ၢ်ပှၤအါမး, စိဒိၣ်ကမီၤထီန့ၢ်ပှၤဒိၣ်မး နးနးကလဲာ်န့ၣ်လီၤ. ကစၢ်အံၤ မ့ၢ်ဝဲဒၣ်ပှၤပၢတၢ်လၢပလိၤ, လၢအကြၢးဘၣ်ပၢပှၤန့ၣ်လီၤ. လၢတၢ်န့ၣ်အဃိ ပမ့ၢ်သးအိၣ်ကဲထီၣ်အတံၤသကိးသၢပျၢၤ, ပကဘၣ်စူၢ်အီၤ ဒီးပကဘၣ်မၤတၢ်လၢ အအဲၣ်ဒိးပမၤအီၤန့ၣ်လီၤ. မ့ၢ်မၤဒ်န့ၣ်သၢပျၢၤ ကမ့ၢ်တၢ်ဂ့ၤဘျုးဂ့ၤဖှိၣ်လၢပဂီၢ် ထီဘိန့ၣ်လီၤ.—ယၡါယၤ ၄၈:၁၈.
