တၢ်မၤလိ ၁၁
ဟးဆှဲးတၢ်ဘူၣ်တၢ်ဘါလၢအကမၣ်န့ၣ်တက့ၢ်
မုၣ်ကီၤလံၢ်ဒီးအတၢ်နါတဖၣ် တအဲၣ်ဒိးလၢ နကဘူၣ်ထီၣ်ဘါထီၣ်ကစၢ်ယွၤန့ၣ်ဘၣ်. မ့ၢ်သ့မ့ၢ်ဘၣ်န့ၣ် အဝဲသ့ၣ်အဲၣ်ဒိး ပှၤခဲလၢာ်ကဃၣ်ဒူၣ်ချၢအသးလၢယွၤန့ၣ်လီၤ. ဂုာ်ကျဲးစၢးမၤဝဲသ့ၣ်ဒ်လဲၣ်? တမံၤန့ၣ် ခီဖျိလၢတၢ်ဘူၣ်တၢ်ဘါလၢအကမၣ်န့ၣ်လီၤ. (၂ ကရံၣ်သူး ၁၁:၁၃-၁၅) တၢ်ဘူၣ်တၢ်ဘါတခါလၢ အတသိၣ်လိမၤယူၤတၢ် ဒ်လံာ်စီဆှံအတၢ်မ့ၢ်တၢ်တီအသိးန့ၣ် မ့ၢ်တၢ်ဘူၣ်တၢ်ဘါလၢအကမၣ်လီၤ. တၢ်ဘူၣ်တၢ်ဘါအကမၣ်န့ၣ် မၤသးဒ်စ့အဘျၣ်လီၤ. လီၤဂာ်ဒ်စ့နီၢ်နီၢ်သနာ်က့ အပှ့ၤတအိၣ်ဘၣ်. အဝဲမၤအိၣ်ထီၣ် တၢ်ကီတၢ်ခဲအါဒိၣ်မးသ့လီၤ.
တၢ်ဘူၣ်ကမၣ်ဘါကမၣ်တၢ်န့ၣ် ဘၣ်တၢ်မ့ၢ်တၢ်တီကစၢ် ယဟိဝၤအသး တသ့လ့ၤတက့ၤဘၣ်. ဖဲယ့ၣ်ၡူးအိၣ်မူတ့ၢ်လၢဟီၣ်ခိၣ်အခါ တၢ်ဘုၣ်တၢ်ဘါတကရူၢ်လၢအဲၣ်ဒိးမၤသံအီၤ အိၣ်ဝဲန့ၣ်လီၤ. အဝဲသ့ၣ်ဆိကမိၣ် အတၢ်ဘါအတၢ်ဘျၢန့ၣ် မ့ၢ်တၢ်အဘၣ်လီၤ. အဝဲသ့ၣ်စံးဝဲလၢ, “ပအိၣ်ဒီးပပၢ်, ယွၤတဂၤဃီန့ၣ်လီၤ.” ယ့ၣ်ၡူးအၢၣ်လီၤအဝဲသ့ၣ်ဧါ? တအၢၣ်လီၤဝဲဘၣ်. ယ့ၣ်ၡူးတဲကဒါက့ၤအီၤလၢ, ‘သုဝဲသ့ၣ်အံၤ, သုဟဲလီၤလၢ သုပၢ်မုၣ်ကီၤလံၢ်န့ၣ်လီၤ.’ (ယိၤဟၣ် ၈:၄၁, ၄၄) မုၢ်မဆါတနံၤအံၤ, ပှၤအါဂၤ ဆိကမိၣ်လီၤအသးလၢ အဘါယွၤဘၣ်ဆၣ် နီၢ်နီၢ်တခီ ဘါဝဲသ့ၣ်မုၣ်ကီၤလံၢ် ဒီးအတၢ်နါတဖၣ်န့ၣ်လီၤ.—၁ ကရံၣ်သူး ၁၀:၂၀.
ဒ်သ့ၣ်လၢအတဂ့ၤန့ၣ် သၣ်ထီၣ်တၤသၣ်လၢအတဂ့ၤအသိး တၢ်ဘူၣ်တၢ်ဘါလၢအကမၣ်န့ၣ် မၤကဲထီၣ်ပှၤမၤတၢ်အၢတဖၣ်န့ၣ်လီၤ. ပှၤအါဂၤ မၤတၢ်အၢတၢ်သီအဃိ ဟီၣ်ခိၣ်ပှဲၤကတံာ်မးဒီး တၢ်ကီတၢ်ခဲ, တၢ်နးတၢ်ဖှီၣ်န့ၣ်လီၤ. တၢ်မၤကမၣ်မုၣ်ကမၣ်ခွါ, တၢ်အ့ၣ်လိာ်ဆိးက့, တၢ်ဟုၣ်တၢ်ဘျၣ်, တၢ်ဆီၣ်ဘံၣ်ဆီၣ်ဘၢ, တၢ်မၤသံပှၤအသးဒီး, တၢ်မၤတရီတပါပိာ်မုၣ်ပိာ်မၢၤတဖၣ် အိၣ်ထီၣ်န့ၣ်လီၤ. ပှၤအါဂၤ လၢအမၤတၢ်အၢဒ်အံၤသိးတဖၣ်န့ၣ် အိၣ်ဒီးတၢ်ဘုၣ်တၢ်ဘါတခါသနာ်က့ အဝဲသ့ၣ်အတၢ်ဘါန့ၣ် တထိၣ်ဟူးအဝဲသ့ၣ်အသးလၢ အကမၤတၢ်ဂ့ၤဘၣ်. မ့ၢ်တအိၣ်ဆိကတီၢ်မၤတၢ်အၢသၢပျၢၤ အဝဲသ့ၣ် ကဲထီၣ်ယွၤအတံၤသကိး တသ့ဘၣ်.—မးသဲ ၇:၁၇, ၁၈.
တၢ်ဘူၣ်တၢ်ဘါလၢအကမၣ်န့ၣ် သိၣ်လိသီလိပှၤလၢ ကဃ့ဘါထုကဖၣ်တၢ်ဆူ တၢ်ဂီၤတၢ်ဖီၣ်တဖၣ်အအိၣ်လီၤ. ယွၤအတၢ်မၤလိာ်အိၣ်ဝဲလၢ ပတဘၣ်ဃ့ဘါထုကဖၣ်တၢ် ဆူတၢ်ဂီၤတၢ်ဖီၣ်တဖၣ်အအိၣ်ဘၣ်န့ၣ်လီၤ. တၢ်န့ၣ် ဘၣ်လိၢ်ဘၣ်စးဒီး ကြၢးဝဲဘၣ်ဝဲလီၤ. ပှၤတဂၤန့ၣ် တကတိၤတၢ်ဒီးနၤနီတဘျီဘၣ်ဒီး မ့ၢ်ကတိၤတၢ်ဒီးနဂီၤန့ၣ် ပှၤအံၤကဘၣ်နသးစ့ၢ်ကီးဧါ? ပှၤန့ၣ်ကဲထီၣ် နတံၤသကိးတံၢ်နီၢ်ကသ့စ့ၢ်ကီးဧါ? ကဲထီၣ်တသ့ဘၣ်. ယဟိဝၤအဲၣ်ဒိး ပှၤကတိၤတၢ်လၢအီၤလီၤ. တမ့ၢ် လၢတၢ်ဂီၤတၢ်ဖီၣ်ဘၣ်.—၂ မိၤၡ့ ၂၀:၄, ၅.
တၢ်ဘုၣ်တၢ်ဘါလၢအကမၣ်န့ၣ် သိၣ်လိပှၤလၢ တၢ်ဒုးတၢ်ယၤကဲထီၣ်အခါ ပမၤသံပှၤဂၤအသးသ့န့ၣ်လီၤ. မ့မ့ၢ်ယ့ၣ်ၡူးတခီ, စံးတ့ၢ်ဝဲလၢ ယွၤအတံၤသကိးတဖၣ်န့ၣ် ကအဲၣ်လိာ်အသးတဂၤဒီးတဂၤန့ၣ်လီၤ. ပတမၤသံပှၤလၢပအဲၣ်အီၤတဖၣ်န့ၣ်ဘၣ်. (ယိၤဟၣ် ၁၃:၃၅) တၢ်မၤသံပှၤအၢပှၤသီဒၣ်လဲာ် ကမၣ်လီၤ. ဖဲယ့ၣ်ၡူးအဒုၣ်အဒါတဖၣ် ဟဲဖီၣ်အီၤအခါ ကစၢ်တဟ့ၣ်အခွဲးလၢ အပျဲၢ်အဘီၣ်တဖၣ် ကအိၣ်ပှိၤအီၤဒီးတြီဆၢကဒါက့ၤဒုၣ်ဒါတဖၣ်န့ၣ်ဘၣ်.—မးသဲ ၂၆:၅၁, ၅၂.
တၢ်ဘုၣ်တၢ်ဘါလၢအကမၣ်န့ၣ် သိၣ်လိပှၤလၢ ပှၤအၢပှၤသီတဖၣ် ကဘၣ်တူၢ်တၢ်နးတၢ်ဖှီၣ်လၢ ရာ်မ့ၣ်လၣ်မ့ၣ်ကဲၤအပူၤလီၤ. ဘၣ်ဆၣ် လံာ်စီဆှံတခီ သိၣ်လိဝဲဒၣ်လၢ တၢ်ဒဲးဘးဆှၢတၢ်ဆူတၢ်သံန့ၣ်လီၤ. (ရိမ့ၤ ၆:၂၃) ယဟိဝၤမ့ၢ်တၢ်အဲၣ်တၢ်ကွံအကစၢ်လီၤ. တၢ်အဲၣ်တၢ်ကွံအကစၢ်န့ၣ် ကမၤနးမၤဖှီၣ်ပှၤကညီ လီၤထူလီၤယိာ်ဧါ? တမၤနးမၤဖှီၣ်ဝဲလ့ၤတက့ၤဘၣ်. လၢပၤရဒံစူးအပူၤန့ၣ် ကအိၣ်ထဲ တၢ်ဘုၣ်တၢ်ဘါလၢယဟိဝၤဘၣ်အသး တခါဧိၤန့ၣ်လီၤ. (လီၣ်ဖျါ ၁၅:၄) တၢ်ဘုၣ်တၢ်ဘါလၢ မုၣ်ကီၤလံၢ်ဒုးအိၣ်ထီၣ်အီၤ ခီဖျိလၢတၢ်လီတၢ်ဝ့ၤတဖၣ်န့ၣ် ကဟါမၢ်ကွံာ်ခဲလၢာ်လီၤ.
