“လၢထံးလၢသီန့ၣ် ယွၤတ့လီၤ မူခိၣ်ဒီး ဟီၣ်ခိၣ်လီၤ.” ပှၤတနီၤတဲဝဲလၢ ကယဲၢ်တၢ်ကွဲးအသးခဲလၢာ်အကျါန့ၣ် တၢ်အံၤမ့ၢ်တၢ်ကတိၤအိးထီၣ် လၢအဟူထီၣ်သါလီၤအဒိၣ်ကတၢၢ်န့ၣ်လီၤ. (၁ မိၤၡ့ ၁:၁) လံာ်ကျိၤယိယိဖိလၢ အလီၤကဟုကညီၢ်အံၤ ဒုးသ့ၣ်ညါပှၤဒီး ယဟိဝၤယွၤလီၤ. အဝဲမ့ၢ်သ့တၢ်လၢာ်ကစၢ် ဒီးမ့ၢ်ပှၤလၢအရ့ဒိၣ်ကတၢၢ်တဂၤ လၢလံာ်စီဆှံပူၤလီၤ. လံာ်စီဆှံအဆိကတၢၢ်တဆၢအံၤ ပာ်ဖျါထီၣ်ဝဲလၢ ယွၤမ့ၢ်တၢ်ဘၣ်တ့ကစၢ် လၢအတ့လီၤ မူဟီၣ်ကယၢဖးလဲၢ်ဖးထီ ဃုာ်ဒီးဟီၣ်ခိၣ်အံၤလီၤ. လံာ်စီဆှံအဆၢလၢ ၁ မိၤၡ့ ၁:၁ အလီၢ်ခံတဖၣ်န့ၣ် ဒုးနၢ်ပၢၢ်ပှၤလၢ ကစၢ်ယွၤသူဝဲတၢ်ဆၢကတီၢ်လၢအယံာ်ဒိၣ်မး တကတီၢ်ဘၣ်တကတီၢ် လၢကကတဲာ်ကတီၤ ဟီၣ်ခိၣ်လၢပှၤဟီၣ်ခိၣ်ဖိကအိၣ်ဆိးဝဲအဂီၢ်လီၤ. ဒုးအိၣ်ထီၣ်စ့ၢ်ကီးဝဲ ဟီၣ်ခိၣ်အန့ဆၢၣ်တဖၣ် လၢအလီၤကမၢကမၣ်န့ၣ်လီၤ.

ယွၤအတၢ်ဘၣ်တ့လၢ အဂ့ၤကတၢၢ်လၢဟီၣ်ခိၣ်ချၢန့ၣ် မ့ၢ်ဝဲဒၣ် ပှၤဟီၣ်ခိၣ်ဖိလီၤ. ကစၢ်ယွၤတ့လီၤပှၤဟီၣ်ခိၣ်ဖိဒ်အက့ၢ်အဂီၤဒၣ်ဝဲအသိးလီၤ. အဲၣ်ဒိးစံးဝဲလၢ ပှၤဟီၣ်ခိၣ်ဖိန့ၣ်ပာ်ဖျါထီၣ်ဝဲ ကစၢ်ယွၤအတၢ်ဂ့ၤတၢ်ဝါတဖၣ် ဒ်သိးဒီး တၢ်အဲၣ်တၢ်ကွံ ဒီးတၢ်ကူၣ်သ့န့ၣ် သ့ဝဲလီၤ. ယွၤတ့လီၤ ပှၤဟီၣ်ခိၣ်ဖိအဆိကတၢၢ်တဂၤလၢ ဟီၣ်ခိၣ်ကမူၣ်လီၤ. ဝံၤဒီး, ကိးဝဲအမံၤလၢ စီၤအၤဒၣ်ဒီးဒုးအိၣ်ဆိးအီၤလၢ ပၤရဒံစူးအပူၤ လၢဘၣ်တၢ်ကိးအီၤလၢ ဧ့ၤဒ့ၣ်တၤသၣ်အလီၢ်လီၤ. ကစၢ်ယွၤ ဒုးမဲထီၣ် တၢ်မုၢ်တၢ်ဘိ လၢတၤသၣ်လီၢ်အံၤအပူၤဒီး သ့ၣ်သူဝၣ်သၣ်အထူၣ်လၢအဖျါဃံလၤတဖၣ်န့ၣ်လီၤ.

ကစၢ်ယွၤထံၣ်ဝဲလၢ စီၤအၤဒၣ်န့ၣ် လိၣ်ဘၣ်ဝဲအသးသမူတံၤသကိးတဂၤန့ၣ်လီၤ. လၢတၢ်န့ၣ်အဃိ, ကစၢ်ယွၤသူဝဲ စီၤအၤဒၣ်အဂုာ်ဃံ, ဒီးတ့လီၤပိာ်မုၣ်တဂၤ ဝံၤဒီးဆှၢအီၤဆူ စီၤအၤဒၣ်အအိၣ်ဒ်သိး ကကဲထီၣ်အမါလီၤ. လၢခံန့ၣ် ပိာ်မုၣ်အံၤဘၣ်တၢ်ကိးအမံၤလၢ နီၢ်အံၣ်အုန့ၣ်လီၤ. စီၤအၤဒၣ်ပှဲၤဒီးတၢ်သးခုအဃိစံးဝဲဒ်ထါအသိး, “ခဲကနံၣ်အံၤ အဝဲဒၣ်အံၤ မ့ၢ်ဃံလၢယဃံ, ဒီးညၣ်လၢ ယညၣ်လီၤ.” ဒီးယွၤပာ်ဖျါဝဲလၢ, “မၤသးဒ်န့ၣ်ဒီး တၢ်လၢပိာ်ခွါအံၤ ကဟးသဒၣ် အမိၢ်အပၢ်, ဒီးကဘျုးအသး ဆူပိာ်မုၣ်အအိၣ်, ဒီးတၢ်လၢပှၤခံဂၤန့ၣ် ကကဲထီၣ် တၢ်တသွံၣ်ဃီ တညၣ်ဃီလီၤ.”—၁ မိၤၡ့ ၂:၂၂-၂၄; ၃:၂၀.

ယွၤဟ့ၣ်လီၤ နီၢ်အံၣ်အုဒီးစီၤအၤဒၣ်လၢ တၢ်မၤလိာ် ခံမံၤလီၤ. တၢတမံၤ, အဝဲသ့ၣ် ကဘၣ်အံးထွဲကွၢ်ထွဲ ဟီၣ်ခိၣ်အံၤ ဒီးမၤပှဲၤထီၣ်ဟီၣ်ခိၣ်လၢ အဖိအလံၤတဖၣ်လီၤ. ခံမံၤတမံၤ, ကစၢ်ယွၤတဲအဝဲသ့ၣ်လၢ တၤသၣ်လီၢ်ဖးလဲၢ်အပူၤန့ၣ် ထဲဒၣ်သ့ၣ်တထူၣ်လၢအမ့ၢ် “တၢ်သ့ၣ်ညါ တၢ်ဂ့ၤဒီး တၢ်အၢအသ့ၣ် တထံး” န့ၣ်တဘၣ်အီၣ်အီၤတဂ့ၤန့ၣ်လီၤ. (၁ မိၤၡ့ ၂:၁၇) အဝဲသ့ၣ် မ့ၢ်တဒိကနၣ် ကစၢ်ယွၤအတၢ်မၤလိာ်အံၤန့ၣ် ကဘၣ်သံဝဲလီၤ. တၢ်မၤလိာ်တဖၣ်အံၤန့ၣ်, မ့ၢ်ဒၣ်ကစၢ်ယွၤဟ့ၣ်အဝဲသ့ၣ်တၢ်ခွဲးတၢ်ယာ်တခါ လၢ ကပာ်ဖျါထီၣ်ဝဲလၢ အဝဲသ့ၣ်တူၢ်လိာ်ဝဲကစၢ်ဒ် အတၢ်ပၢကစၢ်အသိးန့ၣ်လီၤ. အဝဲသ့ၣ် မ့ၢ်ဒိကနၣ်န့ၣ် ကပာ်ဖျါစ့ၢ်ကီးဝဲလၢ အဝဲသ့ၣ်အဲၣ်ယွၤ ဒီးသ့ၣ်ညါဆၢက့ၤ ယွၤအဘျုးအဖှိၣ်န့ၣ်လီၤ. အဝဲသ့ၣ်ကတူၢ်လိာ် ကစၢ်အတၢ်ပၢ လၢအိၣ်ဒီးတၢ်အဲၣ်တၢ်ကွံန့ၣ် တကီလၢအဝဲသ့ၣ်အဂီၢ်ဘၣ်. ပှၤအလၢအပှဲၤ ခံဂၤအံၤန့ၣ် အတၢ်လီၤတူာ်လီၤကာ် တအိၣ်လ့ၤတက့ၤဘၣ်. လံာ်စီဆှံ ပာ်ဖျါဝဲလၢ, “ယွၤကွၢ် အတ့လီၤ တၢ်တမံၤလၢ်လၢ်န့ၣ်, ဒီးထံၣ်ဝဲလၢ အဂ့ၤမးလီၤ.”—၁ မိၤၡ့ ၁:၃၁.

​—ဘၣ်တၢ်ဒိးသန့ၤထီၣ်အီၤလၢ ၁ မိၤၡ့ အဆၢဒိၣ် ၁ ဒီး ၂ န့ၣ်လီၤ.