ယ့ၣ်ၡူး​ခရံာ်​မ့ၢ် ယွၤ​အဖိခွါ​ဒီး အတံၤသကိး​အဘူး​ကတၢၢ် လၢ​အအဲၣ်ဝဲ​အဒိၣ်ကတၢၢ်​တဂၤ​န့ၣ်လီၤ. ယ့ၣ်ၡူးအံၤ တချုး​အိၣ်လၢ​ဟီၣ်ခိၣ် ဒ်​ပှၤကညီ​အသိး​အခါ, အိၣ်မူတ့ၢ်ဝဲ​လၢ​မူခိၣ် ဒ်​ပှၤနီၣ်သးဖိ​လၢ အစိကမီၤဒိၣ်​တဂၤ​အသိးန့ၣ်လီၤ. (ယိၤဟၣ် ၁၇:⁠၅) လၢန့ၣ်​အလီၢ်ခံ ဟဲလီၤဝဲ​ဆူ​ဟီၣ်ခိၣ်​ဒီး သိၣ်လိနဲၣ်လိ​န့ၣ်​ပှၤ တၢ်မ့ၢ်တၢ်တီ​ဘၣ်ဃးဒီး​ယွၤန့ၣ်​လီၤ. (ယိၤဟၣ် ၁၈:၃၇) ဒ်သိး​က​အုၣ်က့ၤခီၣ်က့ၤ​ပှၤကညီ လၢ​အတၢ်ဒိကနၣ်အိၣ်တဖၣ် လၢ​တၢ်ဒဲးဘး​ဒီး​တၢ်သံ​အဂီၢ်, ညိကွံာ်ဝဲ​ပှၤကညီ​အသးသမူ​စ့ၢ်ကီး​န့ၣ်လီၤ. (ရိမ့ၤ ၆:၂၃) ခဲအံၤ ယ့ၣ်ၡူးန့ၣ် ကဲထီၣ်ဝဲ ယွၤ​အဘီအမုၢ်​အစီၤပၤ​လံန့ၣ်လီၤ. ယွၤ​အဘီအမုၢ်​မ့ၢ် မူခိၣ်​အတၢ်ပၢတၢ်ပြး လၢ​အက​မၤကဲထီၣ်​ပၤရဒံစူး​လၢ​ဟီၣ်ခိၣ်အံၤ​န့ၣ်လီၤ.​​—⁠လီၣ်ဖျါ ၁၉:⁠၁၆.

မူခိၣ်ကလူး​တဖၣ်စ့ၢ်ကီး မ့ၢ်​ယွၤ​အတံၤသကိး​တဖၣ်လီၤ. မူခိၣ်ကလူးတဖၣ်အံၤ တမ့ၢ်​အသးသမူ​စးထီၣ်ဝဲ​ဒ်သိး ပှၤကညီ​လၢ​ဟီၣ်ခိၣ်အံၤ​အသိးဘၣ်. ဖဲ​ယွၤ​တချုး​တ့လီၤ​ဟီၣ်ခိၣ်အံၤ​ဒံးဘၣ်အခါ တ့လီၤတ့ၢ်​အဝဲသ့ၣ်​လၢ​မူခိၣ်​န့ၣ်လီၤ. (ယိၤဘး ၃၈:​၄-၇) မူခိၣ်ကလူးတဖၣ် အိၣ်လၢ​အကကွဲၢ်တဖၣ်​အကကွဲၢ်​လီၤ. (ဒၤနံးယ့လး ၇:၁၀) ကစၢ်ယွၤ​အတံၤသကိး​လၢ​မူခိၣ်တဖၣ်အံၤ သးအိၣ်ဝဲသ့ၣ်​လၢ ပှၤ​က​မၤလိ​တၢ်မ့ၢ်တၢ်တီ လၢ​အဘၣ်ဃးဒီး ယဟိဝၤ​အဂ့ၢ်န့ၣ်လီၤ.​​—⁠လီၣ်ဖျါ ၁၄:​၆, ၇.

လၢ​ဟီၣ်ခိၣ်အံၤ​စ့ၢ်ကီး ယွၤ​အတံၤသကိးတဖၣ်​အိၣ်ဝဲ​န့ၣ်လီၤ; ကစၢ်​ကိး​အဝဲသ့ၣ်​လၢ အပှၤအုၣ်အသး​တဖၣ်န့ၣ်လီၤ. ပှၤအုၣ်အသး​တဂၤ​လၢ​ရူန့ၣ် က​စံးကတိၤဝဲ​ဘၣ်ဃး ပှၤတဂၤဂၤ မ့တမ့ၢ် တၢ်ဂ့ၢ်တခါ​ခါ, လၢ​အသ့ၣ်ညါတ့ၢ်​ဝဲန့ၣ်လီၤ. ယဟိဝၤ​အပှၤအုၣ်အသးတဖၣ် စံးဘၣ်​တဲဘၣ်​ပှၤ​အဂုၤအဂၤ ဘၣ်ဃး​ယဟိဝၤ ဒီး​အတၢ်တိာ်ပာ်​တဖၣ်န့ၣ်လီၤ. (ယၡါယၤ ၄၃:၁၀) ဒ်​မူခိၣ်ကလူး​သ့ၣ်တဖၣ်​အသိး, ပှၤအုၣ်အသးတဖၣ်အံၤ သးအိၣ်​မၤစၢၤ​နၤ​လၢ န​က​မၤလိ​တၢ်မ့ၢ်တၢ်တီ​ဘၣ်ဃးဒီး ယဟိဝၤ​န့ၣ်လီၤ. အဝဲသ့ၣ်​အဲၣ်ဒိး​လၢ​နၤ​စ့ၢ်ကီး န​က​ကဲထီၣ် ယွၤ​အတံၤသကိး​န့ၣ်လီၤ.