တၢ်မၤလိ ၈
ယွၤအဘီအမုၢ်န့ၣ် မ့ၢ်တၢ်မနုၤလဲၣ်
၁. ခဲအံၤပကကတိၤသကိး တၢ်ထုကဖၣ်လၢ အဟူထီၣ်သါလီၤမနုၤလဲၣ်.
ပှၤဟီၣ်ခိၣ်ဖိလၢ အကကွဲၢ်တဖၣ် သ့ၣ်ညါဝဲတၢ်ထုကဖၣ် လၢအဟူထီၣ်သါလီၤလၢ ဘၣ်တၢ်ကိးအီၤလၢ ခရံာ်အတၢ်ထုကဖၣ်န့ၣ်လီၤ. ယ့ၣ်ၡူးသူဝဲတၢ်ထုကဖၣ်အံၤဒီး သိၣ်လိဝဲအပျဲၢ်အဘီၣ်တဖၣ် လၢကဘၣ်ဃ့ဘါထုကဖၣ်ဝဲဒ်လဲၣ်အဂ့ၢ်န့ၣ်လီၤ. အဝဲဘါထုကဖၣ်ဝဲလၢ မနုၤအဂီၢ်လဲၣ်, ဒီးဘၣ်မနုၤအဃိလၢ တၢ်ထုကဖၣ်တခါအံၤ အရ့ဒိၣ်လၢပဂီၢ် လၢမုၢ်မဆါတနံၤအံၤလဲၣ်.
၂. ယ့ၣ်ၡူးသိၣ်လိပှၤ တၢ်ဂ့ၢ်အရ့ဒိၣ်သၢမံၤလၢ ပကဘၣ်ဃ့ထုကဖၣ်န့ၣ် မ့ၢ်တၢ်မနုၤလဲၣ်.
၂ ယ့ၣ်ၡူးစံးဝဲလၢ– “ဘါထုကဖၣ်တၢ်ဒ်အံၤ, အိၣ်လၢမူခိၣ်ပပၢ်ဧၢ, မ်နမံၤဘၣ်တၢ်ပာ်စီဆှံတက့ၢ်. နဘီနမုၢ်န့ၣ် မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢဟီၣ်ခိၣ်ချၢ စ့ၢ်ကီးဖဲဒၣ်နသးတက့ၢ်.” (ဖး မးသဲ ၆:၉-၁၃ တက့ၢ်.) ဘၣ်မနုၤအဃိ ယ့ၣ်ၡူးသိၣ်လိပှၤလၢ ပကဘၣ်ဃ့ထုကဖၣ်လၢ တၢ်ဂ့ၢ်သၢခါအံၤအဂီၢ်လဲၣ်.—ကွၢ်တၢ်ဂ့ၢ် ၁၉ လၢလံာ်အကတၢၢ်တက့ၢ်.
၃. ဘၣ်ဃးဒီးယွၤအဘီအမုၢ်န့ၣ် ပကဘၣ်သ့ၣ်ညါတၢ်ဂ့ၢ်မနုၤလဲၣ်.
၃ ပမၤလိဘၣ်လၢ ကစၢ်ယွၤအမံၤန့ၣ် မ့ၢ်ယဟိဝၤလီၤ. ဒီးပမၤလိဘၣ်တၢ်ဂ့ၢ်ဘၣ်ဃးဒီး ကစၢ်ယွၤအတၢ်ဘၣ်သးလၢ ဟီၣ်ခိၣ် ဒီးပှၤဟီၣ်ခိၣ်ဖိအဂီၢ်စ့ၢ်ကီးလီၤ. ဖဲယ့ၣ်ၡူးစံးဝဲလၢ– “နဘီနမုၢ်န့ၣ် မ်အဟဲတက့ၢ်” န့ၣ်မ့ၢ်အဝဲအဲၣ်ဒိးစံးဝဲတၢ်မနုၤလဲၣ်. တၢ်မၤလိတခါအံၤအပူၤ ပကမၤလိဘၣ်လၢ ကစၢ်ယွၤအဘီအမုၢ်န့ၣ် မ့ၢ်တၢ်မနုၤလဲၣ်, ဘီမုၢ်အံၤကမၤတၢ်မနုၤလဲၣ် ဒီးဘီမုၢ်အံၤ ကပာ်စီဆှံယွၤအမံၤလၢကျဲဒ်လဲၣ်န့ၣ်လီၤ.
ယွၤအဘီအမုၢ်န့ၣ် မ့ၢ်မနုၤလဲၣ်
၄. ယွၤအဘီအမုၢ်န့ၣ် မ့ၢ်တၢ်မနုၤလဲၣ်, ဒီးဘီမုၢ်အံၤအစီၤပၤ မ့ၢ်မတၤတဂၤလဲၣ်.
၄ ယဟိဝၤယွၤ ဒုးအိၣ်ထီၣ်ဝဲတၢ်ပၢတၢ်ပြးတခါလၢမူခိၣ် ဒီးအဝဲဃုထၢထီၣ်ယ့ၣ်ၡူးလၢစီၤပၤ ဒ်သိးကပၢတၢ်လၢမူခိၣ်လီၤ. လံာ်စီဆှံကိးဝဲတၢ်ပၢတၢ်ပြးတခါအံၤလၢယွၤအဘီအမုၢ်န့ၣ်လီၤ. ယ့ၣ်ၡူးန့ၣ် မ့ၢ် “စီၤပၤတဖၣ်အစီၤပၤ, ကစၢ်တဖၣ်အကစၢ်” လီၤ. (၁ တံၤမသ့း ၆:၁၅) ပှၤပၢတၢ်တဂၤဂ့ၤတဂၤဂ့ၤန့ၣ် မၤစၢၤပှၤဟီၣ်ခိၣ်ဖိ တသ့ထဲသိးဒီးယ့ၣ်ၡူးဘၣ်. ဒီးပှၤပၢတၢ်တဖၣ် မ့ၢ်ပာ်ဖှိၣ်ထီၣ်အသးဒီး မၤသကိးတၢ်ဒ်သိးသိးသနာ်က့ အစိကမီၤတဒိၣ်ထဲသိးဒီး ယ့ၣ်ၡူးဘၣ်.
၅. ယွၤအတၢ်ပၢတၢ်ပြးန့ၣ် အိၣ်လၢတၢ်လီၢ်ဖဲလဲၣ်, ဒီးကပၢဝဲတၢ်မနုၤလဲၣ်.
၅ ယ့ၣ်ၡူးဂဲၤဆၢထၢၣ်သမူထီၣ်က့ၤ ပူၤကွံာ်အသီလွံၢ်ဆံဝံၤအလီၢ်ခံ အဝဲက့ၤထီၣ်ဆူမူခိၣ်လီၤ. ဒီးလၢခံန့ၣ် ယဟိဝၤယွၤပာ်ထီၣ်အီၤလၢ ယွၤအဘီအမုၢ်အစီၤပၤလီၤ. (မၤတၢ် ၂:၃၃) ယွၤအတၢ်ပၢတၢ်ပြးအိၣ်လၢမူခိၣ်သနာ်က့ ကပၢဝဲဟီၣ်ခိၣ်ဒီဘ့ၣ်လီၤ. (လီၣ်ဖျါ ၁၁:၁၅) လၢတၢ်န့ၣ်အဃိ လံာ်စီဆှံကိးဝဲ ယွၤအဘီအမုၢ်အံၤလၢ ‘ဘီမုၢ်လၢမူခိၣ်’ လီၤ.—၂ တံၤမသ့း ၄:၁၈.
၆, ၇. ဘၣ်မနုၤအဃိယ့ၣ်ၡူးန့ၣ် ဂ့ၤန့ၢ်ဒံးပှၤဟီၣ်ခိၣ်ဖိအစီၤပၤတဖၣ်လဲၣ်.
၆ လံာ်စီဆှံစံးဝဲလၢ ယ့ၣ်ၡူးန့ၣ်ဒိၣ်န့ၢ်ဒံးစီၤပၤလၢ ဟီၣ်ခိၣ်ချၢကိးဂၤဒဲးလီၤ. မ့ၢ်လၢအဝဲမ့ၢ် “ပှၤလၢအသံတသ့ဘၣ် တဂၤ” အဃိလီၤ. (၁ တံၤမသ့း ၆:၁၆) ဒ်တၢ်ဆၢကတီၢ်လဲၤပူၤကွံာ်ဝဲအသိး ပှၤပၢတၢ်တဖၣ်သံဝဲ ဘၣ်ဆၣ်ယ့ၣ်ၡူးတသံဝဲနီတဘျီလၢၤဘၣ်. တၢ်ဂ့ၤတဖၣ်လၢယ့ၣ်ၡူးကမၤန့ၢ်ပှၤန့ၣ် ကအိၣ်ဂၢၢ်အိၣ်ကျၢၤဝဲ လီၤထူလီၤယိာ်လီၤ.
၇ ဝံအတၢ်စံးပာ်လၢ လံာ်စီဆှံအပူၤန့ၣ်ပာ်ဖျါထီၣ်ဝဲလၢ ယ့ၣ်ၡူးကမ့ၢ်စီၤပၤလၢ အအိၣ်ဒီးတၢ်သးကညီၤဒီး ကစံၣ်ညီၣ်တၢ်တီတီလိၤလိၤလီၤ. လံာ်စီဆှံစံးဝဲလၢ “ဒီးယွၤအသးကအိၣ်ဘှံးလၢအလိၤ, တၢ်ကူၣ်သ့ဒီးတၢ်သူၣ်ဆးသးဆးအသး, တၢ်ကူၣ်လိာ်ဒီးတၢ်အစိအကမီၤအသး, တၢ်သ့ၣ်ညါအသး, ဒီးတၢ်ပျံၤယွၤအသးလီၤ. ဒီးကမုာ်လၤတၢ်လၢ တၢ်ပျံၤယွၤအပူၤ, ဒီးတစံၣ်ညီၣ်ဘၣ်တၢ်ဒ် တၢ်လၢအထံၣ်လၢအမဲာ်အသိးဘၣ်န့ၣ်, ဒီးတစံၣ်ညီၣ်တဲာ်ဘၣ်တၢ်ဒ် တၢ်လၢအနၢ်ဟူလၢအနၢ်အသိးဘၣ်. ဒီးကစံၣ်ညီၣ်ပှၤဖှီၣ်ဖိယာ်ဖိလၢ တၢ်တီ” လီၤ. (ယၡါယၤ ၁၁:၂-၄) မ့ၢ်နအဲၣ်ဒိးလၢနစီၤပၤန့ၣ် ကမ့ၢ်ပှၤဒ်အံၤဧါ.
၈. ယ့ၣ်ၡူးတပၢတၢ်ထဲတဂၤဧိၤန့ၣ် ပသ့ၣ်ညါဘၣ်ဒ်လဲၣ်.
၈ ကစၢ်ယွၤဃုထၢထီၣ်ဝဲ ပှၤဟီၣ်ခိၣ်ဖိတနီၤလၢ ကပၢဃုာ်တၢ်ဒီးယ့ၣ်ၡူး လၢယွၤအတၢ်ပၢတၢ်ပြးလၢ မူခိၣ်န့ၣ်လီၤ. အဒိ တၢ်မၢဖိပီလူးတဲဘၣ် စီၤတံၤမသ့းလၢ– “ပမ့ၢ်ဝံသးစူၤတၢ်ဒီး, ပကကဲဃုာ်စီၤပၤဒီးအီၤ စ့ၢ်ကီးလီၤ.” (၂ တံၤမသ့း ၂:၁၂) ပှၤကပၢဃုာ်တၢ်ဒီး ယ့ၣ်ၡူးဒ်စီၤပၤအသိးန့ၣ် ကအိၣ်ဝဲပှဲၤဂၤလဲၣ်.
၉. ပှၤကပၢဃုာ်တၢ်ဒီးယ့ၣ်ၡူး အိၣ်ပှဲၤဂၤလဲၣ်, ဒီးကစၢ်ယွၤစးထီၣ်ဃုထၢ အဝဲသ့ၣ်လၢ ဆၢကတီၢ်ဖဲလဲၣ်.
၉ ဒ်ပမၤလိဘၣ်လၢ တၢ်မၤလိ ၇ အပူၤအသိးန့ၣ် တၢ်မၢဖိယိၤဟၣ်ထံၣ်ဘၣ်တၢ်ထံၣ်လၢညါခီ လၢအပာ်ဖျါထီၣ်ဝဲ ယ့ၣ်ၡူးကဲစီၤပၤလၢမူခိၣ်ဒီး စီၤပၤအဂၤသ့ၣ်တဖၣ် အိၣ်ဒီးအီၤလီၤ. ဒီးအဝဲသ့ၣ်အနီၣ်ဂံၢ်အိၣ်ဝဲ ၁၄၄,၀၀၀ လီၤ. ပှၤ ၁၄၄,၀၀၀ န့ၣ်မ့ၢ်မတၤသ့ၣ်တဖၣ်လဲၣ်. စီၤယိၤဟၣ်တဲဖျါထီၣ်ဝဲလၢ အဝဲသ့ၣ် “အိၣ်ဒီး [ယ့ၣ်ၡူး] အမံၤ ဒီးအပၢ်အမံၤကွဲးအသးလၢ အမဲာ်တူၢ်ခိၣ်” န့ၣ်လီၤ. ဒီးစီၤယိၤဟၣ်စံးစ့ၢ်ကီးဝဲလၢ– “ပှၤတဖၣ်န့ၣ် မ့ၢ်ပှၤလၢအပိာ်သိဖိအခံ, ဖဲအဆှၢအီၤတပူၤလၢ်လၢ်လီၤ. ပှၤတဖၣ်န့ၣ်, မ့ၢ်ပှၤလၢတၢ်ပှ့ၤက့ၤအီၤလၢ ပှၤကညီအကျါ” လီၤ. (ဖး လီၣ်ဖျါ ၁၄:၁, ၄ တက့ၢ်.) ပှၤ ၁၄၄,၀၀၀ တဖၣ်အံၤ လံာ်စီဆှံစံးဝဲလၢ အဝဲသ့ၣ် “ကပၢတၢ်ဒီးခရံာ်” လီၤ. အဝဲသ့ၣ်တဖၣ်န့ၣ် မ့ၢ်ခရံာ်ဖိလၢ အတီလၢ ကစၢ်ယွၤဃုထၢထီၣ်ဝဲ ဒ်သိးကကဲထီၣ်စီၤပၤတဖၣ် ဃုာ်ဒီးယ့ၣ်ၡူးခရံာ် ဒီးကပၢဟီၣ်ခိၣ်ဒီဘ့ၣ်န့ၣ်လီၤ. ဖဲအဝဲသ့ၣ်သံအဆၢကတီၢ်န့ၣ် ဂဲၤဆၢထၢၣ်သမူထီၣ်က့ၤဝဲဆူ မူခိၣ်လီၤ. (လီၣ်ဖျါ ၂၀:၆, ခ့ခါစှီၤကျိာ်) စးထီၣ်လၢတၢ်မၢဖိအစိၤတုၤလီၤလၢအဆၢကတီၢ်ခဲအံၤန့ၣ် ယဟိဝၤယွၤ ဃုထၢထီၣ်ဝဲ ပှၤလၢအသးတီဒီးအီၤတဖၣ် ဒ်သိးအဝဲသ့ၣ်ကပၣ်ဃုာ်လၢ ပှၤ ၁၄၄,၀၀၀ တဖၣ်အံၤအကျါန့ၣ်လီၤ.
၁၀. ယဟိဝၤယွၤဃုထၢထီၣ် ယ့ၣ်ၡူးဒီးပှၤ ၁၄၄,၀၀၀ လၢကပၢပှၤဟီၣ်ခိၣ်ဖိန့ၣ် ဘၣ်မနုၤအဃိ မ့ၢ်တၢ်ရဲၣ်တၢ်ကျဲၤလၢ အပှဲၤဒီးတၢ်အဲၣ်တၢ်ကွံလဲၣ်.
၁၀ ယဟိဝၤယွၤသးအိၣ်ပှၤဒိၣ်မးအဃိ အဝဲရဲၣ်ကျဲၤဝဲလၢ ပှၤဟီၣ်ခိၣ်ဖိတနီၤ ကပၢဃုာ်တၢ်ဒီးယ့ၣ်ၡူးန့ၣ်လီၤ. ယ့ၣ်ၡူးကမ့ၢ်ပှၤပၢတၢ်လၢ အဂ့ၤတဂၤ မ့ၢ်လၢအဝဲနၢ်ပၢၢ်ဝဲ ပတၢ်အိၣ်သးအဃိလီၤ. ယ့ၣ်ၡူးမ့ၢ်တ့ၢ်ပှၤဟီၣ်ခိၣ်ဖိအဃိ အဝဲနၢ်ပၢၢ်ဝဲ ပှၤဟီၣ်ခိၣ်ဖိအတၢ်အိၣ်သးဒီး အဝဲတူၢ်ဘၣ်ဝဲတၢ်နးတၢ်ဖှီၣ်ဒ် ပဝဲဒၣ်အသိးန့ၣ်လီၤ. စီၤပီလူးတဲဝဲလၢ ယ့ၣ်ၡူးအိၣ်ဒီးတၢ်ဒိသူၣ်ဒိသးလၢ ပဖီခိၣ်လီၤ. အဝဲ “သးကညီၤပဂံၢ်စၢ်ဘါစၢ်” ဒီး အဝဲ “ဘၣ်တၢ်လ့ပစီကိးအမံၤဒဲး ဒ်ပဝဲအသိး” န့ၣ်လီၤ. (ဧ့ၤဘြံၤ ၄:၁၅; ၅:၈) ပှၤ ၁၄၄,၀၀၀ စ့ၢ်ကီးနၢ်ပၢၢ်ဝဲ ပှၤဟီၣ်ခိၣ်ဖိအတၢ်အိၣ်သး မ့ၢ်လၢအဝဲသ့ၣ်ကွၢ်ဆၢၣ်မဲာ်ဘၣ်ဝဲ တၢ်ဆူးတၢ်ဆါဒီး တၢ်တလၢတပှဲၤအဃိလီၤ. လၢတၢ်န့ၣ်အဃိ ပနာ်သ့လၢယ့ၣ်ၡူးဒီးပှၤ ၁၄၄,၀၀၀ န့ၣ်နၢ်ပၢၢ်ဝဲပတၢ်တူၢ်ဘၣ် ဒီးတၢ်ကီတၢ်ခဲလၢ ပထံၣ်ဘၣ်လၢမုၢ်မဆါတနံၤအံၤန့ၣ်လီၤ.
ကစၢ်ယွၤအဘီအမုၢ် ကမၤတၢ်မနုၤလဲၣ်
၁၁. ဘၣ်မနုၤအဃိ ယ့ၣ်ၡူးသိၣ်လိအပျဲၢ်အဘီၣ်တဖၣ်လၢ ကဃ့ဘါထုကဖၣ်ဝဲလၢ ယွၤအတၢ်ဘၣ်သး ကဟဲလၢထီၣ်ပှဲၤထီၣ်ဝဲလၢမူခိၣ်န့ၣ်လဲၣ်.
၁၁ ယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ အဝဲသ့ၣ်ကဃ့ဘါထုကဖၣ်ဝဲဒ်သိး ယွၤအတၢ်ဘၣ်သး ကဟဲလၢပှဲၤထီၣ်လၢမူခိၣ်အဂီၢ်န့ၣ်လီၤ. ဘၣ်မနုၤအဃိလဲၣ်. ပမၤလိဘၣ်ဖဲတၢ်မၤလိ ၃ အပူၤန့ၣ် မုၣ်ကီၤလံၢ်စးထီၣ်ထီဒါဝဲ ယဟိဝၤယွၤလီၤ. ဖဲမုၣ်ကီၤလံၢ် ထီဒါတၢ်ဝံၤအလီၢ်ခံန့ၣ် ယဟိဝၤယွၤဟ့ၣ်အီၤအခွဲးဃုာ်ဒီးမူခိၣ်ကလူးလၢ အတတီဒီးအီၤ လၢအမ့ၢ်တၢ်ဝံတၢ်နါတဖၣ် ဒ်သိးအဝဲသ့ၣ်ကအိၣ်ဒံးဝဲလၢ မူခိၣ်န့ၣ်လီၤ. လၢတၢ်န့ၣ်အဃိ ပသ့ၣ်ညါဘၣ်လၢ ပှၤအိၣ်လၢမူခိၣ်တဖၣ်န့ၣ် တမၤယွၤအတၢ်ဘၣ်သးကိးဂၤဒဲးဘၣ်. လၢတၢ်မၤလိ ၁၀ အပူၤန့ၣ်ပကမၤလိအါထီၣ်ဘၣ် မုၣ်ကီၤလံၢ်ဒီးတၢ်ဝံတၢ်နါတဖၣ်အဂ့ၢ်န့ၣ်လီၤ.
၁၂. လီၣ်ဖျါ ၁၂:၁၀ ပာ်ဖျါထီၣ်ဝဲတၢ်မၤအသး လၢအရ့ဒိၣ်ခံခါန့ၣ် မ့ၢ်မနုၤလဲၣ်.
၁၂ လံာ်စီဆှံပာ်ဖျါထီၣ်ဝဲ ဖဲယ့ၣ်ၡူးကဲထီၣ်စီၤပၤလၢ ယွၤအဘီအမုၢ်အပူၤ ဝံၤအလီၢ်ခံန့ၣ် အဝဲဒုးတၢ်ဒီးမုၣ်ကီၤလံၢ်န့ၣ်လီၤ. (ဖး လီၣ်ဖျါ ၁၂:၇-၁၀ တက့ၢ်.) ဖဲအဆၢဖိ ၁၀ န့ၣ်ပာ်ဖျါထီၣ်ဝဲ တၢ်မၤအသးလၢ အရ့ဒိၣ်ခံမံၤန့ၣ်လီၤ. တၢတမံၤန့ၣ် ယွၤအဘီအမုၢ် အတၢ်ပၢတၢ်ပြး သူၣ်ထီၣ်အသးလၢမူခိၣ် ဒီးယ့ၣ်ၡူးစးထီၣ်ပၢတၢ်ဒ်စီၤပၤအသိးလီၤ. ဒီးခံမံၤတမံၤန့ၣ် ယ့ၣ်ၡူးတ့ၢ်လီၤကွံာ် မုၣ်ကီၤလံၢ်လၢဟီၣ်ခိၣ်ချၢလီၤ. ပကမၤလိဘၣ်လၢ တၢ်မၤအသးသ့ၣ်တဖၣ်အံၤ ဟဲကဲထီၣ်တ့ၢ်လံအသးလံန့ၣ်လီၤ.
၁၃. ဖဲတၢ်တ့ၢ်လီၤကွံာ်မုၣ်ကီၤလံၢ်လၢ ဟီၣ်ခိၣ်ချၢဝံၤအလီၢ်ခံ တၢ်မၤအသးလၢ မူခိၣ်ဒ်လဲၣ်.
၁၃ လံာ်စီဆှံပာ်ဖျါထီၣ်ဝဲလၢ ဖဲတၢ်တ့ၢ်လီၤကွံာ်မုၣ်ကီၤလံၢ်ဒီး အတၢ်နါတဖၣ် လၢဟီၣ်ခိၣ်ချၢဝံၤအလီၢ်ခံ မူခိၣ်ကလူးလၢအတီအလိၤတဖၣ်န့ၣ် ပှဲၤဒီးတၢ်သူၣ်ဖှံသးညီလီၤ. ပဖးဘၣ်လၢ– “မူခိၣ်, ဒီးပှၤအိၣ်လၢအပူၤသ့ၣ်ဧၢ, သးခုတက့ၢ်.” (လီၣ်ဖျါ ၁၂:၁၂) ဆၢကတီၢ်ခဲအံၤ မူခိၣ်ပှဲၤဝဲဒီး တၢ်မုာ်တၢ်ခုၣ်ဒီး တၢ်ဃူတၢ်ဖိးလီၤ. မ့ၢ်လၢပှၤကိးဂၤဒဲး အိၣ်မူဝဲဒ်ကစၢ်ယွၤအတၢ်ဘၣ်သးအဃိလီၤ.
စးထီၣ်ဖဲ မုၣ်ကီၤလံၢ်ဒီးအတၢ်ဝံတၢ်နါတဖၣ် ဘၣ်တၢ်တ့ၢ်လီၤကွံာ်အီၤဆူ ဟီၣ်ခိၣ်ချၢ အဆၢကတီၢ်န့ၣ် တၢ်အၢတၢ်သီဒီး တၢ်နးတၢ်ဖှီၣ်အါထီၣ်ဝဲလီၤ. တယံာ်တမီၢ်န့ၣ် တၢ်သ့ၣ်တဖၣ်အံၤ ကကတၢၢ်ကွံာ်ဝဲလီၤ
၁၄. ဖဲတၢ်တ့ၢ်လီၤမုၣ်ကီၤလံၢ်ဆူ ဟီၣ်ခိၣ်ချၢအခါ တၢ်မၤအသးလၢဟီၣ်ခိၣ်အံၤဒ်လဲၣ်.
၁၄ ဘၣ်ဆၣ်တၢ်အိၣ်မူလၢ ဟီၣ်ခိၣ်ချၢအံၤအိၣ်ပှဲၤဒီး တၢ်ဘၣ်ယိၣ်ဘၣ်ဘှီလီၤ. ပှၤဟီၣ်ခိၣ်ဖိတဖၣ် ကွၢ်ဆၢၣ်မဲာ်ဘၣ်ဝဲ တၢ်လၢအလီၤဘၣ်ယိၣ်ဘၣ်ဘှီတဖၣ် မ့ၢ်လၢ “မုၣ်ကီၤလံၢ်သ့ၣ်ညါလၢ အဆၢအကတီၢ်အိၣ်ထဲ တစိၢ်ဖိသတးဒီး, ဟဲလီၤဝဲဆူသုအိၣ်, အိၣ်ဒီးအသးဒိၣ်ထီၣ်ဒိၣ်မးလီၤ.” (လီၣ်ဖျါ ၁၂:၁၂) မုၣ်ကီၤလံၢ် သးပှံၢ်ထီၣ်ဝဲလီၤ. အဝဲဘၣ်တၢ်တ့ၢ်လီၤအီၤဆူ ဟီၣ်ခိၣ်ချၢ ဒီးအဝဲသ့ၣ်ညါဝဲလၢ တယံာ်လၢၤဘၣ်န့ၣ် တၢ်ကမၤဟးဂီၤကွံာ်အီၤန့ၣ်လီၤ. လၢတၢ်န့ၣ်အဃိ အဝဲဂုာ်ကျဲးစၢးဝဲတသ့ဖဲအသ့ ဒ်သိးကဒုးအိၣ်ထီၣ်ဝဲ တၢ်ကီတၢ်ခဲ, တၢ်ဆူးတၢ်ဆါ ဒီးတၢ်နးတၢ်ဖှီၣ်လၢ ဟီၣ်ခိၣ်ဒီဘ့ၣ်န့ၣ်လီၤ.
၁၅. ကစၢ်ယွၤဘၣ်အသးလၢ ဟီၣ်ခိၣ်ကကဲထီၣ်အသးဒ်လဲၣ်.
၁၅ ဘၣ်ဆၣ် ကစၢ်ယွၤအတၢ်ဘၣ်သးလၢ ဟီၣ်ခိၣ်အဂီၢ်န့ၣ် တဆီတလဲဝဲနီတဘျီဘၣ်. အဝဲအဲၣ်ဒိးဒံးဝဲလၢ ပှၤဟီၣ်ခိၣ်ဖိလၢ အလၢအပှဲၤတဖၣ်န့ၣ် ကအိၣ်မူဘၣ်လၢ ဟီၣ်ခိၣ်ပၤရဒံစူးအပူၤလီၤထူလီၤယိာ်န့ၣ်လီၤ. (စံးထီၣ်ပတြၢၤ ၃၇:၂၉) မ့မ့ၢ်ဒ်န့ၣ်န့ၣ် ယွၤအဘီအမုၢ် ကမၤလၢပှဲၤထီၣ်ဝဲယွၤအတၢ်ဘၣ်သး လၢကျဲဒ်လဲၣ်.
၁၆, ၁၇. ဘၣ်ဃးဒီး ယွၤအဘီအမုၢ်န့ၣ် ဒၤနံးယ့လး ၂:၄၄ ဒုးသ့ၣ်ညါပှၤတၢ်မနုၤလဲၣ်.
၁၆ ဒၤနံးယ့လး ၂:၄၄ စံးဝဲလၢ– “တၢ်လၢစီၤပၤတဖၣ်န့ၣ် အမုၢ်နံၤအတီၢ်ပူၤ, မူခိၣ်အကစၢ်ကပာ်လီၤဘီမုၢ်တဘီမုၢ် လၢအတဟးဂီၤဘၣ်လီၤထူလီၤယိာ်ဘၣ်. ဒီးဘီမုၢ်န့ၣ်တအိၣ်လီၤတဲာ်ဘၣ်လၢ ပှၤအဂၤတကလုာ်အဂီၢ်ဘၣ်. ကမၤလီၤကလဲ, ဒီးကမၤလၢာ်ကွံာ်ဘီမုၢ်ခဲလၢာ်လီၤ. မ့မ့ၢ်အဝဲန့ၣ် ကအိၣ်လီၤထူလီၤယိာ်လီၤ.” ဘၣ်ဃးဒီးယွၤအဘီအမုၢ်န့ၣ် ဝံအတၢ်စံးပာ်အံၤ ဒုးသ့ၣ်ညါပှၤတၢ်မနုၤလဲၣ်.
၁၇ တၢ်ဂ့ၢ်တၢတမံၤန့ၣ် လံာ်စီဆှံအဆၢအံၤပာ်ဖျါထီၣ်ဝဲလၢ ယွၤအဘီအမုၢ်စးထီၣ်ပၢတၢ်လၢ “စီၤပၤတဖၣ်န့ၣ် အမုၢ်နံၤအတီၢ်ပူၤ” လီၤ. တၢ်အံၤအခီပညီမ့ၢ်ဝဲ ဖဲယွၤအဘီအမုၢ်စးထီၣ်ပၢတၢ်န့ၣ် ဟီၣ်ခိၣ်အတၢ်ပၢတၢ်ပြးတဖၣ် တလီၤမၢ်ဝဲဒံးဘၣ်. တၢ်ဂ့ၢ်ခံမံၤတမံၤန့ၣ် ယွၤအဘီအမုၢ်ကအိၣ်ဝဲလီၤထူလီၤယိာ်ဒီး တၢ်ပၢတၢ်ပြးလၢအဂၤတဖၣ် နုာ်လီၤလၢအလီၢ်တသ့နီတခါဘၣ်. သၢမံၤတမံၤန့ၣ် ယွၤအဘီအမုၢ် ကဒုးတၢ်ဒီး ဟီၣ်ခိၣ်အပဒိၣ်ပပှၢ်သ့ၣ်တဖၣ်လီၤ. ယွၤအဘီအမုၢ်န့ၣ် ကမၤနၢၤတၢ် ဒီးကမ့ၢ်ဝဲ တၢ်ပၢတၢ်ပြးထဲတခါဧိၤလၢ အကပၢဟီၣ်ခိၣ်န့ၣ်လီၤ. ဖဲန့ၣ်အဆၢကတီၢ် ပှၤဟီၣ်ခိၣ်ဖိတဖၣ် ကဒိးန့ၢ်ဘၣ်ဝဲ တၢ်ပၢတၢ်ပြးလၢ အဂ့ၤကတၢၢ်လီၤ.
၁၈. တၢ်ဒုးတၢ်ယၤလၢခံကတၢၢ်တခါန့ၣ် ဘၣ်တၢ်ကိးအီၤဒ်လဲၣ်.
၁၈ ယွၤအဘီအမုၢ် ကပၢက့ၤတၢ်လၢ ဟီၣ်ခိၣ်အတၢ်ပၢတၢ်ပြးအလီၢ်ဒ်လဲၣ်. တချုးလၢ တၢ်ဒုးအလီၢ်ခံကတၢၢ် လၢအမ့ၢ်အၢ်မက့းဒိၣ်န့ၣ် တၢ်ဝံတၢ်နါတဖၣ်ကကွဲန့ၢ်လွဲန့ၢ်တၢ်ဒီး “လဲၤထီၣ်ဝဲဆူ စီၤပၤလၢဟီၣ်ခိၣ်ချၢခဲလၢာ်အအိၣ်, ဒ်သိးအကဒုးအိၣ်ဖှိၣ်ရိဖှိၣ်အီၤဆူ တၢ်ဒုးတၢ်ယၤဘၣ်ဃးဒီးယွၤလၢ အသ့တၢ်လၢာ်အနံၤဖးဒိၣ်လီၤ.” ဖဲန့ၣ်အခါန့ၣ်ဟီၣ်ခိၣ်အတၢ်ပၢတၢ်ပြးတဖၣ်ကဒုးတၢ်ဒီး ယွၤအဘီအမုၢ်န့ၣ်လီၤ.—လီၣ်ဖျါ ၁၆:၁၄, ၁၆; ကွၢ်တၢ်ဂ့ၢ် ၁၀ လၢလံာ်အကတၢၢ်တက့ၢ်.
၁၉, ၂၀. ဘၣ်မနုၤအဃိ ပလိၣ်ဘၣ်လၢ ယွၤအဘီအမုၢ်န့ၣ်ကပၢဟီၣ်ခိၣ်လဲၣ်.
၁၉ ဘၣ်မနုၤအဃိ ပလိၣ်ဘၣ်ယွၤအဘီအမုၢ်လဲၣ်. ခီဖျိလၢတၢ်ဂ့ၢ်သၢမံၤအံၤအဃိ ပလိၣ်ဘၣ်ယွၤအဘီအမုၢ်လီၤ. တၢတမံၤန့ၣ် ပမ့ၢ်ပှၤတၢ်ဒဲးဘးဖိအဃိ ပဘၣ်ဆူးဘၣ်ဆါဒီး ဘၣ်သံဝဲလီၤ. ဘၣ်ဆၣ်လံာ်စီဆှံစံးဝဲလၢ ယွၤအဘီအမုၢ်အဖီလာ်န့ၣ် ပကအိၣ်မူဘၣ်လီၤထူလီၤယိာ်လီၤ. ဒ် ယိၤဟၣ် ၃:၁၆ စံးဝဲအသိး– “ယွၤအဲၣ်ဟီၣ်ခိၣ်ဖိ တုၤအဟ့ၣ်လီၤကွံာ်အဖိခွါအိၣ်တဂၤဃီ, ဒ်သိးကယဲၢ်ပှၤလၢအစူၢ်က့ၤနာ်က့ၤအီၤ တဂၤလၢ်လၢ်န့ၣ်, အသုတဟးဂီၤတဂ့ၤဒီး, ကန့ၢ်ဘၣ်တၢ်မူအထူအယိာ်လီၤ.”
၂၀ ခံမံၤတမံၤန့ၣ် ပလိၣ်ဘၣ်ယွၤအဘီအမုၢ် မ့ၢ်လၢပှၤအၢပှၤသီတဖၣ် အိၣ်ဝးတရံးပှၤအဃိလီၤ. ပှၤအါဂၤလံၣ်တၢ်လီတၢ်, မၤတၢ်တတီတလိၤ ဒီးအဝဲသ့ၣ်အလုၢ်လၢ်သကဲာ်ပဝးသ့ၣ်တဖၣ် ဘၣ်အၢဘၣ်သီဝဲဒိၣ်မးလီၤ. တၢ်ဂ့ၢ်ကီတဖၣ်အံၤ ပမၤကတၢၢ်ကွံာ်အီၤတသ့ဘၣ်. ဘၣ်ဆၣ်ကစၢ်ယွၤမၤဝဲသ့လီၤ. ပှၤဟီၣ်ခိၣ်ဖိလၢ အဆဲးမၤဝဲတၢ်အၢတၢ်သီသ့ၣ်တဖၣ်န့ၣ် တၢ်ကမၤဟးဂီၤကွံာ်အဝဲသ့ၣ်ဖဲ အၢ်မက့းဒိၣ်အဆၢကတီၢ်န့ၣ်လီၤ. (ဖး စံးထီၣ်ပတြၢၤ ၃၇:၁၀ တက့ၢ်.) သၢမံၤတမံၤန့ၣ် ပလိၣ်ဘၣ်ယွၤအဘီအမုၢ် မ့ၢ်လၢပှၤပၢတၢ်တဖၣ်န့ၣ် မၤတၢ်တတီတလိၤ, တအိၣ်ဒီးတၢ်သးကညီၤဒီး တအိၣ်ဒီးတၢ်စိတၢ်ကမီၤလၢ ကမၤစၢၤပှၤဟီၣ်ခိၣ်ဖိလၢလၢပှဲၤပှဲၤအဃိန့ၣ်လီၤ. လံာ်စီဆှံစံးဝဲလၢ “ပှၤပၢပှၤဂၤလၢ အတၢ်အၢအဂီၢ်လီၤ.”—စံၣ်တဲၤတဲလီၤတၢ် ၈:၉.
၂၁. ဒ်သိးကစၢ်ယွၤအတၢ်ဘၣ်သး ကဟဲလၢထီၣ်ပှဲၤထီၣ်ဝဲလၢ ဟီၣ်ခိၣ်ချၢအဂီၢ် ယွၤအဘီအမုၢ်ကမၤဝဲဒ်လဲၣ်.
၂၁ အၢ်မက့းဒိၣ်ဝံၤအလီၢ်ခံန့ၣ် ယွၤအဘီအမုၢ် ကမၤလၢထီၣ်ပှဲၤထီၣ်ဝဲ ယွၤအတၢ်ဘၣ်သးလၢ ဟီၣ်ခိၣ်ချၢန့ၣ်လီၤ. အဒိ ဘီမုၢ်အံၤ ကမၤလီၤမၢ်ကွံာ်ဝဲ မုၣ်ကီၤလံၢ်ဒီး အတၢ်ဝံတၢ်နါတဖၣ်န့ၣ်လီၤ. (လီၣ်ဖျါ ၂၀:၁-၃) လၢခံန့ၣ် ပှၤဟီၣ်ခိၣ်ဖိတဖၣ် တဆူးတဆါဒီး တသံဝဲလၢၤဘၣ်. ခီဖျိလၢတၢ်ပှ့ၤက့ၤအဃိ ပှၤဟီၣ်ခိၣ်ဖိလၢ အတီအလိၤတဖၣ် ကအိၣ်မူဘၣ်လၢ ပၤရဒံစူးအပူၤလီၤထူလီၤယိာ်လီၤ. (လီၣ်ဖျါ ၂၂:၁-၃) ဘီမုၢ်အံၤကပာ်စီဆှံ ကစၢ်ယွၤအမံၤလီၤ. တၢ်အံၤအဲၣ်ဒိးစံးဝဲအခီပညီဒ်လဲၣ်. အဲၣ်ဒိးစံးဝဲ ဖဲယွၤအတၢ်ပၢတၢ်ပြး ပၢဝဲဟီၣ်ခိၣ်အခါ ပှၤဟီၣ်ခိၣ်ဖိကိးဂၤဒဲးန့ၣ် ကမၤလၤကပီၤယွၤအမံၤလီၤ.—ကွၢ်တၢ်ဂ့ၢ် ၂၀ လၢလံာ်အကတၢၢ်တက့ၢ်.
ယ့ၣ်ၡူးကဲထီၣ်စီၤပၤလၢ ဆၢကတီၢ်ဖဲလဲၣ်
၂၂. ဖဲယ့ၣ်ၡူးက့ၤထီၣ်ဆူမူခိၣ် ဝံၤအလီၢ်ခံ အဝဲတကဲထီၣ်ဘၣ် စီၤပၤတဘျီဃီဘၣ်န့ၣ် ပသ့ၣ်ညါဘၣ်ဒ်လဲၣ်.
၂၂ ယ့ၣ်ၡူးသိၣ်လိအပျဲၢ်အဘီၣ်လၢ ကဃ့ဘါထုကဖၣ်ဝဲလၢ– “နဘီနမုၢ်န့ၣ် မ်အဟဲတက့ၢ်.” ယ့ၣ်ၡူးအတၢ်ကတိၤတဖၣ်အံၤ ပာ်ဖျါထီၣ်ဝဲလီၤတံၢ်လီၤဆဲးလၢ ယွၤအတၢ်ပၢတၢ်ပြး ကသူၣ်လီၤအသးလၢ ခါဆူညါန့ၣ်လီၤ. အဆိကတၢၢ်န့ၣ် ယဟိဝၤယွၤကသူၣ်ထီၣ် အဘီအမုၢ်အတၢ်ပၢ ဒီးကဒုးကဲထီၣ်ယ့ၣ်ၡူးလၢ စီၤပၤလီၤ. ဘၣ်ဆၣ်သနာ်က့ ဖဲယ့ၣ်ၡူးက့ၤထီၣ်ဆူမူခိၣ်အဆၢကတီၢ် မ့ၢ်အဝဲကဲထီၣ်စီၤပၤတဘျီဃီဧါ. တမ့ၢ်ဘၣ်. အဝဲဘၣ်အိၣ်ခိးဝဲလီၤ. ဖဲယ့ၣ်ၡူးဂဲၤဆၢထၢၣ်သမူထီၣ်က့ၤ ဝံၤအလီၢ်ခံ စီၤပ့းတရူးဒီးစီၤပီလူး စံးဝဲလၢ ယ့ၣ်ၡူးမၤလၢထီၣ်ပှဲၤထီၣ်ဝဲ ဝံအတၢ်စံးပာ်ဖဲ စံးထီၣ်ပတြၢၤ ၁၁၀:၁ န့ၣ်လီၤ. လၢလံာ်စီဆှံတဆၢအံၤအပူၤ ယဟိဝၤယွၤစံးဝဲလၢ– “ဆ့ၣ်နီၤလၢယစုထွဲ, တုၤယပာ်နဒုၣ်နဒါလၢ နခီၣ်ယီၢ်လီၢ်န့ၣ်တက့ၢ်.” (မၤတၢ် ၂:၃၂-၃၅; ဧ့ၤဘြံၤ ၁၀:၁၂, ၁၃) မ့မ့ၢ်ဒ်န့ၣ်န့ၣ် ယဟိဝၤယွၤ ကဒုးကဲထီၣ်အီၤလၢစီၤပၤအဂီၢ်န့ၣ် ယ့ၣ်ၡူးဘၣ်အိၣ်ခိးဝဲ ဆံးယံာ်လဲၣ်.
ယွၤအဘီအမုၢ် ကမၤလၢထီၣ်ပှဲၤထီၣ်ဝဲ ကစၢ်ယွၤအတၢ်ဘၣ်သးလၢဟီၣ်ခိၣ်ချၢ
၂၃. (က) ယ့ၣ်ၡူးစးထီၣ်ပၢတၢ် ဒ်စီၤပၤတဂၤလၢ ယွၤအတၢ်ပၢတၢ်ပြးအပူၤ လၢဆၢကတီၢ်ဖဲလဲၣ်. (ခ) တၢ်မၤလိလၢခံတခါန့ၣ် ပကမၤလိသကိး တၢ်ဂ့ၢ်မနုၤလဲၣ်.
၂၃ ခရံာ်ဖိလၢအသူၣ်ဘျၢသးဘျၢတကရူၢ် နၢ်ပၢၢ်ထီၣ်ဝဲ လံာ်စီဆှံအတၢ်စံးပာ် ဒီးတဲဖျါထီၣ်ဝဲလၢ ၁၉၁၄ န့ၣ်မ့ၢ်နံၣ်လၢအရ့ဒိၣ်တနံၣ်န့ၣ်လီၤ. စးထီၣ်လၢ ၁၉၁၄ နံၣ်တုၤခဲအံၤန့ၣ် ဟီၣ်ခိၣ်တၢ်မၤအသးတဖၣ် ပာ်ဖျါထီၣ်ဝဲလၢ အဝဲသ့ၣ်တဲတၢ်န့ၣ် ဘၣ်ဝဲလီၤ. ဒီးနံၣ်အဝဲန့ၣ် ယ့ၣ်ၡူးစးထီၣ်ပၢတၢ်ဒ်စီၤပၤန့ၣ်လီၤ. (စံးထီၣ်ပတြၢၤ ၁၁၀:၂) တၢ်န့ၣ်အလီၢ်ခံ တယံာ်ဘၣ်ဒီး တၢ်တ့ၢ်လီၤကွံာ်မုၣ်ကီၤလံၢ်လၢ ဟီၣ်ခိၣ် ဒီးခဲအံၤအဝဲ “အဆၢအကတီၢ်အိၣ်ထဲတစိၢ်ဖိ” လီၤ. (လီၣ်ဖျါ ၁၂:၁၂) တၢ်မၤလိလၢခံတခါန့ၣ် ပကမၤလိဘၣ်တၢ်ဂ့ၢ်အဂၤသ့ၣ်တဖၣ်လၢ အပာ်ဖျါထီၣ်ဝဲ လၢပအိၣ်မူဘၣ်လၢတၢ်ဆၢကတီၢ်အဝဲန့ၣ်လီၤ. ဒီးပကမၤလိဘၣ်စ့ၢ်ကီးလၢ တယံာ်တမီၢ်န့ၣ် ယွၤအဘီအမုၢ်ကမၤလၢထီၣ်ပှဲၤထီၣ်ဝဲ ယွၤအတၢ်ဘၣ်သးလၢဟီၣ်ခိၣ်ချၢန့ၣ်လီၤ.—ကွၢ်တၢ်ဂ့ၢ် ၂၁ လၢလံာ်အကတၢၢ်တက့ၢ်.
