တၢ်မၤလိ ၁၂
ဖဲပှၤသံအခါ တၢ်မၤအသးဒီးအီၤဒ်လဲၣ်
တၢ်သံန့ၣ် ထီဒါဒီးတၢ်မူလီၤ. တၢ်သံန့ၣ်မၤသးဒ်သိးဒီး တၢ်မံကျၢၤသးအသိးန့ၣ်လီၤ. (ယိၤဟၣ် ၁၁:၁၁-၁၄) ပှၤလၢအသံတ့ၢ်တဖၣ်န့ၣ် နၢ်ဟူတၢ်တသ့, ထံၣ်တၢ်တသ့, ကတိၤတၢ်တသ့, ဆိကမိၣ်တၢ်တသ့ နီတမံၤဘၣ်. (စံၣ်တဲၤတဲလီၤ ၉:၅, ၁၀) တၢ်ဘုၣ်တၢ်ဘါလၢအကမၣ်န့ၣ် သိၣ်လိပှၤလၢ ပှၤသံတဖၣ် လဲၤဝဲသ့ၣ်ဆူ ပှၤနီၣ်သးတဖၣ်အိၣ်အလီၢ် ဒ်သိးကအိၣ်ကဆိးဒီး အဖံအဖုတဖၣ်အဂီၢ်န့ၣ်လီၤ. လံာ်စီဆှံတသိၣ်လိဝဲဒ်န့ၣ်ဘၣ်.
ပှၤသံတဖၣ်န့ၣ် မၤစၢၤပှၤတသ့ဘၣ်အမဲာ်ညါ မၤအၢမၤသီပှၤတသ့စ့ၢ်ကီးဘၣ်. ပှၤတဖၣ် မၤဝဲသ့ၣ်တၢ်အလုၢ်အလၢ်အဒိအတဲာ်ဒီး တၢ်လုၢ်တၢ်ပာ်သ့ၣ်တဖၣ် လၢအဝဲသ့ၣ်ဆိကမိၣ် ကမၤမုာ်ပှၤသံတဖၣ်အသးန့ၣ်လီၤ. တၢ်န့ၣ် အိၣ်သူၣ်လီၤအသးလၢ မုၣ်ကီၤလံၢ်အတၢ်လီတၢ်ဝ့ၤတဖၣ်အဖီခိၣ်အဃိ တဘၣ်ယွၤအသးဘၣ်. မၤမုာ်ပှၤသံတဖၣ်အသး တသ့စ့ၢ်ကီးဘၣ်. အဂ့ၢ်ဒ်အံၤ, ပှၤသံတဖၣ်န့ၣ် မ့ၢ်အသးသမူတအိၣ်ဘၣ်အဃိလီၤ. ပတကြၢးပျံၤ ပှၤသံတဖၣ်ဘၣ် ဒီးပတကြၢးဘူၣ်ထီၣ်ဘါထီၣ်အဝဲသ့ၣ်စ့ၢ်ကီးဘၣ်. ပကြၢးဘူၣ်ထီၣ်ဘါထီၣ်ထဲဒၣ် ကစၢ်ယွၤန့ၣ်လီၤ.—မးသဲ ၄:၁၀.
ပှၤသံတဖၣ် ကမူထီၣ်က့ၤကဒီးန့ၣ်လီၤ. ယဟိဝၤန့ၣ် ကဒုးမူထီၣ်က့ၤပှၤသံတဖၣ် လၢဟီၣ်ခိၣ်အပၤရဒံစူးအပူၤန့ၣ်လီၤ. တၢ်အံၤ ကကဲထီၣ်လၢခါဆူညါန့ၣ်လီၤ. (ယိၤဟၣ် ၅:၂၈, ၂၉; မၤတၢ် ၂၄:၁၅) ဒ်နထိၣ်ဂဲၤထၢၣ်က့ၤ ပှၤလၢအမံဘၣ်အသးတဂၤ သ့အသိး ကစၢ်ယွၤန့ၣ် မၤမူထီၣ်က့ၤပှၤသံတဖၣ် သ့ဝဲလီၤ.—မၢ်ကူး ၅:၂၂, ၂၃, ၄၁, ၄၂.
တၢ်နာ်ဘၣ်ဃးပတသံဘၣ်န့ၣ် မ့ၢ်တၢ်လီတၢ်ဝ့ၤတခါလၢ မုၣ်ကီၤလံၢ်ရၤလီၤဝဲန့ၣ်လီၤ. မုၣ်ကီၤလံၢ်ဒီး အတၢ်နါတဖၣ် ဒုးနာ်ပှၤလၢ ပှၤသံတဖၣ်အနီၢ်သးန့ၣ် အိၣ်မူသ့ၣ်ဝဲအဖၢမုၢ် ဒီးမၤအိၣ်ထီၣ် တၢ်ဆူးတၢ်ဆါ, တၢ်ကီတၢ်ခဲတဖၣ်န့ၣ်လီၤ. မုၣ်ကီၤလံၢ်န့ၣ် ဘၣ်တဘျီဘျီ ကလံာ်န့ၢ်လွဲန့ၣ်ပှၤခီဖျိလၢ တၢ်မံမီၢ် ဒီးတၢ်ထံၣ်လၢညါခီတဖၣ်န့ၣ်လီၤ. ယဟိဝၤကတိၤအၢပှၤလၢ အဂုာ်ကျဲးစၢးကတိၤတၢ်ဒီး ပှၤသံတဖၣ်န့ၣ်လီၤ.—၅ မိၤၡ့ ၁၈:၁၀-၁၂.
