တၢ်မၤလိ ၆
ပၤရဒံစူးကဟဲတုၤဘူးထီၣ်လံ
တၢ်အၢတၢ်သီလၢမၤအသး လၢဟီၣ်ခိၣ်ချၢခဲအံၤန့ၣ် ပာ်ဖျါထီၣ်ဝဲ ပၤရဒံစူးကတုၤဘူးထီၣ်လံန့ၣ်လီၤ. လံာ်စီဆှံစံဝဲဒၣ်လၢ ပၤရဒံစူးကဟဲတုၤဘုးထီၣ်အဆၢန့ၣ် ပကဘၣ်ကွၢ်ဆၢၣ်မဲာ် တၢ်အၢတၢ်သီအကတီၢ်န့ၣ်လီၤ. ခဲအံၤ ပအိၣ်မူဘၣ်ပဝဲလၢ တၢ်ဆၢကတီၢ်အဝဲန့ၣ်အပူၤလီၤ. တၢ်လၢလာ်တဖၣ်အံၤ, မ့ၢ်တၢ်တနီၤ လၢကဘၣ်ဟဲကဲထီၣ်ဝဲ ဒ်လံာ်စီဆှံစံးအသိးန့ၣ်လီၤ–
တၢ်ဒုးဖးဒိၣ်တဖၣ်. “ပှၤကညီတကလုာ် ကထီဒါပှၤကညီတကလုာ်, ဒီးတဘီတမုၢ် ကထီဒါတဘီတမုၢ်လီၤ.” (မးသဲ ၂၄:၇) ဝံအတၢ်ကတိၤဝဲအံၤ ဟဲကဲထီၣ်ဝဲဒၣ်လံန့ၣ်လီၤ. စးထီၣ်လၢ ၁၉၁၄ နံၣ်န့ၣ် ဟီၣ်ခိၣ်ဒီဘ့ၣ်အတၢ်ဒုးခံခါ ဒီးတၢ်ဒုးဖိတဘျုးခါ ဟဲကဲထီၣ်ဝဲန့ၣ်လီၤ. တၢ်ဒုးတဖၣ်န့ၣ်အဃိ ပှၤသံလၢအကကွဲၢ်ညါန့ၣ်လီၤ.
ဆူးတၢ်ဆါရၤလီၤအသး. “တၢ်ဆါသံသတြိာ်ကအိၣ်ထီၣ်ဝဲလီၤ.” (လူၤကၣ် ၂၁:၁၁) ကဲထီၣ်ဝဲဒ်န့ၣ်သပှၢ်ကတၢၢ်ဧါ? ကဲထီၣ်ဝဲဒၣ်လီၤ. ခဲစၢၣ်, သးအတၢ်ဆါ, ထံၣ်ဘံၣ်, တၢ်ညၣ်ဂိၢ်, အ့း(ဒ)(စ) [AIDS] ဒီးတၢ်ဆူးတၢ်ဆါအဂၤတဖၣ်အဃိ ပှၤဘၣ်သံလၢအကကွဲၢ်န့ၣ်လီၤ.
တၢ်အီၣ်တၢ်အီတကူတလၢ. လၢဟီၣ်ခိၣ်ဒီဘ့ၣ်ညါ ပှၤလၢအတၢ်အီၣ်တၢ်အီ တကူတလၢတဖၣ် အိၣ်ဝဲဒၣ်န့ၣ်လီၤ. တၢ်အီၣ်တၢ်အီ တကူတလၢအဃိ ပှၤသံလၢအကကွဲၢ် ကိးနံၣ်ဒဲးန့ၣ်လီၤ. တၢ်အံၤမ့ၢ် တၢ်ပနီၣ်တခါ လၢအပာ်ဖျါ ပၤရဒံစူးကဟဲတုၤတယံာ်လၢၤဘၣ်န့ၣ်လီၤ. လံာ်စီဆှံစံး, “တၢ်သၣ်ဝံၤလီၤဒိတဖၣ် ကအိၣ်စ့ၢ်ကီးဝဲလီၤ.”—မၢ်ကူး ၁၃:၈, ခ့ခါစှီၤကျိာ်.
ဟီၣ်ခိၣ်အတၢ်ဟူးတဖၣ်. “ဟီၣ်ခိၣ်ကဟူးဝးဆှဲးဆှိးဝဲ လၢအံၤတပူၤ လၢနုၤတပူၤန့ၣ်လီၤ.” (မးသဲ ၂၄:၇) တၢ်အံၤစ့ၢ်ကီး မၤအသးလၢပစိၤနီၢ်နီၢ်လံ. စးထီၣ်လၢ ၁၉၁၄ နံၣ်န့ၣ် ပှၤသံလၢဟီၣ်ခိၣ်ဟူးအဃိ အိၣ်တကကွဲၢ်ဘျဲၣ်န့ၣ်လီၤ.
ပှၤအၢပှၤသီတဖၣ်. ပှၤတဖၣ်ကမ့ၢ် “ပှၤသးကွံစ့” ဒီး “ပှၤအဲၣ်လီၤအသး” န့ၣ်လီၤ. အဝဲသ့ၣ်တဖၣ်န့ၣ်ကမ့ၢ် “ပှၤလၢအအဲၣ်တၢ်မုာ်လၤ ဒိၣ်န့ၣ်အအဲၣ်ယွၤ” န့ၣ်လီၤ. ဖိလံၤတဖၣ် ကကဲထီၣ် ‘ပှၤတဒိကနၣ်မိၢ်ပၢ်အတၢ်ကတိၤတဖၣ်’ န့ၣ်လီၤ. (၂ တံၤမသ့း ၃:၁-၅) လၢမုၢ်မဆါတနံၤအံၤ, ပှၤဒ်န့ၣ်သိးတဖၣ်အိၣ်ဝဲန့ၣ် နကအၢၣ်လီၤနဲလီၤ. အဝဲသ့ၣ်တဖၣ်န့ၣ် တအိၣ်ဒီးတၢ်ယူးယီၣ်ယွၤဘၣ်, ဒီးမၤတံာ်တာ်ပှၤလၢအဂုာ်မၤလိယွၤအဂ့ၢ်တဖၣ်န့ၣ်လီၤ.
တၢ်အၢတၢ်သီတဖၣ်. “တၢ်အၢတၢ်သီကအါထီၣ်ဂီၢ်ထီၣ် . . . ဝဲလီၤ.” (မးသဲ ၂၄:၁၂, ခ့ခါစှီၤကျိာ်) နကဘၣ်နသးလၢ တၢ်အၢတၢ်သီ အါထီၣ်နးထီၣ်န့ၣ်ဒံး လၢနံၣ်လၢအပူၤကွံာ်တဖၣ်န့ၣ် လီၤ. ပှၤလၢတၢ်လီၢ်ကိးပူၤဒဲးန့ၣ် ဘၣ်အိၣ်ဒီးတၢ်ဘၣ်ယိၣ်ဘၣ်ဘီလၢ ကဘၣ်တၢ်ဂုာ်ဆူၣ်ပျိဆူၣ်အီၤ, တၢ်လီန့ၢ်ဝ့ၤန့ၢ်အီၤ, တၢ်မၤအၢမၤနးအီၤန့ၣ်လီၤ.
တၢ်သ့ၣ်တဖၣ်ခဲလၢာ် ပာ်ဖျါယွၤအဘီအမုၢ်ဘူးထီၣ်လံန့ၣ်လီၤ. လံာ်စီဆှံစံးဝဲဒ်အံၤလီၤ. “တုၤသုထံၣ်တၢ်တဖၣ်န့ၣ် မၤအသးဒီး သ့ၣ်ညါလၢ ယွၢအဘီအမုၢ်အိၣ်ဘူးထီၣ်လံန့ၣ်တက့ၢ်.” (လူၤကၣ် ၂၁:၃၁) ယွၤအဘီအမုၢ်န့ၣ် အမ့ၢ်ဝဲတၢ်မနုၤလဲၣ်? တၢ်န့ၣ် မ့ၢ်ယွၤအမူခိၣ်ပဒိၣ် လၢအကမၤကဲထီၣ်ပၤရဒံစူး ဖဲဟီၣ်ခိၣ်အံၤန့ၣ်လီၤ. ယွၢအဘီအမုၢ်ကဟံးန့ၢ် ပှၤကညီအတၢ်ပၢတၢ်ပြးတဖၣ်အလီၢ်န့ၣ်လီၤ.—ဒၤနံးယ့လး ၂:၄၄.
