တၢ်မၤလိ ၁၅
ယွၤအတံၤသကိးတဖၣ်န့ၣ် မၤဝဲသ့ၣ်တၢ်ဂ့ၤ
တံၤသကိးလၢနပတြၢၤအီၤ ဒီးပာ်ကဲအီၤ မ့ၢ်အိၣ်တဂၤန့ၣ် နကဂုာ်ကျဲးစၢးဒ်နကလီၤဂာ်ဒီးအီၤလီၤ. လံာ်စီဆှံစံးဝဲ, “ယွၤန့ၣ် မ့ၢ်တၢ်ဂ့ၤတၢ်ဝါ, ဒီးတၢ်တီတၢ်လိၤလီၤ.” (စံးထီၣ်ပတြၢၤ ၂၅:၈) လၢပကကဲထီၣ်ယွၤအတံၤသကိးအဂီၢ်, တၢ်သူၣ်ဂ့ၤသးဝါ, ဒီးတၢ်တီတၢ်လိၤ ကဘၣ်အိၣ်ဒီးပှၤလီၤ. လံာ်စီဆှံစံးဒ်အံၤလီၤ. “ကဲထီၣ်ပှၤကွၢ်လိယွၤ ဒ် [ယွၤအ] ဖိသးဘိအသိးန့ၣ်တက့ၢ်. လဲၤသုဝဲလၢ တၢ်အဲၣ်တၢ်ကွံအပူၤ . . . တက့ၢ်.” (အ့းဖ့းစူး ၅:၁, ၂) ကျဲလၢပမၤအီၤသ့ဒ်န့ၣ်အသိးတနီၤန့ၣ်–
မၤစၢၤပှၤဂၤတက့ၢ်. “မ်ပမၤဂ့ၤတၢ်လၢ ပှၤကညီကိးဂၤဒဲးတက့ၢ်.”—ကလၤတံ ၆:၁၀.
ဂုာ်ဖံးဂုာ်မၤတၢ်တက့ၢ်. “ပှၤလၢအဟုၣ်တၢ်, မ်အသုတဟုၣ်လၢၤတၢ်တဂ့ၤ, အခိၣ်တလိာ်, ဒ်သိးအကဟ့ၣ်နီၤတၢ်လၢ, ပှၤဖှီၣ်ဖိယာ်ဖိဒီး, မ်အကျဲးစၢးမၤတၢ်ဂ့ၤလၢအစုသပှၢ်ပှၢ်တက့ၢ်.”—အ့းဖ့းစူး ၄:၂၈.
ပာ်ကဆှဲကဆှီ နီၢ်ခိဒီးသကဲာ်ပဝးတက့ၢ်. “မ်ပမၤကဆှီပသးလၢ ကယဲၢ်တၢ်ဃံၣ်တၢ်မူး, ဘၣ်ဃးဒီးပဖံးပညၣ်, ဒီးပသူၣ်ပသး ခဲလၢာ်တက့ၢ်. ဒီးလၢတၢ်ပျံၤယွၤအပူၤန့ၣ်, မ်ပမၤလၢထီၣ်ပှဲၤထီၣ်တၢ်စီဆှံတက့ၢ်.”—၂ ကရံၣ်သူး ၇:၁.
ရ့လိာ်နဟံၣ်ဖိဃီဖိတဖၣ် လၢတၢ်အဲၣ်တၢ်ကွံ ဒီးတၢ်ပာ်ကဲလိာ်သးတက့ၢ်. “သုဝဲဒၣ်အံၤ ဒ်သုအဲၣ်လီၤသုသးအသိး တဂၤအဲၣ်အမါ, တဂၤအဲၣ်အမါဒၣ်ဝဲတက့ၢ်. ဒီးပိာ်မုၣ်န့ၣ် မ်အယူးယီၣ်အဝၤတက့ၢ်. ဖိသၣ်သ့ၣ်ဧၢ, စူၢ်သုမိၢ်သုပၢ် လၢကစၢ်အပူၤတက့ၢ်.”—အ့းဖ့းစူး ၅:၃၃–၆:၁.
ပာ်ဖျါတၢ်အဲၣ်တၢ်ကွံ လၢပှၤဂၤအလိၤတက့ၢ်. “မ်ပအဲၣ်လိာ်ကွံလိာ်ပသးတက့ၢ်. အဂ့ၢ်ဒ်အံၤ, တၢ်အဲၣ်တၢ်ကွံ ဟဲလၢယွၤ . . . လီၤ.”—၁ ယိၤဟၣ် ၄:၇.
ဒိကနၣ်ထံကီၢ်အတၢ်သိၣ်တၢ်သီတက့ၢ်. “မ်ပှၤပာ်အသးလၢ တၢ်စိတၢ်ကမီၤအဒိၣ်တဖၣ်အဖီလာ် ကိးဂၤဒဲးတက့ၢ်. . .. ပှၤလၢအဂ့ၤဒိးသွဲန့ၣ် ဟ့ၣ်သွဲတက့ၢ်.”—ရိမ့ၤ ၁၃:၁,၇.
